السودان – تشاد .. ده حدو وين ده ؟؟؟

Posted: الإثنين,18 مايو, 2009 by aflaiga in اخرى

لن نطيل الحجيث حول العلاقات السودانيه التشادية او نتجمل فى وصفها بانها كالعلاقه بمصر ازلية وتاريخيه ولا يشوبها اى شائب !! بل سندلف للموضوع مباشرة وهو السؤال الهام الذى ينبنى عليه اساس العلاقات المحترمه بين كاى بلدين محترمين وهو :

ماذا تريد تشاد من السودان وماذا يريد السودان منها ؟؟؟

وسنبدا على خلفية الاحداث الاخيره تناول ملخص التطورات بين البلدين :

* قامت المعارضه التشادية بشن هجوم قوى على النظام التشادى انتهى بدحره بواسطة الجيش التشادى عبر دعم لوجستى معلوماتى استخبارى فرنسى .

* قامت تشاد باتهام السودان بتمويل وتسليح المتمردين وانهم اطلقو من الاراضى السودانيه .

* قام السودان بنفى الاتهامات عبر تصريحات رفيعة المستوى .

* اتهم السودان تشاد باختراق الاجواء السودانيه وقصف منطقة غرب دارفور .

* اعترفت تشاد بتعاونها المعلوماتى واللوجستى مع المحكمه الجنائية .

* قامت قوات خليل مسنودة بدعم تشادى بهجوم على مناطق منى اركو مناوى  .

* نفى خليل ان يكون هو البادئ بالهجوم واعتبر ان ما حدث كان كمينا قام بمقاومته والرد عليه واتهم الحكومه بدعم مناوى لضرب قواته .

* المفاوضات فى الدوحه تتراوح بين التعثر والجمود .

وايضا لقراءة لواقع بشكل جيد لا بد من استصحاب الدور الغربى فى المعادلة فى ظل الصراع الاروبى الامريكى فى المنطقه ( فرنسا – امريكا ) .

وللاجابة على السؤال الاول :

الوضع فى تشاد مرتبط ارتباط وثيق بالوضع فى غرب دارفور وفى دارفور عامة باعتبار دارفور هى المتنفس الطبيعى لتشاد وباعتبار التداخل القبلى بين البلدين … وتشاد ترغب فى وجود جار مسالم يسمح بتداول الثروه بين الطرفين فى الاقليم الفقير اصلا بموارده التى هى فوق الارض وغنى بموارده التى هى فى باطن الارض .. والسودان يرغب فى جار مسالم يسمح بحدوث استقرار جيد فى الحدود ووضع يمكن من انهاء الازمة فى دارفور ..

وهنا ياتى دور المعارضه فى البلدين والذى هو تلخيص لكل الوضع حيث المعارضه التشادية ذات العلاقات بالسودان والمعارضه السودانية الممثله فى الحركات ذات العلاقه بتشاد ولكل منهما مصالحه فى استقرار الاول وغلغلة الثانى لاضعافه ومن ثم تحقيق اهدافه فى الاقليم للحركات فى شكل ارض محرره يمكن من خلالها الضغط فى الموقف التفاوضى وللمعارضه التشادية كارض محرره تسهل الانطلاق والمناوره والنموين اللوجستى ..

ملخص الحل يكمن فى انهاء الازمة بين النظام التشادى والمعارضه وبين الحركات والحكومه ولعمرى ان هذا الحل اكبر بكثير من جهود قطر حيث يحتاج الحل لمؤتمر دولى  لحل الازمه بين الدولتين باستصحاب كمعارضة كل منهما .. اما اى حلول مؤقته بين الجارين دون استصحاب المعارضه فى كل منهما فهو مجرد حبوب مهدئة للازمة ما تلبث ان تعود لتشكل هاجسا يقلق الطرفين ويضر بانسان دارفور وانسان شرق تشاد الذين لا يتحملان اكثر مما تحملاه حتى الان واصبحو ضيوفا دائمين فى معسكرات النزوح واللجوء .

على المجتمع الدولى ان يقف بقوه لوضع حد لهذه المراهقه السياسية من الطرفين والتدخل القوى لجعل المنطقه غرب دارفور وشرق تشاد منطقة اامنه تماما يستفيد منها البلدان والعالم اجمع من خيراتها وفق مع حفظ السياده لكل بلد .

