من خمرة السرور قدم الطاهر الى نسّون امريكا ..

Posted: الأربعاء,10 يونيو, 2009 by aflaiga in اخرى

بدات الحكاية عندما تعبت الحاجه خمرة السرور قدم الطاهر والتى تسكن احدى قرى السودان النائية ، تعبت من البحث عن حل للمشكلات التى ترهق كاهل زوجها حاج اللدر ود اسماعين .. فالحاجه بت قدم الطاهر عانت كثيرا لتفهم ما يجعل زوجها وسائر ازواج القريه والبلد يعانون فى سبل كسب الرزق ويعانون فى ايجاد ما يسد رمق الاسره – بيد انها توصلت عبر بحثها المتواصل والمضنى وبعد ان استعانت بشيخ حسن امام مسجد الحى وشيخه سامية رئيسة نسون السودان  الى ان امريكا هى اس كل المصائب التى يعانى منها بلدها وبالتالى رجال بلدها الذين منهم بالتاكيد حاج اللدر .ولكن دعونا  نرى كيف توصلت بت قدم الطاهر الى الحل الناجع لمشكلات زوجها ورجال بلدتها ولبلدها عامة :

 

جلست الحجه تفكر وتفكر وتوصلت فى النهاية للاتى :

* بما انو امريكا هى سبب كل مشاكل بلدنا ورجالنا يعنى لازم الحل يكون عندها هى شخصيا .

* وبما انو بت قدم الطاهر من اسره محافظة وما بتنكشف على رجال فافضل حل انو تواجه نسون امريكا وتتكلم معاهن بخسوس المشكله دى .

ومن هناك نبعت فكرة ارسال هذه الرساله الى نسون امريكا معنونه الى جميع النسون فى امريكا وبصورة خاصة الى كل من ( كونداليزا رايس )  و ( وهيلارى كلنتون  ) . فالى نص الرساله :

* فى بداية القول بصلى واسلم على الرسول الكريم وكان بتعزنو ولا ما بتعزنو المهم اياهو حبيبنا البنحلفبو وبنعزو .

* تانى شيى اعرفكن بنفسى انا خالتكن خمرة السرور بت قدم الطاهر من السودان .. ااى السودان بتعرفنو كويس ما تعملن رايحات ..

*ثالث شئ نبدابك يا خيتى يا كوندليزى واول بالتبادى كفاره التغيير الوزارى الشالك  وما رضانا والله علا دى سنة الحياه الديمقراطية !! عندكن !! عليكى امان الله كان جيتينا هنى الا يمرقك من الوزارة فراق الحبايب !! وتانى شيئ والله يا خيتى وما بيناتنا مدسه وماك طالبانى حليفه الحاله عندنا هنا ناشفى خلاس وسالت تحت تحت قالولى انتو السبب لى اذانا وانتو السبب فى تعبنا وطبعا انتى دحين ما عندك صفه رسمية تتفاهمى بيها معاى وتورينى الحصل شنو لكن خسمتك بى الغالى مع انى ما عارفه الغالى عندك شنو !! لكن خسمتك بيهو تتوسطى لى عند اخيتى هيلارى دى فى شان تورينا الحاصل شنو ..؟؟

* اها وبعد داك الكلام ليك يا هيلارى يا خيتى انا جيتك عديل ما عارفه كوندليزى تكون ورتك ولا لا علا انا بلخص كلامى فى كم حاجه كده باقى انتو مشغولين وما عندكن زمن زينا للفارغى والمقدودى :

* والله يا هيلارى يختى انا لى زمن بفتش فوق المشاكل الكل يوم بتنزل فوق راسنا دى وفوق الحال البقى على رجالنا ديل وانا فى شان كونى مره مشيت لى اتحاد النساوين حقنا بتاع اخيتك فى الله سامية بتعرفيها مش كدى ؟؟ علا ما فهمت منها شيئ طلعت لى بالحجاب نزلت لى بالغسل مرقت لى بالهجمه الشرسه والكيل بى مكيالين مع انى مشيتلها منستره بى توبى الاصلا ما علق عليهو يوم حاج اللدر وساترنى وساترو فى الحله ومع انى مشيتلها نضيفى بعد كملت ايامى ! علا تقولى شنو ما فهمت منها شيئ الا انو انتن وحكومتكن سبب البلا كلو .

