أنا لا أعتقد

Posted: الثلاثاء,5 مايو, 2009 by عزت in اخرى

و أنا أعتقد أنو الموضوع دا اذا تناولناهو من النقطة التي أشار اليها (أخونا حسن) لوجدنا أن (يكرر كلام حسن) و يضيف اليه قليلا من البهار و بقدمه في طبق صيني موّرد و بالهنا و الشفا…. هذه اللقطة أكيد من اجتماع يجلس فيه المجتمعين على جوانب الطاولة الكبيرة و أمام كل أكوام الورق التي يراها البعض و ولأول و بأجندتها في ذلك الاجتماع و تراهم مشغولين بقزقزة الفول المدمس و البلح اذا كان الاجتماع بعد الثانية عشر و معط الدجاج و “الهوت دوق” اذا كان بعد التاسعة صباحا بقليل و في نخاع أي مسئول احساس عميق أن (الاجتماع) في حد ذاته عمل… و ليس أمرا للترتيب للعمل.. و ربما لذلك تغدق الكثير من الجهات على كل من يشارك برايه أو بحضوره أو الاثنين معا حتى و ان كان المدير (ذات نفسه) رغم أنه يجتمع في وقت الدولة التي اشترته منه يوم دفعت له مرتبه. و قد لا ينال من اضطلع بكتابة التقرير او اجراء الدراسة مكافأة نتيجة لجهده و لكنه ينال المكافأة مع المجتمعين اذا حضر معهم الاجتماع لمناقشة فكرته (زيو زيهم)…

 

قل أن يفهم المجتمعون أن فكرة الاجتماع ما هي الا للعصف الذهني و تلاقح الأفكار في موضوعا قد جهز له من قبل و ما عقد الاجتماع الا للتلاحقح الفكري المباشر الذي تنتج منه القرارات و لكن كيف يتم ذلك ان كان معظم المجتمعين لا يكونوا قد قرأوا الأجندة من قبل و كونوا فكرة عن الموضوع المزمع مناقشته فيلتقطون أطرافه في الاجتماع لذا يكون الاجتماع كمثل حلقات النقاش و بيوت البكا يلتقط هذا كلام ذلك و يضيف أو لا يضيف اليه شيئا و قد يعرج بالمجتمعين في موضوعا جانبيا يصعب معه الرجوع الى الموضوع الأصلي و العجب لو كان من النوع بتاعين (الحنك) و النكات…

 

و بين هذا و ذاك يقضي المجتمعون الساعات الطوال و يكون على السكرتيرة أن (تزحلق) الزوار بأن المدير في اجتماع… فهي لا تكذب فانه فعلا في مجمل وقته في اجتماع و الاستثناء ان لا يكون في اجتماع و يصبح منطقيا أن يتسائل البعض متى يعمل المدير اذا كان كل يومه و اسبوعه في اجتماع… لكن يا جماعة الخير لم لا يجتمع الناس في السودان اذا استطاع أن يحقق الموظف المجتمع ثلاث مرات في الاسبوع ثلاثمائة جنيه و فطور كارب بالشئ الفلاني و قهوة و شاي و (طراوة) فضلا عن رشق السكرتيرة بالنظرات عندما تحوم عليهم و توزع في الورق و الابتسامات و الظروف…

 

الواقع أن الأمر ليس فيه (سؤ نية) من المدير و لا السكرتيرة و لا الحضور فهو في (الأجتماع) ذات نفسوا لأننا لا نعرف كيف نجتمع…فلو حضّر للاجتماع تحضيرا جيدا و حضر الناس في الوقت المحدد للاجتماع و قفلوا (موبايلاتهم) ثم أدير الاجتماع بطريقة حازمة لما دام أي اجتماع أكثر من ربع ساعة…. و العاقبة عندكم في المسرات

d8a7d8acd8aad985d8a7d8b9d8a7d8aa1

m-bush

Advertisements
تعليقات
  1. بشار أحمد بشار (إبن برد) كتب:

    د/عزت سلام : أين لمديري الولاء من أهداف وأدبيات ومقاصد الإجتماعات وهم من عوام العوام ولم يخلقوا أساساً لتولي إدارة أمور الناس وحكاية الإجتماعات دي بيعملوها بس لزوم (القشرة) و (الأهميات) ومرات مرات (حاكونا حاكونا)…. بلا فقعة مرارة. هنالك مثل شرق أوربي يسخر من النظام الشيوعي وشغفه بالإجتماعات يقول:
    لمن تكون في صفيحة (قيروانة) بتكون ما في موية ولمن تكون في موية بتكون مافي صفيحة ولمن تكون في موية وفي صفيحة بيكون في اجتماع!!!!

