دايرين شنو !!؟؟؟؟

Posted: الجمعة,10 أبريل, 2009 by ياسين شمباتى in اخرى

لعل معظم المتابعين لما يجرى فى الساحة السودانية على علم بمشكلة الاطباء التى تزامن حدوثها وقرار المحكمة الجنائية,وما دار حينها من تداول بين الاطباء ونقابتهم ووزيرتهم..وألخص الامر لمن ليس لهم علم بان وزارة الصحة فجأة ومن غيرما سابق انذار قد قررت ان تخصم 300 الف جنيه_قديم_ من راتب نائب الاختصاصى ليصبح راتبه 500 الف جنيه فقط!! مع العلم بان النائب ممنوع من مزاولة المهنة فى المستشفيات والمستوصفات الخاصة_معظمهم يتجاوز هذا القانون_كما انه لا يسمح له بمزاولة المهنة فى عيادة خاصة,ويبقى القانون سلاحا يشهر فى حينه لمن لا يحوز الرضا..
ولقد رفع الاطباء العديد والعديد من المذكرات والشكاوى للنقابة والوزارة ولمكتب العمل وديوان شئون الخدمة وتبعوا كل النظم واللوائح,ولما لم يجدوا صوتا يسمع او قلبا يعى لوحوا وهددوا بالاضراب والتوقف عن العمل..فما كان من وزيرتهم_التى لا تملك مؤهلا واحدا يبيح لها الجلوس على كرسى الوزارة اللهم الا انتماءها السياسى_ما كان منها الا ان هددت بانها ستضرب بيد من حديد على رأس كل من تسول له نفسه بالاضراب,محتجة بانهم لم يمنحوها زمنا كافيا لتحل المشكلة!! بالله عليك يا وزيرة الصحة,هل منحتى الاطباء زمنا كافيا او اخطارا مسبقا بانك سوف تقتطعى من رواتبهم هذا المبلغ الضخم!!؟؟ مالك كيف تحكمين؟؟
ثم يأتى رئيس المجلس الطبى الجديد(بروفيسور عثمان طه)_وقد كان عميد كلية الطب بجامعة الجزيرة,وهو رجل مشهود له بالكفاءة والخبرة الاكاديمية على مستوى الشرق الاوسط وافريقيا,لكنه لا يجيد الكثير فى فن الادارة والتعامل مع من هم دونه_يأتى البروف بقانون جديد ينص على عدم الاعتراف بزمالة الكلية الملكية البريطانية فى قسمى الطب الباطنى والاطفال,,ومنع الحاصلين على الجزء الاول فى هذه التخصصات من التدريب والتعلم على نفقة الوزارة!!!مع العلم بان هذه الامتحانات تعقد بالسودان بل وفى جامعة الخرطوم-كلية الطب!!! وللعلم ايضا ان البروف حاصل على الزمالة من تلك البلاد..واذا كان مقصوده هو تشجيع الدارسين على الحصول على زمالة مجلس التخصصات السودانية,فاين هى مراجعهم ومقرراتهم ومجلس ممتحنيهم الدائم؟؟وما هى معايير المرور فى الامتحان؟؟هل تصدقون ان المراجع والمقررات هى نفسها مناهج الكلية الملكية البريطانية؟؟وهل تصدقون ايضا ان النجاح قد يكون لانك ابن بروفيسور فلان او قريب دكتور علان او لحوجتهم الماسة الى كذا من النواب؟؟وهل تصدق انه من بين مئة ممتحن قد ينجح عشرة فقط!! ليس لعدم الكفاءة ولكن نسبة لعدم الحوجة..وهل تعلمون انه فى كثير من الاحايين تعدل النتيجة بعد صدورها بيوم او يومان؟؟هل بعد هذا كله نثق فى مجلسنا ونترك الزمالة البريطانية؟؟
وجاء قراره القاصم للظهر حين اعلن توقف التدريب على نفقة الوزارة_منحة داخلية_حتى عام 2011,,هل هذا يعنى ان يتوقف الاطباء عن تحصيل العلم حتى ذلك التاريخ ام ماذا؟؟وهل البلاد ليست فى حاجة حقيقية وملحة لخدماتهم ام ماذا؟؟بل واردف هذا القرار باّخر يقضى ان يوقع نائب الاختصاصى على اقرار يقضى بتنازله عن راتبه فى الستة اشهر الاولى والا يزيد هذا الراتب عن 500 الف جنيه!!!! يا للروعة…..
لقد كان المقال الذى كتبه د.امجد فريد والذى نشر على موقع سودانيزاونلاين وتكرم البروف بانزاله هنا بعنوان(ندين ادعاءات اوكامبو ونطالب بالمرتب) صرخة اسمعت لو نادي حيا,,لكنهم لاهون سادارون وفى غيهم يعمهون..ما الحكمة فى اذلال الرعايا واشعارهم بانهم ضيوف على الدولة؟بل وضيوف ثقيلى الظل كثيرى المطالب,لحوحين لزجين!! هل هذا جزاء من يعمل بالمتوفر من الامكانات ويتلقى اللوم والشتم والسب كل يوم من المرضى وهو لا حول له ولا قوة ؟؟هل هذا جزاء من دانت نفسه وخضعت رقبته للسلطان؟؟
حيفى عليك يا نقابة تبعت السلطان وتركت منسوبها الانسان,,على ذكر الانسان,اين هى الانسانية التى تتشدق بها الوزارة ويطالب بها المواطن؟؟اليس الطبيب بانسان يستحق ان يعامل بانسانية وان تحترم كرامته؟؟وددت يا اخوتى ان اقرأ يوما مقالا يتحدث عن الوضع المزرى وبيئة العمل المحبطة للطبيب السودانى,وعن كيفية معاناته واجتهاده فى ظل ظروف هى ابعد ما تكون عن الصحة واهلها..ولكننا لا نقرأ الا قدحا وذما وحكايات عن الاخطاء الطبية تمتلئ بها الصحف وتتجر فيها بالمواطن المسكين..لا اعفى اخوتنا الاطباء من الاخطاء ولكن,انظروا الى ما وراء الأكمة والاسباب,,واحكموا بعدل وانصاف..
فى النهاية كدة يا ناس المجلس الطبى,,دايرين شنو !!؟؟؟؟؟؟
ونلتقى……

 

Advertisements
تعليقات
  1. ابكرون كتب:

    د. يس :
    لكم الله يا اطباء بلادي وهكذا يطرد الجنين من رحم امه….لتتركوا لهم البلاد والمستشفيات لكوادرهم …وعندما تدخل السياسة والمصالح الحزبية الضيقة بالشباك …يخرج الاكرمون الي بلاد الله الواسعة بالباب….
    وليكن شعاركم :
    سأعيش رغم الداء والأعداء
    كالنسر فوق القمة الشماء

