التطعيم ضد الجدري

Posted: الأربعاء,1 أبريل, 2009 by عزت in اخرى

يختص كل بلد بمفردات يتداولها الناس و تكون معروفة بينهم و قد لا يمكن فهما في خارج تلك الدولة و هذا ما يطلق عليه اللهجة و التي تكون غالبا خليطا من لغة سائر أهل البلد مطعمة “بشويت” دارجي ممعن في المحلية و لكن قد يصعب فهم اللهجة لمجموعة أخرى من الملل و هذا ما يطلق عليه الرطانة…فقد يشترك المحس و الدناقلة و الحلفاويين في بعض المفردات و لكن يمكن أن يفهموا رطانة بعضهم البعض و لن يتعدى ذلك بالطبع لفهم رطانة الدينكا…. و قد تفهم بعض مفرداتها و التي دخلت اللغة العربية في الكثير منها و لكن بجرة الكلمة أو ضمها و لكن اذ “رخيت أضانك” قد تفهم شيئا و تعودت على ذلك بحسبي “سوداني” على قول أهل “مرتي” لا أجيد رطانة الحلفاوين و لا أدقق كثيرا فهم يرتاحون للونسة بالرطانة و مرة مرة لمن يضحكوا يحاولوا ترجمة النكتة مع الاعتذار كل مرة أن الترجمة تفقد حلاوة النكتة… فلم أعد أطالبهم بالترجمة و لكن تعودت أن أضحك عندما يضحكون حتى ان كانت الضحكة علي و لكنهم لا يقطعون في الناس فلم أعد أهتم.

عادي جدا و لكن نشط الشباب عندنا و صاروا يتداولون كلمات قد لا تجد لها سندا في لغتنا الأم و لا الحبوبة فهو نوع من كلام يفهم في سياق معنى الكلمة أو تصريفا لأسم… فقد تفغر فاهك و لا تفهم اثنين “يقطعان” فيك كمن يقول (ياخ صاحبك عامل لي فيها الشريف الرضي) هنا يكونوا قد استعاروا معنى اسم لشخصية مشهورة و جعلها دالة على الشرف أو كمن يقول (أمبارح دقيت ليهو لقيتو قافل القزاز) فقد لا تعرف ما علاقة قفل الزجاج مع الدق … و هكذا تتعدد اللهجات و كلام “الراندوك” و قد لا تفهم شيئا عشان كدا تعود أن تتفاعل حتى و ان لم تفهم المقصود… و لكن هناك مرات و مواقف طريفة تستدعي الوقوف عندها قليلا… و التي تتعلق “بفهمتني غلط” اذ تحصل بعض المفارقات بين مجموعة أو اثنين ليفهم أحدهم غير ما يرمي اليه الأول فيشرع في فعل أمر لم يطلب منه و تحصل الطرفة… فاللبنانيين مثلا (يبلشوا) في الأول بينما نفهمها نحن أنهم قد تركوا الأمر و تخلوا عنه و غيرها من الأمثلة الخاصة بممارسات يطلع بها البعض في دولة قد تجد انها تعنى العكس في أخرى و يمكن للاخوة أن يدفعوا بالمزيد من “ما تفهمني غلط” … و التي عبر عنها صاحبنا عندما تحدثت اليه زوجته: بالله رقبتي معسمة ما قادرا أتلفت…

قال (سعيد) بالله أنا أمبارح شايفك راقدة في مخدة عالية…

(يخسي عليك) ما عدلت رقبتي مالك… قالت (عواطف)

فكرت أعدل رقبتك لكن خفت تفهميني غلط !!!!

عليه ترك سعيد عواطفه تهنأ “بالنومة” الما مريحة خوفا من الفهم الخاطئ و الذي كان في صالح أمرأة في بلدة ما عندما ذهبت الى العنوان الذي وجدته في احدى الصحف المحلية و هي حاملة في يديها (بطتين) ducks فقد قرأت أن فلانا يعرض بيع سيارته ببطتتان… و هي في لهجتهم المحلية تعنى (ألفين دولارا) فغنمت السيارة التي حكمت لها بها المحكمة لأن القانون لا يعرف أن بطتين تعني قروشا… و هكذا يتداول الناس الكلام و ان لم يكن واضحا قد لا يدل على المعني… و لكن ما بال صراف الجمعية التأسيسية فقد وقف أمامه عضوا يريد مرتبه؛

