مرارة الغربة

Posted: الأحد,14 يونيو, 2009 by استرايكر in إجتماعية

الغربة هي شعور بالوحدة وعدم الإنتماء وهي تجربة صعبة وأحياناً كربة وألم ومعاناة ……… يفارق الشخص دياره وأهله وأبنائه ووطنه ولذا يكون الشخص غير مستقر نفسياً ولا يعوضه المال الاذي اكتسبه ولا الجو الذي عاشه عن أعز ما يملك كما قال الشاعر:

الغربة أصلو طعيما مر لكني قاعد بالجبر

لامن سنين الهم تمر يا ربي ألهمني الصبر

 

القصيدة التالية أعجبتني وأهديها للطيور المهاجرة (سنكل – بشار – مخير – حاج سلاوي – ابكرون –  شمباتي – محمد صالح – خندقاوي) وكل الأخوة خارج الوطن الحبيب فألي النص :

 

 

اسمع كلام أمك تعال
الفنان عبدالرحيم البركل

اسـمـع كــلام امــــك تــــــعــــــال الغربه ماها كنز قروش
والــغـــــــــــــــــــربـه مــــــــاهــــــــــــــــــــا بيوت ومال
الــغـــربــه كـــم ذلــت نـفـوس والـغـربـه كـم هانت رجال
بـوصــيــــك يــــا ولـــدي الـحـنـيـــن اسمع كلام امك تعال

سـمـح الـشـغـل فـي ارض ابــوك ارجـع تـعــــال ما تودرا
ارويــهــا مـن عـرقــــك زلال ارمـيـهــا بـي تـيـراب خدرا
شـــوف الــســنــابـل كـيــــف تـمـيـــل تـشـبـع بلدنا نصدرا
والـغــــربـه تــــب مــا فـيـهــا غير عيشة العذاب والدردرا

مــالـك عـلـي شـغـل الإيـجـار واطاتـنـا بور صبحت وراك
لـيـه تـبـقـي خــدام لـلـغـريــب مـا انـتـي سـيــد نفسك براك
انا عيني في نص الليل ترف وقلبي الحنين نوموا اللي راح
مــن شــوفـتـك غـلـبـني الـمـنام واصـبـح مـناي عيني تراك

ارجـع تـعــال لـي يــا الـحـنـيــن مــالـك عـلـي عيشة الشقي
شـوف كـيــف تـمرنا سبيطوا مال والنيل سقي الوديان سقي
مـا بــتــلـقـي غـيـر رزقـك هنـاك يـا ريت نصيحتي تصدقه
ارجـع تـعــال والـزاد المكتوب لـيـك في ارض ابوك بتلحقه

ارجــع تـــعــــال خــلـي الــــشــــقــي وعــيـشــة الـكــرم في
ارضــك الــمــقــســوم بـيجــيـك في الغربه أو هنا لـيـك رب
ســودانــا اصـلــوا مـن الــقـريـر لـيـهو الكريم بالنـيــل وهب
ســودانــا والله الـعـظـيـــم واطــــاتـــوا أغـــلـي مــــن الدهب

 

———————————–

سماسم

Advertisements
تعليقات
  1. مشكورة الاخت سماسم لارسال المقال – ونهديها لكل الطيور المهاجرة

  2. الزهراء كتب:

    لك عاطر التحايا يا سماسم
    الغربه حآآآآآآآآآره لكن المعايش جباره
    وربنا يرد كل الطيور المهاجره وينوروا بلدهم ويتلم الشمل
    والله لو البلد فيها خير الغربه ما حتكون خيار
    الله يدي العافيه

  3. nono كتب:

    سماسم احيييييييييييك……….مااااااااااشاااالله مشاااااالله؟؟

    عيني بااااااااااااااردة,,,,

    بداية موفقة عقبااااااك الباسوير تنزلي طواااااالي…..

    الغربة ؟؟

    ونااااااااار الغربة؟؟

    قرشين حلوين؟؟

    كلوااااا بي تمنوووووا؟؟

    ولنا عودااااااا

  4. سماسم كتب:

    بارك الله فيكم جميعاً (ود الخلا ، استرايكر، الزهراء ، نونو) وان شاء الله ناس بره يخشو ويورونا تجاربهم مع الغربة

  5. سهيل كتب:

    حمدلله على السلامه .. و مبروك البوست..

