ودالشايقى وحريمه الأربعة – للشاعر الدكتور ودبادى

Posted: السبت,6 يونيو, 2009 by حاج أحمد السلاوى in إجتماعية

بصراحة كدا أنا من هواة ومحبى ..بل من  مدمنى قراءة  ما يسمى بالشعر الحلمنتيشى ..هذا الشعر الساخر الجميل الذى أعتبره إمتداد لمسيرة الأخ الفاتح جبرا فى مجال الكتابة الساخرة التى تعالج قضايا المجتمع المختلفة فى قالب بديع يدخل البهجة والسرور على النفوس..ومن هؤلاء الشعراء الكبار فى عالم الشعر الحلمنتيشى – وهم كُثر – هو الدكتور ودبادى ( الذى استميحه عذراً بأنى انقل بعضاً من قصائده إلى منتدانا سوداننا دون إذنه فليعذرنا فى ذلك ) والذى أأدعوكم أن تقرأوا له لتستمتعوا بموهبته الفريده فى الوصف الدقيق ..وهاأنذا أنقل إليكم إحدى روائعه المعروفة بإسم ودالشايقى وحريمه الأربعة التى توصف حالة اخونا ودالشايقى الذى دقّ سدره وتزوج بأربعة نساء وصارت حالته حاله يرثى لها ..

يمر الحول وحول بى زول والزول غول
ونحن ضهابة نحن تعابة لا نقدا ولا محصول
يا قشارة ما معقول يا فقاسة ما معقول عليك
الوليه الفنجريه حلاوة نبق
الوليه الغجرية ودايره دق
البطن ديمه منفوخة طبق طبق
ومره تديها الهواده وترمى زى زولين زياده
الله اريتو الزول يزاول يا حكم صفر ده فاول
البطن بت اللذينة عايزة تعمير القبائل
واب شنب تعبان وعرقه يسيل جداول
يلحس الكوع رغم انفه وكان مزاول
شايله فوق الصفحه سوسو واحد الله
باليمين مقيوده سيسى مالو تانى
اب شنب شايل أمانى تلاتة بركه
وكل حركة معاها بركة فى البطن بنجوسها فرفر
والقطر بوراها صفر والله يستر
عينى باردة ومانى حاسد وربنا يتم المقاصد
والله ما شقالو حنكا ضيعو
والله ما سوالو طفلاً ماسقاهو ورضعوا
الا الرباية خشم بيوت والمعايش ماها توت
والمعذب اخير يموت
قد تقولون حراما .. لستُ مفتى …
ولماذا لستُ أفتى ؟!
شيخنا خريج الخلاوى يكتب البخرة ويداوى
يعشق الماحى وطارته وأبوكساوى
قافل اضانو من البلاوى
لا يفهم إلا فى عرّس وطلق
قد يجيب بعض الفتاوى …
حالته ساتره ونص ُكم
بيعه فى سوق السماسره
بيعه رابحه وبيعه خاسره
وهو حامد متشكر ليس ملحد منكر
يمشى ما بين السرارى ونساوينه الحوارى
لا تغيب عن قلبو ابداً
حاجة سعدة لجنة خردة
وهى حاربت فى المهدية
ثم آلت لجلابط وكراضم
عن قريب ستزور الأبدية
ثم تأتى سعدية وهى رهن الخدمات
ومفاخر ومباخر وعيون فاهمات
تعرف الوقت المناسب لتحاسب ..
ليس فى الدين حرج
آخر العنقود ليلى اصغر الزوجات ليلى
شيخنا ودالشايقى افلح اشترى ليلى مكعكع فتصلح
وتصبين وتنحنح وهو شيخ فى هجيع الليل يمدح
يا ليلى ليلك جنى معشوقك أوه وانى
وتجيب المدح ليلى وتغرود غير هدنه
وتزيد الشيخ قرباً قاب قوسين أو ادنى
أنها دنيا المطالب بأسم ليلى من يطالب
فى مره والمرات كثيره
صلى الشيخ الصبح ونافلة بآيات قصيره
وتعوذ ودعا الله بأن لايتجوز
وتشهق وتمنطق وبراس السبحه طق طق
ومضى يتلو الكتاب …
مرّ بالمال والبنون فتبسم وترنم
وبآيات الطلاق فتجشم وتكشم
وإذا مالاقى مثنى وثلاث ورباع
وقف الشيخ طويلا مثل فحل الضباع
وبكى وهو يرخى من حبال وتريه
وجرى دمع الزراعة المطرية
وقال اين منى زوجة بكرا طرية
وقال اين منى المحلبيه ؟ اين منى السرتيه ؟
فى نقاء كبحيرة طبرية
ودعا الله عروسة ….
خطفها خطفها جاب ضحية هايله ومذهله
وتفوت سنه وتمر سنه وشيخنا عجّز وانتنى
شيخنا يا شيخ السجم خلف زرازير البجم
واحدين اساميهم عرب واحدين اساميهم عجم
بدأ بسيد الخلق ثم زوجات الرسول العشرة
وكل الذين تجمهروا فى البيعة تحت الشجرة
طلحة الخير والزبير ثم سعد وسعيد
ثم ستة مبايعين ثم عبد مايشاء من البنين
عبد الجليل عبدالرحيم عبدالمعين
وتنوع فى القوافى وفى تراكيب المضافى
شمس الدين قوس الدين
ولهب الدين وقمر صناعى الدين
أخر الدور تقول مسحور
وما بخليلو مرةً بور
وزراعته ما بتقع واطه
بقت الطلبات بالدست
حتو درج الخزنة حت
الوليه تنبح كان أصبحت
وان كان مست
خرائط ولفايف ومحزق ومنمق
أنها نكبة روما والمتمه
إن طعم العرس حلو ولذيذ
وهو كاسات افراح ونبيذ
ثم تأتى انتفاخات القرنتى
وباعوض كالنتمتى
لا يقاوم بالدي أم تي
حنى حنى … وتتى تتى … ولا عليا .
_________________

Advertisements
تعليقات
  1. الزهراء كتب:

    سلامات حاج السلاوي
    ادخلت البهجه الى قلوبنا بهذا الحلمنتيش الجميل ودا حال الشوايقه في الوصف وحتى المصيبه بيعملوا منها بسمه
    لك التحيه ايها الرائع كروعة نيلنا العظيم

  2. د.ياسين شمباتى كتب:

    ابونا السلاوى..سلام..
    الليلة جبت سوقك تب..لكن زولك دا الجبرو شنو على جنس دا!!؟؟براهو سواها فى رقبتو..

  3. حاج أحمد السلاوى كتب:

    ولدنا الحاج يسن شمباتى .. وبنتنا الزهراء .. سلام
    زولنا دا راجل مزواج وبيعتبر نفسه قصَر فى حق الكتاب وهو شيخ خريج الخلاوى يكتب البخرة ويداوى..

  4. سهيل كتب:

    هلا هلا … السلاوي وصل …

    شاعرنا الكبير محمد بادي العكودابي شاعر (بيئه) يا دكتور عزت.. وله من شعر البيئه ما تنوء به الكتب.. (فسر يا بشار) .. و هو صاحب قصيدة ( هوي ياوليد) و كذلك ( ام الخير يجيك الخير وصل جوابك الكاتباهو للولد الحتالي).. و ( بعد عشرين) و هو كشاعر الشمال العتيق ( محمد جيب الله الكدكي) يكتب مايرى و يعايش باسلوب سهل ممتع و شيق و فيه الكثير من الدعابه ..