فقال له : اسمك؟

قال النائب: جبر الله خمسين

فقال الصراف: جبرالله كم؟؟؟؟؟؟؟

فوقع في المحظور اذ مزجع الأرقام بالأسماء فالطبيعي أن يستفهم بجبرالله منو (طبعن)

و تتوالى الحكايات لكن أطرفها ما سمعته بالأمس فقد كان أحد الكورنجية الذي تعلق قلبه بالكورة يتحاور مع آخر في أمر الكرة التي شغلت الكل و تعددت أسماء الفرق و الروابط و مسارح المنافسات… فقرا عنوانا عريضا و استعجب لزميله أنت الِفرق دي بيجيبوا الأسماء بتاعتا دي من وين….

هسة التطعيم ضد الجدري ملعوبة وين و الفريقين ديل ذاتم منو  ….


securedownload

فما رأيكم دام فضلكم هلا دفعتوا بالمزيد من مفارقات “فهمتني غلط” و الا “دا قال شنو…. فالمساحة في خانة التعليق قد تتسع…

About these ads
تعليقات
  1. د.ياسين شمباتى قال:

    عشمانة……….العشا

    زيدان ابراهيم………….زيادة وكدة

    خوجلى عثمان…………خجل وحياء

    فريد الاطرش………دق طناش

    وبنجيك تانى..

  2. nono قال:

    كثيرا ما يتم الفهم الخاطئ لمعنى غير مقصود ! .. مرده
    لاختلاف مدلولات الألفاظ .. وتغير المعاني من
    مكان لآخر ! .. وهذا يحدث في الكثير من الحوارات
    والأحاديث بين الناس، وجرت العادة أن ينتهي الأمر
    بتفهّم الموضوع، ومن ثم الضحك والدعابة، ليبقى
    ذكرى جميلة ونكتة لطيفة ! ..
    حكى أحد مديري المعاهد أنه أتى بأحد المدرسين السودانيين من العاصمة بسيارته، وبعد أن صلوا المغرب قال المدير للمدرس وبلهجته السريعة، تشأ عشأ يا أستاذ ؟ أي : هل تريد عشاءً، وخرجت من فم المدير وكأنه يقول : شعشع يا أستاذ، والتي تعني شرب الخمر ! فغض المدرس وقال : عيب يا أستاذ، هذا ما يليق بك ! .
    اندهش المدير وقال : ماذا جرى يا أستاذ ؟ أنا والله ما غلطت عليك ولا تفهمني غلط، أنا قلت لك : تريد عشاء، فقال المدرس بعدما هدأ غضبه قليلاً : يا زول وضح كلامك ولا تخليني أفهمك غلط .

  3. الغبشة قال:

    واحد سودانى متزوج من شاميه ،وفى يوم بتونس معاها قال ليها ماتشوفنى انا لون بشرة ابيض كده انا طالع على خيلانى لكن ابوى أخضر,الشامية صرخت بكل استغراش شووووووووووووو؟

  4. طارق أب أحمد قال:

    واحده قديمه من مجتمع سائقى الشاحنات
    سائق شاحنه ملقب ب أصلى توفى فى حادث حركه على طريق بورسودان و أختار زملاؤه أفضل أثننين منهم لأبلاغ الخبر لوالد المتوفى
    بعد السلام الأول للتانى

    يا حبه ما تفرتق اللغم خلينا نشتت
    التانى للوالد
    يا جلك ولدكم أصلى دقس و أتلحس ,,فاتحه

  5. شكرا يا حبايب

    للزيارة و التعليق و اضافة المفارقات للبوست …

    غايتو يا ود الخلا نحن بنمشي (للمباكننا) و (الما مباكننا شي) معليش ما تزعل ما تتداخلت في (الذكاة العاطفي) خفنا تفهمونا غلط…. لكن انشاء الله نجيك يوم فرح الوليدات… انت بس فكها شوية و أدينا مثل و نكتة تقرب لينا الموضوع… و على ذكر السواق…

    طوال زواجه الذي دام ستة سنوات لم تعرف مرتة القديمة أن هناك جديدة و بي عيالها كمان بس يوم و في انشغال (سعيد) و عدم تقديره ان السواق دا جديد ما بيعرف بيت المرأة الجديدة …

    قام سعيد جاب الولد من الروضة و قال للسواق أمش وصل الولد للبيت
    فلما كان السواق جديد و لا يعرف سوى البيت الذي استلم فيه المدير في الصباح… أنقر ما ودا الولد للمرأة الكبيرة…