    و ماتنسوا :رائعة الراحل صالح الضى ,,, واهداء للجميع

    يا طير يا ماشي لى أهلنا
    بسراع وصل رسايلنا
    والشوق ما تنسى ياطاير لكل البسألك عنا
    قوليهم على عهدي ما زلنا ومازلنا
    ذكراهم أنستنا مشاغلنا
    كيف حال بستانا وخمايلنا
    وبكرة نجمع شمايلنا
    *******
    أنا في انتظارك يا طاير
    انا راجي
    وصل رسايلك ياطاير
    أطرى المشاغل
    وافرد جناحك ياطاير
    على داري
    قبال تعود لازم تروح لي تاني مره
    ماتنسى زول في الحله إلا تسلم عليهو وتبوس إيديهو

  6. بشار أحمد بشار (إبن برد) كتب:

    الإبنة سماسم : تهانينا الحارة على البوست الجميل ونحن الجابرنا على المر الأمرة منو وبلدنا بقت لينا زي (قد) الإبرة ولو بقينا فيها خشينا أن نسأل الناس الحافا.

  7. سهيل كتب:

    الغربه ذاتها يا جماعه خشم بيوت : ناس ورا الرزق و ناس ورا العلم و ناس سااااااااااااااكت ورا ما اي حاجه .. والله بيعد عنكم شر الأخيره

    و جاييييييييييكم

  8. bakriMusa كتب:

    الاخت سماسم
    الفين سلام

    اختيار موفق .. وموضوع دسم ..

    والله نحن مع الطيور الما بنعرف ليها خرطة
    ولا في إيدها جواز سفر نمشي في كل المدائن
    نبني عشنا بالغناوي وننثر الأفراح دُرر
    الربيع يسكن جوارنا والسنابل تملا دارنا
    والرياحين والمطر
    D D D D D
    والحبيبة تغني لينا لا هموم تسكن دروبنا
    ولا يلاقينا الخطر وين يلاقينا الخطر
    لو بقينا مع الطيور الما بتعرف ليها خرطة
    ولا باكر يا حليوه لما أولادنا السمُر
    يبقوا أفراحنا البنمسح بيها أحزان الزمن
    نمشي في كل الدروب الواسعة ديك
    والرواكيب الصغيرة تبقى أكبر من مُدن
    إيدي في إيدك نغني
    والله نحن مع الطيور الما بنعرف ليها خرطة
    ولا في إيدها جواز سفر
    _______________

    وبسم الله نبدا

    راجعين

  9. سهيل كتب:

    تجربتي الشخصيه كانت مع الغربه من اجل الدراسه والعلم … ويخيل لي دي كمان اصعب لأنك لازم تحصل اكبر قدر ممكن من العلوم المتاحه و إنت في سباق مع الزمن من حيث الكم و سباق مع فطاحلة العلم من حيث الكيف.. و عشان اهلي التعبو فيني و حرموا نفسم لقمة العيش عشان انا ادرس ا كان لابد من التحصيل فوق العاده للعوده بشيء يفرح الوالدين و الأهل .. وزي ما هم بيتباهوا بولدهم الصلح البيت ولا البنا العماره و جاب ما خلى حاجه هم بيفرحفوا اكتر لمن تجيهم شايل الشهاده و مالي يدك من علمك و فهمك .. إنت بالنسه ليهم زي الشتله الكبرت و كل يوم ضلها زايد ..

    الغربه صعبه للبيعيشها .. و الماجربها بالنسبه ليهو مجرد كلمات .. وهي ما كلها شر .. بالعكس بتعلمك الإعتماد علي النفس و تعلمك التدبير وكذلك القيام بكل ماتحتاجه من غسيل و طبيخ و كده بنفسك ( دا طبعآ لو كنت عذابي) .. اما لو كنت متزوج و زوجتك معاك ( فالمصيبة اعظم).. نظام يلمها النمل ..يطاها الفيل..” اسألوا السلاوي و بشار” .. والمصيبه الأكبر هي تعود (من عاده) الأبناء على حياة الخارج و عند العوده يصعب إنسجامهم مع الناس و إحتمالهم لظروف البلد…

    و الأمر ( مراره) من دا كلو الغربه الداخليه .. ولا اعني هنا الأقاليم .. بل ان تحس بالغربه في وطنك و بين اهلك و ناسك.. وزي ما قال الشاعر (نسيتو) و غنى ود اللمين ..

    هي الغربه نخلي ديار و نمشي ديار ؟

    ما اهو نحن متجاورين و عايشين غربه جوه الدار..

