القزاز والمشمع الخلفى……؟؟؟

Posted: الأحد,7 يونيو, 2009 by الغبشة in إجتماعية

من المعروف لكل عربية قزاز خلفى وهو اساس هذا الموضوع وبالتحديد مايتم كتابته من عبارات عليه وعشان ما يزعلوا محبى الركشات أضفت المشمع الخلفى……..
تحتل العربات التجارية الصدارة بمختلف أنواعها (تكاسى_ أمجاد_حافلات_ هايسات_ ركشات_دفارات _لوارى……….) أما العربات الخاصه فهى فى المرتبة الثانية والحكومية المرتبه الرابعة وقد تمتنع….…….
بعض العبارات التى مرت على وراسخه فى الذاكرة(ماشاء الله _الحمدلله_ لا اله الا الله محمد رسول الله_ تبارك الله_رضاك يارب_ صلى الله عليه وسلم)
(أبو امنه_ خال رؤى_ عم عزو……………)
(لقطة_تحفه_ ما تزعل..؟؟_ فى الليلية-وبعدها صورة ديك- _ربنا اكفينا شر الهايس_ رد الجميل صعب_ حصاد الغربة_حصاد السنين_ غداره_ راجع نفسك_ الدوائر مشغولة حالياً_ هسى بجى_ لالوبناولاتمرغيرنا_ وين ما تمشى ومتين ماتجى ربنا يرعاك_ الزعيم_ أنزف ياجرح_ ابتسم_ ماتشيلى هم_ حال الدنيا………………)
فى رايكم العبارات دى نتاج لشنو؟ ممكن نحلل صاحب العربية منها؟ والاهم بتحس بشنو لما تقرأ أى عبارة فى القزاز او المشمع الخلفى لاى مركبه؟بتوصلك وين تلك العبارات؟ ………………………………………..
طيب ممكن تورونا العبارات القابلتكم؟

 

Advertisements
تعليقات
  1. ابكرون كتب:

    الغبشة سلام:
    زمان سمعته قالوا في واحد محضر درجة علميه في (أدب اللواري) علي وزن أدب المدايح….من اللافتات العجبتني : واحد كاتب بخط جميل (يا إدريس من البوليس)….اما (لحظك الجراح )..ومعاها رسمة عيون جميله ورشرش طويل دي كتيره..ويخيل لي دي بتحددها ثقافة أو سخافة سائق المركبة……..برضو في بتاع لبن بوزعه بكارو …مزركش الكارو وعامل لوحة انيقه بين اللستكين وكاتب فيها (آن حماري…)

  2. الغبشه و زوارها سلام

    عارفه مرة و أنا ماشي على أستوب فاذا بعربة بفنطاز كبيرة (شختت) لي اي فاتتني بطريقة مستفزة لكن ضحكت عندما قرأت ما كتب في مؤخرة السيارة

    (حصل خير)

    لكين يالغبشة أخوانا الخطاطين ديل مالم بيكتبوا مرات (غلط) أي بأخطاء املائية واضحة ما دايرة ليها درس عصر…

    و مرات حاجات محيرة عايزة تفسير مثل ما حيرني مرة في قرائته الى أن استعنت بصديق كدي أنقشوه

    (الرسول فجوله تلعب) !!!

  3. حاج أحمد السلاوى كتب:

    الغبشة ..كل التحايا لك ولكل القبيلة ..
    العبارات المكتوبة على العربات واللوارى والكارو وأخيرا الركشات والحافلات بكل أنواعها من أمجاد مروراً ب روزا ثم الهايس ..ترمز إلى شخصية قائد هذه المركبة .. إذا كانت المركبة جديدة تجده مفعم بالأمل وروح التحدى إلى درجة الإستكبار ( لا علاقة له بدول الإستكبار المعروفة ) خصوصا سائقى الحافلات والبصات الكبيرة ..أما سائقى الركشات والأمجاد الذين لا حول لهم ولاقوة تلقاهم واقعين فى كلمات الحب والغزل المستخرجة من كلمات الأغانى العاطفية شديييييد ( خصوصا الفيها كسير تلج ..قربوا يبقو اخوان صاحبنا سعيد ) ونادرا ما تجد على العربات الخاصة مثل التعبيرات دى .
    ما يحضرن زمااااان لامن كانو أخواننا اليمانية موجودين كاصحاب بقالات فى العاصمة المثلثة ( أكيد كل الكواشف بدأوا من تلك الذكريات الجميلة..كدا ولاّ ما كدا ؟ ) وكانت لهم تعليقات طريفة تتعلق بالبوست فقال أحده تجد اللورى ( لورى زمان)لما يكون جديد صاحبه يكتب عليه .. الأسد … الزعيم …. قاهر الصحراء ..أنا ابوك يا فاطنة ( فاطمة )..الصاروخ عابر القارات ..وعندما تبدا المكنة تخف والحديد يترهل تلقاهو يكتب .. سيرى وعين الله ترعاك..فى العجلة الندامة وفى التانى السلامة ..تجرى جرى الوحوش وغير رزقك ما تحوش ..واخيراً كل لأول ليهو آخر ..
    ونحنا زاااااتنا عاوزين نشوف آخرتا شنو !!!

  4. ابكرون كتب:

    عزت برضها ما عايزه ليها درس ظهر…بمعني خصمتكم بالرسول …عليكم الرسول زحوا ليها المكان خلوها ترقص…..واظن صاحبك بشبه مركبتو بالعروس او الفلم يتاعتو وكل العربات تزح ليها من الشارع

  5. سهيل كتب:

    كل الغبش سلام .. .

    ناس بره يالغبشه بيكتبوا ( النقل الوطني) او ( الترحيل الجماعي) بسسسس

    – الجميل في تلك الكتابات انها تجعلك تفكر كثيرآ و تشغل مخك عشان تعرف القصد منها شنو .. مثلآ من الكتابات التي قرأت .. x60 يعني ( في ستين) ..

    و برضو – D ليا .. يعني داليا .. ….دا كوم و الرطانه كوم .. يعني ممكن تعرف جنس صاحب العربيه من الكتابه … مثلآ اشرنكيل ..دا طوالي تعرفو حلفاوي و ناس عربنتود ..محس … إتانينا ..ادروبات.. و هكذا

    إنتي ماشه بعيد مالك ..الحيكومه ذاتها بتعمل حركات قريبه من دي ..امشي امدرمان من الخرطوم بالكبري ( المعروش) و عايني يمينك .. حتلقي ليك زي 60 يافطه كده مليانه حاجات كويسه زي الاحاديث .. يقوم يجو ناس الإعلانات يخلوها خل خالص…

    لنا عوده

  6. بشار أحمد بشار (إبن برد) كتب:

    الغبشه كيفنك
    قرأت على أكثر من لوري سفري عبارة “عبور المحيطات صعب على العصافير الصغيرة” وقرأت على لوري عبارة ” الفرز نشابو ” وأظنه كان يقصد مخطئاً:القرز نشابو بالقاف والصحيح الغرز بالغين ومرة قرأت على عربة كارو عبارة : من أجل أبنائي تيمناً بإسم الفيلم الهندي الشهير Mother India أما كلمة “التونسية” شائعة جداً في البرنسات والحافلات ومصدرها الطائرة التونسية التي كان يستقلها الذين عملوا في ليبيا وأتوا لإستثمار أموالهم في مجال النقل والمواصلات في السودان وعلى بعض الركشات قرأت عبارة ” تبكي بس ” ليه ما اعرفش .

  7. د.ياسين شمباتى كتب:

    الاخت الغبشة..سلام..واهم عبارة(على كف القدر نمشى ولا ندرى بالمكتوب),ودا بعد ما يكو نالدنيا عصرتو مصرتو..وما ننسى(قشاش الدموع-الرحال-البطحانى-جرح الالم_فى الضواحى.الخ)..

    ابكرون الحبيب..لحظك الجراح دى زى العيون الفى البروفايل بتاعك دى ؟؟

    د.عزت..نهارك سعيد..وقال شاعرنا الشايقى(فجولى يا خلاى اللشوفها),,ودى طبعا واحدة جميلة ورقاصة حاوطوها ليك الجماغة,فزولنا اتضايق وطلب منهم الفجة!!