  6. اليوم داك و في قمة انفعاله و في حضرة الريس و بعد الجنائية طوالي و في لقاء جماهيري يبدو في شلعوها الخوالدة و الا وين ما عارف..
    قال: نرحب بالسيد اللواء جعفر محمد نميري
    قام واحد لكزوا
    فصلحها نرحب بالفريق جعفر محمد نميري

    الله يطرا بالخير
    فهما غلط مرة و قال
    نحي المعلم علي حَسَن سلوّكة

  7. ابكرون قال:

    عزت : من مفارقات اللهجات اهلنا البني عامر في الشرق لمن يحكي ليك انه ذهب لفلان ولم يجده يقول :مشيت ليه (استناني مافي)…ماعارف يكون استناه كيف وهو مافي..!!
    شمباتي اضافه : عامله لي شريفه فاضل
    عامل عون الشريف

  8. طارق أب أحمد قال:

    أبكرون
    شيخ بنى عامراوى قال لى أنا ماشى الخرتوم أشكس
    بعد أسيبوع رجع وقال لى مشيت الخرتوم شكست الدكتور قال لى ما فى شى بس إلتهابات

  9. حاج أحمد السلاوى قال:

    أخونا عزت المرطب دائما وكل المرطبين ..سلام .
    إختلاف اللهجات والمصطلحات يأتى دائما باكثير من الطرائف والنوادر ..قبل فترة طويلة وقبل ما نختلط مع الشعوب الأخرى ( المحبة للسلام ) أى قبل عصر الفضائيات التى ساهمت فى إنتشار اللهجات واللغات ..وخصوصاً ما ياتى من بلاد الشام ..فقد قابلنى أحدهم محيياً ومرحباً : إيش لونك أحمد ؟ فما كان منى إلا أن رديت عليه بكل عفوية السودانيين .. لونى ؟..لونى أسمر .. أهو أنا قدامك ..ما شايف لونى إيه ؟ .. فما كان من الرجل إلا وانفجر فى موجة ضحك عارمة .. فاندهشت أنا الآخر من ضحكه المفاجىء وليس هنالك ما يدعو للضحك فى تلك اللحظة ..وسألته : إيه المضحك وخلينا ننبسط معاك .. فقال : يا احمد أنا بسالك عن حالك وصحتك واخبارك .. تقولى لونى أسمر ؟فرديت عليه .. غايتو دى اول مرة اعرف واسمع الإصطلاح بتاعكم دة..ونحن بنقول ..أزيك .. كيفنك ..كيف حالك..لكن جنس كلامكم دة يطرشنى ما سمعتو … وما فهم الرجل الكلام..وبدأ يسال إيش تقول ؟ .
    منذ فترة قصيرة بدأت أتعلم لغة أهلنا الدناقلة بحكم وجودى دائما مع مجموعة كبيرة منهم حولنا ..ولكن لسؤ الحظ المعلم ما كانش يجيد اللغة مضبوط ( الأخ بيومى متولى ) .. يعنى نص نص لأنه طلع بدرى من المنطقة ..فسمعنى الأخ عوض قرشوم ( رئيس الجالية السودانية.. وهو دنقلاوى على السكين .. لدرجة إنو لسانو به عُجمة ) فقال لى إنت قاعد تتعلم لغتنا زى الزول البتعلم إنقليزى من أستاذ تايلندى..
    ونلاقيكم فى اللفة ..

  10. BakriMusa قال:

    بلدياتنا كان قاعد في البص جنب الباب في موقف بصات (الديوم الشرقيه)

    *يا حاج الباص ده ماشي وين؟
    *ماشي (الديم )
    *(الديم بالظلط) ؟
    *ايوه بالظلط اوماااال هايتيير (ح يطير )

    واحد بلدياتنا تاني في نفس موقف الباصات جات واحدة عايزه تركب

    *اسمعي يا هاج الباس دي ماشه فين ؟
    *زولنا عرفها دي من جماعتهم من العربي المكسر طوالي قام شبكها ليك رطانه وقال ليها فيما معناه انو الباص ده ماشي الكلاكله.