    و ياحبذا لو إتغربت و إنت متيم و ” ضاربك الهيم ” زي ناس كده .. ما علينا ..

    حالتك حتكون ( كتمت) زي بتاعت بشار و ابكرون… وتشعر بالدنيا دي كولها بقت زي خرم الإبره.. وكفاكم كده لأنو شمباتي دمعتو سالت …

    جايييييييكم

  10. الغبشة كتب:

    سماسم:مبارك اول ماتكتبى تبكى؟ وما تنسى

    ((كان مسافر شان علاجى بلقى فى قربك دوايه
    وأكان كرعينا راحل نحن فى بعدك حفايه))

    ((طيرى يا طياره وطيرى
    امشى لابوى فى بلد الغربه
    وقولى ليه بتك كبرت حبه
    ومشت المدرسه تعرف تحسب حدت عشرة
    ولسه اخوى بحب الكوره
    وبدل الشنطه رسل صورة))

    كسره:بس عارفين الغربه بين ناس احر من الغربه بين الغرباء.
    والى لقاااااااااااااااااءءءءءءءءء

  11. الزهراء كتب:

    سهيل/ ما قصرت ما قصرن ايامك ان شاء الله
    حقيقه الغربه مره لكن باقي لي كدي لو الزول جا ناااجح وفااالح وشايل مستقبلو في ايدو اكان شهادات اكان قروش
    الفرحه حتكون كبيره ويا اخوانا فرحة العلم اكبر من فرحة القروش

    اما غربة الدواخل طبعا اصعب وامر

    كل طائر مرتحل

    عبر البحر قاصد الاهل

    حملتو اشواقي الدفيقة

    ليك يا حبيبي للوطن

    لترابو لرمالو للدار الوريقة

  12. الزهراء كتب:

    كثيرا ما تنتج الغربه الابداع واكثر من اشتهروا بوصف الغربه ومعاناتها هم الشايقيه فهم في الغربه يتغنون للام للحبيبه للوطن للنخيل والسواقي وهاكم نموذج قصيدة السر عثمان الطيب الشهيره(بحر الموده)

    شوفي الزمن يا يمه ساقني بعيد خلاص
    دردرني وإتغرّبت وإتبهدلت ورّيني الخلاص
    ساقني القدر منّك بعيد لأذاي كاس . . جرّعني كاس

    يا يمه يا فيض الحنان الما كمل
    يا يمه يا بدري البشع دايماً يهل
    يا يمه يا نور الصباح وكتين يطل
    وا شري يا زينوبة
    ولدك في بحور الشوق كتل
    محروم من الحب والمحنة وراك همل

    يا يمه يا بحر المودة وكتين يفيض
    يا يمه يا شعلة أمل زادت وميض
    يا يمه يا عنقود كلام منظوم قريض

    يا يمه يا نغماً حنين بالشوق يرن
    وافكاري فيهو بيرتعن
    دمعاتي شانو بينزلن

    بتذكّرك يا يمه
    في الدغش النسايمو يهبهبن
    قايمي الصباح متكفلتي وشايلي الحليلي على المراح
    والساعة ديك يا دوبو ديكنا بدا الصياح
    والطير صغارو يغرّدن . .
    جبتي اللبن بي إنشراح

    وإتذكّرك يا يمه في ساعة الهجير
    صالاكي نار الدوكي عستيلنا الفطير
    رشيتي قلتي اكلوهو خير
    وإتذكّرك يا بسمة الطفل الغرير
    وكت الخلوق ترقد تنوم
    وارقد براي ارعى النجوم
    والشوق يرف جنحيهو
    بي فوق لي يحوم
    واهتف باسمك في الخيال
    طيفك بي فوقي جال
    واتمنى لو لحظات يدوم
    لكني فجأة ألقاهو زال

    وإتذكّرك يا يمه ساعة الناس يجونا من البلد
    ناعم ترابا علي جسيماتن رقد
    ريحة التمر فوق الهدوم لون الخدار خانس لبد
    والشوق أوارو بيشتعل . .
    كان ظني فيهو يكون خمد

    وإتذكّرك يا يمه والناس قالوا قايمين البلد
    رصوا الهديمات عدّلوا
    ركبوا اللواري وقبّلوا
    خلّوني وحدي بلا أنيس
    كيف إنفرادي إتحملّو؟
    شالوا السلام من عندي ليك
    وإن شاء عندك يوصلوا

    يا يمه ساعة يوصلوا ويقولوا ليك ..
    شفناهوا في بلد الأمان
    مبسوط ورايق في أمان
    إنبسطي يا نبع الحنان
    وأنا حالي يشهدبو الزمان
    يا يمّه . .
    رسّلي لي عفوك ينجيني
    من جــــور الزمان

  13. د.ياسين شمباتى كتب:

    الاخت سماسم ثرو استرايكر..مرحب مرحب..ويارب الجميل ما ينقطع..

