كل سته فى حته – ولا سته فى واحد ؟؟؟

Posted: السبت,16 مايو, 2009 by aflaiga in اخرى

سميره انتقلت حديثا لداخلية البنات العاصمية وسكنت فى نفس الغرفه مع سهى القدييييييييييمه !! فى الداخليه والجامعه والحياه وبدات سهى فى تعريف سميره بحال الدنيا وحال الجامعه وحال الداخليه والشارع :

سهى : شوفى يا بت البلد دى اهم شيئ فيها العلاقات !! عندك علاقات بتعيشى وتاكلى باسطه عديل كده مش عيش !!! انا شخصيا مثبته لى بتاع ركشه للمشاوير الصغيره ومراسيل حاجاتى الشخصيه !! ومثبته لى بتاع امجاد لمشاويرى الطويله وتوصيلى للميناء البرى لمن اكون مسافره او جايه !! ومثبته لى بتاع بوتيك لكريماتى ولبساتى وهتشى وبكشى !! ومثبته لى بتاع اتصالات لتواصلى مع الناس وترتيب مواعيدى مع المعارف !! ومثبته لى بتاع بقاله كبيره لمشترياتى الغذائية والبارد والشيكولاتات !! وبعد ده كلو بحب عصام ود خالتى فى البلد ومعجبة بى وائل زميلى !!

سميره : سجمى سجمى قبلك وحدك ديل كلهم اسى بتعرفيهم كيف وبتلاقيهم كيف وما بيتضاربو مع مواعيد ومعرفة بعض ؟؟؟

سهى : شوفى يا بت البلد دى اسى المعارضه مش بتقول عيبا عدم الشفافيه ؟؟!! اها يا بتى البلد دى اكبير بلد فى الشفافية يعنى عندك انا مثلا واضحه وصريحه فى علاقاتى مع لناس ديل وموريه اى زول منهم انو غيره ما معانا !! تهور ما معانا !! حركات جعليه ما معانا وخاته ليهم دستور واضح وصريح بيقول ( وظف غيرتك فى شكل اهتمام بى عشان تنافس !!! ووظف جعليتك فى دعمى عشان اقدر اكمل جامعه فى الظروف الصعبه دى !!! ووظف تهورك فى انو تتهور فى توفير حاجاتى !!! ) ..

سميره : اسى لكن يا سهى بعد تكملى الجامعه بالطريقه دى بيفضل شيئ تتعاملى بيهو مع عصام ود خالتك ولا وائل زميلك ؟؟؟

سهى : شوفى بالنسبه لوائل هو زول واعى ومتفتح وعارف وعايش نفس الظروف ونحنا متفقين انو ليهو العضم وللدنيا اللحم !!! اما بالنسبه لعصام ففى النهايه هو ود خالتى ومجبور على !!!

سسميره : والله يا بت منطقك ميكافيللى غريب !! والله يسترك ساى ؟؟ يسترك ليك شنو ؟؟ الله يسترنى انا دى !!!

وبعد فتره من الزمن وانقضاء ثلاث سمسترات تقابلت سهى وسميره فى مناسبه جامعيه وكانت سميره اخر انقاه وروقه وقشره :

سهى : يا بت يا شيطانه انتى عامله فيها غبيه ما اهندا طبقتى نظرية كل سته فى حته !!

سميره : ابدا وحاتك والله انا طبقت نظرية سته فى واحد !!!

——

كسره : سميره طلعت مفتحه اكتر من سهى ولمت فى زول واحد مرتاح واستمتعت بكل الخدمات الاضافية فى خط واحد !!!!

——

نرجع نقول اللهم استر اعراضنا وبناتنا من كل سته فى حته ولا من كل سته فى واحد ….

