جزمتى الايطالية وينها ؟؟؟

Posted: الخميس,30 أبريل, 2009 by ياسين شمباتى in إجتماعية

يحكى ان احد السلف دخل مسجدا وترك نعله خارجا,ولما فرغ من صلاته لم يجده,فقال : (غفر الله لمن سرقه)..وقضى بقية حياته لا ينتعل,ولما سئل عن ذلك قال : (اكره ان اتخذ نعلا فيسرقها رجل فيأثم)..غفر الله لهذا الشيخ الزاهد,يمشى حافيا مخافة ان يأثم السارق!! وعلى اليد الاخرى لو ان اى منا مشى حافيا(زهدا او حردا) فمن اين يترزق هؤلاء اللصوص!!؟؟

يعنى عادة سرق الاحذية_اكرمكم الله,وما ح اكتبها تانى لانها ح تتكرر كتير_قديمة ومأصلة,وما نرميها فى الزمن دا وضعف النفوس وشدة الحوجة!! لكنها انتشرت بصورة وبائية فى تسعينيات القرن الماضى,حتى انو الناس وصلوا مرحلة انهم عملوا شباشب او سفنجات خاصة المسجد,وغالبا ما تكون قديمة ومقطعة وحالتها بالبلا !! اخواننا فى جماعة الدعوة والبلاغ بجامع بلال كان فى واحد مكرههم,كلما يطلعوا من الصلاة يكونوا نص المصلين فقدوا احذيتهم,فعملوا كمين ولقوا انو فى واحد بيجى يخم الاحذية فى شوال ويتخارج,وطبعا لكم ان تتصوروا منظره يوم قفشوه قبل يسلموه البوليس..ومن ذاك اليوم عملوا نظام حراسة للمسجد,يعنى يكون فى واحد مناوب فى الباب الخارجى ويتبادل مع اخوانه,ولا ادرى الحكم الفقهى هنا فى هذه النوبتجيات اثناء الصلاة..

فى بداية تسعينيات القرن الماضى,كان اخى يدرس بجامعة القراّن الكريم والعلوم الاسلامية وعندو جزمة ايطالية جديدة رسلها ليهو اخونا الكبير من ابوظبى,ومشى صلاة الظهر فى جامع النيلين,لكن قلبو اكلو على جزيمتو السمحة,فلما دخل المسجد وضع فردة خلف مكيف والاخرى خلف مكيف اّخر,,لكن لدهشته لم يجدهما بعد الصلاة!!! شكلو الحرامى تابعو من الوضاية..لكن الغلط غلط اخونا,دى جزمة بيمشوا بيها الجامعة كان ما حركات منو؟؟ وغيره كثر ممن يخرجون بعد صلاة الجمعة وتلقاهم يداقشوا ويبحتوا فى النعلات بحثا عن تلك التى اخدها الحرامى_الله ينتقم منو_وربما اقسم احدهم الا يصلى فى هذا المسجد او ذاك ابدا,وربما وصل الغضب بالبعض ان ترك صلاة الجماعة وحافظ على مداسو!! يحكى انو بعض خالاتنا الشايقيات مشن العمرة,ولما خلصن وطلعن ما لقن احذيتهن فدار بينن الحوار التالى:-

نفيسة : علويى,نعلاتنا وينن؟

علوية : يبقا سرقوهن المقاصيف الحرامية,ان شاءالله تحرم عيشتهم

نفيسة : اها ااختى,الدبارة كيفن؟نمش حفايا؟

علوية : دنقرى البسيلك نعلات من القدامك ديل

نفيسة : نسرق فى بيت الله ااعلويى!!؟؟

علوية :االبومة,اول نحنا بيت الله جيناهو حفايا ؟؟

طبعا منطقها غريب شوية,بس نسبة للزحام واختلاط الاحذية على الحجيج والمعتمرين,تكثر مثل هذه الحوادث وافتقاد الاحذية بنسب عالية فى الحرم المكى,لذا صدرت فتوى تجيز ان تأخذ حذاء من التى تكون بالخارج اذا فقدت حذاءك,,شريطة الا تزيد عليها فى الثمن والقيمة..وفى الحرم المدنى يوجد لدى(هيئة شئون المسجد الحرام والمسجد النبوى) احذية تعويضية لمن يفقدوا خاصتهم_وهذا اكمل وافضل من ان تأخذ حذاءا هكذا جزافا_

