قالو لى انت عينك طايره !!!

Posted: الإثنين,6 أبريل, 2009 by aflaiga in اخرى

مشهد سغنتوتى :

عواطف : الو .. سعيد انت وين اسى ؟؟

سعيد : انا فى المكتب خير انشاء الله ؟؟

عواطف : وصوت البنات الجنبك ده شنو ؟؟

سعيد : انا مش قلت ليك فى المكتب طبيعى يكون فى نسوان انا قلت ليك فى المقابر ؟؟

عواطف : شوف يا سعيد والله انا ما بستحمل الكلام ده ؟؟

سعيد : كلام شنو قولى بسم الله اصبحنا خلااااس ؟؟

عواطف : ضربت لى هنايه قالت لى انت عينك طايره !!

سعيد : الحمد لله الما قالت ليك انو عينى حاره  انتى يا مره جنيتى قولى بسم الله خلينا نرجع البيت بعدين نتفاهم فى القصه دى ..

عواطف : لالالا انا ما بستناك لمن ترجع البيت ده موضوع ما بيستحمل السكات ولا الانتظار ؟؟؟

سعيد : كدى دقيقه انتى هنايه دى قالت ليكى انا حامل ؟؟؟

عواطف : طبعا بتهظر وانا اعصابى بايظه وفى ظروف زى دى مش ؟؟

سعيد : الله يهديكى يا بت الناس روقى واجلى الموضوع ده لمن نجى البيت ..

اها قعدو سعيد وعواطف فى قالو لى ما قلت ليك ….

يا جماعه ما تشوفو حل للناس دى …

 

Advertisements
تعليقات
  1. aflaiga كتب:

    شباب : دعونا نناقش فى هذه المساحه قصة الشك والثقه بين سعيد وعواطف واعتقد ان الشك لمن يخش بالباب بيطلع الثقه ووراها الحب والاحترام من الشباك !!
    دعونا نجيب على الاتى :
    * متى تبدا عواطف فى الشك فى سعيد ؟؟؟
    * كيف يمكن ان يعالج سعيد شكوك عواطف ؟؟
    * هل يلجا احيانا عواطف او سعيد لاستحثاث الشك لدى الاخر لغرض ما ؟؟
    * لماذ فى الاساس يتوافر عدم ثقه بين سعيد وعواطف ؟؟
    * هل الغيره احد ابواب الشك ؟؟ وهل الغيره تنقلب لضدها احيانا ؟؟
    * هل يقبل سعيد شكوك عواطف حتى فى ظل تقصيرها هى فى حقه ؟؟
    * هل اختلال معالة الواجبات والحقوق احد ابواب الشك فى :
    سعيد بيودى قروشو واحاسيسو وين ؟؟ وعواطف بتودى اهتماما واحاسيسا وين ؟؟؟ زى قروش البترول !!!
    دعونا نناقش الموضوع بالله بكل شفافيه وصراحه ؟؟؟

  2. مُخير كتب:

    أبو حمودي سلام
    الحبان سلامات
    الله يدينا خيرك يا نوبي، اليومين دي مالك حاكيها كدة
    يا خي مشاهدك دي لا سغنتوتية ولا حاجة !!!
    بتفتح بوهيات كدة ،،، غايتو نخلي أبو عصمت بحكم صلاحياتو كرئيس يضع حد للفرفرة دي، الفتنة نائمة ولعن الله من أيقظها

  3. سماسم كتب:

    إنت عارف أسعد السعيدين هو من يعمل مع عواطفه في مكان واحد يعني حا يكون ما في شك … العيون حا تكون راكة وليست طايرة …………. الثقة بتكون متوفرة لمعرفة كل بما يدور من حوله…………. لكن عندما يمون هنالك شك تتغلب الحياة الى جحيم والعياز بالله

  4. مُخير كتب:

    عودة:
    اسمع يا فردة جنس السوالات الفوق دي ناقشها براك والقصة كوولها ما بتستحمل، وخلاصة ما عندي هو أن حبة الغيرة ما بطالة، زي حبة الشوق، أو حبة الشطة في بوش عبدوش، لكن لو زادت شوية حتكون ممرضة وما شغالة نوهائي !!!

