فرز الكيمان في ( سوداننا )

Posted: الإثنين,23 مارس, 2009 by ودالزبير in اخرى

طبعاً يا شباب لازم نفرز الكيمان في موقعنا ده ونعرف منو المعانا ومنو المع الخيانه من المعروف للقدامى هنا إن توجهات أخونا زوووووووول عكس توجهاتنا تماماً لكن بعد أن كبرت الشغله وإنضم أعضاء جدد للموقع لازم الزول يعرف المعاهو من المامعاهو فلازم نفتح بوست عشان كل زول يحدد لينا ولائه وإتجاهاته ليسهل لنا التعامل معه وبالرجوع لمسأله التوجهات قلت أن زوووووووول ود عزت بقاريتش ونيام نيام وسنكل كان صهيونيتهم وأضحه للعيان ولو أن عزت يغلفها بدبلوماسيه على الطرف الآخر يقف الأهله الشرفاء خالد مدني وإسترايكر وشخصي وأفليقا من منازلهم وأبو المنزر ومشاكل وعبدوش كأبرز الأصوات الهلاليه القويه هذا البوست لتوزيع الناس ومعرفه حجم الأعداء بيننا حتى نتمكن من التعامل معهم في مقبل الأيام والبطولات بالنسبه للناس الماعندها ميول رياضيه ما مشكله راح نسهل ليهم الشغله يعني سؤال صغير وبنضمك لواحد من الفريقين والسؤال هو هل تفضل لون السماء والبحر الأزرق والأبيض أم تفضل لون الدم والمرض الأصفر والأحمر ..
إجابتك على هذا السؤال تعني تصنيفك وتنسيبك لمعسكر من المعسكرين ..

يالله يا شباب ساعدونا بالتصنيف ….

Advertisements
تعليقات
  1. Nourlight كتب:

    هلال…

    و ممنوع العنف…

  2. ابكرون كتب:

    أفكر فيه وأتأمل
    أراه اتجلى واتجمل
    هلالى الهل واتكمل

  3. مُخير كتب:

    ود الزبير
    هلالاب حد الوله، ودماءنا زرقا، ونعشق الأزرق والأبيض عشقنا للماء والهواء
    كما نتبنى بصدق شعارنا الخالد ” الله، الوطن، الهلال”، فالهلال القبيلة والحزب والعشيرة والإنتماء، لكن شخصياً ضد التعصب في كل شيء فالذي يحب بقوة لا يكون في قلبه متسع للكره والبغض، لذا أرفض منطق من ليس معنا فهو ضدنا، لا تحرك في شماتة الصهاينة ومشاكساتهم ساكناً ولا يجب أن تهز فينا شعرة فهم أقلية مضهدة تستحق التعاطف وهم عندي هلالاب زعلانين ربما يهديهم الله يوماً فيرجعوا لُحب الهلال، إذا لعب الهلال وخسر أحزن جداً خاصة إذا قدم أداءً جيداً، لكن إذا لم يؤدي وخسر فلا أغضب أو أحزن كثيراً، ولا أجد أدنى حرج في دعم وتشجيع المريخ خارجياً عندما يمثل البلاد فوقتها يكون بمثابة الهلال أو الفريق القومي، ولن أفقد إتزاني إذا ما أرد أحد أبنائي في المستقبل تشجيع المريخ أو حتى اللعب له، وأتمنى أن يحذو ود الزبير حذوي.

  4. bakriMusa كتب:

    خليكم معانا مع ال:ـ Fair Play

  5. طارق أب أحمد كتب:

    د الزبير
    ياخى بوظت أعصابنا المنبر اليومين دى بقى كلو فرز كيمان الواحد بس يغيب يومين تلاته يلقى المسائل بى وراهو ((شاغت))

    أها الشيرنج نسلمو ونو و وين

  6. علي سنكل كتب:

    ود الزبير سلامات
    نستنكر وندين الخطأ الفادح الذي وقع فيه إعلامكم الذي وصفنا بالدموية والقتل.
    قف . . هلال . . لال . . لال . . لاب وإتحاد مدني
    لكن المريخ في الخارج ما بناباهو.

