سيدى الوالى .. حبابك ..

Posted: الإثنين,25 مايو, 2009 by aflaiga in اخرى

والخرطوم فى عدة طلاقها بعد فراقها لواليها السابق وفق قرار المحكمه القاضى بالتفريق بين الزوجين للضرر !! على خلفية الدعوى التى تقدمت بها الولاية ضد واليها السابق بنسخه رئيسية لامير المؤمنين ونسخه لرب امير المؤمنين تطالب فيه بالتطليق نسبة للضرر والغيبه عن القلب والعين وعدم التكافؤ .. تتقدم باسمى ايات العرفان لرب العباد اولا واخيرا ولامير المؤمنين من بعد ان عافاها من اذى واليها السابق وان قيض لها من تامل فيه خيرا ولو ان الخير صار عمله نادره فى زماننا هذا .. سيدى الوالى الجديد ادناه خطاب مفتوح باسم مواطنى الولايه :

 

سيدى الوالى طالما ان الانسان مصر على تحمل امانة السموات والارض وطالما انك قبلت بهذا التكليف مشكورا فاسمع منا نحن مواطنى ولاية الخرطوم :

* سيدى الوالى سمعنا انك اوقفت الحملات فى اول قراراتك ولكنا نشفق عليك من مافيا الحملات فان انت نصرتنا عليهم ااذوك بالتاامر وانت انت نصرتهم علينا اذيناك بالدعاء عليك !!!

* سيدى الوالى سمعنا انك ضد اكياس البلاستيك ونفيدك ان سلفك السابق افرغ كل اكياسنا فلم يتبق لنا ما نضعه فيها فاعمل على ( ملئ اكياسنا اولا ) ومن ثم اوقف الاكياس ودع لنا ما نحمله فيها !!!!

* سيدى الوالى سمعنا انك طهرت القضارف من الذباب ونفيدك سيدى ان الفقر قد دق اسفينا بيننا والذباب فلم يجد هو ما يعلق به ولم نجد نحن ما نهشه عنه فصار الذباب صديقا لاجسادنا المنهكه مصرا على ازعاجنا ما استطاع .

* سيدى الوالى سمعنا انك سوف تعمل على تطبيق الحكومه الالكترونيه فى كل ما يخص المعاملات الحكوميه ونفيدك ان التقنية ستحارب الفساد ان تم برمجتها على ذلك ولكن من يبرمج مستخدمى التقنيه على النزاهه ؟

* سيدى الوالى ان كنت ق جئت لتصلح حالنا من اجل الانتخابات او من اجل ارضاء رب العباد فمرحبا بك ولكن :

* دع الخرطوم تكمل عدة طلاقها واترك لها الفرصه لتضع حملها وان كنت تريد لها الستره فى الدنيا ولك الستره فى اخره فابحث لها عن نفقة طلاقها وعوضها عن ضررها السابق  .

* دع الخرطوم تشيل نفسا شويه من لهثها وراء لقمة العيش ومن ثم كرس فترة العدة لدراسة ايسر الطرق لتعود الخرطوم كريمة ابيه دون ان تغتالك يد الفساد عبر الابعاد او التحييد او الاستقطاب !!!

* سيدى الوالى الخرطوم هى نموذج جمهورية السودان فان انت حكمتها حكمت السودان كله فاحرص على تسجيل اسمك فى سجل ناصع البياض يوم لا ينفع مال ولا بنون ويوم تعرض الاعمال بغير الباور بوينت !!!

سيدى الوالى نحن شعب ولاية مزعج فتحملنا عسى ان يتحمل الله دفاعك عن نفسك يوم الحشر ..

سيدى الوالى افضل ما تبدا به العمل فى الولاية ان تعمل نايم لفتره وسياتيك اهل المصالح يحملون قاربينهم لذبح شعب ولايتك ومن ثم قرر من ستذبح ومن ستقدم قربانا لمن ؟؟؟؟

Advertisements
تعليقات
  1. حاج أحمد السلاوى كتب:

    ولدنا الدينمو .. السيكوباتى ..الرائع .. ابو حمودى (وسروية عشان ما تزعل .. نحنا زعل السُغار ده ما بنقدر عليهو ) …
    سلام .
    سؤال واااااااااااحد سغيروووووووونى كده ( مع الإعتذار ل×ت نونو )..عِدة الوالى الفات ( وفى جيبه سبه لفات ) كمن هى ؟إن شاء الله ما تكون طويلة !!!
    أما الوالى الجديد ده أدوهو فرصة يشيل نفسه شوية ..من مشوار القضارف ..بس ما شايف أى ترحيب وتهانى فى الجرايد بالوالى الجديد..وأنه خير خلف لخير سلف ( الكلام ده صحيح ؟ )..ما اصلو نحنا السودانيين ديل متميزين فى كل حاجة ..وسياسة عفا الله عما سلف لا زالت تعشعش فى عقولنا ..
    والسؤال السغيرونى التانى .. الوالى الفات ( بكل حسناته وسيئاته ) وكتين أصلو كان كويس وشايف شغلو مظبوط فى الولاية حقته .. شالوهو ليه وعينوهو وزير زراعة وهو طبيب ..؟ يعنى أسه ناسنا الزراعيين ديل كوووووولهم مافيهم واحد بيملا العين ( وعندنا واحد ما شاء الله عليهو يملا العين ويزيد كمان .. عرفتوهو ؟) عشان يبقى وزير زراعة ؟ ..ديل مش مفروض يعملوا إضراب.. ديل مفروض يخشوا الغابة كمان..
    المهم والشاهد فى الأمر ..نتمنى للوالى الجديد ( الذى ولاه الله علينا )كل التوفيق والسداد وتطهير البلاد من بلاء وفساد ..
    وخلونا نشوف آخرته شنو !!!

  2. زووووووول كتب:

    افليقا سلااام
    * سيدى الوالى سمعنا انك ضد اكياس البلاستيك ونفيدك ان سلفك السابق افرغ كل اكياسنا فلم يتبق لنا ما نضعه فيها فاعمل على ( ملئ اكياسنا اولا ) ومن ثم اوقف الاكياس ودع لنا ما نحمله فيها !!!!
    انت يا افليقا يعنى المجلس التشريعى دا داير يكسر ليهو تلجه تلجتين ما الاكياس دى شغاله من زمن المتعافى . بعدين تفتكر نشيل حاجاتنا فى شنو قفه يعنى ولا كيس اسمنت ولا ورقة جريده .
    دا كلو كوم اها ناس الصعوط يرجعوا للحقه تانى ولا يعملوا شنو ؟
    يا اخ والله الولايه مشكلتا ما اكياس البلاستيك زى ما تفضلت اول حاجه كدى اليملوها لينا عشان ما يحظروها وهى نضيفه .
    كسره : انها امانه وانها يوم القيامة خزى وندامه!!! وقد كان الصحابة يضربون على تولى الولايه العامه فعل ذلك عمر بن الخطاب مع ابى هريرة رضى الله عنهما .

  3. aflaiga كتب:

    سلاوى ثرو الزول : منورين براقى المرور …
    العده بتاعة الطلاق مى معروفه يا عم السلاوى لكن طبعا فى ظروف بتخلى المطلقه تطلع طوالى تانى يوم للشغل وهى الزروف السعبح وعدم توفر الحب بين الشريكين !! يعنى زعلانين ليها شنو هو كان يعنى مكفينا !!!!
    زوووول : تعرف عودة التمباك للحقق تانى دى بتدخل شباب الجامعات فى الحرج مع انو منهم ناس زمان كانو بيشيلو التمباك فى علية الفيكس !!! لكن فى زمننا ده مافى حرج لانو البنات قربن يسفن !!!!
    شباب : بالله ادونا تمنياتكم وامالكم للولاية فى عهد الوالى الجديد لانو لو قلنا يعنى حيعمل شنو بنكون اديناهو فرصه اولى وهى ( عدم الاكتراث ) والفرصه دى معروف انها هى سبب كل بلاوينا !! مع انو اكترثنا ما اكترثنا كلو واحد !!!
    جاييكم ..

  4. مشاكل كتب:

    سلامز

    نتمنى ان يسمع صوتك يا أفليقا و نحاول نوصل ليه الكلام دا اذا استطعنا

    حاج السلاوي كتب :
    والسؤال السغيرونى التانى .. الوالى الفات ( بكل حسناته وسيئاته ) وكتين أصلو كان كويس وشايف شغلو مظبوط فى الولاية حقته .. شالوهو ليه وعينوهو وزير زراعة وهو طبيب ..؟ يعنى أسه ناسنا الزراعيين ديل كوووووولهم مافيهم واحد بيملا العين ( وعندنا واحد ما شاء الله عليهو يملا العين ويزيد كمان .. عرفتوهو ؟) عشان يبقى وزير زراعة ؟ ..ديل مش مفروض يعملوا إضراب.. ديل مفروض يخشوا الغابة كمان..

