أمي بتسلم عليك

Posted: الثلاثاء,28 أبريل, 2009 by عزت in اخرى

طرق باب بيتنا … ليقول لي ولد الجيران
امي تسلم عليكم وتقول عندكم …. طماطم

 ابتسمت من قلبي 

 وقلت له عندناولو ماعندنا زرعنا لكم بحوش بيتنا..
هلا بالجار الصغير 
منذ متى لم يطرق بابكم احد الجيران لطلب
طماطم او بصل او عيش وملح
ربما يقال اننا بخير ونعمة ولم يعد الطلب من الجيران
له ضروره … ولكن لا اعتقد
فقدنا الطلبات الصغيرة بين الجيران
فقدنا طعم الجيرة
كان الجار يطلب من جاره بصل
وبعدها يرسل له قليل من الطبخة
عيش وملح
الان تعد الطلبات بين الجيران عيب وقلة ذووق
وقد تستغرب ان يطرق جارك بيتك بدون موعد واذن مسبق واتصال
وقد يتهم الجار بالجنون حين يطلب طماطم


زمان لم تكن الحالة الاقتصادية مثل الآن
اليوم فواتير وديون واقساط واسعار مواد غذائية عالية
وعيب نطلب وندق باب الجيران
زمان حياة بسيطة وقلوب نظيفة… وصغار الجيران
وجملة …. امى تسلم عليكم وتقول عندكم بصل
جميلة هذه العبارة
بجمال البساطة
وجمال المحبة
وجمال روح الجيران الوحده
كنا بيت واحد
وطبخة وحدة
اخبرتنى جدتى
ان الاسر قديما تشعر بمدى حاجة جارها
وترسل له من غير طلب
واذا راعى البيت قضى لبيته ماينسى جيرانه
واذا بقى شي من العشاء… يرسل للجيران
واليوم يزعل الجار من بقايا العشاء يعتبرها فضله….
ليست المسألة بمجرد الطلب..
وليست عبارة امى تسلم عليكم وتقول عندكم طماطم هى المحك
لا ….
ولكن العلاقة نفسها فقدت طعمها
فقدت دفئها
فقدت الجيره
لم تعد الحياة لها طعم بعد الاستغناء عن بصل وطماطم وخبز الجيران
وحين نعطى الصغير طلبه … نتنتظر عودته بطبق من عشاءهم

ليتها تعود تلك الأيام
و أتمنى عودة أيام ماضيةٍ بزمنٍ جميل
وجيران ترسل وتسأل وتطلب
بدون قيود حياةٍ مملة ورسميات قاتلة


أحضرت الطماطم لولد الجيران …. ووصلت لنهاية كلامي
قول لماما أمي تسلم عليكم وتقول .. إذا بغيتوا شي لايردكم إلا لسانكم
وخرج الصغير ولسان حالي يقول:
شكرا لك عشت معك لحظات أصبحت مفقودة …. بزمن لم يعد الجار يعرف جاره

وأمي تسلم عليكم وتقول
 
ألا ليت الزمان يعودُ يوماً لأخبره ما فعلت التكنولوجيا

  (ملطوش)

  فهل يا ترى تناسى الناس الوصية الخالدة التي اوصى بها جبريل عليه السلام نبينا صلى الله عليه وسلم بالجار و التي شدد فيها المصطفى صلى الله عليه وسلم بقوله حتى ظننا أنه سيورثه وصارت كباقي الوصايا……

 

272201

Advertisements
تعليقات
  1. الغبشة كتب:

    د عزت : لك التحية اعتقد ان مثل من تحدثت عنهمفى بيئة سكنية ومعيشية معينة ولكن الاغلبية ما زالت على نفس الحال مازالت تستعير الطماطم والفندق(المدق) وليمون وشطه وطشت، وامس القريبة دى جارتنا كوركت لينا بالطاقة البينا وبينهم واديناها طماطم وادتنا تلج والامور عال العال،دحين سمعت بناس عندهم طاقة لحدى هسى؟ نحن عندنا