  7. نيام كتب:

    يا سا دتي من كان منكم سامعي فليسمعا
    لو طل نجم في السماء يزينها كانت نجومي الالمعا
    فهلالكم ذكر المواسم او قل صيامي المزمعا
    و نجومنا زانت نجوم الكون الشعاع اللامعا
    وان احتجبن وعز ذلك فهلالكم الامعا

  8. زووووووول كتب:

    ود الزبير سلاااام
    رغما عن انك فرزتا الكيمان براك .
    لكننا هلالاب حد الثماله ودماءنا بيضا (دا فقر دم عديل ) زى ما قال مخير نحن هلالب زعلانيين لان فريق الهلال لم يتمكن من الظفر ببطوله خارجيه منذ ان وطأت قدمانا ارض الله وقد حدثنا كبارنا انه لم يظفر بها منذ (سقوطه) على كوكب الارض .
    ونحن هلالاب زعلانين جدا لان فريقنا (؟) لا يملك حق المواصلات ناهيك عن ستة مليارات لتسجيل الدره الافريقيه ستيفن وارغو كما انه لا يملك استاد محطرم(؟) ليمارس فيه لاعبوه كرة القدم انما مقبره وزريبة عيش . ونحن زعلانين لان هلالنا لا يمكنه دفع رواتب المحترفين الذين فروا منه فرار الصحيح من المجزوم .
    نحن زعلانين لان هلالنا يأتينا بالمحترفين من شاكلة كوارزما وايفيانى بينما يشرب غيرنا صفوا وكلتشى ووارغو .
    حتما (لن) نعود لتشجيع الهلال لو تمكن من الفوز ببطوله خارجيه (بنرجا البيلى ونرجى بله زاتو ) . وسنعود للهلال لو تمكن من احضار محترفين من شاكلة المالى لاسانا فانى وسنعود لو تمكنت ادارة الهلال من التعامل مع المحترفين الناجحين امثال قودوين ويوسف محمد .
    كسره : قلتا اخير كدا يا ود الزبير وعملتها هلال مريخ ومفخره ومقبره
    ان عدتم عدنا

  9. نيام كتب:

    ودالزبير:
    أهنيك علي البراعة في فنون الانتشال
    ولتفهموا لو أننا غبنا لما كان الهــــــلال
    فنجومنا تهدي المسافر دربه وذكركم عفو المقال

  10. ودالزبير كتب:

    صباحاتكم خير

    نبدأ نحسب أولاً المعانا :
    1/ نورليت
    2/ أبكرون
    3/ مخير
    4/ سنكل

    المع التانيين :
    1/ نيام نيام
    2/ زوووووووول
    أعضاء غير وأضحيين المعالم
    1/ طارق اب أحمد
    2/ بكري موسى

    يعني لحدي هسه غالبين أربعه إتنين وهو وضع طبيعي جداً في ظل الهيمنه الهلاليه على قلب الشعب السوداني رغم الصفر الدولي الكبير يظل ثلاث أرباع الشعب السوداني هلالي الهوى والحته دي بالجد داير ليها علماء نفس وإجتماع لأنها من الظواهر الخارقه الغير قابله للتفسير

  11. نيام كتب:

    نور لايت:
    ولقد حسبت النور فيك بانجمي و توهجي
    فاذا المشيئة ابدلت بسراجكم لا مسرجي
    زان الديار دياركم نجم العشي المبهج
    در مانتي نور يشع بنجمنا المتوهج
    مخير:
    اذن انتو مريخاب زعلانين ..بلي ..فلو كنتو فرحانين اذن هم زعلانين .. ولو كانوا مبسوطين فانتو زعلانين..يعطيكم العافية..
    زووووووول:
    نحن في المشتات ندعو الجفلا لا تري الادب منا ينتقر

  12. ودالزبير كتب:

    نيام نيام

    نورلايت دي ما عندنا وكده

    يعني كلام المعلقات ده أكتبوا لينا بالعربي عشان نفهم إنت قاصد مدح ولا هجاء

    بالعربي الفوق دي يعني بالدراجي

    إنتو أفليقا وين يجي يكنب لينا بيتين شعر عشان كمان ناس الزووووووول دي مايفتكروا إننا ما عندنا شعراء وكده حريقه في عمر محمد خالد زاتو

  13. مُخير كتب:

    أحبابنا الهلالاب الزعلانين
    نيام نيام، الزوووووول
    فنجومنا تهدي المسافر دربه وذكركم عفو المقال
    قصة هداية المسافر في الصحراء دي “أوت ديتيد” شوية في عصر الثورة الرقمية الآن أقوم أقوقل الماب وأطالع نيام في مدني وأنا هنا خارج القارة ، لكن ذكر في القرآن إذ يسئلونك عن الأهلة قُل هي مواقيت للناس يعني “إيفر فاليد” فنحن الذين نضبط الزمن إلى يوم الدين، بينما ذكر في القرآن أيضاً في سورة النجم بِسْمِ اللّهِ الرَّحْمنِ الرَّحِيمِ “وَالنَّجْمِ إِذَا هَوَىمَا ضَلَّ صَاحِبُكُمْ وَمَا غَوَى..الخ” فمعذرة أحبائي وهل لي هلالو ظهر وبان لي الليلة.

  14. نيام كتب:

    ودالزبير:
    1/ نورليت دي لانو استاد الهلال في شارع بيتهم
    2/ أبكرون فنان لوجيا يعني لو الاغنية قالت ” نجمي الطلا و اتكمل ” كان بقا معانا
    3/ مخير دا مريجابي زعلان و هو مع اللعبة الحلوة يعني احترافي في التشجيع مرة هلال مرة مريخ
    4/ ابو السناكل دا ما عارف الهلال ظاتو في بري الدرايسة و لا ثاوثهامبتون .. لما فرنسا لعبت ضد ساحل العاج .. شفتو مرة بصفق لقرنسا و مرة لساحل العاج.
    (المع) التانيين :
    1/ نيام نيام
    2/ زوووووووول
    وباقي نجوم الدانقا طبعا معروف
    اما أعضاء غير وأضحيين المعالم (مريخاب حكومة ظل )
    1/ طارق اب أحمد
    2/ بكري موسى
    3/والبقية تأتي

  15. aflaiga كتب:

    شباب : مشهد سغنتوتى :
    السما : تعال يا حمودى ورينا فايدة النجوم شنو وفايدة الهلال شنو ؟؟
    حمودى : بابا مع انو هلالابى لكن قال لى يا ولد النجوم دى عندها تلاته فوائد :
    * زينة للسماء ( وزينا السماء بمصابيح ).
    * رجوما للشياطين ( وجعلناها رجوما ) .
    * تهدى السالكين فى الصحراء ولنعلم عدد السنين والحساب .
    السما : والهلال يا حموووووودى ؟؟
    حمودى : بابا قال لى ده كلام كبييييييييييير انت اسى ما قدرو لكن بشكل عام :
    * لمن يصل نص الشهر بصبح بدر – وبيقولو ليهو قمر 14 .
    * لمن يجى اول الشهر بيكون هلال بنعرف بيهو انو الشهر بدا .
    ومع انو بابا نوبى وانصار سنه فى حتى رمضان دى لكن بيعز الهلال معزه شديده لانو العلماء بيجتمعو ليهو !! عشان يقولو لينا صومو .
    السما : يا حمودى ما وريتنا الاحسن فيهم ياتو .
    حمودى : والله بابا قال لى الهلال هلال وواحد وظاهر وواضح – بس النجوم دى كل يوم بتسجل ليها نجمه فى مجموعتا لكن يعد ده النجمه الواحده تكفى للتسميه .
    السما : ده كلام دبلوماسى ورينا رايك بصراحه .
    حمودى : اسى ولا نهاية الشهر ؟؟
    وجاييكم للبوست بتاع المشاكل ده اصلو ود الزبير حارقاهو شكله لو عملا ما بيرتاح ..

