السيكوباتية …ذلك المجهول( 2)

Posted: الثلاثاء,24 مارس, 2009 by قرن شطة in علميه

السيكوباتى والفار

(البوصلة والمحصلة)

 

يقال أن رجلاً قد ابتلى بالعمى منذ ولادته وشاءت مشئية الخالق أن يبصر فى لحظة ما ويرى لمدة ثوانى فكان أن رأى فاراً ثم أطبقت عليه ظلمات اللا شى مرة أخرى وعاد الى حالته الأولى ، فأصبح اذا تكلم معه أحد ووصف له شيئاً يستفهم الرجل عن حجم الشى الذى ذكر له قائلاً: هو أكبر من الفار أو اصغر؟

هذا الرجل الأعمى أصبح له مقياساً للأشياء التى يجهل حجمها … الفار أصبح مرجعية هامة له بل أساسية وحتمية لكى يستطيع أن يكون فكرة ذهنية عما يقال وويوصف له.. السيكوباتى مع أنه يرى ولكن لا مرجعية له…مرجعية الناس العاديين هى  قيم وأخلاقيات ومثل وتقاليد على ضوءها يتصرفون ويفرقون بين الذى هو خير وبين الذى هو دون ذلك… السيكوباتى شخص ضاعت بوصلته فأصبح يضرب فى مناكب الأرض بغير هدى…

السيكوباتين عزيزى القارى أصناف وأنواع ومذاهب كثيرة صنفها الباحثين والعلماء الى أنواع متعددة جلهم ينزع إلى الشر والاجرام والسلوك المعادى للمجتمع. وهنا نتحدث عن الأنواع الملفتة للنظر وتستحق التأمل ولو لى لحظات سراع..ذكر فى أدبيات السيكوباتية أن هذه الشخصيات تمتاز بعدم الضبط الاجتماعى وضعف الارادة عموماً..هناك السيكوباتين المنحرفون جنسيا (توجد علاقة أكيدة بين السيكوباتية والانحراف الجنسى) كما توجد فئة المتشردين… والتشرد قد لايكون التشرد الذى نراه فى هذه الأزمان فى عاصمة بلادنا (مثلاً) والتى أردنا لها يوماً أن تكون أجمل عواصم الدنيا فأصبحت قاصمة فلاهى صارت كما كنا نبتغى ولانحن ناجين من مسالأة وملاحقة )ناس النفايات(…والتشرد قد يكون فكرياًً أو معنوياًً وحتى ايدولوجياًً…

 جاء فى تصنيف أحد الذين أهتموا بالظاهرة أو الحالة رجل باحث ويدعى (استريكر) Strecker فقا أن من ضمنهم المصابون بما يسمى بالسرقة المرضيية Kleptomania أناس لايستطيعون تمالك أنفسهم حيال أشياء الأخرين فيستولوا عليها خفية مع سبق الاصرار وعدم الارادة …وأيضاً فئة أخرى تسمى بمشعلى الحرائق Pyromania وهولاء لهم غرام غريب مع النيران واشعالها فى أى لحظة.. وعلى كل النار جذبت انتباه البشرية منذ الازل فمنهم من عبدها ومنهم من أصبحت تمثل له ظاهرة جذابة بطريقة كارثية لايمكنه الفكاك من تأثيراتها… وأيضاً هناك نوع من السيكوباتين يسمون “بمدعى المرض” فهم فى حالة مرض مستمرة..دائمى الشكوى وبهم عشق ووله بالأطباء والامدادات الصيدلية…يجدون ذاتهم الضائعة فى هذه الحالة الغربية ، ورسولنا الكريم قال “لاتتمارضوا فتمرضوا فتموتوا” وهذا كلام عميق وعلمى لايفك طلاسمه ويعرف معانيه الا الراسخون فى العلم.

ومن أكثر التصنيفات جاذبية تصنيفات العالم الألمانى والباحث بهمة فى المادة (كيرت اشنيدر) فقد ذكر السيكوباتى المفاخر المتبجح شديد الاعتزاز بعرقه وجنسه واثنيته ، وذكر أيضا صنفاً أخر أسماه (ناقصو الذهن السعداء) ..وذو الجهالة فى الضلالة يسعد !

