لا تتحدث مع السائق 2 ..

Posted: الأحد,3 مايو, 2009 by aflaiga in اخرى

كنا قد توقفنا فى الحلقه الماضية عند سؤالنا عن مستقبل البص والذى كان :

يا ربى نخلى ناس الحركه ديل يوقفو السواق ده ويقطعوها معاهو ؟؟؟

ولا نقيف مع السواق ده لحدى ما يفوت الحمله دى وبعد داك نتفاهم ؟؟؟

ونحنا طبعا كركاب طيبين وقفنا مع السواق لحدى ما اتجاوز الحمله بحمد الله لكن بالله عليكم الله تقييمكم شنو للرحله من يوم فتنا الحمله ولحدى الليله ؟؟؟

انا شخصيا غايتو شايف انو :

* بتاع الحركه عمل نايم وخلى البص يعدى لكين ليييه ؟؟ ما معروف !!

* السواق فى كلامو للركاب قال يا جماعه اعملو انتخابات ولو فاز سواق غيرى ما عندى مشكله بنزل ليهو من الدركسون مع انو سواقتى مافى زيها واللقيتوهو فى زمن سواقتى ما بتلقوهو تانى !!!

* بعد كم يوم البص بقى يرترت ويقّطع اها لمن سالنا السواق الحاصل شنو قال الضفيره الجديده دى فيها مشكله كبيره عشان كده كهربة الكتاوت ما موزونه !!!

*قلنا ليهو مش دى الضفيره الجديده الردينا بيها على بتاع الحركه انو البص ده ميه ميه ؟؟؟

* الوساق قال : ايوا هى نفس الضفيره بس انتو اصبرو شوية وحنراجعا ونجيب الكهربجى الاشتغلا يزبطا تانى ..

* قلنا ليهو طيب ضفيرتنا القديمه ديك وبطاريتنا القديمه ال 50 امبير مالا مش ممكن نشتغل بيها لحدى ما تجيبو الكهربائى ؟؟؟ قام السواق سكت والكمسارى عمل نايم !!!

اها اتكلمنا معاهو فى المقاعد بتاعة البص وخاصة مقاعد النسوان ووعد خير بانو التمثيل فى المقاعد يكون عادل واى زول حيلقى ليهو مقعد مريح ..

* اها قبل كم يوم الكمسارى دور مشكله مع الشفع والنسوان البيجو راكبين فى البص يبيعو المناديل والمويه والتسالى وقال ده ما مظهر حضارى فى البص بتاعو ده !!!

* اها فجاتن جا بص سياحى وقف وكورك للشفع ديل قال ليهم تعالو اركبو ونشترى منكم بضاعتكم كلها ونوصلكم محل ماشين !!!

* طوال السواق والكمسارى طلعو فتوى من هيئة الكمسنجية بانو الركوب فى البصات السياحية خروج من المله وكفر صريح !!!

* قام الشفع والنساوين طلعو بيان مكتوب فيهو ( دخلت امراة النار فى هرة حبستها …….

غايتو ده لحدى اسى الحصل فى البص لى يوم الليله اها انتو رايكم شنو يمكن تكونو شايفين شوفه تانية ؟؟؟

Advertisements
تعليقات
  1. طارق أب أحمد كتب:

    أفليفا

    االبوليس مصر يسحب رخصة السواق و السواق مصر أصرار غريب أنو يسوق الباص و فى واحده من أنفعالاته الهستيريه أو هسترته الأنفعاليه (أيهما أبلغ) صار يكورك عشرين سنه أنا سايق الباص دا حصل يوم دقشت بيكم

    السواق نسى الدقشات الكتيره الحاصله فى البص الرفرف البى الناحيه الغربيه و الجنوبيه و الشرقيه و الشمال شرقيه البودى كلو مطقع و الجوه أسكت و عاين بس

  2. aflaiga كتب:

    اب احمد : احيى مرورك الراقى .. ومبادرتك بالتعليق ..
    بالله هو قال كده ؟؟ ليه يعنى هو الضربات والسمكره دى بى بره ولا جوه ؟؟ ما كل الناس شايفه الضربه الفى الرفرف الغربى الكل يوم كنا كركاب بنكورك فيهو ياخى سمكر الضربه دى ياخى معجن الحته دى ياخى رش الحته دى بوهيه لمن الركاب الفى الغرب قربو يشيلو الرفرف ينزلو والرفرف اتملا سمكرات هجين !! شيئ سمكره خدرا وشى سمكره حمرا …
    غايتو يا اب احمد البص ده من بره عاوز سمكره وبوهيه عامه لكن شايف الكمسارى مصر انو يجيب ستيكر بتاع تلصيق وفيه شعرات وايات من نوع ( اصبرو وصابرو واتقو الله ) ويلصقا فى حنان الحتات الدايره سمكره عشان يغتى على الطرقيع .. يقوم اليحصل شنو ؟؟ الحديد المصدى يقطع الاستيكر ويجى مارق يبين عورة الاستيكر كلها ..!!!!!
    وجاييك .

  3. البشاوى كتب:

    افليقا
    هو سواقنا دة ماخلاص روحو انسلت وكرعينو اتلولون من سواقة دفاراتو الخاصة تانى بافى ليك بيقدر يعشق ويمشى لى قدام؟؟
    بعين بتاع المرور دة لابيترشى ولا بيتهرش لو فوت الموضوع فى الاستوب الفات حيلبت للسواق فى الاستوب الجايى والركاب ديل حفو يدوهم فرصة ينزلو فى قهوة محمد احمد يظبطو ليهم حلة وشاى وحجر شيشة

  4. aflaiga كتب:

    البشاوى : حرم نحنا سواقنا ما بنسلمو لى ناس المرور .. نحنا سواقنا بنسلمو لى الله عديل كده بنقعد نتحاسب معاهو فى الواطه دى يا نزلنا سبنا ليهو البص يا نزل ساب لينا البص ده يا البص قام نزّلنا كلنا ومشى يا السواق ده استعدل وساق كويس ..