  16. هسة يا أفليقا كان متوسم فيك تقطع ليهو بيتين شعر تقوم تعملا مشهد غير واضح المعالم برضو….

    أنا رأي يا ود الزبير تسجلو شعراء معاكم كمان

  17. aflaiga كتب:

    ود الزبير : عشان المريخاب ما يزعلو ورينا مقام كل منهما :
    يلا نجى بعد كده لى انتماءنا :
    مما قمنا وشفنا الشارع شفنا هلال العز فى سماه
    مما قمنا وشفنا الكوره عرفنا الكوره مسيخه بلاهو
    عرفنا الناس فى بلدنا هواها معظمو ازرق وشويه سواهو
    وجاييك تانى .. لانو بحاول اتغلب على مرارات ما صار عليه الهلال مؤخرا وبحاول انكت فى هلاليتى القديمه ..

  18. حاج أحمد السلاوى كتب:

    أخونا ..ودالزبير ..وكل الحبان الأعزاء ..
    أنا غايتو شايف تعصبنا الشديد دة لأنديتنا الرياضية ( هم اصلهم كام .. ما إتنين .. بس )دة هو الخلا مستوانا متدنى لهذه الدرجة .. وبالرغم من أنى اشجع الهلال منذ الصغر..ولكننى فى الاونة الأخيرة لم يعد لى الحماس فى متابعة كورتنا الشينة..التعبانة …أنا اندهش خالص لما أشوف مستوانا العجيب دة وأقارن بمستوى الآخرين حتى من اقرب الناس لينا ..وهم أولاد بمبة …كورتهم مختلفة عننا تماما ..بش شوفوا منظر اللاعب السودانى وهو بيشوت الكورة وشوفوا منظر أى لاعب من خارج السودان وهو بيشوت كورة وبيلعب باص لزميله..فرق شاسع ..ونحنا قايمين وقاعدين ..مباراة قمة ( مباراة غِمة..كما يقول السادة معلقينا الرياضيين.. وشات كورة غوية.. ).. أى قمة هذه ؟ ممكن تقولوا لى حسه فى وقتنا الحالى عندنا كام لاعب سودانى محترف خارج السودان ؟ .. إذا ما عندك اقل حاجة عشرة لاعبين محترفين فى الخارج دة معناتو إنو كورتك محلية وبس .. يعنى دافورى عدييييل كدة… وبرااااكم شايفين الصرف المالى فى الفاضى على كورة تعبانة مستوى درجة تالته .. قبل فترة قصيرة جدا وفى مباراة السودان مع الكونغو .. هل شاهدتم كيف لا عبنا المريخ الكبير الدولى ( يبرطع زى الجمل الهائج ) المدعو فيصل العجب راوغ الدفاع وراوغ ايضا حارس المرمى ..وبعد دة كووووولو طوح الكورة بعيد من المرمى .. جنس دة يقولوا عليهو شنو ؟يا جماعة الخير خلونا نقعد فى واطات الله ونجيب شباب ونعلمهم مبادىء الكورة .. كيف يستلم كورة .. كيف يشوت كورة زى الناس .. كيف يتحكم بالكورة .. وبعد داااك تعالوا إتكلموا عن الكورة … بصراحة كدة ..وأنا عارف الصراحة بتزعل الناس ..ولما أقول الكلام دة لأى سودانى متعصب لفريقه التعبان يقول لى ..ياها دى كورتنا العندنا وبرضو بنشجعها .. خلاص خليكم كدة محليين..والناس الإتعلموا الكورة بعدنا بمراحل فاتونا وبقوا يغلبونا من قولة تيت ..وبأقل مجهود ..
    شوفتو فى الدنيا كوووولها بلد يتنافسوا فيهو فريقين بس على كل الكؤوس . ..؟ يا هلال .. يا مريخ ..ألا يدل ذلك على أنه فى حاجة غلط ؟
    وخلونا نشوف آخرتا شنو مع ودالزبير والزوووووول أبو سبعة واوات !!!