* اها يا خيتى النصيحى لى الله انا مره واضحه وصريحه فى شان كدى استاذنت ابو العيال وكتبتلك المكتوب ده فى شان نستبين منك ومن خياتك وكان ممكن اوجهو لى اوباما طوالى علا نحنا حريم زى بعض وبنعرف حال بعض مع انى ما شايفالك لا انتى لا خيتك كوندليزى عاملات ليكن  لا حنه لا خمره لا دخان لكن تقول شنو اهو برضو نسون والستره والفضيحه متباريات .

* اها يا خيتى بالله عليكى لمن يصلك مكتوبى ده ردى على ما تسوى اضان الحامل طرشا فى شان نحنا والله تعبنا تعب شديد خلاس .

فى الختام مرسل ليكى انتى واختك كونداليزا شوية ويكى وشوية شرموط فى شان تتقوتن بيهن  وشوية حنه وطلح ختوهن فى سكاكاتكن ديل كان تبقن بتشبهن الحروم فى شان نحنا عندنا المره الما محننه وما مجيهه ما مره .. هى سجمى نسيت كوندليزى ما تديها مش عزبه ولا لقتلها راجل بعد فضت من السياسى  ؟؟

رجاء ان يكون الرد عاجلا فى شان نعرف انتو سبب بلاوينا ولا سامية دى بتتكلم ساكت ؟؟؟ وانا لا بقوللك اتحجبى ولا بقوللك انضفى بس بقوللك انسترى على الاقل معانا .. وما تزعلى من كلامى ده ده كلام حريم مع بعضن …

 

Advertisements
تعليقات
  1. aflaiga كتب:

    شباب : صباح الخير تجدون اعلاه نص خطاب خمرة السرور قدم الطاهر الى نسون امريكا الرسميات وفى حلقة قادمة سنتناول نص رد نسون امريكا على الحجه بت قدم الطاهر … دعونا نتداول حول خطاب الحجه …

  2. مُخير كتب:

    الرائع أبو حمودي
    السمار الحبان
    السلام عليكم
    مبالغة وإبداع وخطير عديل كدة يا أفلايقا، وما شاء الله الرحول نتائجه بدأت تظهر، كدي نمشي ونجييك نقراك بالروقة كان الله هون.

  3. سهيل كتب:

    صباح الخير و بركه الجيت بركه الجيت ..آآآآآآآآآآآآآآآآآآآآآي

    اول شي كدي شكل لينا (خمره) بالضمه و لا سااااااااااااكت بالفتحه ؟

    بعدين الحجه دي ماعندها خبر مادلين بت اولبرايت؟

  4. زووووووول كتب:

    افليقا سلااام
    والله ما روعه لكن يا افليقا بالله دى بكم كرت والله حسن كابوس اتبرمك معاك بطريقه ما معقوله كلو كلو .
    قلتا ليا شيخه ساميه ادتا محاضره عن الحجاب والغسل ؟
    كسره .
    ……………………..ليكم احم احم
    ……..و…………….. قد دنا عذابها على ان لاقيتها ضرابها
    خلى بالك الشيخه دى شغاله بمكنه قديمى شويى علا نقول شنو ؟

  5. سهيل كتب:

    الزوووووول دا مالو يا افليقا … شابكنا امريكا روسيا قد دنا عذابها …الخ … دي سنة كم دي ؟ 89 ؟

  6. الصادق ود البركة كتب:

    السلام عليكم يا الجميع دون فرز القرا البوست ده والحا يقراهو بعدين وشكراً يا السيد افليقيا يعني كده قنعت من أن الرجال يحلو مشاكلنا قلت النشوف النسوان؟؟؟؟؟ وبعدين عندي شوية تعليق:
    سامية من وين بقت أخية في الله لهيلاري ولا كوندي؟

  7. nono كتب:

    ابي افليقا/لك التحية

    ياااااخمرة السرور قدم الطاهر ليه اللفه الطويلة دة؟؟؟؟

    هو القاااااااااااال ليك امريكا هى السبب في كل المشاكل الفي بلدنا ورجالنا ده

    كذب عليك …………..؟؟؟

    ساااااااااااااامية دة اكلت راااااااااااسك حلاااه!!!