  5. طارق أب أحمد كتب:

    و بما أنو السواق عايز يثبت أنو أشطن من بوليس الحركه خلى البص واقف محلك سر وركب ليهو ركشه و راح يتنطط من ورا البوليس مره يمشى الحله البى جاى و مره الحله البى هناك و كل ما يرجع يقوم يعرض لينا….. أنا أبزند أنا الشافو خلو أنا الكيك قرقار مراقد الفيل تمساح الشنو ما عارف داك و و و و و……………..الباص واقف

  6. aflaiga كتب:

    اب احمد : والله حقيقة البص وااااقف .. لكن بدون زعل ( ينطط ويعرض ) دى كتيره شوية خففا الراجل مهما كان سواقنا وعندو مكانتو فى الموقف بتاع المواصلات واى تقليل من طريقة سواقتو بتقلل من قيمة البص والركاب ..
    دعونا نركز فى الافعال دون الاشخاص الاشخاص بيمشو ويجو .. اى نعم السواق بيربط احيانا بين موقعو كسواق وشخصو المياس لكن نحنا نكون احسن لانو البص بصنا والبلد بلدنا والعريس عريسنا والحفله حفلتنا وما زال الليل طفلا يحبو ..

  7. aflaiga كتب:

    بنفس المستوى يا اب احمد بننوه بالسواق انو يفصل بين سواقتو للبص ومجازفاتو مع ناس الحركه باعتبارها سياسة البص وبين انها رجاله وهاشمية و حنك سنين منو !!
    فى بلدى هناك مساحه بين الخاص والعام يتم التغول عليها من المسئول فيدمج الخاص فى العام فيبدا الرعية فى تناول خاصه كعامه مما يسيئ لمكانة المسئول الشخصية .. البعض فى بع

  8. aflaiga كتب:

    بعض الدول يبدا فى خصخصة الدوله كملك خاص له فيخلط بين عربته الخاصه والحكوميه وبين ماله الخاص ومال الشعب وبين بيته الخاص وارضى الشعب ومصنعه الخاص ومصنع الشعب ويترتب على ذلك :
    حين يتوقف مصنع الشعب الذى حوله لمصنعه الخاص ويبدا الشعب فى الحديث عن المصنع المتوقف يحس المسئول باهانه كبيره لان اهله لم يرضو الحديث عن مصنعهم !!! فيتحول الردع الرسمى الى ردع مشوب بوازع شخصى وهنا يظهر ما يقوم به البعض من تنفيذ سياسات بشكل قمعى رهيب لا يمكن تقييمها الا بانها رد عام على حق خاص !!!
    فهمتو شيئ ؟؟ ولا انا !!!

  9. aflaiga كتب:

    نجى للنقطه المهمه :
    السواقين بتاعين البص الفاتو يعنى الكانو سايقين البص ده قبل سواقنا ده ويييييييييييييييييييييييين ؟؟؟
    فى مواقف المواصلات العامه حين يترجل احد السواقين من عربيتو الكان ماسكا بيسموهو ( ممروح ) وفكوهو عكس الهواء !!! او اختلف مع الجلابى سيد البص وربما يكون هناك وشاية من سواق عينو على البص فيقوم يجى للجلابى ويشبكو ليك :
    * السواق ده بياكل الايراد !!
    * السواق ده بيختف بنات من الشارع !!!
    * السواق ده عندو ترحيل خاص بياكل قروشو بوراك !!!
    * السواق ده رخصتو ما عامه !!!
    * السواق ده بيغشك بكترة الصيانات ومشى المنطقه !!!
    فيقوم الجلابى يفك السواق القديم عكس الهواء ويركب الجديد !!!
    لكن طبعا فى حالة بصنا ده الجلابى غير انو البص ده حقو ما عندو اى شيئ بيجيهو لا ايراد كفى البلا ولا عندو حق يشوت السواق ولا يغيرو …
    الغريبه فى المواقف بتلقى السواق القديم قاعد مع ستات الشاى بيوصف ليهم :
    تعرفى يا سعدية انا الحديده دى كنت سايقا زمااان والله بهتم ليك بغيار الزيت والفلاتر ومكشبا ليك كشب شوفى اسى بقت كيف ملجنه وزيوتا تخرخر وبوهيتا مطرقعه كيف ..؟؟؟
    فتبتسم سعدية ذات الذاكره القوية !! التى يظنها السواق القديم ضعيفه فسعدية كانت احدى ركاب البص لمن كان سايقو هو ذاتو وكان اكعب من ده برغم من انو الكمسارى كان مؤدب مع الركاب لكن البص كانت حالتو تحنن !!!!
    وفى بنبر اخر جوار سعدية يجلس حاتم عرفان !! السواق القديم الذى اتعلما بره !! وما لاقى فرصه يسوق وشابك حاجه سعدية :
    تعرفى يا سعدية البص ده انا لو استلمتو اول شيئ بملكو للركاب ديل ويركبو بلاش مش غلابه بوليتاريا ؟؟ بعدين اى زول بعمل ليهو قدامو سماعه ومسجل العاوز يسمع راب يسمع والعاوز يسمع مديح يسمع مش زى اسى مديح بس ويعلو الصوت كمان ولو ما عاجبك تسكت بس !!!
    وفى بنبر اخر جوار حجه سعدية فاضى ليهو زمن طويييل قالو بتاع حاج عثمان السواق الزمان كان بيتبادل مع محمد الامام السواق التانى لمن البص كان بخيرو ولمن سالنا حجه سعدية قالت البنبر ده فاضى من زماااااااااان مما الجماعه الاسى ديل مسكو البص وكل مره بيقولو حاج عثمان جاى حاج عثمان جاى وبيدفعو حق البنبر والمشاريب بتاعة الكماسره الكانو معاهو كلهم ولى يوم الليله ما جا !!!!
    اها فى قعدتم ديك قام السواق والكمسارى الاسى ديل اجتمعوا وقالو النقه المن بنابر سعدية دى كترت وقامو حرشو ناس النظام العام !! جو علمو كشه وشالو بنابر سعدية وكتبو سعدية تعهد انو اى زول يقعد ماسك خشمو تكبى ليهو شاى اى زول يتكلم فى البص ده تورينا طوالى !!!!
    اها سعدية مسكينه بقت تنبه الزبائن انو ما يتكلمو فى موضوع البص لمن يجو يشربو الشاى لانو بيخربو بيتا …
    ونواصل …………………

  10. aflaiga كتب:

    نواااصل ..
    فى مققعد بعيد من بنابر سعدية كان يجلس عمك تعبان السواق القديم الذى منذ ان تم شراء البص من مارينو الخواجه ومافى زول اداهو يسوق برغم انو سواق قديييم .. اها قام عمك تعبان شال رخصتو ومشى عمما وسواها دوليه ومشى لى مارينو سيد البص القديم واشتكى ليهو قام مارينو قال ليهو :
    شوف تعبان بص دا حلو حلا انا عارفو كويس وناس ديل ما بيدوك فرقه تيسوق براك بى برازرى وبرازرك !! شوف تمشى تفك الفرامل وتدفق مسامير فى سكة البص كل يوم وتكب سكر فى اللديتر وتقد الضبه وتعمل مشاكل مع الكمسارى لمن يدوك تسوق …. اها من اليوم داك عمك تعبان اى سواق يمسك البص ده بيقوم ليك عليهو معاكسه ومشاكل لمن جا السواق الاسى ده وقعد مع عمك تعبان فى الواطه وحلو المشكله وادو عمك تعبان الكراسى الاماميه ومره مره بيمكسوهو الدركسون لكن فى الشارع الرئيسى !! ممكن يقدم البص فى الفرده او يوديهو الطرمبه يكب جاز لكن يسوق ركاب ما بيدوهو كلو كلو !!! اها عمك تعبان عجبو مشوار الطرمبه شديد وبالذات لمن يفول التنك جاز لانو بقى يصر انو الفرد والمشاوير الما بيسوق فيها يشيل الجاز باعا وبقى عندو جركانه خاصه بيهو بيكبو ليهو جازو فيها براهو انشاء الله يمشى يبيعو لى ناس الافران مش جازو واى زول بى جازو !!!؟؟؟؟؟
    ونواصل …………………….

  11. aflaiga كتب:

    نواصل :
    اها بالرغم من انو عمك جورج سيد البص الزمان هو الاجبر عمك تعبان والسواقين الاسى اللى دعونا نسميهم ترحيلات الهدى الاسلاميه زى ما بيحبو هما .. الا انو مره مره عمك تعبان بتقوم عليهو ديمقراطيتو وشوية حريات كده يغلغل ليك بيها ناس الهدى الاسلاميه ديل لكين هم مفتحين شديد بيقومو طوالى يدوهو ليك جركانتين تلاته ذياده فوق حقو يقوم عمك تعبان يعمل نايم مع انو شكلو زول مفتح ما النوع البيتزبل بالساهل لكن شكلو عندو راى نايم فوقو !!!!
    اها نرجع للجماعه فى الموقف القديم القاعدين جنب حجه سعدية :
    فى بنبر بعيييد كان قاعد عمك ادم السواق وعمك ادم ده راجل سواق حريف من بدرى صاح هو ما ساق البص ده براهو لكن مره مره فى زمن شيخ عثمان ومحمد الامام كان بيدوهو يسوق بعدين هو تحت تحت كده قالو اهلو بيحبو ناس حاج الامام وكل ما يشحن فرده لى بلد ناس ادم كانو بيشيلو البص ده شيل من الواطه من كتره التقدير … اها عمك ادم السواق عندو ولدو مع ناس الهدى الاسلاميه ديل غاشنو ليك مره مره بيدوهو يسوق معاهم اها ولد عمك ادم ده مره زهج ونقنق مع ناس الهدى ديل وهددم بانو يورى الركاب انو باقى قروش الفكه بتاعة التذكره بتمشى وين ؟؟؟ وطبعا ناس الهدى ديل اى شيئ ولا تهبشم فى التذكره لانو من هبشم فى تذكرتم وكانما هبشم فى عقيدتم ولا الاتنين واحد ما عارف !! غايتو بيحبو التذاكر وباقى الفكه زى حبهم لى هداهم !!!! المهم عمك ادم قام كده ودقش ليك الشارع وعمم الرخصه بتاعتو وبقاها دوليه برضو ومشى لى عمك جورج ود سيد البص القديم وبرضو اداهو ليك الوصفه السحريه بتاعة عمك تعبان وبدا فى المشاكل مع ناس الهدى لدرجة انو فى يوم زى الايامات دى فى شهر خمسه يوم جا ناطى ليهم جوه البص وقرب يستلم الدركسون الا ربك قدر وما تمت مع انو السواق والكمسارى بتاعين الهدى قالو للركاب انهم عارفين الحركه دى لكن كانو قايلين ناس عمك ادم حيجو بى باب النسوان قامو جو بباب السواق !!!!
    ونواصل …………………….

  12. حاج أحمد السلاوى كتب:

    الثنائى الخطير ..افليقا ..وطارق أب احمد ..
    إنتو عاوزين الجد ..ولاّ ابن عمو …؟أنا بقول زى ما قال سعد زغلول للحاجة صفيةوهو على فراش المرض …ما فيش فايدة …
    السواق ياهو السواق ..والكماسرة بقوا كُتاااااااار وكل واحد عاوز يغير خط مسار البص المكركب..التعبان
    وحكايتكم دى ذكرتنى طرفة عن أخوننا الصعايدة السته( يعنى عددهم 6 ) اللى اشتروا عربية بيجو ..وكوووولهم ما بيعرفوا يسوقوا عربية ..قامو استاجروا سواق وشغلوا العربية أجرة ( تاكسى ) خط القاهرة … إسكندرية ..وعشان ما كانو مستامنين السواق فى الدخل بتاع العربية بقوا كوووولهم راكبين معاهو طالعين ونازلين بين القاهرة والإسكندرية ..بعد فترة لاحظوا إنو ما دخل أو إيراد من العربية.. لأنو ما فى زول غيرهم بيركب العربية قاموا إتصلوا على خالهم ( الصعيدى ) بيدرس وبيعمل فى دكتوراه فى امريكا وحكوا ليهو الموضوع من طقطق لسلامو عليكوم عشان يديهم العقاد النافع ويحل المشكلة.. الخال العزيز قال ليهم : غيروا السواق …
    أها حسه إنتو أكان غيرتو السواق المشكلة اللتكم دى حتنحله …؟؟ غايتو شوفوا كان عندكم خال ..ولاّ عم خارج أمازونيا يساعدكم ..لكين أنا غايتو شايف إنو مافى فايدة ..وشوفوا آخرتا برااااااااكم .

