لا تتحدث مع السائق ..

Posted: الخميس,26 مارس, 2009 by aflaiga in اخرى

كان يا ماكان فى قديم الزمان ناس حله طيبين وحلوين وعفيفين ، وكانو بيتنقلو لقضاء حوائجم ببص وااحد كانو هم البيختارو سواقو وهم البيختارو كمساريهو وكانو ناس ملتزمين جدا جدا بيدفعو حق تذكرتم اول باول وقبل الكمسارى ما يطقطق وبراهم بيفضو كراسى للنسوان وبراهم ناس مروه بيقيفو الشباب للزول الكبير ويقعدوهو فى الكرسى وبيقيفو فى اى محطه ( المدرسه ينزلو الطالب – والمصنع ينزلو العامل – والمستشفى ينزلو العيان – والحديقه ينزلو العاوز يرفه – واى زول بيسوى حركات ما ياها فى المواصلات كانو بيادبوهو براهم والبص ده كان مفتوح لاى زول من الحلال التانيه بشرط انو يركب بى ادبو ويدفع قروشو وينزل فى محطتو … وفى يوم  من الايام صحو الصباح لقو البص واقف فى المحطه وراكب فيهو سواق جديد !! وكمسارى جديد !! استغربو وقالو الحاصل شنو ؟؟ واول ما اتحركو تجاه البص عشان يركبو الكمسارى بدا يوقف فيهم وبدت التعليمات لاول مره يسمعوها بالشكل ده وهم الما كانو محتاجين لاى تعليمات عشان ينظمو ركوبم :

الكمسارى :اول حاجه يا ركاب السلام عليكم ورحمة الله وبركاته وبعد :

*  يا جماعه انا والسواق ده استلمنا البص ده عشان ننقذكم من الشلهته والتعب فى المواصلات .

* ياجماعه عسى ان تكرهو شيئا وهو خير لكم .

* يا جماعه الركوب بالرجل اليمين بعد البسمله .

* يا جماعه النسوان يقعدو لينا براهم والرجال براهم .

* يا جماعه المحطات اتغيرت فما تستغربو لاننا عارفين مصلحتكم اكتر منكم .

اها الركاب قالو يا جماعه مجبورين عشان نوصل نركب نسوى شنو ؟؟

وفى اول محطه :

احد الركاب : بالله هنا فى محطة المزرعه لو سمحت .

الكمسارى : طوالى يا سواق مافى نازل !!!

احد الركاب : بالله هنا فى محطة المصنع لو سمحت .

الكمسارى : طوالى يا سواق مافى نازل !!!

احدى الركاب : بالله هنا فى محطة المستشفى لو سمحت ..

الكمسارى : طوالى يا سواق مافى نازل !!!

احد الركاب : بالله هنا فى محطة الحديقه لو سمحت .

الكمسارى : حديقه فى عينك فاسق !! طوالى مافى نازل !!!

الكمسارى : محطة الجامع فى نازل ؟؟

الركاب : طوااالى مافى نازل ..

الكمسارى : مافى نازل فى عينكم اقيبف نزل الناس دى هنا لحدى ما نخش الطرمبه نكب بنزين ونفطر فى السوق ونجيهم ..

وما زال الركاب فى انتظار البص يجى راجع يسوقم حتى انقضى ذلك اليوم ويبدو ان السواق وكمساريهو انشغلو فى السوق  شويه !!!

وهنا ادرك الشعب انو لا البص بقى بصو ولا السواق بقى سواقو ولا الكمسارى بقى كمساريهو ..\وفى اليوم التانى تفاجا الشعب بانو السواق محل الكمسارى والكمسارى سايق البص وعرفو بعد داك انو الاتنين حاجه واحده مع انو الكمسارى ده مافى زول شافو سايق قبل كده والسواق ده ذاتو حوادثو كتييييره من اتعلم السواقه !!

وفى احد الايام وفى اخر محطه توقفت فجاه امام البص  حمله من الشرطه وبدات فى فحص اوراق البص ورخصة السواق وبطاقة الكمسارى وهويات الركاب وخرجت الحمله بالنتيجه التاليه :

البص لا يصلح للاستخدام الادمى !!

السواق رخصتو منتهيه منذ اكتوبر 21 !!

الكمسارى مسكين عاوز ياكل عيشو وبطاقتو منتهيه غير مجدده !!

اما الركاب فقد اوضحت التحريات انهم لا صلحون لركوب اى مركبه من كتره ما مشو كدارى واتركبو !!!