    آخر عهدي به كان يعمل في دولة الإمارات ( ايام كنت طالبآ جامعيآ).. الا رد الله غربته .. و لمريدي شعر البيئه انصحكم بزيارة موقع منتديات محمد النصري للإستزاده من شعر البيئه و الحمنتيش…

    كان هذا مدخل للتنوير الإخوه عن الشاعر الفذ العكودابي أو ود بادي..

    سنعود بإذن الله للتعليق على الموضوع الشيق … لكن يا عمك .. إنت و الزوووووووووووووووول ( شايف كم واو ) و د. عزت ما جننتو بوبي بالتعدد و عذبتو الموحدين و انصار العواطفات عذاب شديد .. و ليس بوست عزت عنكم ببعيد .. و كل ما نسقف تدوها مدماك مدماكين…

    لنا عوده

  5. الزهراء كتب:

    ياها زاتا ولادة قصار العمر
    كل ما تصبح الواطه تلقى عندو شافع وفي النهايه ياكلوا صدقتو
    ولا شنو يا شمباتي

  6. د.ياسين شمباتى كتب:

    الحبيب سهيل..طبعا اخوك من انصار التعدد,لكن كلو حسب القوانين والمعايير والاعراف..لكن (النصرة) ما بننكرها..الحاج جاك فى (الاتو) بتاعك!!!

    الاخت الزهراء..ما كضبتى,ودايما وابدا الناس بترمى مسئولية الولادة المتكررة على المرأة وناسين انو الرجل هو المسئول الاول..

    البوست دا بعيد عن التعدد والزواج والمقصود به الفكاهة والمفاكهة يا اخوانا..فما تسوقوهو بعيد..ولكم ودى..

  7. حاج أحمد السلاوى كتب:

    ولدنا شمباتى..والرائع النجم سهيل .. شكرا لمروركم الراقى ( كما يقول الدينمو ) ..
    والله شمباتى ختفتها من قلمى ..أنا كنت عاوز أقول إنو القصيدة دى ما لبها علاقة بالتعدد ..والمقصود بيهو بالفعل روعة التصوير الشعرى الحلمنتيشى الجميل للدكتور بادى ( أطال الله عمره ) لزولنا ودالشايقى ..ومش حتصدق إنى ترددت شوية فى إرسال البوست اليوم خوفاً من كلام الناس ( الما بتريح ) إننا عاوزين نأجج نار التعدد من جديد ..حاشا وكلا ..لأنى افتكر إنو الموضوع داك الناس ما قصروا فيهو ابداً وأدوهو حقو بالكامل ..وأخونا أبو عصمت سقف الدور التانى ( نسال الله برضو تسقف بيتك الحقيقى ..تلاته أربعة أدوار ) وكل قرد طلع شدرته …وزى ما قال ولدنا التانى ( أو حفيدنا ) سهيل الدكتور بادى غنى عن التعريف وله كم هائل من كل أنواع الشعر الغير الحلمنتيشى ويتمتع بقدرة مذهلة فى الوصف …ولكن ولما هذا النوع من القصائد من نكهة خاصة نحبها جميعاً تخرجنا من الدبرسة ( وعدم العرس ..بالنسبة للشباب طبعن ) وتنفس عننا شوية .. أوردنا هذه القصيدة الرائعة …وهنال أخريات ..بس بعد القطع الناشف القادم ..مش إتفقنا على كدا ؟
    وبصراحة كدا خلونا نضحك شوية …لأنو آخرتا كوم تراب..ونسال الله حسن الخاتمة .

  8. د.ياسين شمباتى كتب:

    ابونا السلاوى..ما تتردد فى اتحافنا بالروائع دى,,وبرضو الايميل عندك ما تقصر فيهو..بس ختينا ال……..

  9. سهيل كتب:

    إنت يا يس الكلام دا ماااااا واضح .. شنو نقط نقط و الجرجره دي..

  10. الزهراء كتب:

    حاج السلاوي نحن في انتظار المزيد حتى لو كان فيه كتاحة تعدديه فأننا لها.
    الناس دي كلها محتاجه تفرج شويه عن همومها فخلينا معاك على طول مبتسمين وبعيدين عن الدبرسه .

  11. الغبشة كتب:

    حاج السلاوى والبقية لكم التحية والتراحيب…………………………. شعر الحلمنتيش به من الواقع ماهو حقيقة وليس خيال ويارب سهيل يقرا ويتخيل نفسو ياربى كان حيكتب نفس الشكل ولا أسؤ؟

  12. البشاوى كتب:

    حاج سلولو لك المودة والحب
    السمار سلام
    قدر العجاجة ماتروق وتجى الطراوة تانى تقوم تهيَج العجاج !!!!!!!!!!!!!!!!!
    الزهراء
    شايفك وقفتى للسهيل شوكة حوت
    شمبانى
    دة ماياهو حال الشوايقة

  13. bakriMusa كتب:

    اخونا الحاج احمد السلاوي
    والجميع الفين سلام

    بوست جميل ورائع كروعة اهلنا الشوايقه ..عايزين المزيد .. ونحن وراك بنزيد..

    وهاكم دي :

    واحد شايقي مسروق قال:ـ

    يعيقك الله يا مجرم

    وكيف اسع تصدقني
    وتسرقك بطنك ان شاءالله وتخليك ديمة متألم
    حضير ان شاءالله يبراكا وفلساً للجيوب يخرم
    والعطش اليحرق الجوف يخلي الفقراء قايمي وقاعدي ليك تعزم
    تعيقني انا..؟.
    يعيقك الله يامجرم وبي مدفع كلاشنكوف يواليك في المسيمع عاد
    يخليك لا سمع لا شوف
    يجيك عميل من السوفيت مرسله ليك قورباتشوف
    شايل حقنة حارقة معاه يحرق ليك قلبك وكبدك وحتى المعدة والشرشوف
    تعيقني انا ..؟
    يمين بالله لو سألوك نان عميان من الاسواق ..
    تسوق الوتّي في ساقي تورها يقطع الخنّاق
    تسوق ليك داف تدقشه ترلة في عقبة يخليك لا ضهر لا ساق
    نان بالله لو سألوك ماتعرف القروش بي وين..
    ناس بانية عمارات وناس راحات وناس تخزين
    حكمت تجيني انا المسكين البلقط بي قرش وقرشين
    تقرشك عقرباً تلقاك فوق الريق يكون جسمك مرطب تب ..
    تقرشك سموم الصيف تخلي وشيك قائم حب
    وِقرْشاً يبلعك يسرِع يلف بى جدة و الصومال و يجيبك لينا تانى هنا
    يرميك فى الرصيف بيجاى يسلب لحمك الفوقك يخليك بس عضام و عصب
    تعيقني انا ..؟
    تطرشق لي برنامج اخطط فيه ليّ سنين
    يطرشق فيك كمبرسون يخليك انت بس ساردين
    ويطرشق فيك بوتجازاً يكون جنبك صفيح بنزين
    وترقد ما نشوفلنا زول يقولنا ماشي في تحسين
    تعيقني انا …؟
    كمان تسرق ملاياتي المن كيسها ما انفكت
    ولا عارف نقوشن كيف
    يفكك مننا الله اليوم قبل باكر
    يخليك لافّي صيف وخريف
    يفك ضلعك تفارق عقلك تسك الماشي فوق عدلك
    زي جملاً عشاه الزيف
    تعيقني انا …؟
    نفسك فااااااتحة ترقد فوق ملاياتي ؟؟
    ترقد يابا في عنبر نصيحه يشابي كايس سيده
    ترقد يابا في قبراً اعوذ ربي من هوله وعذاب سيده
    ترقد يابا في غرفة وتكون مفروشة بالصُرفة ونملها يخمو بالقفة
    لا تشوف جنّة بي عينك ولا في العتبة تتعتّب
    عشان عملك تملّي كعب
    تسرق الجيب تسوي العيب
    انت حرامي ود الكلب
    انت حرامي ود الكلب
    انت حرامي ود الكلب