  13. aflaiga كتب:

    نواصل :
    نمشى نشوف عمك جورج سيد البص القديم …
    مما عمك جورج ساب البص اسيادو وهو عينو على البص ده اصلو ما شالو من راسو وفهمو هو واهلو انو البص ده اكبر من امكانيات اسيادو ومفروض يتخت فى الموقف تحت رعاية جمعية البصات السفرية !! وانو البص بيورد ايرادات خيالية لو لقى ليهو سواق تمام عشان كده مما مرق شغال انو ما يجى سواق تمام للبص ده كلو كلو واى سواق تمام يظهر يعمل ليهو مشاكل يكرهو ليك السواقه ذاتو !! هو من ناحية عمك جورج عندو حق لانو بعد مرات فى سواقين بيجو الموقف بصهم وسخان ودخانو فى السما يقوم يزعج ناس الموقف كلهم وبعد مرات يركب فى البص ناس عندهم مشاكل كتيره وكبيره مع جورج وحالو كم مره يحرقو بصت جورج فى اى موقف فى العالم !!! اها ناس الهدى ديل اول ايم لمن مسكو البص ركبو ليك اى زول عندو مشكله مع ناس جورج ورفعو ليك فى البص شعارات خطيره جدا وكتبو فيهو بى ورا ( الممشينا غير الله الليجى يبطلنا ) !! اها الكلام ده ازعج جورج جدا جدا وبقى يشيل ويليس ليك ليهم مخالفات مره انتو ما بتهتمو بالركاب ومره بصكم دخان عادمو كتير !! ومره الركاب الورا اتخنقو من الدخان وماتو موت جماعى !! ومره المديح صوت وعالى ازعج الركاب !! لمن فى النهاية ناس عمك ادم اتهمو السواق عديييل بانو ساهم فى انو الركاب الورا فى الناحية الغربيه ماتو مخنوقين بسبب انو السواق قفل الشبابيك والكمسارى وصل العام جوه العربيه !!! غايتو ناس لجنة البصات السفريه قالو السواق ده مذنب وقاصد وطلعو ليهو امر قبض ادوهو لى ناس امن انقل العام والبترول عشان ينفذوهو !!!
    ونواصل ………..

  14. aflaiga كتب:

    السلاوى : شكرا على المرور الراقى …
    فى اتصال هاتفى قبل قليل مع ود عمتنا الفى امريكا قال بالنص :
    غيرو البص ده وتعالو اركبو معانا ولا تكونو من الظالمين !!!
    اها رايك شنو نمشى ولا ناكل باسطه ؟؟؟

  15. aflaiga كتب:

    نواصل :
    نرجع الموقف ونشوف حجه سعدية وزباينا السواقين القدام :
    فجاه يوم كده البنبر بتاع حاج عثمان جا واحد نسجو ليك من جديد وضرب كرعين البنبر بوهية وقالو حاج عثمان جاى .. اها سعدية ادتا ليك زغردوته طوييييله قامت بتها كلتوم سالتا : يما مالك يعنى حاج عثمان حيحلها ؟؟؟ سعدية قالت ليها : يا بتى ناس حاج عثمان ديل زمان فى زمننا كانو بى فاتحه واحده بيحلو اى شيئ !! اقعدى فى واطاتك دى وانتظرى !!! ومرت الايام وفى يوم من الايام تفاجا الناس فى الموقف بانو حاج عثمان جا بى عبايتو المهيبه الزمان ديك لكن فجاة جا ماشى جنبو الكمسارى بتاع البص بتاع الهدى وهتف فى الناس ( عايد عايد حاج عثمان وانا ذتى بحبو وبحب البحبو ) !!! واغمى على سعدية وبتها واندفق البراد بتاع الشاى !!! وقبل ان تفارق كلتوم الوعى صاحت ( فاتحة شنو يمه والله دى قافله جنس قفله !!! ) …
    ونواصل ………….

  16. aflaiga كتب:

    نواصل : يا شباب سيل المواصله لا يمنع من التعليقات …
    نرجع لى ناس الهدى الاسلاميه وكان عندهم اجتماع فى البص :
    السواق : اها يا شيوخ عمك تعبان السواق وجبناهو ركبناهو الماسوره عفوا البص !! وعمك ادم وولدو شغالين معاهم فى الموقف بتاع الحافلات وعمك جورج الايامات دى فاصل معانا وعمك حاج عثمان احتويناهو مؤقتا اها المشاكل شنو ؟؟؟
    الكمسارى : والله يا ريس القصه كلها الايامات دى فى شيخنا الكبير الكان بيدبنا تصديق الخط ويورينا نتخارج من الحملات كيف ؟؟؟
    السواق : مالو كمان مش قلتو شيلوهو شلناهو من رمضان الفاااااات داك ؟؟ تانى منظرو شنو ؟؟؟
    الكمسارى : والله يا ريس محل ما يمشى واى موقف يخشو كان موقف اسلامى يشبك ليك الناس البص حاد عن طريقو وما عادت القيم هى القيم واصبحت القصه قصة سواقه بس ولم تعد لله !!! وكان موقف سياحى يشبكم ليك : كنا نرجو ان نسخر الهدى الاسلامية كما خططنا لها فى خدمة الموقف العالمى لكن بعضنا سخرها لهدم السلم الموقفى !!! ومره يقول ليك ركوب البص بالشباك حلال مع انو راى الشرع واضح انو اتو البصات من حيث امركم جورج !!!!
    السواق : شوفو فى بوليس فى الموقف ده ولا مافى ؟؟ طوالى نزلوهو من اى بص ماشى اى موقف تانى ولو اظطر الامر اقفلوهو فى التبلون بتاع بصنا ده وما يطلع تانى كلو كلو شنو يعنى هو جوه ووب بره ووب ؟؟؟
    ونواصل ………….