هنا صاح احد المواطنين رجعو لينا قروشنا الشلتوها مننا كلها والفكه الكنتو بتخنصروها من الباقى …

فبرز االسواق من نص الناس مخاطبا الركاب :

بالله انتو كمان عندكم كلام ؟؟ نحنا لمن استلمنا البص ده كان مكنتو خافه ومقاعدو تنجيدا منتهى وانتو ذاتكم كنتو محتالين ما بتدفعو حق التذكره وكنتو ما بتوقرو الكبير الواقف شماعه وما بتحترمو النسوان الراكبات معاكم ومحطاتكم كلها مصنع ومزرعه ومستشفى وجامع الله ده الا وريناكم دربو انحنا …

وهنا سكت الركاب ولم يستطيعو الاجابه ربما بسبب فقدان الذاكره او بسبب عدم الحوجه لمشاكل لانو من تجاربم مع السواق والكمسارى طوال فتره سواقتم للبص عرفو انو ديل الاتنين ممكن يخشو بالبص ده فى اى عامود ولا ترعه ولا ينطو بيهو من الكوبرى واصلو ما فارقه معاهم ..

المهم يا جماعة الخير لو فى زول كان راكب فى البص ده من الناس النزلو ولا اللسه راجين فى اخر محطه يورينا الحصل شنو الضبط عشان البص ده يشحن فردتو دى ويمرق نخلى السواق والكمسارى ديل لى ناس الحركه يقطعوهو معاهم ولا الحل شنو ؟؟؟

 

Advertisements
تعليقات
  1. التلب كتب:

    أفليقا سلام
    المشكلة ناس الحركة ما بقطعوا مع السواق و الكمسارى بس و إنما بحجزوا البص ذااااتو، ده إذا ما عملوا ليهم سواق جديد لبص الحلة يكونوا علموهو السواقة البتعجبهم في المدارس بتاعتهم. أما الخيار الأسواء على الإطلاق إنو يقوموا يشلعوا البص و يبيعوهو إسبيرات و في الحالة دي ناس الحلة حيقولوا يا ريت لو كنا شحادين بنستعمل الدواب فى ترحالنا بدل البص الكل مرة ناطي فيهو سواق جديد لحدي ما فرتقوهو اسبيرات

  2. aflaiga كتب:

    التلب : شكرا على المرور الراقى .. انت كنت مسطح فوق البص شكلك ؟؟!! كدى اسال واحد كان شماعه شوف رايو شنو ؟؟

  3. علي سنكل كتب:

    الولد الشقي أفليقا
    منتهى الروعه .
    لكن عايز أقول ليك نسيت تقول لينا السواق والكمساري بدأو بضرب أي زول يحتج على تغيير المحطات أو ما ينزل في محطة الجامع ، بالذات ناس كنبة النص لحد ما شردو وخلو البص وخلو مصانعهم ومكاتبهم ومدارسهم وهربوا وتركو القريه ، إلى القرى المجاوره.
    بعد داك السواق والمساعد قبلو على ناس الكنبه الجنوبيه كتيل عديل عشان ديل رفضو ينزلو محطة الجامع وطلبو ينزلو في المحطه الجايه ( محطة الكنيسه).
    بعد داك قبلو ليك علي القاعدين في الكنبه الغربيه ضبح عديل كده ، لحد ما المساعد قال للسواق يا أخي كده حرام فقام السواق والمساعد اتشاكلو لمان جاء بوليس الحركه وقال عايز يسوق السواق المحكمه ، قام السواق قال علي بالطلاق ما بمشي.

  4. ودالزبير كتب:

    افليقا

    مرور لتسجيل إعجاب بالأسلوب السلس والشيق للسرد والتصوير الدرامي السهل الممتنع .

    الخوف يا صديقي إن يدلل البص في المزاد ويباع أو كما قال التلب أن يباع كإسبيرات ووتوزع قطعه على مختلف المحطات.

  5. طارق أب أحمد كتب:

    أفليقا و السمار
    سلام
    موضوع رائع
    تتذكر لامن السواق و الكمسارى خلو الركاب فى الجامع و دخلوا السوق شان يفطروا حسب ما قالو . أها الجماعه و قعوا ليك فى الأكل لبع شى شيه و شى سمك ويشيلو و يخموا ليهم و لى ولادم و لامن جات ساعت الحساب الجماعه رفضوا يدفعو و العوا قامت أسياد القطور دايرين يداوسوهم علا جماعتك الجبنا جروا جابوا الركاب من الجامع و قالوا ليهم ناس السوق ديل دايرين يكسروا الجامع و بسوهوا دسكو أرح نكاتلم و الموت فيكم بنعرس ليهو حوريه و نعمل ليهو حفله لى رب السما وكان ما مشى الدواس ثكلته أمه
    قهوه و نواصل

  6. أيه الجمال دا

    أيه الباصات الجميلة دي قصة رائعة يا أفليقا و زادها أب أحمد ألقا باكمالها…. شكرا ليكم فضل بعد دا نلقى لينا زول يرجعنا المحطة الأولى….