    أرنو إلى الشمس المضيئة هازئا
    بالسحب والأمطار والأنواء

    لا أرمق الظل الكئيب ولا أرى
    ما في قرار الهوة السوداء

    وأقول للقدر الذي لا ينثني
    عن حرب آمالي بكل بلاء

    لا يطفئ اللهب المؤجج في دمي
    موج الأسى وعواصف الأرزاء

    فاهدم فؤادي ما استطعت فانه
    سيكون مثل الصخرة الصماء

    ويعيش جبارا يحدق دائما
    بالفجر بالفجر الجميل النائي

    وانشر عليه الرعب وانشر فوقه
    رجم الردى وصواعق البأساء

    سأظل لأمشي رغم ذلك عازفا
    قيثارتي مترنما بغنائي

    أمشي بروح حالم متوهج
    في ظلمة الآلام والأدواء

    النور في قلبي وبين جوانحي
    فعلام أخشى السير في الظلماء
    ——————————————————————–
    ياخ بالله 500 جنيه….عارف الخادمة بتاخد المبلغ ده ويمكن اكتر…وهو دخل صاحب حافلة في يوم…..يارب الست الوزيرة مخصصاتها كم ..؟

  2. ودالفتيحاب كتب:

    د شمباتى
    وأخونا أبكرون
    صبحكم الله بالخير
    وجمعه مباركه.
    كلام جديد وغريب ,واعلامنا المجيد معطينا الصوره مقلوبه ,كأن هناك غلو عند الاطباء وفهمناها ان الاطباء انتهزو الفرصه لتكبير كومهم لاننا دائما شايفين الاطباء مرطبين .

  3. البشاوى كتب:

    د\ شمباتى
    صبحك الله بالحير
    الله يكون فى عون انسان هذا البلد طبيبا او مريضا
    وزى الحال دة يوم لاكان لاحصل

  4. طارق أب أحمد كتب:

    صوره إلى إبنى أيمن

    يا ولدى ما قلت ليك شوف ليك سباكه ولا سمكره و حداده أفيد ليك و,,,,,,,,,,,لينا

    جمعه مباركه و راجعين بعد ما بنج فطور الجمعه يفك

    آخ نسيت
    شمباتى كيفك و الله شوقنا بس مسيره مليونيه

  5. مُخير كتب:

    العزيز حاج ياسين
    الحبان سلام
    تعرف يا دكتور دخلت فراشكم ده وقمت بالواجب ورجعت تاني ما لقيتو، غايتو مشروع جنترة والله يستر بالطريقة دي ما نلقى الطبيب المداويا ،،،
    النصيحة لله الأطباء مظلومين ظلم الحسن والحسين، وباقي لي الجماعة ديل فتحوا الترباس وخلوا كمية منكم يشتتوا لعل وعسى يقدروا يلبوا الحد الأدنى من طلباتكم الما بنتهي دي، هو يحلوا مشاكلكم ولا مشاكل المعلمين ولا الموزفين ولا منو ولا منو، ما براكم شايفين وعارفين الحاصل، غايتو كدي نمرق من الحتة الضيقة النحن فيها وبعدين نعالج مشاكلكم اللي لا ليها أول ولا آخر.
    بعدين قلتي لي البروف وقت الصبا عمل زمالة الرويال كولج في أدنبرة طيب ومالو ما هسة بكرة حنعمل ليكم رويال كولج في اللعيت جار النبي ولا توتي وتجوا كوولكم تعملوا زمالة فيها، منو الكان بيصدق إنو يكون في كلية طب في الفاشر وفي خورطقت وجامعات في كل أركان السودان غايتو إنتو شعب جاحد وما وش نعمة وأكتفي بهذا القدر وأستغفر الله لي ولكم والسلام.

  6. الحاج دكتور يس
    المدونين الأعزاء سلام

    أولا تدري تلك الوزيرة ان بلا أطبائنا ديل ما عندها شئ

    انهم ملائكة للرحمة و مهما أصيبت هذه الشريحة من ظلم و عدم اهتمام هذه الأيام إلا أن المعدن الأصلي يبقى فالذين مارسو الطب جد جد في السودان و ما زالوا قابضين على الجمر أسسوا سمعة طيبة في الداخل و الخارج لأنهم تدربوا في ظروف أقل ما توصف بأنها ليست جيدة و لكنهم نبغوا و صاروا مفخرة لنا في كل مكان التحية لهم…

    و لتهنأ و من شايعها بمخصصاتهم انشاء الله تضوي ليهم

  7. د.ياسين شمباتى كتب:

    ابكرون..سلامات..

    فعلا انحنا عايشين برغم الداء و(الاعداء),,وعلى قول ابونا السلاوى راجين نشوف اّخرتها شنو…والوزيرة ما فاضية من الحفلات والتكريمات والمباركات والمجاملات الادبية,وناسية واجبها تجاه شريحة مرؤسيها المغلوب على امرهم..
    والادهى من كدة انهم ذوبوا نقابة الاطباء واتحادهم فيما يعرف ب(نقابة المهن الصحية)!! عليكم الله فى فوضى نقابية اكتر من كدة؟؟وفى ذكاء اشد وامض من ذكاء الجماعة ديل؟؟ خلوا الطبيب والممرض والمساعد الطبى وطبيب المختبرات والفراش والقابلة والسستر على اختلاف شهاداتهم ودرجاتهم العلمية ومراتبهم الوظيفية فى نقابة واحدة!! مع احترامنا لكل الزملاء بالحقل الصحى,لكن لم نر احتقارا او امتهانا لاى مجال غيره كما صار اليوم..وبذلك يضمنون ولاء الاكثرية الفئوية وتضيع كلمة النخبة المتعلمة التى يجب ان يسمع صوتها..

    ووالله الوزيرة دى لو ما مدور ليها د.كمال عبدالقادر_العفيف النظيف_شغل الوزارة كان الفيها اتعرفت..وراجين منك الكثير يا د.كمال..وكلنا خلفك من اجل الوطن الحق..

  8. د.ياسين شمباتى كتب:

    ود الفتيحاب..المشكلة فعلا فى الاعلام البدس الحقيقة ويظهر العايزاهو الدولة,وزمان كان عندنا مشاكل فى المرتب قبل ننزل الامتياز,,جرايد بسيطة القبلت انها تكتب عن المشكلة,وهى ذاتها جرايد ما عندها توزيع كويس!! والتلفزيون رفض يعمل تسجيل عن الموضوع!! والله الاطباء غلبانين وما قعد يكبروا كومهم,,يا حليلك يا (الجزولى دفع الله)..

    سؤال خاص يا ود الفتيحاب..انت (مكجر) الصور دى ولا شنو!!؟؟ ابت تترسل..

  9. د.ياسين شمباتى كتب:

    البشاوى العزيز..فعلا زى الحال دا يوم لا كان لا حصل,,ولا اظن بيحصل..