  17. aflaiga كتب:

    نواصل :
    اها الاجتماع بتاع ناس الهدى خلص لى انو مافى سبيل غير انو ندى الركاب ديل فرصه يختارو سواقم براهم واللى هو بالتاكيد نحنا حسب تقارير الكماسره الفى الابواب كلها ولا التقارير دى ملفقه ساى ؟؟؟
    الكمسارى : ابدا يا ريس بصنا ده وعاء جامع وحقق للركاب ما لم يكونو يحلمو به انحنا جاهزين والانتخابات دى لعبتنا !!!
    السواق : على بركة الله انتخابات انتخابات تانى فى زول يفتح خشمو !!!
    وفى الموقف بتاع المواصلات كانت سعدية قد فاقت من اغماءاتها لتجد انو البنبر فاضى وحاج عثمان جا سلم على ناس الموقف ورجع البيت عندو ارتباطات مهمه ومقابلات كتيره وبرنامج ( سو بزى ) !! قامت سعدية سالت حاتم عرفان : انت يا حاتم الحصل شنو ؟؟ فرد حاتم : شوفى يا سعدية نحنا فى الموقف الجديد الشغالين فيهو لا مكان للقوى القديمه والسواقين القدام نحنا عاوزين ناسس الموقف ده على روح جديده قوامها احترام البص والبصات الاخرى ومعركتنا مع ناس الهدى مستمره .. قامت سعدية قالت ليهو : انت يا حاتم مش اول امبارح الكماسره ديل قالو انت قلت البنات البيبعن ام جنقر القبضوهن يومتا ما مفروض يجلدوهن ؟؟؟؟؟
    ونواصل …………………

  18. aflaiga كتب:

    نواصل :
    اها حاتم عرفان قال لى سعدية : شوفى يا سعدية وراء كل امراه مخطئة ظرف قاهر او حكم ظالم او رجل متنصل عن مسئولياته .. انا لم ادع الى الغاء الحدود لكنى اعتقد انو الحدود لها ظروف للتطبيق .. وقبل ان يكمل حاتم كلامه جات كشه وقامت سعدية شالت كانونا وشتتت !!!
    نرجع لى ناس جورج الكان عندهم اجتماع برضو بخصوص البص الحير الناس ده :
    جورج : ايه اخر المعلومات عن البص المخستك ده ؟؟
    وليام : حقيقة انا احسب انو البص ده محتاج لفرصه جديده واحنا قعدنا مع اخواننا !! فى الخرطوم وقالو لينا انهم ما عندعم اى نوايا عدائية ضدنا بل بالعكس هم يشاطروننا نفس الاحلام بعالم سعيد وبالعكس هم يعملون بجد نحو تحقيق هذا العالم ..
    جورج : وليام انت بقيت جبهجى ولا شنو ؟؟؟
    ونواصل ………….

  19. aflaiga كتب:

    نواصل :
    فى مكان اخر كانت هناك خيمه بعيده فى طرف الموقف بها عقلاء الموقف جلسوا يتباحثون حول موضوع البص ده وخرجو بالاتى :
    * هذا البص هو سبب لكل المشاكل بسبب ما فيه من مميزات وما يورده من ايرادات خياليه وما به من مقاعد اى نعم تنجيدا تعبان لكنها مقاعد كبيره ومريحه وبتشيل كل الركاب .
    عليه قرر عقلاء الخيمه الاتى :
    يلا يا شباب لحدة هنا السرد وقف اتخيلو نفسكم محل عقلاء الخيمه وورونا قررتو شنو ؟؟؟؟
    وما حنواصل ……..

  20. نيام كتب:

    افليقا / اب احمد:
    هسع البسوق لينا منو و لا سواقتو كيف دي بقت مشكلة زمن …الكلام الطقش اضاني انو الباص زاتو مرهون و عليه ديون كتيرة خلاس..هسع في غيار الضفيرة الاخراني دا قال ليك جابو فني كهربجي ضفائر بالشئ الفلاني و قال الضفيرة القديمة كووووولها يشيلها برة و لانو فيها شعر مستعار و لازم الجرسي كوووولو يكون الاصلي..ولمان وافقوا ليهو قال كمان يغير المقنيتة و الخترات و في احتمال سبائك..غايتو الشمطة لمان كترت قالوا يصلحوا الباص القديم و يرقعوهو و يعملوا ليهو مرمة ويعلوا البودي و يعملوا ليهو ابواب جديدة و غايتو البارح وافقوا علي الفاتورة النوهائية المفروض يدفعها محمد احمد مع الفاتورة القديمة..ومحمد احمد قال ماداير باصات بمشي كداري لكن ما في زول سمعو ليهو..

  21. aflaiga كتب:

    ما بندقر ما نواصل ..
    ود الخلا ثرو نيام : شكرا على المرور الراقى …
    ود الخلا : قصة الحجاب الحاجز دى باقليك بتعفى السواق من المسئوليه ؟؟
    قالو ليك الخلق الصنع البص ما بيقبل اى كلام زى ده وكلامو واضح : فى غلط معناتا يا انت عارف وذنبك كبير يا انت ما عارف وذنبك ذنبين الاول انك ما عارف والتانى انو فى غلط !!! شفت الخلق الصنع البص ده عادل كيف ؟؟ وما بيقبل اى لعب فى بصاتو ولا ركابو ؟؟
    نيام : اها يعنى البطارية ال10 امبير الجديده دى طلعت فايره عين !! انحنا قايلينها ادوها عين !!! يعنى القصه مافى الضفيره القصه فى البطاريه ذاتا ؟؟؟ اها لو وديناها البنشر وغيرنا ليها العين البايظه ما بينفع ولا دى عين رئيسية ؟؟؟ اسى عليك الله القروش الاشترو بيها البطاريه ال 120 امبير دى مش كانت زبطت البطاريه ال 50 امبير ؟؟ انت ال 120 دى انكو ولا ساريا ؟؟؟ بتكون اسريا لانو حاجات ساريا كلها بالشكل ده !!! الا الهلال !!!!

  22. aflaiga كتب:

    شباب : فقه التغيير من اجل الغيير .
    لو صدق كلام نيام فهذا يؤكد اننا قد اصبحنا اسرى لفقه التغيير من اجل التغيير دون اعتبار او تقدير لاى معايير !!!
    وهو فقه قديم بدا مع الاسلاميين منذ معركة الجمل وتشيع البعض وتسنن الاخر ومنذ ان خرجت جماعات التكفير والهجره والبلاغ والدعوه والتصوف والسلفيه من رحم الاسلام فصار كلهم يغير من اجل التغيير مع ان كل الامر مختصر فى 114 سوره وعدد من الاحاديث الشارحه الصحيحه !!!
    فى لعم النفس حين ترتفع الانا لتعلو فوق الجماعه يمكن للانا فى اطار انانيتها المطلقه ان تشرع لنفسها قوانين وفتاوى وفقها يجعل ما سواها باطل وهى حق ويجعل راى الانا صواب يحتمل ولا يحتمل احيانا الخطا وراى الغير بالتاكيد خطا وخطل من عمل الشيطان !!!
    بنفس هذه العقليه قفزت جماعة الاسلام السياسى السودانى الى السلطه دون مراعاة لطبيعة وظروف شعبنا ذو الذاكره المتقده والنفسالابيه الشريفه العفيفه . وارتضى بعض العسكر ممن اطالو اللحى ورخو القاشات ان يكونو اداة بيد هذه الجماعات فاخرجو لنا هذه الخلطه السحريه التى ما زلنا نرزح تحت وطاة تفكيرها العقيم الذى يظنو عبره انهم خادعو كل الناس لكل الوقت وما علمو انك يمكن ان تخدع كل الناس لبعض الوقت او كل الناس لبعض الوقت اما كل الناس لكل الوقت فذلك المحال ودونكم مكر بن التابعى حين خلع صاحب ذاك ونصب صاحبه ظانا انها نهاية المكر وما كان يدرى انها بداية الفتنه التى نجنى ثمارها الى يومنا هذا … قومو الى باصاتكم يرحمكم الله .