    ودمتم سالمين

  14. حاج أحمد السلاوى كتب:

    السُمّار الكرام ابناء الكرام ..شكرا ليكم كووووولكم ..
    أخونا العزيز الغائب الحاضر ..( ياخ لوما كنا قاعدين فى بلد واحد … ؟ )
    أنا قصدت عدييييل كدا بالحلمنتيش أطلع لك بره لأنى عارف عندك درر كتييييرة من الشعر الحلمنتيشى الجميل …وأذكر إنك مرة نشرت واحده منهم …فلا تبخل علينا من هذا النبع..دا متنفسنا الوحيد ..حياتنا كلها بقت هم فى هم وغم فى غم ( دى على وزن غرامة غرامة … سجن ..سجن ) عشان كدا الإبتسامة بقت مطلوبة شدييييد وكتر خير الله أخونا الفاتح جبرا بروائعه ..ربنا يديه الصحة والعافية ( بس .. يبطل السجاير والقهوة )..
    وأتمنى من أى واحد عندو شعر حلمنتيشى يكتبه لينا فى المدونة وانا متأكد من ذلك …
    – أسئلة حائرة … أين أخواننا قرن شطة ..محنك ..على سنكل..عباس ركس..همتك ( بتاع الصين والحصين ) ..ولدنا ساتينتود .. وأخونا محمد الزهج خلاص ( يبدو إنو قفلت معاهو خالص ..وبطل الشغلة.. يا خ هون عليك … المسألة ما مستاهلة .. ) وأخواتنا الحرائر همسة شوق ..وأخواتها من العواطفات ..؟

  15. الحاج و سماره سلام

    بوست تمام التمام أصلو الشعر الحلمنتيشي دا ممتع جدا استمتعنا به كثيرا في الجامعة حيتث انبري الحلمنتيشيين وصفا لكل شي ابتداءا من البرالمة و انت طالع و ما والت الى الآن قصائد عصماء ألفوها واحدين و جرت مجرى الأمثال و ما زالت خالدة أهمها ….

    يا سيدة لا
    فايتانا وين مستعجلة
    (دا طبعن لمن البنية فاتتهم للسنة التالية و خلتهم مربتين)

    و
    قف أنك بيطري
    لا طبا بلغت و لا زراعة
    (و دي كنا بنغيز بيها البياطرة)

    و الحكاية استمرت و قيلت مئات القصائد الحلمنتيشية الرائعة في وصف كل شئ و حليل مقهى النشاط و ليالي الأنس… الآن تعشعش الطيور في الجامعة و لا أثر لجنس بشر في الجامعة بعد تسعة بالليل…

    و حليلنا نحن من الجمال و الابداع

  16. ابكرون كتب:

    والله لكن يا سلولو عفيت منك كلام جميل ….
    لكن شيخك ده ممسوخ بشكل :
    ——————————————
    وبكى وهو يرخى من حبال وتريه
    وجرى دمع الزراعة المطرية
    وقال اين منى زوجة بكرا طرية
    وقال اين منى المحلبيه ؟ اين منى السرتيه ؟
    فى نقاء كبحيرة طبرية
    ——————————————-
    بالله هي الزوجة الطريه بتبكي كده ؟ ههههههههه الدمع الهتون…. طريه اصلها سمكه؟

  17. حارة من الايميل من صديق….

    شعر العولمة وبيل قيتس

    طه الضرير والطيب ود ضحوية في طريقهما إلى أبو دليق وكان طه يبحث في اللاب توب تبعه في الإنترنيت بال Wireless. وكان يبحث عن رد من محبوبته. فوجد رداً قصيراً. فأنشد قائلاً:

    شديت ال Pentium واصبح يبرطع جايط

    وال Internet دقش قلبتو صايت صايت

    على ام شعراً حلال ما طولنو وسائط

    وعطشان الغرام ما برونو 2 K.Bite

    فرد عليه الطيب قائلاً:

    الفيك يا طه Virus والله الكريم الشافي

    ومفيدك طبيب حتى إنبقيت Mc Kafi

    غير لخلوخة الهرفة أم قليباً جافي

    وأركز للتجيك يا طه Options مافي

    استسلم طه وأنشد:

    إيميلك وصل زود علي الهم

    والفكر انشغل ال Ram عليك وال ROM

    يالصلاح جميع أنا والحبيب نتلم

    ويا ساكن الضريح سيدى الحسن Dot Com

    الليلة ام شلوخ لاقيتا عند ال Chat

    و Virus ضرب قلبي ومحى الفايلات

    يوم شافني الفقير البكتب البخرات

    قال Defrag ما بفيد أحسن To Reformat

    بعد ما كت فقير بخراتي Word و Excel

    دقشتني أم رشوم خلت درايفي إختل

    Mother Board القلب الكان زمان Intel

    بقى Chipset رخيص كل ما ربطو أنحل

    الخبر الأكيد اليلة جابو ال Yahoo

    وقال ست البنات إيميلنا مي طارياهو

    ست القوام Hardware نظامو براهو

    غرامك Virus الهجعة البقرض الجاهو

  18. حاج أحمد السلاوى كتب:

    أخوانى الكواشف ..
    إيه رايكم فى الكلمات دى :
    ومضى يتلو الكتاب …
    مرّ بالمال والبنون فتبسم وترنم
    وبآيات الطلاق فتجشم وتكشم
    وإذا مالاقى مثنى وثلاث ورباع
    وقف الشيخ طويلا مثل فحل الضباع
    وبكى وهو يرخى من حبال وتريه

    عندما تقراها تشعر إنو الزول ده واقف قدامك ..غايتو ناس سعيد ديل بكايين جنس بِكا .. اصلو ما معقول !!

  19. و بقوا بكايين و بالعولمة كمان

    (دقشتني أم رشوم خلت درايفي إختل)

  20. bakriMusa كتب:

    اخونا حاج احمد السلاوي ( العمدة ) يا رجل يا زوووق
    ايها الرائع كروعة نيلنا العظيم كما قالت اختنا (الزهراء)
    دائما تسال عن الناس وتتفقد اخبارهم واحوالهم سواء عبر المدونه او عبر الهاتف ادامك الله اخا عزيرا كريما للكل ..
    ونحنا الدنيا ديه دايرين منها شنو ..غير الكلمة الطيبه ..واللمه الحلوه ..والعفو والعافيه .. والشكر كله لله ومن ثم لربان هذه المدونه اللذين جعلوا كل هذا ممكنا.