    البشاوى العزيز,,يا كمين بشر…هل نعلم انهم قصروا فترة التدريب المسماة بالامتياز من 16 شهر الى 12 شهر بحجة الحوجة الماسة للاطباء العموميين..طيب النواب ديل ما بفيدوا المرضى اكتر من العموميين!! مالكم مابينهم؟؟ ومالكم بتعاملوهم بالدونية دى؟؟

    اب احمد..الشوق اكتر والله..ياربى ايميلاتى وصلتك؟؟ الطب بقى مهنة ذات وجاهة اجتماعية,بدأت هى الاخرى فى الانحسار وبدأ الطبيب يفقد احترامه وسط مجتمعه..يعنى دكتور يكون ساكن ام بدة وشغال فى بشاير,وما لاقى غرفة فى الميز,,يقوم من الصبح يدافر فى المواصلات عشان يلحق نوبتجية الصباح,,تخيل دا لما يصل الحوادث ح تكون اخلاقو كيف؟؟ معقولة بس!!!؟؟؟

  10. د.ياسين شمباتى كتب:

    مخير..جمعتك سعيدة..ياربى يكونوا قاصدين كدة؟؟طيب كان يصارحونا احسن..بالجد فى يالعزيز وم من ايامى عملى بقرية(ودربيعة) كان بتناقش معاى احد منسوبى(المؤتمر الوطنى),فكان بتفضل وبمتن على بانو الدولة فتحت جامعات عشان يقروا فيها(الزيى)!! قلت ليهو انا قريت فى جامعة موجودة من قبل يلدوهو هو,بعدين الكثرة ما بتعادل الجودة,,ولا شنو يا مخير؟؟ هل تعلم انو السودان بيخرج 2000 طبيب كل سنة؟؟وعدد المتدربين منهم سنويا لا يتعدى 1000 او 1500؟؟ وعدد الذين يتم تعيينهم بعد التدرب فى وظيفة طبيب عمومى لا يصل الالف مهما حدث؟؟ وبعد دا يمتنوا عليك بالهم الاتسببوا فيهو..ربنا يصلح حالهم بس..

    د.عزت…يا ريت هى تعرف!! لكن اصحاب السمعة الطيبة ديل اتدربوا فى ظروف اقل ما توصف بانها ممتازة!! لانو درسوا من المرحلة الابتدائية او الاولية وحتى تخرجهم من الجامعة على نفقة الدولة.وكانت الداخليات_وبراك عارفها_عبارة عن فنادق خمسة نجوم,,وكانوا بيدوهم اعانة,,وابتعثوهم للدراسات العليا على نفقة الدولة,,حتى تخصصاتهم الفرعية كان بعضا منها على حساب الحكومة..نحن لا نطالب بكل هذا,,فقط نطالب بحقنا الادنى فى الحياة,,على الاقل يعيدوا الاتحاد سيرته الاولى..هل تعلم انو الطبيب بيدفع 800 الف ايجارا لارضية دار الاطباء اذا كان سيتزوج هو شخصيا؟؟وعليه بعد ذلك ايجار الكراسى والترابيز والزينة وزكل شئ,,مع العلم بانو يخصم من راتبه شهريا مبلغ مقدر من المال لصالح الدار_واريتك ما تشوف حالتها_

    لك الله يا وطنى الجريح…..

  11. ودالزبير كتب:

    العزيز شمباتي

    وددت لو أستطعت أن أتعاطف معكم معشر أطباء السودان لكن في الحلق غصه من الأطباء عموماً وإن جاملك الأخوه أعلاه تضامناً معك شخصياً مره وكره في الحكومه مره أخرى لكني دعني أسوق لك رأي مختلف . معظم الأطباء يشعرونك بأنهم مخلوقات من طينه مختلفه التعامل في المستشفيات سواء العامه أو الخاصه يشعرك الطبيب أنك لا تفهم شيئاً وإن سألت أسئله عن أحوال مريضك تأتي الأجابات من طرف الأنف النماذج الخيره التي نعرفها من الأطباء هي حالات إستثنائيه لكننا نتحدث عن الغالبيه من أطباء بلادي … الكلام يا دكتور يس عن هضم حقوقهم بالطبع لا نوافق على الظلم حتى وإن كان لنا رأي سالب في الأطباء لكن دعني أتسأل هنا عن أحوال الكوادر الطبيه المساعده من ممرضين ومحضري عمليات وفني معامل وغيرهم هل تحدثت النقابه عن حقوق هؤلاء …. هناك فقره في البوست تتحدث عن عدم وجود مؤهل للسيده الوزيره لتبؤ هذا الموقع أرجو أن لا يكون ذلك نابع من كونها خريجه تمريض عالي فحسب معلوماتنا أنها تحصلت على درجه الدكتواره وهي درجه علميه مرموقه وكونها ليست طبيبه لا ينقص منها ذلك شيئاً وأنت الأدرى أن في بلادي يمكن لأي شخص أن يصبح وزير حتى ولو لم يكن مختص ومن المعروف أن وكيل الوزاره هو من يقوم بتصريف العمل في الوزاره وهو ما أشرت له أنت بحديثك عن دكتور كمال …

    عارف يا دوك

    الزول عارف أن الرأي المختلف هنا بقي يجلب المشاكل خصوصاً بعد أن يتكون رأي عام قوي حول موضوع لكن قدرنا أن نقول ما نراه صحيحاً ..

    بعدين زي ماقالوا الأخوان فوق الأطباء ديل ناس مرطبين وممكن تلحظ ده في ملبسهم وسيارتهم وأسلوب معيشتهم ( اللهم لا حسد ربنا يزيدهم كمان وكمان ) لكن البلد فيها مظاليم كثر وممكن نضرب مثل بمزارعي الجزيره وغيرهم من مظاليم البلد ربنا يخفف على الكل .

  12. د.ياسين شمباتى كتب:

    صديقى ود الزبير..اختلاف الرأى لا يفسد للود قضية..

    اولا اعتقد انو اّراء الاخوة ما نابعة عن تضامن مع شخص او فرد,بل هو رأى نتج عن دراسة وملامسة للواقع المعاش..ودا ما بالنسبة للطبيب بس,بل زى ما ذكرت فى ختام مداخلتك انو واقع الكثير من الكادحين فى بلادى بكل طبقاتهو وحرفهم..وربما كتبت انت وغيرك فى هذا الموضوع مرارا وتكرارا,لكن يبقى الطبيب مظلوم اعلاميا..
    وما لمسته من بعض الاطباء لا يعطى فكرة عامة عنهم,وحتى لو سلمنا بى انهم(ظلمة وكعبين) فدا ما بيعطى مبرر للدولة انها تضطهدهم وتهينهم كدة!! والا ح يودينا لى كلام ما بسر زول اذا اتبعنا منطق الظالم يظلم وكدة..