    الاجابة

    السودان يطرح مشاريع استثمارية زراعية بقيمة (45 مليار دولار )
    اها انشا الله تكون عرفت

    و الساقية لسه مدورة

  5. سأل واحد مثل سؤال حاج السلاوي

    فرد علية المتحكم في القرار

    زي رد (مشاكل)

    و زاد عليه ان هذه المرحلة هي مرحلة الاستثمار في الزراعة فيشان كدا

    وديناهو الزراعة باقي القبلو سواها كلام “ساكت”

    غايتو بتاع الأكياس ظنيت ما عندو شي غيرها لكن تحت تحت سمعنا انو جهز البديل و في الميناء قرب يخش طوالي اول ما القرار يطلع !!!!!

  6. aflaiga كتب:

    عزت : فى مصر لمن يجى رب الاسره خاشى شايل اكياس الورق وفيها الخضار والفاكهه ويختها فوق الطبليه بيديك احساس بتاع كفاح جميل جدا جدا .. يا ربى حيحصل علينا نفس الشيئ احتمال يجيبو كيس ورق مبطن بى طبقه بولسرينيه زى كيس اللبن الطازه عشان تقول لي بتاع الدكان ادينى فول بى خمسميه وكيس بى ميه !!!
    مشاكل : بالله وصل ليهو النقه دى لو لقيتو وابقى قابلنى لو لقيتو ؟
    بالله والينا السابق ده مشهور بانو بيااااع وبيعرف يسوق كويس ؟؟؟

  7. حنين كتب:

    أفليقا والسمار .
    سلامات .
    يعنى بصات الوالى القديم لسة منتظرنها تقوم تجى بدائل الاكياس للوالى الجديد .ياربى جاية من برة ولا بجيبوها لينا من برة ولا كمان جايبنها من برة …
    نتوقع من الوالى الجديد أن يولى الشارع العام كل الاهتمام يعنى يهتم بأمر الزواج حتى يختفى أطفال المايقوما .توفير وظايف ومشاريع الطالب المنتج ومشاريع الخريج حتى لا تكون هنالك عطالة وبالتالى خمور وحشيش .
    يعمل على إعادة النازحين فى العاصمة الى مواطنهم الصلية وخاصة زوى المهن الهامشية …
    اللهم ولى إمورنا أخيارنا ولا تولى إمورنا أشرارنا ولا تصلت علينا بزنوبنا من لا يخافك ولا يرحمنا .آآآآآمييييييين

  8. نيام كتب:

    السلاوي:
    عرفناهو عرفناهو ودا بملاء العين و يفضل لكن المشكلة ياتو عين..دي عيون الاحسبون و عيونن ما بملاها الا التراب..
    اعتقد انو الوالي القديم الوزير الزراعي الجديد راجل دماغو بتاع بزنيس ..يعني كمان سنة و حتشوفوا موقف سندس و موقف بركات و موقف السوكي في دبي غرب السوق…

  9. حاج أحمد السلاوى كتب:

    ولدنا ..مشاكل ( اما إنت بتاع مشاكل بصحيح ) ..سلام ليك ولكل الجيل الجديد .. انا حاسس كده إنو الوالى الفات فات وفى جيبه سبعة لفات ده قريبك أو من عنديكم ..غايتو حاجة كده ..سؤالى ليك برضو ..الخمسة واربعين مليار دولار دى الحيدفعها منو ؟ ..وعندو منها كم ؟ واسئلة كتيييييرة حاميانى ..وين المستثمرين اللى حيجو ويضخوا ليك 45 مليار دولار فى السودان ؟ إنت تصدق كلام الجرايد والإذاعة والتليفزيون ؟ أول حاجةخلى يكون عندك قانون إستثمار جاذب للمستثمرين بعد داك أعلن عن مشاريعك الإستثمارية .. نحنا قاعدين برة البلد وقابلنا ناس جوا عملوا إستثمار وهربوا بجلدهم وكايسين يرجعوا راس مالهم ما محصلين حاجة .. قبل ثلاث سنوات جاء إلى الخرطوم عدة مستثمرين ( تُقال ) من دول الخليج واجتمعوا فى قاعة الصداقة بالخرطوم وقالوا كلامهم الدايرنو وناقشوا العقبات والمطبات الموضوعة فى طريق الإستثمار من ضرائب إلى جبايات إلى …. إلى ….. واللى إنت عارفو دااااااااااك .لاكين ليوم الليلة ما سمعنا بأنو فى حاجة إتعملت ..وصدقنى مافى زول بيجى ويضخ أمواله فى بلد كوووووولها سماسرة …وكل واحد عاوز حقو قبال المشروع يبدا ..هو ده شنو هو ده ؟ جنس ده أصلو ما شفناهو ..!! قال إستثمار قال !!!
    معليش يا جماعة طلعت بيكم بره الموضوع لاكين الكلام جاب الكلام ..وسؤالى لا يزال قائم ..ناسنا الزراعيين كووووولهم ما بيعرفو الإستثمار فى الزراعة ..والوحيد اللى بيعرف الإسثمار فى الزراعة هو السيد الوالى السابق ؟ طيب ليه من زمااااان ما ودوهو الزراعة ما دام هو أصلاً خبير زراعى بشرى ؟ طيب كويس ..ليه ما يقفلوا كلية الزراعة وكلية شميات الزراعية ما دام ما قاعدين يخرجوا ناس بيفهموا فى الزراعة وإستثماراتها ..؟ وحتى كمان مشروع الجزيرة ما لاقين ليهو زول زراعى يديره غير البروف الزبير ( مع إحترامنا الشديد ليهو …راجل عملى ..بس ليس بالرجل الزراعى !) يا جماعة كلمونا على قدر عقولنا البسيطه دى وفهمونا على قدر ما نفهم ..يعنى البلد كوووووولها ما فيها زولاً بيفهم غير الجماعة ديل .. يحولوهم من وزارة لوزارة ومن ولاية لولاية ؟
    وبرضو خلونا نشوف آخرتا شنو !!!