  2. aflaiga كتب:

    عزت :اسى بالمناسبة دى مش نحنا محتاجين اجتماع للجمعيه ؟؟؟
    كنت قد ذكرت ان اول المستفيدين من اجتماعات الانقاذ منذ مجيئها هم اصحاب محلات الدجاج والماكولات الفاخره والعصاير وكنت قد سرحت بعيدا فى ان الانقاذ لو قدر لها ان تتوب من الاجتماعات فاول من سيتمرد على الحكومه هو الناس ديل !!!!
    صديقى ص عامل فى مصلحه حكومية شبه استثمارية وكان لديه مشكله لم تحل برغم عدد الاجتماعات الخرافى التى عقدها مديرو واركان حرب المنشاه وفى يوم من الايام قاعد قدام باب المدير وكان فى اجتماع مجلس ادارة وهو فى قمة زهجه دار الحوار التالى :
    عم حسن الفراش : يا ص عليك الله انا جيت متاخر ما عارف عدد الناس الجوه ديل كم وعاوز اجيب ليهم عصير عليك الله ما عارفم كم بالتقريب كده ؟؟؟
    ص : عليك الله دى دايره ليها تقريب بسيطه جدا ( شوف الجزم البره كم بتقدر تحدد عدد الجزم !! الجوه كم ؟؟؟؟ ) ……
    وجاييك ………….

  3. بشار أحمد بشار (إبن برد) كتب:

    أفليقا : (مليص) الجزم ده لزومو شنو ؟؟؟ يعني غاية (الغرقان) في الورع والتصوف حسب مقتضيات الحال وتمام (عدة الشغل)؟؟؟

  4. حاج أحمد السلاوى كتب:

    ولدنا الدينمو السيكوباتى أبو حمودى افليقا ..
    هو ده إجتماع ولاّ ذِكِر المملصين ليهو الجزم؟ .. ولاّ يمكن الجماعة خايفين يقوم واحد من المجتمعين يضرب المدير بالجزمة زى عملة ولدنا الزيدى مع سىء الذكر بوش ..عشان كده ملّصوا الجزم بره .

  5. طارق أب أحمد كتب:

    بسم الله نبدأ

    بعض المداخل

    اللهم صلى و سلم على نبينا الأمين
    انا أحسب
    أنا أؤمن على كلام الأخ
    فى الحته دى أنا شايف
    أضافتن لى كلام اللخو أحب أقول

    بأوولك أيه يا روح أمك
    نبلش نحشى (نبدأ نحكى)

  6. aflaiga كتب:

    بشار ثرو السلاوى : مليص الجزم ده من ناحية تاصيليه تفسيره :
    انو الارض كلها مسجد والشباب ديل صلايين خلاس ! فممكن يصلو فى اى حته وفى اى وقت عشان كده بيجو مقلعين !! جاهزين ..
    تعرفو عمكم ص ده لو لم الجزم البره بتاعة الجزم الجوه !! ومشى باعا مش كان حلا مشكلتو من بدرى ولا شنو ؟؟
    صديقى س وصديقته ع قررا فى احدى الجلسات فى حديقه مجانية الدخول ان يفترقا ودار الحوار التالى :
    س : اس يعنى يا ع ده قرار نهائى ؟؟؟
    ع : اى والله نهائى لكن مافى مانع نخضع القصه دى لمذيد من المشاورات ..
    واتفا على ان يجتمعا اسبوعيا فى فس المكان الذى بدا فيه حبهما فى التشكل لاخضاع الموضوع للنقاش …
    الغريبه س و ع لى يوم اليلى ( شفتو الليلى دى ؟!! ) بيتلاقو وبيجتمعو وما موصلو لقرار نوهائى !!!
    ربما عرفو ان الاجتماعات لا تحل اى مشكله وهما لا يرغبان فى الانفصال ويتمنيان ان تجعل الاجتماعات وحدتهما جاذبه !!!!
    يا جماعة الخير بالله وين كل من ( سنكل – ابكرون – مخير – ركس – محنك – ابو محمد – كنانى !! – سهيل – حنين – مشاكل ) وبقية العقد الفريد المنقطع عننا