  2. طارق أب أحمد كتب:

    دكتور
    صبحك ألله بالخير
    تعرف أمى بتسلم عليك و بتقول ليك دى لامن يكون الرسال لى تانى بيت ولى قدام
    أما جارك لزم فيكفى أن تكورك الوالده من أى مكان فى البيت للجاره لتصل الرساله
    كمان فى أشياء لما تعد لازم يكون للجار نصيب الأسد منها مثل الشيه و الفسيخ و كل ذى قدحه

  3. طارق أب أحمد كتب:

    و لا أنسى الصينيه المندكله التى ترسل من الجيران عند السكن بحى جديد أو عند الأنتقال لمدينه أخرى لظروف العمل نجد الجيران الذين لا تربطهم بنا سابق معرفه قد كملو الواجب

  4. طارق أب أحمد كتب:

    بدأن من المدرسه لو تذكرون كنا نقطع الساندوتشات على مائده مكونه من صفحة صحيفه يوميه … و السانوتشات فول أو طعميه أو سلطة أسود من الحجه أو جبنه ,طحنيه ,مربى ,بيض من المنزل والعنو و الما عنو يدوس

    أكثر ما يحيرنى فى أطفال الزمن دا لماذا لا يحبون الطحنيه زينا أيام زمان الما كانت أحلام

  5. nono كتب:

    لكم التحية**

    لازالت هذة المورثات موجودة معا اختلاف خااااااااارطة الطريق جااااارتنا صاحبة امي تجيها اختة من الولايات (ندنكل )صينية الفطور قراصة بالدمعة وفول وطعمية سجك وشعيرية شنو مااااابعرف دااااك بااااين علية انا جعانة ولة شنوووووو!!! نوديها ليها معااة حبة سكر وبن وشاي !!!! المسائل دة مورثة بالفطرة يعني انا والدتي عملة كدة اكيد انا في يوم من الايام ممكن اعمل ..؟بس الظروف الاقتصادية اختلفت الحمدلله الدنيا بي خيرة ونعيمة سنعود بعد قليل……….

  6. حنين كتب:

    الدكتور المرطب والسمار .
    سلامات .
    نحن زمان الواحد ترسلو أمو لى ناس خالتى بخيتة نقول ليها أمى قاتليك سلفينا كورة دقيق لحدى ما أبوى يدقق لينا .بالامس القريب مرة الجيران كوركت بالحيطة الى حكومتنا و أدتا صحن لقيمات يعنى زمان كانو ناس خالتى بخيتة وأسى بقو مرة الجيران وبالكاد نعرف أسمائهم .هلا .هلا …
    التحية لك د.عزت وأنت تزكرنا بالجوانب التى بدأت تغيب عن حياتنا …
    طارق أب أحمد ياخى ما شاءالله عليك وإنت تضع بصماتك الواضحة على الموقع بنشاط وحيوية …لك التحية …

  7. نيام كتب:

    امي قالت ليك كان عندكم فندك
    تدقو تدونا
    ندق و نديكم
    كان عندكم قدحة
    قحو و ادونا
    نقح و نديكم
    كان عندكم ملحة
    ملاحكم انتو شنو كسرتنا تشبهكم اكلو و ادونا ..
    يادوك و الله امرك عجيب انت رجعتنا للزمن الغلط ..لما كان مافيش ظلط..زمن النفاج و و د نفاش و ود النقاش وود الحاجة وود الصين وود الكلب آ الزمن الفلاني..