  10. بشار أحمد بشار (إبن برد) كتب:

    يعني يا أفليقا (يالتريقة ده) شريحة المتضررين حتزيد والناس حترجع للجراكن والقزاز تاني عشان تشيل فيها (زيت الجمجم) وما تقول في نوع (زيت) بيمسح بوهية الأكياس ظاتا ليتلون الزيت بلون البوهية كابيتو؟؟؟؟

  11. ابكرون كتب:

    العزيز افليقا والمتداخلين
    تحياااات :
    ———————-
    في دول الخليج وبريطانيا وغيرها للآن الاكياس موجوده في المجمعات والبقالات الخ ….لكن حقو نحث الوالي الجديد علي كيفيه التعامل المتحضر مع فارغ هذه الاكياس …..لو قدام كل منزل هناك برميل قمامة بلاستيكي او لكل منزلين…

    توضع فيه قمامة المنزل بعد وضعها في اكياس مخصصه من قبل اصحاب المنازل …ثم تاتي عربات القمامة المجانية ….والتي يجب ان يزيد عددها بحيث تغطي العاصمة كلها ..(مش 3 عربات لامدرمان يا المتعافي) ياخ امدرمان دي براها عايزه 300 عربية……

    نخلي الوالي يفتش الحلول لنظافة الشوارع ومن بعدها نظافة الناس والمأكل والمشرب والملبس……هنا يظهر التغيير….والعرب ديل ما كانو انظف مننا في شوارعهم وبيوتهم ….الا في عهد الانهيار ده….
    فليبدأ الوالي ببدايل لاحلال مواصلات منتظمة وكافيه وانيقة ورخيصة (بصات / مترو الخ)

    تغطي العاصمة طولا وعرضا…..وليتخلص من الصراصير (الركشات) ومن بعدها الأموات (الامجاد) ومن بعدها العافنات( الحافلات)….وما عفن وتلوث وزحمة العاصمة الا من هذا السرطان النتن الذي يغطي كل متر مربع من شوارع العاصمة……قد يتباكي البعض علي ان في ذلك قطع للارزاق ….لم يلجأ الاغلبية لهذا الاسترزاق الا بعد ان طردتهم اقاليمهم وطردهم الفساد…فليتجهوا بهم للاعمار والزراعة ولترجع ولاياتهم منتجه وجاذبة ووووووو
    لو فعل الوالي ذلك سيرجعنا لرونق ما كنا عليه في الستينات …ومن هنا من الستينات ننطلق عسى ان نلحق بالامم قبل ان ينفخ في الصور…..
    (يعني القصة ما اكياس…القصة كياسة)

  12. البشاوى كتب:

    افليقا
    مظلمة مظلوم رفعت لرد الظلم نسأل العادل الصمد أن يتولى امرها وأمرنا
    ابكرون
    صدقت ليست اكياسا ولكنها كياسة

  13. الصادق ود البركة كتب:

    السلام عليكم إخواننا الكرام وبعد
    الأخ أبكرون بصراحة أضحكتني قولك برميل قمامة لكل بيت أو بيتين لأنو لو ده حصل ستكون موجودة لمدة نهار واحد وبالليل ستسرق وتباع في سوق الله أكبر وكمان حكاية أطفال المايقوما دي عاوزه الناس كلهم ذكور وإناث يخافوا ربهم ويبعدوا من الفاحشة (فمن لم يستطع فعليه بالصوم فانه له وجاء )وصدق الرسول صلى الله عليه وسلم .وشكراً السيد أفليقيا على المواضيع الجميلة التي تكتبها ودمتم

  14. aflaiga كتب:

    ود البركه : وشكرا ليك يا بركه على الطله بعد غيبه وما تنقطع .ز
    اما المايقوما فابسط طلب مننا للشباب انو اذا بليتم فاستترو والبسو الواقى وللبنات اذا بليتن فاستترن وخلوها بدون تبعات !!