  8. الزهراء كتب:

    لك التحيه اختي العزيزه الغبشه ليك وحشه والله
    السمار الاكارم سلامات بقدر قاماتكم الشامخه
    ثقافة الكتابه في القزاز الخلفي تطورت لدرجة انه صار البعض يضع كلمات انجليزيه مثل fox ودي غالبا في المشمعات الخلفيه للرقشات وغالبا ما يكون صاحب المركبه شفاتي درجه اولى
    وكذلك اسماء المسلسلات وخصوصا التركيه مثل(غزل- زيزو- وتمضي الايام- مهند)
    واغرب تعليق قابلني كان عباره عن معادله رياضيات (س+ص=ع ) واظنه سواق الرقشه ده كان عندو عقده من المعادلات الانيه.
    وفي حاجات جاتنا من المصريين ولغت الشباب عندهم زي (روش- riwish-طحن-tahn)
    حتى مسلسلات الاطفال نالت نصيبها (فتى الادغال-دراغونبول-بيرين) وغيرها

  9. سماسم كتب:

    الغشة النااااااااااااايرة سلامات ….. كيف الصحة

    برضو يا الغبشة مرة عجبتني في بص عبارة غنيتا للــــــــ 666666 طوالي قمت

    سألت السواق قلت ليهو لكن ابن البادية ما غني لل666666 ديل

  10. aflaiga كتب:

    الغبشه : بالله قرصه هنا انا راكب شماعه لو مافى مقعد
    امدرمان بسته محطة وسطى مقاعد سوسته سواق اسطى
    مجتمع الكمسنجية والسواقين والكماسره هو المجتمع الذى يفرز مثل هذه المسميات وقد ياتى المسمى قبل لولج الساواق او صاحب العربه الجلابى لهذا المجتمع وسرعان ما يغير الكتابه الى 0 الاقارب عقارب . مثلا بعد ان يكون ملدوغ من نسيو الاداهو العربيه او اخو مرتو الاشترى ليهو الحافله .
    عموما اديكى بعض العبارات :
    * واقفين تحننو راكبين تجننو .
    * وضع
    * حنين
    * سلمى يا ظالمه
    * ابو فلانه
    * جدد وضوك
    * الاسد الافريقى
    والعربه او الركشه يتم تقييم صاحبها او سائقها عبر عدة معطيات اهمها :
    شكل العربه
    الابنصات
    الفرش
    المسجل ومؤخرا الام بى ثرى
    البورى المصاحب فى اللوارى السفريه
    اكتمال علامات العربه التوضيحيه
    والكماسره فى خطى الشمال والغرب يهتمون بهذه الاشياء اهتماما كبيرا والكمسارى الما بيهتم بعربيتو زى المرا البيتا وسخان !!
    وكذلك الكمسارى الما بيقعد فى السبت الفوق الكبينه ويقعد يردد مع الابنص الصاجه فى الرمال ويقود عربه افتراضيه فوق السبت ما كمسارى
    الان وبعد ان اصبح السفر قطعه من الفردوس اصبحت الاهتمامات متغيره منها ملئ صبارة المويه البارده فى البص السياحى وتوزيع البارد والفطور ..
    وجاييك ومعليش للزحمه الايامات دى راحل تانى من مكتب لى مكتب جنب البيت يعنى الواحد يكون قاعد فى البيت وشايف المكتب ويجى يفطر فى البيت من الشغل يلقى سمسمه فى الشغل وحمودى فى الروضه !!
    غايتو بنرجع ليكم برواقه بعد كم يوم ..

  11. بشار أحمد بشار (إبن برد) كتب:

    أفليقا : جننتَّ الرحيل جن ، أمشي أدخل في بوست أخوك ود الزبير في المنتدي العام وخد معاك أبكرون عشان نسمع منكم التحف والدرر .