يحكى ان القاضى ابا غانم بن العديم نزل فى بعض الليالى يصلى الفجر وترك نعليه خارجا,ولما انفتل من صلاته وجد نعله القديم ولم يجد الجديد!! فنادى غلامه : الم انزل بالنعل الجديد؟ فرد عليه: بلى,ولكن جاءنا الساعة رجلا قال ان القاضى يقول لكم انفذوا اليه حذاءه العتيق فقد سرق الجديد !! فضحك القاضى من ظرف اللص الذى لم يتركه يمشى حافيا وقال :جزاه الله خيرا,هو فى حل منه.(.يعنى عفاهو ليهو)..احيانا يكون المداس المسروق قديم وحالتو بالبلا او يكون (تموت تخلى) لكن الواحد يعمل فيها انو سرقوا منو جزمة ايطالية او اسبانية او شبشب ايرلندى_زى الفقدتو قبل شهور واحتسبتو_والناس يعزوهو,وربما (غمتوا) ليهو الفيها النصيب وما طنشوهوا !!!

والنعل كلمة فصيحة,وهو على احتقارنا له ذكر فى القراّن,حيث قال المولى عزوجل مخاطبا الكليم موسى((اخلع نعليك انك بالوادى المقدس طوى)),وجاء فى الاثر( لا تحقر من المعروف شيئا ولو ان تقدم لاخاك نعله),كما جاء فى السيرة انه (صلى الله عليه وسلم) كان يخصف نعله بيده الشريفة..

ختاما,مادام جبنا سيرة الاحذية لابد لنا ان نشكر بعض المشاهير من اصحاب الاحذية,امثال (ابوالقاسم الطنبورى),صاحب حذاء الطنبورى المعروف..و نحيى اخونا (حنين) بضم الحاء وفتح النون وتسكين النون_يعنى ما حنين حبيبنا بتاع المدونة وان كنا نحييه ايضا_ اقول حنين كان له خف ضرب به المثل,فقالوا(رجعت بخفى حنين)..وما دام جبنا سيرة الشكر تحضرنى نكتة الجماعة الساروا_من سيرة العرس_لى الدويم,فقام واحد من اهل العريس ضارب منقوع البلح والذرة مسك المايك وبدأ يشكر فى اهل العروس على حسن استقبالهم وضيافتهم,وشكر جيرانهم من اهالى الدويم,وشكر مصانع الجبنة بالدويم,والناس البيعملوا الفسيخ فى الدويم,وختاما شكر اسرة مستشفى الدويم العالجت(طه القرشى) لما كان مريض بالاسهال!!!

يا حليلك يا بخت الرضا ومناهجها الثرة,,ويا حليل شبشبى الايرلندى!!!

ونلتقى………

 

Advertisements
تعليقات
  1. حاج أحمد السلاوى كتب:

    ولدنا يسن شمباتى ..
    قدله يا مولاى حافى حالق … وخلى نعلاتك فى البيت حتى لا تتعرض للسلب ونهب الأحذية … خسوساً الإيطالية منها .

  2. عزت يقا ريتش كتب:

    ما دام جات سيرة “الجزم” نذكر هنا “جزمة الزعيم” و جزمة “الزيدي” و “الراجل جزمة” و الفول زيت و المرأة شنو ما بعرفوا ….

    مرة واحد تعرضت لسرقة صندل مدنكل و أعطتني تلك التجربة و التي سرت على ضوئها في الرمضاء الحارة الى السيارة درسا أن تنتعل شئيا شبية بغالب نعال أهل البلد….

    كسرة:
    أنا ما عارف كيف يستطيع الأولاد السغار المشي حفايا في الشمس…!!