  23. نيام كتب:

    ودالخلا:
    انت السر في انو سواقننا طوالي عندهم التهاب الحجاب الحاجز دا شنو يا ربي؟؟
    افليقا:
    “بتكون اسريا لانو حاجات ساريا كلها بالشكل ده !!! الا الهلال !!!!”..دي بجاوبك عليها الساعة تسعة ونص!!!

  24. aflaiga كتب:

    نيام : الهلال ما بيقيموهو بى تسعه ونص الهلال كل تسعه وكل نص حقو ..

  25. aflaiga كتب:

    شباب : قلنا ما حنواصل لكن فى حته مهمه :
    نعود بالمشهد الى موقف الموصلات :
    فى يوم الصباح الناس جات تركب البص لقت لافته كبيره مكتوب عليها ( بكره الركوب مجان ) وبقو كل ما يسالو عن بكره يقولو ليهم بكره ماقلنا بكره !! ) والغريبه البص ده متفننين فى الكشب بتاعو تفنن شديد خلاس وفيهو مئات بل الاف اللافتات والزينات الحضاريه :
    يعنى تجى تقعد جنب الحريم تلقى لافته ملصقه مكتوب فيها ( ما اجتمع راكب وراكبه فى مقعد الا وكان الشيطان ثالثهما ) ولافته تانيه مكتوب فيها ( عزيزى الراكب المقاعد الخلفيه لخلوة الركاب بعد دفع الرسوم !! ) وتجى تشغل المكيف تلقى لافته مكتوب فيها ( المكيف معطل اصبرو وصابرو ورابطو وابشرو بالهمبريب الذى به توعدون ) وتلقى فى لافته تانيه مكتوب فيها ( لاغراض التكييف التجارى راجع المقاعد الخلفيه ..
    ونواصل …

  26. نيام كتب:

    ودالخلا:
    أي نعم..” أن الله لا يغير ما بقوم حتي يغيروا ما بأنفسهم..” لكن كمان قال ص: “… كلكم راع وكلكم مسؤول عن رعيته، فالإمام راع وهو مسؤول عن رعيته…” (متفق عليه).
    افليقا:
    اهم يافطة مكتوب عليها “لا تتحدث مع السائق”..لمان محمد احمد المسكين قراها انكتم و خاف يشغل السائق من شغلوا ..لكن محمد احمد مازال مستغرش انو السائق دا طوالي بتحدث و يعرض و يبشر و البص ماشي..السائق دا بسوق متين ياربي..

  27. طارق أب أحمد كتب:

    ود الخلا سلامات

    ((بتصدق السواق دا سأل قبل كم يوم كدة واحد عن مشكلة الكهربة بتاعت البص وقال ليهو (أنت الكهربة دي مالا الحاصل فيها شنو؟؟؟؟؟؟))

    أها هل ممكن تصدق أنو قبل فتره كان قاعد فى فراش بكا و قام سأل الناس ___ أنتو الدولار عامل كم اليومين ديل ؟___

    بس معقول السواق البحدد قيمة التذكره ما عارفا بى كم

  28. aflaiga كتب:

    نواصل :
    فى عوده سريعه الى موقف المواصلات :
    اجتمع كل السواقين القدام وتباحثو حول مسيرة البص مما نزلو منو وكانت اراءهم :
    * حاج الامام قال : يا جماعه البص ده انا لمن كنت سايقو صح كنت بتكلم مع الركاب كتير لانو كنت قايل انو الحوار والكلام وترك الفرصه للركاب للحديث هو افضل وسيله لجعل البص مريحا واكتشفت انو الركاب ديل ما بنفع معاهم غير واحد يجى متلب يمسك الدركسون ويسكتم كلو كلو ويتكلم هو بس !! وانا من هنا بقول انو عندى خارطة طريق لاعادة البص لمسارو الصحيح عبر التصالح بين كافة الفئات الممتطية للبص وصهر كل رؤانا فى بوتقه واحده عبر مؤتمر جامع يحدد للسواقين والركاب طريق الخلاص الوطنى .
    * حاج عثمان قال : انا جيتى الجايه من بره حاكون حددت ملامح خطتى للحل ..
    هنا قفزت حاجه سعدية : عليك الله يا حاج تانى ما تمرق وكان مرقت شيل بنبرك ده معاك !!!
    * حاتم عرفان قال : نحن سنعمل من داخل المريسه المشتركه مع الزعيم تعبان على تحويل مسار البص لتلبية جميع متطلبات الركاب وحنروج لمفهوم البص الجديد الفيهو الحريات واى زول يختار الكرسى اللبيقعد فيهو والشريط البيسمعو والمحطه النازل فيها ..
    * الزعيم تعبان قال : شوفو والله انا مما اتفقت مع ناس الهدى الاسلامية وادونى نسبة مشاركة فى البص ده وريتم انو اى حركات ما تمام انا بشيل كراسيى وبشوف لى مكنه وكبوت واربطم وادور بصى براى !! لكن فى الاصل انا زول وحدوى مع انو البص لكل الركاب دون تقسيم .. انتو كسواقين قدام اجتهدوا فى نيل حقوقكم ونحنا مع سيد جورج بنساعدكم .
    * من نصف الاجتماع خرج الاستاذ سحلية المحامى ( الغواصه الخطير ) واكد وامن على حديث الجميع واشار الى ان الانتخابات هى الطريق الوحيد للعملية السلمية وتداول السواقه بين السواقين وهتف :
    بص قديم اوييى .. بص جديد اوييى …
    وقرب يدقس يقول تكبيييير ..