    دمتم

  7. نيام كتب:

    افليقا:
    رائع ، رائع ، رائع وبس س س س س س س ..

  8. سماسم كتب:

    الكمساري:
    إنتو يا الناس الفي البص ديل عاوزين ليكم إبادة جماعية قدر الناس ما تحاول ترقيكم وتمرقكم من الأنتو فيهو دا أنتو ما راضين
    الركاب:
    آاي بس خلونا في بصنا القديم

    الكمساري :
    واله أخير ليكم نحن … ما معروف لو جاء سواق جديد وكمساري وبص جديد غير بصنا دا البحصل ليكم شنو؟

  9. Aflaiga كتب:

    ود الزبير : مشكور على التقييم اصلك زول مجامله ..
    اب احمد : بالله كدى احكى لينا حال المواصلات زمان قبل اللجنه بتاعة الترحيل الاخيره دى تستلم !!! تعرف من الاشياء السيئه التى قام بها السواق والكمسارى :
    * البص بدا باسم ترحيلات الوحده الوطنيه .وسرعان ما بقى اسمو ترحيلات الهدى الاسلاميه وسرعان ما بقى اسمو ترحيلات المسار الوحيد وسرعان ما بقى اسمو ترحيلات السراط المستقيم وسرعان ما تحول الى ترحيلات الزارعننا غير الله مؤخرا الى ترحيلات الوحده الوطنيه بدون وحده ولا وطنيه !!
    * فى البداية البص كان بيرفع ناس الحله على مضض بعد شويه بقت الكراسى القداميه لدفعة الكمسارى وبعد فتره بقت الكراسى لاهل السواق وبعد فتره بقو يدو اى زول بيدق جرس مع الكمسارى كرسى قدام وقالو الما بدق جرس ما بيشيل كرسى .
    * معظم الركاب بقو ما بيسالو من التسعيره ولا كرت الخط ولا تصديق الركاب والبيسال منهم عن الحاجات دى يا بينزلوه فى الشارع العام !! يا لو كمان حنكو بقى سنين وعندو قريبو فى القسم بيرجعو ليهو قروشو ويجيبوهو يقعد قدام جنب السواق هو صحيح قاعد جنب السواق لكن ما بيدوهو يسوق بس عشان ناس المرور لو جو مارين يلقوهو جنب السواق .
    * السواق كافى البلا بدل ما يربط حزامو !! هو ربط احزمة الركاب لمن الحزام انطبع فى الجلد وبقى جزء اساسى منو !!
    * برغم انو البص ما مرخص لكن السواق حريف فى الزوغان بى جوه الحله ومره يركب مكنه روسيه ومره امركيه ومره ايرانيه مع انو مقتنع انو المكنه الامريكيه قويه لكن بتصرف بنزين !! اصر فى الايامات الاولى انو ياصل حتت المكنه دى بمكنه ايرانيه تجميع للهنتر القديم !!
    * المشكله الشعب قى راسو لافى البودى سودانى والصينيه الرخيصه الركبوها دى عامله ليهو لفة راس لانو الرخيس بى رخستو !! والمقاعد من بلد والفرش من بلد .
    * اها لمن نقة المواطنين كترت فى البص ام السواق اشترى لى اهله عربات سغيره ملاكى عشان يتجنبو نقة الركاب وحسدم .
    * مره مره السواق ده بتجيهو صحيه يقوم يقول يغير خط البص ده ويقيف للناس فى محطاتا العاوزاها لكن اهل الكمسارى مصرين البص ما يغير محطاتو !! وقامو ظللو القزاز القدام للسواق ووزنو ليهو الدركسون فى اتجاه معين ..
    وجاييكم تانى …

  10. طارق أب أحمد كتب:

    عدنا
    لامن البص دور من جديد أها الجاز كمل وناس السوق رفضوا طبعا يدو السواق جاز لأنو عارفنوا بياكل حق الناس . قام السواق جرى للمرابى كوهين يانج و باع ليهو 100 كيلو من لحم أولاد الركاب مقابل أنو المرابى يمرق الجاز ويخصم منو الدين ويدى السواق جاز الباص و الفيها النصيب