    واقول ليك يا سماسم زى ما غنى الكابلى:-
    غريب والغربة اقسى نضال..غريب والغربة سترة حال..

    العزيز سهيل..عرفتنى كيف؟؟والله الغصة لم تبرح حلقى مذ قرأت العنوان.ناهيك عن عمايل بكرى موسى ورائعة مصطفى سيداحمد..ولا اغنية صالح الضى الجيتها انت..قرض على كدة يا حبيب..

  14. مُخير كتب:

    الأخت الفاضلة سماسم
    الحبان في كل مكان
    السلام عليكم ورحمة الله وبركاته،،،
    مبروك المقال الأول وشكراً على إهداء القصيدة الرائعة للطيور المهاجرة، وفعلاً شعرائنا عبروا أبلغ تعبير عن مرارة الغربة ومعاناتها، واليوم يُمر زي السنة لكن الموضوع ده بالنسبة لناس سنة أولى غربة “زي أخونا د. شمباتي” أما بالنسبة للطيور الكُبار فالتحية للعلامة بشار الذي عبر عن موقفنا بإقتضاب وافي ((الجابرنا على المُر الأمرة منو وبلدنا بقت لينا زي (قد) الإبرة ولو بقينا فيها خشينا أن نسأل الناس الحافا)) غير كدة سبب واحد يخلينا مزازين ببرة مافي. ولكم جميعاً كل الود والتواصل معكم عبر هذه المساحة يخفف علينا كثيراً ويجعلنا وكأننا معكم في ربوع الوطن الحبيب وكنفكم الطيب. ودمتم

  15. nono كتب:

    الاعمام والاخوان المهاجرين لكم التحية (سنكل – بشار – مخير – حاج سلاوي – ابكرون – شمباتي – محمد صالح – خندقاوي)
    الى مسااافرة
    كلمات الشاعر عثمان خالد
    أعصر دموع ….هاك غنوة لى سيد البلد…..يحليلو
    حليلو قال سايب البلد…يحليلو
    حليلو كيفن يبتعد
    كيفن نسيبو يروح بعيد
    فى رحلة مجهولة الأمد
    ياحليلو
    كل العمر كان لحظة واحدةنشوفو والشوق يستجيب
    نسكر نغيب
    نسكر نغيب ..من لطفوا..من دلو الحبيب
    من لونو زى كرز المغيب
    الراقى محلو السمر
    دى شفايفو زى ياقوت ندر
    من شكلو زى نص القمر
    مبتل مثير
    مبتل مثير ….مخلوق اشان أحلى الزهور
    وأشواقنا تتعطر تطير..من نفحة من مجرى العبير
    من لمسة جيدو النضير
    من لفظة من ثغر المثير
    الفيهو أيام السمر
    بيهو القلوب كم تأتمر لو مرة سيد الناس أمر
    بنظرة بتدوب حجر …لى بسمة بتضوى العمر
    يا حليلووووو
    حليلو قال ناوى السفر …كيف الوداع لامن يحين وقت السفر
    أهديك زهور …حاشاى انا وانت ندى الزهر
    أهديك حروف…يا اجمل احرف فى الدهر
    اهديك حنان..ما قلبى عندك من زمان…وأنا راجى عطفك منتظر
    أهدييك حروف…ما قالا زول و ما أظن يقولا وراى بشر
    اهديك عيونى…فى الدنيا اشان استريح..الدنيا بعدك مابتسر….يا حليلو
    كسرة/
    bakriMusa
    احيك علي الطير المهاااااااااااااااااجر

    الحمدلله المرة دة جاااااااااااات سليمة ؟؟؟

    ماااااااااافي روووووووووووووووووووووووووب؟؟؟؟

  16. حاج أحمد السلاوى كتب:

    الأخت الفاضلة سماسم ..,كل الأحبة الأكارم ..
    أول حاجة تهنئة بمناسبة أول إنتاج فكرى ..أما بالنسبة لموضوع الغربة والإغتراب دا موضوع شرحه يطول ويمكن أن تفرد له صفحات عديدة .. المهم والشاهد فى الأمر إنو الغربة أنواع متعددة وتختلف من شخص لآخر منها مثلاً غربة الدراسةودى أكيد من أفضل أنواع الغربة .لأنها تمت فى مرحلة الشباب وفيها إكتساب الكثير من المعارف والعلوم غير المنهجية الدراسية فالإختلاط بالشعوب الأخرى له فائدة فى حد ذاته.. فقد كنا نعتقد قبل مغادرتنا الوطن للأول مرة أن كل ما كنا نقوم به هو الصواب ولا شىء غيره ولكننا فوجئنا ( أو فوجئت.. شخصياً ) بأن هنالك اشياء كثيرة لم تكن كذلك بل يجب علينا العمل على تغييرها ومن هذه الأشياء الإنضباط فى كل شىء …الوقت .. التعامل مع الغير وإحترامهم .. الأمانة والصدق ( من غشنا ليس منا ) وبإختصار كل ما ينص عليه ديننا الحنيف..ثم تعلمنا بعد ذلك الإعتماد على النفس وكما قال النجم سهيل بن سهلول المسهلى كنا ندرس ونطبخ ونغسل ونكوى وننظف الغرفة أو المسكن ( ما باقى إلا نغير البامبرز ..ويمكن يكون فى ناس عملوها ) ..
    ثم نأتى على نوع آخر من أنواع حمى الغربة التى اجتاحت العالم العربى منتصف وأواخر السبعينات بعد إرتفاع اسعار البترول جراء حرب 73 ..فقد هاجر الكثيرون طلباً لتحسين الأوضاع المعيشية التى تدهورت فى تلك الفترة فصار السؤال لماذا لا تهاجر بدلاً من لماذا يهاجر الناس ؟ وصار الكل يسعى للهرب من وطأة الحياة المعيشية القاسيةلبلدان الخليج التى بدأت تنعم باموال النفط وفتحت ابوابها للكل للعمل لأنهم لا يملكون القوى البشرية المدربة والكافية للمشاريع العملاقة التى بدأت حينها ..واستمرأ القوم الغربة وحياة الغربة إلى يومنا هذا ..فمنهم من استفاد وافاد غيره … أسرته فى المقام الأول ثم الأقارب .. ثم الأصحاب والجيران ..ومنهم من عاد بخفى حنين ..والعودة ألان صارت مطلباً شعبياً والكل يريد العودة ولكن … تظل رهينة ظروف كل مغترب الخاصة وإمكانية عودته وانخراطه مرة أخرى فى مجتمع تغير 180 درجة ..وأقولها لكم بصراحة كل شىء فى أوانه حلو .وعندما يأذن الله بذلك فسوف تكون العودة بلا شك وقولوا يا باسط..
    فلسنا وحدنا مغتربون ..
    أطلت عليكم ووجعت راسكم ..ولكن البوست ذو شجون ..ولنا عودة ..

  17. الزهراء كتب:

    الاعزاء نهاركم بركه

    سافِر
    سافر ..

    مطارات الوداع ضجت قدامك .. وراك بيضا

    وسماك غنـّاى

    مساحات الأسى الفى عيونّا

    تتفجر مدينة وناى

    بطاقات دعوة الرجعة .. تساب عينين من الفرحة

    دموع للحاضرين فجت

    زغاريد غطت الدنيا

    وعاد .. فرح الرجوع منية

    صداك الريح .. ومتل السنبل الغناى

    ……..

    كتير بنعاتب الحاضر

    ولا أسفاً على الماضى

    صدق الرؤية من قلبك .. بين الشوف وإنسانك

    نغم فنان يعيش راضى

    مداك إتعدى حد الشوف

    دخلت على الشعر .. إنسان

    وهواك .. إتختّ جوة الجوف

    وإنتحر النهار .. هسـّة

    نغنيك لى مدن .. شاخت

    معاك أحلامى .. ما تنسى

    تغنيك القرى الراحت

    خلاص يا غربة .. ما ترسى

    غنيناك .. وبنغنى

    وبتحدى الزمن .. فنان ..