  3. سماسم كتب:

    صباح الخير للجميع

    شمباتي: إنت أكتر حذاء مشهور لم تذكره ………… هو حذاء منتظر الزيدي

    شبشبك الإيرلندي وجزمة أخوك الأيطالية موش يكون طلعوا قدر المرطب مع

    تحياتي لدكتور عزت

  4. علي سنكل كتب:

    شمباتي كيف الحال والأحوال . . .
    المدوناتيه الكرام سلام . .
    سرقة النعلات من أمام المساجد كثيره ومسيخه ، و أنا حصلت لي كتير داخل وخارج الأمازون.
    لكنك أحياناً تجد العذر للحرامي ، والله آخر حرامي سرق شبشبي الجديد لنج لو لقيتو كنت ناولتو الفيها النصيب ، لأنو من حالة شبشبو الخلاهو لي تعرف إنو ما سرق إلا مضطراً ، والله دعيت ربنا يفرجها عليهو.

  5. نيام كتب:

    الدانقوست الحنان في كل مكان ..
    دخلت المسجد صليت و قدامي مركوبي الاصلة الجديد حق العيد “الانترنت”..وبعدين الناس مرقو قلت اصلي لي ركعتين ختيت المركوب جنبي و صليت بعد التركع لقيت المركوب بح..مرقت من الجامع حفيان لاقاني واحد مسخوت قال لي مالك ماشي حفيان قلت ليه سرقوا مركوبي الجديد ..قال لي عشان تصلي تاني..

  6. ياسين شمباتى كتب:

    ابونا السلاوى..نهارك سعيد..النصيحة دى كان تقولها لى صاحبك(بيومى),لكن فى النهاية بقينا نعمل كدة..

    د.عزت..بركة البقت فى عربية قريبة تمش عليها,والله احيانا تضطر تلف فى رمضاء لزهاء نصف الساعة وما تلقى اليجيرك..العجيبة جنب الحرم تلقى بعض اخوانا واخواتنا من غرب افريقيا ماسكين ليك سفنجات ويبيعوها بضعف تمنها ,,وفى رواية بتقول انهم بسرقوها من عند الحرم وبيعزلوا الجديدة بس,ويجوا يبيعوها تانى!! دورة خبيثة يعنى..

    سماسم..شوفى الزيدى والجابتها ليهو جزمتو !!

  7. ياسين شمباتى كتب:

    سنكل..سلامات..ديل كذابين,مخصوص بيجيبوا الاحذية القديمة ويختوها بدل المسروق نكاية فيك وامعانا فى التشفى..ربنا يهديهم..

    نيام وريحة الجزيرة الخضراء..فعلا فى ناس حلفوا ما يصلوا فى جامع تانى!!! لكن (الانترنيت) ما عندك..

  8. سهيل كتب:

    ولدنا شمباتي سلام و للكل الف تحيه و سلام..

    مره مشينا عقد في جبره .. قلعنا احذيتنا و دخلنا انا و الوالد و بعد عقد القران تأخرت شويه في الخروج من المسجد لأاجد نفسي بدون حذاء(لاحظ انا قاشر افرنجي) قمت بالبحث وبعد يقيني بسرقة الحذاء توجهت إلى العربيه حافيا لأجد الوالد الله يديهو العافيه شايل الجزمه معاهو .. اول ما مرق خاف عليها من السرقه .. ( الحاج تفتيحه) قام لماها و خلاني لافي نص ساعه افتش فيها..

    • الغبشة كتب:

      سلام يا ولد ياسهيل:الطلع تفتيحه شمباتى الخلاك تظهر اليوم عقبال ما نشوف ودالمهدى ودالخلا وابكرون الناس ديل مختفين عسى المانع خير؟؟؟؟؟؟؟

  9. nono كتب:

    لكم التحية اصحاب المدونة /
    عن أبي هريرة رضي الله عنه عن النبي صلى الله عليه وسلم قال: “لعن الله السارق، يسرق البيضة فتقطع يده، ويسرق الحبل فتقطع يده”. أي يسرق البيضة أولاً فيعتاد حتى يسرق ما قيمته ربع دينار فأكثر فتقطع يده إذا انكشف أمره، ورفع إلى حكم الإسلام.