  8. aflaiga كتب:

    بتنا نونو : طيب ما توري خالتك دى سبب المشاكل شنو بدل تخليها تقابض فى ناس هيلارى وساميه .. اكلت راس منو ؟؟ والله افليقا ده ما ياكل راسو الا السيف ..
    مخير : شكر يا راقى .
    ود البركه : كيف ما اخوات فى الله كما مصدقنى اسال سكوت غريشن .
    سهيل : زووول مره مره بتقوم عليهو ايام 89 لكنه سرعان ما يعود ل 2009
    زووول : كم كرت شنو يا زوول ده هوا الاقمار ساى

  9. أفليقا و المدونين الأعزاء

    خطاب تمام لكن الظاهر قدم الخير ما شافت كوندا كويس أصلو أسمح حاجة عندها (سكاكاتها)…

    كسرة:
    انت يا ابو الأفلاق قاصد النسون بدون الف… و الا خمرة السور ما بتعرف تكتب

  10. lasttarget كتب:

    ما فهمت حاجة . والفكرة والقالب قديم ولا يناسب الزمن الـ نحن فيهو ,,,,, ياخي قديم ومصدي ….

    • الزهراء كتب:

      الاخ last yarget
      مهما اختلف الاسلوب من جدي لقديم والعكس
      فالهدف واحد وكل شيء ليه نواحيه الجماليه وليه رونقه الخاص
      والما عندو قديم ما عندو جديد والنسى قديمو تااااه
      والقديم كان اصلي مابيصدي مهما جار عليه الزمن

  11. سهيل كتب:

    lasttarget
    ما فهمت حاجة . والفكرة والقالب قديم ولا يناسب الزمن الـ نحن فيهو ,,,,, ياخي قديم ومصدي ….

    تأكد إنو العيب لافي البوست ولا في كاتب البوست

  12. ابكرون كتب:

    افليقا تسلم….
    تعرف خمرة السرور تمثل طيبه خالاتنا واتخيلتها (مشلخه مطارق وداقه شفايفها)
    والرسالة فيها صراع حضارات ولو وصلت لكوندا وهيلاري اكيد حيقولوا مجنونه….وزي ما قال ليك د.عزت كوندا اجمل ما فيها خشباتها اقصد سكاكاتها ….خمرة السرور تكون حاسداها ساكت….موضوع جميل ووراه ما وراه …تسلم تاني يا مدرسه

  13. التلب كتب:

    تسلم يا أفليقا يا راقي
    مبرووووووك البيت الجديد لحدى ما نجيك بالدرب

  14. الزهراء كتب:

    الاخ افليقا
    بوست قمه في الروعه
    لكن الحاجه دي ما بالعه حبوب الصراحه عدييييييل كده
    ورتا المكشن بلا بصل بالبارد
    بس كان تودي ليها عريس مع الطلح والحنه للمره العامله زي حصان طرواده دي يمكن نفسياتا تروق شويه

  15. علي سنكل كتب:

    ليه كده يا لاست تارقيت؟ البوست ده من حبوبه أفليقا تجي إنت داخل توووووش وتفليقا!

