لاتغتر يوما بحسن ملبسا**********اجدي جمال الكيس ان كان فارغا

Posted: الأربعاء,8 أبريل, 2009 by nono in اخرى

Cover والمظهر والجوهر وجهان لعملة واحدة ولكن يجب ان نعلم بإن المظهر       هو الشكل الخارجي المكمل للشخص……….. يستطيع الشخص التحكم فية في طريقة اللبس والالون التي يرتديها …………
الشخص الذي يتجمل من الخارج يصبح كذابا ؟ في نظر الناس؟؟؟

وقد اصبح المظهر المعيار الرئيسي في تحديد مكانة الفرد في المجتمع ……… وهو وباء(فيروسي) اجتماعي قد تفشي بصورة مريبة…. فبعض الناس من خلال النظرة الاولى تقدم صورة سريعة عن الشخص الذي نراه ونصدر عنه أحكامنا الخاصة، وهي ذات الاحكام التي تحدد اطار العلاقة ومدى تواصلها. المظهر  لبعض الافراد قد يكون مهما في زمن اصبحت  النظرة السطحية هي المسيطرة في زمن طغت فية المادة علي كل شي…. قد يكون المظهر ابتلاء لبعض الناس او (هوس ) دنيوي وفي الغالب كانت المراة تهتم بظهرها الخارجي لكن اختلف الزمن اصبح الرجل ايضا يهتم بمظهرة الخارجي حيث استوطن جمال الجسد والمظهر في عقول كثير من الرجال والشباب..

 يلعب المظهرا دورا هاما في العلاقات العامة وحتى في العلاقات العاطفية والصداقة، حيث أكد  ان المظهر الخارجي له تأثير سحري في العلاقات وأنه يستطيع أن يجلب لصاحبه احتراما مضاعفا أو العكس..

وحول أهمية المظهر في اختيار الزوج أو الزوجة، أكد أن المظهر يحتل حصة الاسد في الايام الاولى للعلاقة، خصوصا أن البداية تكون اعجابا بالمظهر أو جمال الوجه وغيرها من الاشياء الخارجية التي تجذب، أن المظهر يبقى ذا اهمية في كل المراحل وحتى بعد الزواج، فالعين تعشق الجمال ؟؟؟

ولكن الصورة الحقيقية التى يسعى البعض لإخفاء ملامح قبحها بالتزييف والتزوير… لن تلبث أن ينفضح أمرها وينكشف سترها طال الزمن أو قصر……… 

ناتي لجوهر الانسان  فإننا نقصد به مكنون الإنسان ونفسه  المتمثلة بأفعاله وأقواله المكونة في النهاية لمفهوم شخصية الإنسان   والإشارة إلى هذا المصطلح من أجل العلم بأجزاء الإنسان ومكوناته من أجل أن نحسن تقييمنا ………… لبعضنا إن دعت الحاجة………….

نادرآ ماتجد شخص يظهر امام الجميع بجوهرة الحقيقي، فالغالبية منا يعمل على أخفاء الجوهر،ويظهرامام الآخرين بمظهر مخالف لجوهرة؟؟؟.

جوهر الانسان الحقيقي لانستطيع ان نتعرف علية بسهولة ولكي تتعرف على الجوهر الشخص؟؟؟ لابد من معاشرته مدة طويلة وعندها تستطيع ان تبين حقيقته

111

Advertisements
تعليقات
  1. nono كتب:

    شباب المدونة لكم التحية/

    المثل بيقول المظاهر خداااااعة؟

  2. aflaiga كتب:

    نونو : نحييك على موضوعك الاول وبدايه راقيه ..
    بعض الناس تعاشرهم لمن تموت ما تقدر تفهم منظرم شنو ؟؟ وبعضهم كالحرباء كل يوم بلون جديد !!
    ذكرتينى قصة اللبس الكتبتها يوم فى بوست معقول يا افليقا انت لسه ما لبست ؟؟!!
    اما المظهر الحالى فى الشارع فربنا يستر اعراضنا ساى ..