    فانظر كيف يرهب الإسلام من السرقة ؟؟؟؟

    حمنا الله اياكم..!!!!

  10. ياسين شمباتى كتب:

    صديقى سهيل..سلام وبركة بالطلة..اسه فى داعى لى (جبرة) دى !!؟؟ لقد اثرت اشجانا كنت اكتمها عفا واذكر وادى النيل هيمانا..
    لكن ابوك تفتيحة لما بهناك,ولا يكون هو الجايبها ليك عشان كدة خاف عليها كدة!!؟؟تحياتى ليهو كتير..

    نونو..نهارك طيب..الاسلام يأخذ بشدة على يد السارق,لذا جاء حد الحرابة مفصلا جميع الحالات(اذا كان معها ترهيب-قتل-او الاثنين معا),,اما السرقة فقط فيكتفى فيها بقطع اليد من المعصم,واذا تكررت تؤخذ القدم من الكاحل _القدم المقابلة لليد_وهو ما يسمى القطع بالخلاف,وهكذا حتى تقطع جميع اطرافه ثم يقتل آخرا..اما فى عهدنا هذا فالسارق تنشأ له وزارة خاصة له,او كما قال حكيم المدينة: نحن قوم اذا سرق فيهم الضعيف حدوه_اى اقاموا عليه الحد_واذا سرق فيهم(الشريف) عينوه وزيرا..صدق حكيمنا..

  11. الغبشة كتب:

    دكتورنا العزيز شمباتى:الجاتك فى الايرلندى سامحتك،وليه نسيت سندرليا ما عاجباك جزمتها ولا شنو؟

  12. حنين كتب:

    أخونا شمباتى والسمار ,
    عساكم بخير .
    والله موضوع الحزاء ودسة فى المسجد والمضارفة عليهو بقى من المشاغل التى ينشغل بها المصلى عن الصلاة . لكن أخوانا الضباط الكبار بيوقفوا عسكرى برة عشان يحرس بون السيد الوزير .
    زكر لى إبن خالى أنة صلى مرة فى مسجد النيلين وقبل تمام الصلاة كحل واحد شايل شوال وبيخم فى الجزم وهوأصلا كان مراقب جزمتو الجديدة فما كان منة إلا وأن قطع الصلاة وسكى الحرامى الى أن لحقو فى الرفيرا وعندما أوقفة أنزل الحرامى الشوال من على كتفة وكبا البراكيش فى الواطة وقالليهو (شيل جزمتك وماليك شغلة بالباقيات).

  13. سهيل كتب:

    حاج السلاوي .. لا زال التحري مستمرآ .. والعاقبه عندكم في المسرات

  14. سهيل كتب:

    مره واحد قريبنا جا بيت البكاء و ملص مركوبو وقعد في البرش للمساء و لمن عاوز يمشي فتش شمال يمين مالقى المركوب .. صرف عربي اصلو ما معقول .. و كورك و ما خلا نبز للحراميه .. سألناهو مركوبك شكلو كيف .. قال مركوب جلد اصله بني .. بعدما الناس مشو لقينا مركوب ابيض و اسود اظنو جلد ارنب ولا حاجه زي دي.. صاحبنا خجل خجل شديد لأنو بعد النفير دا كلو طلع هو مامتذكر إنو مرق من بيتهم بالمركوب المبرقط دا ..

  15. زووووووول كتب:

    شمباتى سلااااااااام يا دكتور
    من اشهر الاحذيه فى العالم جزمة الرئيس عمر البشير التى يقبع تحتها اوكامبو واعوانه والمحكمه الجنائيه . شفت كيف
    يحكى ان احد اللصوص قرر التوبه وذهب الى حج بيت الله لكنه عندما خرج من المسجد الحرام فقد حذائه وقرر العوده الى سابق عهده ثم دشن فترة السرقه والهمبته بقوله : بركه الجات منك يا بيت الله .

  16. سماسم كتب:

    اليوم منور يا سهيل عالم ما تجيش إلا بالجزم الإيطالية

  17. ياسين شمباتى كتب:

    حنين..اضحك الله سنك,والله انا لو محل قريبك دا كان عفيتها ليهو او اتقاسمت معاهو السمينة..