  19. زووووووول كتب:

    حاج السلاوى
    ايه التعصب دا يا عمك بعد اللفه الطويله دى جاى تقول لينا انو(المدعو) العجب زى الجمل الهائج .
    بعدين مستوانا ما بطال وراجع ارشيف مشاركاتنا فى السنوات الاخيره
    المنتخب السودانى يهزم المنتخب التونسى بثنائية العجب !وعلاء الدين بابكر
    السودان يقصى الكونقو بهدفى العجب !!! ومهند الطاهر
    السودان يتفوق على موريشيوص بهدفى العجب !!!
    السودان يعود الى نهائيات امم افريقيا بعد ثلاثين عاما
    المريخ يهزم الاهلى المصرى بثلاثية هيثم الرشيد والعجب ويودع دورى ابطال افريقيا
    الهلال يهزم الاهلى المصرى فى عقر داره بهدف ريتشارد جاستن
    الهلال يقهر الاهلى بثلاثيه
    المريخ يتلاعب بالنجم الساحلى التونسى ويهزمه بهدفين مع الرأفه
    الهلال يتفوق على انيمبا النيجيرى 3/2
    المريخ يقهر دولفين بنصف دسته
    المريخ يفوز على شبيبة القبائل الجزائرى بثلاثيه
    الاسماعيلى . الشلف . اولمبيك خريبكه . صنداونز الجنوب افريقى . وغيرها
    كسره : شكرا افليقا ((لانو بحاول اتغلب على مرارات ما صار عليه الهلال مؤخرا وبحاول انكت فى هلاليتى القديمه ..)) وشكرا على ردك الشافى على صديقنا مخير
    عزت بقا ريتش : احى الثوره بالنص زاتو يا اخ انت من قبيل وين خالينا انا ونيام برانا
    نيام : بالله براحه عليهم الناس ديل ما تتور نفسهم بالشعر لانو دا شهرا ما عندهم فيهو نفقه . بالله يا نيام شوفت مهزلة الكاردينال فى الجرايد قال دا شعر لاهل غزه . اضان الشعر طرشاء

  20. نيام كتب:

    افليقا:
    مما قمنا وشفنا الشارع ونحنا صغار
    شفنا النجمة تابعة النجمة و الدنيا نهار
    مما قمنا شفنا الكورة لقينا الكورة شكل نجوم
    ولما مشينا تبعنا دليلك لقينا ارواحنا في الخرطوم
    وعرفوا الناس سر النجمة مرة تغيب و مرة تحوم
    الا نجمنا البهرة الضاوية غايمة الدنيا او مافي غيوم

  21. حاج أحمد السلاوى كتب:

    ولدنا … العزيز الزووووول …
    عالم الكورة كل حاجة واردة فيهو .. يوم غالب ويوم مغلوب .. ما قلنا حاجة يا ابو الشباب .. لكن أنا المزعلنى وحارق دمى طريقة اللعب بتاعنا .. بدائى جداً واللاعبين اللى عندهم فنيات وتقدر تقول عليهم لاعبين كورة عددهم قليل قليل قليل جدا فى جمهورية أمازونيا العظمى ( إن شاء الله بعد خرف ) ..سحرة البرازيل يا ما إتهزموا من دول اقل منهم ..لكنهم يظلوا سحرة الكورة .. وحتى لما يخسروا مباراة تلقاهم عملوا كورة خيالية وجميلة ..خلونا نلعب كورة جميلة وراقية وننهزم .. أحسن من الدافورى الشغال ليهو عشرات السنين دة..
    ممكن تقول لى حنمشى جنوب أفريقيا نعمل شنو مع العمالقة القاعدين نشوفهم بيلعبوا فى أوروبا ؟هل تذكر منافسات كاس الأمم الإفريقية فى غانا ؟ ..لاعبكم طمبج دة قدر عمل حاجة هناك .؟. دلوقت عامل هداف ..طبعن فى الدافورى المحلى دة ممكن يجيب عشرة أهداف بسهولة….
    دول زى ليبيا والأردن .. يا دوبك عرفوا يلعبوا كورة بقوا بيلعبوا أحسن مننا نحنا البنقول أسسنا الإتحاد الأفريقى وعايشين على أمجاد سادت ثم بادت..خلونا واقعيين شوية وخلونا نأسس لاعبين للمستقبل وسيبكم من الفرقعة الما جايبة همها دى ( هلال مريخ … مريخ هلال ) ووفروا الأموال السايبة دى لبناء أجيال جديدة تخدم البلد ..وبرضو خلونا نشوف آخرتا معاكم شنو !!