    ويا عزيزى ود الزبير لا تنظر الى القلة التى تملك سيارات وعيادات فخمة ويعملون فى عدة مستوصفات خاصة,,بل انظر الى الاغلبية التى تشكل اكثر من 90% من اطباء بلادى,وتشكل طبقة كادحة وبائسة..
    اما بالنسبة للوزيرة,فهى على حد علمى تحمل ماجستير فى التمريض العالى من جامعة بلندن,وحتى لو كان معها دكتوراة,فهذا لا يؤهلها _على حد علمى_الى ترأس وزارة الصحة..لانه لا يعقل ان تترأس على من يعلونها فى الدرجة العلمية والمؤهل الاكاديمى,,لكن للاسف هذا هو الوضع فى بلادى(الما مناسب فى اى مكان والسلام)..
    اما بالنسبة للكوادر المساعدة(ممرضين ومخدرين ومحضرى عمليات وغيرهم,فديل بياخدوا حقوقهم اول باول واوضاعهم احسن مننا كتير)..هل تعلم انو نقيب المهن الصحية فى ولاية الجزيرة ممرض بشهادة_يعنى ما خريج معهد التمريض_وانو الاّن يملك عمارة من 3 طوابق غير العربات الما تديك الدرب!!؟؟
    عليك الله لو عندك قريبك طبيب امتياز او عمومى او نائب اسألو من الحاصل وهو بوريك المغسة العليهم..

  13. جلنار كتب:

    الدكتور ياسين :
    لك السلام والتحية…
    ولكم السلام يا أطباء السودان والدعاء بتحسن الأوضاع
    حابة اعقب على كلامك الاخير يا دكتور (ان الكوادر الاخرى ماخدة حقوقها بالكامل) ,,لكن الصحيح الكوادر الطبية الاخرى ماقادرة تاخد حقوقها زي ما انت قلت..
    انا خريجة مختبرات طبية واتممت اجراءات التخرج والتسجيل المؤقت بالمهن الطبية لكن بعد ماواجهت حقيقة الوضع بالحياة العملية بعت القضية وحاليا اعمل باحدى شركات الاتصالات !!!! شفتو كيف!! ..
    هل تدرون ان مجال المختبرات الطبية كان قبل سنين شهادة التخرج لا تتجاوز الدبلوم وعندما واصلو الاضرابات وعاقبوهم بوقف دراستهم حوالي الاربع سنوات تم تصعيد شهادات التخرج الى البكالاريوس-اخيرا-وتخرج طالب المختبرات ومنى نفسه بالماجستير واتمها ومنى نفسه بالدكتوراه—مع العلم انه رغما عن الماجستير فيا خريج المختبرات انت في وزارة الصحة لا تستحق لقب (باحث) !!!!
    ويا خريج المختبرات انت في وزارة الصحة مازلت تحت القانون الذي لم يتغير منذ 30 سنة !!!
    ويا خريج المختبرات انت لا يحق ليك فتح مختبر بأسمك الا تحت اسم طبيب بشري -تخصص بمجال المختبرات-!!!!
    يا دكتور ياسين هل تعلم انو مافي حتى محاولة لتحسين وضع خريجين المختبرات الطبية ليه ؟؟؟ لأنو القائمين بأمر وزارة الصحة وقراراتها ( عصابة أطباء) وفيهم الكتير المتخصصين بمجال المختبرات , فبالتالي اذا خريج المختبرات تحسن وضعه المهني فيا دكتور عليهم السلام حيقفلو ويمشو بيوتهم….فيا دوك لغاية هنا وخلاس ماتخلينا نتكلم ساااااي

  14. د.ياسين شمباتى كتب:

    جلنار..سلامات ومرحب بيك..

    فعلا نبهتينى لى نقطة مهمة كنت عايز اثيرها بس كنت مأجلها لى وقت تانى..الاخوة اطباء المختبرات مظلومين ظلم بين لا يغالط فيه انسان..وانا متابع الحاصل فى القضية كلها من زماااان,واذا سمعتى بى طلاب المختبرات بتاعين الجزيرة القربوا يشردوهم بتحالف من ادارة الكلية والنقاية ومجلس المختبرات الطبية..وللاسف خريج المختبرات يدرس 5 او 4 سنوات وينال البكالوريوس ولا تنعم عليه الدولة بلقب(طبيب او دكتور) ولما خلاص تفضلوا عليه منحوه لقب(اختصاصى)!!! عليك الله فى حقارة ومهزلة اكتر من كدة؟؟

    ويا اخت جلنار انحنا ما بنعتبركم من الكوادر المساعدة,,ولما قلت الباقين ماخدين حقوقهم ما كنت قاصد اضمن اطباء المختبرات معاهم..

    وخليك دايما قريبة يا دكتورة..

  15. ودالزبير كتب:

    العزيز يس شمباتي

    شوف يا فرده

    أصلاً قصه الأطباء ديل مساكين ومضهدين وتعبانين دي ماواقعه لي .

    يا معلم تمشي المستشفى تلقى طبيبه الأمتياز لابسه أحسن لبس شايلها أحسن موبايل الطبيب متريح بأحسن ريحه أها ديل يكونوا تعبانين كيف بعدين نحن علينا بالظاهر يعني لمن تلقى الطبيب لابس على سنجه عشره فمعناتها إنه مرطب ولا عندهم أصحاب في بلاد بره بيرسلوا ليهم …

    نرجع لموضوع الوزيره وأنت يا دوك عارف إنه في يوم ما كان وزير الصحه المقدم قلوال دينق أها أحسن ليكم مقدم أركان حرب ولا زول من كاركم ….

    كامل تضامننا مع خريجي المختبرات الطبيه

    وكامل تضامننا مع نؤاب الأخصائيين لحدي مايبقوا أخصائين ..

    بعدين إنتو القال ليكم ضيعوا وقتكم منو في القرايه ( أحيلك لنكته غسال العربات مع البروف )
    خالص الود

  16. د.ياسين شمباتى كتب:

    ود الزبير..(نونو) ما قالت ليكم المظاهر خداعة؟؟ يعنى الا يجيكم مبهدل وعينو بى قضاها وريحتو تصحى المغبى عشان تقتنعوا بى ظلمو!!؟؟؟ وزى ما قلت امكن اهلو مرتاحين او عندو اصحابو بيدعموهو..
    يا ود الزبير انا بتكلم عن مرتب 500 الف جنيه_قديم_ لى زول فى الدرجة التاسعة,,وبتكلم عن قوانين مجحفة ومذلة للانسانية..وبتكلم عن اقرار توقع عليهو قبل تعيينك..عليك الله لاقاك فى قانون الخدمة المدنية بند زى دا!!؟؟ وفى اشياء العن واخس داخل الوزارة..

    بعدين منطق اخير ليكم دا ولا داك ما بنفع مع الديمقراطية والشورى الحقة,,انحنا بنطالب بى الوزير المناسب الكفء,,يعنى لا قلوال لا تابيتا لا اى شخص غير مؤهل اكاديميا وعلميا..ليه دايما نرضى بالدنية ونقول دا احسن من غيرو؟؟ليه ما نشوف غيرو عشان نتأكد من كفاءته؟؟ الديمقراطية الحقة تأتى بالتجريب,والحقوق صارت تنتزع انتزاعا,,وما ضاع حق لم ينم عنه اهله..