  8. سماسم كتب:

    سلام دكتور عزت:

    إنت عارف لو في معاملات زي دي لسه بتكون عن طريق التلفون والنت ………

    ممكن الواحدة ترسل لي جارتها إيميل تقول ليها لوعندك ملاح ورق (Pls, Soft)

    وتكتري لي من untvirus

  9. سلام يا أعزاء

    غايتو بحمد الله نمارس عادة تمرير ما فاض عن حاجتنا لجيراننا الجنب التعريشة أحيانا كثيرة اذ لم يتعود أولادي أكل الكمونية فهي دائما لمرأة الخفير جيراننا… لكن غايتو قاعدين يتلوموا معانا مرات… أصلو مطبخكم جنب التعريشة على بيتنا و مرات كده مرت الخفير عندها قدحة بنت دين كلب تلقى الريحة طاقة و انحنا غدانا بيض… غايتو بناكلها في حشانا و الجاتك في نخرتك تثير شهيتك…

    فعلا عادات حلوة و العجب في رمضان… هاكم قراصتنا و ملاحنا و شكرا لعصيدتكم و ملاح النعيمية الخطير… اصلو نحن ثقافتنا “قراصة- نوبي” و مرات كثيرة قاعدين يطلبوها طلب من “عواطف”….
    فسارع بحجز صحنك رمضان الجاي…!!!

  10. زووووووول كتب:

    عزت بقا ريتش سلاااام
    حليل زمن الجيران جيران وحليل زمن ادونا ملح وادونا ليمونه ففى هذا الزمن تكاد لا تجد جيراننا يتعاملون فيما بينهم حتى فى الاحياء الشعبيه .
    صديقى (X ) (طبعا س دا صديق افيقا ) كان يسكن فى حيى شعبى .
    سمع طرقا فى الباب فوجد (زهره ) ابنة جيرانهم
    ــ اتفضلى
    *امى قالت ليكم لو عندكم اسود ادونا حبتين تلاته
    ــ اخذت باذنجانها وخرجت ثم عادت بعد دقيقتين
    * بالله لو عندكم زيت املوا لينا الكبايه دى
    ــ خرجت ثم عادت بعد ثلاث دقائق
    * امى قالت ليكم ادونا طوتكم
    ــ صديقى لم يتمالك نفسه بعد ان راها تخرج بالطوه فردد بصوت مسموع لا خلاس بالله تعالوا نديكم بتنا سعاد تطبخ ليكم بعد كدا .
    كسره : بالله يا عزت قول لعصمت عمك الزووووووول عازمك جقاجق

  11. بشار أحمد بشار (إبن برد) كتب:

    هل سمع أحدكم والدته أو إحدى خالاته أو عماته أو جدته وهي تنادي جارتها من (طاقة) (التُكُل) ونار الحطب مستعرة تحت (الدوكة) أو صاج (العواسة) :النبي يا رقية ما بلقي لي عندك حتة (طايوقة)؟؟؟
    لا أدري لماذا يذكرني ذلك الزمن الجميل الفنان المبدع الراحل عبد العزيز العميري:
    ياعديله افتحوا البيبان والطاقه وامسحوا الدمعه الحراقه عديله وزين ياعديله .في زوول فيكم عارف لييي؟؟

    • الغبشة كتب:

      سلام ابونا بشار:بركة الرجعت بصحة وعافية،دائماً الحاجات الجميلة بتذكرك الجميل او الاجمل،انه عبدالعزيز العميرى رحمه الله ذلك الصوت الجميل (ياعديله افتحوا البيبان والطاقه وامسحوا الدمعه الحراقه عديله وزين ياعديله) انها اخلاقيات وسلوك تحمل فى محتواها معنى الترابط التعاضد،ان هذه الابيات تحمل صفات الغبش الا يكفى هذا السبب؟

  12. سماسم كتب:

    حكت لي صديقتي ع قالت لي نحن جيرانا نوع برسلوا الولد يجي يقول لينا أمي

    قالت ليكم كان ما عندكم ملح أدونا حبة زيت (لكن دا ما هس …… كان في الزمن

    الجميل)

  13. حاج أحمد السلاوى كتب:

    أخونا الكاشف بشار ثرو العميد أبو عصمت ..سلام ..
    غايتو الطايوقة دى باااااااالغت فيها عدييييييل كدة …حسه باقى ليك فى زول بيعرف طايوقة يعنى شنو ؟ حسه تلاقى..ماس سهيل وأخوانه قعدوا يسألوا بعض … الطايوقة دى شنو ؟
    الحبيب سهيل .. انا فى انمتظار ردك يا حبيب ..وما تغيب ..
    وكل طايوقة والجميع بألف لفة كِسرة …
    نيام نيام خليك قريب عشان تشرح للشباب ديل الطايوقة دى شنو !!!
    بشار … كتِّر من جنس ده وخلينا نطرا ( نتذكر ) الماضى الجميل ..ويا حليلك يا حاجة زهرة ..ويا حاجة نفيسة ..