  12. سهيل كتب:

    هوي يا عمك .. أقيف في الصف .. الحافله دي لسه ما ملت .. خمسه نفر و القومه.. عربي عربي عربي

  13. الغبشة كتب:

    سلام ياحبان…………………………….
    والله منورين……………………………..
    اجمل حاجه هى السرحان والخيال مع العبارات دى وخصوصاً لو راكب مواصلات ((يعنى احساس رهيب وجميل يامرطب )) وفيها حكم وفيها البضحك وكمان الببكى،لكن عليكم الله لو يوم زول لمه ليه فى واحد كاتب((كهيعص)) يسالو لى هو قاصد شنو؟وعارف معناها ولا ساكت حركات منو؟
    *أخو الساتره حالها
    *السودان ظريف
    *غرب الفلوجه
    *الشايقية_محسيه
    *حاسدين غرامنا

  14. بشار أحمد بشار (إبن برد) كتب:

    J uvek stojim na redu ولا شنو يا أبكرون؟؟؟

  15. نيام كتب:

    افليقا:
    اما الشاحنات :
    بس تشيل فيني و تودي ، الخمجان ، قلتو حاجة ، ماذا يعمل الحاسد مع الرازق ، بشويش ، فاطنا قالت لي ، تاني تجو

  16. حاج أحمد السلاوى كتب:

    نيام ..
    قديماً ايام مسرحيات الفاضل سعيد صاحب حافلة كاتب : نحنا كدا إنتو كيف ؟
    فى أسماء أخرى طريفة إستعملتها شخصياً فى الماسينجر زى : قليل الدسم .. الفارز عيشتو ..حظى كدا ..العارف عِزو مستريح ..

    -الغبشة .. غايتو فى بلاد بره( القاعدين فيها ) ثقافة التعبيرات الراقصة دى شحيحة جداً .ناسنا فى الداخل ناس بهجة واحاسيس مرهفة رغم الضيق الحاصل ..عشان كدا الحياة ماشة والبسمة هاشة ..الشىء الوحيد اللى لاحظته فى الحافلات هنا.. لأنو مواصلاتهم العامة محدودة.. هى عبارة : تحذير .. وقوف متكرر … !! (وتحذير زااااته مكتوبة بالزاى .. تحزير ..)
    غايتو جنس لغة ..الأعاجم تأثيرهم شديد جداً .. نحنا غايتو لامن نرجع نكون لا بنعرف عربى ..ولا بنعرف إنقليزى ..والدايم الله .

  17. aflaiga كتب:

    الركاب جميعا : حبابكم وست العربيه الغبشه جيناك :
    وعربيتك الحمرا يا سايق المرسيدس الغاتسه فى الرمله تقوم بينا العربيه .
    * المركبات ووسائل النقل حظيت بحظ كبير فى الوجدان السودانى غناء وامثالا وتناولا شعبيا ..
    * الكتابه فى المركبات حقيقة تعبر عن احساس صاحب العربه او سائقها او الخطاط نفسو احيانا يقوم صاحب المركبه باعطاء الخطاط مساحه وجدانيه ليكتب على ذوقو الذى دائما ما يكون مهبب !!!
    من الكتابات ايضا :
    على كف القدر نمشى ولا ندرى بالمكتوب
    عبر المحيط على العصافير صعب
    ما طار طير وارتفع
    x 60
    طع 100 بس
    كل ما نشتل الافراح تجى الاقدار تمد ايدا
    صبحنا وصبح الملك لله
    جر قدام
    وجاييكم تانى …

  18. الأعزاء سلام

    قبل فترة صدر قرار عن محلية جبل أولياء ومن ثم عُمِّم على بقية المحليات يقضي بإزالة جميع أنواع الكتابة عن زجاج المركبات و الذي اعتبره البعض مصادرة لحرية التعبير.

    فالكتابة على المركبات تأتي كإفراغٍ لشحنات وجدانية ومصدر للتعبير عن ذات كاتبها و إنتقاصاً للحريات الفردية، خاصةً إذا علمنا أن السلطات في قرارها الأخير فرضت دفع إيصال مخالفة لكل مركبة تحمل عبارة مهما كان معناها بقيمة (30) جنيهاً.. وقد وصل الأمر حد مطالبة بعض أصحاب المركبات بمسح اسم الجلالة أو الشهادة مع دفع قيمة المخالفة.

