السيناريوهات المحتملة تجاه طائرة الرئيس

Posted: الأحد,22 مارس, 2009 by ابكرون in سياسية

هناك احتمالان لا ثالث لهما هما ان يقرر الرئيس او مجلس الرئاسة سفره الي خارج البلاد لحضور مؤتمرا او للعلاج  (ولناخذ قمة الدوحة المنتظرة مثالا ) والاحتمال الثاني هو أن لا يسافر الرئيس ….ففي الحالة الثانية جنب الرئيس البلاد شرورا كثيره قد تدبر علي قرار المحكمة الجنائية الدوليه .

يهمنا في هذا التحليل الاحتمال الاول وهو حالة أن الدولة قد قررت سفر الرئيس لحضور هذه القمة او غيرها فهناك العديد من الاحتمالات والسيناريوهات المحتملة  التي قد تحاك ضد سفريته هذه، رغم ان تحركات الرئيس لحضور مؤتمر او لعلاج او غيره  قد تحاط بسرية كاملة من جانب الأمنيين السودانيين (بعد قرار لاهاي) وهم ضليعون في ذلك …كأن تخفي ساعة ويوم اقلاع الطائرة المقله له …او ان تحدث عمليات اقلاع لعدد من الرحلات الوهمية للتغطيه علي الرحلة الرئيسية التي بها الرئيس…وقد تستخدم رحلات لخطوط جويةعربية صديقة أخري كالقطرية او غيرها ….وقد ياتي الرئيس للقمه قبل يوم او يومين او قبل انعقادها بلحظات كل ذلك بغرض التمويه (وهنا يحسب حساب العملاء والاستخبارات المضادة في البلاد وخارجها)…وقد يسافر الرئيس في معية رئيس دولة اخري كالرئيس مبارك مثلا ويبرز هنا  سؤال  هل تقبل دولة عربية اخري ان تعرض امن رئيسها للخطر؟؟…لا اظن ذلك …..

في حالة تخطي كل العقبات التي ذكرت ووصل الرئيس للدولة المضيفة آمنا….تصبح المعضله في تامين تحركاته في البلد المضيف..وهذا امر قد يبدو  سهلا رغم أن الدولة المضيفة من واجبها ان تقوم  بتامين عدد كبير من الروساء…

غير ان رحلة العودة للبلاد (رحلة الإياب والتي لابد منها) هي المعضلة الكبري ….وهنا تكمن الصعوبة فليس الامر سهلا او يمكن تغطيته كرحلة الذهاب…خاصة وعيون واستخبارات الدول المتربصه لالقاء القبض عليه كاسرائيل والولايات المتحدة وفرنسا وبريطانيا مفتوحة (وهم متاكدون في هذه الحاله من مكان وجود الرئيس وموعد انتهاء المؤتمر الخ…)وهم ضليعون في عمليات الاختطاف والعمليات (القذرة ) الاخري…

عموما قد تعمل استخبارات الدول التي اشرت لها خاصة اسرائيل بالتنسيق مع الولايات النتحده في قراءة الموقف بوقت كاف  ونشر العيون وتحليل الاخبار ذات الصله بالموضوع.. من هنا تبدأ سيناريوهات تحويل مسار الرحلة أو ختطافها لجهة اخري…..فمن المرجح ان تهتم الجهات التي تريد تسليم الرئيس لمحكمة لاهاي بترصد خروجه من السودان وتُكَوَن لذلك غرفة عمليات دائمة تتبع تحركاته واخباره ..وتقوم بادارة المهام وهذه بدورها تُكِون قوة واجب جوي تساندها مجموعة واجب بحري او ارضي في مناطق قريبة لمسار رحلة الرئيس المحتملة..وبنظره كاحلة وسريعة لمسرح عمليات هذه العملية (والتي نتمني ان لا تحدث)…الا ان الموقف يحتم علينا ان نحلل ونستقرئ كل الاحتمالات الممكنه والمحتملة….اما عمليات إحباط هذه السيناريوهات فذلك من مسئولية جهات التخطيط والتحليل  بالبلاد…..

مسرح هذه الرحلة التي اشرنا لها ( الي الدوحة كمثال حي ذهابا او ايابا) ينقسم الي ثلاث اجزاء رئيسية ….

الجزء الأول من هذا المسرح …الاجواء السودانية (من الخرطوم الي ساحل البحر الاحمر) تستغرق الرحلة في  هذا الجزء نحو الساعة….والسيطرة في هذا الجزء من المسرح للقوات السودانية بدرجة ليست متكاملة  في الارض او الجو…..غير ان هناك ثغرات في هذا الجزء من المسرح وهو قابل للاختراق كما حدث من قبل عند قصف مصنع الشفاء …وخلال تسلل اسرائيل ابان عملية موسي الشهيرة…

اما الجزء الثاني من المسرح هو أجواء البحر الاحمر  وتستغرق الرحلة خلاله نحو نصف ساعة  وهذا الجزء هو الاخطر ومفتوح وحر لكل دول العالم بحرا وجوا وتوجد به اساطيل غربية (امريكية وفرنسية) وتجوبه اسرائيل بِحُريه خاصة وان لها نقطة ارتكاز في جزر (دهلك) الأريترية جنوب الساحل السوداني….واسرائيل ضليعة في اعمال القرصنة الجويه وقد ثبت ذلك في حادث تحرير الرهائن في عنتيبي تلك العملية التي تمت بالطيران طولا فوق البحر الاحمر…..ولا يجب ان ننسي عملية اختطاف (اوجلان) من قلب افريقيا بواسطة تركيا وبعون اسرائيلي وكل ذلك عبرالبحرالاحمروكذلك عمليات نقل اليهود الفلاشا من مطار( كرساقو)  بشرق السودان قرب منتجع اركويت ومن ثم الطيران فوق البحر الاحمر…..من هنا نقول ان هذا الجزء خطير جدا ويصعب تامين اي طائرة او سفينه اذا اريد بها شرا….خاصة من قبل دولة كالسودان يفتقر طيرانها لمزية التزود بالوقود جوا لاطالة امد البقاء بالجو….الا ان هذه المسلبة يمكن التغلب عليها (لحد ما)  بدفع الطيران السوداني الي قاعده متقدمة كقاعدة بورتسودان الجوية او مطار بورتسودان…..الا ان هناك ايضا احتمال التعرض لهذه القوة الجوية لتامين العملية ان كان لا بد من ذلك …

الجزء الاخير  والثالث من المسرح لا يقل خطورة عن المسرح الثاني وتستغرق خلاله الرحلة للدوحة اكثر من ساعة بقليل وهو يمر عبر الاجواء السعودية ثم القطرية وتوجد في هذا الجزء من المسرح قواعد امريكية عده قريبة وبعيده في كل من السعودية والبحرين وقطر والامارات والاسطول الامريكي الخامس المتمركز في الخليج العربي في ميناء المنامة……وهنا قد تتقيد هذه القوات الغربية المتواجده باحترام قوانين هذه الدول وقد لا تتقيد تحت اي من الاعذار والتعليلات الا ان عملية اعتراض طائرة الرئيس ممكنه في هذه الاجواء –علما بان  القوات الجوية السودانيه لا يمكنها توفير الحماية هنا لانها لا تستطيع بلوغ هذا المدي اولا ولان هذه الاجواء لدول اخري لا تسمح بالطيران الحربي الاجنبي فوقها-  والتوجه بها نحو مطار او قاعدة خارج تلك الدول العربية في اسرائيل او قبرص او اليونان مثلا او غيره…..

