النعام والطيران

Posted: السبت,2 مايو, 2009 by قرن شطة in ادبية

أمام قفص الحديد الصدى والذى يحبس فيه النعام فى حديقة الحيوانات.. هذه الطيور الضخمة غريبة الشكل قليلة التناسق بين اعضائئها وذات الاعناق الطويلة والملتوية. النعام فى محبسه يسير من اتجاه لاخر بخطوات طويلة وعصبية. طفل يرتدى سروال قصير وعلى الوجه نظارات سميكة تدل – والله اعلم – على العمى المبكر او النبوغ السابق لاوانه …الطفل مستغرقاً فى النظر الى الحيوانات فى اقفصاها وفى استغراقه يمسك يد جده ويدا اخرى على قضبان الحديد ثم يسال وعيونه على النعام:

– الاتطير هذه الحيوانات؟

– لا تستطيع، تركت الطيران منذ زمن بعيد – أجاب العجوز .

– لماذا وهى تملك أجنحة تبدو قوية؟

– حسنا هذه الطيور حرمت من الطيران لتكبر وعجرفة ارتكبتهما وكان العقاب أن حرمت من الطيران – صمت الطفل مندهشا ونظراته لاتفارق النعام فى غدوه ورواحه القلق  داخل القضبان ثم قال:

– ارجوك ياجدى ان تحكى لى قصة النعام.

– هذه قصة قديمة … حكاية خيلاء وثقة زائفة بالنفس – قال الجد بصوت راوى حكايات متمرس – يقال انه فى موسم الجفاف والعدم الذى يضرب من حين لاخر السهول الافريقية ، اجتمت كل الطيور وتشاورا فى الامر وكان أن قد قرروا الهجرة الى منطقة البحيرات العظمى حيث سيجدون هناك الماء والغذاء . الطيور قالت بتفاؤل :اذا شاء الله غدا سوف نطير الى هناك، ماعدا النعام – والذى كان يطير فى ذلك الزمان – فانهم اداروا ظهورهم وقالوا بعجرفة : اذا شاء الله او لم يشاء غدا سوف نطير الى هناك! فى صباح اليوم التالى طارت كل الطيور وفى عرض السماء الزرقاء شكلوا جماعات منظمة وهندسية ومن الاعالى نظرت الطيور بدهشة الى النعام والذى كان يجرى على الارض باندفاع جنونى ومع ذلك لم يستطع الطيران! الله عاقبهم على غطرستهم بان يسيروا على وجه الارض الى الابد ومنذ ذلك الحين والنعام لايطير….اصبح طيراً عاجزاً عن الطيران! الطفل بوجه فيلسوف ماوراء الطبيعة ظل صامتاً فترة من الزمن وكأنه يحلل القصة وفجاءة سأل:

– قل لى ياجدى هل الله موجود حقيقة وفعلا ؟

– نعم ياصغيرى والا فكيف سنشرح للناس قصة طيور النعام وعدم مقدرتها على الطيران!  

الجد وحفيده ضحكوا بمرح وذهبوا متماسكى الايدى للتمتع  برؤية باقى حيوانات الحديقة.

Advertisements
تعليقات
  1. طارق أب أحمد كتب:

    وعندما ندم على فعلته الشنيعه دفن رأسه فى الرمل
    قيل خوفا و لكن يبدو أنه خجلا
    الأحباب السمار
    عمتم مساء

  2. ياسين شمباتى كتب:

    د.قرن شطة..سلامات..

    لو كنت مكان الضغير لما اقتنعت باجابة الجد,فهى تفترض وجود الله عز وجل فقط لاثبات صحة القصة,,لكنه ان ركز على العقاب واثبت به وجود قوة عظمى وخفية لكان اجدى له..تحياتى على النص القصير المفعم بخفايا الوجود وجدليات البقاء والقدرة والقوة والتخطيط ليوم غد..

