انتخبو مرشحكم الاقل فسادا …

Posted: الجمعة,24 أبريل, 2009 by aflaiga in اخرى

فى اخبار المساء اعلنت هيئة الانتخابات بدء الحمله الاعلاميه التى تقرر لها ان تستمر اسبوعا واكدت خلال الاعلان ان الحمله الاعلانيه ستكون نزيهه جدا ويتم فيها توزيع الفرص بالتساوى على كل الاحزاب حتى تتمكن من ايصال صوتها وبرامجها للشعب وبالفعل بدات الحمله :

استضاف التلفزيون فى اولى حلقاته عددا من قادة الاحزاب وبدا الحوار :

فى البدء نرحب بالشيخ /  السيد شبعان مكتفى عينو مليانه /  ونريد اضاءه سريعه  حول برنامج حزبه فقال :

حقيقة انا زول عينى مليانه وحزبى حزب مرطب بغض النظر عن مصدر الترطيبه نحنا قررنا انو نعوض الشعب الفضل ده ونعيشو فى نغنوغه ودعه وترطيبه وبرنامج حزبنا بيقوم على اسعاد الشعب ودى مرحله علميا بتقول انها المرحله البعد ارضاء الشعب وبعدها طوالى مرحلة تفوق تطلعات الشعب ودى مرحله حنصل ليها سويا بعد ترشيحنا وفوزنا بالانتخابات .

وننتقل للسيد الدكتور عارفين اى شيء وساكتين / ليلقى بعض الضوء حول برنامج حزبه فقال :

حقيقة فى هذا المنعطف الخطير من تاريخ شعبنا اؤكد للسيد شبعان اننا عارفين اى شي وكل حركه قام بيها هو وحزبه اثناء فترة حكمهم نحنا راصدينها ..

المذيع مقاطعا : عفوا كلمنا عن البرامج :

د . عارفين : نحنا بنكتفى فى الفتره الجايه لو فزنا انو نكشف للشعب كل الخطط التاامريه التى حيكت ضده عشان نبنى ارضيه جديده لبناء وطن حر ديمقراطى .

ونلتقى برضو بالسيد / كلام ما نفع وتانى ما بنفكها / وعاوزينو يلقى الضوء على برنامج حزبو فقال :

الحمد لله والله اكبر ما حاطيل الكلام لانو اطالة الكلام كانت احد اسباب دخولنا فى المازق ده واؤكد انو لو مسكناها تانى ما حنفكها وانو حزبنا جهز كمية من العبارات العمليه للمرحله الجايه .

ونلتقى بالسيد الشيخ الدكتور العلامه المفكر / ظلمونى الاحبه وبقيت طاشى شبكه  / ويلقى الضوء على برنامجو فقال :

اهى اهى .. نحمد الله ان قيض لنا تحاكما شفيفا فى زمن جور ظننا انه ينبغى له ان يتمحور فى فلك ارادتنا الجامعه ..

المذيع مقاطعا : يا شيخنا رجاء خاطب الشعب بعبارات مفهومه وواضحه ليستبين قولك .

الشيخ : لسنا الان فى مقام من يوضح لمن لا يحتاج التوضيح فالامر واضح ولا يحتاج عناء فى الابانه نحن نعد شعبنا باننا حنبطل اى حاجه ما بتعجبو واعتقد انو ده براهو كافى لو ما نفذنا اى انجاز …

فى الصباح الباكر كانت اللافتات تملا الشوارع والمواطنين يخرجون فى تظاهرات فرح عارمه تحمل وتررد شعارات :

يا شيخنا نحن معك وسنرشحك بس بطل ………. وما عاوزين اى انجازات !!!!

Advertisements
تعليقات
  1. ياسين شمباتى كتب:

    افليقا..مساك طيب..

    ديل كلهم ما دايرنهم,,دايرين وجوه جديدة بالجد,,ومادام صبرنا عشرات السنين على الجور والظلم ما اظن عشرة عشرين سنة بكثيرة على ديمقراطية وشورى وحرية حقيقية..وهذا كله سيتحقق بالقوى الامين_الما خمج_الذى يكون قويا فى الحق وعلى الباطل وبالدين,,ويكون امينا مع نفسه وشعبى وعلى ولايته ورعيته..