كل هذه السيناريوهات سوى ان كانت  في الاجواء السودانيه او البحر الاحمر او الاجواء العربيه …قد تتم بعملية قرصنة جوية وذلك  باعتراض سرب من الطائرات المقاتلة والهجومية (من قوة الواجب المكونة للتنفيذ) …للطائرة التي يقلها السيد الرئيس وامر الطيار بالتوجه للجهة المراده ….وتهديده باسقاط الطائرة في حالة عدم الانصياع او التلكؤ….وعادة تكون في معية هذا السرب المهاجم طائرة تزود بالوقود بالجو وتدار مثل هذه العمليه من غرفة العمليات التي اشرنا اليها في بداية التحليل والتي قد تكون في سفينة قيادة او قاعدة بحرية او جوية قريبه ….وهنا تلعب الاقمار الاصطناعية دورها وتحدد تحركات الرئيس وموقع طائرته بدقه متناهية باستخدام تقنيات ال  GPS المتطوره وكذلك يلعب العملاء والمجندين داخل الوطن دورا كبيرا في تاكيد المعلومات سوي في المطارات او باختراق الاقربون لاعطاء المعلومات التي تفيد في المراقبة والتتبع ….

لم اتطرق في هذا التحليل لامر وارد ويمكن حدوثه وهو عمليه اختطافه في الدولة التي يذهب اليها من قبل عملاء او قوات لهذه الدول التي اشرنا اليها في البلد المضيف وتسليمه لسفارة دوله اخري ومن ثم نقله الي الجهة التي يراد نقله اليها ….انوه الي ان كل شي ممكن …

أمر أخير لا ثان له يحبط كل ذلك ويجنب البلاد الدخول في هذا النفق المظلم وهو ان لا يسافر الرئيس الي ان يحل هذا المشكل نهائيا من قبل مجلس الامن … علمنا بان العمليات المضادة لمثل هذه السيناريوهات ممكنة الا انها تتطلب وقتا وتدريبا عاليا  وقدرات تحليلية واستخباراتيه تحتاج لمزيد من الوقت والجهد………

والله المستعان…..

 

 

 

 

 

 ملحوظة : هذه المرئيات تحليلية بحته …..

Advertisements
تعليقات
  1. الجنرال ابكرون
    يعنى الا يترسل ليك عشان تنزل التحليل ده ياخى ؟؟
    والله انا كنتا قايل لو اتقبض ح يكون فى الدوحة زاتاااا – زى مسلسل 24 وكدا الانتهاء الاسبوع الفات.
    على العموم وبماانك المراسل الحربى لسوداننا فى الدوحة – مسرح الحدث زاتوا- فنتوقع منك تقارير متواصل وكمان بالصور لما سوف يجرى هناك.

    وربنا يكضب الشينة !

  2. ابكرون كتب:

    الاخ استرايكر ك
    الموضوع ده نزل في سودانايل امس في صفحة منبر الرأي…..تحياتي

    http://www.sudanile.com/arabic/index.php?option=com_content&view=article&id=1768:2009-03-21-19-03-25&catid=206:2009-03-21-19-00-02&Itemid=55

  3. والله يا ابكرون قريت الاسم – وبسال فى نفسى يااخوانا عمر خليل ده منو – تصدق بالايميل عرفت ده زولنا زاتووو الاسمو ابكرون – تحياتنا ليك يا واصل ومنتظرين تحليلاتك بفارغ الصبر .

  4. عشان كدا يا ابكرون حقو يسمع كلام علماء السلطان فقد أشاروا بعدم جواز سفره (لأغاظة الأعداء و وقايته من كل شر)…

    و ليحاولوا التخفيف في خطابهم السياسي و قد وضح أنهم قد شرعوا في ذلك فعلا ..ز فقد كان خطابه في افتتاح كبري توتي بالأمس متوازنا بعض الشئ… و ليهدا المستوزرين و الكف عن الاساءة للشعب فلسنا (شحاتين) و الله المستعان زي ما قلت…

    تحليل مظبوط يا ريت يخلوه في البال…
    شكرا يا أبكرون…

  5. التلب كتب:

    سلام للكل
    اها يا أبكرون الجماعة بتاعين زواج الإيثار أفتوا بعدم جواز سفر الرئيس في ظل الظروف الحالية

  6. بالله بعد ما عملت ارسال عاينت للرأى العام لقيت (طارق بن زياد) السودان مصرحا بأنهم قد حرقوا مراكب الرجعة بالنسبة للمنظمات….. و أردف قائلا
    (لو انطبق الأخشبين) ما حيرجعوا…

    يا أخوانا البكلم… منو؟
    أحيييييي يا أبو سامح

  7. نيام كتب:

    ابكرون:
    ودي ما حلها بسيط يا ابكرونا يا اخوي .. نمشي كووووووولنا معاهو .. وبس و نقعد هناكا..

  8. حاج أحمد السلاوى كتب:

    أخونا ابكرونا .. وكل الحبان ..تحليل جميل وسيناريوهات محتملة وربنا يكضب الشينة .. يا ابكرونا ( إنت كنت جستابو يا ابكرونا ..ولاّ شنو ؟ )
    قبل إذاعة بيان هيئة علماءنا الأجلاء الذين افتوا بعدم جواز السيد الرئيس فى مثل هذه الظروف( عرفنا ذلك من قناة الجزيرة ) …كنا نعلم سلفاً أنه لن يسافر ولن يغادر البلاد حتى إشعار آخر ..لأنها مجازفة خطيرة فى الوقت الحاضر ..وسيدخل السودان فى حتة ضيقة بالحيل ..
    وخلونا نشوف آخرتا ..