  14. عزت بقا ريتش كتب:

    هسة يا حاج السلاوي افرض سهيل عرف الطايوقة باقي ليك أهلو حيسو بيها شنو… غايتو ماشفت قريب ناس بيعوسو كسرة….
    و البيعوسو يا بشار بقوا يستعملوا “كرت الاسكراتش” بدل “القرقريبه” و ما بعيد يستعملوا “زبده” بدل “الطايوقه”
    تطور شديد… مش!!!

  15. نيام كتب:

    بشار بن برد:
    كنا في انتظار مفاتيح اللعب..لما كانت في بيبان “نفاج” و طاقة و دونكا و عمرة و طايوق ما كنش في مسغبة لو ولعت دوكة واحدة الجيران كووووولهم بفطرو و باكر الدوكة التانية بتفطر الحيشان كوووولها و النفاج شغال و الغريب و القريب ما بقول انا جيعان..تدخل أي حوش تقول ليهم ملحوا لي لقمة تفك الريق و تشرب الشاي و يقولوا ليك لمان تجي الرسول تجي تتغدا معانا عندنا ملاح سبروق يشبه خشيمك..هسع حسب الله الاحسبوني يضرب في الضان و جاروا يومين بايت القوا..

  16. نيام كتب:

    ذات مرة ذهبت زيارة للبلد وقصدت بيت خالي عليه رحمة الله فوجدت زوجته عليها رحمة الله تعوس و النهار حار و الدونكا نار الله الموقدة ..و انا مريوق..قالت لي حبابك الملاح ما مرق لكن عندي ليك طسبيرة ..جابت الكسرة الحارة و قطعت فوقها طماطم جروف “ما تقول لي ملح يوريا” ريحتها زكية تفتح نفسك وعليها بصلة و زيت سمسم عصارة “عصارات الجمل يا بشار”..والله مااكلت طعام اشهي من ذلك..وكانت فطور و غدا ..الا رحم الله خالي و زوجته ورحم الله ذلك الزمن الجميل…هسع تزور زول يرسلوا الشافع يجيب ليك ببسي من الدكان و لا يسألوك فاطر و لا لا…

  17. علي سنكل كتب:

    د.عزت تسلم
    السمار الكرام د. عزت فتح لينا بوست عادات في حياتنا ( ذي أسماء في حياتنا )، أشياء نبيله في لحمة البنيه الاجتماعيه للأمازون، زالت قسراً مع تعرض أهلنا للمسغبة والتجويع على أيدي دعاة الهوس الديني ، الذين أدخلوا العباد في عهد لم يكن أهلنا الطيبون يظنون أنهم ملاقوه.
    أدى هذا الشظف إلى التجافي بديلاً عن تدانينا وناب عن طيب اللقيا قفل البيبان والطاقه.
    تحولنا إلى مجتمع شبيه بالمجتمعات الصناعية المتقدمة ولكن بدون صناعة أو تقدم. يا بشار قلت ليك لسه يا أخي البلوفه ما سلكت كويس فلا تأسى يا صديقي على الزمان النبيل الذي مضى عنا ولا أظنه سيعود.

  18. نيام كتب:

    علي سنكل:
    بشار دا ما تخاف عليهو دا قلبو محدثو ..بس ما بأكد ليك حدثو قبل الصيانة و لا بعد الصيانة..