    عزت/ابكرون (ناس جامعة الخرطوم ادري بشعاب الشعر الحلمنتيشى)
    طلعوا لينا الجميل المثير الخطر ..

    وراجعيين

  21. زووووووول كتب:

    عمنا واخونا حاج السلاوى سلااااااااااااااااااااااااااااااااااااام
    موضوع جميل جدا والحديث عن تعدد الزوجات يحلو للجميع!!!! . لكن ما اعجبنى فى ود الشايقى انو عمل ثروه قوميه جد جد ونفع اهلو وبلدووحتما نفع نفسو دنيا واخرى لانو سيجد منهم اكثر من ابن صالح يدعو له وبالتالى تتواصل حسناته حتى بعد مماته وهذا من حكم التعدد يا ابكرون شوف الراجل دا :
    واحدين اساميهم عرب واحدين اساميهم عجم
    بدأ بسيد الخلق ثم زوجات الرسول العشرة
    وكل الذين تجمهروا فى البيعة تحت الشجرة
    طلحة الخير والزبير ثم سعد وسعيد
    ثم ستة مبايعين ثم عبد مايشاء من البنين
    عبد الجليل عبدالرحيم عبدالمعين
    وتنوع فى القوافى وفى تراكيب المضافى
    شمس الدين قوس الدين
    ولهب الدين وقمر صناعى الدين

  22. د.ياسين شمباتى كتب:

    الحبيب البشاوى..سلام..والله فعلا الشوايقة ديل مبدعين جدا,بس الناس ما مريحنهم..

    الحبيب سهيل..الجرجرة دى نخليها لى منو؟؟ بعدين كان كلامى بقى واضح بدون نقط تبقى دى عوجة!!!

    الحبيب بكرى موسى..سمعنا انو الحرامى دا سرق منو 10 الف وملايتين!! يعنى كان سرق الديجيتال كان بلغ عنو الانتربول..

  23. سماسم كتب:

    سلام للجميع

    حاج سلاوي لكن اعترف انت عجبك الحلمنتيش وإلا عجبتك فكرة الأربعة

  24. حاج أحمد السلاوى كتب:

    سماسم ..
    القصيدة عاجبانا بالحيل وجميلة والراجل وصّاف بحق …لاكين كمان بشتنة عمنا ودالشايقى دى ما بنقدر عليها ..الواحد اسماء أولاده بعدين ما يعرفهم ونبقى فى شراء الحاجات بالدست… والبت ما اتكست.. ود الشايقى حتوهو حت…. والولية تنبح كان اصبحت وكان مست ..
    الأربعة دى خليناها للشباب ديل ..ناس سهيل والزووووووول ومن لف حولهم ..

  25. سهيل كتب:

    يا عمنا العواطفات ديل ابن يسقفن عدييييييييييييييييييييل .. كل ما ننوم واحده التانيه تصحي .. تقول عاملين ورديه .. .. .. حرًم العواطفات ديل غالبم النوم … الواحده خايفه تنوم و تصحي تلقى نفسها بتسمع في جدول إتنين

  26. الزهراء كتب:

    جدول اتنين ساهل بنقدر عليه الكلام البشتنه ولقيط اكياس النايلون من الشارع (دي في راجلا بقدر عليها) ؟
    السمار الكرام
    تتجلى ابداعات الشايقيه في مختلف انواع الشعر بجانب الحلمنتيش
    فنجدهم مشهورون بشعر المناسبات كالتخرج والزواج(قصائد السيره) وكثيرا ما يحظى الحفيد الاول بأجمل القصائد خصوصا من الحبوبه
    وايضا نجد المديح والرثاء والهجاء
    كما يمتاز شعر الشايقيه بدقه الوصف وجمال التعبير فما ان تبدا بقراءة واحده من القصائد حتى يتداعى الى اذنيك صوت السواقي وتشتم رائحة القيف والنيل وتحس بسمو النخيل عاليا يداعب كل حرف من القصيده
    التحيه لهم اينما كانوا
    ونرجع لموضوع الحلمنتيش واذكر هنا احد الذين يعارضون عمل المرأه قائلا:
    شوف الجات تهز في ضراعه قالت عايزه تقرا زراعه
    حرتت وتيربت بي كراعه عملت في بلدنا مجاعه
    قاعده لينا بالمرصاد عايزه تقرا اقتصاد
    شي استرليني وشي دولار
    لو خليتك ابقى حمار وزيك فاكر الحكايه هظار
    يالفي الهندسه مزاحمانا
    شايله المسطره وفالقانا
    وفي المطبخ يتملا مكانا
    عشان تقعد تسوي غدانا

    مع انه الحلمنتيش مفروض يعالج مشكله الا ان صاحب هذه الابيات استهزأ بكيان مهم من المجتمع
    والحمد لله نسواننا اتعلمن ونجحن واتبوأن اسما المناصب
    ولكم التحيه اعزائي

  27. مُخير كتب:

    الحلوين في كل مكان
    عشاق الشعر الحلمنتيشي
    سلام ونهاركم سعيد وعواطف كمان
    الرائع أبو الحجاج السلاوي: القصيدة جميلة وشكلت مع رصيافتها معلقات شعر الحلمنتيش ورغم مرور عدة عقود عليها ما زالت طازجة وطريفة، أتحفونا بالمزيد ويا جيل سهيل وياسين زودونا بما استجد من الأشعار الطريفة لأبناء جيلكم.

  28. حاج أحمد السلاوى كتب:

    كل الأحبة .. الشايلين المحبة .. حبة .. حبة .
    طبعن لهذا النوع من الشعر ( الحلمنتيش ) وقع خاص فى نفوس الجميع وحبيت أنوه إلى أنو للشاعر الدكتور ودبادى شريط ( كاسيت ) به مجموعة من القصائد الحلمنتيش وغيره ..وهو يلقيها بصوته العذب ويعطيها رونق جميل رائع …آمل ان أتحصل على هذا الشريط وأرسلو ليكم ..وقالوا الكلام سمح فى خشيم سيدو ( فى رواية أخرى .. فى خشم ..بدون تصغير ) ..

    _ الدينمو .. السيكوباتى .. ابو حمودى وسروية ..(فى حاجة ناقصة ؟ ).
    زماااان اخونا أبو عصمت قال مقولةكبيرة وذات معنى.. وأصبح الجيل بعد الجيل يرويها ..وهى الما بيباكينا تانى .. ما بناباكيهو ..وأنا بقول ليك حارم وصلى مالك ؟..