  9. aflaiga كتب:

    ابكرون الخبير بالجو : اعتقد ان الازمه ذات جانبين :
    * معنوى : وهو التكيف مع الامر الواقع الذى سيترتب على عدم السفر او السفر .
    * مادى : وهو الاثار المترتبه على السفر او عدمه .
    ناخذ الجانب المعنوى :
    * فى عدم السفر اشارتان مهمتان وهما :
    الاولى هو اعطاء جهة ما وهى الجهه المستهدفه لرحلة الرئيس وسفره للخارج سواء للدوحه او لغيرها مستقبلا اشره باننا قد سلمنا بان من حق هذه الجهه ان تستهدف الرئيس وهو فى العرف الدبلوماسى يعتبر اهانة كبرى لسيادة الدوله وفى العرف العسكرى يعتبر بمثابة اعلان حرب …
    * وفى حال السفر ستكون الجبهه الداخليه رهنا لمالات السفر وما يترتب عليها وسينتقل كل جهد الدوله المعنوى للاهتمام بمتابعة تامين الرحله او الرحلات القادمه مما ينعكس سلبا على الحاله المعنويه الطبيعيه التى هى الدافع لممارسة السياده والعمل على تحقيق اهداف الدوله .
    اما الجانب المادى ففيه :
    * فى حال السفر ستبذل الدوله جهدا كبيرا وخارقا فى تامين السفريه الحاليه او السفريات المقبله وفق سيناريوهات تحدث عنها بذكاء ابكرون الحصيف وما عارف جاب كلام الجن ده من وين ؟؟ الا يكون حسن كابوس جاهو امبارح فى تجليه استخباراتيه !!! هذا الجهد الذى ستبذله الدوله سيكون خصما على جهدها العام فى تحقيق الامن الداخلى وقد يدخلها فى مهاترات كبيره مع دول الجوار وفق نظريات المؤامره ..!!!
    فى جانب عدم السفر سيكون على الدوله ايجاد التبرير المقنع المضاد للحملات التى سبقت السفر او منذ بداية التداعيات للازمه وهذا التبرير مطالبه به امام الداخل والخارج ..
    ويقينى ان النظام لما عرف عنه من مكر وداء وحنكه استخباريه سيجد من المخارج ما يجعل الامر يعدى زى السبيبه فى العجين !!!!
    السيناريو الاسوا الذى قد لا يكون النظام قد انتبه له وهو سيناريو :
    هل اصبحت حكومة الخرطوم مرهقه فى محيطها العربى والاقليمى ؟؟؟
    ولو رجعنا ورا شوية لى بعض الانظمه كتشاد وموريتانيا وبعض الدول غير المستقره سياسيا والتى تتناوشها القرارات الدوليه او التقلبات الداخليه سنجد ان معظم دول العالم قد نفضت يدها من التعاطى مع شان هذه الدول باعتبارها اصبحت مصدر قلق ولا تستطيع الدوله التى تريد بناء خط استراتيجى للتعامل معها ان تقرر بشان السياسه تجاهها !!!
    وعليه قبل ان يصبح النظام فى قائمة هذه الدول عليه ان يسرع الخطى بعقلانيه شديده خاليه من العواطف لعقد صفقه مع المجتمع الدولى تخرجعه من عنق الزجاجه الحالى وتسرع بقطع الطريق امام تحوله الى نظام مقلق كثير التكلفه السياسيه فى التاييد او الحياد تجاهه …
    هذا مع اكيد تمنياتنا لسعادة المشير بموفور الصحه داخليا وخارجيا واعود لاكرر قولى السابق :
    سيدى الرئيس طالما حولك رجال لهم بطون منبتها حلال فلن تضام فابعد بطون الحرام عنك فانها اول من يبيع !!!

  10. زووووووول كتب:

    ابكرون سلااام
    تحياتى على التحليل الرائع. لكن ما نتمناه ونرجوه الا يسافر الرئيس لان دولة قطر (واهل مكة ادرى بشعابها ) لن تتمكن من حماية البشير ان تعرض لمكروه (لا قدر الله ) وفيها تقبع القواعد العسكريه للمتربصين .وكلنا يعلم ان سيادتها هى وكثير من اخواتها (الدول العربيه ) غير كامله حتى على اراضيها ناهيك عن اجوائها .
    كسره : نتمنى حدوث السيناريو :
    أمر أخير لا ثان له يحبط كل ذلك ويجنب البلاد الدخول في هذا النفق المظلم وهو ان لا يسافر الرئيس الي ان يحل هذا المشكل نهائيا من قبل مجلس الامن .
    كما نتمنى من البرلمان السودانى اصدار قرار يحظر سفر الرئيس ليس جبنا ولا تجابنا لكنه لحماية بيضة الدوله ورمز سيادتها واستصحابا لقوله تعالى ((ولا تلقوا بايديكم الى التهلكه )) وجاييك يا ابكرون

  11. aflaiga كتب:

    الزووول : نحن جميعا مع تلافى اى تطورات ضر بالعباد وكنت قد اوضحت كيف يتاثر العباد ولكن للذكرى اكرر :
    * مجرد اشاعة عدم الاستقرار بتقفل الاسواق والحياه بتقيف ولمن تقفل الاسواق فى بلد معظم شعبه رزق اليوم باليوم معناها دى الابداه الجماعيه الحقيقيه ..
    * مجرد تازم الاوضاع يعنى توقف التبادل التجارى فى المواد الاستراتيجيه فى الغذاء والدواء وهنا ينشط تجار الحروب والازمات ودى برضو اباده جماعيه غير مباشره .
    شوفو يا زوول يا خوى :
    تطلعو قرار من البرلمان يمنع سفر الريس ..
    تقيفو قدام طيارتو بالعكاكيز زى ما قال اسحق الما نصيح الرائع ..
    تعملو ليهو عمل فى الشاى يكرهو فى السفر …
    تعتصمو قدام بيتو وما يمر الا على اشلاءكم …
    المهم حلو لينا القصه دى بحيث نامن فى بيوتنا واهلينا ..
    وجاييك ..

  12. د.ياسين شمباتى كتب:

    سلامات..
    ابكرون يا واعى..والله ما خليت لينا شئ نضيفو,,بس الرئيس صرح بالفم المليان وفى غيرما مناسبة بانه سيسافر,,يعنى (فتواهم) الما بخجلوا منها دى بقى ما عندها لازمة..وياريت كل زول يلزم محلو ويبقى قدر كلامو..والله ديل جماعة ما بختشوا..

    لكن حتى لو سافر حيسبب عبء على الدولة المستضيفة,,واسه قطر يدها على قلبها من انو يصر على قرار الذهاب,,خصوصا انو علاقتها مع امريكا كويسة وما عايزة تخسرها وهما كان السبب..

    بعدين يا د.عزت جماعتك ديل مفتكرين نفسهم صحابة وانبياء!! شنو الجاب الاخشبين هنا!!؟ قبل كدة الطيب مصطفى ايام كان على وفاق مع الترابى سألوه عن حاجة غريبة قالها الترابى,,قال ليهم :دعوه فالرجل من اهل بدر!!!

    اعوذ بالله من جهل على عمد……….

  13. aflaiga كتب:

    شمباتى : بقيت تجى فى الايام التاليه غير الخميس ما شاء الله ..

  14. ماماسك الكورة بتاعتو وكده يا ولدنا
    جهزتا ليك لستة يا حاج ومرسلنها ليك قريبا – من الربح بتاعك !!!!

  15. nono كتب:

    ابكرون/ لك التحية

    الزول ان وعد شين ميعادو يخلفو
    في ربط اللسان يسخابو دمو يتلفو
    سفري الليله فيه زولين ما بختلفو
    ضروري اصل ام شديده علي وعد بي حلفو
    ما بعرف ازوق من نشيت تبيت
    فريقكم لي فريق وبيتكم يمين لي بيت
    اجيك ديناً علي حتي إن بقيت حبيت

  16. aflaiga كتب:

    نون : هيع ..
    لكن العالم يا نونو ما عاد يدار بهيع او بالعزه
    والعرب اليوم يا نونو فى طرف الحائط كالمعزه
    واليانكى يا نونو حكم العالم دون مقاومه او هزه
    والعقل ينادى يا نونو حكم عقلك لا تسمع ابليس ولو وزّ
    معليش دى نجره سريعه كده ما قعدنا ليها ..