    الغبشة..سندريللا دى كمان حكايتها حكاية,لقتها فى غفلة من التأريخ..اريتو حال السرور..

    سهيل يا صديق..ما عشان كدة قلنا الواحد بيعمل ليك فيها انو جزمتو الاتسرقت كانت ايطالية اصلية..لكن جلد الارنب دا عندو قصة مبااااالغة عند حبيبنا بشار..

  18. ياسين شمباتى كتب:

    زووووووول الحبيب..اها داير تجيب سيرة….تانى؟؟؟ اها زولك الحرامى دا غلطان ولا رايك كيف؟؟؟

    سماسم..لا فض فوك..

  19. بشار أحمد بشار (إبن برد) كتب:

    د/شمباتي:لاكين ما جننتَّ النعلات جن:
    هنالك جامع في امدرمان يفع بالقرب من شاطيء النيل في منطقة تغطيها الأعشاب والأشجار الكثيفة حيث درج الشماسة على سرقة الأحذية والإختباء في ذلك الدغل مما حدا بالمصلين ترك أحذيتهم الفاخرة في سياراتهم والمشي حفاة على الحصى الساخن حتى مدخل المسجد ولك أن تتخيل النقزي والنطيط والإستجارة من السرقة بالمشي فوق الحصى الساخن واقترح أحد الممكونين : يا جماعة الحصحاص ده ما تدوهو رشة.

  20. سهيل كتب:

    مره كنا في المرخيات و لمن جا وقت صلاة الجمعه قلنا نمشي اقرب مسجد و طلع الكلام ده في دار السلام .. غايتو لمن وصلنا قلنا نعمل زي جماعة عمنا بشار .. خلينا نعلاتنا في العربيه و مشينا حفايا .. بعد تلاته خطوات آمنت بإنو درجة الحراره فوق الخمسين .. قلنا ما مشكله هسي بنخش الضل و نصلي.. لمن دخلنا الجامع لقينا الصاله مليانه فل و البرندات مافيها محل تخت رجلك.. لمن إنتهت الصلاه غلبتنا السواقه لأنو كرعينا بقبقن من الصلاه في الشمس.. و الإمام يعجبك الركعه نص ساعه.. ( أيدو في المويه ) قصدي رجلو

  21. ياسين شمباتى كتب:

    بشار يا حبيب..جماعتك ديل الجابرهم شنو,,ما يمشوا جامع تانى..لكن نسبة لى طيبتنا وسماحتنا يسرقونا مية مرة وما بنتوب!! لكن برضو كان ادوا الحصحاص رشة بكون احسن,ويا حبذا لو رشوهوا الحرامية!!

    سهيل..تستاهلوا,ما كان تصلوا جمعتكم فى المرخيات,ولا المستجدين مرفوعة عنهم الصلاة!!؟؟

  22. بشار أحمد بشار (إبن برد) كتب:

    قبل أعوام خلت توفي الى رحمة مولاه ركن ركين من الأقطاب الأمدرمانيين وصاحب أشهر منتدى سارت بفضله الركبان وشهد له بالكرم كل قاصٍ ودان ويوم (رفع الفراش) ضاقت ساحة (حي الملازمين) بما رحبت من المصلين وتبودلت الكلمات في مآثر ومناقب المرحوم العطرة وبعدها اكتشف عدد كبير من المصلين ضياع نعالهم وكان أحدهم يتميز غيظاً ويقول :”يا جماعة…..صندل كلارك جديد لنج جايبو من انجلترا لبستو مرتين بس إتسرق؟؟؟ وهنا علق أحد ظرفاء أمدرمان بصوت خفيض: “صندل كلارك ولا جاري كوبر ما خلاص سرقوهو” ويقصد كان المقدور وقع ما بنفع الجقليب. والجدير بالذكر أن كل من كلارك جيبل وجاري كوبر من أبطال السينما الأمريكية في الخمسينيات.