  29. bakriMusa كتب:

    حاج السلاوي والسمار الكرام
    التحايا والود

    ______
    ممو القلب قادر ألمو
    أصلو مجروح جاري دمو
    ضربو زايد..قاسي همو
    قالوا سبب الرجفة والموت
    الحليو الأسمو مـــــمــو
    وأصلو مـــــمــو….
    كمو كطو
    وكطو كمو
    أبوها بابي
    ومامي أمو
    من الجماعة الكل يوم
    قاعد استحموا
    والعطر خمسيـــــــــن متــــر
    حـــرّم تشمو
    ولما تقدل بس تقول
    تقلع ترابا البتمشي فيهو
    عديل تخمو
    طبعو رقه
    لونو منقه
    في أوروبا مارادونا
    وفي بلدنا مافي زيو
    الا تنقا
    و أصلي مما شفت مـــــمــو
    قلت يا ناس دي الملائكة؟
    ولا خلقه
    قالوا خلقه
    قلت انو.. ما أظنو
    وأصلي مما شفت مــــــــمــو
    عقلي فرّ وقلبي دقه
    وبنطلون الجنز طقه
    أي عجور ضقتو بعدو
    لقيتو منقه
    باكو السجاير جوه جيبي
    لقيتو حــقـــه
    الفنيله اللونا أبيض
    فجأة جيت!!
    ولقيتا زرقاء
    ياريتني لو من مويتو
    ألقى ليــا بقه
    ان شالله حتى
    لو فيها شرقه
    ياريتني لو في بحرو
    ألقى ليــــا غرقه
    كنت بغطس
    و ما بدور لي تاني مرقه
    تاني أمرق؟
    وين أقبّـــل؟
    للبعاعيــــــت؟
    عليكم اللــه ديا خلقه
    مـــــــمــو يا ناس ما أزانا
    بي خدودو البرتكانه
    مــــــــمــو يا عالم جمانه
    لا أكل يوم زي عشانا
    كسره بي لبن البطانه
    ولا شرب من زير مغبّـــر
    زي فلانه وفرتكانه
    مـــــــــمــو مافيـــــــــش منو اتنين
    هم مخلوقين براهم
    ونحن مخلوقين برانا
    الفرق……..!!!!!!!!
    نحن بنعوس كسرة في الصاج
    وهم رغيفم بيشتروه
    من أجزخانه
    الفرق……….!!!!!!!
    هم بيمشوا عديييل أفوتو
    ونحن نترجى البكاسي
    ويومي نتلفت ورانا
    الفرق……….!!!!!!!!!
    هم عندهم توليت مكندش
    ونحن عندنا أ……….خانه
    مــــــــمــو حنّـــي عليكي بابا
    تعالي نعمل حبكانه
    يمكن أتعلم
    أحب ناس هاي وأروق
    بدله فاخره واستكانه
    غايتو حأقول ليكي حالي
    كان نفع قولي أوكي
    مانفعت
    قولي ما نافع معانا
    عندي شده
    وبنطلون واحد مرقع
    حالو حالنا ومستوانا
    أبوي مزارع
    يحفر الطين بالطواري
    عرقو نازل
    في هجير الدنيا
    في الصيف والسخانه
    شان ألقط لقمه…لقمه
    شان يتمتم لي…عشانا
    شان يشوفنا
    نقرا نتعلم برانا
    عمي ترزي…وكان تمرجي
    ولادو دسته
    وكلهم ساكنين معانا
    مـــــــمــو يا الجو المكندش
    شوفي كتاحة هوانا
    وأصلي عارف
    بكره يظهر مغترب
    ناكل النيم والزلط
    وانتو بتلوكو اللبانه
    ونحن بنكابد نجابد
    ونبقى في الآخر ضحية
    الشواكيش كع….كرع
    التقول بس بندقيه
    والمآسي الفي جوانا
    كل يوم بتزيد شويه
    الا بس أصبح عزانا
    طيبة القلب البينزف
    وكتين الناس بتشحد
    زكل أطفال التشرد
    لما يمشوا عشان يرقدوا
    ينوموا في نص الشوارع
    يعني ما يلقوا المكانه
    الا بس أصبح عزانا
    طيبة اخلاصنا ووفانا
    وكتين أولاد المدارس
    موت يدافرو..في طريقهم
    شان يكتبوا الحصة
    في حينا وزمانا
    الا بس أصبح عزانا
    حب بلدنا
    حب وطنا
    منبع الخير و الوداعة
    ريحة الطين و الزراعة
    حب تقاليدنا وطباعا
    و فوقا ما بنرضى المهانه

  30. سماسم كتب:

    الأخ ابن موسى لك التحية

    بس ما ورديتنا رد ممو كان شنو بعد ما عرض عليها ها الكتاب المفتوح؟؟؟؟

  31. حاج أحمد السلاوى كتب:

    أخونا بكرى ودموسى ..
    نحنا قبيل شن قلنا.. ما قلنا العندو جنس دا يدينا…وادونا فندقكم ندق ونديكم .. ندق ونديكم ..
    ومنتظرين كمان أبو عصمت ..عندو حاجات كدا مدكنة … أفتح السحارة وطلع الفيها .

  32. سماسم كتب:

    حاج سلاوي سلام – افتح الإيميل

  33. سهيل كتب:

    سلام يا حلوين .. ( حفظتو جدول تو ؟)

    هاكم رائعه ود بادي العكودابي .. وتحمل إسم هوي ياوليد ( تصغير ولد)