    لحد هنا كويسين و بالطبع لم ينفذ القرار خاة بعد تفشي تداعيات المحكمة الجنائية و الحكاية بقت تظليل عديل

    ببعض العبارات و الصور الملونة التي تغطي مرات القزاز كلو و اقتطف لكم منها ما يلي

    – أسد أفريقيا
    – موصو و أشرب مويتو
    – رمز العزة
    – الحسن صاقعة النجم (دي من عندي) لكن لا تستبعد ورودها
    – يمكن ان نتفق على إزالة العبارات التي تخرج عن الذوق العام.. لكن ليس كل العبارات..
    وأخيراً هناك شئ لم نفهمه، كيف يتم تعميم القرار على الولاية بأسرها وهو صادر عن محلية جبل أولياء فقط؟».

  19. خالد مدني كتب:

    الغبشة والاخوان آخر ما كتب علي الركشات كلمة معبره جدا وتحمل في جوفها نبض الشارع واظنها طلعت من مدني وهى : كتمت .

  20. مُخير كتب:

    الأخت الفاضلة الغبشة سلام
    الحبان في كل مكان سلامات
    الموضوع شيق والفعل ليس حكراً على بني أمازونيا، فأبناء شمال الوادي لديهم وبالملصقات كمان ومن عباراتهم المستخدمة لدينا “يا ناس يا شر كفاية قر” و”عين الحسود فيها عود” و”إتمخطري يا حلوة يا زينة”، بل وللأعاجم نصيب مُقدر منها ففي شبه القارة الهندية يهتمون بزينة المركبة الخارجية والداخلية بدءً بالشاحنات مروراً بالحافلات والتاكسيهات إنتهاءً بالركشات التي جاءتنا منهم، ولا يقتصر الأمر على العبارات المقروءة بل اللوحات التي ترسم على إمتداد العربة وكذلك على مار الصهريح في حالة التانكرز وتشمل مناظر طبيعية وحيوانات وحشية غزلان وأسود وطيور كالصقور والنسور والطواويس…الخ، أما العبارات المكتوبة بمختلف اللغات فتشمل مقتطفات من أغنيات وأبيات شعر وحكم وفي حالة باكستان آيات قرآنية بصرف النظر عن المغزى فمن تكون “زدني علماً” أو ” مان كي دعاء جنت كي هواء” وتعني دعاء الأم نسمة من الجنة، ومن أطرف ما قرأت “ديكهـ مقر بيار سي” وتعني “أنظر لكن بعين المحبة” وأخرى “آنكهين كهوول دنيا قوول” وتعني “أفتح عينيك جيداً الأرض كروية ” أي الدُنيا دوارة اليوم فوق بكرة تحت. وخلاصة القول أنها تُعبر عن جزء من ثقافة أو شخصية كاتبها وربما معتقداته عموماً شكراً يا الغبشة على الموضوع.

  21. ابكرون كتب:

    خالد مدني /بشار :
    هههههههه (كتمت )بالتاء ده واحد صديق بشاااار كان في الثغر ….ياخ جننتو جن اسه يكون بشار انتفض وما بعيد ترجعه المستشفي تاني و(شعرت جلده غزت)

  22. الغبشة كتب:

    اهلييييييييييييييييين بالزينين الطيبيييييييييييييين الراكبين والمشمعين والسايقين……
    د.عزت:ديل بعد شويه ممكن يطلعو قرار انك تمسح السواده وكفاك البياضه يعنى لازم عينك تكون اسود وابيض ده اسراف………………
    افليقيا:(كل مانزرع الافراح تجى الاحزان تمد ايدا) اخى من العبارات البتوجع دى وبالاخص لو قريتها وانت قافله معاك……………
    مخير:لكن الباكستانين ما قصروا وانت كمان
    وهاكم دى:
    *************مفطوم اللبن ما بسكتو اللولاى*********
    والى اللقاااااااااااااااءءءءءءءءءءءءءءء

  23. بشار أحمد بشار (إبن برد) كتب:

    خالد مدني / أبكرون : كتمت دي جاية من ورا البسمات كتمتّ دموع بكيت من غير تحس بيَّة ولا جاية من (الكاموتة)؟؟

  24. سهيل كتب:

    كتمت بسكون التاء التانيه يا معلم بشار … ابكرون ورينا قصة بشار الخايف عليها دي .. باين عليها حتكتم..