  18. علي سنكل كتب:

    العزيزه سماسم
    نبارك ليك باكورة إنتاجك وجات منتهى التوفيق.
    وأشكرك على الإهداء بالأصاله عن نفسي وبالإنابه عن كل الطيور المهاجره. وذي ما قال ليك عمك بشار ما يجبرك على المر إلا الأمر.
    قال الإمام علي ” الفقر في الوطن غربه والغنى في الغربة وطن ” ، وده المرقنا بره.
    كلامك صاح يا الزهراء ، الشايقيه من أروع من وصف الغربه ، لأنهم أول من اكتوى بنارها ، وذلك لشح الموارد وضيق سبل كسب العيش في منطقتهم بشمال السودان. المهنه الأساسيه في منطقة الشايقيه هي الزراعه والأرض الصالحة للزراعة لا تزيد عن كيلومتر واحد على ضفتي النيل والباقي صحراء جرداء على مد البصر وفي معظم الأحيان الجبل طوالي مع القيفه.
    لذلك بدأت غربة الشايقيه كغربه داخليه ، عطبره ، كوستي ، مشروع الجزيره مدني ، شندي . ثم امتدت شويه إلى الفاشر ونيالا وجوبا كتجار.
    ثم خارجيه إلى مصر كجنود هجانه.
    يعوضني الله فيك يا مال فلسطين ( فقد كان الشايقيه من جنود الدول العربيه الذين شاركوا في حرب 48،( النكبه ).
    يعوضني الله فيك يا مال فلسطين
    أنا أخد بي ستي وبعت الكيله قرشين
    بعد ما كنت أمباشي ولي شريطين
    بقيت خيات أرقع في الدلاقين
    قعاد المكنه سبب لي الطواعين
    القميص أب رقبه مدور وليهو جيبين
    سيدو إن اسركن معاك يديك قرشين

    إشترى هذا الامباشي العائد من فلسطين بعد أن سلمها الانجليز لليهود بتآمر من الحكام العرب ، إشترى بالفلوس الحوشها كلها ، بلحاً بستة قروش للكيله ولعدم معرفته بالتجارة ، غشوهو وفي النهايه باع الكيله بقرشين وعمل ترزياً.

    الله يستر علي أولادنا من الغربه النوع الأخير القالو سهيل ، لكن الشايقي قال ليك رسل ولدو يقرا في بلاد بره والولد طلع صايع ساكت وجا واحد كلم أمو قال ليها ولدك ما قاعد يقرا وحايم ساكت.
    فرسلت لولدها قالت ليهو:

    أبوك يسوق الساقي في الفجراوي
    فكت ريقو دفيق
    ويفتل في الحبال ما خلا شيتن أسمو اشميق
    يرسل ليك فشان تقرا العلم تلحقنا في الضيق
    إنت تاريك في بلد الترك ولداً مطيليق
    يا خسارة عيشنا ما أكلو الجراد والحكمه متيق

    والحكايه التانيه يا نونو الشايقي رسل ولدو يشتغل بره والود أظنه سنتين ما اشتغل ، وخجلان يقول لأهلو.
    الأم كتبت :
    بساهر لا عند الفجر والجنبي نايمين
    وحاسي لا وكت السحور يا ربي أروح وين
    مرقت ، ، ، لاطلع الفجر لا شافت العين
    علي جدودي البره راقدين
    الفوقو بنيه والفي القبب الاتنين
    وشكوى لسيدي الحسن بي عرضحالين
    ولي جدو النبي وخلفاء المجاهدين
    تجيبو الغايب التمالو حولين
    هو ضم لو طارينا لا قال البلد وين
    لا سملئهم منو لا رسل لي ملين
    عاد شوفو ناقص عقلو واللا من المجانين
    إنتا يا الناسينا أنا ما برضالك الشين
    الله يغفر ليك حقوق الليك والدين
    الرزق عند سيدو رسلو لينا في الحين
    والله العيش قواسيق في محلين
    تمرنا نجض وتجارو قاعدين
    ونقسم في ذكاتو على المساكين
    و إنت إنما جيت بننتظر السغيرين

    أهدي المودة و الشوق الصادق لكل الذين شاركو في بوست السماسم هذا لأني حبيتو.