    هوى يا وليد يا دلوعة يا مرنوعة
    أعدل إيدك المفدوعة
    واتلحلح واقيف دغرى وواس صدرك
    مع صدرى واتشدع
    ليك الحق شان ولدوك فى اسفنج
    وحتى أول جديد سوهو ليك بالبنج
    وهسع هوايتك إنك تلعب البنق بونق
    وليك الحق عشان فطموك بعد مازدتا فوق سنتين
    وفى سن عشرة كان نومك على الليدين
    غطاك بالشاش وفرشك بحرير الصين
    والبدورو كلو بتلقى غاب قوسين
    ابوك مليان وجيبو سمين وقلبو سمين
    وفاتحلك حساب فى البنك والتأمين وليك الحق
    عشان ما خضتا فى وحل المطر والطين
    ومن الترعة ما سويت شراب الهين
    وما قيلتا فى ضل دومة بى فرعين
    وما شاققتا عرق النيل مع الوزين وليك الحق
    عشان ادمنتا عيشة اللين
    ومشي الاسفلت ما جربتو بالكرعين
    ركوب اللورى فى شمساً تصر العين
    وما عانيت وقوف الصف وراء التموين
    عشان يا انتى ما بتدرى سجل ابواتك البدرى
    دحين اسمع سماك الباكى الزال
    يا ما كانوا تحتوا رجال ابوخنجر وابوشوتال
    والصقر البجيك خوجال صوتن كان يمين جلجال
    ومكسيين كمال وجلال لكن الزمن اسرع
    سيفن بلحس الفقره وما كان برضو بالحقرة
    وكانوا بضبحوا الشقره
    وكانوا بضوقو العادوه نوم الكوع
    وكانوا بموتوا فى شان حرمة (……….)
    الجعلى اب شرابا حار وقالوا بعدى يومو خنق
    والشايقى البياكل النار وفوق نحاسو متخنق
    ودرفون البجا الصقار وحاقب سيفوا ياكل الشق
    والغرباوى عينو شرار وكضب القالوا عندو عرق
    والنيلى البعرفوا كتار على كتل الأسود جرق
    والبطحانى والشكرى وغيرهم من أهل فخرى
    ومنهم أصلى لا بشبع ولا بقنع .. هزى يا وليد
    حصل جربتا كب السارية
    فى القلعة وخلا العتمور
    وشفتا بروقه تتلقص وتتحرقص
    تقول مطويه فى قرقور
    وعاوى الزيفة بنفخ فى
    جبال النقعة زى الصور
    والحصحاص يجرفوا السيل
    يكنسوا على مهاوى الخور
    وقلب الصاقعة يتطرقش
    يكب النار دمار وشرور
    وشفتا الحال عرق مقلوع
    جبل متروم فرع مكسور
    جمال غرقانة بى حالا حد المويه فى الغرغور
    ود اب نادم المسكين نجاتو تحت قرون التور
    والعوتيب عريش يجرى يشيلك وانتى ما بتدرى
    هوى يا وليد …
    حصل سادرتا بالديداب وقدامك
    مراحك وراكب الخباب
    ودربك طولوا يملا العين
    سحاب وغبار ومويتو سراب
    وهوى كرجاك البكاى
    يبكى على ضهور الضمر الانجاب
    وتسرى الليل وما تضوق هجدة
    لو كان النجم ما غاب
    وبعد أيام تجيك لفته
    ويلوحلك فى البوادى سحاب
    وتكرف من دعاش العينة تملا رئاك
    عطر وأطياب
    تلقى الوادى خضر زى تقول
    ماكان خراب ويباب
    وبت ام ساق تقييل من ضحاها
    على المعالى ونسمة الهباب
    وتفرش ليك حزمة نال تحت
    سيالة تريانة فروعها قراب
    وتنفخ كل آهاتك مع المزمار
    تصوغ الحان ملانة شباب
    وتنسي الدنيا كل الدنيا
    ماعندك معاها حساب
    خلاف برقا يشيل حرقاصه
    ورعدا تقول رصاص وكت فركع
    هوى يا وليد …
    حصل صحاك عز الهجعة
    صوت شتماً بعيد مخنوق
    وجاتك شخرة الطمبارى مشتاقاً يسوى القوق
    ونومك طار واتقسم والرشرش صبح مفروق
    واتلفحت نص من توبك الجرجار
    على الدلوكة سايق سوق
    وتلقى هناك بنات بلدك ولاد بلدك
    يعلو الصفقة تقدح فى القلوب الشوق
    ونغم الفال ابشرن يا بنات بالخير
    والجنيات تطير لا فوق
    وكم زغرودة تتفجر تفور بالناس بعد ما تروق
    يعوم فى الصدور وتشابى للمجهول وما بتضوق
    تميل زينوبة زى البان يمين وشمال تودى الطوق
    واخوان ام شلخ ينكبو جوه الداره
    زى صقرا نزل من فوق
    ضرب الصوت والركزة بيفرق الناس
    عشان زينوبة ما بتحوق
    وعاد تتحزم الجنيات وتتنظم تقيف فوق روق
    وكل واحد يهز ضرعاتو والحجبات تزح لافوق
    جفير الخوسة فايت الكوع
    وسيرو مع العضل مطبوق
    والطاقية تحت الحاجب المعقود
    هدية أم زين وما مشرية من السوق
    ويتقدم عريس السمحة رافع صوتو
    كان بسوقوا بيهو النوق
    والعنجاوى ينزل فوق ضهورن
    بس تقول منشحطة فيها بروق
    يبدا مجرو بالترقوة ويتحدر
    مع الضلع القصار ملصوق
    واحمر عين يشم الدم بعد ما يرش بنات
    عمو ويزيدن شوق
    وثابت حيطة لا بتهز ولا بتلز
    وصارى جبينو كلو عروق
    وقال بعد العقد طلقانة ما يحجزوهو
    إلا يخلو ضهروا شقوق
    هناك الحال مغير جد هيجة الناس تفوت الحد
    وكان حجاز مد الليد بتسمع كع
    هوى يا وليد …
    حصل شارفت دغشا بدرى
    فوق حجرة مخانق النيل
    فى سنة تساب والشر ق
    حزم القيف وطفح الكيل
    وشوفتا الهيبة فوق اسيادا
    والشخرى البكتل الحيل
    وشفتا الجارى يحفر فى سروف كوكبنا
    بس داير يشقو عديل
    بصدرو متحزم ومتلقف صفوف فى صفوف
    يحاكى الخيل ومو يتو الهايجة تبلع جب
    وتجقم فى مدالق السيل
    وفوق الرملة مشرور العشارى طويل
    معشعش بين نوايبو الطير
    وحليل جزايرو جاها النيل
    وحالف ما يخلى شبير
    حزم اطرافه يكسر فيها
    بالهدام وينحر فيها بالقرقير
    وبكرة يموصها يشرب طينها
    يزرع فيها شلالات هدير وهدير
    وتكسح مركب النواتى عايمى
    على قرون الموج جناحها كسير
    رواسيها مالى اصابعوا فى المجداف
    يقوم لافوق ويجى من تانى فوق الدفة رافع ايدو
    ينده فى جملة الصلاح واهل الخير
    هناك الموت يمين شافوهو شوف العين
    مافى شفيع ومافى مجير
    تقول الزول يعرف اجلو
    ومكان موتو لولا إنو ما كشفو الإله لى غير
    عاد ما دام رقاب الموج تمد لسناتا
    فوق للحيف تكب الصير
    وشن فضل بلا الغرق البدور ناعى
    وفعلا كانوا يا هو مصير
    ومشت المركب الغرقان بين موجتين
    وطفروا منها النواتا قالوا اخير
    تماسيحاً يقالدوا الموج يصارعوا
    عتاوة العرق الكتالو مرير
    ساعة يعمو بالضرعات وساعة فوق
    صدور ضمة مااتبلت ولو قطير
    ديل يا وليد ولاد النيل
    رضو الهيجة من صدروا
    ومن الطيبة رضعوا كتير
    الواحد فعايلو كتر ونضمو دقاق
    نهرتوا تسوى الفاق ومر لا ضاقوه لا بنضاق
    كفاك يا وليد بلاش فاقات أنا تهتا فى الاشواق
    وما برجع وهسع ضمة لا شايفك ولا بسمع

  34. سهيل كتب:

    إذا سمحتم و لم يمانع عمنا السلاوي .. نستغل البوست دا لتزويد الإخوه و الأخوات ببعض روائع الشاعر ود بادي العكودابي …. حسب تواجدها في مكتبتي الإلكترونيه ( ليست كلها حلمنتيش)..

    كان قلنو نعم .. بنفتح ليكم المكتبه و كان قلتو لأ نشوف مره تانيه تكونوا رايقين

  35. سهيل كتب:

    إنت يا أفليقا مقيل في ضل قمر صناعي الدين دا و مشخت لينا مالك .. إنت ما محتاج تكتب .. إنت بس اقيف تحت الدش الكبير العلي اليمين داك و قول الفي راسك .. اكيد حيصلنا ( بلوتوث)

  36. حاج أحمد السلاوى كتب:

    سماسم ..
    فتحت الإيميل .. رائعة ..رائعة جداً وضحكت لامن زملائى فى المكتب قالو السودانى دا الليلة مالو بيضحك لحالو ( يعنى براهو ) ..والعجيب إنو شاعر القصيدة سعودى على ما أعتقد..يلا يلا طلعوا العندكم كوووول ..وخلونا نضحك شوية .. بلا غم بلا هم .