  25. بشار أحمد بشار (إبن برد) كتب:

    أبكرون /سهيل : يا حليل الثغر الباسم وحليل سنينو وغايتو يا أبكرون جنس (صلبطة)!!!

  26. سهيل كتب:

    يا سعادتو بشار / ابكرون .. شنو لامين الفوطه و حارميننا نقوطا .. فك اللعب و افرش ورقك .. الأتوه لامنو لمتين؟

  27. حاج أحمد السلاوى كتب:

    النجم .. سهيل ..
    يعنى إيه ؟

  28. سهيل كتب:

    إنت يا حاج بدل دا كلو …رسل لي (زياره) اجي اقعد معاك إسبوع كورس مكثف و اهو نطلع بضحكتين حلويييييييين

  29. bakriMusa كتب:

    الغبشة
    والسمار الكرام الفين سلام

    اتذكر في بدايات ظهور (البكاسي) ما تمشي بعيد يا سلاوي .. دي وسيلة مواصلات ايام النميري ..ظهرت ظاهرة الكتابة على البكاسي..وفعلا الكتابة على العربات في كثير من الاحيان تعكس الحالة النفسية للسائق او مستوي ثقافته ..
    من الكتابات القديمه والحديثه التي :

    *نجيبو كتكوت نربى يفوت
    *الوراي ديل بيقرو في شنو؟؟؟؟
    *قديم الحمام
    * واحد كاتب في ركشه (سيدا نايم وانا حايم )
    *الغتاته لزوما شنو؟
    *خليك عادي
    *اقدلي وسكتي الخشامه
    *انت برضو + x عنادك
    *كان راجل حصلنى
    *شاحنة مرسوم على مؤخرتها ( ديك ) ومكتوباً أمام الرسم فى الليلة …

    *(بوكسي)مكتوب فيه (مع Safety)
    *احد العساكر كتب في مؤخرة مجروس (هل أتاك حديث الجنود)

    وما دام بقينا في موضوع الكتابة نخرمج بيكم لكتابات اخري :

    *فى واحد حلفاوى فتح مطعم فى حلفا ونادى الخطاط عشان يكتب ليهو بعض الكتابات الخطاط قاليهو نكتب هنيا مريا . عمك قال ليهو لا ديل كدة بياكلو ومش حايدفعوش اكتب ادفع بالتى هى احسن………………

    *فىواحد كاتب فى المطعم فول بالحمه وناسك يجو يأكلو فول بس بدون اللحمه واحد ساله وقال ليه ياخى انت كاتب فول بالحمه تدينا الفول وين اللحمه قال ليه الشاى ابو غزالتين قاعدين يدوك الشاى ولا قاعدين يدوك معاه الغزالتين0

    ودمتم سالمين

  30. طارق أب أحمد كتب:

    لو كان ده المحطه لصا حبها خضر عيسى
    لوكاندة المحطه لصاحبها خضر عيسى, يقراءة واحد بيتعلم القراءه

  31. نيام كتب:

    bakriMusa:
    سلامة حسن كابوسك…
    اب احمد:
    لمان فريق دينموكييف جاء الامزونة ..اذكر كان مكتوب في صحيفة الايام بالبنط العريض (دينمو كييف يصل اليوم) واحد اخونا قراها ..دينمو كيف يصل اليوم..

  32. سهيل كتب:

    حبيبنا بكري موسى و منه لعمنا الحاج ود عجبنا ( قصدي السلاوي) .. البكاسي بتاعت المواصلات دي زمان كان بسموها ( البرينسات) جمع برينسه .. و على ما أظن فقد إشتق الإسم من ( برينسيس) .. زي ما اهلنا في الخليج بسموا البكس ( وانيت) لأنو الموديل الجاهم منو مكتوب عليهو في باب الصندوق 1.8 وهي بالإنجليزي ون – إيت وتعني سعة المحرك من الوقود فدرج الناس على تسميته بالوانيت إلى يومنا هذا بالرغم من ظهور موديلات (وداد) .. ودي ياعمك خلي افليقا يشرحها ليك … يا مفتح يابتاع حجر العسل إنت