    • سماسم كتب:

      االعزيز سنكل لك كل التقدير والإحترام على المداخلة والشعر والقفشات والتحية للكل الذين يعيشون الغربة ويتذوقون مرارتهاوربنا يجمعكم بالوطن في القريب العاجل

  19. سماسم كتب:

    كتر خير كل الطيور المعلقة (من الداخل والخارج) وإن شاء الله ربنا يزيل الأسباب التي أدت للهجرة ويحسن الحال في الداخل ويعيش الناس في أمن أمان

    كسرة: ما عرفنا رأي ( د. عزت، ود الزبير، أفليقا والبقية)

  20. زووووووول كتب:

    الاخت سماسم عن الاخ سترايكر سلااام
    الغربه تجربة لم يخضها الزووول الا فى فترات متقطعه للنزهه والتدريب واشياء اخرى مفيده .لكننى اذكر يوم (تغربت ) لاحظوا الاقواس فى مدينة (امدرمان ) يوم تم قبولى بكلية الاقتصاد بجامعة امدرمان الاسلاميه (تقول ليا فلادفستك يا سهيل ) .كنت كثيرا ما اهرب لبلدتى واهلى فى الشمال بنية القضاء على ملل( الغربه ). كان صديقى بابكر يعيش معى نفس الشعور . وكنا نذهب الى سوق بانت نشترى نصف كيلو موز نتقاسمه .كان هذا غداؤنا يوميا بينما كنا نأكل البوش فطورا وعشاء . كان بائع الموز يردد الشغله ما شغلتنا لكن الظروف جبرتنا . وكنا نجيبه بصوت واحد (شكل كورس ) والله نحن ال الشغله ما شغلتنا .
    كانت سياسات (طلاب دعم الصندوق ) كما اسماه الطلاب عقيمه جدا فى تلك الفتره فكان يوفر الدعم والسكن للطلاب بعد تجاوز عامهم الاول فى الكليه . ودا موضوع براهو يا سماسم .

  21. البشاوى كتب:

    الاميرة سماسم حياك الله
    والهندسة استرايكر لك الود
    شيتا هبش سنكل خلاهو يمرق الكلام المدفون دة كلو اكيد ماشئ ساهل وفتقتى جروح كبيرة مسكوت عنها ومدفونة فى نفوس كل الطيور المهاجرة والطيور التى هنا وعينها على الهجرة وياقول بشار البيجبر على المر الامر منو
    لعمرى ماضاقت بلاد بأهلها لكن اخلاق الرجال تضيق!!!!!!!!!!!!!!!!!
    ربنا يعدل الحال والاخلاق وترجع لينا كل الطيور الضاربة الغربة لاننا نحتاجهم كل يوم اكثر

  22. سماسم كتب:

    الزول ثرو بيشاوي تحياتي شكراً على الأضافة
    قلت يا يالزووووووول أم درمان بالنسبة ليك كانت غربة دا أخير من ولاية لولاية لكن نحن كنا في ولايتنا بنقضي 15 يوم في الداخلية لما كنا في المتوسطة والثانوي كنا بنعد الأيام لحدي ما تتم ونمشى ناكل القراصة والكسرة ودا كان يوم الهنا

  23. حاج أحمد السلاوى كتب:

    الزوووووووول .زوكل الأحبة …سلام ..
    قلت لى كانت غربتك فى أمدرمان …لاكين عاد ما غربة جد !!! غايتو باااااالغت عدييييييل كدا ..تجى لحد عندنا فى امدرمان بلد الأمان وتقول إتغربت فيها ؟ طيب لو كنت مشيت محل الصقيع داااااااك (محل أخوك سهيل ) كنت عملت شنو ؟
    الحمد لله ربنا ردَ غربتك سريع ..

  24. نيام كتب:

    سماسم:
    موضوع غريق بالحيل .. نكأتي جروحا بليغة صديئة كا ن الصبر طبيبها و الحاجة ضمادها ..اذكر في مرة و انا راجع من الاجازة الي الغربة بكي ولدي الصغير و قتها وهو يقول يا بابا انا ماشي معاك..
    – وامسك بتلابيبي فقلت له تمشي معاي وين يا ولدي انا ماشي وادي بغير ذي زرع
    – فصرح انا ماشي معااااااااك
    فلما لم اعره انتباها قذف بالساندوتش الذي كان بيده علي وجهي .. فحزنت لذلك الموقف جدا واخبرت صديقي بذلك فيما بعد..فقال لي ملاطفا..
    – احسن يبكي و يسكت و لا احسن يبكي طوالي

  25. سهيل كتب:

    تعرف يالزووووووول .. كنا لو عايزين نضبح ( إسلامي) إلا نسافر 140 كيلومتر.. تقولي (بانت) ..