    *سجمي سجمي انتي ايرفتي انا برطن كيف ؟
    *قال ليها هو انتي قايلها نفسك اتكلمت ارابي (عربي)

    وراجعين

  11. salih قال:

    الاكارم
    سلام

    استاذنا الفاضل بروف عزت
    تحية طيبة

    غايتو ديل ما قويات زي بتاعات التطعيم ضد الجدري:

    وقفت امرأة
    قبيحة على دكان عطار، فلما نظر
    إليها قال: “وإذا الوحوش
    حشرت”
    فقالت
    له المرأة: “وضرب لنا مثلا ونسي
    خلقه”

    _________________________________________________
    ذهب أحد الثقلاء إلى شيخ عالم مريض،
    وجلس عنده مدة طويلة ثم قال له: يا
    شيخ أوصني (أي أنصحني)
    فقال
    له الشيخ: إذا دخلت على مريض فلا
    تطل الجلوس عنده
    _________________________________________________
    جاء
    رجل إلى آخر يطلب الأجرة عن دار
    كان قد أجرها له
    فقال
    المستأجر يشكو: أعطيك الأجرة،
    ولكن أولاً أصلح هذا السقف فأنه
    يهتز ويتفرقع
    فقال
    صاحب الدار: لا تـخـف .. فإنما يسبح
    السقف من خشية الله
    فقال
    المستأجر: نعم .. لكني أخشى أن
    يدركه الخشوع فيسجد
    _________________________________________________
    ركبت
    سيدة بدينة جداً الأتوبيس فصاح
    أحد الراكبين
    متهكماً:
    -
    لم
    أعلم أن هذه السيارة مخصصة
    للفيلة
    ..
    فردت
    عليه السيدة بهدوء:
    -
    لا يا
    سيدي .. هذه السيارة كسفينة نوح ..
    تركبها الفيلة والحمير
    أيضاً

  12. صباحاتكم خير

    و تستمر المفارقات في البصات، حيث شاعت في فترة ما في الخرطوم موضة البصات السياحية و التي لا أعرف لم سميت سياحية فالشكل ياهو ذاتو و الكمساري هوا هوا و لكن يبدو أن لسلطات المحلية راي آخر فهم يتحصلون منهم رسوما أكثر و انعكس ذلك على سعر التذكرة بالطبع…

    كشكش الكمساري فناوله أحد الركاب السعر المعتاد
    - خمسمية صاح الكمساري … ده بص سياحي
    - دفع “محمد أحمد صاغرا”
    بعدها تلفت نحو الركاب و تحدث الى الراكب جنبو
    - انشاء الله الخرطوم عجبتكم..!!!

  13. ابوالمنذر قال:

    عزت والاحباب…
    قدام الدكان …
    الدينكاوى : اته بتاع دكان ادينا ( كيت)
    النوباوى : عندكم (حيت )
    الحلفاوى سيد الدكان : انتو دايرين (هيت )
    طبعا كلهم قاصدين (خيط كروريه)
    ………
    يا شمباتى ..
    الشربينى ابو عفان (لمان يكون الشراب عفن)
    عزت نفسى (لمان تتعزز)

  14. اثنين قاعدين و جا واحد عايز يعرف الساعة كم فقعد يقول
    بالله….الس الس س س س س ساعاااااااااة كك ك ك ك ككم
    فطنش منو صاحب الساعة
    فزهج التمتام و ذهب
    فقال واحد لصاحب الساعة: انت الزول دا ما سألك لمن روحو دايرة تطلع مالك ما وريتو الساعة كم؟

    فقال صاحب الساعة: انت تتتت تتت تت ت عاوزني أأأ اأ ااا وريهو يقوم ييييييييييييييي يقول بي بي بي بي يحاكيني

    و الطبع يفهموا غلط !!!

  15. نيام قال:

    ابوالمنذر ثرو بقاريتش:
    يعني انت قاصد شنو يا ابوالمنذر .. المرطب دا ما سيد الهيوت..
    عزت المرطب:
    طبعا التطعيم دا زمان ما كان اسمو التطعيم .. علي ايامنا كان اسمو القروح .. كنت تسمع كلمات انت اتقرحت و انت ما مقرح ..والكلمة الان تستعمل علي نطاق شبه دبلوماسي بمعني مختلف..(فمثلا عند النشالين )
    - اسمع عمك دا قرحتو
    - أي قرحتو
    - ادينا جرعتنا

  16. aflaiga قال:

    عزت : الخبير بفك الاحتقانات .. بوست موفق وفى تايمو تمام …
    بعدين يا دوك انت البوديك محل الرندوك شنو ؟؟ الا كان جابوهو ليك فى دراسة انت مشرف عليها ؟؟
    جاييك .

