يضربك الضريب 4

Posted: الثلاثاء,24 مارس, 2009 by عزت in اخرى

كان شهر مارس هو شهر الكوارث بمفهومنا كطلبة في جامعة الخرطوم زمان، حيث تسير في عشية 28 أو 29 فبراير كيفما اتفق مظاهرة عارمة تبدأ من قهوة النشاط و تطوف بردهات الجامعة المختلفة و ياخدوا ليهم وقفة أمام قاعة الامتحانات المهيبة في “المين رود” و التي شبه أحد الطلاب سقفها الذي يظهر مرتفعا في جنباته عن باق السقف كأكتاف الشخص الذي رفعها تعبيرا عن استغرابه لأمر أو لعدم معرفته به فقال ان القاعة تقول (أعمل ليكم شنو؟) ثم تنتهي المظاهرة بالقرب من داخلية البنات حيث يتبادل “الخطباء” الخطب الحماسية و التي يشير معظمهم فيها ان هذا هو اليوم الأخير و أننا سوف لن نأتي الى هنا توديعا “لخلطاتنا” (اذ يعرف الخلط بمجالسة الولد للبنت و التي كانت شائعة الاستخدام وقتها) أو السؤال عنهن طوال شهر مارس لما شهر مارس من خصوصية حيث تستعر المنافسة بين الطلبة و الطالبات و التحصيل لمجابهة امتحانات مارس.

 

فقد كان شهر مارس هو شهر الامتحانات في كل الجامعة و ظل هكذا الى أن جاءت (ثورة التعليم) التي أطلقها “الأحسبون” و التي تعني بالنسبة لي طمس معالم الجامعات التي نعرف و الزج بكل ما لا يمت بصلة الي الجامعات من مقررات، و أساتذة و طلبة… رحم الله جامعاتنا فقد تمخضت الى مسخ لا ندري هل نطلق عليها جامعات في اشارة الى المدارس الثانوية و معاهد التربية التي تم تحويلها بقدرة قادر الى كليات جامعية تمنح الدرجات.

 

ما علينا فبقدر ما يمثل الينا شهر مارس من ذكريات جميلة و مؤلمة يمثل للبعض منا ذكريات “حلوة و مرة” أيضا،  فهذا الشهر هو شهر المرأة (مارس)، ولست أدرى لماذا اختاروا هذا الشهر أعياداً للمرأة… فبالاضافة الى أنه كان شهر كوارثنا ايام الجامعة فمارس كان أيضا الاه الحرب عند الرومان، وهو ابن الإله (جوبيتر) وكان عاشقاً للإلهة (فينوس) إلهة الحب.. و قد سمّوا شهرا على اسمه لذا لم يطلقوا على أى شهر اسم فينوس.. و لكنهم خصصوا أياماً فى العالم أجمع للاحتفال بالمرأة.. كمرأة وكأم، وهى طبعاً مناسبات تجعلنا نشير بالتميز للمرأة ولو لوقت محدود..

 

عيدين في شهر واحد بالرغم من أننا نحن الرجال أو الأباء لنا صوتا واحدا أمام الثلاث المكتسبة… فالأمهات أحق بمحبة أولادهن ثلاث مرات عن آبائهم أسبقها عليهم رسولنا الكريم صلى الله عليه و سلم و ندري هم الأحق بالمحبة فقد حملننا و وضعننا و نكن لهن الكثير…اللهم يسر لأمهات القراء الأحياء هناء العيش و الصحة و للأموات الرحمة و المغفرة و رفقة الصديقين و الشهداء…. لكن حسب معظم الاحصائيات في سلسلة مكتسباتنا تشير الى أننا مظلومون بعض الشئ اذ نعتقد أن النساء أخذن أكثر مما يستحققن… ووصل الأمر ببعض الرجال التهكم والقول إنه يجب إنشاء مجلس للرجل… ويحوّل هؤلاء غضبهم على المجتمع والدولة والحكومة إلى غضب على النساء، فإن كانت هناك بطالة فالنساء هن السبب لأنهن يأخذن أماكنهم، وإن كان هناك ازدحام فالسبب هو: النساء يزحمن المواصلات العامة والخــاصـــة والشـــوارع..