    وطبعن كوهين حلب الجاز من دقنو و أفتلوا و الكلام دا أكيد ما بعجب ركاب مؤخرة الباص فكسرو ليهم كم كرسى وفنوهم فى الكمسارى
    والعوا دورت جوا الباص المره دى

    إلا طبعن البوليس الجدجد واقف يراقب

  11. aflaiga كتب:

    اب احمد : بالراحه يا زول نحنا لسه فى اول محطه .. وحده وحده ورينا كدى الرحله دى من بدت لمن ناس الحركه جو !! وما وريتنا رايك انت مع انو ناس الحركه يقطعوها مع السواق ولا نقش التراب ونقعد واطه ؟؟

  12. محنك كتب:

    البص دا انا عرفتو
    بابو الورا فاتح … وبدفق عفش بره … وقزازو مكسر …. يمشى بالجلاله … الغريبة فى ناس تجى من بره وتركب قدام .. احتمال يكون باعو جزء منه واجروا جزء ونحن نكون قاعدين فى مقاعد من الباطن … بس يا افليقا الحكاية دى حاره حاره شيلها … 21 اكتوبر دى اهلها ماتو لكن ما جات واحدة بعدها ليه ما عديتها … بتعدو حقكم بس

    السواق دحين ما مطالب

  13. افليقا كتب:

    ود الخلا : الكبير كبير – اذدان البوست بحضورك الراقى يا عفيفا بلا اذى ..
    تعرف يا زعيم الركاب وقفو ورا السواق حفاظا على البص مع انو الركاب داخل البص على مسئوليتهم الخاصه واى زول ياكل نارو ده كان شعار البص من السواق ده استلم !!! طيب السواق ده ما شويه يفكر انو الركاب الوقفو معاهو برغم الكسور والرضوض دى كلها يستاهلو يسوقو بيهم براحه !! ويقيفو ليهم فى المحطات الكريمه البتنفعم !! والله انا بعرف واحد عندو سكر كان راكب مع السواق ده ومزنوق ابو يقيفو ليهو كلو كلو لمن البولينا طلعت ليهو فى راسو !! وبعرف واحد تانى لمن نزلوهو من البص لانو ابى يدفع اكتر من التذكره بقى يمشى يكورك للبصات السياحيه !! وبعرف واحد تانى بقى ماشى كدارى من البص ده بقى كده !! وبعرف وبعرف وبعرف .. والمهم فى الامر انو الناس ديل كلهم برغم اذيتم من السواق ما ببيحملو تجاهو اى ضغينه شخصيه لانو عالم ( السواقه ) !! ده اصلو كده لكن ما عندهم اى استعداد يركبو معاهو تانى لو بيسوق بى نفس الطريقه القديمه !!!
    مره اخرى حباب طلتك البهيه وراجينك بكره اساسى قبل الكراسى .

  14. افليقا كتب:

    محنك : شكرا على المرور الراقى .. عشانك نشيل اى شيئ لكن عليك الله الكمسارى ده ياهو بتاع 21 ذاتو ولا واحد تانى ؟؟ حيرنا ذاتو !!

  15. طارق أب أحمد كتب:

    البوليس الجدجد: ركستك و بتاكتك والجنسيه وأية أوراك سبوتيا سواق وا كمسرى أنتا آآآمل دشمان فى شارع بتاع هاى واى

    السواق للكمسارى : ياخى ما عندنا فله فك ليهو اللستك الأزبير خلينا نتخارج

    بوليس تانى : بأولك أيه يا روح أمك أيه الزيطه ديت
    السواق للكمسارى : فك ليهو الحلايب بتاعت الصاجات خلينا نتخارج
    البوليس التانى : تسلم لى حبيب ألبى
    بوليس تالت : دا شنو دا سواق مجنون أعمل ليهو تلاته مخالفتين
    السواق للكمسارى : فك ليهو الفشقه بتاعت الجربكس خلينا نتخارج

  16. طارق أب أحمد كتب:

    أفليقا معليش طلعت بى الترس التامن طوالى

    ود الخلا ترحيلاتك ملعوبه

  17. نيام كتب:

    أب احمد :
    وانخدع الركاب بهذه الدعوة لانها جاءت من كمساري كبير ماركة ابولحية ..فقاموا بجلد المطعمجية وكانوا يشعرون انهم في قرارة انفسهم يجلدون ذاتهم ..وفجاتن صاح الكمساري الشيخ هيا اركبوا هيا..فتسلق المتسلقون و ركب الدهماء و السذج من الركاب وظل باقي الركاب علي قارعة الطريق يلعنون حظهم العاثر ..فهم كالمنبت لا دربا قطع و لا ظهرا ابقي .. وهم في دهشتهم تلك اذ بالقاضي يقف علي باب المطعم يطالبهم بدفع نفقات ما اتلفوا و فاتورة المشاوي و المطايب التي لهطها السواق وكمساريهو..