  3. aflaiga كتب:

    واقرب مثل انتى ذاتك يعنى نونو الكنا بنتشاكل معها فى البوستات زمان ونصفا بانها مافى داعى .. ما هى ابدا نونو الشفناها فى الرحله :
    كمية من الرقه والادب والرقى والعطف تراها مع الاطفال طفله ومع الكبار قمه تسارع فى خدمة الناس بهمة ونشاط وتؤثر على نفسها .. غايتو يا نونو النيو لوك ده قرضى عليهو قوى لانو هو دى نونو العاوزينها .. ولا شنو يا شباب ؟؟

  4. nono كتب:

    غايتو

    جنس

    غايتو

  5. aflaiga كتب:

    نونو : جنس غايتو ساى ؟!! ومش كده وبس !!

  6. نيام كتب:

    نونو:
    فعلا المظهر مهم و في كل الاوقات و الانسان نصفه مظهر ولا اعني بذلك الهندمة و التكلف في اللبس بل البساطة مع النظافة و الانسجام في اللبس ..اما بالنسبة للحبايب ففي الفترة الاولي يهتمون بالمظهر ثم تراهم بعد ذلك لا يأبهون البتة..يفترض في الانسان ان يكون دائما في هيئة مقبولة من المجتمع ، ولا تقل لي “ما انا ماشي قريب وجاي ” ففي زماننا هذا تخرج من بيتك و كانك متوجه الي جارك او الميدان و فجاتن تجد نفسك في المقابر او بيت العقد..او بيت البكاء..فيحكم عليك الجميع بانك اصبحت مهملا و لا تهتم بمظهرك..

  7. aflaiga كتب:

    نونو ثرو نيام : من اهم منجزات الثوره الصينيه ( قوم ياجوج وماجوج ) انو ممكن وانت ماشى فى الشارع وجاك تلفون بتغيير الوجهه من زياره الى اقامه !! انو تغشى اقرب فراشى فى الارض وتسوقو على جنب وساهل جدا بى مبلغ 50 جنيه يخليك على سنقة عشره بس انتبه انو الملابس دى زى الكبابى ال( ديسبوز ) بتستعمل مره واحده بس !!! يعنى الحمد لله الصينيين الله يخليهم حلو لينا مشكلة انو ما نتفاجا فى الشارع !!!
    تعرف يا نايم انا عندى صحبى فى السوق العربى فارش جنب صحبى بتاع التبش !! لو عزت مره فاجاك بى انو فى اجتماع فى بيت ود الخلا بغشاهو طوالى :
    هو : اها الليله بخصوص الجمعيه ولا الموقع الجديد ؟
    افليقا : لالا ده احتفال بالعريس خندقاوى !!
    يقوم طوالى يسوقنى بى ورا الكشك بتاع سعديه بتاعة الباكمبا ويلبسنى !! طبعا انا بقلع براى !! واطلع من هناك على عزت طوالى كانى جايى من الساونا بتاعة الهيلتون .. غايتو لو يوم دقق فى ماركات الهدوم والاحذيه بيعرف انو من مرقت من البيت لمن جيتكم فى المناسبه ما كلفنى اكتر من 40 جنيه !! وما كتيره عليكم والله !! بس لمن تجى ماشى ورا الكشك كلم البشاوى عشان يقيف معاك لانو فى اكشاك غريبه جدا !! تقوم تقلع وما يدوك الهدوم تبقى فى البشاوى جيب غيار من العربيه !!!

  8. ابكرون كتب:

    الله يرحم ابراهيم عوض : انا عمري ما حبيت غير الجمال في الروح

  9. ابكرون كتب:

    بيوت الصفيح حول الاسكندرية بيطلع منها نجف ….للان اخوانا المصريين بعتبروا اللابس قيافه ..بيه وباشا…تحترم حسب مظهرك سعد قشره يعني…!

  10. nono كتب:

    موضة آخر موضة هيفا غير زنار

    روضة داخل روضة غني فيها كنار

    شوف جبينا الهل ضو فوقه فنار

    منه هل الشارع منه بق ونار

    طالعة ما بتقابل زي لهيب النار

  11. مبرووك يا nono الباس و الموضوع الأول… انشاء الله تبقوا ثلاثة و أربعة و طوالي عشان تذيدي لينا عدد الأصوات الناعمة و كلام النواعم…

    موضوع جميل… و القميص ماشي مع البنطلون بس الكرفتة مشاتره شوية… بعدين أنا ما بحب الملابس الغامقة لأنها بتكون دايره ليها واحد قبطي جد ما محروق زينا… عموما القشره مهمة جدا في كل الأوقات…

    قضى أخي قرابة تاشر سنة بره البلد و لما عاد صار يقشر على سنجة عشرة و يقعد في البيت … فلما يجي الزوار يحرجوا و كل مرة يقولوا ليهو : معليش ياخي أنا جيتك و انت مارق… يقوم يحلف أنو قاعد في البيت فما بصدقوهو ….

