راقد قفا…

Posted: الأربعاء,13 مايو, 2009 by ياسين شمباتى in اخرى

الاستلقاء على الظهر معروف للجميع,ونحن فى السودان نسميه(راقد قفا),,وهو من الوضعيات المحببة لدينا لا سيما اذا صاحبته (خلفة رجل) وكان ذاك فى العصر بعد ان تكون قد (ضربت غدا كاااارب وشربت الشاى),وربما اتحفتك ام العيال ببعض قهوة لتنال بها كمال الرضا..وتكون انت مرتديا(العراقى الهبابى) والارض الرملية تحتك قد تم ريها الماء لتأتيك نسمات لطيفة (تظبط) مزاجك..وتبدأ انت فى مطالعة الجريدة التى حملتها معك من المصلحة التى تعمل بها,وقد يلتف حولك ابناؤك ويبدا سرد لاحداث اليوم,,وربما غفوت قليلا_برغم الكراهة_هذا كله احبائى كان فى زمن مضى,,زمن عرف بالهدوء وراحة البال والالتجاء الى السكينة الاسرية بدلا عن البحث عنها خارجا..
الشاهد من هذه المقدمة هو الاستلقاء على الظهر كوضعية مريحة عرفت منذ قديم الزمان واقرها الاسلام ك(رقدة) شرعية,,وحبذ الاضطجاع على الجنب الايمن,ولابأس فى الايسر..وكان الحبيب المصطفى(صلى الله عليه وسلم) كثيرا ما يضطجع متيمنا..ولا يفوتنا هنا الفرق بين الاستلقاء والاضطجاع,فالاول يكون على الظهر والثانى على الجنب وربما استعمل فى مكان الاول..وكره لنا معشر المسلمين الانقلاب او الاستلقاء على البطن,حيث انها رقدة اهل النار,وعليها يسحبون مسلسلين ومكبلين وزاحفين..وما يهمنا هنا هو(الرقاد قفا) حيث اننا نستخدمها قولا اذا اردنا نطمئن شخص على ان موضوعه او غرضه(مقضى),فنقول له(ارقد قفا ساكت),,وربما رقد رقدة لم يقم بعدها,وهى على شاكلة(خت فى بطنك بطيخة صيفى)..وكما قلنا انها رقدة الراحة والاسترخاء,فنأصل لها بكلام ابن الخاضبة الوراق_وكان ينسخ الكتب_,حيث ذكر انه رأى يوما فى المنام انه ادخل الجنة,قال: فلما دخلت استلقيت على قفاى ووضعت احدى رجلى على الاخرى وقلت:آه..استرحت والله من النسخ..انتهى كلامه..
وقد يكون الاستلقاء على القفا ووضع رجل على الاخرى للتأمل والخلوة بالنفس,فقد روى سليمان بن يسار انه رأى سعد بن ابى وقاص فى طريقه للحج وهو بين مكة والمدينة وقد القيت له سجادة مستلقيا عليها وواضعا احدى رجليه على الاخرى..(وبقية الحديث بجيب ليهو عوة ومشاكل ساكت)..ونحن نقول (خالف كراعو),وكلمة كراع من فصيح العرب,,فقد قالت العرب فى مثل لها(كنت كراعا فاصبحت ذراعا),يذكر لمن كان وضيعا فارتفع ذكره..وكلنا قد سمع بقصة اخانا الذى قدم من الجزيرة وركب البص,فوطئ قدم احد اهل المدينة,فقال له المدينى: اذا سمحت زح كراعك من رجلى,فرد عليه الجزيرى: على بالطلاق ما ارفعها الا اعرف الخلا كراعك رجل ورجلى كراع شنو!!!! واحسبه صادقا..ويقال ايضا ان احد(الهمباتة) مر بصاحب مواش وخير عظيم,وكان هذا الرجل الغنى بخيلا جدا,وقد استلقى على (عنقريب) ورجلاه قد امتدتا خارجه,فاغتاظ منه (الهمباتى) واخترط سيفه وقطع له رجليه من(حد العنقريب) وعاتبه قائلا: المال دا كلو هولك وماك داير تجيبلك عنقريبا وهيط!!؟؟ وساق مواشيه وغنمه امامه..طبعا دا همباتى متحيل ساكت!!!
وتحضرنى هنا لطيفة حدثت لاحد اجدادى,حيث ان الرجل فى ذاك الزمان كان له فى الغالب (سروال واحد وعراقى وجلابية او اتنين),يغسل بعضهم ليلا ويلبسهم صباحا..وكان جدى كعامة اهل القرية,وكان يوم السوق الاسبوعى يوافق الثلاثاء بمدينة(تنقاسى),وكانوا يتحركون نحوها قبل الصبح راكبين حميرهم من اجل ان(يلحقوا السوق والافتتاحية)..فى تلك الليلة كالعادة غسلت خالتى ملابسه وملابسها(وشرتهم) على الحبل,فقام هو باكرا والظلام يخيم على البيت فارتدى ما ظنه سرواله,وماهو الا (جبون) خالتى!! وذهب الى السوق وباع وابتاع,ولما ظهرت الشمس جيدا استلقى تحت شجرة نيم وريفة مع بعض اصدقائه واستلقى على قفاه ووضع كراعا فوق الاخرى ليبدا المؤانسة,(فضربه الهمبريب الباااااارد),فما كان منه الا انزل رجله سريعا وصاح(التومة,,الله يقلعك,,فضحتينى فى نص الرجال)..يريد انها وضعت ملابسها قرب ملابسه..
ونحن فى زمان لا يجد فيه الواحد منا زمنا للقيلولة او غفوة صغيرة تريح بدنه,فهو لا يأتى فراشه الا آخر الليل ل(ينجدع) عليه كيفما اتفق,فلا يدرى الا والصبح منبلج عليه..ولا يعلم عن رقدته اهى (قفوية) ام رقد رقدة اهل النار!!!نعوذ بالله منها ..والاضطجاع على الجنب الايمن فيه فائدة علمية,,حيث وجد ان المعدة تتوسط البطن وتميل الى المراق(الجانب) الايمن,لذا اذا اضطجعت متيمنا فانك تزيد من انسياب الدم نحوها مما يسرع عملية الهضم والامتصاص..والله اعلم..
و(فتكم بى عافية وارقدوا قفا وما تشيلوا هم,,دى الجاتكم جاتكم من الارض,,ما جاتكم من تالا السما)..يتخيل لى كدة واضح!!!
ونلتقى……………..