(غايتو دا ما كلامي براى).

 

لكن برضو نحكم العقل و نقول أن نسبة معتبرة من الأسر السودانية تعولها نساء، وعلى فكرة لم يعد الأمر مقصوراً فقط على الطبقات الفقيرة، فلقد تراجع إلى حد كبير مفهوم العيب فى إنفاق المرأة على البيت، وفى أحيان كثيرة- وباسم المشاركة- تدفع الزوجة كل ما تحصل عليه، و باقي مرات الراجل (بيدكن) أي يخفي بعض القروش من عيون زوجته وأعرف نساءً كثيرات يضطررن لطلب معونة من أهلهن بسبب عدم رغبة الزوج فى الإنفاق الكامل..

 

فالمشكلة أن المادة أو المال هو الأمر الوحيد الذى يتحدث فيه عن المساواة، فلو تناولنا أمثلة من نوعية الرجال الذين يفضلون بقاء زوجاتهم فى المنزل على أن ينفقوا هم نجد البعض منهم يمارس فى أحيان كثيرة أنواعاً مختلفة من العنف، على اعتبار أنه هو الذى ينفق، وبالتالى له كل الحقوق أما إذا طلق فإنه يراوغ ويلف و يدور و قد لا تقبض منه طليقته لا حق لا باطل دون محاكم و غيره من المساومات.

 

عموما النساء كمخلوقات يعانين أكثر من الرجال، وفى بلادنا ومع عدم توافر إعانات للنساء أو مواصلات آدمية أو فرص عمل/زواج كثيرة لهم تصبح حياتهن أكثر تعقيداً، لكن كتروا بلحيل فما ذهبت الى محاضرة الا و وجدت ثلثهم و مرات الربع من الوليدات و تجدهم في غالب الحالات منزوين على بعضهم… و علقت اليوم داك لمن كانت أصوات الشابات في المحاضرة أعلى من صوت الشباب في النقاش فأشرت الى ذلك فقال لي أحدهم “أصلوا كلامهم كتير” فضحكنا كلنا و لكن قبل كم يوم استرايكر كمان جاب ليهو “ضرب” انشاء الله التضرب “سعيد” يضربا الضريب…..

Advertisements
تعليقات
  1. aflaiga كتب:

    د . عزت : سعيد البتضربو عواطف اريتو بالضريب اليضربو ..
    زمان كنت كتبت فى تعليق سابق انو يجب اعادة النظر فى توثيق العقود بيننا وبين عواطف وان تكون عقود ملزمه قانونيا يعنى :
    بهذا تم الاتفاق بين السيد / افليقا ويعرف فيما بعد لاغراض هذا العقد بالطرف الاول وبين السيده / سمسمه وتعرف لاغراض هذا العقد بالطرف الثانى على الاتى :
    * الطرف الاول شتات خالى التزامات بدون تحدي المحطات .
    * الطرف الثانى عافص لاى التزام تامى او ناقص .
    حضر امامى طرفا العقد ولم يقرا باى من بنوده التى لم يسمياها وعليه انا خال مسئوليه من اى نظريه .
    نيام الشاعر
    المحامى وموثق العقود
    يعنى يا جماعه العقد مفروض بعد الماذون يسويهو يتوثق فى المحامى طبعا بعد ابو وام العروس يشيلو عواميلم !! مش شهدو انو العربيه نضيفه يشيلو عواميلم طوالى ولا شنو يا جماعه ؟؟مع انو عرس الزمن ده ما بيحتاج لى سماسره وشهود لانو العريس بيكون طلع وفتش وعرف المره دى ماشه كم كيلو معاهو وكم كيلو قبالو ولو عدادا مصفر ولا ما مصفر !!!
    وجاييك يا عزت تانى كان ….