    لكن؟؟؟؟؟؟؟؟؟؟؟؟؟؟؟؟؟

  2. البشاوى كتب:

    افليقا
    تعرف ياصديقى كل السادة المرشحين اعلاه كلهم بطننا طامة عديل منهم
    اقترح عليك تستضيف حاجة احسان المحسنة اللى فى المايقوما ومعاها الولد الشفيف النعيم ومعاهم بعض المسحوقين والمطرودين من البلد ومن الوظيفة تأكد ديل ماعاوزين اى فرصة عشان يقولو برامج ديل من القلب للقلب مباشرة وليهم فوز بى طعم الانتصار فى هذا الزمن النكد

  3. نيام كتب:

    افليقا:
    في حقيقة الامر انو الشعب القاعد ينجز أي حاجة بيشتغل .. بجيب القروش .. و يوردها في خزنتم بمسميات اختاروها ليه .. و يتكفل بنفسو يعني باختصار بقول ليهم خدو خلو دي معاكم .. يعني لو بطلو الهمبتة و الظيتا الفارغة البلد كانت براها تتغير..

  4. nono كتب:

    افليقا لك التحية /

    يا شيخنا نحن معك وسنرشحك بس بطل ………. وما عاوزين اى انجازات !!!!

    انحنا زاتنا معااااااااااااااا شيخنا بس ياتوتو شيخ في الشيوووووووووووووخ ربنا

    يكفينا شرهم….؟؟؟؟

    حاول افهم يا حبيبنا

    واصْحَا من خَدَر العَشَم.

    انتظرنا ولاّ الصبر جاب الفَرَح

    لى عيونَّا..لا الليل انهزم.

    اليقين ما الإنتظار

    بين دموعنا وفى الندم

    اليقين فى الاختيار

    إمّا نِتفَهّم وجودنا

    وامّا ياخدنا العدم.!!!!!!!!!!!

  5. حاج أحمد السلاوى كتب:

    طيب يا أفليقا الجماعة ديل أو الشعب دة لو ما عايز أى إنجازات ..النقنقة عليهو شنو ..ما هو الناس قاعدين وما فى أى ………………….. وحتى الأ ……………الأتعملت طلعت ناقصة وما ليها طعم..وما جابت فايدة ….
    آخر نكتة سمعتها وهى إنو بعد الحر الشديد وقطوعات الكهرباء …الجماعة إكتشفوا إنو السد زاااااتو بيشتغل بالكهرباء..وعاوز ليهو سد تانى عشان يولد ليهو كهربا..فى إنجازات أحسن من كدة …غايتو ..يا سادة جنس حسادة..نبرا ونستبرا منكم..

  6. aflaiga كتب:

    الاكارم : سلامات ومنورين شديد .
    عشان ما تفهمونا غلط اول شيئ محل ال ….. مقصود بيهو اى حركات وصلت الناس للحاله دى ..
    تانى حاجه انا عرضت ليكم بعض النماذج من مرشحى الانتخابات القادمه ( واحد شبع – وواحد تاب من الكلام الكتير عاوز يشتغل – وواحد كل همو فضح الحزب الحاكم – وواحد وعد الناس انو حيبطل اى حركات زعلت منو الشعب زمان ..
    اها انتو حرين تنتخبو منو على كيفكم …
    فى قطاع كبير من الشعب بيشجع المرشح ظلمونى الاحبه لو بطل حركاتو دى واستعدل كويس مع الشعب …
    وفى قطاع كبير من الشعب مستعد تانى يفوز ام بى ثرى وسى دى ودى فى دى ذاتو بس يتعظ من نقة الماضى ويبقى زول عملى …
    وفى قطاع كبير من الشعب مستعد يرشح عارفين اى شيئ وساكتين بس يديها شوية دين لانها بدون مسيخه وما بتنشرب ..
    وفى قطاع كبير ممتنع عن التصويت برغم عمله انو حيصوتو بدلو لو ما صوت ..
    المهم البوست عباره عن حركة تنشيطية واستقراء مستقبلى للانتخابات القربت وما اعددنا ليها اى شي لحدى اسى ..
    اللفت نظرى للبوست ده انو قريت قبل ايام اعلانات فى الجرايد عن تسجيل احزاب باسماء جميله ( حزب الحقيقه – حزب التضامن ) لكن وانا بطالع لسته اسماء المؤسسين لقيت فى كل حزب كمية من الاسماء المنتهيه باب واحد وجد واحد حقيقة او عنوان واحد وبعضها طبيعتو قبلى بحت !!
    قلت يا ربى لو دى الاحزاب الحتنافس المؤتمر الوطنى فابشر بطول اقامة يا مؤتمر !!!
    وجاييكم …