  17. ابكرون كتب:

    سلام : سلولو ما كنت جستابو لكن كنت الله جابو….
    زوووول شكرا علي التواصل ….عدم السفر هو احباط للسيناريوهات ….ودي اسياء ما فيها حليفه ولا عنتريه ….العالم ديل عندهم اختطاف طائرة او سفينه….زي لمن الشماسي يخطف ليه رغيفه….نعم الحافظ الله …لكن برضو لا تعرض روحك للهلاك بالتوكل وبس….احمي نفسك ابقي اقوي مثلا ابقي ادهي الخ….
    شمباتي : فعلا تامين الروساء العادي عبء علي الدولة المضيفة…فما بالك عندما يكون هناك تهديد من الدرجة الاولي لشخصية ما ….
    عزت : ليس الصحاف ببعيد عن الاذهان والانطباع الذي تركه…قبل وبعد سقوط بغداد…

  18. nono كتب:

    الجوووووووووعيل دة نخلية لية منووووووووووووووووو؟؟؟؟؟؟؟؟؟؟؟؟

  19. aflaiga كتب:

    ابكرون : واضيف لى كلامك فى مجال تامين الرؤساء :
    فى الدول المتقدمه هناك فصل واضح بين امن الشخصيه الهامه وحراسة الشخصيه الهامه مفاده :
    امن الشخصيه الهامه هو الترتيبات الوقائية التى تسبق اجراءات التامين الماديه ومنها دراسة الوضع الامنى والتهديدات الماثله قبل واثناء وبعد اى نشاط من انشطة الشخصيه الهامه ..
    بينما حراسة الشخصيه الهامه هى الاجراءات المادجيه التى يتخذها طاقم الحراسه للحد دون تعرضالشخصيه لاى تهديد مادى او معنوى …
    وفى قطر التى تعمل بنظام المخابرات الامريكى فى مناهجها يتم دراسة جدوى لتكلفة الاستضافه من حيث الارهاق الامنى وفى النهاية يكون القرار ان الوضع الامنى الداخلى لا يهدده وجود هذه الشخصيه فى البلاد لكن دراسة الموقف المصاحب للوجود ينبئ باحتمال اخطار نجد ان الدوله فى غنى عنها وعليه يتم تقييم الزياره بانها غير محبذه مع وضع البدائل فى حال اصبحت امرا واقعا وهذه البدائل يقوم تيم الدراسه بتضمين نسب النجاح والفشل فيها بشكل واضح لتحديد المسئوليات والصلاحيات ..
    يعنى الان الاخوه فى قطر بيكونو بيقيمو فى كل ما له علاقه بالموضوع ومن ثم يتم رفع التقرير النهائى الذى اعتقد انه فى ظل المعطيات سيدفع فى اتجاه :
    * التمسك المعنوى بضرورة الاستضافه مع العمل على تهيئة الداخل لاستقبال الزياره .
    * العمل الخارجى مع النظام السودانى لاخراج عدم السفر بشكل يضمن سيادة السودان كعضو فى القمه .
    * قيادة خط داخل القمه ان قامت بغياب الرئيس على ان يكون اول موضوعاتها ادانة القرصنة السياسيه .
    وجاييكم …

  20. ودالزبير كتب:

    أبكرون

    لو سمحتي لي بنقل هذا البوست الرائع لمواقع آخرى منسوباً لأبكرون أو عمر خليل أيهما أحب أليك

  21. aflaiga كتب:

    ابكرون : جيييتك تانى :
    بحديثك الاخير اصبح للازمه ثلاث اطراف :
    * السودان بين خيارات السفر او عدمه .
    * قطر بين خيارى الاستضافه او عدمها .
    * الغرب بين خيارات التحدى او الانكسار .
    يلا كدى يا ابكرون امسك لينا كل واحد من ديل وورينا المنظر الفى شكل بنبر شنو ؟؟ والعلميه فى النمليه كيف ؟؟

  22. aflaiga كتب:

    ود الزبير : بس تشيل منى وتودى بدون حقوق ملكية كاشيه !!
    ابكرون : بصفتى وكيل مقالاتك فى السودان ( شفت السلبطه دى كيف ؟؟ ) من جابت ليها كاش !! اقترح ان تكون رسوم نقل المقال داخليا براها وخارجيا براها .. وفق التسعيره الاسفيريه ..

  23. نيام كتب:

    ودالزبير:
    بس تنقلو تنقلو ساكت ماعارفين فيها مصاريف نقل..لمان نجيك في سيدي بي و الحساب فوق الطاولة..

  24. ابكرون كتب:

    ود الزبير : مشكور ياخ الموضوع نشر في سودانايل بااسم عمر….ولا احبذ نشره في سودانيزاونلاين لاسباب شخصية تحت اي مسمى….مع تحياتي

  25. ابكرون كتب:

    نونو : هههههه ام شديده دي اوعه تكون الدوحة….هنا عندنا ام القلايل

  26. ابكرون كتب:

    افليقا :باختصار شديد…
    في السودان ناس الفتوى قالوا لا ….واظن في لجنه هي البتحدد …بعد قراءة المعطيات ….واظن حتقول (لا سفر)
    الدولة المضيفة :عملت العليها وقدمت الدعوة بوفد واقول ليك شي قطر من افضل الدول امنيا….لكن كيف يتم التامين في طريق الذهاب والاياب ما جملته 6 ساعات طيران؟؟؟
    الغرب متحفز وداير اي ثغره….واظن 6 ساعات طيران to & fro فرصه جيده…

  27. bakriMusa كتب:

    ابكرون سلام مربع

    طيب في حالة عدم سفر الرئيس من هو الشخص ا لمرشح للسفر مع التحليلات اللازمه ..
    وبالمناسبه وين وزير خارجيتنا شغال من منازلهم ولا شنو ؟

  28. طارق أب أحمد كتب:

    أبكرون و الجميع سلام
    أنقل ما كتبته سابقا حول نفس الموضوع فى تطورات ملف الجنائيه
    ببساطه شديد الرئيس لن يسافر لأى مكان ليس خوفا من أعتراض بواسطة طائرات الفرنجه و اللمريكان
    و لكن لأن الخوف من جوه الحيشان ..
    لو نط فيها أى كائن من كان ,
    فقد الريس سلطته وراح فى خبر كان ,
    حينها سينعق الغربان
    بأن السادن دعى وكاذب وفى الأفك …فنان

  29. nono كتب:

    منقول من فتوى هيئة علماء السودان :/

    وها هى الهيئة قد أصدرت رؤيتها فى هذه المسألة وهى بإذن الله تعالى مأجورة إن أصابت أو أخطأت

    1/تدريب الشعب السودانى على الثقة بالنفس .