  18. طارق أب أحمد كتب:

    أفليقا ثرو نيام

    أهو الريس نيام رجعنا للمحطه ال أنتا قاصده نشوف القاضى حيسوى شنو

  19. aflaiga كتب:

    نيام : لا شك ان السواق الكمسارى قد درسا نفسية الركاب تماما فهم كانو كمسونجيه فى الموقف وعندهم طبالى واكشاك فى الموقف وكانو قاعدين بيتفرجو على سلوكنا فى المواصلات وعرفو نحنا وجعنا وين .. عشان كده لمن استلمو البص ما لقو صعوبه فى سواقتو وسواقتنا معاهو بس هم نسو انو اى فرده اذا ما تمت تنقلب !!! ودوام المشوار من المحال !!!
    الغريبه زمان محطة الجامع كانت عارمه برضو والناس بتنزل بى رضاها بعد تكمل شغل فى المصنع والمزرعه وبعد مرات بتصلى فى محل الشغل !! لكن تقول شنو بس اسى فى ناس كرهت محطة الجامع دى عشان النزول القسرى !!!
    اعاد الله لنا بصنا واسعا يسع الجميع بما فيهم السواق والكمسارى بس المره دى يركبو بى ادبم زيهم زى الناس ويدفعو تذكرتم زيهم زى الناس …

  20. د.ياسين شمباتى كتب:

    افليقا ثرو اب احمد…

    قلتوا لى ناس الحركة مع منو؟؟مع الركاب ولا طلعوا هم كمان حرامية وعايزين (غمتة) السوق والكمسارى؟؟ولا طمعانين فى شراكة فى البص وركابو؟؟

    وياربى السواق دا من ركب البص دا كان عارف مسارو وسواقتو على وين ولا كان فى زول جنبو بوريهو الطريق وهو المال بيهو على درب الودار دا؟؟

    والركاب ديل ذااااتهم كلهم كايسين حقهم ولا فى ناس الكمسارى ما شال منهم او رجع ليهم الباقى بدون خنصرة؟؟

    رحلة عجيبة والله..

  21. nono كتب:

    شباب المدونة لكم التحية/
    كان يا ماكان فى قديم الزمان واحد سواق جاه ولده
    الصباح قال ليه يابابا عيني حمرا وما قادر
    امشي _ابوه قال ليه :لما تبقي خضرا أمشي؟
    لنا عودة………..

  22. د.ياسين شمباتى كتب:

    اب احمد..ترسك صعب,,وشايف نيام طلع بى نمرة 9..

    لكن يا افليقا ممكن الكمسارى والسواق يرضوا تانى انهم يدفعوا زى الركاب؟؟ما اظن..مافى طريقة تطلبوا من مصلحة النقل الميكانيكى بص جديد ومن وزارة الاشغال كمسارى وشواق جديد؟؟كدى امشوا علفيهم وشوفوا ردهم شنو..

  23. حاج أحمد السلاوى كتب:

    البروف .. الدينمو .. السيكوباتى .. المبدع.. أبو حمودى .. أبو سروية.. أفليقا.. فى حاجة ناقصة ولاّ كدة كلو تمام عشان نمشى نحصل نركب البص مع الجماعة…
    حبكة رائعة ..وتصوير اروع وخيال واسع ..ودة شىء كان ملاحظ من فترة طويلة …وسؤالى السغيروووونى الدايما عاوز ليهو إجابة ..إنتو جيتو من وين..واتلميتو هننا كيف ؟ سؤال صعب ..مش كدة ؟
    واكتر حاجة عجبتنى فى القصة التعديلات الحصلت المشابهة للواقع المعاش من الستينات وحتى يومنا هذا… علماً إنو السيكوباتى المبدع زااااتو لم يعيش تلك الأحداث الدرامية …ويا ريت نرجع تانى للصفر الكنا فيهو كما يدعون أنهم إنتشلونا من الصفر وهم ما عارفين إنو الصفر دة رقم مهم جدا ..بس ما تكون بالناحية الشمال .
    ويا حليلنا نحنا اللا لمينا هنا ..ولا هناك وبقينا زى الزول الواقف فى السلم لاعارف يطلع .. لا عارف ينزل..وربك يستر لقدام .