    كده مش كويس

    أفليقا:
    يا رايع جفيتني وأنا ضايع
    تعال لي

  16. الغبشة كتب:

    افليقيا:لو عارفين السكنه قرب الاقمار بتفك القنوات المشفرة كنا سكناك من بدرى هناك،بس بعد كم يوم ما تعمل ليك قمر براك وتشفروا مننا أبدعت ابدعت
    لايت تارقت:قريتكلام سهيل ولا اعيدو ليك؟

    *********يا اخوانا ابكرون والمرطب ديل اى موضوع يعملوا لينا فيه بيت عزاء ونلقى البكى والردحى ،نسوى ليهم شنو؟

  17. bakriMusa كتب:

    افليقا … الفين سلام
    مبارك البيت والمكتب الجديد

    ابداع جديد يضاف لابداعاتك ..وفي انتظار رد حروم امريكا..
    هسسع (اضان الحامل طرشا ) دي ترجموها ليهن كيفن ؟؟؟

    ابكرون.. سكاكات دي على وزن مساكات .. موش ؟؟؟

  18. زووووووول كتب:

    لاسترقيت
    انت بتاع الانتباهه ولا واحد تانى ؟ بالله عليك الله اتفكفك وادينا عرض اكتافك وغبشة كراعك نحن الكلام دا عاجبنا وشايفنو جدييييييييييييييييييييييييد . انت فهمتو كويس ولا خشيت شمال ساكت . لو ما فهمتو ممكن نفهمك ولو فى حاجه كدا ولا كدا قول لينا عووك .
    كسره : شكر الله سعيك الفاااااااااااااااتحه
    يلا بلاش لمه

  19. علي سنكل كتب:

    سترايكر:
    عندي تعليقين من أمس هنا وعند سهيل ، مشو وين؟
    واللا شلتوني للصالح العام؟

  20. سهيل كتب:

    يا عمنا ” سنكل” .. سلامات .. ما عاش اللي يفكر يشيلك .. إنت ابونا و عمنا .. و كان قلت نشيل ليك سترايكر نشيلو …… سامعني يا سترايكر ؟

  21. lasttarget كتب:

    زووول: برد نفسك وخلى الروح رياضية . ولا اي حاجة لازم يثنوا عليها عشان تكون جيدة أو اى حاجة تنتقد معناها سيئة , يا اخواني انا ما انتقدت بهذا المعني , يعني قالب الهيلاهوب وتيراب والاسكتشات دا والله اصبح ممل ولايشبع المووود. وبعد كدة ممكن نشوف العيب وين , ومشكورين على الرد.

  22. aflaiga كتب:

    ود يا محمد : وين العده بتاعة ابونا سنكل ؟؟ نحنا مش متفقين انو العفش داخل البص على مسئولية الادمن ؟؟ بالله سريع كده شوف العده مشت وين فتش مخازن النظام العام ومخازن البلديه يمكن يكونو كشوها وانت ما عارف مع اننا عارفين انو اسوارك ميه ميه ما بتدخل اى تباع بلدية مع انو بدو يخشو …

  23. مُخير كتب:

    العزيز أفلايقا
    الحبان في كل مكان
    سلام
    الأخ لاصت تارقيت: حيّاك الله ونُكرر الدار دارك، وأتفق معك ليس بالضرورة أن يعجبك الأسلوب أو حتى المقال برمته، وعند التعليق من حقك أن تقول القالب قديم ,ان نقبله لكن “مُصدي” لا نقبلها لأنها ليست النقد الموضوعي المقبول ولأنها البتخلي الزي الزووووول يفقد الروح الرياضية ويكتب كلام لا يعجبك ولا يعجبنا فخلينا أخوان وحلوين. وهاك تعليقي على ما كتبه الأخ أبو حمودي:
    1) أرجعنا إلى لغة دكان ود البصير البرنامج الرائع الذي كان يقدمه الأستاذ عبدالمطلب الفحل في إذاعة أم درمان، وأذكر أن وقتها قام أحد مثل أخونا لاصت تارقيت إنتقد الأسلوب ووصفه بأنه “بلدي خالص”، وأن الأستاذ الفحل عاجز عن التعبير بلغة عربية سليمة، وما زلت أذكر أن من ردوا عليه أعلموه بأن الأستاذ الفحل يحفظ ألفية إبن مالك (وهي قصيدة من ألف بيت تتضمن قواعد النحو والصرف) وأنه أستاذ في اللغة العربية، وأن سر نجاح وشعبية البرنامج الذي إستمر لفترة طويلة أنه يخاطب كل الشارع السوداني من الجدود إلى الأحفاد بل ومن مزاياه أن يُعرف الأحفاد بلغة الأجداد، ويعرف أهل الغرب والشرق والجنوب بلهجة الوسط التي رويداً رويداً أضحت تمثل لهجة معظم السودان.
    2) خرج بنا عن المألوف وكسر الرتابة اللغوية بأسلوب سلس وبسيط وقمة في الطرافة.
    3) توفق في إختيار المرأة كشخصية محورية في السيناريو إن جاز لي وصفه كذلك وقمة الذكاء أنه أخرجه مُعسل “sugar coated” فهو نقد غير مباشر لفرية أو شماعة أمريكا التي يعلق عليها النظام أخفاقاته، وإختار من المعسكر الآخر شخصيات نسوية لضرورة درامية توفر الإتساق في النص.
    4) الحوار مشحون بإنتقادات مركزة تتناول قضايا راهنة وشائكة ومنها على سبيل المثال الكنكشة في الكراسي وما أروع إختزالها في عبارة واحدة على لسان البطلة ((عليكى امان الله كان جيتينا هنى الا يمرقك من الوزارة فراق الحبايب !!)) أي المسئول لدينا ينتقل من والي إلى الوزير أو العكس ومن الداخلية إلى الدفاع لكن الخروج إلا على يد عزرائيل.
    5) يحفل النص بالإحتفاء بتقاليدنا السمحة والتي ترد عفوية دونما تكلف وتمثل إضاءة واضحة وربما رسالة مُبطنة للجيل الجديد من الجنس اللطيف وفيها على سبيل المثال:
    أ) الإعتداد بقوامة الرجل والاحترام للزوج ((شان كدى استاذنت ابو العيال وكتبتلك المكتوب ده فى شان نستبين منك ومن خياتك وكان ممكن اوجهو لى اوباما طوالى علا نحنا حريم زى بعض وبنعرف حال بعض ….الخ )) .
    ب) تأكيد على الخصوصية الجندرية للإناث وتشديد على أهمية الاهتمام بالزينة والمحافظة على الجمال في قولها ((مع انى ما شايفالك لا انتى لا خيتك كوندليزى عاملات ليكن لا حنه لا خمره لا دخان لكن تقول شنو اهو برضو نسون والستره والفضيحه متباريات ..الخ)).
    ج) رغم الضنك وصعوبة الوضع المالي والاقتصادي لابد من الكرم حتى مع الخصوم المحتملين ((مرسل ليكى انتى واختك كونداليزا شوية ويكى وشوية شرموط فى شان تتقوتن بيهن وشوية حنه وطلح …الخ)).
    6) تلمس العجلة كعادة أفلايقا في معظم كتاباته التي لا تخلو من بعض الأخطاء الطفيفة بسبب طابع العفوية المفرطة للنص وهي تُغفر له قياساً بالتركيز في الإمساك بتلابيب الفكرة الأساسية، وربما لو راجع وسبك وعدل لما خرج بروعته الحالية.
    شكراً أفلايقا وده أول غيث البيت والمكتب الجديدين والجديد شديد وزدنا.

  24. علي سنكل كتب:

    مخير:
    البركه في تعليق اللاست تارقيت الخلاك تنثر الدرر وورانا إمكانياتك في النقد الأدبي.
    شغل محترفين عديل كده ، ربنا يخليك.

    ذي تعليق اللاست تارقيت الجاب لينا أدب مخير ده ناس اللغات بسموهو ( سرنديبتي ) واللا شنو يا بشار.

    ومشكور يا أفليقا الفتحت السيره.

  25. سهيل كتب:

    اها يا عمنا سنكل .. لميت في العده ؟

  26. علي سنكل كتب:

    لا والله يا سهيل . . الشايفها دي عده جديده.

  27. سنكلونى – التعليقات نزلت الان
    عند تغييرك للكومبيوتر – او ادخال الاسم والايميل – لابد من مراجعتهما جيدا – لان اى خطاء فى الادخال سوف تحتسب على انها مداخلة جديدة لعضو جديد وبالتالى تننتظر الموافقة على النشر .