  2. nono كتب:

    إن حقيقة العلاقة بين سعيد وعواطف علاقة تكاملية وليست علاقة تنافسية كما هي عند الغرب .
    بمعنى أن كلاً منهما يكمل الآخر . فخشية الرجل من التغيير الذي قد يطرأ على شخصية الزوجة نتيجة خروجها للعمل يجعله أمام تحديا مع نفسه ومعها خاصة وأنها أخذت تساهم في الإنفاق على الأسرة وتحقق لها شيئا من الاعتداد بالنفس، وبالتالي الاستقلالية في اتخاذ القرارات، وعندما تطالب المرأة بحقوقها هذه وتحاول ممارسة إنجازاتها هذه، يحدث الصدام، ويحاول الرجل، عن طريق استعمال قوته الجسدية، واستعمال وسيلة الضرب، العودة للصيغة القديمة في العلاقة بين الرجل والمرأة تلك الصيغة التي تؤكد تسلطه كرجل وتبعيتها له كامرأة وقد قال الرسول صلى الله عليه وسلم: “ألا واستوصوا بالنساء خيراً فإنهن عوان عندكم ليس تملكون منهن شيئاً غير ذلك، إلا أن يأتين بفاحشة مبينة، فإن فعلن فاهجروهن في المضاجع واضربوهن ضرباً غير مبرح فإن أطعنكم فلا تبتغوا عليهن سبيلاً”.

  3. علي سنكل كتب:

    دايماً يا د. عزت فاتح السيره ومخلينا نتكلم في السياسه
    نونو
    سعيد مشكلتو مع عواطفو من أول يوم بعد الدخله.
    السبب إنو متهم بالخيانه من قولت تيت ، دايما هو متهم بزوغان العين وناوي يعرس فيها. وذي التقول ما كان معاهو بنات في الجامعه ولا في الشغل ! ما مفروض يكون بعرف أي بت ومن تاريخ العرس ممنوع يضرب لبت أو يسلم عليها . لأنها حتطلع دايره تعرسو.
    وسعيد تلقاهو شين قرد وليه كرش وقصير لكن عواطف تفترض إنو بنات السودان ديل كلهن جاريات وراهو.
    يا أخي عواطف دي أمها وخالاتها بدوها كورس في النكد على سعيد.
    شوفو الوصايا التحت دي جاتني بالإيميل من صديق يعاني من عواطفو وكثيراً ما يبكي على كتفي:

    نصائح أم سودانية لابنتها

    يا بت هوي فتحي عينك وابقي نجيضة وفالحة …..

    قدر ما أجي داخله عليكم القاكي …. هي هي هي …. و قر قر قر ….. تضحكي مع عبد الله دا….

    الراجل ما تضحكيلو كتير…..

    يسعلني الله بعدين يحقر بيك….

    الراجل اديهو العين الحمرا.

    وان قدرتي لعند ايدك تلحقيها ليهو لحقيها…

    ابقي نجيضة…..

    آآي ….. زي امك…..

    الله بسعلني وقت ابوكي يقول حاجة تضحك….

    امشي اتحشر في الاوضة واضحك زين واجي مارقة صارة وشي….

    وبعدين اوعك وأوعك وبعدين تااااني اوعك… تقوليلو الجلابية دي سمحة ولا العمه اللابسها دي سمحة…

    نفسو تقوم تعجبو يعرس فوقك…. وبعدين تشربي ما تروي….

    واكربيهو بالطلبات…. اوعي تخلي لك قرش يبيت في جيبو…

    واوعك تخليهو يشوف.ال…… بيخربن الرجال

    وقت المسلسل داك يبدا جيبي فندكك واقعدي دقي أي حاجة جنبو … ويا ريت لوكانت شطة…

    ولا كان شافعك جيعان وداير يرضع وبيبكي خليهو في بكاهو داك لمن المسلسل ينتهي….

    وبعدين ما يجى داخل يلقاكى تغنى …

    حتى ان بقيتي دايرة تغني اوعك من الغنا الخايس ناس حبيبي حبيبي ….