  3. البشاوى كتب:

    قرن شطة
    مساءك قشطة
    انها عاقبة الغطرسة والنفخة الماليها لزوم دايما تجى العواقب كبيرة ومؤثرة
    حسة نحنا الحامينا نطير ونمشى لى قدام شنو بلا النفخ الفى الفاضى والتحدى البنتحداهو يوماتى على قوانين الطبيعة ومنطق الاشياء ومواثيق الواقع كل يوم ننفخ والقربة مقدودة يوم سد ويوم رد ويوم النفرة الخضراء
    ويوم ورا يوم ياحبيبى مابيجينا النوم دة من شنو ؟ احسن نسأل النعام

  4. aflaiga كتب:

    قرن شطه : وهو غير الفلسفه دى البيودى لدرب الله شنو ؟؟؟
    خلق الله الكون لنتفلسف فيه ونبحر بعقولنا لنعود لمحطة واحد وهى انو اصلو ما ممكن يكون الشغل ده بتاع بنى ادم !!! واصلو ما ممكن يكون الشغل ده براهو كده من العدم !! وقومو يا عباد الله ارجعو لى الله !!! شفت كيف ؟؟؟
    اما النعام فبالله انا عندى سؤال محرج شوية :
    طبيعة الاشياء الخطا ثم التوبه ثم المغفره الا ابليس الطريد الى يوم الدين … صح كده ؟؟؟
    طيب النعامه دى من الزمن داك لو تابت واستغفرت مش يمكن الله ( يطيرا ) تانى وتطير ما ترك كلو كلو ؟؟؟؟
    بالله انت والبشاوى اقعدو لينا كده مغربيه بمزاااااج ! وشوفو لينا امكانية توبة النعامه وموقع توبتها من التصديق باعادة الطيران بشرط عدم الركه تانى !!!

  5. البشاوى كتب:

    افليقا
    امكانية توبة النعام ورجوعه الى جادة الصواب زى امكانية دخول ابليس للجنة وهذا ليس قفلا لباب التوبة المفتوح ولكن لكبر انكار النعام ذات نفسه لمشيئة الخالق ونحنا فى امازونيا المغلوبة على امرها نعمل وللاسف بمنطق النعام الهدام نفترض الحق فى الباطل والجميل فى القبيح والخير فى الشر ليس لصحة المنطق ولا لغباء اصحاب الرأى بل لشئ فى نفس صاحب الرأى
    كسرة
    فى الزمن الجميل حبوبة صاحبى الشايقى وهى محبة لدرجة الادمان لمديح المصطفى (ص) جاء صديقى حفيدها ليخبرها بحزن بوفاة المادح حاج الماحى
    فكان ردها التلقائى (الله فك أبوجهل من النبيشة)

  6. نيام كتب:

    قرن شطة:
    ترا النعامة ندمت سفت التراب الكلام النعام ادم..
    البشاوي:
    والله صدقت حبوبة صاحبك..

  7. جميلة مدونتكم
    أدعوكم لزيارة مدونتي

    وتبادل الإعلانات على الرابط

    http://financialmanager.wordpress.com/2009/05/03/free-ad/
    برجاء النشر

  8. قرن شطة كتب:

    الاخوة الاماجد ظناً ثم الاشاوس تاكيداً / مسائكم خير / الغريبة كنت أتوقع أن يكون فى شوية حراك وعكلتة فى الموضوع ولكن مرا بسلام….الحقيقة إنو هذه القصة تناقش ليس فقط موضوع النعام وعدم تركه للطيران فهى قصة لاندرى حقيقتها وربما مغزاها…ولكن أتحدث عن أمر أخر وقد جاء فى أخر القصة الا وهو مصطلح فى علم النفس تعارف عليه بمسمى – بالالحاد الطفولى – وهو باختصار شديد أن الاطفال بيكونوا دايماً ملحدين بالله ذلك أن فكرة ووجود الله لاتتناسق وطبيعة تفكير الصغار فهم بحكم محدودية عقلهم لايومنون الا مايرون ويحسون فقط…أرجوا أن تكون الفكرة وضحت وعلى ضوئها يمكن أن نقود نوع من النقاش ..تحياتى أيها الاحباب وشايف فى ناس إختفوا… ناس على سنكل ومخير وأخرون لهم منى التحايا.