  23. سهيل كتب:

    شبشب – نعال -برطوش – بلغه – صندل – جزمه – كداره – سفنجه – كركب – شده (بكسر الشين) – مداس – بوت – زحاحات – شلوت – كبك -عفاصات – تموت تخلي -دبابه – مركوب – شحاط – “كندره” –

    يا عبدوش بتعرف النقلتي ؟

  24. ياسين شمباتى كتب:

    بشار ابن برد..شوف الناس فى الخمسينيات كانوا متابعين السينما الامريكية وعارفين نجومها,,ثقافة وكمان معناهو فى وقت فاضى لمتابعة الاحداث..الليلة الممثلين السودانيين ما بنعرفهم!! والزمن مافى عشان نحضر ونتابع متغيرات الاحداث على الساحة الثقافية..

    سهيل..بعد دا كان ما بعرفو بكون عرفو,,لكن انت العرفك ديل كلهم شنو!!؟؟

  25. Nourlight كتب:

    د. شمباتي…

    رغم انه المقال يناقش قضية اجتماعية بل خلل واضح الا اني اعتقد ان ما حفزك وحمّسك لكتابته هو الحنين الي حذاء حبيب فرّق بينك وبينه لص مأفون 🙂

    انا احب اشيائي حتي لو لم تكن غالية او قيّمة…و تؤلمني سرقتها او ضياعها…اعان الله المنكوبين منكم والمسروقة اشيائهم…والحرامي بصراحة ما عنده لا عذر ولا منطق مهما وجدتوا له الاعذار….

    وهو لا يقدر حق غيره ولا جهده و يسرق خاصة الناس…فهل يا تري يقّدر جهد نفسه ويحب ان يكون له شئ يخصه حصل عليه بجهده؟

  26. ياسين شمباتى كتب:

    الاخت نورلايت..سلامات..والله فعلا حزنت على الشبشب بشدة,لانو من شخص عزيز..كمان برضو عندى ارتباط شديد جدا باشيائى_تشمل كل شئ_ولا استطيع التفريط فى اى منها,ولى اخت لها نفس العادة بل انكى واشد,حيث انها تحتفظ باشياء منذ الطفولة وهى الان على اعتاب الاربعين!! عندها شنط مليانة هتش وحاجات فارغة…ياريت يجى حرامى ويسرقهم ويكون مفتكر انهم حاجات مفيدة!! تحياتى…

    • الغبشة كتب:

      شمباتى:ليه تحمك على انها اشياء فارغه؟وانت كمان اعترفت بانك برضو بتحتفظ بالاشياء،هل الاحتفاظ يكونمن اجل الشئ ام من اجل ارتباطه بشئ اخر؟احى اختك واشياء،واعتقد من يستطيع الارتباط باشيائه ومهما صغرت يعنى انه يستطيع الاحتفاظ والارتباط بالافكر والمبادئ والعلاقات مهما كان شكلها ودلالاتها وده شئ جميييييييييييييييييييييييييييل خالص ((انا برضو بحتفظ بالحاجات))

  27. ياسين شمباتى كتب:

    الغبشة..صباح الخير..

    ما كل الحاجات ممكن يحتفظوا بيها,,يعنى اقلام رسم وبنات لعب(ليون) واكسسوارات عفا عليها الزمن,,وكمان بتكون اشترتهم هى,يعنى ما هدية وكدة..

    وانا بحتفظ بالهدايا والاشياء المرتبطة بمواقف معينة,,حتى الخطابات وكدة..واهم شئ بحتفظ بيهو الصداقات والمعرفة…تحياتى..

  28. ودالفتيحاب كتب:

    الحمد لله
    للكل سلامى
    الليله سياحه شبشبيه

  29. حاج أحمد السلاوى كتب:

    أخونا ودالفتيحاب ..سلام ..
    إنت كنت قاعد جوه فريزر ..ولا شنو ؟ الخلاك شنو تنكت البوست دا ؟

  30. د.ياسين شمباتى كتب:

    حاج السلاوى..والله حيرنا شديد!!

    حبيبنا ود الفتيحاب..بركة برجوعك لينا كيبورديا,,فى انتظارك الليلة..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s