  7. ودالفتيحاب كتب:

    أفليقا الرايع
    مساك الله بالخير
    الساده المنتخبون
    سؤال صغنتوتى كده
    كل مرشح يقول عنده برنامج جديد , طيب ماكلهم كانو فى الحكومة يعنى البرنامج ده داسنو لى متين ؟
    وبلاش نسألهم من اخفاقاتهم فى الماضى ؟

  8. محنك كتب:

    يا اخوانا دى ديمقراطيتنا نحن ديل ما ديمقراطيتكم هوانتو على كيفكم

    ود الفتح …. كل حزب جربناهم كم سنة حسب الاحصائيات وانجازاتو شنو … وما هو التغيير اللحصل خلال الفترة … وهل من جديد

    اخير ليكم قطيع الكهرباء برا راس

  9. عارفين يا أخوان حقو الشعب دا ينتخب الجماعة الرطبو زمان و هم في دست الحكم… على الأقل سوف لن ينهبوا كثيرا لكي يرطبوا… و سوف يلتفتون للشعب

  10. حنين كتب:

    الاخوة سلام .
    أثنى راى المرطب وعموما أخير ننتخب لينا زول سمين ونشيلو الهم بدل ماننتخب لينا زول مهموم ونشيلو السمنة …

  11. بمناسبة بدء الحملة الانتخابية للمرشحين نرفع البوست ده عاليا.

  12. عبدالرحمن أحمد كتب:

    دكتور عزت النار لا تشبع من القش الدقاق ودا بدمر البيئه وللا ككيف ؟؟؟؟

  13. طارق أب أحمد كتب:

    أفليقا رد الله غربتك
    سترايكر أسمح لى أن انسخ ألصق الموضوع أدناه فى نفس السياق

    لن اترشح – قد اترشح – الكرسى حلو حلا !!

    الثلاثاء,12 أغسطس, 2008 من تأليف aflaiga

    رغم انه كرسى فقط يتكون من اربع ارجل ومقعد وضهريه الا ان التاريخ الحديث لم يشهد حبا لهذا الكرسى كما تشهده هذه الايام بلادنا العربيه والافريقيه .. سقت هذا التقديم التدليلى على الكرسى لاوضح انو القصه لو كانت كرسى ابو اربعه كرعين كان ممكن اى زول يسوى كرسى وما اكتر الحدادين والنجارين وما امهرهم !! لكن يبدو ان القصه تتجاوز ذلك بكثير !! فى موريتانيا القريبه التى ما زال انقلابها سخن من نارو اكد الرئيس الجديد حتى الان !! انه لن

    يترشح للانتخابات وسيقوم بالعمل على اعادة الديمقراطيه باسرع فرصه !! اتقول مؤجر عجله من الدلنج ( عجلاتى مشهور بامبده ) – ولم يلبث ان صرح اليوم انه قد !! شفت كيف ؟؟ قد يترشح للرئاسه ولعمرى ان مببره سيكون على شاكلة ( فى الايام التى قضيتها فى الرئاسه احسست بن البلاد مستهدفه وان من واجبى ان اعبر بها نحو بر الامان !!! ) كأنو البلاد دى كانت ما مستهدفه اول امبارح قبل يجى وكأنه لم ينقلب على الديمقراطيه !!! فى عالمنا العربى والافريقى الكثير من هذه النماذج دعونا نناقش هنا ما سر هذا الكرسى العجيب ولماذا كل من ينط لينا الصباح يتحدث باسم الثوريه ثم الديمقراطيه ثم العبور بنا ونحن لا نجد اى من هذه الاهداف الا فى ملصقات تظاهرات حسن طحنيه !!! ولماذا يصر الانقلابيون فى كل مكان انهم رسل الله للانسانيه لانقاذها ؟؟ولماذا تشهد بلادنا العربيه والافريقيه تقلبا فى الحكم يحول دون استقرارها ومن ثم تنميتها ؟ يعنى باختصار المشكله وين فى الكرسى ولا القاعدين فيهو ولا العينم عليهو ؟؟ ولا فينا نحنا ؟؟؟

