كلما اورق غصن كان فيه ريح جبرا ..2

Posted: الأحد,31 مايو, 2009 by aflaiga in اخرى

كتب الكاتب مجدى اسحق بسودانيز اون لاين مقالا جدير بالاهتمام والوقوف عنده وما يلى بعض المقتطفات منه  :
عندما تنظر حولك وترى كمية التدهور والإنهيار لا تستطيع أن تستوعب كمية المشاعر و الإنفعالات التي تحاصرك .


إن الوعي بالأزمة وتسليط الضؤ عليها بحق هو الأساس الذي عليه تقوم كل محاولات التغيير والتفكير في بناء واقع جديد.
إن قلم الفاتح جبرا قلما يفرض عليك إحترامه.
قلما يدعوك لقراءة التناقض العبثي في تفاصيل معاناتنا اليومية.تمارس كلماته الساخرة شحنات من الصدمات التي تمنعنا من التبلد و التعايش مع الواقع المتناقض كحقيقة ثابتة.قلما يجعلك تضحك علي معاناتنا ويترك في دواخلنا أثرا عميقا من الحسرو والتساؤل.
الأعزاء
أشعر إنه واجب علينا ان نسطر هذه الكلمات في حق هذا القلم تقديرا لما يقدمه لنا من فرح وسخرية لاذعة تساهم في حركة التغيير و تطور شعبنا.
سأحاول أن أقدم بعض كتابته هنا في محاولة متواضعة لقراءة جماعية لهذا الإبداع ولكي نعطي هذا الرجل حقه فهو يملك قلم مبدع وعقل ذكي يلتقط التناقض العبثي ليخلق منه مقال و حكاوي تشرح وتحلل وتترك الكثير من الأسئلة العميقة.
فيا هذا الأنسان المبدع المعجون في حب هذا الوطن لك التجلة والتقدير ولك الإنحناءة يا صاحب هذا القلم الجميل.
لك الأنحناءة يا عزيزي الفاتح يوسف جبرا.

دعونا هنا ونحن ال بيت الفاتح نسجل كلمات بحق الرجل وما تقولو لى مافى داعى وربنا يجزيهو خير بقدر ما بيسوى !!! ان من اكبر اخطاء الامم هو تجاهلها لمبدعيها ولا رايكم شنو ؟؟؟

Advertisements
تعليقات
  1. حاج أحمد السلاوى كتب:

    الدينمو .. الأفليقا ..السيكوباتى …أبو حمودى ..
    الفاتح دا نكتب عنو ونقول شنو ؟ غايتو الواحد زااااتو ما عارف يكتب ويقول شنو ؟ ..كل الأقدر أقولو ..ربنا يديه الصحة والعافية ..ويطول عمره عشان أهل بيته وأولاده …عشان الناس دى كووووولها محتاجه ليهو ينفس عنها من التناقض العبثى اللى اشار ليهو اخونا مجدى أعلاه..وبصراحة ربنا… ما عاوزين نقصم ضهره بالكلام عنه …فادعو له ربنا يعافيه مما به من علل جسديه …بس هو كمان لازم يساعدنا بسمعان الكلام ويخلى باله من صحته …عشان خاطرنا ..وخاطر كل محبى واصدقاء الفاتح..

  2. البشاوى كتب:

    ابوالافلاق لك الاشواق
    صدقت ياعزيزى من اكبر ازماتنا اننا لانوفى من يستحق قدره وهذه ثقافة سادت فى مجتمعنا منذ امد لان الذى يستحق الشكر والانحناءة يستحى من الثناء والاطراء تواضعا لانه عظيم اخلاق ومكانة وساد مع هذه الثقافة القول الشائع عندما تريد ان تثنى على احد ان تقول له انشاء الله يوم شكرك مايجى وهذا كناية عن ثقافتنا ان نذكر خير الناس بعد رحيلهم فماذا لو تعلمنا ان ننحنى احتراما وتقديرا للمبدعين حتى يتزودوا من هذا الحب ويكبر ابداعهم
    حبيبنا واستاذنا وكبيرنا وتاج رأسنا وشيخنا البروف نهلنا من ابداعه وتعلمنا كيف نتغلب على احلك المواقف بإبتسامة وكيف نرد عن نفوسنا الغم والهم ببعض كلماته وكيف نتوافق مع تناقضاتنا الخاصة والعامة إنه من يصنع الفكرة فنتأملها ونتعلم منها وهو من يكتبنا من الالف الى الياء كلما تقرأ له ينتابك احساس بأن الذى قرأته أنت الذى كتبته وكل مرة تكاد أن تجزم بأن الذى قرأته لن يكتب البروف أروع منه وتظن أن المعين لايحتمل أكثر من روعة الذى قرأت فيدهشك ويبعد الظن عنك وينبئك حمرة عين عدييييل كدة أنك لم تقرأ بعد ماهو أجمل فصرنا ننتظر كل مقال لنتذوق ولنتعلم و((( نتفشَ ))) من المغايص الضاربة جوة الجوة فهو البلسم لمن اراد الخروج من دائرة المواجع وهو الاصل عندما ترى مداخلات احبابه
    متعه الله بالصحة والعافية ونرجو الله ان يحفظه لاهله ولوطنه وللانسانية

  3. مُخير كتب:

    أبو حمودي وعشاق فن جبرا
    أهل الدار والزوار
    سلام
    طيلة السنين العجاف الكذا وعشرين التي شهدت تشكل وعي جيلكم وما سبقه وأعقبه من أجيال لم تشهد ساحة الكتابة الساخرة في الصحافة السودانية قامة لا تطالها شبهة إنبطاح أو تلون سياسي أو جهوي كالفاتح جبرا لهذا زادت شعبيته ولهذا فرض إحترام قلمه وفكره على الجميع ولأنه فنان ودرجة إحساسه عالية بما حوله خاصة مصائب قومه لهذا أصبح ضغط دمه ونبض قلبه كمؤشر الأسهم في الأسواق المالية الكبرى صعوداً وهبوطاً مع تقلبات حالنا المايل ولهذا نحن هنا في هذه الساحة سوداننا التي هي إحدى الشرفات التي تطل على عالمه في الكتابة فغني عن القول بأن الفاتح جبرا مدرسة في أدب الكتابة الساخرة وأننا فضلاً عن مدمني قرائته نعتبر أنفسنا تلاميذ في هذه المدرسة الفاتحية الجبراوية الفاتحة على الشارع السوداني والذي بدوره فاتح على قلبو والله يحفظ قلبو وصحته ويديم عليه نعمة العافية ليواصل إبداعه المتميز ويزين بالبسمة شفاه الغبش داخل الوطن وخارجه.

  4. علي سنكل كتب:

    الأفالقة الكرام . . أفليقا وحمودي وسرويه وسمسمه
    البيت مبارك وربنا يهنيكم فيهو ويجعلو دار عامر بحب الناس ليكم .

    نحن الشعب الوحيد على وجه البسيطة الذي لا يشكر مبدعيه ويرى في ثقافة الشكير دي ملق ، والمضحك تلقى المبدع طول عمره من بيت إيجار لبيت إيجار ولمان يموت ندي أولادو قطعة أرض ، ونكتب عن إبداعاتو في الجرايد ونقيم ليالي التأبين.
    نلاحظ في الشعوب الأخرى من عرب وعجم الكلام عن مبدعيهم وحتى ترى في كثير من الأحيان المبدع لا يجد حرجاً في شكير نفسو والكلام عنها.

    أنا الذي نظر الأعمى إلى أدبي
    وأسمعت كلماتي من به صمم
    حسي دي كان كتبها جبرا عن نفسو كان القيامي قامت وكان وصفناهو بما لم يقله مالك في الخمر.
    وهذه الثقافة ( ثقافة قمط حقوق المبدع ) ، ضارة أبلغ الضرر بالمبدع وحقوقه في الانتشار والصيت ، كما هي ضارة بانتشار الثقافة السودانية.
    أنا أرى أن التربيه الغلط هي سبب رئيسي في ضياع حقوق السوداني المبدع واللا محمد أحمد دافع الضرائب ساكت. التربيه من إنت شافع صغير كلما تجي تتكلم في موضوع تجد من يقهرك ويسكتك : يا شافع اتلهي ، يا شافع إنطم.
    وهذه التربيه تولد إنساناُ خجولاً منضوياً لايستطيع التعبير عن نفسه بصورة واضحة متنازلاً عن كافة حقوقه لأول من ينهره.