 

Advertisements
تعليقات
  1. حاج أحمد السلاوى كتب:

    ولدنا الحاج د. شمباتى ..وكل الحبان
    الظاهر إنو الغربة والحفرة الإنت قاعد فيها لخبطت عليك الأمور شوية ..وبقيت تهضرب بالرقاد والقومة والقعدة …وشنو ما بعرف داااااااااك. حسه عليك الله الزول بعد ما يرقد فى السرير.. أو العنقريب ويغرق فى النوم بعد يوم عمل طويل وشاق ..دحين تانى بيعرف هو كان نايم قفا ..ولاّ بطن ؟ غايتو انا لامن أكون متعب ممكن أنوم وأنا قاعد فى الكرسى ..ما عندى مشكلة أبداً ..ونحنا فى السودان( رغماً عما جاء فى السنة المشرفة المطهرة على لسان رسولنا الكريم ) عندنا مثل بيقول كل زول ينوم على الجنب البريحو ..رايك شنو ؟
    أما قصة جدك ولبسه للجبون بتاع الحاجة دى عاوزة مراجعة ..يعنى لحد ما باع واشترى ولامن جا يرقد ما شعر ابداً إنو فى حاجة غلط ..؟ غايتو بالغ عدييييييل كدة ..ولاّ يكون شارب ليهو شربوت من الصباح ..وناس خالتك بيعرفوا الجبون من الزمن دااااااك ..؟ يا حاجة الجبون ده ………………………..شوية !!! الباقى يتموهو ليك الكواشف .. أو أخوك المشاغب سهيل …
    ولحد ما نشوف آخرتا شنو …. أرقدو قفا ..

  2. nono كتب:

    شمباتي لك النحية/
    الرقاد علي الظهر او الرقاد قفا هذة اخر مرحلة من مراحل عناء يوم طويل مابين العمل او الدراسة او العودة من مشواااااار العصااااااااااااااري!!!!
    شماتي/ وكان ذاك فى العصر بعد ان تكون قد (ضربت غدا كاااارب وشربت الشاى),
    اصبح الغداء في السودان وفي الغااااااااااااااااالب بعد المغرب حيث يتم تجمع الاسرة في ذاااك الوقت يعني العصر دة رااح في الزحمة وخاارج حسابات الجميع؟؟؟؟ كان متعارف لو في زول جرة سريرة علي ضل الشاتي رقد قفا يجيهوا واحد ناااااااااااطي الراقد ليها شنو او يقول لية انتي وااااااااااارث من باب ( السخرية )….؟؟او المزااااااااااح؟؟؟
    *********************
    لكين وليدو الكان زمان تعبان عليهو
    يقرِّي فيهو و اديتو ليهو بلا المطر
    دقس المديني و اشتغل دي اربع سنين فوقن شهر
    راقد قفا وقاطع الخبر !!!!!!!!!!!!!!

  3. ياسين شمباتى كتب:

    ابوى السلاوى..اسوى شنو عاد؟؟ ما عديم شغلة وكدة..لكن تمامة الاغنية عارفها,,بس ما حبيت اذكرها,,وهى كلمة تبدأ بحرف القاف وتتكون من اربعة احرف!! خترى انا..لكن ما بعيدة جدى يكون شارب(نسكافيه) من بالليل واثرو امتد للصباح..

    نونو..مساك طيب..فعلا رقدة العصرية دى كانت لما البال كان رايق وايقاع الحياة مضبوط..دا محمد جيب الله كدكى ولا شنو؟؟

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s