Advertisements
تعليقات
  1. aflaiga كتب:

    شباب : قبل ان نبدا فى نقاش وطرح الموضوع انبه لان الموضوع يتعلق ببناتنا واعراضنا وانو ما وصلنا الى هذا الحال الا بعد طناشنا من نقاش الموضوع بشكل شفاف ( مش زى شفافية سهى !! ) وعشان ما يجى زول ناطى يقول لى معانا حرائر فى الموقع ده !! الحرائر ديل نحنا كاتبين عشان كرامتن وعزتن يلا نناقش بصدر ووعى وعقل مفتوح .. واديكم اول مشهد :
    ——
    صديقى س من العسكريين المخضرمين وهو قائد وحده عسكرية مشهوره يوم من الايام جاهو واحد من عساكرو وقال ليهو :
    العسكرى : يا سعادتك عاوز لى سلفيه بتى خشت الجامعه وعاوز ادفع ليها الرسوم …
    سيادتو س : شوف يا ابنى انا بديك السلفيه لكن بنصحك انو تخلى بتك فى مكانا وبعدين انت اهلك من وين ؟؟
    العسكرى : انا من اقصى الشمال سعادتك ..
    سيادتو س : شوف انا مش عميد قديم ؟؟ وقائد وحده ؟؟ رسلت بتى الخرطوم تقرا وكانت ما شاء الله ميه ميه قدام ورا !! عليك امان الله جات فى اول اجازه زيها زى امها !!! اها ده انا قايدك العندى امكانيات …
    العسكرى : سعادتك انسى موضوع السلفيه ده نشوف ليها عريس بس !!!!

  2. (وبعد ده كلو بحب عصام ود خالتى فى البلد ومعجبة بى وائل زميلى !!)

    والله يا عبدو عندك محن كتيرة – انتا بتجيب الكلام ده من وين
    اوع من كابوس واخوانه!!!

  3. محنك كتب:

    خوّفتونا عديل كده معليش الاستيعاب ضعيف مع 10 سنة بره … وصلنا درجة تحتاج للتدخل الجراحى … ولو اصلوا الدولة دى عايزة تعلم الشباب ديل لازم تتحمل لانو الاهل حار عليهم يقرّوهم وحار جدا يقعدوهم فى البيت
    ونرجع نقول يا افليقا اللهم استر اعراضنا واسترنا واحفظنا

    والموضوع جد مهم ولازم تدلوا بدلائكم … وسنعود

  4. يا مخير يااخوى كلام افلايقا ده صحيح والله وكمان اكتر من 100 %

    يعنى بالمختصر طالبه جاية تقرا الجامعة فى الخرتوم – وبدوها مصاريف قول 50 الف فى الشهر – اها – ورينى ح تعمل بيها شنو ولا شنو ولاشنو ؟؟؟
    اذا بتاكل فى اليوم ب 5 الف فقط
    اذا بتشترى دفاتر – وللمعلومية الدفتر الواحد ممكن سعرو يصل لاكتر من 3 – 5 الف للمادة الواحدة
    مواصلات ب 1000 جنيه فى اليوم
    مواد تجميلية وعطور وملابس – مابتقل باى حال على 25 – 30 الف فى الشهر
    الاسكراتشات – بس قول 10 الف فى الشهر
    وده غير اى اشياء اخرى خاصة بها ممكن تكون محتاجة لمصاريف زياده عشان تجيبا

    عشان كده ظهرت ال6 فى حتة وممكن تجيب اكتر من كده.

    حمانا الله وحمى بناتنا واخواتنا من مثل هذا !!!

  5. aflaiga كتب:

    عزيزى مخير : ما ذكرناه هنا لا ينفى ان هناك من عصمهم الله من البلاء وكما يمكنك ان تدخل شارع فى الخرطوم تلقى واحده لابسه لبره جوه والجوه بره ( من غير هدوم زى ما بيقول عادل امام ) ممكن تلف اللفه التانية تلقى واحده منقبه ومحترمه …
    ما يهمنا هنا هو لماذا وصل الحال الى ما هو عليه ؟؟
    هل رفعت الحكومه يدها فرفع الشعب … ؟؟؟
    هل هناك موازنة ودراسة جدوى يجريها الاباء قبل ارسال الابناء للدراسه ؟؟
    طالما هناك استعداد عند الفتاه لتبيع فتاكد ان هناك من هو مستعد ليشترى !!!!!
    برغم ان سياسات التأليم الالى !! قد قصرت الظل الاكاديمى بجعل الجامعات فى الولايات الا ان حال جامعات الولايات يغنى عن السؤال !! وهو الخرطوم عامله كيف لمن الولايات !!!
    اخى مخير هناك وزارة للتعليم العالى وهناك صندوق لدعم الطلاب وهناك ديوان للزكاه وهناك منظمات لرعاية الطلاب ..
    لكنها تقرا معكوسة كالاتى :
    وزارة التأليم الالى – طلاب دعم الصندوق – ديوان العاملين عليها ..فالوقع يقر بغير ذلك …
    وحتى ولو قلنا ان ما يحدث فى الجامعات عمل تخريبى من خلايا نشاط هدام تستهدف هدم قيمنا وتخريج جيل فاسد اخلاقيا فقد نجح من نجح نجاحا كبيرا فى هذا الشان واين الدوله ؟؟؟؟
    بدلا من ان يجتهد الاسلاميون واعنى هنا الاسلاميون بكل تنظيماتهم فى حكاية قصه جديده لسميره قوامها :
    شوفى يا سميره البلد دى فيها الكعب وفيها الكويس واهم شيئ فيها السمعه والستره ومن اسى كان اهلك ما قادرين يقروك ارجعى بكرامتك عزيزه مكرمه بلدك وكان عندهم قدره فى الحد الادنى نحنا الباقى بنتمو معاكى وتاكدى انو بكره بتلقى البيغريك والبيغويك وكايس يشيل منك اهم شيئ تملكه البت وهو سمعتا وشرفا وبتلقى الفقدت الحاجات دى وعاوزه تدمرك زيها وبتلقى المنهجو قايم على التفسخ وحيزكك ووراك وراك لمن يسقطك .. لكن اهو انحنا مدينا ليك يدينا وعاوزين عزتك وكرامتك ونجاحك ورجوعك لاهلك سالمه غانمه عفيفه شريفه … ودخلو يدهم فى خزائن الارض الولاهم الله عليها وادو سميره البيكفيها ويحميها من سهى واخواتها ….
    يجتهدون اخى مخير فى البحث عن صوت سميره فى الانتخابات ودعوة سميره للتلاوات الجماعيه والبرامج الصيفيه والخروج فى المظاهرات ونصرة الوالى ولتنديد باسرائيل !!!!
    اها شفت يا عزيزى الميزان مقلوب كيف ؟؟؟
    فى الوقت الفيهو سهى مقدمه عرض رائع وجميل وساهل وبيعجب اى سميره !!!!!
    ما سقته هنا اخى مخير قيض من فيض من قصص الداخليات والشارع والبنشات التى لا تبدا من سهى الطالبه ولا تنتهى بعلوية الداية ولا دار المايقوما للاطفال !!!!

  6. aflaiga كتب:

    ود الخلا : حقيقة الموضع عاوز يتناقش بهدوء وروية :
    ولو بتستحملو كلامى هاكم :
    نمسك البت الطالبه اولا :
    خلال فترة الجامعه محتاجه لشنو ؟؟؟؟
    تقرا – تشارك اجتماعايا – تمارس حياتا العاديه وتعبر عن مشاعرا – تمارس حياتا السياسية وتعبر عن افكارا وتبنى نفسها – تتواصل مع اهلا وزملانا …
    يلا البيت ده يا – بيت اسرتا الصغيره – او بيت اهلا الاقربين – او داخليه
    خلونا نمسك دى اول شيئ :
    لانو عندى صحبى سالتو بتك ساكنه وين فى الخرطوم قال لى والله مصاريف الداخليه كترت فقامت سكنت مع نسيبة خالة جيران ناس صحبتا !!!! يعنى على الاقل ده معروف برغم اللفه الطويله دى انو ممكن نسال منها ( ود نسيبة خالة جيران ناس صحبتا ) !!!
    فى زمن فيهو الواحد شفعو يالا ويامين بيقدر يرعاهم يعنى حيرعو صحبة نسيبة جارة خالتم كيف يعنى ؟؟؟؟
    اما الطلاب فديل دنيا تانيه خالص :
    سمعت بطالب شغال خاطبة غير رسمية بغير الحلال ( قواد ) عشان يتمصرف ؟؟؟
    سمعت بى طالب نسى الجامعه وشغال تحويل رصيد عشان يتمصرف ؟؟؟
    زمان الطالب كان لو بالغ بيشتغل فى فندق عشان يقدر يذاكر ويضمن لقمتو ويخت راسو !!!!
    برغم كل شيئ اشيد بدور الشركات الامنيه الخاصه ( الهدف – اواب – وغيرها ) فى تشغيل الطلاب اثناء الدراسه ….
    اما طلاب وطالبات الحزب الحاكم فديل طبعا بيذكرونى بى قصة تبرع ود النفيدى بمبلغ مليون جنيه وتبرع النفيدى بمبلغ مية جنيه وتبرير النفيدى لذلك ( اها انت ود النفيدى عندك حق !! انا ود منو ؟؟ ) فايضا طلا بالحزب الحاكم لقوها بارده لانها ابناء الحزب الحاكم الذى كان يصرف من حيث لا حيث !!!!
    اوتذكر يا ود الخلا كيف كنتم تدرسون ايام الجامعه ومن اين كنتم تصرفون على محاربة اليسار وام جكو ومن اين كنتم تصرفون على تسيير حاجات الاخوان ؟؟ والان وقد حكم اهل قبيلتكم اين البركه ؟؟؟؟ ده موضوع تانى حنجيهو كان الله هون ….

  7. مُخير كتب:

    الحبان سلام
    عساكم بخير
    أولاً معجب للغاية بالطرح الشجاع والطريف والصريح الذي يفضح ما آل إليه حال بناتنا وما هو أسوأ العمق الذي إنحدر إليه مجتمعنا.
    ثانياً التحية للأخ محنك وحقو علينا، الراجل حقو مهضوم وخامنو مخير، مخير ، قد يكون في تشابه في رؤانا إلا أنني لي زي ربع قرن برة الجك، ومع ذلك ما مندهشين كتير للحاصل والقادم أسوأ.
    ثالثاً: أكمل الشغل الفي يدي وأجيكم بالروقة.

  8. aflaiga كتب:

    شباب : بالله معادلة صغيره كده اوزنوها معاى :
    فى الوقت الذى يبحث فيه من يبحث عن فساد مجتمعنا وجعلنا امه خانعه فاسده اخلاقيا ساقطة ليسهل تدميرنا وليضمن بقاءه عبر كل السبل التى منها هدم التعليم الذى هو اساس نهضة الامم وعبر الاسقاط الاخلاقى الذى هو اس ضياع الامم وعبر الاذلال بالجوع والفقر والحصار الاقتصادى لنكون امة لا تملك قوتها ومن ثم لا تملك قرارها —— معادلة 1
    تنشط الحكومات فى افقارنا وذلنا وتمييع نخوتنا وتهدى كل يوم لعدونا عميلا جديدا وانسانا ساقطا او مشوشا —— معادلة 2
    بالله عليكم لو انقلب ميزان العدالة ليصير :
    حكومه تبحث كل يوم عن ابواب وثغرات الفتن لسدها عبر محاربة الجوع والفقر والجهل والمسغبه فهل يضيرها ان تجتمع عليها الدنيا بمن فيها ؟؟؟؟
    سؤال بسيط لحكوماتنا والوياء امورنا :
    * ماذا يعنى طالب فقير جائع ؟؟؟
    * ماذا يعنى طالبه على شفا حفرة من الضياع ؟؟
    * ماذا يعنى ولى امر مذلول مهان عاجز عن القيام باعبائه ؟؟
    * ماذا يعنى مجتمع فقد التكافل والنخوه ؟؟؟
    * ماذا يعنى جيوش من الاجانب والطفيليين الاغنياء الجدد فى مواجهة شعب وصل لمرحلة البيع بدءا من اثا منزله وحتى شرفه ؟؟؟
    مالكم كيف تحكمون …..