  5. aflaiga كتب:

    مخير ثرو الجماعه : ما قلنا ليكم القصه ما شخصيه لانو ببساطه لو القصه شخصيه كل يوم بتلقو مشهد لمن البتل يستشهد !!! افليقا يبتسم !!!
    طبعا مرحلة انو عواطف تطنش منك نوهائى دى مرحله ختيره جدا …
    صديقى س وصل لهذه المرحله وقدر ما حاول يثير غيرة عواطف ما قدر يوم جا خاشى ومعاهو واحده البيت ودار الحوار التالى :
    عواطف : ودى شنو كمان دى الجايبا معاك الليله ؟؟؟
    س : دى نهى صحبتى اصرت تصل معاى البيت ..
    عواطف : والله كتر خيرا انا من قبيل راجيا زول يجى يسوى ليك الغدا لانو ماشه ناس امى ضرورى .. عليكى الله يا نهى بتلقى الملاح فى التلاجه المطبخ على يمينك بالله ملن تجى ماشه اكوى معاكى القميص والبنطلون ديل !!!
    س : لا قميص لا بنطلون نهى امشى بيتكم دى قصه خربانه !!!

  6. نيام كتب:

    افليقا:
    (كل دا سغنتوتي)…
    قال صلى الله عليه وسلم ( آية المنافق ثلاث : إذا حدث كذب , وإذا وعد أخلف وإذا اؤتمن خان) … واليوم احاديثنا كلها كذب و مجاملة ووعودنا المالية و الاجتماعية و البنكية عبارة عن شيكات طايرة ..واماناتنا مالية و سياسية و اجتماعية لا ترد نسمع الطفل يكذب و نحن نضحك و نزهو بذكائه الفطن ثم نقول كذب أبيض و يكبر فيكذب في النتيجة ثم يكذب في الخبرة ثم يكذب في العمل ونقول تفتيحة عبقري زمانو هل هذا الا دعوة مفتوحة للشك..وهنالك من يسأل ما هو السبب ؟؟
    السبب؟؟
    { يا يا أيها الذين امنوا اتقوا الله وذروا ما بقي من الربا إن كنتم مؤمنين فَإِنْ لَمْ تَفْعَلُوا فَأْذَنُوا بِحَرْبٍ مِنَ اللَّهِ وَرَسُولِهِ وَإِنْ تُبْتُمْ فَلَكُمْ رُءُوسُ أَمْوَالِكُمْ لَا تَظْلِمُونَ وَلَا تُظْلَمُونَ (البقرة 278-279)}
    هل تنتظر من اكل الربا و مال البنوك المرابية الا ان يكذب ثم ينتظر منا ان نصدق و لا نشك..
    هل يظل من يحمل شهادة ماجستير مع خبرة تفوق الثلاثين عاما ليصبح عاطل عن العمل ويصبح خريج الامس برأس اكثر ما فيها شعر كث و الباقي خواء(وحسبنة) مدير (ابو ثلاثة ليلي علوي).. هل تنتظر مني الا اشك..
    الا تري المعلم المحترم الكفؤ والمهندس الخبرة و الطبيب العالم و المحاسب المرجع يحاولون ان يدبروا عيشهم بالكاد في بلاد الله الواسعة و تري السفيه الصفيق الخاوي يتمتع بحياة رغدة و معيشة ميسرة و كل كفاءته انه احسبوني بالميلاد..هل مازلت تنتظر منا الا نشك..
    والشك في مجتمعنا تراكمي فكما نشك نحن تشك عواطف فهي تري كل يوم عجبا ، رجل في عمر والدها يطارد طريدة في عمر بنته جاءت تبحث عن وظيفة او تتدبر امر اسرتها الا يدعو هذا عواطفاتنا الي الشك..وهذه التراكمات ليست فردية فهي تسمع كل يوم قصة اغرب من سابقتها و لذلك فهي كلما رأت سعيدا يقف امام المرآة او ينظر في رسائل الموبايل يتسرب الشك الي فؤادها..