    لكن كلامك صحى اننا ضيعنا وقتنا فى الفارغة,واهلنا صرفوا دم قلبهم وجنوا السراب..

    لك الله يا وطنى الجريح…

  17. حنين كتب:

    د.شمباتى وسمارة الكرام .
    سلامات وطابت جميع أوقاتكم .
    يا دكتور شمباتى ماتصبر شوية . بالطريقة دى انت فقدت الصبر ودى فرنبة ساهى .طالما طلعت من البلد بغية تحسين الاوضاع حقو تحتسب والاجر على الله .
    الحتة بتاعة كفائة الوزيرة دى لأنها تعيين سياسى يعنى بتعتمد فى أختيارها على قوانين نظام وخصوصا بعد الدخول مع عدة حركات متمردة فى المفاوضات والتنازل لها عن بعض السلطة يعنى ضريبة السلام تطال جميع المؤسسات الحكومية أما مازكرتة عن نقيب المهن الطبية والذى يمتلك عمارة فهذة قسمة رب العباد ..

  18. مُخير كتب:

    الحلوين سلام
    ونهاركم سعيد
    العزيز حنين: لا أرد مدافعاً عن د. شمباتي فهو أقدر على ذلك، لكنني أحتار من قولك ((طلعت من البلد بغية تحسين الاوضاع حقو تحتسب والاجر على الله)) وهذا لعمري منطق مرفوض، طالما المذكور قُدر له أن يخرج ويجد ظرفاً أفضل مهنيا وأحسن معيشياً فهل يعني ذلك أن ينكتم، يُحمد له أنه لا يزال على إلمام بتفاصيل معاناة كان جزءً منها، وطالما هو الآن في وضع يسمح له بأن يمارس التوعية والتبصير بقضايا شريحة ينتمي إليها فما الغضاضة في ذلك.

    2) أما موضوع كفاءة الوزيرة، قد لا أتفق مع ياسين في منطق تقييمه للكفاءة فجون ميجور أحد أنجح رؤساء الوزارة في بريطانيا لم يدرس جامعة، وبذات القدر أحد وزراء الداخلية السابقين في أمريكا فإن لم ينتقص من كفاءة رئيس الوزراء في هاتين الدولتين عدم نيلهمما أرفع الشهادات العلمية فمن باب أولى أي مسئول يجلس على هرم أي وزارة حتى ولو كانت الصحة يفضل أن فلا يكون طبيباً لكن إذا كان إداري كفؤ وحوله مساعدين أكفاء يستطيع أن ينجز مهامه، لكن الغير مقبول لدى هو منطق ضريبة السلام والتنازل التي يتوجب أن يدفعها الشعب، ففوق كل مسئول سائل وفوق الكل رب العالمين ولا يعني الاتفاق مع الحركات إياها أن تمنح الحقائب الوزارية هدايا !!!

    3) أما ((إمتلاك نقيب المهن الطبية عمارة فهذة قسمة رب العباد)) ده كلام غريب !!! فإن صح إمتلاكه لها من عرق جبينه لا ضير، أما إذا كان ممن إمتلكوا عمارات من خير الإنقاذ المقتطع من عرق العباد فلن يرضى عنه رب العباد.
    ويا حنين خليك حنين، أحد أقربائي من الأطباء يشتغل دوامين ويقود سيارة قديمة ورثها عن أبيه الراحل وعندما تعطلت مكنتها مد القرعة مستحياً طالباً المدد لمساعدته في إعادتها للحياة، فليس كل ما يلمع ذهباً يا صديقي.

  19. حاج أحمد السلاوى كتب:

    ]د. يسن الغلوب على أمره ..
    غايتو ما عندك غير حل وااااااحد بس .. تمشى الحرم وتدعو الله العلى القدير أن يكشف عنكم ظلم الحسن والحسين ..لأنو ظلم ذوى القربى ( ناسكم ناس نقابة الأطباء ) أشد مرارة ..واشد وقعاً …
    يس عندى سؤال سغيروووووونى كدة ..النقاية دى جات عن طريق الإنتخاب ..ولاّ تعيين سياسى زى السيدة وزيرتكم الموقرة تابيتا بطرس ؟ إذا كان عن طريق الإنتخاب ..ما أظن عندهم طريقة تانى يفوزوا حتى لو كانو هم الوحيدين المصوتين ..وأما إذا كان تعيين ….. فما عليك إلا أن تلوك حبال الصبر حتى تشبع .. ثم تجتر .. ثم تأكل مرة أخرى .. وهكذا حتى يقضى الله أمراً كان مفعولاً…
    ودالزبير … مالك شايلة تقيييييلة مع أخوك السغير دة ؟ ولاّ يمكن دى من علامات المحبة ..وربنا يديم المحبة .. حبة .. حبة …لكين برضو إختلاف الرأى لا يفسد للأطباء قضية …غايتو الله يكون فى عونكم يا د. يسن .. .. إنتو حتلقوها من النقابة ..ولاّ من تابيتا ؟ وما عليكم إلا الإنتظار عشان تشوفوا آخرتا شنو.. مع الجوز .

  20. د.ياسين شمباتى كتب:

    مخير..يسلم فمك..واوفقك الرأى تماما ان الكفاءة الادارية مطلوبة اكثر من الشهادات,,لكن اذا انعدمن الاتنين,,نقبل وين!!؟؟؟ ولا اخفيك خبرا ان الوزيرة تكايد الحكومة بقرارات تصدرها تكسب بها غضبة الشعب والاطباء,,ابسط مثل قرارها القاضى بمجانية العمليات القيصرية وعلاج الاطفال ما دون الخامسة..لقد اصدرته بين ليلة وضحاها ولم يدرس الامر جيدا,,حيث ان التمويل لم يقدم للمستشفيات,,خصوصا التى تقع خارج العاصمة,,مما ادى لممارسات سالبة من ادارات المستشفيات والاطباء..فهى عندما اصدرت قرارها كانت تضع فى حسبانها واحد من امرين,اما نجاح القرار ويصير محمدة لها وللحركة الشعبية,واما يفشل فتثير سخط وغضب الشعب على الدولة ويتهمها بمعاداته_اكثر مما هو حاصل_وتضغط به حركتها على الحكومة..ولكن لولا فضل الله ثم جهد السيد الوكيل لما تحقق النجاح لهذا القرار..