  28. مُخير كتب:

    الحبان في كل مكان
    السلام عليكم
    حبيبنا وأستاذنا السنكلوني
    1) Il mio amico Da voi si impara
    2) Ci hanno il dovere di elevare a standard
    3) حتماً تتفق معي في أن الرأي الآخر المعترض المنتقد مطلوب وبشدة هنا وربما نفتقده لأنه دوماً يثري الحوار ولا نُريد من أخينا lasttarget أن يوافقنا الرأي ولكن أن ينتقد بأدب.

  29. سهيل كتب:

    يا سلام علي الأدب

  30. سهيل كتب:

    إديكم سر … : البوست القبل الفات بتاع عزت ( كدي النقول ضرورة حال) .. انا يا مخير كنت اتحامل على العواطفات لدعم المعددين من باب إثراء النقاش و حتى يحتدم الصراع( شفت يحتدم دي) و النار و لعت و غلبني اطفيها ..

  31. سهيل كتب:

    هسي الزول يقرا الكلام دا يقوم يقيم علي الحد و يهدر دمي …. خليكم قراب

  32. مُخير كتب:

    العزيز وجه الحبيب سهيل
    سلام
    المناكفات حلوة يا سهيل، خصوصاً لمن تكون ودية وبأسلوب ظريف وأخوي، لكن محاولة التملص من مواقف مُعلنة دي ما بسكويت، إنت إخترت مُعسكر التعدد مع سبق الإصرار والترصد ولأنك شايف إنو عواطف واحدة ما كفاية، وده رأيك ورأي الزووول وآخرين وبرغم إختلافنا معكم إحترمنا رأيكم لأننا نحترمكم، ونحن نتفهم خطورة موقفك لأنك على وشك وكدة …لكن برضو تجي هسة وتحاول تقول إنو موقفك إفتراضي بغرض أثراء النقاش ده موضوع عاوز بوست لحالو وما حلوة منك تخلي وش القباحة للزووووول براهو !، لأنو بالطريقة دي الدُبل كابين الجاري وراهو ده ما حيلقاهو !!!

  33. سهيل كتب:

    يا حبيبي يا مخير .. هو الزووووووول دا باقي ليك لو عاوز يطبق في زول بيقدر يحوشو ؟.. بعدين الزوووووول دا زول جامد و بيتخاف عليهو …و كفايه كده ماتوديش الزول في داهيه

  34. سهيل كتب:

    تصويب .. ما بيتخاف عليهو

  35. سماسم كتب:

    أفليقا سلام لك وللجميع

    لكن هسع الهدايا الرسلتم خمرة السرور قدم الطاهر لى نسون امريكا بعد

    وصلتن عرفن يستعملنها؟؟؟ يفترض كان ترسل ليهن وفد من الخبرات السودانية

    لنشر الثقافة دي وسط نساء أمريكا وصدقني بعد داك كل طلبات الحاجة حا تنفذ

    فوراً

  36. aflaiga كتب:

    الحبايب سلام :
    سماسم : انا نسيت اقو لليك هى رسلت مع الهدايا كاتلوج برسومات توضيحية وتسجيل صوتى ولنك بتاع فيديو . المره حصيفه وما بتنسى الحاجات دى وعارفه انو فى الغرب اهم شيئ البرزنتيشن .
    شباب : اها ننزل بوست الرد بتاع نسون امريكا على خمرة السرور ولا ننزل اول شيئ خطاب سامية الرسلتو بالحقيبه للسفاره بتاعتنا هناك ..؟؟؟
    بالمناسبه الهدايا بتاعة خمرة السرور بعد تم فحصها فى معمل السى اى ايه المركزى سلموها للنسون بعد شالو نسخه فى مكتبة الكونغرس .. واكتشفو انو العرب ليه ما بيتقدمو !!!