السيكوباتية فى جوهرها انحراف فى السلوك (ليست بمرض عقلى ولانفسى) يحمل فى طياته ضرورة بذرة الاجرام والفوضى ، ومع ذلك توجد فئة منهم لاتجرم بل تتسبب فى إلازعاج والتنكيد على الاخرين كمدعى المرض وفئة تسمى “السيكوباتى الموظف” صاحب التقارير والشكاوى…هولاء “الأفندية” مهووسون بكتابة ورفع التقارير والشكاوى والتظلمات الى مرؤسيهم..يشتكون من كل الناس وخاصة زملائهم..هولاء ولحسن الحظ ضررهم ينحصر فقط فى كمية الازعاج والسأم الذى يتسببون فيه وكمية الورق الحكومى الذى يعبثون به نتيجة للحالة الغير عادية التى يعيشون فيها…وهناك سيكوباتى أخر ربما حرى بنا أن نقف عنده قليلاً ..هو مايسمى بالسيكوباتى المبدع أو الخلاق وهم أفراد يتسمون بالفردية الشديدة يهتدون فى بلوغ أهدافهم بشعور ما (مبهم) بأنهم يسيرون فى الطريق الصحيح أكثر من اعتمادهم على التفكير المنطقى المرتب… ومن هولاء الفئة نذكر شخصيات كان لها أثر وبصمات فى التاريخ مثل نابليون بونابرت ولورانس الملقب بصديق العرب والرسام الشهير فنست فان جوخ الذى قطع اذنه فى محراب السيكوباتية واضطراب الشخصية وكثيرين نعرفهم ولايسع المجال لذكرهم.

أن الشخصية السيكوباتية (حالة) لازالت يلفها كثير من الغموض والحيرة وتحتاج الى دراسات متعمقة لمعرفة ماهيتها علمياًً وضبط كنهها حصرياًً والتعامل معها بصورة مناسبة وفعالة.

نقول هذا الكلام للمهتمين بانشاء مراكز ومعاهد الأبحاث.. سوف نوفر كثيراً من الجهد والزمن والأموال والالام اذا وصلنا الى فك شفرة هذه الحالة ووضعنا مبادى وقاية وبالتالى حماية مجتمعنا من المجرمين والنصابين والافاكين والدجالين المشعوذين…. كل هذه الأنواع الضارة من البشر والتى تجعل الحياة اكثر تعقيداً وأقل متعة.

 

 

 

 

Advertisements
تعليقات
  1. والله يا عزيزى قرن شطة
    ابداعاتك بقت كتيرة على شديد – ادينا شوية جرعات ماطوالى تاح كدا ياخى

    عارف موضوعك ده خلانى جد فى عالم تانى واغوص ( حلو ة الكلمة دى ) فى نفسيات الجماعة ديل وشوية شوية يقع الموضوع بتاعو لينا – علا بس فى الحتة بتاعة ( وهناك سيكوباتى أخر ربما حرى بنا أن نقف عنده قليلاً ..هو مايسمى بالسيكوباتى المبدع أو الخلاق وهم أفراد يتسمون بالفردية الشديدة يهتدون فى بلوغ أهدافهم بشعور ما (مبهم) بأنهم يسيرون فى الطريق الصحيح أكثر من اعتمادهم على التفكير المنطقى المرتب… )

    يعنى اسا ناس هناى وهناية ديل – يكونو مرضى بالسيكوباتية ؟؟

  2. aflaiga كتب:

    قرن شطه : والله بالطريقه دى حتخلى الناس محتارين زى الميل بتاع ابكرون بتاع علاقة طول الاصبع بطول الحياه !! الخلى الناس شايله المتر وماسكه اصابعينا !!! وفى النهايه قالو ابكرون ده ما عندو شغله اصابعنا ميه ميه !!!
    لدى وجهة نظر مغايره لا تنبنى على نظرية معينه لكن ممكن تسميها نظريه افليقيه قاطعا من جضوم خيالو :
    * لقياس الشخصية غير المتزنه سواء كانت سايكوباتيه او منفصمه لا بد من وضع معايير للشخصيه السويه فى الاول ولعمرى ان هذه المعايير تختلف من مجتمع لاخر ومن عقيده لاخرى ومن بيئه لاخرى فما تراه اختلالا فى مجتمع قد يكون غاية السواء فى اخر ولا شنو ؟؟
    بشكل عام انا شخصيا شايف انو شعبنا السودانى كلو ممكن يصنف فى مرحلة المرض النفسى وفق مرض ( الاعتياد على الظلم ومقبل بقوه على مرحلة استمراء الظلم واخشى ان يصل لمرحلة الاشتياق للظلم !! )
    كنت قد كتبت تعليقا سابقا عن حال الشعب السودانى وقلت فيه :
    لو صحينا يوم الصباح ولقينا الحال بقدرة قادر !! انقلب ميه ميه والقشية معدن فالسيناريو الذى سيحدث كالاتى :
    يوقفك بتاع المرور تبدا تترجف وتتكبكب ويدور بينكم الاتى:
    الشرطى : السلام عليكم يا محترم .
    المواطن : اا ا انت معاى انا ؟؟
    الشرطى : ايوه معاك انت يا محترم وهو فى محترم غيرك يا سبب ديمومة عملنا وهمنا الاول والاخير …
    ورب رب تروح واقع من الاندهاشه المخلوطه بشعور ما حسيت بيهو ليك زمن !!!
    وجاييك ..

  3. aflaiga كتب:

    قرن شطه : جيييتك . تساؤل برئ :
    من الملاحظ دوما فى خطاب الانقاذيين مقارنتهم بالحال بين ما قبل مجيئهم وما بعده وعلى سبيل المثال ( شوفو لمن جينا كان كيف واسى كيف ؟؟ )
    فهل يدخل ذلك ضمن تصنيف/ يعنى بالنسبه للفار اكبر منو ولا اصغر ؟؟

  4. ماده جزو من ناس هناى وهناية – ياافلايقا – ياخى اتصلح معانا – ولابقيت شايف انو ده الصاح – اسا اقوم اصنفك ( وبماانو الايام دى فى موجة بتاعت تصنيفات وكد ا ) زووول سيكوباتى – ونطلب من قرن شطة يديك العلاج – وهو فى الغالب ح يكون كم فولت كده – كلو تلاتا ساعات

  5. aflaiga كتب:

    سجمى يا ستريكر داير تصنفنى ونحنا الاتصنفنا سوا فى يوم مولدنا اولاد للبلد ؟؟ بعدين انا الكهربا ما بقدر عليها لا ( اى سى ) لا ( دى سى ) ..

  6. ودالزبير كتب:

    جاء فى تصنيف أحد الذين أهتموا بالظاهرة أو الحالة رجل باحث ويدعى (استريكر) Strecker

    ما ساهل والله !!!

  7. علي سنكل كتب:

    روعه يا اسباذ الأساتيذ يا قرن شطه
    عرف عن لورانس العرب أنه كان شاذاً جنسياً و يقال أنه بعد عودته من الصحراء غير اسمه وخدم الخمس عشرة سنة الأخيرة من حياته كجندي (نفر عادي) في جيش صاحبة الجلالة ، بعد أن كان ضابطاً عظيماً.

    ده يقولو عليهو لي شنو؟
    كم هو ملئ بالسايكوباتية هذا الأمازون العظيم . . . مأكلين حقوقنا وزاردين حلوقنا.