    بعدين يا حنين انا بتألم بشدة لما الواحد يقرا كلامى ويفتكر انو انا كاتبو من منظور شخصى!! يعنى الا اموت حتى اتكلم عن الموت والقبر وعذابه!!؟؟ وهل انا لقيت وضع كويس فى بلدى ورفضتو؟؟ هل تعلم انو جاتنى فرصة للاغتراب قبل سنو ونصف ورفضتها..لانى كنت لسه متوسم خير فى الوزارة..بعدين نحتسب شنو ولا شنو!!؟؟؟
    بعدين كلامك عن قسمة رب العباد دا غريب خالص!! طيب ما نقول الحكومة دى قسمة ونسكت,,والكافر يقول ربنا قسم لى الكفر ويسكت,,ونبقى(قدريين) ونرمى كل شئ على القدر والقسمة!! كلامك دا ذكرنى كلام عبدالباسط سبدرات لما سألوه عن سر الاستوزار الطويل_من جات الحكومة وهى يتنقل بين الكراسى الوزارية_رد على المحاور :الناس البقولوا كدة ديل ما مؤمنين!! لانو السلطة والوزارة دى قسمة من ربنا!! فما كان من المحاور الا ان تبسم سخرية!!!!!!
    وللمعلومية ان رئيس النقابة بولاية الجزيرة متورط فى قضية فساد مالى مع مدير التلفزيون ووزير الثقافة(اخو الوالى),,واستقطع من مرتباتنا مرتب يوم كامل بقرار من الوالى لصالح الحوادث وبنك الدم_طبعا الغرض الاساسى تغطية الاموال المنهوبة والتى تقدر ب3مليار جنيه_ولى يوم لليلة ما عملوا شئ فى الحوادث او بنك الدم…

  21. د.ياسين شمباتى كتب:

    الوالد السلاوى..كيف اصبحت؟؟ولا بقت كيف قيلت عديل بعد دا؟؟

    النقابة رئيسها وعضويتها جوا بالتعيين طبعا,,ليهم اكتر من عشرة سنوات ما عملوا انتخابات او دعوا حتى ولو اسميا لى اجتماع جمعية عمومية,,واسألنى انا عن كيفية تكوين النقابة فى المستشفيات,,تجى الصباح تلقى اسماء معلقة بعضوية النقابة!!! وانا شهدت دورتين فى مستشفى رفاعة التعليمى,,يشهد الله ان النقابة الاولى لم تحل او تدعو لاجتماع الجمعية العمومية,وكنت وقتها طبيب امتياز_اى لا يحق لى التدخل او الانتخاب او الترشح_جينا الصباح لقينا نفس اسماء اللجنة السابقة معلقة بقرب مكتب المدير الطبى!!!!

    بعدين انحنا اجترينا لما انجرينا عديل كدة..غايتو دعوات الحرم عااارف بقبلها وين!!!

  22. ikram كتب:

    اخى وصديقى د. يس شمباتى
    اولا اشكرك جدا انك اثرت هدا الموضوع وحاولت تعكس للناس جزء من مأسينا
    نحن الاطباء
    المشكلة يا د.يس انه المشكلة ما بدايتها من تعينات الامتياز القصة قديمة جدا جدا من قبول الاعداد الهائلة لكليات الطب ليس حسب نسب القبول فقط وحسب الكفاءة هناك الكليات الخاصة والقبول الخاص فاصبح كل من هب ودب يستطيع ان يصبح طبيب.هل تدرى انى عندما كنت اؤدى فترة الامتياز وانا تخريجت من اقدم جامعة فى السودان والحمد لله قبلت فيها بنسبتى وعرق جبينى, كان هناك من يؤديها وقد قبل فى الجامعةبنسبة70%, وهناك من قبل فى جامعات خاصة اقسم بالله بنسبة63%.
    القبول للجامعةيا صديقى ليس لمن كد وجد او بسهر الليالى كل المشاكل بتتحل بالقروش…….
    و اجمل تعليق قيل لنا ايام مشاكل التعين للامتياز من رئيس اتحاد العمال وهو د.ابراهيم غندور فى حافز اكبر من كده؟؟؟
    و ردى للاخوة الدكروا ان الاطباء دايما بيلبسوا احسن لبس وراكبين عربات , الجزار اثناء شغله بلبس جلابيه مليانه دم وبعد ما ينتهى بغير ملابسه بواحدة نضيفة ومنكن يركب عربية حيتعرف؟؟ والبناء بيلبس قميص وبنطلون كله طين و مونه وبعد ما ينتهى حيغير بلبس نظيف وحيركب المواصلات حيتعرف؟؟؟
    قصدى انه كل واحد عنده لبس لزوم الشغل ايضا الطبيب لبسه المهندم لزوم الشغل و ما اظن فى مريض حيمشى لطبيب مبهدل؟؟؟؟!!!!!
    ثم هل هناك موظف يبيت فى مكان عمله غير العسكرى والطبيب وهل هناك من يكون على اهبت الاستعداد ادا استدعى فى انصاف الليالى وهل هناك من ينتقل اليه عدوى المرض باختلاف انواعه غير الطبيب وده لمجرد انه بيقوم بواجبه…
    انا والحمد لله بحب مهنتى جدا رغم انها متعبة وغيورة عليها جدا جدا … لكن ادا قلنا الزول يعمل قدر قروشه ما حتلقه زول فى المستشفيات احنا بنعمل قدر ضمايرنا…

  23. ياسين شمباتى كتب:

    الاخت الدكتورة اكرام..سلام..

    كلما ذكرتيه لم يجافى الحقيقة,ولكن يبقى هناك من يتربص بنا الدوائر!!

    فى ردة فعل قوية من المجلس الطبى البريطانى والكلية الملكية والجامعات البريطانية ازاء قرار رئيس(المجلس الطبى السودانى) الموقر بعدم سماحه للاطباء الذبن حصلوا على الجزء الاول من زمالة الكلية الملكية فى شتى المجالات بالحصول على فرصة للتدريب على نفقة الوزارةوتلميحه الى انه لا يعترف بهذه الشهادات,,ردا عليه فقد رفضت بريطانيا الاعتراف بشهادات التخرج من كليات الطب السودانية..مما يعنى عدم السماح للسودانيين بالحصول على زمالتهم او العمل فى تلك البلاد..

    اسه عليكم الله جنس دا يقولوا فيهو شنو؟؟؟؟ اسأل الله ان يرينا يوما اسودا كيوم عاد وثمود فى كل من ظلم البلاد والعباد واراهم الذل وسامهم الهوان..

    لقد سدوا امامنا المنافذ,,والجاتنا جاتنا من الارض,,ما جاتنا من تالا السما..

    لك الله يا وطنى الجريح..

  24. aflaiga كتب:

    شمباتى : اما سمعت بعطاء من لا يملك لمن لا يستحق ؟؟؟
    وهو مجلسنا ده عليك الله كان فيهو فايده كان حوج الناس يمتحنو بره وولا يتخصصو بره ؟؟؟ وكمان عجز وسوء ادب ؟؟!!
    هو عليك الله ناس بره ديل مش بركه الاعترفو بينا كبلد ذاتو !!
    ذكرتنى عمنا الترزى س الذى شاغله صديقه المكوجى بانو سمع اسم الترزى فى تشكيل الوزراه الجديد فما كان منه الا ان رد :
    والله بستاهلا علا ما بيدونى فرقه !!!
    اها ترزيتنا ديل كمان قايلين روحم بيستاهلوها ونفس السلوك السياسى عاوزين يكرروهو فى الطب كرهونا التب ذاتو !!!!