    امسكي في الغنا الحار زي “البيجري مصيبتو و مرتو طلقانة” ولا “اندب حظي”

    ولا “دفاعنا الشعبي ياهو ديل” ولا “النار ولعت بقلبي بطفيها”…..

    اااااااااااي…. عشان تربيلو الزلعة …..والخلعة….

    بس اوعك تغني “لو الليلة يوم الرجال”….

    بيقوم يصدق و يتحنفش فوقك ساكت……..

    واوعك تشكريلو حاجة جابها….

    ان جاب لك لحم، ختي ايدك فوق راسك وقوليلو:

    ووب علي ووب علي ووب علي، غشوك وادوك الجلافيط …..

    وان جاب لك فتيل ريحة اول ما تفتحيهو وتشميهو طوالي كشري وقبلي غادي وابزقي

    قوليلو: دا شنو يا عبدالله؟……

    الريحة المتل ريحة الفسيخ دي جايبها من وين؟

    غايتو انت مغستك تقد…….

    وان جنك نسوان ولا بنات….ما تخليهو يقعد وسطن….ويتونس….

    طيريهو من البيت….

    وان ابى يمرق… قدر ما يقول ليو نكته ولا يخفف دمو قدامن صري ليهو وشيك….

    وقوليلو: انت يا عبد الله ما عندك غير النكتة دي؟

    يا خي عملت لينا بيها وجع … وش……

    اصلهم الرجال عارفاهم …

    الواحد فيهم لمن يشوفلو لمت بنات يقعد يخفف في دمو ويعمل فيها ودنفاش…..

    وتلقيهو يضحك بلا سبب…

    حتى ان واحدة قحت ساكت …

    يقعد يضحك ويصفق ايديهو….

    واوعك تخليهو معاهن وتدخلي المطبخ تسوي ليك شربات …..

    وحات الله … بنات الزمن دا ان غفلت من راجلك دقيقة بس …

    تلقيها عرستو.

  4. aflaiga كتب:

    عم سنكل : قلت لى زولك ده بيبكى وين ؟؟ فى كتفك ؟؟ اسمع منى نصيحه :
    اوع تخلى راجل يبكى فى كتفك لانو رجال الزمن ديل الواحد تدلدل ليهو كتفك يبكى فيهو يجى بعدين يقول لى عواطف :
    انا فعلا بكيت لكن هو ساعدنى بى كتفو وحرر لى بكاى ..
    ويبقى غلطان اب كتف !!!

  5. حاج أحمد السلاوى كتب:

    د. عزت ..أبو عصمت ..
    تانى قمنا وجبنا سيرة البحر والضرب ..؟أنا لمن جبت السيرة دى ( سيرة ضرب الزوجات والأبناء ) فى موضوع الأخت نور لايت قالت الحسان حيهدروا دمى .. شوف عليك الله المصيبة الوقعنا فيها .مع إنى أنا قلت إذا دعت الضرورة وحصل نشوز ..عشان كدة أنا حاطالب بحماية دولية..متواصلة 24 ساعة … أصلو الحسان ديل زى ناس عواطف عندهم عصبية زايدة شوية ..وربك يستر …يا زول….الحمد لله إنو الواحد قاعد خارج دولة أمازونيا الكبرى ..ولاّ كنا بقينا فى خبر كان ..
    أفتكر إنو شهر الكوارث دة عاد كما كان سابقا..وشايف كل الأمتحانات بقت فى مارس ..يا ريت نرجع كل حاجة قديمة عشان الشباب ديل يلقوا فرصة ويشوفوا الزمن الجميل الذى لن يعود..دة اليوم البيمر .. وين نلقاهو تانى ؟ أو كما قال الفنان الذرى الراحل ابراهيم عوض .

  6. سيرة البحر دي ما لذيذة يا السلاوي و هاك يا سنكل نصائح للزوجة

    لاتجعلي مشاغل الحياة تسرقك من نفسك ومن زوجك.