دعونا هنا نناقش الحلول الاخرى وماالات الوضع وخاصة بعد تهديدات السودان بانه قادر على الزحف الى تشاد وانهاء الازمه تماما ؟؟ مكررا سيناريو غزو العراق للكويت !! هل الهجوم الاخير فخ للنظام لجره الى معركه خارج الحدود ؟؟ وهل الهجوم الاخير رد فعل انتقامى على هجوم المعارضه التشادية ؟؟ وكيف تقيم الامور فى الميدان وانعكاساتها على ازمة دارفور والمفاوضات الجاريه بقطر ؟؟

Advertisements
تعليقات
  1. ودالفتيحاب كتب:

    الاستاذ أفليقا
    يومك أنشاالله وياعين ياعنيه ياكافرة يانصرانيه وعين الحسود فيها كمنجه.
    التحيه لك وأنت تسرد لنا ماآلت له العلاقات السودانيه التشاديه فى الحقبة السابقه وماتمر به من حجار المتضرر الوحيد هو هذا الشعب الكريم فى كلا البلدين .
    طول ماكان هنا وهناك معارضة سوف لن ينصلح الحال الا اذا حسمت هذه الاطماع من كلا الطرفين .
    قرات كراكتير من يومين فى احدى الجرايد وهو صور انقطاع المياة المتكرر فى العاصمة قال والله بقت ذى العلاقات التشاديه .
    التحيه عبرك للجميع والبروف خليكم جنبو قريب لانو زعلان بالحيل …

  2. ودالفتيحاب كتب:

    يومك انشاالله عسل مصفى

  3. aflaiga كتب:

    ود الفتيحاب : مشكور على المرور الراقى .. ويبدو انك ما زلت متاثر بما ذكرته من تجاهلات !! عزيزى ليس هناك اى تجاهل من اى نوع ولو تعلم ما يكنه الناس لبعضهم هنا لما توانيت فى تقديم العذر للكل …
    ثانيا : مسالة العلاقات السودانية التشادية دى فى حاجه غريبه جدا جدا وهى انو البلدين ديل فيهم خير كتير فى النص والاطراف التانيه بس المشكله فى الشرق بتاع تشاد والغرب بتاع السودان يعنى عدم توازن التنمية فى الطرفين هو البخلى غربنا يخش فى شرقهم وشرقهم يخش فى غربنا !!! بالاضافه لانو شرقهم اهل غربنا وغربنا اهل شرقهم !!! يعنى احل كمان فى انو شرقهم ياكل من خيرات غربهم وشمالهم وجنوبهم !! وغربنا ياكل من خيرات شرقنا وشمالنا وجنوبنا ووسطنا !! بعد داك بيكون مافى مشكلة ويفضل بس التداخل القبلى …
    تعرف اكبر مشكلة فى القصه دى هى مثقفى الطرفين فمثقفى غربنا يحلمون بحكم كل سوداننا وتشاد !!! ومثقفى شرقهم يحلمون بحكم تشاد كلها وغربنا !!! وفى نث ده بيضيع شعب شرقهم وغربنا !!
    شقت الغلوتيه دى كيف ؟؟؟؟!!!
    اما بالنسبه لقربى من الاستاذ فما فى زول بيوصوهو بابوهو وكفى …
    واخيرا بالنسبه لزعلتك الاخيره :
    السيد / ود الفتيحاب .
    الموضوع / زعلتك الاخيره .
    بالاشاره للموضوع اعلاه وبما انه نما الى علمى انا وكيل نيابة الخوه والمحبه بين المدونين انك متحسس شوية فياخى بعد الشر عليك .. بهذا فانت ملزم بتقديم اسبابك الوافيه لمحكمة الخوه فى الميل !! للنظر فى دعواك ..