  9. aflaiga كتب:

    قرن شطة ثرو ود الخلا :
    انا شخصيا كتبت عن هذا الامر قبل كده فى شكل حوار مع حمودى :
    حمودى : بابا اقوى سبايدر مان ولا الله ؟؟
    افليقا : طبعا الله يا حمدوى .. سبيادر مان ده شخصية كرتون ساى ..
    حمودى : طيب ليه نحنا بنشوف سبايد مان قوى وبينقذ الناس طوالى ويساعدم وما بنشوف ربنا قوى وبينقذ الناس ؟؟!!!!!!!!!
    كدى عشان البوست ده يفيد فايده قصوى ناقشو لينا نظرية الالحاد الطفولى ده بتوسع اكبر ….
    طبعا انا رديت على حمودى والحمد لله ربك سهل نو نورى الود عظمة الله لكن برضو عاوزين رد عملى وعلمى …

  10. قرن شطة كتب:

    الاخوة الافاضل الاشاوس / المهندس ود الخلا والحبيب أفليقا / اقول لاداعى للقلق بشأن الاشياء فلله الامور من قبل ومن بعد …وانت تعرف ياباشمهندس نحن نعرض بضاعتنا والاخرين يقولون مايقولون..القصد أن نتعلم من بعضنا ونستحمل الراى الاخر ..اما انت ياايها الافليقا فلك التحايا أولاً والموضوع ده موضوع مش معقد خالص باختصار الاطفال لايومنون بالله ولايومنون الامايرون ..فكرة الله فكرة معقدة وبتحتاج الى سعة عقل ووفرة معلومات ونقاء سريرة أيضاً ..اية رايك

  11. قرن شطة كتب:

    وعلى كل ح أرجع أكتب شوية عن موضوع الإلحاد الطفولى بتوسع شوية واتمنى أن لانقود اى شخص من حالة الى اى حالة بل العكس من كعب الى كويس..وماتخاف من العكة والعلالة..تقوم وتنطفى..ناس المطافى بسو فى شنو؟

  12. aflaiga كتب:

    ود الخلا : افادك الله وذادك علما …
    ولكن اما سمعت بان كل مولود يولد على الفطره فابواه يهوداه او ينصرانه ..
    ما افلطره المقصوده هنا ؟؟؟
    وهو ذاتو لو ما اختلفنا واتفقنا الناس البيقرا حتستفيد كيف ؟؟؟
    انا شخصيا لا علم لى بان الطفل ملحد منذ الولاده لكنى سقت لك حديث حمودى وغيره من الاطفال لنناقش هذه الظاهره الهامه ..
    قرن شطه : راجين المعلومات المفيده …

  13. aflaiga كتب:

    طيب ببساطه يا قبيله الشفع ليه دايما ما بيتقبلو الغيبيات بسهوله ودايما بيناقشو فى ما تم تحديد السؤال عنه كبدعه …
    القصه اعتقد برضو فيها جانب تعليمى يجب تغذيته فى الاطفال من باب التفكر فى المخلوقات .. اطفال شنو يا قبيله هو الكبار ذاتم بعد مرات دايرين حركه حركتين …

  14. aflaiga كتب:

    شباب : قطع اخونا صالح قول كل خطيب :
    ادناه رسالة فى الميل من الاخ صالح حول الموضوع :
    مع اننا لم نفتى ولكننا اوضحنا وقائع من الواقع المعاش تم تعديلها فور علمنا بالفتوى والدليل من السنه والقران :
    ادناه مقتطفات من رسالة الاخ صالح :
    ——————————–
    كل مولود يولد على الفطرة
    (من فتاوى ابن تيمية)
    (المجلد الرابع)
    سُئِلَ ـ شيخ الإسلام إبن تيمية رَحِمِهَ اللَّهُ ـ عَن قَوله صلى الله
    وسلم‏:‏ (‏ كل مولود يولدعلى الفطرة‏)‏ ما معناه‏؟ أراد فطرة الخلق أم
    فطرة الإسلام‏؟‏ وفي قوله‏: ‏‏(‏الشقي من شقي في بطن أمه‏)‏ الحديث‏.‏
    هل ذلك خاص أو عام‏.‏ وفي البهائم والوحوش هل يحييها اللّه يوم
    القيامة أم لا ‏؟‏
    فأجــاب‏:‏ الحمد للّه؛ أما قوله صلى الله عليه وسلم‏:‏‏(‏كل مولود يولد
    على الفطرة فأبواه يهودانه أو ينصرانه أو يمجسانه‏)‏‏:‏ فالصواب
    أنها فطرة اللّه التي فطر الناس عليها، وهي فطرة الإسلام، وهي
    الفطرة التي فطرهم عليها يوم قال‏:‏ ‏{ ‏أَلَسْتَ بِرَبِّكُمْ قَالُواْ بَلَى} ‏
    [‏الأعراف‏:‏172‏]‏
    وفي رواية اخرى له من حديث ابن نمير؛ مامن مولود الا وهو على الملة0 قال النووي والاصح ان معناه ان كل مولود يولد متهيئا للاسلام وعند النووي ايضا شرح صحيح مسلم ليس من مولود يولد الا على هذه الفطرة حتى يعبر عنه لسانه قالوا؛ يارسول الله أفرايت من يموت صغيرا قال الله اعلم بما كانوا فاعلين00 والذي هو اقرب الى الواقع والمنطق في هذا الحديث والاحاديث الاخرى التي تجري في نفس السياق ان تفسير وشرح الحديث من قبل الشراح القدامى على ان اصل الفطرة هي الاسلام لايمت الى الواقع باي صلة وليس هناك اي دليل دامغ على ان اصل الفطرة هي الاسلام حتى الاية التي استشهد بها ابو هريرة ليس دليلا كافيا لتوضيح معنى الحديث وقال اقرءوا ان شئتم ( فطرة الله00) الاية0 في الحقيقة التفسير الاقرب الى الواقع هي ان اصل الفطرة هنا ( الجهل) وليس الاسلام وهناك دليل من القران يوكد ذلك وهو الاية التي تقول( والله اخرجكم من بطون امهاتكم لاتعلمون شئيا) والعلم هنا هو ضد الجهل0 ولايعتد بكلام شراح الحديث القدامى لانه تفسير منافي للواقع والحقيقة0 فلماذا يتباهى المسلمين بانهم مسلمون؟ وسوف نضرب مثلا يقرب الواقع اكثر0 وهو ولادة طفل من ابوين مسلمين ومنذ اللحظة الاولى نرسله الى بلد غير اسلامي انكلترا مثلا ثم نعود بعد عشرين عاما هل سوف يكون هذا الطفل الذي بلغ عشرين عاما مسلما الجواب لا طبعا0 اذن الجهل هو الفطرة وليس الاسلام والطفل يتشكل في البئية التي يعيش فيها منذ ولادته ويكتسب كافة الاشياء المشكلة(بضم اللام) له من المحيط الذي يعيش فيه وياخذ دينه من ابويه وعاداته وتراثه وتقاليده وكل شي يراه ويسمع به في مجتمعه وبيئته00
    —–
    التعليق :
    ننتظر حديث اخونا الدكتور قرن شطه لنخرج بملخص مفيد من هذا الموضوع .

  15. قرن شطة كتب:

    الاخوة الافاضل / لكم التحية كلها ودمتم / شايف الموضوع دارت حولة نقاشات ثم اتبعتها فتاوى وشبه فتاوى…ده كلام جميل…تعلمون ايها الاخوة ان مانرى قد كتبناه صراحة ، والشى الاخر ان راينا راى يقوم ومبنى اساساً على علم النفس الذى درسناه ودرسناه كتخصص ، وعلم النفس علم قام بتاسيسيه ناس لايومنون بالاديان فى الغالب وهم يدرسون بصورة ممنهجة ومرصودة ومحصية بعض الظواهر فى سلوك البشر ويقومون بتحليلها مستخلصين بعض النتائج على ضوء الملاحظات التى رايت بالعين او التى استنتجوها استنتاجاً بالدلائل…ونحن لنا مذهب تكاملى فى فهم الاشياء ..اى مادرسناه ونتبعه بما نعتقده..اما الموضوع فى حد ذاته فقد اوضحناه ومظاهره العامة..استمتع بالنقاش وطولوا بالكم ايها الاحباب فالعلم احياناً عصى..ودمتم