  33. سهيل كتب:

    يا عمنا نيام .. هو بالله دينامو كييف جا هنا ؟ نحن كنا وين ؟ انا خشيت إستاد دينامو كييف في تسعينيات القرن الماضي .. لكن اول مره اعرف إنو جا هنا

  34. bakriMusa كتب:

    الغبشه
    والسمار الكرام

    اناغايتو ناوي لمن ارجع البلد اذا امد الله في الآجال اكتب في (ركشتي)

    (حصاد الغربة )!!!!

    كسرة:ـ
    خالد مدنى لك التحية

    نرجعوا .. ولا نقعدوا ؟؟؟

  35. زووووووول كتب:

    الغبشه سلاام
    بالامس كتبنا تعليقا على مشمعكم الخلفى لكن كهربتنا قطعت .
    غايتو يا الغبشه خليتنا نبحلق فى العربات ساكت .
    حير 2 نا
    ال زارعنا غير الله يجى يقلعنا
    الدكتوره & المهندسه (دى فى العربات الجديده )
    بعون الله تمشى (دى عينة دفره يا ابو الشباب )
    بكرى موسى :
    برضو من الحاجات البتغيظ تلقا دفار مكتوب عليهو مطاحن فلان لطحن الدقيق وزى دا الرد عليهو من عدة وجوه اهمها :
    1/ انو مطاحن دى مفهومه وما محتاجه شرح
    2/ اصلا المطاحن بتطحن الحبوب فشان يبقا دقيق وما فى مطاحن بتطحن دقيق والا تكون زى ساقية جحا .

  36. سهيل كتب:

    مره و انا مفلس بفتش لي في زول يرقعني ( يديني ياسلاوي)من دين .. شفت علي صاحبنا قاعد جنب ست الشاي قبل ما اوصلو قلت في نفسي كدي نشوف محمد بالأول و ننفضو ( نعدمو التعريفه) وبعدين ارجع لعلي… حق الله بق الله محمد طلع مقشط ( مفلس) و ما عندو التكتحو ..لمن جيت راجع لقيت علي ذااتو شتت ( مشى) .. يعني لا لميت في دا و لا داك.. و انا قاعد بتحسر كده جا لوري ماشي .. مكتوب فيهو ( تفتش في الغريق تلقى المطفح فات) …

    عليكم الله دي ما رساله ذو العرش

    • الغبشة كتب:

      سهيل اتعلم ياولدى المطفح ما دايماً طرور ده لو بتعرف الطرور ممكن يكون قشطة يعنى جماده زى الفى اللبن وقع لك(كان ماعرفت الجماده والطرور امشى شارع السلاوى بتلقى محل بشرح ليك)

  37. الغبشة كتب:

    مرحب بيكم فى قزازكم القدامى……………………………
    طارق أب أحمد:ذكرتنى الزول البتعلم القراية وقال(فندك السودان وكان يقصد فندق السودان)
    ياودموسى:بعد الغربه والتلتله اخره ركشة حرام عليك الهنا بعملوا ركشة ابقى راجع بكره،قول بص سفرى سياحى على الاقل.
    زووووووول:ما تبحلق وانت سايق يمكن تلقى التايه وتحل المشاكل من عبارة فى قزاز قدامك مش اخير من تسرح وتفكر مع الشوارع المليانه دى وتجى تخرمج لينا وتقول تعدد وما تعدد.
    ***من الحاجات الطريفه الكتابه من غير تشكيل او فواصل تلقى نفسك شايت فى اتجاه معاكس زى دى(ابوطه) والمقصود(أبو طه)

  38. خالد مدني كتب:

    الجهابذة الكبار ابكرون / بشار والصغيرون الماهو ني سهيل … كتمت يا اعمامنا جاية من الكتمة وهي شدة الضيق وعادة ما تعقبها الكتاحة .. احفظنا يا رحمن … وتصرف علي كتمت فينا وكتمت فيهو وفيهم … والكتمة مطلقا هي كمين ناس المرور … صفا واسترح .