  8. غايتو يا قرن السكوباتي المتمارض دا ناس البصيرة أم حمد بتاعيننا ديل لقو ليهو طريقة … الكمدة بالرمدة و يعرف ذلك المرض (بمرض حامد) .. فقد كان لدي صديق لا يعطي للملاريا فرصة فهو مما تزغلل عينو يقول أنا شاعر حتجيني ملاريا… و جري على الصيدلية
    نقول ليهو انت كان تديها فرصة…

    بالله بعد ثلاث سنين زواج سألتو… قال لي يا حليل الملاريا و الصيدليات

  9. nono كتب:

    يستطيع الانسان تهذيب سلوك اي انسان بتهيئة الظروف الجيدة والمناسبة له

    وخاصة اذا كان الانسان ابنا او قريبا …………

    الامور المهمة ان تعتقد ان كون الانسان غنيا او ذا نسب جيد ليس سببا في

    افضليته على غيره اذ ان التصرفات الحسنة والسلوك المستقيم لا يقاسان بامور كهذه.
    للحديث بقية؟؟؟؟؟؟؟؟

  10. بشار أحمد بشار (إبن برد) كتب:

    يعني معنات الكلام ده “Lawrence of Arabia” ظااااتو كان بلبس عراريق الساكوبيس الخفيفة وطباخ ماهر؟؟؟
    حيرتونا معاكم هسع الواحد يكتب يقول شنو؟؟؟؟؟

  11. عباس ركس كتب:

    العزيز بشار : تحياتي وشاكرين سؤالك عنا . الايام دي متواجد في الساحة السودانوية القمردينية .

    لكن ناس الساكوبيس ديل البوديهم الصحراء شنو ؟

    غايتو يا ابو السناكل عليك جنس معلومات !!!!!

  12. طارق أب أحمد كتب:

    بخلاف الفرنسى و الأيطالى أينما حل المستعمر الإنجليزى حل معه الساكوبيس

  13. الأخ الفاضل: قرن شطة
    السلام عليكم ورحمة الله وبركاته
    أحييك على هذا الطرح القيم
    وأشكر الأخوة الذين قاموا بالتعليق والتعقيب
    بأسلوب أضاف الكثير وأثر فى تعميق المعنى

    كل التقدير والاحترام لجميع الأخوة الكرام
    فى هذه المدونة العامرة والطيبة
    أخوكم
    محمد الجرايحى
    مصـــــــــــــــــــر

  14. بشار أحمد بشار (إبن برد) كتب:

    الأخ محمد الجرايحي إنك في دارك وبين أهلك والدار عامرة بك يا صاحب الدار .

  15. حاج أحمد السلاوى كتب:

    اخونا العزيز قرن شطة ..وكل الحبان الأعزاء .. أعزكم الله فى الدنيا والآخرة ..إن شاء الله ..
    أنا غايتو بديت ألاحظ السيكوباتية العنصرية الجديدة البدت تظهر عندنا من فترةليست بالطويلة فى دولة أمازونيا (ليس لها علاقة بالجندرة )..وصار حظك فى التوظيف أو إيجاد فرصة لكسب العيش (حق القفة ..والما عارف القفة يعنى شنو.. يسأل أقرب كاشف ساكن جنبو .. ) يعتمد على مدى ونوع سيكوبايتك..ويا بخت من كان السيكوباتى خاله …وما ننسى برضو السيكوباتية الرياضية التى يعيشها أخواناالكرام ودالزبير والزوووووووول أبو سبعة واوات(وما زلت عند رأيى .. بخصوص كورتنا .. )..ومع ذلك أجد ليهم العذر .. سيكوباتية رياضية غير مؤذية لأحد وغير ضارة لأن كاساتها ودروعها موزعة بالتساوى يوم للقمر..ويوم للنجمة.. وافهموها بأة …
    – أخونا الكاشف بشار ..فارق التوقيت خلاك دائماً فى المقدمة.. ما شاء الله عليك ( البدّروا فازوا )بس عاوز أعرف العلاقة الدائمة والمستدامة ( حلوة التعابير الجديدة البنسمعها من فترة .. الشفافية .. المصداقية..والما بعرفو شنو دااااااك ..) بين أخوانا طباخي المناسبات والساكوبيس..غايتو بتنكِِّت وبتذكرنا بجنس حاجات..وصباحك عسل ..
    – أخونا محمد الجرايحى ..ابن النيل ..نزيدك ترحيب كمان وكمان ..فى بيتكم ..بس عندى سؤال سغيرووووونى كدة.. إنت وصلت هنا كيف ؟ دة العالم مش بقى قرية صغيرة .. دة بقى أوضة واحدة بس .. وزى ماقال أخونا عادل إمام .. أنتو سايبين الشأة ( الشقة…للأعاجم ..) كوووولها وآعدين فى أوضة واحدة ؟…وكان واصلت معانا -إن شاء الله – حتتعود على الإصطلاحات الما سمعتها قبل كدة ..وخليك قريب يا حبيب !!!
    – المبدع .. الدينمو أفليقا ..سجمنا .. هو إنت أتاريك سيكوباتى من زمااااااان ..ونحنا مانا عارفين ؟
    وخلونا نشوف آخرتا شنو مع السيكوباتية الجُدد ..!!