  19. Ezz Abdo كتب:

    عزت بقا ريتش
    بارك الله فيكم … فى رأىى الشخصى ان هذه أفضل تدوينة عملية صادقة توضح لنا حجم التغيير الكبير الذى حدث فى حياتنا
    كم كان يهدى إلينا جيراننا .. وكم كنا نهدي إليهم
    نحتاج لهذه الحياة الجميلة الصادقة المتبعة لهدي النبي صلى الله عليه وسلم .

    بدلا من حالة الجفاف الإجتماعى بين الجيران
    جزاك الله خيرا عزت بقا ريتش … أشكرك من كل قلبى … طماطم وليمون .. وملح .. خلقها الله حتى تجمع بيننا …. وليس لنتسابق عليها لنشتريها

    جزاكم الله خيرا

  20. حنين كتب:

    عمنا نيام ثرو المرطب .
    شر البلية ما يضحك والله ضحكتنا نامن دمعنا… لله درك وأنت تزكرنا بمشيك لى بيت ناس خالك وتزكرنا الكسرة الحارة المارقة من الدوكة البتتقرض قروض وتفك الريقة مسمار للقلب …هلا هلا …
    عمتنا آمنة الله يرحما مرة رسلت لينا ملاح رجلة بالليل قمنا عجناهو بالكسرة مع الملح والموية فكانت عشوة كاربة ولا( بوش عبدوش) بعد الانتهاء من الاكل جانا ضيف ولم يجد لدينا سوى الكسرة قام أبوى رسلنى لى عمتى آمنة الله يرحما ويحن إليها أقول ليها( لو عندكم باقى من ملاح الرجلة القبيل أدونا عشان جانا ضيف ) عمتى آمنة قالت لى (خلاص إنت أمشى وأنا بجى وراك أسى أجيب ليكم الملاح .)وبعد زمن جأت عمتى آمنة الله يرحما وهى تحمل حلة ملاح قرع ساخن بوخو يلوى …قلنا ليها ملاح الرجلة وينو قلت لينا وهى تبتسم (دة ملاح قرع تشاهد غدا…)

  21. nono كتب:

    بلدي سهول ، بلدي حقول بلدي الجنة للعاشوها

    ولي البرّة بيها سمع

    بلدي بلد ناساً تكرم الضيف

    وحتى الطير يجيها جعان ومن أطراف تكيها شبع

    بلدي أمان ، بلدي حنان وناسا حُنان

    يكفكفوا دمعة المفجوع

    ويبدّوا الغير على زاتم

    يقسموا اللقمة بيناتم

    ويدّوا الزاد حتن كان مصيرم جوع

    يحبّوا الجار

    يموتوا عشان حقوق الجار

    يضوقوا النار عشان فد دمعة

    وكيف الحال لو شافوها سايلة دموع!

    ديل أهلي .. ديل أهلي

    البقيف في الدار في نص الدار

    وأقول لي الدنيا. كل الدنيا ديل أهلي

  22. مشاكل كتب:

    سلامز

    عليكم الله بعد شوية يا جماعة اي زول يكتب بوست يعمل الترجمة تحتو بالله

    ما تطلعونا بره الشبكة

  23. بشار أحمد بشار (إبن برد) كتب:

    يا جماعة التمريرات الحلوة إن دلت على شيء إنما تدل على الصفاء وطيب المعشر ونقاء المعدن وطهر القلب والسريرة ويا أحبتي الغبسه،نيام،د/عزت،سنكل،حنين، سماسم عز عبدو القصد ليس اجترار الذكريات الجميلة فحسب ولكننا نريد اشراك أبناءنا من القروبات الصغري ناس مشاكل وتذكيرهم جمال ذلك الذي ليته يعود.
    نيام: أنا قلبي ده حدثني الليلة ولا أمبارح؟؟؟

  24. ياسين شمباتى كتب:

    د.عزت..عادتك ولا ح تشتريها ؟؟تسلم على الذكريات الرايعة وجميلة..