  22. nono كتب:

    زووووووول/ كدة اخد نفسسسس عميق؟

    نجمة *************نجمة الليل نعدو

    يا نجوم الليل اشهدي

  23. nono كتب:

    المعاااااااااااااااانا يجي صلطة بالطحينة ..صلطة بالماينيز.صلطة حمراء كلوا موجود في اللستة؟

  24. نيام كتب:

    السلاوي:
    حرم كلامك كلو صاح و ما فيهو عوجة طب ..يازول والله اكان مريخابي كان هييييييييع….عليك الله شفتهم لمان يجرو .. النعامة التكتحكم..والواحد يهبشها يقع تهبشو يقع كان ما هبشوهو يقع ..كان ما وقع يقع..ديل بياكلو ام تكشو و ام رقيقة و ام وقيعة..
    نونو:
    http://www.almerrikh.com/x9.htm

  25. nono كتب:

    هلا لية هلالو ظهر باااااااااااااااااان لية الليلة

    والمعااااااااااااااانا يجي شنوا ماابعرف داااااااااك

  26. الغبشة كتب:

    كان بالكوره واو من غيرها نحن اسياد البلد يا ود الزبير والعندو راى يطالعنا بهناك فى الفسحه الغرب محطة الخيمه الواقعه شمال محطة البلابل سابقاً وسيدى بيه مستقبلاً,

  27. نيام كتب:

    الغبشة:
    سيدي بيه ابو نجمة ولا مو يا ..
    السلاوي:
    تعرف ياحاج مرة كنت بعاين لكاس العالم قبل الماضي فكان في ضربة ثابتة لفريق السويد ..فقاموا نفذوا الضربة بطريقة تريقونومترية و هندسة فراغية ودوائر جغرافية و اللعبة انتهت و انا لسه فاتح خشمي ..واحد من الجماعة قال لي هسع ديل لعيبة كورة ديل ولا مهندسين ..علي باليمين تشرحها لفريق سوداني تلاتاسر سنة ما يفهموها..

  28. سهيل كتب:

    هلااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااال

    و مريخ لو لعب بره

  29. زووووووول كتب:

    بعد اذنك يا نيام

    نجم السعد(السر أحمد قدور)

    نجم السعد
    انواره هلت في البلد
    مريخينا عالى ومعتمد
    وقالوا الهلال في الخط رقد
    والحظ همد
    وبقت حكايته (حمد لبد)
    بالفرحة ما طال الامد
    ايام قليلة بلا عدد
    يوم الخميس جاه النكد
    لم ينتظر يوم الاحد

    جمهوره جقلب ما صمد
    ومرق من الاستاد شرد
    قالوا الثقاة اهل البلد
    شافوه فى حلة حمد

    مريخنا دائما معتمد
    تاج النصر
    بطل البلد
    ما جاب حكم بيهو انسند
    وابطاله في الميدان سند
    ما بخلى تاره الى الابد
    ويفوز على الخصم الالد
    بالقوة بالفن والجلد

    جمهوره يهتف كالرعد
    ثابت معاه وما ابتعد
    اما الهلال قام او قعد
    مريخينا بالاصرار صعد
    فوق الجميع
    والكل بعد
    مريخينا بالقمة انفرد
    ساب الحسار لى غيره
    للافراح ورد
    واصحابنا شوف حيلن برد
    وكان الدرس قاسى
    ما اب زرد

    من بدري ناديكم هجد
    فتشنا واحد ما اتوجد
    ومريخينا طول تاريخه جد
    وراكم الفن الاجد