  16. مُخير كتب:

    الدكتور المبدع قرن شطة
    الحبان في كل مكان
    السلام عليكم
    أولاً تعرف يا دكتور أنا ومعي آخرين كنا أصحاء بس في الفترة الأخيرة الله يعزك أصبحنا سايكوباتيين ومرضى من فئة أخرى تسمى بعاشقي القمردينة Ghumrdomania وكل ما الواحد يقول يخفف الإدمان تقوم تدينا جرعة قوية
    زي دي، ونقوم نغوص أكثر في المرض غايتو هو الشافي…..

    ثانياً: أبدعت في حتة التشرد قد يكون فكرياًً أو معنوياًً وحتى ايدولوجياًً… ويبدو أننا أيضاً متشردين فكرياً ووجدنا مأوى في هذه المساحة يحفظها الله.

    سلام

  17. قرن شطة كتب:

    الاخوة الاعزاء / سلام شديد / اولاً أنا الايامات دى عندى إجازة مرضية وقاعد فى البيت عشان كدة لاحظتو بكتب أكتر…ثانياً اتصلت بى أحدى الاخوات القارئات وقالت إنها قرأت المقال الاول عن السيكوباتية ، وهى شاعرة إنها سيكوباتية لان المقال جاء مفصل عليها بالحتة والتمام…تذكرت نفسى وانا طالب صغير فى الجامعة وفى محاضرات علم النفس الجنائى وعندما يصف الاستاذ مرضاً نفسياً أو عقلياً أو إضطراباً معيناً كان ينتابنى إحساس قوى بانى معلول ومقصود بتلك الافة … وبقيت كثير السرحان وإتلفت براى بدون معنى وغايتو دخلتنى خوفة شديدة وكمان الخوف من الغربة وبى مرض غريب…..حتى أنى أخدت المحاضر جنبة وكلمته فى الموضوع ده – المحاضر نفسو كان مهبوش شوية – فضحك وقال لى انا ظاتتتتتتتى كان بيجينى نفس الشعور لمن كنت طالب زيك كده…ثم أضاف وعيونة منططا : بالمناسبة انا درست هنا فى نفس الجامعة والكلية دى وكنت بقعد فى محلك ده ظاتتتتتتتتتتتتو… داير أقول إنو الحاجات دى تحيطها النسبية فالانسان مكون ومركب من عدة إنحرافات ورغبات طاغية وملحة بس بنسب أقل كثير من النسب المرضية…يعنى ما فى اى زول سيكوباتى هنا يا مخير ..إطمئن يا فردة….تحياتى ولينا رجعة مع السلوك السيكوباتى وماهية اسبابه.

  18. aflaiga كتب:

    قرن شطه : طمنت قلبى يطمنك .. يعد كان طممت بطنى ما يطممك !!
    اهو كده الواحد عرف انو الحاله واحده ..
    بالله البوست بتاع السيكوباتيه 4 ده اكتب فى العنوان العفش داخل البص على مسئولية صاحبه ..

  19. قرن شطة كتب:

    داير اسجل ترحيب خاص بالاخ الزائر المصرى محمد الجرايحى ومرحب بيك بيننا ونتمنى أن يطيب لك المقام فتقرأنا ونقراك.