    2/هى أنّ الرئيس إذا ذهب ورجع سالما سيتيقن الجميع أنّ لا حلّ للسودان إلا فى قيام إنتخابات نزيهة .

    3/فك الإحتقان الداخلى الذى يعانى منه السوق الآن.

    4/سوف تنجو المحكمة من صدام ومواجهة محققة مع دول الخليج خاصة والجامعة العربية والإتحاد الأفريقى.

    5/تكون المحكمة قد نجحت فى إضعاف موقف السودان فى مجلس الأمن وأثبتت للمجلس قدرتها وفاعليتها.

    ختاما قاااااااااااالوا /
    وباختصار نحن من أنصار سفر الرئيس لأنّ الشر الذى سيصيب السودان من سفره أقل بكثير من الشر الذى سيصيبه من قعوده، وسفره هو أخف الضررين فى إعتقادنا؟؟؟؟؟؟؟

    كسرة/ وربنا يكضب الشينة؟؟؟؟؟

  30. بشار أحمد بشار (إبن برد) كتب:

    د/أبكرون : جد ٌ لآسف على الدخول المتأخر….. لاكين يا جماعة زي أبكرون ده بيفكوهو عكس الهوا….. ومسعول من الخير إنت خليت القايناكولوجي وبقيت بتاع بولسي وستراتيجي؟؟ وإنت يا سيد تحليل (الإستخ) وليم كيسي ظااااتو يشيل ليك تعظيم سلام بس (الهازوق) الطيارة تنختف وأبكرون ينعكش ويقولوا تحليلو كان السبب والهداهم على كده.

  31. علي سنكل كتب:

    الأخ العزيز أبكرون
    والله المفروض من دربك ده وتوش تدخل لناس قناة الجزيرة وتقول ليهم أنا عايز كلامي ده أقولو على الهواء . . بس ما يقوم يجيب ليك . . والله قمه في التحليل.

    لكن بالله مش حالنا للعدو الما صليح؟ إمور تهم الأمن القومي للبلاد وسلامة الاستقرار والطمأنينة فيها نخليها لشورة ناس الحيض وغسل الجنازة.
    حسي يومداك لمان الناس اتكلمو في الإيثار ما طلعوهم طبالين وترزيه.
    البجيبهم يفتونا شتو هنا؟
    وين رجال الاستراتيجيات الأمنية وين ناس الدبلوماسية؟

    في رأي السفر فيهو مخاطر كبيرة على سلامة الرئيس وأي خطر على الرئيس هو خطر على أمن واستقرار السودان والمسأله ما جعليين وشايقيه ، أحسن نفكر بهدؤ ونترك الحماسيلت ودق النقاره والعرضه.
    فيها شنو لو مشى الوفد برئاسة سلفاكير واللا علي عثمان ، لحد ما نشوف الحاصل شنو؟

  32. ابكرون كتب:

    بكري ود موسي : اكيد يا بكري أحد نائبية ينوب عنه ويرجح الثاني لانه لا يعقل ان تكون قمة عربيه ويخاطبها سلفا بالانجليزية….
    هو وزير الخارجية منو…؟ انت ملاحظ ما عندنا وزير خارجية قاصع منذ منصور خالد
    بشار : ما خلاص كبرنا علي تحليل قاينة النسوان دي….اخير نرجع لل vojniski like
    سنكل : آي ده الشغل بركه العوه الجابتك…ياخ نحن ما عاجبنك بتوع استراتيجيات امنيه…
    نونو : معقول العلماء القال عليهم عمك سنكل ديل قالوا كده …؟

  33. د.ياسين شمباتى كتب:

    بكرى موسى..سلامات..جبت السؤال الصعب,,وزير خارجيتنا وينو؟؟؟؟؟ الجماعة ديل ملبدنو وممسكين الشغلة لى ولدهم..

    والله العلماء ديل حيرونا عديييل كدة..استغفر الله..

  34. ابكرون كتب:

    ود الزبير :
    انته وزعته الموضوع علي الفضاء كلوووو ولا شنو…؟ لقيتو في: منتديات الراكوبة ،منتديات وادمدني ، منتدي سنار،sudanjem او حركة العدل والمساواة…ناسك في ديل منو..؟

  35. aflaiga كتب:

    ابكرون : الموضوع والله مفروض يتوزع نشورات فى الشارع ذاتو .. لانو موضوع حيوى وبيمس سيادة بلدنا مش البيتكلمو عنها الجماعه ديل لالا اوريك كيف :
    * يا جماعه الانقاذ ليست هى السودان والسودان ليس كله انقاذ …
    * يجب التفريق بين ما للسودان وما للانقاذ ..
    ودى معادلة صعبه جدا جدا ليها امثله كثيره من الواقع نديكم منها شويه :
    * ما انجزته الانقاذ من بنى تحتيه – هو ملك الشعب السودانى وان تغيرت اللافتات يعنى كوبرى توتى بتاع اول امبارح ده حيظل كوبرى توتى ولو مشت الانقاذ كل الحيحصل انو اليافطه بتاعة وضع حجر الاساس فلان الفلانى يمكن تتشال بره وتتخت محلها ( تمت الصيانه تحت رعاية بول بريمر الحاكم العسكرى للسودان !! بعد الشر عليهو وعلينا .
    * المساعدات الانسانيه التى ممكن نقوم بيها تجاه اى شريحه محتاجه لو اليافطه المفروض تترفع هى يافطة الانقاذ ده لا يعنى انو نرفع يدنا من مسئوليتنا تجاه اى شريحه محتاجه والا نكون قد اذنبنا فى حقهم مرتين :
    *مره لمن سمحنا بتغافل منا ان يتولى امرنا من يوصلنا لهذه الحال
    * والمره التانيه لمن اتشاكلنا فى اليافطات وتركنا الزول محتاج يعانى ..
    ملخص تعليقى هنا :
    السياده المقصوده هنا هى سيادة الوطن عشان ما حمودى لمن يغترب بعد كم سنه يلقاهو واحد خليجى يقول ليهو انتو ياخى رئيسكم الفات مش قبضوهو فى الجو ؟؟ ولا انتو رئيسكم الفات مش قطعوهو معاهو وقعد فى الحوش جوه ؟؟؟ تخيلو حمودى حيقول ليهو شنو ؟؟
    لو قال ليهو ده ما كان رئيسنا ووب ؟؟ ولو اعترف بانو كان رئيسنا ووبين !!!
    دعونا نتعامل مع المساله بوعى اكبر من الوعى الحزبى الضيق او المرارات الشخصيه الضيقه .
    سيدى الرئيس لا تسافر وارسل من يمثلك واكسب الزمن فى ايجاد حل يخليك تسافر المره الجايه والايام التاليه ..
    سيدى الرئيس الضمان الوحيد للخروج من اى مازق هو التصالح مع الشعب وليس مع من يدعى تمثيل الشعب ..
    سيدى الرئيس قمه تفوت ولا حد يموت ..
    وجاييكم ..