    لمن وريتو الوصفة السحرية (الجلابية و الطاقية) حتن استراح

    بعدين نصيحة خلي عنوان المقال سغنتوتي و ابتعدي عن التعميم

    هسة زي الكلام دا

    (نادرآ ماتجد شخص يظهر امام الجميع بجوهرة الحقيقي، فالغالبية منا يعمل على أخفاء الجوهر،ويظهرامام الآخرين بمظهر مخالف لجوهرة؟؟؟)

    بجيب ليك الهوا

    تحياتي

  12. ياسين شمباتى كتب:

    سلام اختنا نونو..مبارك باكورة كتاباتك ويارب ما تنومى بالباسويرد زى ناس كدة!!

    نجى لى الموضوع ذاااتو..اكيد التخفى والتظاهر بمظهر غير الحقيقى شى بطال وما محمود,,ومذموم دينيا..بل وجاء فى معنى الحديث(ان الله لا ينظر الى اجسادكم ولا صوركم,ولكن ينظر الى قلوبكم)..وقال تعالى ((..ولباس التقوى ذلك خير…الاّية))..

    لكن على الكفة الاخرى نجد اللباس الطيب والمظهر الجميل لا عيب فيه,,بل جاء فى الحديث (….ان الله جميل يحب الجمال…الحديث),وجاء احد الصحابة يستفسر من رسول الله(صلى الله عليه وسلم) ان الرجل يحب ان يكون مظهره جميلا,حتى شراك نعله_سير السفنجة_يحب ان يكون جميلا ,,فلم يعب عليه الصلاة والسلام مسلكه هذا..ربما بالغ البعض فى هذا,ولكنه يبقى مشروعا ومحمدة..

    وعلى ذكر اللبس والمظهر,,يستند بعض علماء النفس على المظهر كدلالة على المخبر وما يدور فى الدواخل,,يعنى الالوان والتصميم وحتى العطور والجزمة..بل ذهب بعضهن الى قول ان (الراجل جزمة)ّ!!! يعنى حذاءه ممكن يحكم بيهو على شخصيتو..

    واؤمن على مقولتك بان الشخص لا يمكن سبر اغواره الا بمعاشرته والسكنى معه او السفر معه لفترة طويلة..

  13. حاج أحمد السلاوى كتب:

    الأخت نونو .. وبقية السمار الكرام ..
    موضوع مهم فى الوقت الراهن .. غايتو أقول ليكم بكل صراحة إنو نسبة عالية من اهلنا وأخواننا السودانيين بيعطوا صورة سيئة جداً فى موضوع المظهر العام .. ملاحظتى نابعة من مشاهداتى داخل دولة أمازونيا ومن خارجها أيضاً حيث مقر إقاماتنا ..زماااان كان الناس يهتمون بالمظهر العام لأنو هو الشىء اللى بتقع عليهو العين مباشرة ودى حقيقة لا يمكن إغفالها أبداً .. فالإنطباع الأول مؤثر جدا .. لأنك مش حتقدر تعاشر الناس كوووولها فى فترة وجيزة عشان تحكم بعد كدة إذا كان الزول دة مظهره يتناسب ومتوافق مع جوهره أم لا ..وقد يكون الإنطباع الأول وغير صحيح على الإطلاق سلباً أم إيجاباً.. بمعنى أنك قد ترى شخص ما لآول مرة فلا تحس نحوه بأى نوع من الود والتعاطف ( تاااانى قام جاب سيرة البحر .. )ولكن بعد مجالسته فترة من الزمن ( قد تطول وقد تقصر ) لربما يتحول هذا الشعور وتجد هذا الزول لطيف وودود وتستطيب مجالسته ..وقد يكون الأمر بالعكس تماماً ..
    نرجع لمظهرنا السودانى العام خارج الوطن وتحديدا فى منطقة دول الخليج ..فإذا دعتك الظروف لتذهب إلى المطار مثلاً (مستقبلاً أو مودعاً عواطف… يا ابكرونا ) وترى بعضاً (لكنها نسبة عالية .. مع الأسف الشديد ) من إخواننا فى الوطن القادمون.. وتتمعن فى مظهرهم العام تصاب بالأحباط الشديد..فتظن أن الشخص الذى أمامك قد قرر السفر خارج السودان وهو فى طريقه إلى سوق الخضار .. جلابية متسخة.. بدون زراير أو زراير مفتحة إن وجدت .. بدون طاقية أو عمة .. طاقية من النوع الذى لا لون له ولا شكل محدد ..مداس ( شبشب .. اكرمكم الله )سفنجة أو غيره غاية فى القِدم ..ولا أبالغ إن قلت رأينا من أتى يتهادى بالسروال والعراقى البلدى.. كيف سُمِح له بالمغادرة من مطار الخرطوم بهذا الشكل ..؟ ألا يدرون أنه يمثل بلده بهذا المنظر الذى لا يسر عدو أو صديق ؟.. وارجو ألا يُفهم من هذا أنى أطالب الجميع حال السفر إرتداء البدلة( فل سوت ) والكرافته .. حاشا وكلا .. يكفى جلباب ( جلابية بيضاء مكوية …. وتعال ليا .. )نظيف ومرتب مع عمة وطاقية ومركوب فاشرى ( ارخص نوع ) ومن علايل ابروف………قدله يا مولاى حافى حالق .. متى نحترم أنفسنا لكى يحترمنا الآخرون ؟واسألوا إخوانكم الكواشف فى المهجر العربى عن مشاهداتهم المحزنة فى مطاراتهم … ولعل الوضع يختلف فى المطارات الآوروبية ..
    الأخت نونو ..والأكارم .. ناسف للإطالة ولكن فى النفس حسرة مما نشاهده من بعض بنى جلدتنا – هداهم الله وأصلح حالهم -والكلام كتييييير…ذو شجون
    وأضم صوتى لصوت الأخ ابو عصمت … لا للتعميم .. فهناك أيضاً من يملكون حسن المظهر والجوهر معاً..
    ولدنا الدينمو .. أفليقا .. يا ريت كل المسافرين للخارج يعملوا زيك يمروا ويغشوا أقرب فراشى الأرض فى السوق العربى… قبال يوصلوا المطار ..كان اراحوا واستراحو ..
    وخلونا النشوف آخرتا معاهم شنو !!!

  14. Nourlight كتب:

    taking care of yourself is considered personal hygiene and is not a show off.
    sorry Nono, the net didn’t allow me to sign in nor write in Arabic,
    but I liked the topic

    I will ge tback to the topic if I could.

  15. مُخير كتب:

    الأستاذة نونو
    الحبان سلام
    موضوعك جميل، والشباب ما قصروا قالوا الفي البال وكل الممكن يتقال، وسبحان الخالق، يعني زي تقارب لا يصدق في وجهات النظر، ولتلافي التكرار وربما الإجترار نكتفي بهذا المقدار، ونطلب منك أن تواصلي المشوار وأن تطرحي للحوار المزيد من المسائل الإجتماعية الهامة. والسلام

  16. ودالفتيحاب كتب:

    نونو
    والاكارم الكبار و…
    نونو هبشتى موضوع لو تكلمنا سنة كامله مش حانوفيه حقو,
    يااخوانا حكايه الملبس والمظهر دى حكايتنا معاها شنو,كدى ناخذ نظرة للشعوب الحولينا وهتمامهم بالمظهر دايما على سنقة عشره والمدير السودانى قاعد فى الكرسى قيص كم طويل (مكفكف لحدى النص )ولاتناسق مع البنطلون وعلى الارض شبشب اكرمكم الله وعلى الفم سفه (دى مشكلة ثانية لابد أن نتطرق لها),يااخوانا نحن فاكين اللعبة خالص مما يضيع كثير من حققونا بسبب الظهر.
    وتعال لو كانت هناك دعوة فى فندق أواى دعوة بوفية مفتوح تجدنا نتلفت لانعلم ابدا عن برتكول الاكل والطريقة التى يؤدى بها ,الشوكة والسكين دى المشكلة ,شى مره السكين فى الشمال والشوكة فى اليمين (يعنى حايقطع كيف بس).
    محتاجين ياخوانا لجلسة كبيرة مع النفس لتقيم أنفسنا ووضعها فى المكان الصحيح قبل أن يحكم علينا أننا شعب فوضوى ,والحمد لله لاأحد يشك فى أخلاقنا وتعليمنا وأدبنا وكرمنا وأمانتنا .
    أبكرون أكيد قابلتك كثير من هذه الامثلة فى بلاد الهجر .
    عمنا بشار أبن برد .
    نتمنا أن تكون بلغت الصحة والعافية.
    د ياسين يزورو فيك ,قمة النشاط بس بطل (المناقذة) اعمامك شوية عليهم,