  4. محنك كتب:

    كيف يسمح المجتمع الدولى لتشاد بضرب خصومه السياسيين وهم جهات متعددة … بل ويساعدها لوجستيا وفنيا وعسكريا .. ولا يسمح للسودان بضرب خصومه الدارفوريين وهم خصوم سياسة … وهم قلة من ابناء دارفور فى الركن الشمالى الغربى منها … هل يمكن للسودان ضرب قوات خليل بالطيران داخل تشاد فى ام جرس وغيرها

    وهل العدوان والقتل هم الحل الوحيد للمشاكل السياسية وحمل السلاح يمكن ان يقود الى تنمية

    اذن لا يخفى على كل عاقل ايادى الاستعمار التى تحرك الدمى وتحقن بهرمونات الشباب

  5. زووووووول كتب:

    افليقا سلااام
    ود الفتيحاب سلاااام
    محنك سلاااام
    بقية الشله سلااام عليكم جت (؟) معناتا كلكم
    اولا الزوووووول يحييكم من منفاه الاختيارى (اجازه سنويه وكدا لكن شكلها انتهت وكدا ) .
    طيب نجى لموضوع السودان الذى كان يغير انظمة بعض الدول بالانقلاب ثم يقنع الحكومات فى تلك الدول باجراء انتخابات (حره ونزيهه) ولهذا كنا نطالع على دكاكين سوق ليبيا لافتات تقول (انتخبوا مرشحكم ادريس دبى ) .
    بل كان احد وزراء الانقاذ يفتخر وفى ندوه عامه باحدى الجامعات بانو قروش البترول دى نحن بنغير بيها انظمه يا ابنائى .
    لكن يبدو ان العقاب قد شاخ وهرم ولهذا صارت بغاث الطير تدفعه بالمخلب الغض والجناح النضير .
    الان اترككم مع مقتطفات من رائعة العقاد (العقاب الهرم )
    يهم ويعييه النـــهــــوض فيجثــــــــم
    ويعزم إلا ريشه ليس يعــزم
    لقد رنق الصرصور وهو على الثرى
    مكب وصاح القطا وهو أبكم
    يلملم حدبـــاء الــقــدامــــــى كـــأنـــها
    أضالع في أرماسها تتهشــــم
    ويثقله حمل الجـنـاحيـــــن بعــدمـــــــا
    أقلاه وهو الكاسر الـمتقــحــم
    إذا أدفأته الشمـس أغفـــــى وربمــــــا
    توهمها صيدا له وهو هيثــــم
    لعينيك يا شيخ الطــيـور مـهــــابـــــــة
    يفر بغاث الطير عنها ويهـزم
    وما عجزت عنك الــــغـــداة وإنـمـــــا
    لكل شباب هيـــبة لا تهـــــرم
    كسره :
    فى الكلام بقيه يمكن استخلاصها بمطالعة قصيدة الشاعر عمر ابو ريشه النسر الهرم .

  6. يعنى يا زووول
    على نفسها جنت براقش ولا شنو ؟؟؟؟

  7. زووووووول كتب:

    سترايكر سلااام
    ولما رات قواتكم المصلحه غياب افليقا عن بوسته رات الاستيلاء على (السلطه ) الخضراء والحمرا .
    طيب يا سترايكر اوافقك الراى على نفسها جنت براقش والسوتوا كريت فى القرض لقتو فى جلدها لكن الله يعوضنا فى اموال البترول التى انفقت لتنصيب ادريس دبى رئيسا فى شاد .
    كسره :
    الله يستر علينا من افريقيا الوسطى كمان لانها بقت الجار الوحيد الما ضربنا . لاحظ :
    ليبيا تدعم خليل فى ضربة امدرمان
    مصر تحتل مثلث حلايب
    تشاد (دى السم القدر غدانا )
    اريتريا ما قصرت معانا تب !!! وكمان نحن برضو وصلنا افورقى السلطه (الله يعوضنا فى اموال البترول ))
    اثيوبيا دخلت معنا فى عداوات كتيره ومسيخه (والنصيبه رئيسهم يشبه رئيسنا )
    يوغندا معروفه لدينا (صداقة موسوفينى مع قرنق المتمرد ثم قتل قرنق المسالم )
    كينيا ما بتختا ليها حركه حركتين كعبات
    كسرة الكسره :
    اها الفضل منو غير افريقيا الوسطى يا سترايكر ويا افليقا ؟؟؟؟؟؟