  17. aflaiga قال:

    د . عزت : سلامات .
    بالنسبه لرندوك واللازى منو كنت بصدد انزال بوست كامل عن الموضوع لكن ما مشكله ننزلو بى هنا :
    الرندوك لغة تخاطب لا ترتقى الى درجة اللغه ولا اللهجه بمعنييهما لكنها عباره عن وسيلة للتعبير عن واقع معين يعيش فيه المتخاطبين بها والرندوك مر فى السودان بعدة مراحل تتطور من فتره لاخرى وفى الغالب الاعم يكون الرندوك مقصود به تغييب غير العارفين به من فهم الكلام المتداول بين الراندوكيين فيما بينهم . وللرندوك اسباب مختلفه للظهور وانواع منها :
    كون الرندوك وسيلة للتعبير عن مجموعه معينه .
    كون الرندوك حاله خاصه للتعامل مع واقع قمعى تجاه اللغه الاعتياديه السائره .
    فمثلا نجد قبيلة الشماسه يتخذون من الرندوك ملاذا لهم لتغييب بقية غير الناطقين به عن فهم الكلام الساير بينهم .
    وكذلك قبيلة اصحاب المهنه الواحده كالاطباء والكماسره والميكانيكيه والصنايعيه بشكل عام نجدهم يتخذون من تعبيرات اللغه العلميه الخاصه بهم كلمات للتغطيه على ايصال المعنى المراد .
    بدا الرندوك فى السودان على ما اعتقد فى تاريخ قديم جدا اثناء الحقبه الاستعماريه حيث كان المترنكين !! ( يموجون ) بين بعضهم بالفاظ وتعابير لا يفهمها الاجنبى او شبه الاجنبى !! الموجود بينهم .
    ومن ثم تطورت فى العهود اللاحقه ولكن يقال ان انشط فتره لظهور الراندوك كانت الفتره الحزبيه ما بعد نميرى ثم الفتره الانقاذيه التى رندك فيها الشعب اجمعه .
    جاييك تانى ..

  18. حاج أحمد السلاوى قال:

    السادة الأكارم ..
    فى الزمان الغابر عندما كان محظوراً التعامل بالنقد الأجنبى أو ما يسمى بالعملة الصعبة فى السودان .. جاء أحد شيوخ الخليج فى زيارة إلى السودان.. فى المطار ساله ضابط الجمارك إن كان معه عملة صعبة لتسجيلها .ولعدم علم الرجل بالإصطلاح أجاب بالنفى .. وفى أثناء التفتيش الروتينى لاحظ ضابط الجمارك وجود العملة الأجنبية .. دولار.. ريال .. إسترلينى ..فسال الرجل : أنا مش سألتك إذا كان معاك عملة صعبة أم لا .. وقلت مش معاك ؟ طيب دى إيه دى .. مش عملة صعبة ؟ فذهل الرجل الخليجى وقال للضابط بكل براءة : طيب ممكن تورينى إيه الصعب فيها ؟..

  19. مُخير قال:

    الريس أبو عصمت سلام
    الحلوين نهاركم سعيد
    جينا كالعادة متأخرين ولقينا العجاجة تلوي، سلس يا ريس، وحتة الراندوق دي طاعمة جداً، وكما تفضلت تحتاج إلى مواكبة وإلمام مشترك بتفاصيل الرموز المستخدمة، وبحكم الدراسة والإقامة لفترة طويلة في الخارج، كل ما ترجع تلقى الناس قطعت شوط، تسطح اسبوع لحدي ما تدخل في الشبكة (ودي في حد ذاتها إضافة جديدة)، غير انها جميلة وإكتشفت أن الرندوك (بالقاف ولا الكاف يا علاّمتنا بشار عافاك الله) موجود بصيغ أخرى في اللغات الأخرى، بل أن سكان كل مدينة لديهم ما هو أكثر من اللكنة و/أو اللهجة المشتركة، غير أن خصوصية راندوق/كنا تكمن في شيوعه بسهولة ويسر تداوله بين مختلف الأجيال، يعني هسة لو حاول عصمت وأخوانه يدقسوا دكتور عزت ما حيلقوا طريقة والأمر ينطبق علينا جميعاً لو ثابرنا على المواكبة.