  15. ابكرون كتب:

    ود البركة : فيك البركة ….والله كلامك صاح هي اغطية المنهولات بتسرق من داخل البيوت وتباع لك صباحا في الدلالات…!القضية في البداية نحتاج للتربية الوطنية (سرقة المال العام)….ومحاربة الفقر (السرقة بسبب الفقر) …نفتقدهما…..ولا يعلم الا الله متي ياتي من يغرس ذلك في اجيالنا..!
    افليقا :(للشباب انو اذا بليتم فاستترو والبسو الواقى وللبنات اذا بليتن فاستترن وخلوها بدون تبعات !!)….تعرف دي زي خصي الخدم الذكور في قصور الملوك والامراء….يعني مارسوا يا خدم ومتعوا بنات القصر من الاميرات ….بس ما عايزين بطن تنتفخ……..ههههههههههه…برضو السبب الرئيسي الفقر والإفقار…الذي يمنع التحصن بالزواج وحاجة الفتيات للمال…بجانب تلاشي الوازع الديني ونسيان الخلود في نار جهنم …….

  16. aflaiga كتب:

    ابركون ثرو ود الخلا ثرو ود البركه : تعرفو انا قلت الراى بتاع استتروا ده ليه ؟؟؟ لانو العلاجات الكبيره دى بتاخد زمن لمن الشريكين يتفقو والاحسبونيين يتفقو والشعب يتفق بيكون بين كل ود حرام وود حرام فى ود حلال !!!! اسى يا ابكرون لو عندك ماسوره معصلجه وخرطوشا مقدود بتقعد تفتش مفتاح انجليزى لمن القده تملا الحوش وتزلقك ترميك ولا بتليس ليها كيس نايلون فى حنان القده لحدى ما تغير الجلبه ؟؟؟؟ !!!!
    بس ده رايى ببساطه ليسو كيس نايلون فى حنان القده لحدى ما تتفقو المفتاح يكون انجليزى ولا زرديه قباضه !! ولا تقطعو المويه من الاميه ذاتو !!!!!!!!
    صحيح ان الفقر من اكبر الاسباب لانتشار الرزائل لكن فى ناس كمان ماخدين القصه مزاج وموضه .. خش الجامعات شوف ثقافة الجنس معاييرا شنو ؟؟؟ تتاكد طوالى انو القصه ما بقت فقر وفاقه !!! القصه شلاقة اشراقه وذيادة لياقه !!!!
    تعرفو مره اكتشفو انو فى زول كابى مهيج فى صهريج الجامعه ؟؟؟!!!!! يعنى الناس تتهيج من النت ولا القنوات الفضايحيه ولا من شكل الشارع ولا من عدم العرس ولا من شنو ؟؟؟ هى ناقصه هيجان ؟؟؟
    سؤال برئ :
    طالب بيجى من البيت بى الف جنيه قديم وبيعزم صحبتو بى خمسه الف وعندو حيل يسوى حاجات غريبه جدا جدا !!! بس دى كيف ؟؟؟؟؟
    اوعو تقولو لى انت نظرية المؤامره مسيطره عليك ؟؟؟؟
    جاييكم تانى …

  17. د.ياسين شمباتى كتب:

    واضم صوتى الى اصوات الاخوة فى رسالتهم الى الوالى_الذى ارجو الا يكون كذاك الوالى الذى ذهب اليه عادل امام_واخاطبه بما خاطب به الحسن البصرى الخليفة العادل الراشد عمر بن عبدالعزيز(ان الدنيا حلم والآخرة يقظة والموت متوسط,ونحن فى اضغاث احلام..من حاسب نفسه ربح,ومن غفل عنها خسر,ومن نظر الى العواقب نجا,ومن اطاع هواه ضل,ومن حلم غنم,ومن خاف سلم,ومن اعتبر ابصر,ومن ابصر فهم,ومن فهم علم,ومن علم عمل..فاذا ذللت فارجع,واذا ندمت فاقلع,واذا جهلت فاسأل,واذا غضبت فامسك)..

    مع امنياتى بحياة افضل فى مستقبل قريب..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s