  36. ودالزبير كتب:

    أبكرون

    برئ يا فندم

    والله أنا كنت داير أنقله ليك لمنتديات البيت السوداني لكن مادام خلاص الناس نقلته ويمكن يقول عليهو تراث وماعنده كاتب أصلاً فخلاص نقوم نلف بيهو على بقيه المنمتديات وبالمره نوري إننا أصحاب المحلل الجهبذ ده

  37. نيام كتب:

    ابكرونا:
    بسراها قايلنك بتاع فننولوجيا و بس ..تاريك بتعرف السترولوجيا و قصب السكر كمان..الله يسترهم.
    سنكل:
    والله قصة قزازة البيبسي دي حصلت علي انا ظااااتي لكن خليها لمان تجي…تذكر قهوة شريرة..

  38. aflaiga كتب:

    نيام : البشوفك تزقى فينا انا وستريكر فى البيبسى لمن جينا بيتكم يقول مسحوك بيهو من ولدوك !!
    عم سنكل : ما قلنا ليكم اكتبو يا جماعه انت بس تستنى افليقا يكتب وتديهو فى راسو !! وهو اصلو الخلى راس افليقا داير طق شنو غير عدم كتاباتكم بالله عليك نستحلفك ان تكتب مقالا شهريا عن كيف كنتم وكيف صرنا ؟؟
    ابكرون : ياخوى ما تدشن لينا منبر الامن القومى السودانى ليكون واحه لكل مهتم بالشان السودانى من اولاد الكار يعنى تقوم جاك جاك جاك تمشى لى لى موقع بتاع استضافات ورب رب تقوم ترمى ليهم انك عاوز تاسس موقع اسفيرى عن الامن القومى السودانى وجلبلب تقوم تبدا فيهو وتعمل فيهو ابواب زى شنووووووووووو :
    * منتدى التربيه الوطنيه .
    منتدى قضايا الامن الاقتصادى
    منتدى قضايا الامن الاجتماعى
    منتدى قضايا الامن السياسى
    منتدى قضايا العلاقات الخارجيه
    —–
    جاهل من يظن الامن القومى هو منطقه عسكرية ممنوع الاقتراب منها او التصوير فالامن القومى هو منظومه قوامها المجتمع كله ما دامت تتعلق بامن المجتمع والامه ..
    يلا ورينا النشاط والهمه ونحنا معاك …

  39. وصل الرئيس السوداني عمر البشير اليوم الاثنين إلى اريتريا ، في أول زيارة خارجية له منذ صدور قرار المحكمة الجنائية الدولية بتوقيفه بتهمة ارتكاب جرائم حرب في دارفور .

    وجاءت زيارة البشير في تحدي للمحاكمة الدولية ، واستجابة لدعوة اريتريا منذ أيام للبشير لزيارتها، بعد أن أدانت أمر الاعتقال الذي أصدرته المحكمة الجنائية الدولية بحق الرئيس السوداني في اتهامات بارتكاب جرائم حرب في دارفور.

    وقال بيان للحكومة الاريترية :” تؤكد ان الدراما التي اخرجها ما يسمى بالمحكمة الجنائية الدولية توضح تماما الموقف المعادي للشعب ومؤامرة تشويه السمعة من جانب القوى الخارجية”.

  40. وصل الرئيس السوداني عمر البشير الى العاصمة الأريترية أسمرة في أول رحلة خارجية له منذ صدور مذكرة اعتقال بحقه من محكمة دولية.

    ولم يعلن عن الزيارة في وقت سابق، ولكن قناة الجزيرة الإخبارية التي بثت صور وصول البشير الى مطار أسمرة قالت إنه تلقى دعوة لزيارة أريتريا في منتصف شهر آذار/مارس الحالي.

    وكانت المحكمة الجنائية الدولية ومقرها لاهاي قد أصدرت مذكرة اعتقال بحق البشير على خلفية اتهامه بالمسؤولية عن انتهاكات ارتكبت في إقليم دارفور.

    ووفقا لميثاق المحكمة فان الدول الموقعة على الميثاق ملزمة بتنفيذ أوامر الاعتقالات التي تصدر عنها، ولكن أريتيريا لم توقع على هذا الميثاق.

    وكانت هيئة علماء السودان قد أصدرت فتوى دينية تحظر على البشيرالسفر إلى خارج السودان لحضور القمة العربية في الدوحة.

  41. ابكرون كتب:

    استرايكر :طبعا السفر الي اريتريا او مصر او ليبيا لا يشكل خطر علي رحلة الرئيس طالما الدولة التي يزورها تقبل بالزياره ولا يعبر اجواء دوليه ….يعني من البيت للبيت ….
    لكن مثل هذه الزياره ممكن تكون في اطار كسر التحدي او البر بقسم ….وعموما لا تشكل خطرا من اي جهة اخري…الا في حالة حدوث قرصنه لا يحمد عقباها داخل اجواء الدولة الجارة…..

  42. aflaiga كتب:

    ستريكر ثرو ابكرون : يا ربى تكون دى تسخينه لاختبار المسند للضرب ؟؟ الله يهون ..
    طبعا دول الجوار ذات الحدود المباشره معنا يمكن التنقل منها واليها برا وهنا تتعاظم نسب التامين حيث ينحصر التهديد فقط فى احتمالات :
    * العمليات الفدائية من المرتزقه او منسوبى البلد فى الدوله الاخرى .
    * عمليات الاستهداف الشبيهه بالاقدار او التى يتوصل لانها مسببه بعد وقت طويل كحوادث السير او انهيارات المبانى او الحرائق او خلافه .
    * الاستهداف المتقدم عبر التقنيه المتقدمه او التسميم الغذائى كمثال استهداف خالد مشعل باشعة هاتف محمول او الاسلحه الكيميائية المتقدمه كالغازات .
    * الهدايا و الطرود الملغمه .
    هذا اذا كانت النيه الاغتيال او التعرض الجسدى .
    اما الاعتقال فاحتمالاته فى الدول المضيفه :
    * استغلال الحدود لقطع الطريق امام المواكب البريه لتلافى احراج الدوله المضيفه .
    * تنامى العنف فى احد الاقاليم المجاوره لخط الموكب مما يجعل الموكب محتجزا قسريا .
    * التخابر مع الحركات المسلحه التى تملتلك مناطق الحدود للقيام بعملية الاعتقال ويمكن نسب العملية لفصيل منشق !!
    يعنى الاحتمالات برضو تظل ضعيفه اذا ما حسبت بالجدوى الامنيه من تنفيذها وحساب التكلفه الامنى واثاره السياسية ..
    ابكرون : ما رديت فى موضوع الموقع ولا نحرش ليك بشار ؟؟

  43. ابكرون كتب:

    افليقا قال : ابكرون : ما رديت فى موضوع الموقع ولا نحرش ليك بشار ؟؟
    عارف اسم الموقع القلتو ده بذكرني : الطفل البجيبوه شايل ليمونه وبختها في خشمه ….ويكرج…..وتاني يكرج….وتاني يكرج …..ده انا بس ….