  37. حنين كتب:

    أبو الافالق والمدوناتية الاكارم .
    سلامات
    والله ياأفليقا حاج اللدر دة ماليهو حق أكان يقعد مع الحاجة خمرة السرور دى ويقول ليها بدل ما ترسل الخطاب شديد اللهجة دة لى الخواجيات كان الاجدر يترسل خطاب بنفس اللهجة لى نسوان القادة العرب لتوعيت رجالن يمسكو درب الله صاح ويخلو البسووا فيهو دة وطالقين لى شعوبم القيد يقلدوا فى الخواجات باللبس والرقيص والشخلبة والشخلعة .
    وكان يقولليها سمية( الكلمتكن )دى غلتانا وسبب المصايب دى ما أمريكا لكن نقيصة إيمان ساهى وعدم قناعة بالارزاق وعدم إهتمامنا بى أمورنا وزراعتنا ومواردنا وعدم تعاونا مع بعضنا وحسدنا على بعضنا ومابعجبنا السمح لى زول ودايرين السمح لى رقبتنا برانا .
    ومن أكبر مصايبنا بعدنا عن الله سبحانة وتعالى وسؤال الخلق ونسينا الخالق وكان صحابة رسول الله صلى الله علية وسلم يسألون الله فى كل أمورهم ولو أحتاج أحدهم الى (ملح) توضاء وصلى ركعتين ويسأل الله ملحا .

  38. عليك الله يا افلايقا – نزل البوست بتاع فحص ال سى اى ايه للخطاب ده – وورينا الحتة بتاعت النتيجة لما استلما المدير .

  39. علي سنكل كتب:

    والله يا سترايكر لقيت نفسي أنا الغلتان كتبت الإيميل غلت عشان كده ال سي.أي.أيه حجزت التعليق للفحص والتدقيق.

    إنت ميرغني المأمون و أحمد حسن جمعه ديل متواعدين واللا دي يا ربي صدفه سااااكت.

    أخونا ود الخلا:
    معدنك نضيف بدليل جيتك يومداك ، والتي أثلجت صدري الواسع للخلاف الفكري الجاد.
    مشكور عزيزي

    أفليقا ذي ما قال ليك الأدمن نزل فوراً.

  40. مُخير كتب:

    العزيز حنين سلام
    الحبيب ود الخلا سلامين
    الطيبين وزينين سلامات
    ما قالوا عليك حنين، نان وين الحنية ؟؟
    ((كان الاجدر ترسل خطاب بنفس اللهجة لى نسوان القادة العرب لتوعية رجالن يمسكو درب الله صاح ويخلو البسووا فيهو دة …الخ))، مالك ومالنا ومال القادة العرب، كدي خليك سوداني وخلينا في سوداننا، تقليد الخواجات والشخلبة والشخلعة فاتتنا وين؟؟ كمية من الكلام إتكتبت هنا عن الفريق القومي للشباب وطالع الشارع والجامعات والأسواق ترى العجب العُجاب.

    الجزء التاني من كلامك في الصميم ويا ريت يجد نصيبه من الاهتمام غايتو كلام سمح وفي الجك وعجبني بالحيل ((سبب المصايب دى ما أمريكا لكن نقيصة إيمان ساهى وعدم قناعة بالارزاق وعدم إهتمامنا بى أمورنا وزراعتنا ومواردنا وعدم تعاونا مع بعضنا وحسدنا على بعضنا ومابعجبنا السمح لى زول ودايرين السمح لى رقبتنا برانا . ومن أكبر مصايبنا بعدنا عن الله سبحانة وتعالى وسؤال الخلق ونسينا الخالق وكان صحابة رسول الله صلى الله علية وسلم يسألون الله فى كل أمورهم ولو أحتاج أحدهم الى (ملح) توضاء وصلى ركعتين ويسأل الله ملحا)) أتمنى أن يعيه ويدركه قبلنا ولاة أمورنا ولا هُم ما معنيين بيهو ؟؟ .
    لك خالص ودي واحترامي

  41. مُخير كتب:

    القبيلة ود الخلا:
    ((هداني الله واياكم لطريق الحق والنور المبين ))
    آمين ثم آمين بركة الجمعة الجامعة والدعوة السامعة.

  42. البشاوى كتب:

    افليقا
    روعة وابداع ضارب فى العالى كما الاقمار — وأظن الهمبريب عمل مفعول

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s