  26. الزهراء كتب:

    مساء الخير
    الغربه زمان كانت اصعب من الان زمان كان المغترب يرسل جواب يوصل في اسبوعين وكان تطور شويه ورسل شريط عشان اهله يسمعوا صوته محتاج مده شهر اما الان فوسائل الاتصال السريعه هونت من المعاناة قليلا فالموبايلات موجوده والانترنت وممكن يشوف اهلو بالويب كام -ويتواصل مع ناسه زي ما عايز-لكن الغربه ليها مساوئ مثل الحاله النفسيه التي تعتري الاطفال وبعضهم يصاب بالخوف من الفراق او يصاب بحاله من الفوبيا من فراق الوالد وهذه لحظات يصعب نسيانها-
    وعندي تجربه شخصيه فانا الى الان لا استطيع ان انسى يوم سافر والدي عليه رحمة الله لغرض العلاج الذي طالت مدته وحينها كنت في السادسه من عمري ولكني اذكر ذلك اليوم بكل تفاصيله

    فمراره الغربه صعبه لكن اذا كانت الهجره مع الاسره فذلك سيخفف من المعاناه قليلا

  27. بشار أحمد بشار (إبن برد) كتب:

    نيام : – “احسن يبكي و يسكت و لا احسن يبكي طوالي” لاكين ما تقولي صديقك ده راجل مفهومية وحكيم زمانه بعدين “رمية” الساندوتش جد معبرة ويعني طفلك بيقول ليك لقمة العيش البتبعدك عننا نحن ذاتنا ما دايرنا!!!!

  28. aflaiga كتب:

    سماسم ثرو الجميع : اول شيئ اسفين للتاخير .
    الغربه دى انا مازولا كلو كلو برغم غربة الداخل التى عشتها كثيرا فمعظم حياتى الاولى كانت غربه فى الداخل فقد كنت احب الكورسات جدا جدا وبخاصة المقفوله التى تستغرق الشهور وفى مجملها بلغت الخمس سنوات غربه متقطعه من كورس لكورس وكنت فى البيت مثل الغريب المغترب افليقا مسافر افليقا جا من السفر افليقا فى كورس افليقا جا من الكورس وكده – لحدى ما لمت فينى سمسمه والواحد هجس قعد وخلى اللف والدوران فى الكورسات !! اها المهم الواحد عمرو ما طلع جواز سفر ولا سافر بره البلد كلو كلو الا بلبر مره ليبيا ومره تشاد وبرضو كورسات بوثائق رسمية مؤقته – اما السفر الخاص فدا ما شفناهو والله ما احوجنا ليهو كلو كلو الا لبيت الله بس عشان كده البلد دى بنحبها جدا وعاوزين نحضر فيها الحلقه الاخيره .. بالغرم من ان لدى اصدقاء فى الغربه الا انهم يعانون المر فى دفع حسابات الغربه سواء ماديا او اجتماعيا .
    وجاييكم تانى ..

  29. aflaiga كتب:

    ملخص رؤيتى للغربه :
    * اى زول فى الدنيا دى اهلو عاوزين منو وحده من اتنين :
    * يا قريب منهم بدون قروش .
    * يا بعيد منهم بتعويض مادى .
    ده طبعا لمن كان المرقه بره البلد بس عشان تحسين الاوضاع اسى المرقه بقى عندها اسباب تانيه مرتبطة بحوجات البنى ادم وظروف البلد العايش فيها يعنى مثلا :
    * بلد مشكلتا العيش بى كرامه وحرية وانسانيه .
    * بلد مشكلتا مستوى التعليم والصحه .
    * بلد مشكلتا الفقر المدقع .
    ده طوالى بينعكس على انسان البلد بيقوم يهاجر كايس اما القروش او التعليم والصحه او الكرامه والانسانيه .
    معظم المرقو فى الستنينات والسبعينات واول التمانينات مرقو للعلم والوضع المادى الجيد
    معظم المرقو فى اواخر التمانينات وحتى الان مقو اما للكرامه او الفقر المدقع .
    غايتو نحنا مانا مارقين وحقنا هنا بنقعد نحرسو لمن نشوف اخرتا زى ما بقول حاج السلاوى ..

  30. شكرا على الموضوع اخت سماسم
    غريبة لو قلت ليكم اجمل سنين عمرى واغلبها عشتها فى الغربة والأغرب انى اتالمت اكتر لما عشت غربة فى بلدى امر من غربتى الاصلية …. أصعب لحظة كنت بعيشها وانا بودع الوالد امد الله فى عمره … واكتر اعنية بسمعها للان جيناكم ياحبايبنا (غربة وشوق) …. لكم الود والاحترام

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s