    أرسلت فى سياسية

    | تعليقات
    3 تعليقات
    على الثلاثاء,12 أغسطس, 2008 في 11:12 ص | رد
    aflaiga

    ملحوظه : الكتابه عن تجربة الكراسى يجب الا تتناول حكومتنا الرشيده وذلك لسببين : الاول انو حكومتنا انتقلت من مرحلة من يحكم ؟ الى مرحلة كيف نحكم !!! ما شاء الله عليها !!! التانيه انو مافى حاجه يحكموها ذاتو الا نناقش النسخه السودانيه من خيرات السودان جناح ماليزيا وسويسرا !!! اخشى ان نبحث عن السودان فى متاحف الغرب وبنوكه للاستدلال على مكانه ونضع فى مكانه لافتة ( كانت هنا دوله !!! ) …

    على السبت,16 أغسطس, 2008 في 3:54 م | رد
    د.ياسين شمباتى

    افليقا..المشكلة فينا نحنا..

    على الأثنين,18 أغسطس, 2008 في 7:59 ص | رد
    مُخير

    الحبان سلامات
    أبو حمودي سلام
    معذرة للمرور المتأخر بس المشغولية وأكل العيش وكدة… نجي للموضوع
    1) لعظمة الكرسي الذي هو أساس الحكم وهو رمز الملك سُميت بأسمه أعظم آية في القرآن “آية الكرسي” وهى الدالة على الألوهية المطلقة رفعها الله في بدايتها باسمه (الله) وفى نهايتها باسمه ( العلى العظيم ) وهى ترفع معها كل من تعلق بها واستمسك بها ومن حفظها حفظته ورفعته معها إلى أعلى مقام وأسمى منزله. وعنها قال رسول الله – صلى الله علية وسلم (وَالَّذِي نَفْسِي بِيَدِهِ إِنَّ لَهَا لِسَانًا وَشَفَتَيْنِ تُقَدِّسُ الْمَلِكَ عِنْدَ سَاقِ الْعَرْشِ ) وقال أيضاً عليه أفضل الصلاة والسلام (لِكُلِّ شَيْءٍ سَنَامٌ وَإِنَّ سَنَامَ الْقُرْآنِ سُورَةُ الْبَقَرَةِ وَفِيهَا آيَةٌ هِيَ سَيِّدَةُ آيِ الْقُرْآنِ هِيَ آيَةُ الْكُرْسِيِّ ).
    2) كلو إلا “الكرسي” ده، لأنو بيجيب الدم، وبينسي حقوق الخالق والعباد، ويخلي الإنسان المسخوط يقول للشيطان قوم وأنا أقعد مكانك، وعندك في عالمنا الثالث وجوارنا العربي والإفريقي من القصص والأمثلة ما يشيب لهوله الولدان، أبناء أزاحوا آبائهم وأخوة اقتتلوا ورفاق تناحروا وغني عن القول ما حدث ويحدث في أمازونيا بسبب أبو الكرس، فالكُل يعلم عشان كدة ممكن تتوهط في الواطة أو تتمدد إن شئت في السرير لكن إياك والكرسي، ويأخذ الصغار العبرة من الدرس الأول في “لعبة الكراسي”.. طق .. صفقة … وإنت برة !!! وحتى لو تغالط ما في رجعة.

  14. مُخير كتب:

    سأنشد مع أبو اللمين يا حلاتكم يا أهلنا
    يا مصابيحنا ونجومنا
    ويا حلاتك يا أب أحمد ويا حلاة مفاجئاتك
    مرقت لينا حاجة مضى عليها أكثر من عام ونصف وأحيّيت ذكرى الرائع أفليقا رد الله غربته (على حد تعبيرك)، وهنا تكمن روعة الدانقا كثيراً ما يساورني الإحساس بأن هذا الموضوع قد نوقش من قبل وأن كتابة التعليق قد تكون إعادة لما سبق كتابته، وفي أكثر الأحيان لا تقاوم أن تكتب ما تحسه لحظئذ حتى ولو كان مُعاداً فالبركة فيك في الإعادة وولدنا أخبارو شنو ؟؟ عيالوا رجعوا ولا لسة … قصدي بعيالو أمهم يعني لسة لاعب الدورين، عمومن شكرن يا أب أحمد على اللفتة فقليلن ما نجد الوقت للرجوع إلى الأرشيف.

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s