  24. aflaiga كتب:

    يا شباب : كدى بالله خلونا نعمل تقييم للرحله من بدايتا ( الماضى ) ونقيم برضو الوقفه بتاعة المرور ( الحاضر ) عشان نقدر نطلع بى رؤية واضحه تجاه الفرده الجايه ( المستقبل ) .. وعشان نكون منطقيين السواق والكمسارى ديل شعارم لا بصات بلا ابنصات !! وعشان ما نبقى بلا بصات لازم نستصحب معانا الابنصات كمكون مهم فى الفرده الجايه لانو الاقصاء هو كان السبب الوصل البص للمحطه دى ..
    شمباتى : منو القال ليك ما بيرضو يكونو ركاب عاديين فى البص ؟؟!! هم الان فى مازق مستعدين يكونو فيهو مسطحين عديل كده بس الناس تحفظ ليهم كرامتم وعلى قول المثل اكرمو سواق قديم نزل من عربيتو ..
    كدى يا عقلاء المنبر شوفو لينا صيغه وسط نمشى بيها البص ده لانو الشارع ما عاد يدار بالحلول الجذريه والجراح العميقه بل يدار بالموازنات والمعالجات ..
    كدى واحد يدينا خارطة طريق للبص ده توصلو اخر محطه بدون مشاكل ..

  25. aflaiga كتب:

    حاج السلاوى : والله يابوى ما طالبنى حليفه الواحد فعلا ما حضر الزمن داك لكن اقل وصف ليهو :
    ابوى الله يرحمو كان بيطلع الصباح هدومو نضيفه ويركب البص ده ويجينا راجع هدومو نضيفه وقدر القروش الشايلا فى جيبو بيركب بيها واصلا مافى يوم اشتكى انو كان واقف وفى زول اصغر منو قاعد فى كرسى !!
    لكن عليك امان الله اسى انا بركب الصباح بى بنطلون وقميص برجع نهاية اليوم بى فنله وبرمودا ومديون !!!

  26. طارق أب أحمد كتب:

    الغريبه إنهم لامن أستلموا الباص إنسطلوا يى ريحة البنزين وبقوا مطوبرين الركاب
    جاهزين الزارعنا غيرو اللجى يقلعنا نحنا قلعنا الباص دا رجاله و حمرة عين الدابر يسوقوا علا يشوف ليهو عكاز

    وكل ما الباص يمر بى مشروع زراعى أو مصنع يزيدوا السرعه و تمسكم أم هلا هلا و يقوموا يكوركوا نأكل مما نقلع ونقلع ما كان يزرع ,,,نصنع ما لا يلبس المهم الباص يتدمر الولاء قبل الكفاءه

  27. nono كتب:

    aflaiga/

    يمكن السواق الكمساري ماشين بي نظرية درب السلامة للحول قريب؟

  28. طبعا بعد داك السواق بقى مطالب من كل حتة فالبص كان بالأقساط و لا بد من تجهيز توريده بأخنق فطس لكي يعيش…

    السواق سايق ليهو حديدة
    مسكين جاري ورا التوريده
    ما فاضي لدوشة شديدة

    و في سبيل تجهيز تلك التوريدة نسى حياتو الاجتماعية و صار مقصرا و لمن مرتو ضربت ليهو و هو سايق و زهجان قال ليها:

    أنا قلت ليك بمشي ناس (ابكرون) و أجي:
    ما قلت لي
    ياخ قلت ليك
    قلت ليك ما بتمشي ناس أبكرون براك
    بالا لخمة معاك بلا كوراك ما بتمشي لي أبكرون براك
    ما قلت لي
    ياخ قلت ليك
    ما قلت لي
    ياخ قلت ليك

    صوت: اقعدوا انتو في قلت لي ما قلت ليك لمن أوكامبو داك يجيك

  29. د.ياسين شمباتى كتب:

    افليقا..والله مثلك دا ممتاز(اكرم سواق نزل من عربيتو),,وياهو دا الشغالين بيهو الركاب من زماااااان,,كدى اتأكد من السواقين القدام-فيهم ناس لسه عايشين-فى زول غلط فيهم لما مشوا كدارى مع الشعب ولا لما مشوا يشوفوا ليهم بصات برة ولا لما جوا راجعين وركبوا قدام تانى؟؟؟
    والله السواقين ديل لو لقوا ليهم جلدة كاااااربة كان عرفوا ان الله حق..وخارطة الطريق دى اهم شئ فيها يخلوا الركاب يختاروا ليهم سواق من بينهم ويكون عندهم الحق فى انهم يغيروهو متى ما عمل سيك ولا ميك..