  9. nono كتب:

    لكم التحية/
    والذنوب والآثام هتك للباس الإيمان والتقوى ، والعبد يحتاج إلى ستر الله وعفوه في الدنيا والآخرة وأولى…….
    يستر الله أهل الإيمان والتقوى الذين يستشعرون الحياء من الله ، ويستشعرون الندم على ما فرطوا في جنب الله .
    وعن أَبي هريرة رضي اللَّه عنه عن النبي صَلّى اللهُ عَلَيْهِ وسَلَّم قال : « لا يسْتُرُ عَبْدٌ عبْداً فِي الدُّنْيَا إِلاَّ سَتَرهُ اللَّه يَوْمَ الْقيامَةِ » رواه مسلم .

    وعنه قال : سمِعت رسول اللَّه صَلّى اللهُ عَلَيْهِ وسَلَّم يقول : « كُلُّ أَمَّتِي مُعَافًى إِلاَّ المُجاهرينَ ، وإِنَّ مِن المُجاهرةِ أَن يعمَلَ الرَّجُلُ بالليلِ عمَلاً ، ثُمَّ يُصْبحَ وَقَدْ سَتَرهُ اللَّه عَلَيْهِ فَيقُولُ : يَا فلانُ عَمِلْتُ الْبَارِحَةَ كذَا وَكَذَا ، وَقَدْ بَاتَ يَسْترهُ ربُّهُ ، ويُصْبحُ يَكْشفُ سِتْرَ اللَّه » متفق عليه .

    (يدني الله العبد يوم القيامة فيضع عليه كنفه ويستره من الناس ، فيقول : أتعرف ذنب كذا ؟ أتعرف
    ذنب كذا ؟ فيقول : نعم أي رب ، حتى إذا قرره بذنوبه ، ورأى في نفسه أنه قد هلك . قال : سترتها
    عليك في الدنيا ، وأنا أغفرها لك اليوم . فيُعطى كتاب حسناته ، وأما الكافر والمنافق فيقول الأشهاد :
    هؤلاء الذين كذبوا على ربهم ، ألا لعنة الله على الظالمين ) (12) .
    ومن الناس من يفعل الذنب فيستره ربه ، ولكنه يأبى إلا الفضيحة ، فيعلن عن ذنبه ويتباهى به ،
    وهؤلاء يفضحهم الله على رءوس الأشهاد ، وفي الحديث : (كل أمتي معافى إلا المجاهرين) (13) .
    ولأن الله تعالى عفو كريم يحب العفو ويحب الستر فقد حث عباده المؤمنين على الستر ورغبهم فيه لأن ( إِنَّ الَّذِينَ يُحِبُّونَ أَنْ تَشِيعَ الْفَاحِشَةُ فِي الَّذِينَ ءَامَنُوا لَهُمْ عَذَابٌ أَلِيمٌ فِي الدُّنْيَا وَالْآخِرَةِ ) وهم المنافقون
    المرجفون الذن يروجون لكل خبيث وقبيح .
    ولهذا فإن ستر المسلم العاصي على نفسه أولى من اعترافه بذنبه ، وستر المسلم على أخيه المسلم أولى من
    فضحه وهتك ستره برهان ، وفي الصحيح : (من ستر مسلمًا ستره الله في الدنيا والآخرة) (14) .اللهم استر اخوتنا …..وبناتنا……. وسائر نساء المسلمين؟؟

    للحديث بقية……..