  20. bakriMusa قال:

    واحدة عملت الحبيب بورقيبة لواحد … قام الواحد عمل الضوء قدم الخير لأهلها…. وأهلها لما عرفوا انو ما عامل كمال شغيل … عملوا ليه الجزيرة أبا …. الاثنين قاموا عملوا الضوء الشارد… وعملوا عقد الجلاد… أم البت عرفت الخبر عملت احمد الدوخي .

    أنا البحرُ في أحشائِهِ الدرُّ كَامِنٌ فَهَلْ سَأَلُوا الغَوَّاصَ عَنْ صَدَفَاتي

    فيا وَيْحَكُمْ أَبْلَى وَتَبْلَى مَحَاسِني وَمِنْكُم وَإِنْ عَزَّ الدَّوَاءُ أُسَاتي

    فلا تَكِلُوني للزَّمَانِ فإنَّني أَخَافُ عَلَيْكُمْ أنْ تَحِينَ وَفَاتي

  21. د.ياسين شمباتى قال:

    ابو المنذر..سلامات يا صديق..

    ما عارف الجماعة ديل ليه بيركزوا على اسماء مطربين وممثلين فى كناياتهم وراندوكهم!؟؟

    عثمان الشفيع…..بعنى شافع ساكت

    بكرى موسى..والله دى تاخد بيها البرنجى,شكلو الولاد ادوك لزة..تحياتى لهم..

  22. حاج أحمد السلاوى قال:

    الأخ بكرى بن موسى .. من أين لك هذا البليغ من القول المُمعِن فى الشبايبة..؟؟ما تكونش بتاخد دروس عصر وبتذاكر من ورانا.. يا مرسى ؟.ز
    وهاكم عينة مما سمعناه من إخوان سهيل وعبدوش خلال عطلاتنا الماضية :
    - سوسن عبد الفتاح : تعنى سستة البنطلون غير مغلقة .
    - عبد الشكور الجزولى : شكرا جزيلاً .
    حسه الزى الشباب ديل الواحد تانى يقدر يتفاهم معاه كيف ؟ أقترح على سهيل وصحبه الكرام يعملوا لينا قاموس يجمعوا فيهو كل الإصطلاحات والتعابير الجديدة …إتفقنا ؟؟
    عندى سؤال سغيرووووونى لأبو عصمت .. العلاقة شنو بين التطعيم ضد الجدرى والبوست دة ؟؟أوع يكون دة إصطلاح جديد لسه ما طرش اضاننا ؟ .
    غايتو عاوزين برضو نشوف آخرتا شنو مع الشباب ديل وحيودونا وين ؟

  23. جمعتكم مباركة

    ايه الجمال دا يعني البوست بدون تعليقاتكم ما (كامل الأوصاف)
    و نحن مع شاي الصباح قريت مع (عواطف) مداخلاتكم… اتشرقت بالشاي من طرافتها و العجب لمن وصلنا لبتاعت (بكري موسى) …. جريت جبتا ليها مويه

    لكن فعلا يا حاج السلاوي انت محتاج لقاموس … ما الحكاية نكتة و المشكلة لحد الليلة الكانوا بيتونسوا ما عرفوا فريقي (التطعيم) و (الجدري) لاعبين وين

  24. bakriMusa قال:

    د.عزت
    وكل الحبان الفين سلام

    الراندوك موضوع شيق ..وفى تقديرى معرفته مهمة جدا ..حتى لا نكون ضحايا نتيجة جهلنا بهذه اللغة(إن صح التعبير) والتي نجدها فى الشارع ..واصبحت منتشرة فى كل مكان.

    واقول معرفتنا بها مهمة..ولو من باب من عرف لغة قوم امن شرهم..
    لأنو الظروف ما معروفة يا عمنا السلاوي (لو في اتنين جنبك -شماسه – ) مثلاً بدأوا يتحاوروا اهم شيء تعرف قصدهم شنو عشان ما تكون الضحية إنت …
    فهي خليط من العربية والانجليزية مع كلمات غير مفهومة…
    وهي أيضا إشارات لغوية مختصرة ومعتصرة من ثقافة مجتمعاتنا تبيح المرح الجميل وتترك انطباع اللطف والتفرد .. ولكنها أيضا ” لا تقال في كل مقام فلكل مقام مقال.
    فهي لا تقال في الخطوبة الرسمية( ولا في عقودات ناس د.عزت )
    ولا في المآتم ولا في الاجتماعات الرسمية .. لذلك فهي لهجة تتسم بالحميمة وبظروف المرح واللطف السائدتين في مجتمعاتنا السودانية .
    وبحكم خفة تداولها وسهولتها دخلت البيت السوداني وأصبحت لغة التداول بين أفراد العائلة ..
    هذه حقيقة ظاهرة إجتماعية يجب الوقوف عليها ( يا افليقا ) ..
    وهنالك فرق بين لغة الراندوك واللهجة العامية السودانية والتي يتداولها السواد الأعظم ..