  17. ودالفتيحاب كتب:

    للتوضيح
    بلاد المهجر

  18. nono كتب:

    شباب المدونة شكرا علي المرور والاشادة

    استبان هل تحكم علي الشخص من اول نظرة من !!!

    مظهرة ؟؟

    جوهرة ؟؟

    من الاثنان معا ؟؟

    للحديث بقية……….

  19. ودالفتيحاب كتب:

    بكل تاكيد من مظهره لاننا لم نعلم الجوهر بعد.فاذا تفوه قيمنا جوهرة

  20. الغبشة كتب:

    مباااااااااااارك يانونو اول بوست وكانتضربة بداية موفقه,نتمنى نرى الاكثر والاروع……
    ارى ان القبيلة لم تقصر فى تناول اطراف الموضوع، لكن اسمحى لى بسؤال لقبيلة سعيد:مرة وانا فى المواصلات وقفت الحافلة قريب من صالون حلاقة وعينى وقعت على شاب يجلس بداخله ويضع( ماسك) لونه ابيض،بالله عليكم ايه الحكاية؟شماااااار عاوزه اعرف فى الصالون غير الحلاقة فى شنو؟
    اوعك يا افليقيا تقولى صاحبى س .

    د.عزت:قلت لى القميص ماشى مع البنطلون هو البنطلون ماشى وين على قول المسطول ،سالته واحده بالله يا اخو البلوزه دى ما شه مع الاسكيرت ده؟
    المسطول :هو الاسكيرت ماشى وين

  21. nono كتب:

    الغبشة اشكرك علي الاشادة /

    اشالله الرسالة وصلتك؟؟

    في انتظاااااار الرد؟؟

  22. الغبشة كتب:

    نونو: لو ما كلامك ده ،كنت قايلاه الرسالة كذبة ابريل، ولا دى اسمها (همزة ست الدلوك)لو ما عرفت البين القوسين ممكن تسألى اى واحد فى الكواشف ابتدأً بالسلاوى مروراً بابكرون ود زعزت……………………الى ان تصلى أخر كواشف المدونه افليقيا.

  23. aflaiga كتب:

    الغبشه : كوشفتينا كتر خيرك .. يا بتى انا قدر اخوك السغير علا ساى فصاحة لسان مننا .. لكن ما دام لميتينى مع ناس السلاوى ده شرف كبير .. ما تشوفى حمودى وسرويه وعبودى ساى تقولى الكاشف القصه كلها انو سمسمه اخدتنا على حين غره من العشق …!!

  24. aflaiga كتب:

    الغبشه : بالنسبه للصوالين :
    صديقى ن من المهتمين جدا بمظهره ويحمل فى معيته 3 مناديل واحد فى اللياقه بتاعة الرقبه وواحد للعرق الفى الوش وواحد لتلميع الحذاء بالاضافة لمناديل الورق .. دولابه متخم بالكريمات الما شفتها فى دولاب سمسمه ذاتو !! فى الماضى كنت اشير اليه بعلى براحه !! وهو زول راقى عندو زياره اسبوعيه للحلاق وطبيب الاسنان ودكتور الجلديه .. اغرب حاجه لمن يلعب معانا كوره بيشيل منديلو معاهو بيمسح بيهو الكداره كلما يشوت كوره واول ما تجيب ليها دافورى وكسر طوالى بيستاذن ويقعد فى كنبة الاحتياطى ..
    الصوالين الحديثه فيها كتابه فى اللافته لو قريتيها بتفتكرى نفسك فى كوفير تجهيز عرايس !!! شد شنو ورخى شنو وصنفرة شنو وشنو شنو !!
    غايتو يا الغبشه فى شباب حقيقة بيحسسك انك قاعد مع اختك !! زى ما فى شابات بيحسسوك انك قاعد مع نفسك !!
    وجاييك ببوست كامل للقصه دى لو الكواشف سمحو لينا ..