    أعيدي الشباب لعلاقتك الزوجية أطفئي أضواء الكهرباء واستقبليه بشمعه في يدك، ازرعي بيتك بالشموع الحمراء والصفراء،

    أعدي له عشاء رومانسياً على ضوء شمعة،

    أطفئي المكيفات واجعليه يلجأ إلى دفء أحضانك،

    أطفئي التلفاز ولاتدعيه يتذرع بالأخبار ولاتتيحي له مقارنتك بهيفا ونانسي،

    استغن عن الميكرويف لتحميه من روائح الطبخ وارحميه من ضجيج الغسالة الكهربائية.

    وكي تشعريه بقدراً من الاهتمام وبمعاناتك من اجله استخدمي المكواة القديمة التي تحمى على (موقد الغاز) في كوي ملابسه

    عوديه على المشي معك يداً بيد في ردهات المنزل وسط الظلام الدامس.

    مع تحيات هيئة الكهرباء والماء

    الحملة القومية

    معا للترشيد

  7. ابوالمنذر كتب:

    ابوعصمت..
    والمحبين بزعامة سنكل…
    صباح الخيرات…
    اسماء القيامه مؤنثه مثال(الحاقه,الواقعه,الزلزله,)
    النار ظاته مونثه
    جهنم كمان (تدخل ليها موش تدخل ليهو)
    المصيبه
    الكارثه
    يا ربى ليه كل البلاوى المهببه دى مونثه ….؟؟؟؟؟؟؟؟
    يا العواطفات ده مجرد سوال برى دى صدفة لغه وله شنو؟
    الا يا ابوعصمت مارس شهر الكوارث ده مذكر اشمعنى لكن دحين تلاته موش مونثه…!!!!!!
    قلته لى الخلط كان معيط نجيله.. ومكان عزيز على انت به وانا والاخر..
    هسع الخلط عرفى بالمايقوما..

  8. nono كتب:

    ابو المنذر/

    رفقا بالقوارير ، فإنهن مثل العصافير ، لكل روض ريحان ، وريحان روض الدنيا النسوان ، هن شقائق الرجال ، وأمهات الأجيال ، هن الجنس اللطيف ، والنوع الظريف ، يلدن العظماء ، وينجبن العلماء ، ويربين الحلماء ، وينتجن الحكماء ، المرأة عطف ، ولطف وظرف ، سبابها سراب ، وغضبها عتاب ، من خطه المشيب فليس له من ودّهن نصيب ، القنطار من غيرها دينار ، والدينار منها قنطار ، هي في الدنيا متاع ، والحسن والإبداع ، وهي للرجال لباس ، وفي الحياة إيناس ……

  9. nono كتب:

    وهي الأم الحنون ، صاحبة الشجون ، خير من رثى وبكى ، وأفجع من تألم وشكى ، لبنها أصدق طعام ، وحضنها أكرم مقام ، ثديها مورد الحنان ، وحشاها مهبط الإنسان ، في عينها أسرار، وفي جفنها أخبار .

    والبيت بلا امرأة محراب بلا إمام ، وطريق بلا أعلام ، إذا اختفت المرأة من الحياة ، اختفت منها القبلات والبسمات ، والنظرات والعبرات .

  10. nono كتب:

    وإذا رزقت بنات ، فإنهن من أعظم الحسنات ، حجاب من النار ، وحرز من غضب الجبار ، فاحتسب النفقة ، فإنهن صدقة ، وتعاهدهن بالبر والصلة ، فإن رحمتهن للجنة موصلة ، وكفاك أن الرسول المشرع ، رزق بأربع بنات.

    بين بقوله: (( خيركم خيركم لأهله )) ، ويا معاشر الأمم هل عندكم ، حديث (( الله الله في النساء فإنهن عوان عندكم )).

  11. سماسم كتب:

    يا دكتور عزت
    الرجل السوداني دا لو جبت ليهو لبن الطير ولو جلبت الموية من الحفير لو غتيتو بالبشكير ولو شربتو الجنزبيل ما بقول شكراً كتر الله الخير

  12. nono كتب:

    سماسم/

    الجنزبيل دة ماااااااااااااااااااااااااااحار؟

    ماااافي اي مشروب تاني

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s