  25. ياسين شمباتى كتب:

    افليقا..والله بقوا للناس فى رقبتهم,,وبعد دا عصرة جوة ما عايزين يخففوها شوية..بس ربك يستر..

    وبعد دا كلو فى ناس ماسكة ليك فى الاخطاء الطبية وما شغالة بى الظلم وهضم الحقوق!! لا نتنصل من المسئولية لكننا نطالب بالعدالة فى المحاسبة..

  26. دروشاب كتب:

    يا حاج اصل المشكلة دي زمااان لما اضرب الاطباء فى بدايات الحكومة قال كبيرهم وقتها عندما اخبر بالاضراب ادونى ستة سنة وانا انهى ليكم الاطباء بالكترة بس هم يعلمون تماما ان الجامعات تخرج الارتال فمن يسمع الكلام هو من الصفوة وديك يا العربات وديك يالمكاتب والمرتبات مرتبات اضعاااف اضعاف مع انو من نفس الدفعة يكشفون علينا ويدخلونا المعسكرات وهم داخل مكاتبهم المكيفة يزوروننا فى المعسكر ليرونا ونحن في لبس الهوان يوزعوننا على اهواءهم من داخل مكاتبهم المكيفة الى مناطق الشدة وهم تزداد شدتهم نعود نبحث عن رقم وظيفى تجرى لنا المعاينات ويتم اختيارهم ويدخلون المكاتب المكيفة و تسقط اسماؤنا يدخلون التأمين الصحى ويصرفوا راتبين ويمنون علينا المرتب الهزيل لهم بدل زواج بدل سكن بدل سيارة قرابة السبعين مليون ولنا الله عندما اضرب اطباء مدنى قال مدير المستشفى الدكاترة على قفى من يشيل انظر الى من ترسوا عليهم البعثات فى ماليزيا و تركيا وغيرها انظر الي يتم تعينهم فى الوزارة انظر الي والي والي الى ياعمك الاطباء على كدة فئة الف وفئة ج وليست باء
    والجماعة ديل قالوها زمان من قفلوا حنتوب وخور عمر وخور طقت و لغو السكن والاعاشة فى الجامعات انهم ما دايرين واحد يضوق الضاقو ولا حتى يحلم بيهو فى النوم كل الكبار اليوم هم من نبتت انسجتهم من ضرع الوطن الغالى واوقفوا بعدها الضرع الا ان يصب فى اوعيتهم وان يتركوها لمن بعدهم قاعا صفصفا.
    فمن يخرج اليوم بقرار جديد يزيد من معاناة الاطباء يصفق له ومن يحني هاماتهم فقد اسدي اليهم معروفا.
    هل تعلم انهم ينشرون ثقافة اشتكى الطبيب فانه اخطى وكأن الاطباء قد سنو سكاكينهم ومرقو على شعب الله ضبيح من طرف.
    هل تعلم ان من يرفع تقاريرهم و يدرسها ويقرر فيها ليسو باطباء و تكون المشكلة طبيه بحتة مثال احد المدراء الاداريين قال يجب ان نطبق نظام البصمة فى حضور الاطباء كالموظفين تماما و هو يعلم ان الموظف لا ياتى الى المستشفى يومي الخميس والجمعة ولا ياتى بعد الدوام الرسمى الا الاطباء ولا ياتى بالفترة المسائية الا الاطباء ومنهم من يواصل اليوم بالليل بليوم التالى له الا الاطباء ولا ولا ولا ……. الا الاطباء.
    ولو اردت ان اكتب عن تامرارات التى نعانى منها نحن الاطباء لما اتسع المقام لكن فى الختام ما تستغرب لو طلع قرار بالاتي ان يقتل جميع الاطباء السودانيين الفئة ج رميا بالرصاص فى ميدان عام نكاية بهم فلا تستغرب…..

  27. aflaiga كتب:

    الاخ الاكرم دروشاب : اولا مرحب بيك بيننا وحبابك الف .
    تسلم على الطرح الموضوعى والحقائق التى اوصلت هذه المهنه العظيمه لما هى عليه ..

  28. دروشاب كتب:

    من يقرأ كلام ود الخلا يظن ان الاطباء ينزلون كل صباح من كوكب اخر ليتعالو على الناس و يمجدوا طينتهم يا سيدى الاطباء هم اخوك و خالك و عمك او اباك.هم من يرجع الى بيت الطين و يشرب القدوقدو ويضرب الفتة ثلاثين عيشة وواحد فول هم ……… هم كل مكافح يمر على الطريق.
    انت تقصد 10% من الاطباء ناس الراحات ناس العربات والعيادات البى الشى الفلانى ديل نحن مضوقننا المره. لكن ما بال هولاء ال 90% الفئة الكادحة الرازحة من يعمل فى اللايات سنتين اشان يقدر ياخد منحة من الوزارة و عندما يتضرر ابن فلان من القانون – المجحف اصلا – يتم الغاء القانون بحجة فتح المزيد من الفرص ثم هم نفسهم ياتون بقانون جديد يوقف المنح الداخلية يا جماعة بكرة بيضرر واحد من اولادكم ولما يحصل كدة اكيد القانون حا يتغير بحجة جديدة وهم اصلهم ما دايرين حجج.
    اما الحديث عن الاخطاء الطبية اكتب الكلمتين ديل على النت شوف كمية الدول التي تتناول الموضوع حتى لندن وامريكا وهو ليس فى السودان فقط ودا موضوع طووووووويل قدم فية الالاف البحوث ومن خرج البحر عوام الطب ليس فية واحد زايد واحد تساوى اثنين ممككن تساوى عشرة او صفر.
    واخيرا من يرى الخطاء ولا ينكرة فان فية عيب علية ان يبحث عنه ويصلحه. مع خالص تحياتى يا يس شمباتى

  29. د.ياسين شمباتى كتب:

    الاخ دروشاب..سلام وتحية كبيرة جدا للطرح القيم والنقاش الهادف..بس للاسف زى ما قلت فى ناس مفتكرين انو الاطباء ديل جايين من كوكب آخر ليأذوا الناس ثم يغادرون!!! بعدين انا زى البعرفك كدة؟؟؟؟؟؟ ومرحب بيك مية مرة فى دارك..