  7. جايز يكونوا في اجتماع في حتة ما

    سلام يا أعزاء

    عارفين هسة أنا لي كمين سنة قاعدين يدعوني لاجتماعات و قاعد ادعي لاجتماعات أيضا…. لحد الليلة لم يبدأ اي من تلك الاجتماعات في مواعيده و بالطبع لم ينتهي في مواعيده أيضا…..

    مرة كنا مدعوين لاجتماع في وزارة مهمة و كان السيد الوكيل مفروض يجي الاجتماع… لمن تأخر شديد لوجود زوار أجانب معه ففتح للجماعة …. قال رئيس الاجتماع لمن تعدت الساعة العاشرة بقليل…

    احنا حقو نبدأ بالفطور لحد ما يجي…… !!

  8. aflaiga كتب:

    عزت : لكن كده ما بديتو بلب الاجتماع واهم بند فيهو ………

  9. yasso كتب:

    بس أنا عندي ملاحظة واحدة في الاجتماعات دي أكل البلح والفول طيب حانصدر كيف وبعدين طبعا بكونوا من الاجود سواء الفول أو البلح
    تحياتي

  10. سهيل كتب:

    سلام ..

    لكن ( العاقبه عندكم في المسرات ) دي بالغته فوقها عديييييييييل..

    نحن هنا يا افليقا .. نمره كامله عد..88-89-90-ميه

  11. محنك كتب:

    الدينمو افليقا يسال منك الخير
    د عزت ابوريتش والاخوة الاصدقاء
    سلام

    اليومين ديل بداية شهر وزنقة شغل بس يا افليقا وبندخل نطّلع . ومرّات بنعلق .
    الاجتماعات والمسيرات والاجتفالات دى لو وقفت اكيد التعليم والصحة احتمال يصّلحوا شوية

    والزراعة كمان

  12. aflaiga كتب:

    سهيل ثرو محنك : طيب ما تقولو قريبين اعملو اى حركه انشاء الله احم احم ..
    سهيل بمناسبة نمره كامله :
    واحد تعلمجى خواف جدا ويوم من الاياميم الطابور كان غيابو كتير جدا قام رفع التمام كالاتى :
    التعلمجى : تمام سعادتك القوه 200 موجود بالطابور 50 وعندك 10 مرض صباحى يبقو 199 وواحد غياب يبقو 200 ..!!!!
    الضابط كان تمتام وبيقطع قال ليهو :
    الضابط : دددددده شنو ددده ددديل كلهم ما تامين 100 وين الباقين يا تعلمجى ؟؟
    التعلمجى : ما صارفين وغايبين اجيبم ليك من البيت يعنى ؟؟؟!!!
    شباب : الاجتماعات مهمه جدا لاكمال دور ة العمل الادارى حسب علم الادارة وهى بالتاكيد احسن من مرحلة الشرعية الثورية بتاعة ايام رامبو وبالتاكيد ايام رامبو احسن برضو من الايامات دى على الاقل كان ورانا الكهرباء مشكلتا شنو ولو من باب ( انتو مالكم ومال الكهرباء مش فى هوا ؟؟ ) خلاص سكوت …

  13. البشاوى كتب:

    المرطب فى عز الصيف\ دوك عزت
    دايما باصاتك زى البرنس ضمان يجى منها قووون
    جماعتنا ديل الاجتماع عندهم هو نفسو شغل بدليل المقاولين الذين اغتنو ورطبو بى عطاءات تجهيز الاجتماعات بداية من الاستراتيجية الشنو مابعرفو داك ×100 الكانو بيعملوهم فى قاعة الصداقة مرورا بالمؤتمر العام للحزب
    مرة كنت فى مهمة عمل خارج المكتب لاحدى الشركات الخاصة السغنتوتة تبع الجماعة عدد العاملين فيها لايتجاوز العشرة بى المدير ومدراء الاقسام والسواقين والغفراء وكنت محتاج اقابل المدير لتكملة العمل انتظرت كثيرا والسكرتيرة غلتنى بالشاى والقهوة لانو سعادتو فى اجتماع — زعلت من القعدة الطويلة دفرت الباب ودخلت وجدت انو الاجتماع عبارة عن شمارات بينقلها نائب المدير عن زملاء عقيدة وكيف انهم بيحفرو للمدير عشان يمسكو محلو بدون ماأشعر قلت للمدير تعرف ياسعادتك لو خليت جنس الكلام دة وشفت شغلك ماشى كيف مافى راجل يقدر يسد محلك دة

  14. مشاكل كتب:

    سلامز

    حكى لي الوالد و هو أحد أعمدة ما كان يسمى ب ( ثورة الإنقاذ ) بعد ما سألتو عن سر تفرد الترابي بالقول الفاصل و انو كل الناس بتسمع رايو .. حتى الوقت داك علي عثمان و نافع و غيرهم ما كان عندهم رأي معاه .. قال لي انو الناس لمن تكون جاية لي اجتماع مافي واحد فيهم بيكون محضر كلامو او اوراقو او رأي في كل المجموعة الا ( شيخ حسن ) .. كل الجماعة كانو بيجو و ما عندهم فكرة كافية عن الموضوع المطروح للنقاش الا الترابي .. فكانو بيسمعو كلامو على اساس انو دارس الموضوع و فاهمو اكتر منهم ..

    معظم المجتمعين بيجو الاجتماعات و تفكيرهم في الظرف و الأكل عشان كدا ما عندنا حاجة بتتحل بي اجتماع .. اخير من البداية المدير يفصل في الموضوع من غير حاجة اسمها ( اجتماع ) و يلا بلا لمة

  15. حاج أحمد السلاوى كتب:

    ولدنا مشاكل .. بما ان الوالد كان أحد أعمدة ما كان ييسمى ب ( ثورة الإنقاذ) عشان كده ابوك قام سمّاك مشاكل..موووووووش؟
    بعد كده سؤال سغيرووووونى جانبى .. هى دلوقت إسمها إيه ؟هل حصل تعديل فى الإستراتيجية..لا سمح الله ؟ ومين بينقذ مين ؟
    الدينمو.. أفليقنجى .. بديت آخذ كورسات فى اللغة وأول حاجة إتعلمتها …حال مِنديه..آرتين حسبى..وأظرف حاجة ..نقدونجى قصريكمو ..أها شنو ليك … ماشى كويس ..اواصل فى اللغة ..ولاّ لحد هنا كفاية…خيروقو… ولك خالص التحايا من سلاونجى .

  16. ياسين شمباتى كتب:

    د.عزت والحلوين البى هنا..قالوا سر الفول والبلح فى الاجتماعات انهم بعطشوا,وكمان يختوا قدامك الموية والبارد عشان الجماعو (يتزنقوا) ويكون همهم انو الاجتماع ينتهى سريع عشان يلحقوا دورة المياه..وكان عندهم قرار عايزين يمرروهو بدون نقاش يضيفوا للحاجات دى (قهوة),نظام مدرر وكدة!!! غايتو الثعالب_قصدى الجماعة_ ديل عندهم المحن!!

  17. سهيل كتب:

    بسم الله مشاءالله.. جدو سلاوي طلع بره الظلط.. . اوعك من الصينيه “مش اللغه الصينيه)

  18. أرجع جوة الظلط يا حاج ما تقوم تقع في حفرة…………..