  8. aflaiga كتب:

    الزووووووووول : حبابك ومنور ..
    شفت غير قصة ( نحنا الجبناكم وانتو كنتو قاعدين فى سوق ليبيا !! مفى شيئ خلى العداوات تقوم بيننا وبين الناس ديل … دوما كل من لا تاريخ له وبدا تاريخه بعد السلطه يبحث اولا عن معارفه قبل السلطه ليذيقهم الويل او ينفيهم حتى يبدا التاريخ من حيث بدات ولايته !!! دى وقعت ليك ؟؟؟
    فى شان كده الناس ديل ما دايرين زول يذكرم بانهم كانو قاعدين فى دار السلام ولا نمره اتنين ولا جامعة افريقيا !!!
    بالمناسبة ترشح الانباء عن تغيير فى الدفاع بحضور المظلى بكرى حسن صالح للدفاع عما تبقى من هيبتنا …
    والرجل معروف بانه زول ميرى ناشف وقائد القوات الخاصه وما ادراك ما القوات الخاصه ..
    تصدق يا زوول بعد مرات الديش ده لو فكوهو بيقول كلام تانى .. لكن المشكله يفكوهو بعد شنو ؟؟؟
    نتمنى ان نسمع ما يعيد للجيش هيبته وللبلد سيادتها ..
    ونتمنى قبل كل ذلك ان تعود المياه لمجاريها دون طلقه واحده ….
    وانا اطالع الاخبار قرات : ان ناطقا باسم الجيش التشادى قد اعلن انتهاء العمليات العسكرية فى السودان وان القوات التشادية والطيران التشادى قد عاد من طلعاته وهجومه وتمشيطه لمناطق المعارضه وان الجيش التشادى مستعد لمواصلة التتبع فى اى عمق !!!
    من حق تشاد كدوله ان تقول ما تريد ومن حقنا ايضا ان نسمع عن ان جيشنا بدا يمارس مهامه الاساسية !!!

  9. زووووووول كتب:

    افليقا سلااام
    شفت غير قصة ( نحنا الجبناكم وانتو كنتو قاعدين فى سوق ليبيا !! مفى شيئ خلى العداوات تقوم بيننا وبين الناس ديل )).
    افليقا انت فهمتنى غلط ولا شنو يا اخ انا لم اقصد الامتنان على دبى وافورقى بقدر ما قصدت اعانة الانقاذ لهم ثم تنكرهم لها . واعلانات انتخبوا مرشحكم قرأتها بام عينى فى سوق ليبيا خلال التسعينات .
    كسره :
    المشكله انو جيشنا اعطبر (؟) القصه استدراج وطبعا الزوول المفتح لا يستدرج يا افليقا .
    كسره :
    زى ما بتقول حبوبتنا قصة بكرى للدفاع دى يسويها الله

  10. nono كتب:

    الاخوة لكم التحية/

    عواااااااااااااطف الجانب السياسي (فقيييييييييييييير)؟؟؟

    بس عشاااااااااااان مقعدنا يكون ساااااااابت في البرلمان قلنا نسلم عليكم؟؟؟

    زووووووول حمدلله علي السلامة كنتة في الشمالي عطبرة وله شنووووووو؟؟؟؟

  11. aflaiga كتب:

    زووووووووول : انت تفهمنى زى ما داير وانا افهمك زى ما داير المهم نكون فاهمين !!! حبابك وحباب مشاغلتك الودوده …!!
    جيشنا اعطبر دى حلوه شديد وبالغتا فوكها !!
    كنت احكى لجدى المحارب القديم من زمن الديش ابو ريشه وهو جالس يتناول فى كوب الشاى ابللبن بالحلبه :
    افليقا : تعرف يا جدو الليله الجيش صد هجوم تشادى !!
    جدو : بالله فى ياتو استاد وانتهت كم كم ؟؟!!
    افليقا : استاد شنو يا جدو فى الميدان الواحد ده !!!
    جدو : يا ود ما تقوم كده ولا كده انا قايل فريق الجيش بتاعنا بتاع الكوره وفريق تشاد الكوره بتاعة تشاد بتاع الجيش !! غايتو يا ده ما جيشنا يا دى ما تشادنا !! يا ده ما انا !!!
    افليقا : جدو انت خرفت ولا شنو اشرب حلبتك دى وقوم خش على الضل …