  25. الغبشة كتب:

    برضو قلت لى صديقى ننصديقك افيقيا مالو زعلان منو؟

  26. bakriMusa كتب:

    الاخت نونو
    والاخوة الاكارم

    اتفقت جميع الديانات السماوية .. والمجتمعات الإنسانية على وجه البسيطة على أن هناك معايير محددة يمكن في ضوئها الحكم على الأفراد والمجتمعات.. هذه المعايير ترى أن أفضلية الفرد تتحدد بما يمتلكه من ثقافة وقدرات ومواهب وأفكار وإبداع ويحولها إلى أدوات فاعلة لخدمة مجتمعه، وفوق ذلك كله يتمتع بدماثة الأخلاق والبساطة والتواضع والبذل – دون إسراف – ولين الجانب مع نزعة كبيرة إلى تطوير الذات والتعاطي مع كافة المواقف والأحداث بفكر نير وسلوك قويم، مع اهتمامه بحسن المظهر “إن الله جميل يحب الجمال” والأناقة واللياقة والكياسة .
    إن كل ما سبق لا يمنع من ظهور الإنسان بالمظهر اللائق وفق ما لديه من إمكانات مادية “فكل يمد رجليه على قدر لحافه” دون أن يكلف نفسه العناء ليلبس ثوبا غير ثوبه .

    في الوقت الحالي قلب الكثير من الناس كل تلك المعايير رأسا على عقب نتيجة لاختلاف ظروف الحياة وتحولها إلى حياة مادية طغت فيها المظاهر على الجوهر وأصبح الحكم على الفرد – خاصة لدى المجتمعات التي لا تمتلك الوعي الكافي – بالمظاهر.. “فالدنيا كما يقولون مظاهر” بهدف لفت الانتباه والتفاخر على الأقران والأصدقاء.. وقد أرجع علماء النفس الاهتمام الزائد بالمظاهر لمرض نفسي نتيجة الإحساس بعقدة النقص ممن هم أعلى في المستوى الاجتماعي والاقتصادي ولقلة الإيمان بالله وعدم الرضا بما قسمه.

    كسرة:ـ
    اتذكر ايام الشباب كنت في زيارة لوالدي المريض في مستشفى الخرطوم التعليمي وصادف وجود بعض طلبة طب جامعة الخرطوم مع استاذهم وهم يشخصون الحالات
    المرضيه وبما انني كنت راجع من عملي باحد القنادق ولابس على (سنجة عشرة) فجأة وجدت نفسي (تقصمت )شخصية طالب الطب عندما سألتني إحدي الحسان عن حالة ابيها المريض :

    *بالله يادكتور ابوي الليله حالتوا كيف ؟(راسي بقي قدر ده )(ما عارف من اللقب ولا من (يا صوتها لما سري عبر الاثير معطرا )..

    *الحمدلله اليوم حالتوا (ٍStable) بس لازم يواظب على العلاج

    وما عارف يوم داك رجعت البيت ببص الديم بالظلط ولا بص ديم كوريا ولا بص الصحافه ظلط .
    يبدوا انني كنت لا اكذب ولكنني كنت اتجمل

  27. نيام كتب:

    bakriMusa
    لالالالالا انت اليوم داك مارجعت البيت خالص ..انت مشيت كلية الطب سلمت علي الجماعة واحد واحد حتي بتذكر واحد برلوم قال ليك يا بروف السمستر التاني حتبداهو لينا متين..فقلت ليه I guess ,I think ,oh no matter! may be as soon as I get stable. ..
    يا خوي البنية موش اقتنعت ؟؟ خلاص مافيهاش حاجي دي كان ماجاوبتها بكرفتتك ديك تاني تجاوبها متين…
    افليقا:
    الغيار ديسبوزل والجزم اسبور
    موضة اخر موضة و الكلام تينور
    تحرق البتهابل و البعيد مسعور
    تعرف يا ابوالافلاق كمان عند الفراشين ديل فيهم واحدين بقبلو منك القديم و يدخلوه في البيعة حقت الجديد يعني ممكن تجدد هندامك بعشرة جني..اما قصة الاكشاك in the back town فعليك صحبة بودي قارد و لا اعتقد حسب تجربتي ان للبشاوي مثل هذه المؤهلات..