  10. aflaiga كتب:

    نون : كلامك حكم وما اروع الاستشهاد بكلام الله …
    اها الستره وين فى انو امسك بتى الما قادر اقريها على ولا افكها فى الشارع وهى ونصيبا ؟؟؟
    الاصل فى الامور هو حاجتين :
    الاول : انو الدوله توفر التعليم المجانى من الالف للياء ..
    الثانى : ان توفر لولى الامر الجو الكريم ليمارس ولايته على بيته ومنها تعليم ابناءه فى كرامه …
    ومن ثم ياتى دور المجتمع المدنى فى التكافل وانشاء المنظمات التى تساعد على تسهيل العبئ عن الدوله والمواطن وفق اى نظرية سواء التكافل الاسلامى او الاشتراكية الغربيه المهم سياسة تسهل الامور على المواطن …
    ومن ثم ياتى دور الاسره ووليها فى الاجتهاد فى توفير العيش الكريم وعدم التقاعس عن الاخذ بالاسباب …
    اها لمن تختل الاولى والثانية وتتملص الثالثه عن دورا يبقى كل الهم انصب على المواطن المسكين ….
    فيا يبقى قدر التحدى ويقرر بشكل شجاع او يترك الامور للزمن يسوى اليسويهو …
    وفى انتظار جيتك ….

  11. aflaiga كتب:

    مخير ثرو محنك : يا جماعه والله عقدتونا عديل كده مره نقول لمخير محنك ومره نقول لمحنك مخير .. عاوزين نشوف واحد فيكم عشان نقدر نفرز منو البره ومنو الجوه عشان نقول لالا مخير ده القصير الافرانى ومحنك ده الطويل الاخدرانى ولا مخير ده البلبس بناطلين ومحنك ده البلبس جلاليب وكده !! اسى نحنا يدوب بقينا نفرز بين بين سنكل وبشار بعد شفنا واحد فيهم وبعد داك شفنا التانى ( الحنشوفو تانى !! ) – لكن سبهان الللاهو نفس الملامه والشبه !!!
    لكما العتب حتى ترضيا ….

  12. aflaiga كتب:

    شباب : الموضوع مفتوح برضو فى البيت الكبير منتدى ساخر سبيل يعنى بى هناك ترد بى هنا ترد كلو واحد لمن يجى يوم يكون بى هناك وبى هنا واحد ..!!!

  13. محنك كتب:

    قريبا جدا افليقا تشوف محنك ممكن يكون عكس الهوى …. ومخير له التحية وهوقريب جدا مننا وراقى جدا وخاصة فى الادب كما لمست من تعليقاته على مواضيع د. قرن كدكى شطة … وهى النسبة لنا للقراءة ومحاولة التامل الذى لا يبلغ الشأو

    وحقو يا يمسكها يا يقريها لو بقدر

  14. nono كتب:

    عدنا………..
    الاخوة الاكارم
    تاتي المسؤلية الاولي والاخيرة للاباء و الأمهات، إن مسئولية تشملهم، تتضمن ما تشمله، يجب بذل الجهد لإن القضية لا تلقى بحملها على الطلبة والطالبات وحدهم، و إنما هى قضية اسرة متكاملة تستطيع أن تنجح فى تربية غرس القيم فيهم؟ تنشأتهم النشأة السليمة…. وكلنا قرينا وفي الزمن دة زاتووووو واتخرجنا الحمدلله؟؟
    يجب ان نولد لدى أبنائنا الإهتمامات النافعة، و تغذيهم بالقدوات الحسنة، و تنمى مهاراتهم و تزيد من قدرتهم على التفكير الإيجابى، و تعينهم تدريجيا على ما هو مطلوب حاليا من تحمل المسئولية. و هناك أيضا الحاجة الماسة إلى التأكد من أن أولياء الأمور أنفسهم، و أولادهم كذلك، بإمكانهم إقامة علاقات سليمة. كما يجب الاخلاص في التربية هي تصنع جيلاً يستطيع أن يتحدى المشاكل والصعوبات ؟؟؟؟؟؟؟

  15. قرن شطة كتب:

    العزيز الودود /أفليقا/ قصة عجيبة بتاعت البنات فى الزمن الضائع ده..وانا طبعاً شغال فى محلة معظمها بنات وشايف حاجات تحير عديل كده..وطبعاً الجمل ما بيشوف عوجة رقبتو بداية ولا شنو؟ ..غايتو اللهم أصلح الحال أو أخرجنا من هذه المصيبة الرابين أهلها بدون قواعد ولا أخلاقيات..وأنا مستغرب الأهل وين؟؟؟ده المحيرنى شديد..تخيل فى أروبا ما فى كلام ذى الحاصل هنا؟؟ تحياتى يامتابع