  29. طارق أب أحمد كتب:

    أفليقا
    ولاى ياخى أنتو ناس عجيبين
    واقفين تحننوا راكبين تجننوا

    السواق دا يسوى معاكم شنو أنتو ناس توعد و تنسى

    زمان سيد الباص أتفق معاه أنو ياكل من العربيه و ليهو التلت بعد داك قام السواق حسب فهمو أكل بى التلتين ما حسب الأتفاق أن هو يفطر و يتغدى و يتعشى هو و كمساريهو فى أحسن مطعم وأستلم التلت الفضل لأنو تلتو و مشى يشحت و يدين حق الجاز لى باكر

  30. aflaiga كتب:

    اب احمد : مافى راجل يقول للسواق ده قرش العربيه دى عاوزين نبيعا ؟؟؟

    • البشاوى كتب:

      افليقا
      البص تبيع
      يااخوانا سواقنا زينة وحالف مايدلينا سواقنا دة سواقتو سواقة خلا ساكت ماعندو فكرة انو السواقة دى فن وذوق وبرضو ماعارف انو الناس كلهم شركاء فى الطريق يعنى قواعد المرور دى خاتنها لى منو لو اى سواق يدوس ابنص الف ويدوس فرامل الف ياخى الركاب ديل رقابهم اتفقهت عديل
      كدة وبالجد كدة يانغير السواق ولا نغير البص لانو القصة دى بقت ماليها اخر
      واهو عندك كم واحد غيرو البص وبيبصو لينا كل سنة ولا سنتين والحال لايسرهم يقوموا يرجعو لى بصهم الجديد وقصة التهاب الحجاب الحاجز دى مامن السواق زاتو معقولة يكون عرف قصة ضفيرة البص من الجرايد ليه هو سواق ولا كومسنجى

  31. عزت بقا ريتش كتب:

    أفليقا و زواره سلام

    أمبارح في مؤتمر ناس التحالف كان في واحد لابس شعار حركة جديدة اسمها (حركة تغيير السودان)….

    يا ربي دايرين يغيروا لي دولة أوربية………………… و يلجنوا لينا البص دا بي سواقو يكون مية مية

  32. aflaiga كتب:

    عزت : القوى الحديثه دى هى العليها الرك لو سلمت من امراض الحزبيه والاختراق الحكومى .. لانو سمعت قبل كده فى مؤتمر بتاع حركه عاوزه تغير السودان بردو !! انو الزول المنظم المؤتمر قال لى الزعيم بتاع الحزب :
    الاول : تعرف يا زعيم ميزانية المؤتمر ده اعلننا فى الجرايد انو عاوزين تمويل قام زولنا المع الحكومه نصح الحكومه بانو تمولنا بدل ما يمولنا اجنبى ويغير اجندتنا !!! وطبعا ناسك ديل خايفين على الاجندات خوف شديد !! قامو دفعو كل تكاليف المؤتمر …
    الزعيم : برافو عليك ده شغل متقدم جدا بالله اشكرو لينا ووريهو انو الزعيم لحدى الان ماشى كدارى وعندو عروض من كم جهه غربيه يدوهو عربيه !!!!
    اها شفت كيف يا عزت ؟؟؟
    رايت الناس قد مالو الى من عنده المال
    ومن لا عنده المال فعنه الناس قد مالو
    رايت الناس قد ذهبو الى من عنده الذهب
    ومن لا عنده الذهب فعنه الناس قد ذهبوا
    رايت الناس بتصّوت الى من قاعد يقّوت
    ومن لا يقدر يقّوت فليهو الناس بتفّوت !!!!
    رايت الناس قد دخلو الى من عنده النخل
    ومن لا عنده النخل عليه الناس قد بخلو
    رايت الناس مرتاحه الى من يملك الراحه
    ومن لا عنده الراحه اتخارج منو بالراحه !!!
    رايت الناس صفوف بالدور امام من عنده البترول
    ومن لا عندو البترول فعنه الناس سوف تزول
    رايت الناس متلمين على من كيسه سمين
    ومن لا كيسه سمين فعنه الناس طناش داقين !!
    عزيز انت يا وطنى
    برغم قساوة الزمن
    برغم صعوبة المشوار
    ورغم ضراوة الاقدار
    فى الختام احذر غضبة الجائع وثورة المذلول …..
    ورحلة سعيده بالبص القديم حتى نزول البص الجديد للموقف ….

  33. Nourlight كتب:

    افليقا…
    ابتداءاً من اسمك انا لسا ما فاهمة قصتك…

    لكن طبيعة المواضيع التي تطرحها توحي بغضب جدّي يعتمل داخلك…
    غضب “غير متهور” وليس غضب شخص مشكلجي وانما غضب مسالم وطيب الي حد…غضب حذر لكنه ليس حكيم و ذو مقدرات لا محدودة…متململ وغير ميّال لانتهاج الحلول الوسطية…

    قد تسألني عن علاقة تعليقي بالموضوع …لكني كما ذكرت في مكان آخر في المدونة انه كنت قد خرجت للتو من معركة امتحانات…وتفرغت “علي ما يبدو” فبدات اتأمل الكاتب والمكتوب قبل الرد…

    في السودان…لماذا “كما قال فيصل القاسم” تتحول الاماكن الي اراضي اجتماعية؟ مثلاً مكان العمل الي ملتقي جامع للاصدقاء و رفيق العمل يكون اعز الاصدقاء في غالب الاحوال…وتتحول الخدمات نفسها الي نشاط اجتماعي…كقيادة الركشات والبصات و غيرها من “الاجسام المتحركة” و الدكان الي منتدي لاهل الحي حتي كاد صاحب الدكان ان يكون شيخ الحارة!!!