  7. حاج أحمد السلاوى كتب:

    الدينمو .. السيكوباتى .. أفليقا …وكل الحبان ..
    يا جماعة الخير الليلة مالكم علينا إنت وودالخلا قايمين علينا … أزمة ضمير ..وأزمة عدم ثقة .. ورونا الحاصل شنو ؟ عشان ما نقعد مسطحين وما ناقشين حاجة ..

  8. البشاوى كتب:

    ابوالافلاق
    من غيرك يعطى لهذا السعيد معنى ان يعيش وينتصر
    اكاد اشك فى نفسى لانى اشك فيك وانت منى
    الم تسمع عواطف بهذا القول ؟
    بعدين هى ليه طوااااااااااااااااااااالى شاكة ماتفكها شوية — ثم ان الشك حلال عليها تشك وهى عايشة مع سعيد زى ماعايزة وسعيد ممنوع من الشك بامر الدين والاخلاق لو شك فى عواطف يفكها بدون كلام
    بعدين اصلو عواطف ياشك يانقة مافيش حاجة تانية ؟
    ثم انها لو قامت بواجبها تجاه سعيدون هذا الاتكفى سعيد شر طيارة العين
    والتوهان والخروج على النص
    لكن اظنها لو فعلت واجبها مع سعيد كما امرها الدين والعرف لتجدن سعيد معتليا احد الصوانى مندهشا وربما يفك اخرو
    افليقا
    بإسم الغلابة والمعذبون فى الارض انعمنا عليك بوسام المقارعة الحرة
    واخترناك زعيما تنافح وتكافح عن حقوقنا ومن اراد التسجيل معنا عليه بالاتصال على الاخوة ابكرون وحاج السلاوى

  9. salih كتب:

    الاكارم
    سلام

    افليقا …

    ألَستَ القائل:
    ((……..انا اتحدث باسم من لا يملكون كيبورد ولا يملكون له زمنا وقانطون من التعبير عن مااسيهم ..))

    حاشاك لا عينك طايره لا هى زايغة فقط افكارك (عاملة زحمة). لا ادري لم تذكرتُ خالك عبد الحى وانا اقرأ كلماتك تلك . ألانه يقول بما قلّ ودلّ وجلّ والولد خال, تحياتي له وللجميع.

  10. aflaiga كتب:

    اخى صالح : الزحمه فى الافكار منبعها الزحمه فى الدنيا التى اصبح ايقاعها اسرع من ارتداد الطرف !! اما عبد الحى فزول على قدر حالو مكتفى من الدنيا بعباداتو والستره مع رب الخلق وليتنا مثله … بعدين انت قاطع ممنا التلفونات ليه ؟؟ ما زلت افليقا وما زلت عندنا صالحا !!!
    بعدين مش ملاحظ انك عصرت على ود الخلا شويه فى الدفاعات !! عزته بدينه وما يعتنقه تجعله دوما فى مكان الصراع وعزتك به واعتقادك فى صلحه تدفعك دوما للدفاع عنه ولو لم تقصد . ادام الله خوتكم وخوتنا ..

  11. salih كتب:

    الاكارم
    سلام

    ((واعتقادك فى صلحه تدفعك دوما للدفاع عنه ولو لم تقصد ))

    يا افليقا انا لم ادافع عن احد وانما قلت بما اراه صوابا وقد تراه انت والاخرون خطا … واختلف مع ود الخلا في دفاعاته عن الانقاذ التي اكتوى بنارها الجميع ـ ضاعت مني سنتان ـ ولكني لا اتداخل لانني اعلم ان الناس في اقاصي البلد يعلمون سوءاتها والظلم والاجحاف وغمط الناس حقوقهم وغيرها من ما لا يرضاه رب العباد ..