    الحفيد .. النجم سهيل .. هات ما عندك ولا تبالى .. القصائد دى لاميها لمتين ؟

  37. الزهراء كتب:

    قصيده لمبدع قامه من قامات الشمال
    هذه القصيده شارك بهــا الشاعر الطيب احمدون فى المؤتمر
    الإقتصــــــــادى الذى عقد بالخرطوم فى نوفمبر 1989ميلادى وهى تحكى عن الوضع الإقتصادى فى تلك الفتره ورمز لذلك بمخاطبة الجنيه السودانى بمــا آل إليه

    شـُفـــت بنــات مسيكينـــات دمـوعِــن فـــــى الوجــــه نازلات
    ونازلات فــوق خـُدودِن نــــار وكـــادِن يـَحّــرقِـــن الوّجنـــــات
    شبــه ما شفـــت ليهــــــو مثيــل يميــن تحلــف تقول تــومـات
    أربـــع فــى حجـــــم واحــد وكمـــان فــى القيمــه متســـاويـات
    رديــت الســــــلام وســـألت مــا كتــــــرتَ فــــى الكلمـــــــــــات
    يــا بنــــــوت بِتبكِـــــن ليـــه ومِـــن ويــــن يــا بنــــات جــايات
    قــالـــن لـــىَّ سُبحـــان اللــه نِحنـــــــا أصبحنــــــا منسيـــــــــات
    عــيب يــا أهـــل الوطـــن تنسـونـا نحِنــا الفى أى بيت داخــلات
    زمــــــان كان أى بيــت بِنخشــــو ندخـــل نمشـــى مُحترمـــــــات
    بقــى البعرفنـــا مــا بِسندنـــا لــو كان فــى الأرض واقعـــــــات
    وحتـــى أطفالكُـــن العِرفــونـــا قــالوا علينـــا مــــرفوضـــــــات
    لأننـــــــــا كـــان زمــان بنــوفــر البيهــــــــو الطفل يقتـــــــــات
    وكــان بـِنجـِيبلـــــــــو لعبــه جميـــــــله ونمـلأ طِريفــو حلويــــات
    إلا اليـــــــوم فقدنــــــا القيمه لـــى فد قطعــه مُـو جــايبــــــات
    عليـــك المولــــــى مــاك عــارفنــــا .. ما نحــــن الطِـــــريريدات
    أكيــد بنمــــوت بــلا تــاريــخ مِتـــل مــا مــاتت الشٍلنــــــــــات
    بتســـأل من بِكــانــــــــا بكــانــا كــلو أسباب فــراق وشتــــــــات
    بنبكــــــى على زمــن كان لينـــــا فيهـــو الصــوله والجــولات
    زمــن مــا كــــــان أبونـــا عـــزيز ونحـــن معـــاهو معــزوزات
    صـَــرّع دولار عــلى إسترلينــــى فــى الزمن القديم الفــــــــات
    مــن السُكـــر يجيـــب عشرين ومن الكبريــت يجيــب ميــــــــات
    وللطـــــــالب كتــــاب ومجـــله ريشــــة أقـــــــــلام وكــراســــات
    وللعـــامل فطـــور وغـــداء وعشــاء وأجـُـــرَة مبيت إن بــــات
    وقهــوه وشـــــــاى وبعد دا يغطــى أجــرة التاكســى والبصــات
    زمــن كان فـــى قصـــادو العامــل يخــدم خمســـه يوميـــــــات
    أبونـــا الليــــلى يــالشايفنـــو مـو شبــه الجنيــــــــه العـــــــــات
    ليهــــــو زمــــــن عليـــــل ومريـــض وحتى رُجـــولو مـا ثابتات
    يــوم قــال ..! داير أزور أخـــوانى واشــرِف مطعـــم العُمــــلات
    وقــام من الصبـــــــاح البدرى مــاشى يجــرجـــر الخطـــــــوات
    وصــــــــل شـــــاف الرقيــــــص قــالع ريــال درهــــم ودولارات
    وبينـــــــاتـُن رجــــل عـــاتى وطــويل ومـُفتـــــــل العضــــــــلات
    ده دينـــــــار الكــويت الكــان صديقـــو ونِــدو من سنـــــــوات
    قــام لـِحِـــق الجنيـــه بى رِقـــه جـــــرّا سقـــاهو كـوب شــربـــــات
    وقـــالو قـَسّــــمْ عليــك الليــله معـــزوم التــــــلات وجبــــــــات
    الدولار جــــــا للدينــــــــار قــال لا تعـــــــزمــوا لى أكــــــــــلات
    ده مــا هو المستــــــوى البِيعزمــــو نحن نعادلــوا كَــمْ مَـــرات
    الدينـــار زعـــــــل قال ليهــو لــو كـــــان فيهــا مستــــــــــويات
    أنــا فـــى القيمـــه بـــرضــــــــو بعادلك أحســـب تبقــى كم مـرات
    عروبـــه أصيــــــــلة مــــافى مثيــــــــلا جـــن وإتلمِــــن العُمــلات
    وعمـلات العـــرب بالجمـــــــله شــايـــــلات الجنيه لا فـــــــــــات
    وقــالن مــا بنسيبـــــــو حبيبنــــــــــا نحن نموت معــاهو إن مــات
    وإن إتفرقنــــا تبقــى الأمـــه ضــاعت وصــار مصيـــرا شتــــــات
    شــــــال نفســـــــو الجنيه وختـــــــاهو يادوب حــسَ بالراحـــــــات
    وشـــكَّ عيونـــــــــو فى الدولار .. عيون فارســــــاً تقول جمــــرات
    قــــــــالُو تعـــــال لـِــى يالمــــابينـــى دايــــــر أسمعَّـــك كلمـــــــات
    إتبجحـــت يالــدولار نسيــــــــت نفســـــــك قبـــــــــــل سنــــــــوات
    زمـــن بتشــــــــابى ومــــــاك لا حِقنــــــــــى كُت قدرك تلات مـرَّات
    وكنت تســـــــــاوى رُتبـــة جــندى أمـــام ضــابط بدبـــــــــورات
    بتعـــرف ما إحتقرتــــــــك ليه ؟ وليــه مــا أديتـــــك الصفعــــــات
    عشــــان أهــل الكرم يــى اهـلــــى والضيــــــف عندهــم لـو بــات
    بيشعـــــــــر بى أمـــــــان مــا نالـــو رُضـــع فــى صدور أمُـــــات
    كلام فــارســـاً كســرلو أنـُـــــوف وصِـنديداً كِســب جــــــــــــولات
    يصــــــارع فــى الزمــن مــا لآن قــدُر مــا ختـــو مـن قـــــــوات
    لكــن مــا لقـــى البحميهـــــــــو وإتمـــلأ فى الضهـــر طعنــــــات
    قــالن اظن عرفتــــو البينــــــــــا ابقــو رجــال نضــال وثبــــات
    تراكــم شــفتـــــــو أبونـــا إنهــّــــــار شبــع من الضرب لكمــات
    وكل ما تجيهــو لكمة تخــلى قيمتـــــــو أقــــــلَّ ممــــــــا فـــات
    وكيـــف بالله مـــــا ينهـــــــــار عليهــــو ديونــــــــا مليـــــــارات
    بدل ما تجينـــا حفــارات مـــــن النيـــــــل تحفـــــــر القنـــــوات
    جــانـــــــا حديد وصــار تبريد وجــات تكييــــف وتلاجـــــــات
    كمــــان اللينـــــــــا زاد الـدين صناديقــــــــــاً مــــرابيــــــــات
    وإن كان للقـــطن خليهــــو ما زى الزمـــــــان الفــــــــــــات
    بقـــى البترول يســـــــوو هــدوم ونـًقـّص قيمتـــو كم مــرات
    ونتمنى الكـــــريم يحفـــظ لينــا اشجـــــــار تالــــت الثــروات
    كملِــن الكلام قالن لى أسمـــح لينـــا شــان مــا شـــــــــــات
    شِــل منديلــى أمســـح ليهـــن الدمعه العلـــى الوجنـــــــــات
    وقــــت ليهن وحات إســم الله إنتن عنـــدى معـــــــــزوزات
    وكُنتـن تاكِــلِن فـــى النــاس ولا ماكلات ولا شاربــــــــات
    وكيف بالله عاد ننســـــــاكن إن كان لينـــا عـــــزه وذات
    تعالـــن شرِفِـــن لـــى بيتــى ستــات بيت ومــو ضيفـــــات
    وباكــر يعود ابوكن سيد يخـــش لى أعدانــا فى الحدقــات
    ونتمنــى الكريم يهدينــــا نخدم بـــى عقـــول وثبــــــــــات
    نشِـق مشـوار طويل نبداهــو بالخـُطـى والرجـول مــا شـات
    محل ما نقيف يسير أبنائنــا فيهـــو يكمـــلوا الخطــــوات
    نخدم فــى وطنــــــــا جميع بــى إخلاص ونكــــــران ذات
    وأرضـــو الشاسعــــه نزرع فيهـــا والمليون نسّــوِِى نبات
    بدل ما نجيب عيوش أمريكــا نمــــــلأ المينـــــا جــــوالات
    نـَصّـــدَّر ونـَدِى للمُحتــــــاج ونمـــــــلأ البنك بالعمــــــــلات
    وترجـــع يــا جنيهنـــــــــا عـــزيز وبنـُــوتك فـِـــريحانــات