  28. البشاوى كتب:

    النونو
    مبروك
    موضوع جميل وراقى
    اما معرفة دواخل الشخص التى اشرتى اليها فهى بحكم التجربة تأتى عبر ثلاثة محاور لاتخطئ التشخيص بعدها ابدا
    1\ عند السفر يبين كل واحد غلى حقيقتو بالذات لو كان السفر عبر وسيلة مرهقة كالقطار او اللورى على زمن الكواشف
    2\ الشراكة فى المال او العمل
    3\ الارتباط القوى مثل الزواج
    ولا رايك شنو ياأبكرون باشا ؟؟؟؟؟؟؟؟؟

  29. الخير كتب:

    Nono
    السلام عليكم يااختى
    بمناسبة المظاهر الخارجيه وكدة هاكى القصيدة دى واظن كاتبها هو القدال وقصه القصيدة انو فى واحد جى من البلد الى الخرطوم وهو مزارع اها حبا انو يعيش حياة الخرطوم البسمع بيها ومنبهر بيها اها لمن نزل وطلع وفرفش وفعل كل مايظن انه ثقافه وكدة اكتشف ان هذه حياة مسيخه مافيها معانى مافيها جوهر مافيها دفء البندر حياه تحكمها المظاهر والمصالح .فى وسط هذا الجو فى واحده من بنات الخرطوم العرفن نمرت ان تفوز بهذا الصيد الثمين الراجل كان غنى جدا فلمحت له بان يتزوجها اها الزول فجاه افاق من هذا كله ورد عليها قائلا
    (مانى شبه عريسك انا حفيد فلاح غبش مشققات ايديا .عريسك عايزاه لعبه بين ايديك محل ماك عايزة بتودى .وان مليتى منو كمان جائز لأى زول تهدى .وأن حبيتى واحد غيروا طلقى لاتردى .أصلوا العندو ليكى سؤال يمد ايديهوا يقول افندى .وان كان منو فلتت كلمه لى جد جدو تسدى .ومانى شبه عريسك انا .مكشكشه كلك اسبيرات متل فضية العدى .ضفايرك من صنع باريس رموش عينيكى هولندى .مساحك بودره مصريه وبصابونه بتهدى .كدى اقلعى الباروكه لو ماتشبهى السكدى ولا تعالى بفستان قصير فى الركبه لو ماتشبهى الكردى .اهديك من وصف زولى (بت الريف )عويدو البانى الا البانى ممتدى .وجيهو الشفق ضواى غصن الند وكتين يندى .لوقايله انتى جميلى عاينى وفى النجوم عدى .ولو قايله غيرك مافى اخجلى لاتقولى كدى امانه الدنيا ما مليانه بيبنات الحور حوا كم والدى . واحدات فى رفاعه البتى وواحدات فى غرب شندى .لو وديتك ارقو هناك تشيلى الصفيح تردى ولو مالقيتى الباسطه من الدومه بتكدى .ولو قلت ليكى مراحنا جيعان تعرفى تمعطى السعدى .وحات اسم الله على من نص حوض تمسكك الوردى .ومانى شبه عريسك انا .بالله شوف المطرطشه دى اقوليها لاتسوى كدى كان اخيرلك تسوى كدى تقولى NO.SORRY ذوقك لسه ذوق بلدى . على جلات كلامك ده وعلى جلات خليقتك دى وقبال منى ماتبعدى انا عندى ليكى وصيه اخديها من عندى . عشان عرس البلد عشره وعشان عرس المدن شحدى .انا بعشق من البندر واعرس من بنات بلدى
    *مامعنى السكدى والكردى

  30. nono كتب:

    الخير/ لك التحية شكرا علي المرور

    يعني الزووووووول دة مسيخ كدة مالوا …

    البنية دة ماخلة ليها حتة تقبل عليها…..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s