  20. نيام كتب:

    Kleftomania,eteromania,kevernomania,arostomania,egostomania=ahsbonimania
    كل هذه المانيات (جمع مانية) يحملها الاحسبوني و قد زرعها فينا قبل عشرين عاما و حان قطافها فماذا انتم فاعلون؟
    نحن (المانية) المجهولة؟

  21. قرن شطة كتب:

    الاخو نيام نيام / كيفكم يامحترم / المانيا لوحدها علة عكس الدبرشن تسمى بالسرور المرضى أو التفؤل غير المنطقى وليس لديه اسباب ..بتحصل لناس كدة وبترميهم فى مشاكل عويصة..زى ناس الشيكات مثلاً، الواحد فيهم يكتب شيك ويقول يااخى لمن يجى وقتو يحلها الف حلال…ويقوم إجى وقتو و لا حلال واحد من الاف الفكر فيهم قدر يحلها ..وعديل السجن…تسمى جرائم المال ياصديقى..اما حاجاتك الكتبتها دى بتكون غالباً الحاجة القاصدها مضاف اليها ماقصدت أنا إى علة المانيا نفسها وتسمى عند بعض أهل المذاهب المانخوليا..
    يا صديقى أفليقا ما تتجرس ساكت …انت سليم تحمد الله ولو إنو الوضع عامة يجنن..فى واحد من معارفى فى الجامعة سالنى عن السيكوباتية وناسها فوصفت له نفسه بالتفصيل – حتى الملابس – بكلام كبار وبصبغة علمية..إتعقد وتانى ماغشا مكتبى…القاهو ماشى ببعيد من مكتبى، أكورك ليهو إنت وين يادكتور؟ فيلوح بيده مبتعداً ما امكن ويقول لى أيوه جايييييييييييييك؟؟

  22. علي سنكل كتب:

    حسي يا قرن شطه أنا جيت البيت بعد غياب من الساعه 6 ص و دخلت بالظبط مع أذان العشي ( بكسر العين وتشديد الياء ) كما عند أهلنا الشايقيه ، بالمناسبه أذان العشاء عندنا هنا الساعه تسعه إلا تلت . و أنا لسه علي سندوتش الفطور.
    لمان قربت للبيت بنص ساعه بتي عملت لي تلفون ” شنو يا بابا وين إنت نحن منتظرينك”.
    قلت ليها يا بتي خلاص أنا في الطريق جاي يمكن نص ساعه أكون معاكم إن شاء الله ممكن تكلمي ماما تحضر ليا الغداء ) ! مع السلامه عشان سايق وعربية المرور . . . .

    وصلت البيت يا قرن شطه والحمد لله رب العالمين الغداء جاهز على صدر المجلس ومقابل لجهاز التلفزيون وأمامي القناة السودانيه ومقابله مع أحد الخبراء ورد إسمه أسفل السطر المتحرك دكتور فلان الفلاني ( و أنا جيعان موت ) ( لاحظ ما زال إسمه الخبير الاستراتيجي ! ).
    تكلم هذا الخبير الاستراتجي في كل مشاكل الامازون وقدم لها الحلول وحتى مشكلة المحكمه وجد ليها طريقه).
    الغايظني في الموضوع مخاطبته للشعب السوداني باللغة الإنجليزية ( وهو سوداني يقولها با لانجليزي ويرجع يحاول يقولها بالعربي).
    الله لهذا الشعب البسيط.
    يا محمد أحمد همتك المره الجايه.
    ويا ناس الانجاد لمو عليكم هؤلاء السايكوباتيه.

    وسؤال أخير ، ده أي من السايكوباتيه بالله يا قرن شطه جنس ده يا تو سايكو؟
    حمانا الله وإياكم .

  23. قرن شطة كتب:

    الاخ على سنكل/ لا تسألوا عن أشياء إن تبدا لكم تسؤكم….تحياتى للاسرة وربنا يديم العافية..موضوعنا ده طويييييييييييل وفيهو العرض ياقريبى، أحسن ما توجع قلبك ساكت وتجيب لى نفسك فشل كلوى وكده…

  24. بارك الله فيك أخى الكريم د/ قرن شطة
    وأشكرلك ترحيبك الطيب
    أخوك
    محمد الجرايحى
    مصر

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s