  38. سهيل كتب:

    جدي سعيد ولد بادي العكودابي

    بعد عشرين حسبتها يابا يوم فوق يوم وعام فوق عام
    حنينكم طش فى طشيش
    ويا مالقيت تملى الحنين جمام
    اتلفحت شال الشوق احادى الراحلة لا قدام
    كسحت شمال وحس طنبوركم الولوال نحاس ابواتكم الرزام
    صليلن يصحى فى الشوق اذا ما نسم النسام
    نزلت قرير اهالى الشان يعشو الضيف بخيلن فنجرى وعزام
    كرفت الطينة ارث الفات
    وما كفانى الا بركت فوق الدار واتنسمت من السام
    شرفت على رمال القوز
    واترحمت على حرزا هناك مركوز
    على راسم سريع النهمة كان ودتوم وكان فى الماضى مو نوام
    ردفت الصيحة فوق الصيحة واتحزمت ابكى رجال
    بكيتَ سيوفن المدروعة فى الحيطان
    وزى ما هم رقادن طال رقادن طال
    بكيت فرواتن المفروشه للجهال
    ويا ما قال ويا ما قال ويا ما عرض الصهال
    نشدت الفى الضريح راقدين عليكم الله يا خالدين
    عليكم عزتن كانت زمن زينكم
    ودنياكم لبن معسول وتشربوا فيها بى هينكم
    جدى سعيد ولد بادى العكودابى دحين يا ابواتى كان بينكم؟
    قالوا اتربى فوق خيلكم ويوم الحارة شايل شيلتو من شيلكم
    وقالوا الهيلو، كانت في العرف، هيلكم
    يخالطكم قداحة الخير ويتحزم وكت شينكم
    قالوا أماتو مو دابن
    عقاب التيه ما بهابن
    حناضل المره شرّابن
    وشكاراتو سمعن قولى قالن سى بدن شكرو
    وقالن لى يمين ما قلت فى جدك كلام قدرو
    وكل القلتو فيه قليل وما قارب عشر عشرو
    الصهالة والوقالة والرقالة وام غره هو ركابن
    الجهنية والقطنية والمحوية وام درة الباريها حلابن
    العشاية والشاشاية والسباية وام ضرة لى ضيفانو بسخابن
    المزروعة والمقروعة والمفدوعة لا برة متمسح ديمة قيسابن
    المفزوعة والمقلوعة والممنوعة بالمرة كان من مافى جيابن
    راكب الفصلوا انسابن ودايما قدمو فى ركابن
    اسود الغابة غلابن وبعرف يكسر انيابن
    حلفوا الشافوا قدحو الحار وشافو كتار وماهو كضب
    قالوا وساعو مركب زان يشيل اطنان وخرسو هلب
    جفير سكينو دمو ينز وداك برادو واسكت كب
    اهل السايحة والمتراوحة خاتمة وعاقبة بى قدامو سوا درب
    ده ماهو كتير على ولدا مربى على ضفاف النيل
    ويوم ولدوه دفنو ابواتو صرتو فوف مراقد الخيل
    عكود الكان بعبر الكيل
    جاتو الدنيا هينة ولينة بالخيرات مشيلة شيل
    سواقى تسوق تلوت الليل
    ونخلوا متنى شايل العجوة والقنديل
    عيوشو مصوبرات كيمان
    وعيش الريف ولد تيمان وخاتى البودة والعسيل
    ده شيتا كم دقون شافنو
    بين شفقة وحرص عبدنو
    والعقال لعابن يسيل
    الا سعيد الطلق الزايلة وخطب بى مالو دارا خالدة كان عزام وباعو طويل
    بساطو الاحمدى المحضور
    غدا وعشيات ملاقية فطور
    وديمة ضيوفو ديل فوق ديل
    يختف من مطايب الدكة لى ضيفانو مو ضباح حميل وسخيل
    طحاناتو ما نامن
    جبال اللقمة كم عامن
    فوق سمنا مصفى تقيل
    ويومو الودع الحبان
    ونورو الضاو تحت التراب ما بان
    كان الفقد فيهو كبير
    وكان اليوم ده ما خاتنو فى الحسبان
    وكان ميراثو كل ميراثو
    قدحا ناز وسيف فولاذ وفروة ناس اصال وعزاز
    وسبحة ملانة يا حنان ويا منان
    قبل العم وقبل الخال بكوا العدام ..
    بكوا الايتام
    بكى الكرم الصبح
    مشلول وكل ابواتو راحو وغابو فى الرهبان
    ونحن عشنا لا زمناً
    قبل ما يبنوا فيه البيت يكوسو الطبلة والجنزيز مع البيبان
    زمان الصالة والصالون
    زمان الرغوة والبالون
    حليل الكان
    حليل الدانقة والديوان
    حليل النافق اموالو وتدى يمينو وما تعرف حسابو شمال
    خليك من يعرفوا فلان
    ده كلو فضيلة فى الاجداد ابت ما تبقى فى الاحفاد
    ومسكت فى النعوش الطاهرة واندفنت مع الجثمان
    وكل مكارم العابرين معاهم راقدة فى شبرين
    وبقت امجادنا كانوا زمان وكانوا زمان

  39. دقرساوي كتب:

    اشكركم جزيل الشكر لهذا الابداع واظهار هذه الروائع التي قل ان يحود الزمان بمثلها ارجو من الله ان يديم تواصلكم الميمون هذا,

  40. الطاهر ابراهيم عبد القيوم كتب:

    الشكر كل الشكر علي كل من ساهم في تقديم هذا البوست الجميل

  41. ياسر كتب:

    ود بادي العكودابي ليس شايقيا والنص فيه نظر ..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s