    سلامة الشرقة يا د.عزت
    السلاوي ود.يس لازم نذاكر (لاولادنا ناس الشهادة العربيه ديل ) من وراكم عشان بعدين ما يكونوا مسطحين مع الشباب ديل

    وهاكم دي :ـ

    اليله ماشي اعمل اسحا ق الحلنقي لي شعري لانو ماشي اعمل صلاح قابيل لي البت الدير اعمل ليه ماجدة الخطيب

    ودي وحدة كمان مع الترجمة على الشريط (لناس الخارج)

    قال ليك الكمساري شغال بطقطق في الفردة: الشرتيت يا فرد
    واحد قال: طالب
    رد: نشو يا ناس الفردة دي ما عملت فيتنام عديييييييل كدا، حافلة دي ولا فصل
    التاني قال: فاااااااااام يا معلم
    رد: فام فيك يا؟؟؟
    التاني: كنت خاتي الشرتيت في الطلوس، واحد انترناشيونال عمل ليهو ياع
    رد: دقست يا فارة، كان تخت الشرتيت في النكسون وتمشي فلسطين

    ——–
    بطقطق: اي يعمل صوت بي صباعينو ، ودا تنبيه للركاب بان يدفعو
    الشرتيت : القروش
    فرد: يا اخوان
    نشو: مقلوب شنو بداية الحوار
    الفردة : مشوار الحافلة ، يعني من الخرطوم لغاية اخر محطة مثلا
    فيتنام: نامت، يعني المشوار دا ما جاب قروش ، نايم
    فاااام: مقلوب ماف ، يعني بح يعني مافي قروش
    فام فيك: مافي كيفن يعني؟؟
    الطلوس: يعني البنطلون
    انترناشونال : نشال
    والمراد انو خاتي القروش في جيب البنطلون ، وفي نشال نشلو (عمل ليها ياع)
    ياع: صوت النشلة
    دقست: يعني اتغابيت وفارقت الذكاء
    النكسون:؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ما علينا المهم ما يلبس داخل البنطلون والمراد ان يخبئ القروش بحيث يصعب الوصول اليها حاليا
    فلسطين: دلالة علي الفلس
    والمراد ان لا تضع القروش في البنطلون ليسهل نشلها وتظهر كانك مفلس بالنسبة للنشال
    ..
    **جميل راتب
    اى المرتب …او الماهية
    مثلاً :
    شنو يا حبه عملت سلفادور وزغبير، جميل راتب جا وماجيتونا ؟؟؟

    **لو زول خالط وبتلفت يقال له خلى بالك فى ورقتك..
    يعنى خليك مع جماعتك ماتقابض

    **ود قلبا او ود سنترا
    ويقصد بها ود العاصمة
    يعنى زول تفتيحة وشايل شريحة كلامو بالموبايل ولبسو استايل

    **ورينا جمال خطوتك
    ويقصد بها اتخارج وهوينا انت مانافع معانا
    شوف ليك ناس غيرنا ونحنا ماعندنا ليك شئ
    .
    والباقي تموا من شباب المدونه العايشين فعليا في الجو ده

    كسرة :ـ

    غايتو وجنس غايتو يا د.عزت دائما في مواضيعك ترمي لينا السنارة وتطلع مننا الحاجات المدسوسه

  25. حاج أحمد السلاوى قال:

    بكرى ودموسى ..وكل الحبان المفتحين والداقسين زينا كدة .
    لكين يا ودموسى ما طلعت تفتيحة جد ..إنت يا زول قاعد معانا بيجاى وفاتح ليك لينك ( خط ساخن )مع ناس سهيل وعبدوش ..ولاّ شنو ؟؟ غايتو نحنا حقنا راح … انا لامن أجى الإجازة تحركاتى طواااالى مع وضاح عشان يترجم لى ويشرح لى الحاصل شنو ..بقينا زى الأطرش فى الزفة.. يودونا للبحر ويجيبونا عشطانين ( عطشانين ) .. عاد دة كلام دة ؟.الحمد لله الوليدات الرجعناهم بدرى بدرى ..
    أنا غايتو حابدأ من الليلة دروس عصر معاك يا بكرى ( عن طريق النت ) طلعت تفتيحة …اتاريهم الحلفاويين ديل ما ساهلين تب .. خلى بالك يا ابو عصمت !!!
    وانت يا د. يسن حصل رقبتك ..واتخارج بسرعة قبال ما تلقى روحك بقيت زينا كدة …