  44. aflaiga كتب:

    ابكرون : برضو ما فهمت شيئ الموضوعليه علاقه بالبلح ؟؟
    شوف يا ابكرون لو بتثق فى كلامى والله الموقع ده اعملو الليله قبل بكره وممكن تدى توكيل لستريكر يصممو ليك وانا بكون واحد من الادمنين بتاعينو لمتابعة وتنسيق الموضوعات والاتصالات فبادر يا زعيم قبل ان ينط واحد يسوى موقع تحت عنوان الامن القومى للسودان واعدو لهم ما استطعتم من قوة ويتحول الموقع للتنديد والتشديد والكبير والتهليل .. وترجع حليمه لى قديما ..
    اكرر يا زعيم الامن القومى للسودان هو مسئولية مشتركة يبنيها الشعب بمتطلباته الضرورية للعيش بكرامه ومن ثم يؤسس المختصون على ضوئها لبنات التامين وليس العكس ان يؤسس الناس امنا قوميا لا علاقه له بحياة القوم !! مش قومى دى جايه من القوم ؟؟ يلا باسم القوم بقول ليك دور ونحنا وراك .. انت يا ابكرون بقيت تتكبكب برضو ولا شنو فى نوبى بيتكبكب ؟؟

  45. aflaiga كتب:

    ابكرون : لاهمية الموضوع:
    ابوى الله يرحمو كان بيقول لى انت عامل زى الزين بتاع الطيب صالح تختار الحاجات السمحه وتاسسا وما بتدور تخش فيها وامى قالت لى انت بتعرف تلقى السمح وين لكن خساره ما بيجيك ولمن تجى تفتشو لى رقبتك ما بتلقاهو !! طبعا ده ما عندو علاقه بسمسمه !! مع انى عرست لى كميه من اصحابى عرسات ميه ميه زى حقتى !!
    اها يا ابكرون ياخوى الموقع ده واحده من الحاجات السمحه الانا شايفا فى يوم من الايام حتكتب ليك فى ميزان حسناتك الوطنى تجاه بنى شعبك وحيجى يوم يا ابكرون ياخوى ناس حمودى يقول ليك والله بركه السمعت كلام افليقا ..
    حقيقة بلادنا فى حوجه ماسه لموقع تنويرى يهتم بامنها القومى الذى اصبح مش ولا بد ..
    فكر وتانى فكر والناس المختصه بره وجوه القلبها على البلد جاهزه بس كيف انت تبدا ؟؟؟؟

  46. aflaiga كتب:

    ابكرون : انا ما عرفت المشكله وين :
    فى عنوان الموقع
    ولا فى تخصصه
    ولا فى ابكرون ذاتو ؟؟
    من الممكن ادارة النقاش فى الميل لكن لانو الموضوع بيهم الناس كلها وعشان الناس يشكلو عليك ضغط شعبى !! حلوه ضغط شعبى دى مش ؟؟ انا بتناوله هنا بمسببات :
    العنوان ممكن يتغير لاى عنوان تانى
    التخصص مفيد ومهم وغير مطروق
    الكتاب من الحصافه والذكاء حيث يتم الفصل بين المعلومه والتحليل وفق درجات السريه التى ترسخ لمفهوم الجماعيه وتبعد عن الاثاره وحرق الملعومات !!
    اما لو القصه فى ابكرون ذاتو فلا اعتقد انو ابكرون السودانى الاصيل ممكن يضن على السودان بى شيئ ولا ما كده يا مجموعة الضغط ؟؟

  47. aflaiga كتب:

    بالمناسبة الايامات دى فى موضة بتاعة ودي الخور فحاول خش قبل ما البوست ده يمشى الخور …

  48. بشار أحمد بشار (إبن برد) كتب:

    أفليقا: “ولا ما كده يا مجموعة الضغط ؟؟” أبكرون ده زوولي وأنا بعرفو معرفته لذاته وهو رجلٌ مجيدٌ ومطبوع وفي ذات الوقت مقلٌ وملول (he likes to keep low profile) ولو وضع تحت بابور زلط لا بنضغط لا حاجة وبنطبق عليه قول الشاعر :
    بغاث الطير أكثرها فراخا
    وأم الصقر مقلاة نزور
    ضعاف الأسد أكثرها زئيرا
    وأصرمها اللواتي لا تزير
    وقد عظم البعير بغير لب
    فلم يستغن بالعظم البعير
    يصرفه الصغير بكل وجه
    فلا عرف لديه ولا نكير
    فما عظم الرجال لهم بفخر
    ولكن فخرهم كرم وخير00

  49. aflaiga كتب:

    عم بشار : ما عشان القلتو ده انا مصر انو يسويها لانو البتجى من زيو ولا احلى ..

  50. حاج أحمد السلاوى كتب:

    الدينمو أفليقا ..وكل السُمّار..
    نحنا غايتو مسطحين شوية .. يمكن بسبب موقعنا الجغرافى خارج حدود أمازونيا ..وعاوزين نعرف قصة الخيران دى شنو .. مع إنو الخيران كثيرة .. أمسك عندك خور عمر .. الشهير .. وخور ابو عنجة .. الأشهر..وفى خور كمان هناااااك فى أمدرمان ناحية الهجرة ..

  51. أكد المتحدث باسم وزارة الخارجية السودانية علي يوسف، الأحد 29-3-2009، أن الرئيس السوداني عمر البشير وصل إلى الدوحة للمشاركة في القمة العربية، وبذلك حسم الكثير من التكهنات التي ثارت حول مشاركته في القمة وسيناريوهات سفره في ظل مذكرة اعتقال دولية صادرة بحقه من المحكمة الجنائية الدولية حول جرائم ضد الإنسانية في إقليم دارفور.

    وخلال الساعات الماضية، ثارت في الدوحة شتى أنواع التكهنات حول البشير سواء بشأن حضوره الى الدوحة أو سبيل حضوره.

    وأجمع مراقبون على أن أي تدخل جوي لاعتقال البشير في طريقه من السودان الى الدوحة يفترض أن يتم في الأجواء الدولية فوق البحر الاحمر، وذلك ضمن هامش زمني لا يتعدى 12 دقيقة.

    وأشارت تكهنات أخرى الى أن البشير قد يأتي الى الدوحة بصحبة رئيس عربي آخر أو على متن طائرة ترسل اليه في تكتم.

    إلا أن عدة دبلوماسيين عرب أعربوا عن شكوك حيال حضوره، لاسيما لجهة “الإحراج” الذي سيتسبب به ذلك لقطر الدولة المضيفة.

    وفي هذا السياق، قال دبلوماسي عربي إن “الرئيس السوداني لن يأتي الى الدوحة لانه سيُحرج قطر”، وقد يواجه إمكانية اعتقاله في الطريق.

    ومن جانبه، قال مندوب السودان لدى الجامعة العربية عبدالمنعم مبروك في الدوحة في وقت سابق “السودان سيشارك في القمة على أعلى المستويات. الرئيس البشير سيشارك إن شاء الله”.

    من جهته، أكد رئيس الوزراء القطري الشيخ حمد بن جاسم آل ثاني أن بلاده كررت الدعوة للبشير لحضور القمة، الا ان “القرار يعود له”، مشيراً الى تعرض قطر “لضغوطات من بعض الدول” لعدم استقبال البشير.