  16. aflaiga كتب:

    ود الخلا : كلام حكم وزى الترتيب .. بس لو بسطت للناس بالعربى الفصيح يكون ميه يعنى على شاكلة ( اى شافع لمن يتولد —- ) .
    قرن شطه : ايرادالرؤية العلميه البحته ميه ميه ولولا تكامل الاراء لضل قوم كثير ..
    فى سوداننا والحمد لله التخصصات فى مختلف العلوم من افليقا اخصائى التركين الى قرن شطة اخصائى علم النفس الى ود الخلا الهندسة مختص العلوم الشرعية الى الفقيه صالح النطاسى الفقيه الى نيام نيام اختصاصى النجوم الى البشاوى اختصاصى التغلب على عكننة العواطفات وده مما يذيد المدونه شرفا وتكاد بباندويثها تطا ثريا الفضاء الاسفيرى ..

  17. قرن شطة كتب:

    الاخ أفليقا /مساء الخير / أحياناً عندك كلام بتعرفو انت براك يعنى هسع – إى شافع لمن أتولد – ده عربى فصيح لكين مبسط؟؟ نظام مؤطأ مالك وكده؟ ثم ان مسألة الإخصائين دى كترت فى البلد زى موضوع الضباط ..ضابط حركة وضابط بوليس وضابط جيش وضابط أمن وضابط إيقاع…ألخ غايتو ربك يسهل القواسى المواضيع بقت شوية معقدة وفيها متاهات وكدة..تحياتى ايها الاخ الكريم

  18. علي سنكل كتب:

    قرن شطه والمدوناتيه سلام . . .
    يقال أن مالك التيتانيك عندما ذهب إلى حوض السفن لاستلام سفينته وبعد أن طاف بغرفها وطوابقها ، أصابه الزهو والخيلاء فضرب على حديدها الصلب قائلاً ” إن الله لايستطيع إغراقها”.
    فأغرقها الله جل وعلا وأغرقه في أول رحلة لها وكانت الأخيره ، ذي النعام.

    شايف يا قرن شطه موضوعك من عنوانه ساكت قوم العلاله والعجاجه. أها كيفن يكون الحال بعدما تنشره؟ خايف عليك يلحقوك د. نوال السعداوي ! !
    دايما يا أفليقا مولع لينا النيران ، ماتخليهو حمودي نايم ! ! !

    مواضيع ذي دي ممتع النقاش فيها شريطة ” الفير بلاي ” ، والبعد عن الشطط ذي ما قلت يا شطه.

  19. البشاوى كتب:

    قرن الشطة الدليخ
    دى مواضيع جميلة وبتفيد الناس كتير وزى ماقال سنكل (الفير بلاى ) بيفتح الشهية للنقاش وبيفتح العقل للتعلم
    كسرة
    دايما الكبار مايستهينون بعقلية الطفل ونوعية الاسئلة التى يطرحها وربما يضيقون بالشرح والتبسيط لتوصيل المعلومة له ولقد ابان شيخنا صالح وافصح زاده الله علما ومتعه بالصحة — كان لى ابن اخ كثير الاسئلة وهو صغير لدرجة تحس انك لازم تقوم تجلد الولد دة عشان يمسك خشمو من الكلام ودائما اسئلتو من شاكلة ليه الله خلق النمل والشمس بتمشى وين فقام ابوهو لما سالو الله وين قاليهو الله بعيد ماممكن توصلو وتشوفو والكلام انتهى لحدى هنا بعد مدة من الزمن سافرو سنار من عطبرة فى اجازة بالقطر وطبعا المسافة بعيدة جدا وكل مرة الولد يسال ابوهو حنصل متين يرد ليهو لسة شوية وكان التعب قد اصاب الولد وبى زعل قال لى ابوهو نحنا ماشين لى ناس الله اصلو ؟
    استغفر الله لى ولكم

  20. نيام كتب:

    المدونون الاشاوس كما يقول قرن شطة..
    فعلا في عقل الطفل في المراحل المبكرة كثير من الاسئلة و عميقة جدا..يبدو ان الطفل في تلك المراحل لا يؤمن الا بما هو بين يديه..ولذلك فالمسائل الغيبية تسبب له كثير من الاسئلة التي تحتاج لاجابة و ليست ككل اجابة بل اجابة لعقل يؤمن بما لديه…
    وفي نفس الوقت لابد من اجابات لانك لو تجاهلت ذلك قد لا يسألك مرة اخري و تتكون عنده صور غامضة عن الاشياء يصعب فهمها فيما بعد..
    كسرة:
    البشاوي:
    في الحقيقة اتبرا سنار دي نحن ذاتنا محيرانا..