    طارق اب احمد..والله قطعت مصارينى من الضحك_على مغصتنا_من الجماعة الانصطلوا ومطوبريننا,,ومغصتى زيادة من الطابور البيطوبر ليهم..

    الليلة مافى نوم……………

  30. نيام كتب:

    نأكل مما نقلع
    ونقلع ما كان يزرع
    ونلبس ما لا نصنع
    ونصنع سالفة تضيع
    وممكن نصنع اسرع
    وباصنا الهايج كوّع
    ونحن لسه بنلبع
    والعاجبو يبشر فوقنا
    والكاره يكسح يطلع
    ونحن لو ما جينا
    ماكانت روحكم تتطلع
    جنيهنا الكان يا حليلو
    وديناركم كم مرة اترقع

  31. بشار أحمد بشار (إبن برد) كتب:

    أفليقا: إنت امبارح بالليل كنت وين؟؟ في بيت المال ولا إب روف ولا القماير؟؟
    باقي الرائعين : لاكين ما جننتو أدب الرمز جن.
    عبدوش: عاد لكم بملكة ابداع رباعية الدفع.

  32. حاج أحمد السلاوى كتب:

    اخونا ..نيام ثرو ..الدينمو ..
    فى مقطع نسيت تضيفه للآبيات المذكورة اعلاه ..
    ونضحك مما نسمع ..

  33. حاج أحمد السلاوى كتب:

    السُمّار الكرام .. أبناء الكرام.ز
    حسه عليكم الله يا جماعة الخير نحنا لينا كام وخمسين سنة ما قادرين نلقى لينا سواق كويس عنده رخصة عامة ورخصة دولية وبيعرف يسوف قندرانات ولوارى سفنجة … ومساعد ليهو ( كمسارى ) بيعرف يطقطق كويس ..بس يكون أمين يرجع باقى الفكة للركاب التعبانين الما لاقين حق القفة.زبدل ما يكوش عليهو ويطلع بمبلغ محترم آخر الدوام ( يعنى نهاية اليوم …)..؟
    إيه رايكم نعمل إعلان فى الصحف والمجلات .. مطلوب سواق ( للعمل لدى عائلة محافظة … )وخلونا نستغنى عن الكمسارى لحد ما نشوف آخرت السواق شنو ..الكماسرةديل بعد مرات عندهم عصبية زايدة حبتين ..ومستعدين يشاكلوا ضلهم ..أكان ما لقوا زول يفشو خلقهم فيهو ..
    السؤال الفجأة ظهر لى قدامى .. مين حيكون رئيس لجنة المعاينة زاااااتها لإختيار السواق المناسب.. ولحد ما تتفقوا برجع ليكم تانى!!!

  34. مُخير كتب:

    المبدع أفليقا
    الحبان في كل مكان
    بالغت يا مجنون، النص ده من أروع ما قرأت في سوداننا، وزي ما قال حاج السلاوي الروعة في القراءة الجماعية لما بين السطور، بتصور لو زول من خارج الجك إطلع على القطعة دي بيفتكر المعلقين مجانين والكاتب أجن منهم….

    يديدكم العافية ويحفظ ليكم بصكم، وهو قطر ولا بص الغنوا ليهو أمات طه،
    هن مش قالن الشنو ما بعرفوا داك الشالك إنت
    يتكسر حتة حتة وإنت ين يالحبيب
    غايتو كان بص كان طيارة، كان قلتو خير، وقعدتو في وطاة الله دي، كان ناس الحركة وناس السوق وناس الدناي كلهم كسروا حتة حتة، برضو ممكن بالنية الطيبة والإيثار تجمعو قطعة قطعة ويشيلكم كووولكم ويوصلكم بالسلامة لمن تزلوا في محطة شرفي ولا حمد النيل ولا البكري ولا فارووق ذاتها.

  35. د.ياسين شمباتى كتب:

    العزيز مخير..سلامات..