    اسه يا نيام انا لسه ما اتغديت,,فى داعى للكسرة بالطماطم دى!!؟؟

    لكن الصورة الفوق دى بالضبط حاصلة علينا دلوقت!!! والله تقول فى زول مراقبنا…

  25. سهيل كتب:

    سلامات ياناس يا حلوين .. مالكم طولتوا الغيبه .. تخلونا نشتاق و نتجهجه ليكم قدر دا .. عجايب .. البلد دي ما عندها الفه و لا شنو ؟

    د.عزت المرطب و من جاوره سلام .. بس قول لي جدو سلاوي.. طايوقآ ما طايوقك ما تقشبو الصاج .. باقي ليك جدو دا بجدع بالحجار مالو؟ بيتو دا دحين مو قزاز ؟

    الطايوق لغة هو مخ الساق و يوجد بداخل عضم الساق.. يؤكل .. و هو كذلك يستعمل لتميع الصاج حتي لا تلصق عليه الطرقه القادمه.. حاليا هناك طايوق ياباني و هو ما يعرف بالتيفالو هو طلاء ضد الحريق و الإلتصاق .. كفى كده و لا نزيدو..

  26. حاج أحمد السلاوى كتب:

    ولدنا النجم سهيل ..خلاس حنرفعك إلى قروب أعلى من قروبك الحالى ..أنا ما عارف لو ما كنت سافرت روسيا كنت بقيت كيف .. يا راجل ..يا تفتيحه ..بصراحة معلوماتك العامة مية المية ..ننصحك بعمل دروس عصر للآخرين الما ناقشين حاجة ..وأهو برضو قرشين حلوين ينفعوك فى إكمال البيت … الذى بناه الجاك ( دى قروكم ليها فى المدرسة ؟.. ما أظن .. )..
    ما رديت على ما طلبته منك بالهاتف قبل أسبوع .. ما تعمل رايح ومطنش .. فى إنتظارك …

  27. ikram كتب:

    بعد السلام والتحية
    موضوع امى بتسلم عليك وقالت ليك كان عندك …. ادينا… انا ما عشته لكن هو احساس بدى الزول الشعور بالامان لانه فيه بساطه وتكون الحالة واحدة .
    لكن فى كم سبب يخلى العادة دى تختفى منها
    بيوت الايجار ما بتخلى الواحد يستقر فى مكان واحدعشان يكون علاقات تصل للحالة الواحدة
    وثانيا انه الراجل والمرة الاتنين بكونوا شغالين بالتالى بيكون البيت فاضى فكثير من الاحداث اليومية بتفوتم
    ومن اهم العوامل المساعدة لتعارف الجيران وتعاملهم مع بعض انه الاولاد بقروا فى مدرسة الحلة سوي لكن حسه اما فى مدارس خاصة او مدرسة قريبة لشغل الاب او الام عشان يرجعوا سوى او مدرسة قريبة لبيت الحبوبة….

  28. ياسين شمباتى كتب:

    السلام عليكم اكرام.ومرحب بيك فى الدار السمحة..

    لو انتى اكرام البعرفها,كيفن تقولى ما حضرت الزمن داك !!؟؟ ولو غير كدة ما عليك..

  29. طارق أب أحمد كتب:

    شمباتى
    ما لك بقيت حكاك كده
    بس معقول أى عواطف تقول حضرت الزمن داك حتى لو كان قبل 10 سنين

  30. ياسين شمباتى كتب:

    طارق يا لذيذ..اضحك الله سنك..قلنا نقابلها بالمفاكهة والظرافة وكدة..

    افليقا..اظهر وبان..ورد على تلفونك يا حبيب..

  31. ikram كتب:

    اهلا يا يس انا هى داتها انا ما قصدت انى ما حضرت الزمن من ناحية العمر قصدت الاماكن العشت فيها ما كان فيها التعامل ده
    نأسف ادا كان التعبير اده معنى تانى

  32. ياسين شمباتى كتب:

    مرحب بالاخت الدكتورة اكرام..كان على الاماكن ما مشكلة..تحياتى للعيال وابوهم..وما تنقطعى..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s