    • البشاوى كتب:

      الزووووووول الرايق والمفتش افليقا
      لكم التحية والود
      افليقا عبارة جيشنا اعطبر دى قيلت بسبب ان الزوووووول قضى اجازته السنوية بالقرب من عطبرة ولذا لزم التنويه

  12. aflaiga كتب:

    خطرفات متقاعد معاشى من زمن الجيش اب ريشه :
    ——
    جدو : وقلت لى بكرى احتمال يمسك الدفاع ؟؟ هو بكرى النوبى ده ما اصلا دفاع من يوم ولدوهو تعرف يا ود الود بكرى ده !! انا ربيتو بيدى دى من جانا فى ( الخاصه ) ضارب البلح انا قلت ليهو انشاء الله قلبك يكون قدر حيلك !! تعرف عمك عبد الرحيم ده مع انو نوبى وعسكرى لكن ناس الجيش ديل عندهم حاجات واعراف كده بيعرفوها براهم !! اصلا قلبى ما رادو لانو الزول الفى الجو ما زى الفى الواطه !! الفى الواطه عارف اى شيئ وبعدين لو بقى كمان مظلى لامى فوق وتحت بيكون ميه ميه !! غايتو جية بكرى دى كان بقت صاح يا ود با افليقا انا بفتكر انو الدفاع مسك الدفاع ..
    افليقا : انت يا جدو الحلبه قامت بيك ولا شنو ؟؟

  13. زووووووول كتب:

    نونو سلااام
    لا يا نونو انا جاى فى اول اغسطس (ضربة الجزاء بالف دولار والاعاده هواده )
    افليقا :
    يحكى ان المتمردين جسروا شديد على ناس المظلات واى هجوم على قوات المظلات نتائجه مضمونه . وفى بداية الانقاذ
    المتمرد لقواته : هجوووووووووم
    قائد المظلات الشاب : هجووووووم
    وبداية معركه عجاجها ركبه
    المتمرد : اه دا ما مزلات ولا شنو ؟؟
    كسره :والله يا افليقا زمان لا الفريق التشادى ولا الديش التشادى يقدر يقول بغم لكن عوجه مافى تب يا افليقا .

  14. nono كتب:

    لا القطن طويل التيلة
    ؟؟؟؟؟؟؟؟؟؟؟؟؟؟؟؟
    لا القطن قصير التيلة
    !!!!!!!!!!!!!!!!!!!!!!!!!

  15. محنك كتب:

    يا اكوانا دى ما جيش بتاع تشاد … ولا جيش تائيينّا … اسلوا حكاية دا مرق من ايد افريقيا وبقى دولى … يجوك ناس فرنسا ما تتكلم يجوك بريتانيا ما تقول شى يجوك ناس عو سام ما تهزر … يدربك اسرائيل ويقول دربت ما تعرف … واله هيروونا ادديييل كده تيب نهنا ديل وين داخل خرتوم … يقولوا بقى فى ماليسيا كتييير ….. هركة شابية بقى هزب وتيب مين شايل سلاهـ ويعمل دشمان … يا بلد دى بقى كبير ولازم نقسموا هته هته او نقعدوا نلموه وكل واهد يهرس هدود بتاعوا … هوا ما يجى داخل … جيش لو شوية جندو نفر جديد .. سلاهـ لو ما متور جيبوا جديد … مفاودات سلام ما تخلوا … كيف دوله تانى يجى وما نداوسو … هتى لو معاه فرنسا ظاتو … وانا اقول لهم ما تنوموا فرنسا بكره بروه يخليكم كراينكم يلالوا ومجاعة وما تلقوا الا سودان دى … وبكره دبى بروه وبردو ما تلقوا الا سودان دى … ما تلفت وتتغفل ساكت … فرنسا دى لو ما سارق منك هاجة وشايف مسلهه ما جا اندك … وهو بشيل وما بخلى ليك وببيع سلاه علشان اخ يكتل اخوه … وهويشيل موارد ويهتفز بالباقى اهتياتى …