    فقط اشير الى اننا اذا لم نرض بوجود الاخرين معنا في هذا الحيز ـ سودانناـ فلا اعتقد باستطاعتنا عمل ما ننادي به من ديموقراطية ..وعيب علينا ان نحاول اقصاء الاخرين ونحن ننتقد سياسة الاقصاء .. وكاننا نريد تطبيق بعض ممارسات الانقاذ ونحن ننتقدها.

  12. aflaiga كتب:

    شيخ صالح : يا زول قول بسم الله منو الداير يقصى منو ؟؟ والله لو الشيخ ولا الريس ذاتم شالو باس ويرد وخشو كتبو هنا مرحب بيهم بس لمن يتكلمو عن الحاجات يضيفو قبالا اعتقد لانو غيرهم لا يعتقد يمكن !!! مش ؟؟ اعتراضنا على حديث ود الخلا فى انه يريد البدايه من حيث يقف هو وناسو !! مثبتا ما يراه كحقائق لا لبس فيها وده الغلط هنا ..
    كلنا يرى رايا ولكنه لا يقر بانه الصواب الامثل ولا يبدا من قاعدة راى غيرنا خطا يحتمل الصواب .. مادمنا نتحدث عن السياسة ام دق فكلنا خطا يحتمل الصواب .. اما اذا تحدثنا عن الوضوء او الرياضيات او الفيزياء فهى تخضع لقوانين ولا يجوز التنظير فيها .. وانت خير العارفين ولا شنو ؟؟؟
    اما الرضى بوجود الاخرين بيننا فابشرك باننا اول امبارح القريبه دى شاربين شاى اللقيمات الموخمج عند ود الخلا يعنى فى بيتو عديل كده !! فكيف زول تاكل فى بيتو وما ترضى بيهو فى بيت الكل ؟؟؟
    يبدو ان فى النفوس شيئ من حتى لسه ما زال ..
    شعبنا اخى صالح هو سيد البيت وهو يرحب باى قادم للبيت باصولو يعنى ممكن تقول لسيد البيت كب لى سكر ذياده فى شايى ده لكن ما ممكن تقول ليهو كبابيك ديل شينات والبرنده دى افتحا فى الحوش الورانى !!!
    اتمنى ان نتجاوز جميعا سوء الفهم بيننا لاننا اكبر من ذلك ..
    شوف بالله الدنيا دى ذاتا عامله كيف ؟؟ افليقا الهوين ده يقعد ينظر لى دكتور صالح خرتمية سطر !!! غايتو استحملونا انتو الكبار …

  13. aflaiga كتب:

    شباب : اسى خلينا عواطف فى غيها سادره وفى شكوكا سايره وبقينا فى موضوع تانى خااالس اعتقد انو دى مؤامره عواطفيه لصرفنا عن الموضوع الاساسى ..
    لكن برضو بنرجع لموضوعنا :
    مشهد سغنتوتى :
    عواطف : انت يا سعيد الايامات دى بتقيف قدام المرايه اكتر منى انا ذاتى الحاصل شنو ؟؟
    سعيد : هو بالله حالتك دى حالة زول بيقيف قدام المرايه ؟؟
    عواطف : انت قصدك شنو ؟؟
    سعيد : ابدا ولا حاجه بس الايامات دى شغال لى فى لجنة تحقيق بره المؤسسه ولازم الواحد يظهر بمظهر كويس وكده ؟؟
    عواطف : ولجنة التحقيق دى مع ناس سارقين بوتيك ولا شنو ؟؟
    سعيد : انتى القصدك شنو ؟؟
    عواطف : قصدى واضح لجان التحقيق دى بيلبسو ليها كده ؟؟ انت عاوز تحقق معاهم ولا تهنيهم بعيد الفالانتاين ؟؟

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s