  16. العزيز أفليقا

    يعني نحن نعلق بهنا و بهناك برضو…..
    أعتقد أن من المهم توحيد المنفذ حتى لا نتهم بأننا دعاة الانفصال …

    المعنى أن تخص سوداننا (أو) منتدى ساخر سبيل بالمقال ففي ذلك توحيد للجهود و نبذ الفرقة أما بوضع المقال في محلين… ففي ذلك تشتيت للافكار و انسيابها و سلسلة التعليقات ….

    يقيني أن غرضك نبيل و تحتاج أن يقرأ و يتفاعل معك قراء المدونتين و لكن ذلك في عرف الصحافة غير مقبول…..

    لصق هنا واحد و هناك واحد مختلف و أعتقد أن معينك لن ينضب……
    مع تحياتي

  17. حنين كتب:

    حبيبنا أفليقا وسمار المدونة .
    سلامات .
    قبل فترة وأنا أتجول بين القنوات المصرية تابعت مشكلة أبن فاروق الفيشاوى الممثل المصرى أحمد الفيشاوى والبنت التى أدعت أنها حملت بنتها منة وكان متزوجابها عرفيا وجاء أبوها ليدافع عنها فى أجهزة الاعلام دون حياء بأنة يجب أن يعترف الفيشاوى بأبوتة للبنت وأن المشكلة ليست مشكلتة وأنما مشكلة رأى عام …جعلتنى هذة الكلمة أستشيط غضبا .أيعقل أن نترك تربية بناتنا وأن نتركهن للرأى العام يربيهن .
    هذة المشكلة توشك أن تحدث فى مجتمعنا والذى بدأت علية سمات فقدان الحياء تظهر من وسائل الاعلام وخاصة المقروءة وتناول مثل هذة الجرائم والالفاظ التى تتداول بين الناس مثل الاغتصاب والتحرش وألفاظ ماكان لها وجود فى مجتمعنا فنسأل الله الستر بعد أن نعمل العلينا وهو تربية الابناء على الفضيلة .

  18. مُخير كتب:

    الحبيب أبو ناجي
    فردتنا العزيز أفليقا
    شاعرنا نيام
    العلامة إبن برد
    الحبان في كل مكان
    السلام عليكم
    الموضوع حساس وعويص، وبقدرما هو مؤلم وجارح لكنه حقيقي وواقع مُعاش ويضاف إلى قائمة المآسي العديدة التي باتت ترسم ملامح القبح في بلاد أصبحت الحرة تأكل من ثديها ولا تستحي، لعنة الله على الفاقة والعوز، وقبل أن نلوم أمثال هذه الفتاة التي داست على كرامتها وإرتضت بيع شرفها في سوق الله أكبر، فلنتسائل من الشاري، كم ومن هم الذين ماتت ضمائرهم فباتوا لا يخرجون صدقة أو يطعمون مسكينة لوجه الله، هم الأولى باللوم والتقريع والعقاب الدنيوي قبل الآخروي، وقائمتهم تطول لكن على رأسهم من سدوا أبواب الحلال في وجه المحتاجين، أوليس مؤلم أن تسمع عن صندوق دعم الطلاب أو صندوق الزكاة وووو غيرها من الصناديق التي لا تدعم إلا من يرتضون أن يكونوا كباشاً في قطيع الحزب الحاكم، وحتى هذه لم تعد كافية لسد رمق فقد أصبح هناك خيار وفقوس في المنتفعين، أعتقد أن المخرج هو في ذهاب هذا النظام الجائر وإعادة العدالة والحرية والمسائلة والشفافية والسعي إلى توفير الخدمات الأساسية بما فيها التعليم الأساسي والعالي إلى الجميع بأقل التكاليف، إن الإستثمار الحقيقي لا يقتصر على البنية التحتية بل في توفير الضروريات للجيل الناشيء الذي يمثل أغلبية السكان ومستقبل البلاد،

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s