    ايكرونه اساغه انت آرف ام بيستهبل ساكت

  16. حاج أحمد السلاوى كتب:

    أخونا محنك ثرو الدينمو ..أفليقا .,.أين أنت يا رجل؟؟ ..والرجال قليل .
    محاورة جميلة وحلوة شدييييييييد .. دى من راسك ..ولاّ من كراسك ؟
    طلع طلع الحاجات التانية المدسوسه زى دى ..وخلينا نبتهج شوية ..وخلى الباقى إهتياتى
    ..اصلو العلاقات التشادية العجيبة دى ..يوم فى السما ويوم فى الواطه حيرتنا وبقينا ما عارفين الحاصل شنو …حسه عليكم الله كدى أحسبو معاى …عمر وإدريس إجتمعوا كم مرة وإتفقوا كم مرة .. واتشاكلوا كم مرة..؟ .بقت الحكاية زى لعب لعب .وما عارفين آخرتا شنو !!
    لاكين داير اقول إنو الراجل القصير الأخرق ده الإسمو ساركوزى شغال تحت تحت..وهو سبب كل الحاجات الحاصله دى..ما فى زول بيقدر يلجموا شوية ويخلى يقعد فى الواطه القريبة منو دى ؟

  17. ودالفتيحاب كتب:

    يامحنك يارهيب
    سلامى قدر اعجابى
    لك التحيه على هذه المطارحه العجيبه دى
    بالله أسألك كانت من راسك على الكى بورد ؟
    بس ذى ماقال عمنا السلاوى بان بان وعليك الامان …
    أمكانيات رهيبة وتؤهلك تبؤ مقعد مفقود فى الصحافه ونشجعك جدا وماتتردد..
    والله سوف يكون لك شأن كبير (واسعلنى من الباقى) .

  18. مُخير كتب:

    يا محنك ياكي ما برررررررراهة
    إنت والله أخوك بتآآآ أنهن كوولنا والله
    والله آأربي بتآآآ جووبا ده هلو جنس هلا وإنت زول يكتب كويس كتير
    وموضوأ ده إنت لازم يوري فيهو أشان ناس كلوو يآرف هاصل شنو ظاتوو،
    أنا إكييف كتير من قصة بتاآآ فرنسا بكره بروه يخليكم كراينكم يلالوا ومجاعة
    وما تلقوا الا سودان دى
    ياخي مبالغة كدي جدعة تاني من بتاع جوبا ده

  19. aflaiga كتب:

    بدات مواهب عربى جوبا تظهر وسلم لامو :
    محنك : هو درديس دى كان بقايل فرنسا بمرق من بلد تاؤوو بسوى شخل سّى دى ؟؟؟ شخل سّى دى ما بسوووه الا زول دمانات بتاا قعاد بتاا فرنسا مااو اكبر من دمانات بتاا خوه بتاا سودان ماااو !!! بادين يا موهاناك يا اكو بتا انا مجااااه بتاا شنو ؟؟ديرديس دى اتا بقايلوو بجيو ماجاااا ؟؟ مجااا دى بيييجى لى ناس اسلا تابانين !! فى شرق بتاع تاشاد ولا قرب بتاا سودان !!! وتكا قايل فرنسى دى اوير ولا شينو ؟؟ فرنسا بياكل درديس وما بياااكل قلاابه فى شان كى دردديس بياكولو قلاابه شان قلابا ما ياكلو ديرديس !!!

  20. ودالفتيحاب كتب:

    زوووول
    مساك الله بالخير
    وعودا حميدا وإنشاالله عاد أجازه كاربه بين الاهل والاصدقاء ورحب بيك وره ثانيه وثالثه وانت تعطر سماء أخوانك ومحبيك…

  21. ياسين شمباتى كتب:

    سلام للكل واخص الصديق العزيز زوووووول بتحايا وتباريك للعودة الجميلة..بس احب اقول ليهو انو افريقيا الوسطى ذاااتها فقدناها,,فقد اعلنت قبل ايام وقوفها التام مع تشاد!!!

    محنك..عينى باردة..اظهر وبان عليك الامان..

    ودقى يا مزيكا……

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s