    إكتشف الأحسبون هذه الحالة النفسية واستغلوها أفضل استغلال وركبوا على ظهورنا ودلدلو رجليهم.

    حسي أنا من ما رجعت من الأمازون عايز أشكركم على الاستقبال والعزاء الما خمج السويتوهو لينا عند البشاوي وعند جبرا ، لكن خجلان وعايز أقول ليكم إن شاء الله يوم شكركم ما يجي.
    بالله ليه يوم شكركم ما يجي ؟
    تعالو نشكر المبدع الراقي الساخر اللمانا كلنا من حوله كالفراشات حول الزهره.

    شكراً ليك يا الفاتح جبرا يا مبدع يا كتّاب كتابة الجن ، وربنا يخليك لينا ويديك الصحة والمال والجاه والسلطان ، يا أيها الزاهد فبها كوووولها.

  5. aflaiga كتب:

    السلاوى البشاوى خير سنكل : شكرا على المرور الراقى .
    ااى فى داعى ونص وخمسه انو نقيف وقفة اجلال وشكر وتقدير للفاتح جبرا ليييييييييييه لانو هو برضو وقف وقفة اجلال وشكر وتقدير للشعب المتالم وقال ليهو بعد الشر عليك وقال ليهو الشر جاك لانو وعيك ضعيف وام غلف ليهو الكلام ده فى قالب فى منتهى الادب والرقى ( عشان ما يحرجو !! 9 لانو شعبنا ده ممكن يزعل من جبرا لو احرجو ووراهو انو مظلوم لكن ما بيزعل من الظلمو !!!! واهو دى هى فلسفة جبرا الاساسية انك تعرف حقك شنو ووين وبعد داك شوف تشيلو كيف بى طريقتك !! حقيقة انا اقرا واكتب منذ الابتدائية لكنى لم اقرا كما قرات لجبرا ولم اكتب كما كتبت بعد قراءتى لجبرا لاننى بصراحه بعد جبرا اكتشفت ان للكتابه لون اخر وللقراءة لون اخر وطعمين متميزين . الرجل ببساطه ينفذ الى نخاشيش وعيك فيوخز بكلامه المبدع لغلول لسان وعيك فينشطه وينبهه الى ان هناك شيئ ما خطا …
    شخصيا منذ ان قرات للفاتح اول كتاباته احسست بابوة كلماته لما فى ذهنى من فكر واصطحبت وعيى وذهبت خاطبا لابوة فكره المتقد فلم يضن علينا بها ومن ديييييييييك وعييييييك ..
    الرجل بيننا الان يقدم عصارة فكره وابداعه ونضن عليه ببعض ما نسطره شكرا بالله ده كلام ده ؟؟؟

  6. بشار أحمد بشار (إبن برد) كتب:

    سنكلوني : إنك تسكت دهراً وتنطق درراً لاكين وصفك نفسك وإيانا كالفراشات حول الزهرة ( كقروب A) دي كتيرة شوية ونحن مع (الدبابير) الما بتعرف ليها خرطة ولا في إيدها جواز سفر ورحم الله عرف قدر نفسه .

  7. بشار أحمد بشار (إبن برد) كتب:

    تصحيح : رحم الله امريء عرف قدر نفسه.

  8. د.ياسين شمباتى كتب:

    افليقا والحبايب..

    يكفى عنوانك يا ولدنا,,كلما اورق غصن كان فيه ريح جبرا..كتاباته لا يختلف عليها اثنان او الواحد مع نفسه حتى..واحترامه لك يوجب احترامك له ولعظمته..مهما كتبنا واستزدنا لن نوفيه حق او نرد جميلا..حفظه الله من كل سوء وجمعنا دوما على الخير والمحبة..

  9. aflaiga كتب:

    والله يا جماعه بحثت عن ما كتبناه عن ابونا جبرا فوجدت هذا البوست الذى اثرت اعادة انتاجه مره اخرى ليكون ميدانا لمقترحاتنا حول التكريم القادم يلا ورونا رايكم …

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s