  21. قرن شطة كتب:

    الاخوة الافاضل والمدونون الاشاوس / سلام / أنا غايتو فى الايامات الفاتت دى حضرت كم مراسم دفن على الهواء مباشرة بمعنى كنت فى خط الدفن الاول وجنب القبر مباشرة وشاهدت بتمعن وانتباه شديدين نهاية القصة..يبدو كلللللللللللللللل البنسوى فيهو ده ماعندو داعى والقصة كلها فاشلة بى إلحادها الطفولى والكبارى..احد المتوفين الى رحمة ربه كان شخصاً معروفاً وشهيراً وصاحب شخصية جامحة ويقال غنياً اى صاحب مال وجاه ومع ذلك مازادوهو سنت أو صنت فى ود الاحد؟ وبالمناسبة هو سموه ود الاحد ليه؟؟ حكاية غريبة؟ الحقيقة بطنى طامة من الدنيا الايامات دى وهى اصلاً طامة مما وصلت أمازونيا الرابة وحططت رحالى بها..ربك يسترنا ويستركم..القصة جد مرة ودايرة خطة عمل مختلفة وإسترتيجة جديدة…ولا شنو؟

  22. aflaiga كتب:

    ود الخلا : والله كلامك حكم .. واهو كده شوية شوية تلين المسائل عشان تسلك المسائل الناشفه وتدى نظره جديده للدين بعيدا عن الصوره الاحسبونية الميكافيليه الكرهوها الناس يعنى زول زيك كده لا عندو ناقه ولا جمل فى تجنيد زول للدين الجديد وبيدعو للدين القديم طلبا لهداية الاخوان البيقرو وما مهتدين وطلبا لذيادة تعميق ايمان الاخوه المتداخلين المؤمنين اساسا قليل تلقاهو فى زمن التجنيد بالدين واللعب بالعجين !!! لله درك ما اخلصت النيه لله فقط ..

  23. قرن شطة كتب:

    الاخ ود الخلا والعزيز /أفليقا /سلام. أولاً شكراً ليك ياودالخلا والذكرى تنفع المؤمن..وكلامك كلو جيد وكويس وبصب فى محل مافى شك…بس إنتا عارف فى ناس كرهوا الناس الدين ذاتو ، ثم انو الحياة مع انها فانية برضوا الناس دايره تاخد نصيبها مع ذلك، والنظرة الظلامية الى الامور هى فى الواقع هى الخلت الناس يخلوا الدين لانو المسالة أكبر من اية أو حديث، ثم انو الناس بقتت تشكك فى كلام كتيررررررررررر على كل ربنا يسهل والسوايها الله بتبقى..اكرر شكرى
    انت أفليقا شد حيلك لى قدام اصلو باقى لى نحن دى مرقنا منها ساكت كيت..الاتسوا إتسوا وتانى فى امازونيا مافى جديد..ترجا الله فى الكريبة يامحترم..دمت وتحياتى يازول ياظريف

  24. aflaiga كتب:

    ود الخلا : وانت قايل شنو ؟؟ نحنا كما عارفين نيتك بنتور نفسنا معاك !! يا زول ادعو الى سبيل ربك بالحكمه والموعظة الحسنه وبالعكاز وباى حاجه ما دام الى سبيل ربك وليس اى سبيل تانى !!وهو غير مسك سبيل ربّكا ده الكان عازينا شنو وغير فك سبيل ربك ده الزلانا شنو ؟؟ الزلانا دى طبعا يدخل ضمنها تسليط من لا يخافه ولا يرحمنا علينا !! ولا مش كده ؟؟
    قرن شطه : يا متابع يا شفيف تتخيل ود الخلا شابكنى انت قرن شطه ده طوالى علم علم علم مافى دين ؟؟ قلت ليهو والله قرن ده من كترة الدين لمن جا راجع خلى اسبانيا من المغسه لانو ما قدر يستحمل يشوف اسبانيا طارق تحت يد الفرنجه !! ومن ديك والزول ظنو بيك تحسن واهو زى ما شايف عسولى معاك كيف ..
    ود الخلا : والله اى زول من البيكتبو ديل دينو بينقط !! بس لانو زيتو بينقط اكتر من دينو الزيت ظاهر ومغتى على الدين كدى شيل ليك اسطبة ( بتعرف الاسطبه ؟؟ ) وامسح بيها كرتيل الزيت بتاع اى زول منهم والله تلقى باكم ( بتعرف الباكم ؟؟ ) باكم الدين مليان فى ال max لمن قالب جلود !!!! بتعرف الجلود ؟؟؟
    قرن ثرو كل الشباب : والله ود الخلا ده المقنيته بتاعة الدين بتاعتو موزونه لمن راميه كتير عشان كده اى شورت فى اى حته بياثر معاهو ويبدا يعمل ( tracing ) للضفيره بتاعة اى زول يهبشو فى كتاوتو !! لمن يعرف انو ضفيرتك ميه ميه بعد داك بيقلب عسولى خلااااس ..
    وفى الختام تحياتى لكم جميعا ادام الله الود بيننا ما دام الاحترام …

  25. aflaiga كتب:

    ود الخلا : عليك الله لاحظت للقصه بتاعة الاتزان دى ؟؟ يا زول يا ليحيييظ انتا !! صبى دريسه ؟؟ !! كيف يعنى ما اكون صبى دريسه ونحنا فى الاجازات كنا بنشتغل شنو ابوك يسلمك لى عمك صبه الميكانيكى ويقول ليهو استلم الود ده وليك اللحم ولينا العضم وعمك صبه بدون توصيه ما بيقصر وقبل ما ابوك يتحرك يديك اتنين مفتاح فى راسك لزوم كسر حاجز الحنان والتدخل الابوى وابوك يطنش امعانا فى تاكيد التسليم مفتاح !! وانت قايل تسليم مفتاح دى جات من وين ؟؟!! وده بوست براهو عن الخرد والمنطقه الصناعيه وحدادين الواطه وناس ام جنقر وباكمبا بالطحنيه وكمونية فارات وقدوقدو وبتاعين الايلا مش جد محمد طاهر لالا الايلا هى الدلع بتاع الالمنيوم …
    ترقبو بوست حياتنا الشعبيه فى القريب العاجل …

  26. قرن شطة كتب:

    الاخوان الاشاوس/ سلام / نحنا ياسادة عندنا مشاكل عدم فهم من بعض البشر وخاصة ناس الدين الممثلين وبالذات الجهلة منهم – نحن نبحث عن الدين فى الغالب ثرو العلم واحياناً حتى ولاهذا..الروحانيات تعطى الهدوء والسكينة واليقين..وللاسف فى اروبا يوجد دين وصدق وتعامل جيد اكتر من امازونيا بالتاكيد وانا من الشاهدين..وهنا يوجد ماتعرفون، فكيف نستمع اليهم مرة اخرى…حبوبتى كانت تقول – الجرب المجرب وقعت عليه الندامة – العلم هو الاصل والمعرفة هى الاساس لذا لما نزل جبريل على النبى – صلعم – لم يقل له شى اخر سواء إقرأ ، ودى مفهومة إفتكر ياشباب…اما الظلامين والنفعيين والممثلين وديل كولهههههههههههههههههههههههم نحنا ماعندنا معاهم مشكلة لاننا أصلاً لانتعامل معهم وبعدين يشوفوا مشكلتهم مع ربنا..لانو فى حساب وعلى مراحل كثيرة..دنيا واخرة………..واخيراً أوصيكم ونفسى بالعلم والمعرفة لامخرج اخر يوجد ، ومن بحث غيره ينطبق عليهو قول حبوبتى؟؟تحياتى

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s