    شارع فرحكم اتوصد
    خسران حسابكم واترصد
    وفريقنا حقق ما قصد
    في اخر الموسم حصد
    مريخنا زينه دفاعه سد
    وهجومه اشبال الاسد
    يا كليتشى تسلم يا ولد
    قونك مؤكد معتمد
    ما فيه سرقه ولمس يد
    تحياتى لاهالى حمد لبد واهدى الاغنيه للاخوان ود الزبيروافليقا وعلى سنكل بالامارات وللاخوات والنونو والغبشه وعمنا السلاوى بالمملكه العربيه السعوديه وللاخ مخير بدولة باكستان وكمان بهديها ليكم انتو يا ناس سوداننا ولا اراكم الله مكروها فى عزيز لديكم تيت …. تيت … تيت

  30. nono كتب:

    اهدي الاغنية لماااااااااما وباااااااااااااااااابا والاخ زووووووول وكل الاهل الحبان

  31. نيام كتب:

    اهدي الغنية لفنجان قهوة و نجمة و سارة و كناني و الحرامي و شبعان مقصة و بالعكس…الاهداء الدوار ..علي وزن الدواء الدوار اللي لحدي الان ماعارفينو دوار ليه..ولا داير شنو..

  32. مشاكل كتب:

    سلامز

    يا زووووووول و الله لو قبلنا عليك بتطش من سوداننا

    ود الزبير دا زووووووول مسكين

  33. سماسم كتب:

    نحن مع النجمة من زمن المريخ يهزم الهلال بدحدوحتين يا زووووووول ما بنستحق تهدي لينا الأغنية

  34. محنك كتب:

    انا مع عمنا السلاوى
    يظهر انو الفات مات لكن كان سمح

    بس بحيي ودالزبير على انو خلى الجماعة ديل يتنفسوا شوية من قبل خمسة سنة كاتمين … وافتكر انو الارباب طبخها مع الوالى من اجل البزنس واداهو كلتشى عشان يسندوا ويخلوا رئيس للمريخ بعد ما قرب يروح فيها
    وارغو وارغو قوو قووو
    هذا هتاف المريخاب قريبا وانا عند رايي ما عندنا كورة
    بس بالجد عندنا مشجعين خليكم على كده الى ان تتصلح الفرق والكورة لانه لو طفشتوا تانى الا نلعب افليقا عشان يلمكم

  35. د.ياسين شمباتى كتب:

    هلال ولا نامت اعين الجبناء……….

    والله يا نيام بقيت تقول فى الشعر وتهدى فيهو لى ناس ما عارفين ليهم اتر,,ودا كلو عشان تكبروا كومكم..

    بعدين قلت ليك موضوع الدوا الدوار خليهو لما اجيك بالدرب,,ولا بلزو ليك فى ايميل..

  36. سماسم كتب:

    ود الزبير : كيف مع ال3 نجوم بتاعة ليلة الأمس عليك الله ما ضوت ليك
    زووووووول ثرو د. عزت و نيام : ألف مبروك وإن شاء الله دايماً فائزين

  37. مش كدا بالله يا سماسم … نور و لايت و رتينه كمان

  38. نيام كتب:

    ودالزبير ثرو سماسم ثرو شمباتي:
    ما قلنا ليك من قبل دا
    اضبط شباكك و ساعدا ساعدا ساعدا (3مرات)
    شمباتي:
    الدواء الدوار قصتو ما بتتحمل الهبباي في عز الصيف ، لي اكثر من اربعة سنين و ما لاقي اجابة و لمان راسي دار في الدار مع الدوار بدور اعرف الدوران سببو شنو!!!اعمل دورة يا دكتور ودور بينا البلد داك..

  39. حاج أحمد السلاوى كتب:

    المدونون ..كووووووولهم ..
    نبارك لفرقة المريخ .. وعلى راسهم الزووووووووول وللشعب السودانى الفوز الكبير على الإتحاد الليبى..وعقبال هلالنا يهل هلالو كمان .

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s