    كدى (الايثار) دى خليهو بالجنبة,,والله القطر الحالى دا شغال يشيل من البيوت على البكرى وفاروق وما شابه!! دا يصلحوا ليهو اتجاهو كيف تانى؟والله قرضنا قرض..
    بس زى ما قال حاج السلاوى,,لجنة المعاينة دى يلقوها كييييييف؟؟ولا كمان نجيب لجنة من برة ويشيلوا حالنا ؟؟؟

  36. مُخير كتب:

    الحبيب الحاج د. ياسين
    يا خوي الإيثار لابد منه ولا غني عنه ومافي طريقة نخليهو بالجنبة،
    ليه ؟ لأنو لوما في إيثار حتستمر الكنكنشة والرئيس حيكون رئيس لأكثر من عشرين سنة، والوزير حيظل وزير لمن الله يآخذوا وبالتالي الغفير حيكون غفير لمن يلاقي ربه، وهكذا لن يتسنى لسنة التطور الطبيعي أن تحدث، ويجدر في هذا السياق التنويه لما شاهدته البارحة صدفة حديث د. فاطمة عبد المحمود بمناسبة يوم المرأة مع مقدمة البرامج الممتازة كوثر بيومي أنها كانت وزيرة في سبعينيات القرن الماضي والآن بعد أكثر من أربعة عقود لا يزال تمثيل المرأة رمزي رغم وجود كفاءات نسائية عديدة وأشارت إلى أن الإناث يشكلن أغلبية ساحقة في المؤسسات التعليمية والكفاءات المهنية، ويخيل إلي أنه لو قدُر للمرأة أن تحكم لربما كانت أقل أنانية من الرجل في الإستئثار بالسلطة وإحتمال تدي الدركسون لسائق آخر، عرفت ليه الإيثار مطلوب والكنكشة مرفوضة.

  37. عارف يا افلايقا – انا من يوم كتيت مقالتك دى وانا بقراها كل شوية – وماعارف ارد عليها او اعلق بى اى حاجة.

    الله يديك العافية ويخضر كيبوردك.

  38. aflaiga كتب:

    شباب : اسف جدا جدا لعدم متابعتى للبوست لكن حقيقة انشغلت بترتيبات الرحله والتداخل فى البوستات التانيه حقتكم .
    وبقيت زى ود عمنا المشينا نزورو فى البلد لمناسبه وما فارقنا من يوم جينا لحدى ما سافرنا وفى اخر يوم قال لى ك
    ابن عمى : انت يا افليقا يوم واحد ما جيت زرتنى فى بيتى ؟؟!!
    افليقا : وانت اديتنى فرصه ما اليوم كلو يا قاعد معاى فى بيت الوالد يا حايم معاى لى ناس لبلد زور خالتك وزور عمتك !!!
    حقيقة قصة البص دى تحير جدا جدا ..
    طبعا من المؤسف انو فى ناس الكنبه الورا فى البص اخدو حق تقرير المصير وشكلهم حيشترو ليهم كابينه سواق ويقطعو البص من الخلف ويركبو ليهو مكنه وبرضو القاعدين فى الشبابيك الغربيه ( مع انهم ما بيسفو لكن بيزرعوهو !! ) برضو مفكرين يقطعو البص فى حدادين الواطه ويركبو ليهو كابينه سواق ويربطو مكنه !!
    الغريبه ناس المقاعد القدام الشماليه الراكبين جنب السواق – السواق ذاتو خلاهم قاعدين قدام وجا قعد فى النص يطقطق الركاب !!! ونسى ناسو القدام معاهو !!!
    وجاييكم قصة البص دى ما بتخلص كلو كلو ..
    شكرا لكل من مر من هنا …

  39. حاج أحمد السلاوى كتب:

    الدينمو … السيكوباتى .. ابو حمودى ..
    غايتو البص عشان نحافظ عليهو و عشان ما كل زول يجى ويقطح منو حتة ويركب ليها مكنة وكفر ( لستك ) واحد بس ولا يعرف يمشى قدام ولا ورا.. وبعد شوية نلقى البص دة بقى مشلح وزول عاوزه مافى ..يقوموا يجو الشرامة ويلا كل واحد يشيل الدايرو… أنا أقترح نوصل ليهو ترلة عشان يركبوا فيها الناس الما لقوا حته فى الجزء الأولانى من البص ( كدة .. كدة .. كدة .. يا الترلة القاطِره … السيكوباتى … )..
    إيه رايكم فى الإقتراح دة ؟؟؟

  40. البشاوى كتب:

    افليقا
    اقول عليك شقى ومجنون بحب البلد و الناس
    هو البص دة كان مظلل ولا قزازو مكسر زى ماقال الشيخ ود الخلا
    اقيفو نزلونا احسن نمشى كدارى مع ابكرون لاعساكر لادساكر لاتذاكر

  41. نيام كتب:

    افليقا:
    ماعندنا مانع اسياد بلد يقطعوا علي كيفهم و يركبو مكنتهم الماخمج بس ما يكون المكن مستورد..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s