    ود الخلا..طبعا لو ما عارف انك انسان متعلم ولديه مرتبة اجتماعية ووظيفية ممتازة لقلت انك ربما تحقد على الاطباء ليس الا !!!! هل يعقل ان ندفع نحن والاجيال التى سبقتنا بقليل واللاحقون منا فواتير مستحقة لاشخاص قبلنا!!؟؟وهل يحق للدولة_اى دولة_ان ترفع يدها يوما عن شريحة ما وتضع عليها رجلها بحجة انها تنعمت يوما؟؟

    بعدين شنو اما يقبلوا بى كدة والا…..!!؟؟؟؟اها انحنا ما قبلانين,وحقنا ما بنخليهو ليكم مهما طال الزمن او قصر..وطبعا انت ولا هاميك لانو اليدو فى الموية ما زى اليدو فى النار…اهلنا صرفوا علينا الملايين الما ممكن نعوضها ليهم او نوفيهم عشرها فى ظل هذه الطغمة من الحكام والمنتفعين منها..

    وليعش السودان حرا من كل ظالم وابيا فوق كل معتدى…

  30. د.ياسين شمباتى كتب:

    الاخ ودالخلا..سلامات..طبعا كلام انو مشاكلهم تنبع منهم دا حمال اوجه,,يعنى ممكن اوافقك الرأى انو كبار الاطباء والناس الصحى البلد صرفت عليهم وعلمتهم استأثروا بخير البلد ودقوا طناش,,اقول ليك صاح مية المية..ولو قلت انهم ما اجتهدوا وقاتلوا فى سبيل انو تكون عندهم نقابة منفصلة او اتحاد قوى كما كان فى سابق الزمان,,ابصم معاك بالعشرة..لكن نجى ونرمى اللوم على صغار الاطباء ونقول انهم مفروض يسددوا فواتير غيرهم,فهذا ما لا يقبله عقل او منطق..ونقول عشان فى فئة منهم بتخطئ او تقصر فلازم يتهانوا ويتذلوا,,فهنا تقع الوقيعة وتتفرق بنا السبل..

    وعليك الله اورد لى اسباب سحب بريطانيا اعترافها بشهاداتنا,لانو دا كلام كتير وبقودنا طوالى لى سياسات الدولة الرعناء,,ممثلة فى مجلسها الطبى وسدنتها الذين يزينون لها الباطل ومن شايعهم من داخل الوزارة..

    بس اعترفوا انو الدولة قااااصدة تظلم الاطباء وتهضم حقوقهم,,والباقى باذن الله ح يظهر قريب,,وكل ليل وليهو آخر…

  31. ياسين شمباتى كتب:

    الاخوة الكرام..السلام عليكم..
    حقيقة الواحد حاسى بغثيان وقرف من الوضع الوصلت ليهو البلد وخصوصا على المستوى الصحى,,وكلكم عايشين مشاكل الاطباء واضراباتهم المتتالية اليومين ديل,,وبالجد ما قادر اكتب كلمة عن الموضوع لانو حاسى انو كل مرارات الماضى وعفن الحاضر حيندلق على المدونة..لكن بالله عليكم فى رئيس دولة واعى يكون عندو مشكلة فى جهة ما يهدد بفصل جميع الكوادر من غير ما نظر الى مطالبهم1!؟؟؟ ولا هو عاجبو الوصل ليهو الحال؟؟وكيف يكون لو ما كان مقبل على انتخاابات,,كان رماهم بالرصاص ولحقهم الصح وامات طه؟؟وما غريبة عليهو او على حزبو وطغمته من الاوغاد المرتزقة..
    كمان وزيرة الصحة يرفعوا ليها خطاب ترد عن طريق الحركة الشعبية!! دى مصيبة شنو دى الوقعنا فيها يا ناس!!؟؟ لا وزيرة تفهم لا رئيس يعبر لا جن احمر يقول ليهم مالكم!!؟؟ كمان وزير الدولة يهدد بالعقوبات!! ياخ خاف الله فى نفسك وفى شعبك المسكين دا..عموما لو فى العمر باقى وجات نفسية احسن بنرجع بالمهلة..
    لكن يبقى سؤالى قائما : دايرين مننا شنو!؟؟؟؟؟

  32. ديل دايرنكم تجوا على ضل الشجرة و تختو الخمسة في الاثنين … أريتا يا يابا الشجرة التقع فيهو و تلحقو أمات طه…..

    أمبارح كنت في منبر دال البيئي و كان الحديث عن الاحترار أو التغير المناخي و جا “الباسم” وزير الزراعة و الشجر و قال بالفم المليان نحن ما عملنا شئ يذكر لمجابهة هذا الخطر و هو غير متفائل أطلاقا بأن في الأمر حل………………

    كلام غريب يقولو واحد معارضة عاوز يقلل من عمل ناس الحكومة لكن من واحد دايرنا نصوت لي حزبو … فهذا هو الغريب

    وكت ما عملتو و ما حتعملوا عشان ما متفائلين…… آعدين ليه ما تؤموا تروحو…!!

  33. مواصلة لمسلسل الاضراب و ما يدور حوله انقسم المسؤولين الى فئتين
    1- واحدين خايفين على كراسيهم (شحدت الله الكراسي اللي يشيلوها و يكسروها ليهم في ريسينهم منهم ذلك المتسلق رئيس الطب العلاجي الذي يتشدق و هو جزلان بأن وزارة الصحة بدأت في تنفيذ توجيهات رئيس الجمهورية بفصل الأطباء المضربين
    2- بينما التزم وزير الدولة بالصحة لأنو بروفسير طبيب ومهني أن سلطة الفصل قرار وزاري و لا شأن لرئاسة الجمهورية بها و هم ماضون في تزليل المصاعب بل تراجعوا عنم مهلتهم التي ضربتها الوزارة لاثنائهم عن الاضراب

    و الغريبة انزلقت الصحف حسب توجهها فالراي العام مع الأول و السوداني مع التانين
    و نحن متفرجين…………………………
    يا لا يا خبر بفلوس الليلة يبقى ببلاشبكرة

    كسرة:
    تحية للدكتورة ناهد التي أضربت عن الطعام كمان رابطة رجوها عن الطعام الاعتذار لزميلاتها الذين تم الاعتداء عليهم في المستشفى

  34. ياسين شمباتى كتب:

    المرطب عزت..سلام..
    شكرا كتير لتفاعلك مع الحدث,,وشكرا برضو لدكتورة ناهد الطبيبة الانسانة اختصاصية الطب النفسى التى ما فتئت تجابه المنكر والباطل الصادر من قوى البطش والاستبداد..ورئيس الجمهورية دا لو مستشارينو ديل كانوا صحى شغالين كان وروهو انو البسوى فيهو دا غلط وعيب كمان!! والراى العام كيف يبقى مع الحكومة وقرار الفصل!!؟؟يستاهلوا الاطباء المشغلين الطوارئ,,واكيد حيكون فى اضراب عام عشان البشير وتابيتا والشيخ الصديق يجوا يقعدوا فى المستشفيات ويعرفو ان الله حق..

    ولا تقربوا هذه الشجرة ابدا فتكونوا من الهالكين…اما الباسم فهو فاشل فى مهنتو وفى ادارتو وما غريب عليهو البقولو دا..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s