  26. Nourlight قال:

    برروف بقي ريتش…

    وفيه ناس بتتغير لهجتهم وطريقة كلامهم اذا تغير وضعهم الاجتماعي وبقوا ريتش مثلاً…والعكس صحيح…

    يبدو ان ذكاءك الاجتماعي يعمل بشكل فعّال وتستطيع من خلاله مناقشة امور هامة بطرق متعددة…
    أمر هذه الفترة باكتشافات وتساؤلات متعددة ..
    منها مثلاً..ما علاقة بقي ريتش باللهجات واللغات؟
    وما علاقة ابكرون بشرق السودان؟
    واكيد راجعة…

  27. الغبشة قال:

    نور لايت:سلام يابت امى،ما تحتارى لمن واحد سودانى يقول اهلنا البنى عامر وهو اسمو ابكرون لان السودان كلو اهل بعض، عارفاك يمكن بتكونى عاوزى تعرفينا نحن الهنا من وين وثقافتنا شنو واتجاهتنا وين؟لكن صديقينى يمكن تتعبى لانك فى الغالب ما حتقدرى تحددى اتجاه,
    بعدين بقى ريتش دى مالهجه بل لغة واسمها العربى المأنقز(مأنقز جايه من اقليزى بالدارجى يعنى الانجليزى)

  28. ياسين شمباتى قال:

    والله يا بكرى حيرتنا عدييييييييييييييييل كدة!!

    انت شكلك لا معرس لا حاجة,,بتكون اصغر مننا وطالع بينا العالى,,غايتو يوم بنجيك ونشوف بى عيننا..

    حاج السلاوى..شكلى ح الحق صاحبى بعد يومين بالطريقة دى!!!

  29. bakriMusa قال:

    حاج السلاوي
    د.يس شمباتي

    ده انا غلبااااااان .. الغنمايه تاكل عشاي
    نحنا وين لينا من شباب المدونه العاملين (حمد لبد)

  30. أكيد عزيزتي نورلايت خاصة اذا اغتنوا (فجأتن) و كانوا غير جاهزين لتلك النقلة الكبيرة فيصيروا كالمتمصرن الخلوي عندما أراد أن يصف الهرة التي شربت اللبن كلو
    (الأديسة اربت اللبن الو)

    و لكن قد لا يفرق الموضوع كثيرا ان كانوا قد (حبوا) في سيراميك…. و (ملطشتهم) الدنيا في الآخر فالمعدن الحر لا يصدأ

    تحياتي

  31. قرن شطة قال:

    الاخ عزت / قريت اليوم مقالك الظريف وبالمناسبة أنا ما كنت عارف إنك حلفاوى أو لك علاقات حميمة معهم والناس ديل من أظرف خلق الله على الارض، ومعظم أصحابى وفرداتى فى سنين الغربة كانوا من عنديكم…أما الرندوق فدى مسالة قديمة وعويصة ومتجددة..كل يوم بتظهر مصطلحات جديدة وانا تابعت الموضوع ده مرة بس غلبنى وماطلعت بى نتيجة واضحة..أمبارح ذكر لى أحد الشبان الصغار وهو يعمل معنا بان فلان بان كى مون ولما إستغربت أوضح لى بان هذا يعنى بان فلان بكاى..أى شديد الوله والتعلق بالجنس الاخر والمسمى باللطيف احياناً…شوفت كيف..تحياتى

  32. أسو قال:

    ياريت تدونى معلومات أعرف بيها التطعيم يكون منين؟
    معلش حتعبكم
    مرسى جدا

أضف تعليق

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

You are commenting using your WordPress.com account. تسجيل الخروج / تغيير )

Twitter picture

You are commenting using your Twitter account. تسجيل الخروج / تغيير )

Facebook photo

You are commenting using your Facebook account. تسجيل الخروج / تغيير )

Google+ photo

You are commenting using your Google+ account. تسجيل الخروج / تغيير )

Connecting to %s