    بالله براي سويتا في نفسي و جبت سيرة الاجتماعات….. الليلة و نحن في قريب نهاية الاجتماع في الأكاديمية … دقت الباب بنية ظريفة كدا و معاها ولد و شايلين ليهم حاجة كدا في تلج…. قلت يا ود دا يكون (ميلك شيك) يا ربي …

    تخيلو الحاجة الفي التلج طلعت (مصل السحائي) و معاهو حقن صغار صغار…. غايتو استأذنت و سر يع مرقت…………. كمان جابت ليها (طعيين) افرض الواحد (سرخ) جنب البت من الحقنة ….. يودي وشو وين من الحاضرات الاجتماع….

  19. ياسين شمباتى كتب:

    والله دى بالغت فيها يا د.عزت..معقولة بس!!!!؟؟؟ ياهو دا السودان..

    لكنها برضها فكرة كويسة والله,,الحر اليومين ديل صعب,,وبراكم ما بتمشوا تتطعموا الا يقبضوكم زى الجراد كدة…

  20. قرن شطة كتب:

    العزيز/عزت /سلام شديد / أعجبنى موضوع الإجتماعات وأنا أحد ضحايا هذه الاجتماعات التى لاتؤدى الى الى مضيعة الزمن…والحقيقة انت سرقت الوضوع منى؟ أصلو انا خاتى عينى عليهو…لكين حصل خير وقد أبدعت فى وصف الموضوع، والقصة أصلها نحنا هنا بنتظاهر بإننا نعمل ونحن لانعمل لاننا باختصار شديد خالص مابنعرف العمل ذاتو وقيمتو وووووالخ والتمثيلة بتاعت الاجتماعات دى بقت بايخة والغريبة فى ناس لمن يقولو ليهو فلان فى اجتماع ترتفع قيمة هذا الفلان فى نظره..طبعاً لو ماكان زول مهم ماكانوا إجتمعوا بيهو؟؟ وفى ناس بتحب الاجتماعات فى رقبتها وفى حد ذاتها لانها بتديهم نوع من الاهمية والحيثية حيث لاعندهم حيثية ولا الاجتماعات بتدى حيثية أو قيمة مضافة…أنا شخصياً لا اجتمع لانو الفيهو عرفتها اول ماجيت مملكلة الامازون الرابة …لك التحايا

  21. طارق أب أحمد كتب:

    المجتمعين
    جمعه جامعه و مباركه

    من أظرف حركات الأجتماعات ما حكاه أحد رجال الأعمال
    تكررت إجتماعاته مع الجزيره بورد وفى كل إجتما ع كان يجلس بجوار مدير التشعيل الذى دائما ما يستعين بمفكره صغيره مسجل بها كل الداتا الأفدنه التى تم حرثها الحصاد حجم الرى ألخ ألخ لاحظ الراوى أن المفكره فاضيه بيضاء من غير كتابه و خجل أن يسأل الى أن حانت لحظه مناسبه و سأل الباشمهنس عن سر بياض المفكره و من أين له بالمعلومات فأجاب المهندس بأنه يحفظ كل المعلومات عن ظهر قلب لكثرة تعامله معها ولكن أقناع المجتمعين و أضفاء المصداقيه على الأرقام يقتضى الأعتماد على مصدر و هو هذه المفكره القديمه الفاضيه

  22. مُخير كتب:

    العزيز أبو عصمت
    الحلوين أينما كانوا
    سلام وإحترام
    دايماً شايت في القوون يا دكتور يديك العافية، عائد لتوي من دوامة كبيرة إستمرت قرابة الاسبوعين وشملت عدة مؤتمرات واجتماعات وجلسات عمل حول السياحة والإستثمار والخصخصة فضلاً عن إجتماعات نظامية …الخ، والخلاصة ربما عبر عنها جدي يرحمه الله في وصفه للعنكوليب ربما بمقارنته بقصب السكر إذ قال (تلوكون قنطار خشب عشان من أجل درهم عسل) وهكذا الحال كمية من التنظير وقليل من الإنجاز والتدبير ولك الود والتقدير

  23. مخير سلام … ليك وحشه

    حمد الله بالسلامة و الجاتك بسفرة و تغيير سامحتك… ما بطال لكن مرات الاجتماعات مفيدة كنوع من التغيير اصلو في واحد و الا اثنين بقوموا بالشغل نيابة عن الكل ………………………..تحياتي

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s