    والبشير ملاحق بموجب مذكرة توقيف دولية صادرة عن المحكمة الجنائية الدولية على خلفية النزاع في دارفور، الا ان قطر لم تصادق على معاهدة روما التي أسست المحكمة وبالتالي ليست ملزمة بتوقيف البشير.

    وكان مدعي عام المحكمة الارجنتيني لويس اوكامبو اكد انه “ليس هناك حصانة لعمر البشير.. يمكن ان يتم توقيفه ما إن يصبح في الاجواء الدولية”.

    وسبق لعلماء السودان أن أصدروا فتوى حذروا البشير فيها من السفر الى القمة العربية لعدم الوقوع في فخ محتمل.

    وتحدى البشير مذكرة التوقيف الدولية بحقه 3 مرات في غضون أيام قليلة بسفره الى اريتريا ثم الى مصر وليبيا.

    وبحسب دبلوماسي عربي آخر، “سعى البشير من خلال سفره الى هذه البلدان الى التأكيد أنه حر الحركة وهو الذي يقرر حضوره أو عدم حضوره الى الدوحة”، مع العلم أن سفره الى قطر يتضمن السفر في أجواء دولية.

    والبشير يريد من دون شك حضوره أن يحظى بأكبر دعم ممكن من نظرائه العرب الذي سيصدرون في نهاية قمة الدوحة بياناً خاصاً بالسودان، بحسب الامين العام للجامعة العربية عمرو موسى.

    ورفع وزراء الخارجية العرب الذين عقدوا اجتماعاً تحضيرياً للقمة السبت، الى القادة مشروع قرار ينص على طلب إلغاء الاجراءات الدولية بحق البشير، الا أنهم لم يتفقوا حول اقتراح يتعلق بعقد قمة خاصة للتضامن مع السودان في الخرطوم.

  52. ابكرون
    المراسل الحربى

    اها البلد بغادى عندكم كيف ؟؟

  53. nono كتب:

    وصول الرئيس السوداني عمر البشير إلى الدوحة للمشاركة في القمة العربية

  54. nono كتب:

    الزول ان وعد شين ميعادو يخلفو

    في ربط اللسان يسخابو دمو يتلفو
    __________________________

    هييييييييييييييييييييييييييييييييييييييييع

  55. aflaiga كتب:

    نونو : صدق المظلى وعده . وكفى ..

  56. عبدوش كتب:

    الله يكضب الشينة يا عمنا ابكرون

  57. ابكرون كتب:

    ربنا يسهل رحلة الإياب كما سهل رحلة الذهاب…وهي في كلي الحالتين مخاطرة

  58. علي سنكل كتب:

    أبكرون إزيك . . .
    إنت الطياره بتعبر البحر الأحمر في 12 دقيقه؟ واللا دا ما هقيقه؟
    أنا شخصياً كنت قايلها نص ساعه كما قرأت سابقاً.

    في رحلة العوده ممكن الرئيس يجي راكب درجه أولى على القطريه ، المشكله شنو ؟ وطيارتو تقوم و مافيها المطلوب وإسرائيل تنزلها وما فيها زول مطلوب لأي جهة ، و نحن نقوم القيامه مع المجتمع الدولي.

    خلونا كمان نخلي بالنا ونتابع أخبار قرار القاضي الأسباني الذي طالب بإدانة ستة من معاوني الرئيس بوش ( في الإدارة الأميريكية السابقة ) أجازوا بطريقة أو بأخرى تعذيب معتقلين في معسكر قوانتانامو ( سئ الصيت ).

  59. علي سنكل كتب:

    عذراً تصويب :
    ” سيئ الصيت ” ولا أخالها تفوت على فطنة القارئ الكريم.

  60. ابكرون كتب:

    سنكل :
    اكتر كمان شويه من 30 دقيقه…ما قريت عن ال12 دقيقه دي يا سنكلوني لكن يبدو انه بقصد عملية السيطره علي الطائرة
    بعدين برضو يا سنكل كلامك ده سيناريو ممكن…وفي كذا مخارجة …لكن برضو الله يستر… وكلو ما دام في الاجواء الخارجيه بشكل مخاطرة

  61. نيام كتب:

    حاول يخفي نفسو و هل يخفى القمر في سماهو
    ابدا لا و طبعا لا شفناهو شفناهو

  62. aflaiga كتب:

    سواها البشير ولا يخاف عقباها :
    يعتقد الكثيرون ان البشير الذى ظهر ودموعه تغالبه فى الرابع من رمضان حين اشتكى للناس جور الشيخ وتغوله على صلاحياته – والبشير الذى يشرح للناس كلما ذات ازمه موقف السودان السلمى من اى عدوان – اعتقد الناس ان الرجل قد رخا القاش والتحف العمامة وصار جلابى من كانزى الاموال لا يهتم برخية القاش ولا كربة الكردون واللطاش ( فسر يا ابكرون ) ؟؟
    لكن الذين يعرفون الرجل منذ مجئ الانقاذ ولا اقول قبلها فلم نشهد قبلها بوعى سياسى بل شهدنا ما بعدها بوعى مراهق ومن ثم تطور الوعى لنعى تماما من هو البشير ؟؟ ارجل شهد العيد الاول للمحموله جوا عبر الاسقاط الجوى والرجل شهد تحرير توريت والرصاص لم يخمد بعد والرجل له عمق من البصيرة والصبر يجعل القريب منه يشهد بطولة بال اقرب للمسكنه الدرويشه !! لكن الرجل حين تتاوره الحاله الكاكية !! يجمع الصادقين من الكاربين ممن لم تختلط بطونهم بالحرام فيرشدونه الى درب الصواب ..
    فعلها الرجل وجاء للقمة يحمل امنه الشخصى لتحقيق امن شعبه بالكامل .
    فعلها الرجل ووضع العرب امام امتحان صعب اما ان يضطلعو بدروهم تجاه السودان ووقف نزيف الدم واما ان يبحث عن افريقيا او اسرائيل نفسها اذا دعا الحال فكل من فى القمه يتمتع بخلفيته العربيه وعلاقاته الصهيونيه والامريكيه الا نحن الذين نظل نشيل وش القباحه باسم العرب دونما عائد !!!
    الرجل يقول للعرب اننى ساقاتل من اجل العروبه التى تمثل فى بلدى اقل من النصف فى التكوين ومن اجل العروبه التى اوصلتنى لان اكون رئيسا مطالبا به ومتهم بابادة الزرقه !!
    عموما فعلها الرجل واكد ان حواء الامن والاستخبارات السودانيه لم تعقم وها هو يخرج من المطار الخرطومى الانيق ويدخل قطر من الباب مسكتا كل اصوات المراهنه على ما تبقى من قوة شكيمته وعسكريته القحه ..
    نعود فنقول :
    سيدى الرئيس لا تعب نفسك فى ارضاء العرب او الغرب بل اجتهد فى ارضاء شعبك فهو الذى سيسالك الله عنه يوم السؤال ..
    مبروووك سعادتك وتجى بالسلامه ..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s