  34. حاج أحمد السلاوى كتب:

    أخونا ودالخلا …ثرو الدينمو أفليقا..
    لكين نان لمتين الناس الراكبين ورا ديل يقعدوا فى الكنبات المكسرة لحد ما عينهم طلعت..والناس الراكبين قدام جنب السواق مرتاحين ومرطبين كمان..كلامك ده يوحى كده بأنك زى الراكب جنب السواق ( مع إنى شايف غير كده ) ..ناس ورا ما خلاص قالوا الروب..والروب زاااااتو قال الروب ( الروب دى يمكن ناس قروب سى ما يعرفوها …لكين اكيد فى واحد إسمو النجم سهيل بيكون عارفه ..اشرحها ليهم يا سهيل ) والمسالة طالت ومِسخت..
    أنا عندى سؤال سغيرووووونى كده..ليه ياجماعة يسوق لينا سواق واحد عشرييييييييين سنة.؟؟؟ السواقة دى مش عايزة لياقة وقوة بِنية عشان المطبات والحفر الكتيييييرة الفى الشوارع..ليه فى سواقين بينزلوهم المعاش عشان خلاص يريحوا ويرتاحو ..الدركسون ده أظنو فيهو جاذبية عجيبة البيمسك فيهو تانى ما بيديهو بـأخوى وأخوك..غايتو أنا مع نصيحة خال الإخوة الصعايدة القال ليهم غيرو السواق…بس كمان لازم الإخوة الصعايدة ينزلوا من العربية عشان العربية تجيب دخل يومى يساعد فى حق القفة البقت ما جايبه حقها..
    -الأخت نور لايت .. يبدو إنك غايبة مدة طويلة من أمازونيا العظمى الماشة ببركة الغلابة والناس المساكين ..عشان كده قصة بص ولدناالدينمو أفليقا الرمزية دى ما وقعت ليك..كدى مرة حاولى أركبى البص ده .. إن شاء الله محطة واااااحده عشان تعرفى الحاصل شنو..وتسمعى كلام الركاب ( القاعدين فى المقاعد الخلفية …بس ) وبعد داك أحكمى بنفسك عن حالة البص وقيمى السواق والكماسرة الكُتاااااااار الراكبين مع السواق والواقفين فى موقف البصات وينادو …الكلاكلة…الدروشاب ..جبره ..الديم ..أوع أكون لخبطِك أكتر ؟
    ولدنا أفليقا ..بصراحة وبالجد… الجد.. الجد الماليهو حد ..سواقتك عجبتنى بالحيل..ويا ريت نديك فرصة تسوق البص ..وأنا وكل الركاب الراكبين معانا ديل متأكدين إنك ممكن توصلنا لأقرب محطة (إن شاء الله الكدرو … ) بأمان تام..
    نحنا زماااان شن قلنا..الفكى الكارب بيخلف خلفاء كاربين زييو..وأخليك تواصل ..وربنا يخليك لحمودى وسروية….وأم المؤمنين.

  35. aflaiga كتب:

    شباب : يوم جديد فى السكه الطوييييييييييييييله . وحبابكم نتمنى لكم رحله سعيده اليوم .
    نور لايت : نبدا ليك من وييييييييييييين :
    * افليقا اسم الاسره بالعربى وبالرطانه ( افليقنجى ) المسوبون لافليقا الجد النوبى الكبير .
    * اما قصتى فهى قصه شبيهه باى قصه فى اى لفه او زقاق او حاره قصة بلد يشرئب بعنقه للتحرر من ظلم ذوى القربى .
    * اما الغضب فهو نتاج طبيعى لاختلال الطبيعيات المفترضه بدءا من صحية الصباح مرورا بقفة الملاح وحتى نداء حى الفلاح .
    * اما السلام فهو صفة غالب اهل البلد كقوتهم .
    * اما الحلول الوسطية فهى التى اوصلتنا لهذا الحال نحاول من خلال هذا النفاج توضيح ان الجسد السودانى قد ارتفعت به نسبة الفاليوم فى الدم ويحتاج لجراحه عاجله .
    * اما بصنا ده فهو بص عجيب ندعوك لركوبه ولو لمشوار واحد بس وبعد داك نستنى البوست بتاعك عنو .
    ونواصل ….

  36. aflaiga كتب:

    نواصل :
    نرجع لحاتم عرفان السواق القديم وخليناهو بيتكلم مع سعدية قامت الكشه جات :
    قام حاتم من دربو مشى القسم طوالى عشان يشوف رقم البلاغ الفتحوهو لسعدية ويقوم ليها محامى واللازى منو لقى ليك فى باب القسم ناس راجينو عندهم بلاغ قديييييم !! قام طوالى كبر اللفه ومشى عمل مؤتمر صحفى اوضح فيهو انو اسلوب المقايضه البينتهجو السواق مع الركاب يشبه قصة طاقيتك وين وبدا فى السرد :
    يحكى ان قردا مسكينا كان يعيش فى الغابه وكان بالغابة نمر يهوى تعذيب القرد يوميا كالاتى :
    النمر : يا قرد طاقيتك وين ؟؟ ويقطع فيهو كف !!
    القرد : ساكت ويبكى ويتدق .
    وهكذا يوميا … فقام القرد مشى اشتكى لملك الغابه عن معاملة النمر ليهو .
    الاسد : يا ابو النمور ياخى انا نازل انتخابات فى الغابه والاساليب القمعيه دى بتطفش منى الناخبين فحاول غير معاملتك مع القرد ده !!!
    النمر : يا ابوها ده كلام شنو القرود كمان بقت تشتكينا ؟؟!! اسوى ليهو شنو يعنى ما قرد ولازم يتدق !!!
    الاسد : انا ما عندى مشكله وما قلنا حاجه قرد ولا زم يتدق بس شوف ليك حنك سنين ومقنع دقو بيهو .
    النمر : حنك كيف يعنى يا ابو الاسود ؟؟
    الاسد : يعنى ممكن تقول ليهو اطلع الشجره دى جيب لى موزه .. يجيب ليك خدرا اديهو كف قول ليهو جيب صفرا وكده يعنى !!
    فى تلك الاثناء كان القرد مختبئا يسمع الحوار …
    وفى اليوم التالى قابل النمر القرد ..
    النمر : يا قرد يا وهم اطلع الشجره دى جيب لى موزه ..
    القرد : صفرا ولا حمرا ؟؟؟
    النمر : طاقيتك وين .. وكف شديد للقرد …
    وفى ختام المؤتمر الصحفى اكد حاتم عرفان ان البص الجديد سيسع القرود بجانب النمور فى حرية وديمقراطية بدون اى موز ولا طواقى …………ز
    ونواصل ……….

  37. ماجد كتب:

    يعطيك العافية و كتبه في موازين حسناتك ..

    السواق هو حل مؤقت .. لا يعالج جذر المشكلة..
    ماجد

    مدونة لعيون لين..

  38. ياسين شمباتى كتب:

    ودقى يا مزيكا….

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s