  39. خالد مدني كتب:

    اخونا بكري موسي اجابة علي سؤالك بتاع تقعدو وللا ترجعو فتشت ليك عليها برضو في القزازات الخلفية لسيارات الاحسبون المفحطة ولقيت ليك : تاني تجي … وبركة الجات في الحديد … وجات سليمة .
    اما بلغة ناس سهيل الشمس ديل فبقول ليك كان حنكك عضة بس تعال بتلقى العضة لكن لو حنكك ابني عشك يا قماري فاحسن تعمل ياااع … واهم حاجة النقاطة لكن دي دايره ليها جوكي حار وحديدة سنينة لانو يا عمك الجوكي لو كتمت معاهو بشتت وياما جلابة ركبو الشارع بسبب الجوكية … انا بعرف لي جلابي فقع الروزا بخمسة ركشات … ولو عندك اي سؤال تاني شد لي سلك .

  40. زووووووول كتب:

    الغبشه سلاااام
    تانى قام جاب سيرة التعدد يا غبشه ؟
    خالد مدنى سلااام
    عودا حميدا وذنبا مغفورا هنيئا لعين رأتك فى سوداننا وحامت بتعليقاتكم الانيقه . يا داخل سوداننا رحب بود مدنى (ما الحصاحيصا ) . الملاجظ انك اصبحت مقل جدا من التعليقات فشان كدا اظهر ولا نقوم ندق ليكا خروج للمملكه .

  41. البشاوى كتب:

    الاخت الغبشة
    لك التحية على هذا الطرح الحى لواحدة من ملاحظاتنا اليومية التى تمر علينا ونحن فى الطريق
    من اطرف الاحداث فى هذا الشأن كانت راكبة معاى واحدة حاجة كبيرة وقدامى حافلة مكتوب على زجاجها الخلفى آه يالابيض ضميرك للرائع الطيب عبدالله فتمعنتها الحاجة وقرأتها بصوت عميق 51 يالابيض ضميرك

  42. الزهراء كتب:

    اكتر تعليق لفت نظري هو(واقفين تحننوا وراكبين تجننوا)
    وكان عندنا حافلة ترحيل مكتوب عليها(الفهم قسمه)

  43. الغبشة كتب:

    ……………….ساكت تغنوا على القمر……………………
    ……………….واجعنى فى البحر السكات……………..

  44. سماسم كتب:

    ازيك يا كونان
    انتو يا اخوانا مالكم بقيتوا تقلبوا في الدفاتر القديمة باين عليكم فلستوا !!!!!!!

  45. الغبشة كتب:

    مافلسنا لكن المستجدات مافى نكرر احسن نزيد فى الفات…………….
    …………..رب جهجةً إستقامه…………

  46. التركى كتب:

    أعتقد انو العبارات دى بتوحى بنفسيات وطبيعة السائق أولا والمسئول عن المركبة ثانيا … عشان كدة بقول انو نخليهم يكتبو العايزنو ولو كان خادش للحياء طالما هم قدرو يواجهو أنفسهم اولا واسرهم والمجتمع ثانيا بكلمات مثل هذى , وعلى غير الراغبين غض النظر فخدش الحياء مقياس مطاطى … فى تركيا تزدان مركبات النقل العالمية بروسومات بديعة ورائعة فالمركبة كأنها لوحة فنان فى معرض متجول خاصة (اللوارى) يرسم على المركبة دائر مايدور لوحة واحدة وأحيانا اكثر من واحدة تتأملها وكأنك معرض وليس طريق يمتد مئات الكيلومترات .. كذلك المقولات عبارة عن حكم ورومانسية تقتصر طريقك الى حيث تريد

    كتب أحدهم (+عواطف – محنة = أنا)

  47. زووووووول كتب:

    الغبشه سلااام
    اجمل العبارات التى قرأتها اليوم صاحب مطعم للفراخ كتب عليه مطعم وادى الثعالب .
    واخبرونى عن صاحب تانكر ينقل مياه الصرف الصحى كتب خلف عربته www>kaka>com وكاكا(بتشديد الكاف الثانيه ) بالطبع ليس هو اللاعب البرازيلى .

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s