دبلة الخطوبة

Posted: الثلاثاء,16 يونيو, 2009 by البشاوى in اخرى

لاأعلم تاريخا محددا لظهور الخواتم ولا ادرى شيئا عن ثقافة الامم والشعوب حول هذا الخاتم ولكن كبرنا ورأينا امهاتنا وإخواتنا يلبسنه كزينة نسائية واجبة ‘ وأيضا الرجال يلبسونه عند الخطوبة والزواج وبعض الرجا ل يلبسونه كمظهر إجتماعى يدل على مكانة مالية أو دينية أوسياسية أوفنية أومهنية( كاالطباخين) وتعددت أشكال الخواتم من حالة إلى أخرى حسب الامكانيات أحيانا وأحيانا أخرى حسب الوضع الإجتماعى
ماساقنى لهذه المقدمة ومن ثم الموضوع سؤال صديق شليق لى : متى تزوجت ؟ ولما أجبته وأنا مستغرب لسؤاله ذكر لى أيضا إستغرابه من أننى لاألبس الدبلة ! فساقنى خيالى وفكرى إلى بداية عهدى بالخطوبة والزواج وكيف أننى كنت أحرص حرصا شديدا على وضع الدبلة حول إصبعى فى اليد اليمنى وأحرص جدا على إظهار الدبلة كلما جلست إلى بعض الحسناوات فى مكان العمل لأعلن لهن من خلال الدبلة انه لايمكن الوصول إلى فى الوقت الراهن وكنت أحس ببعض غيرتهن من خطيبتى وهن لايعرفنها إنها غيرة مستترة وخفية لكنها تبدو لى بطعم الانتصار ربما أننى فقط أتخيلها وربماهى موجودة لاأدرى كانت أيام جميلة– ولا أنسى شارع الصاغة فى أمدرمان حيث كنت أحرص على تلميع الدبلة هناك كل فترة حيث كان مكان عملى قريبا من سوق الصاغة
بعد الزواج بعدة شهور بعد أن تحولت الدبلة بفعل عقد القرآن إلى اليد اليسرى التى يسكنها القرين كما قول دكنور\عزت إنتابنى شعور غريب لم أجد له تفسيرا حتى اليوم بأن هذه الدبلة الفضية صارت مثل القيد ترفل حول إصبعى كقيود عتاة المجرمين وإحساس كدت أصدقه بأن كل من يرى الدبلة تلف إصبعى ينظر لى بريبة ويتهمنى بالإنقياد التام لمن وضع الدبلة حول هذا الإصبع وإنتابتنى حالة مرضية وهى عبارة عن حكة وأكولة شديدة حول مكان الدبلة حتى صرت أستعمل المراهم كمضادات لأثر الحكة وبعض الادوية الاخرى وكنت لاأجرؤ البتة على خلع الدبلة رغم الاذى الظاهرو البين حتى لاتظن عواطف أن الرباط قد بدأ فى التصدع منذ الشهور الأولى فشاورت أصدقائى المقربين فنصحونى بخلع الحجاب أقصد الدبلة لأنها سببت لى الأذى ومن حقى المطالبة بتعويض عن الضرر إذا لزم الأمر من عواطف فتوكلت على الواحد الأحد وخلعت الدبلة متعـــللا بالحساسية وضاربا الوعد بإعادة لبسها متى مازالت الحساسية —- ولكن صدقونى حتى الساعة اليدوية صارت تضايقنى حتى فتح الله علينا بالموبايلات أم ساعات – فمن منكم عانى ماعانيت وكيف كان التخلص من الدبلة ؟؟؟؟

 

Advertisements
تعليقات
  1. البشاوى كتب:

    الاحبة السمار
    اظن ان اول الثائرين والمتمردين على القيود هم رجال الامازونة بقيادة الحاج السلاوى والسيد ابكرون واتى بعدهم الشاب افليقا لكنه لم يتخذ قرارا بعد فى التخلص من الدبلة

  2. الزهراء كتب:

    عمنا البشاوي
    مساك الله بالخير
    اخيرا ظهرت علينا وشكلها حتجيب ليها كتااااحه
    الدبله دي يا البشاوي لاها في ديننا لاها في سنتنا لاها في فرضنا
    لكنها عاده من عادات النصارى التي صارت تقام بكثره هذه الايام في كثير من المراسم خصوصا الزواج
    لكن الكثير من النساء يأخذنها على أنها شيئ معنوي يدل على توثيق الرابط بين الطرفين
    والغالبيه تدخل في وضع نفسي سيئ مجرد خلع الطرف الاخر لدبلة الخطوبه او الزواج وطبعا بتكون حااااره لو كانت دبلة خطوبه كمان
    ولا مانع في خلعها اذا تسببت في الضرر فكثير من الناس تشكل لهم الدبله عائق في عملهم خاصه الذين يعملون في مجال صيانة الماكينات والكهرباء
    ويا اخواتي اخير الدبله تنقلع مما ينقلع اصبع الراجل ولا ايدو
    لكن والله منظرا بيعجب خصوصا دبلة الفضه العرييضه اللامعه لما يكون سعيد ما عندو حساسيه ولا شغلو بيمنعو منها

    والمصريين عندهم غنيه وحنحولا لي ناس كده

    يا دبلة الخطوبه عقبال ناس نونو كلهم
    ادوني رايكم في كلامي دا

  3. مشاكل كتب:

    سلامز

    و الله يا عمنا البشاوي

    النط على الكبر كالنقش على البحر

    بطلو جرس

  4. البشاوى كتب:

    الزهراء
    والله الدبلة دى عائق كبير جدا حتى لو الواحد فكر يعمل مجنون على واحدة تانية مايقدر لانها لافتة تبين ان الحالة ميئوس منها
    ولدنا مشاكل بتاع المشاكل
    مين قال ليك عاوزين ننط والله تانى مسطبة مانقدر ننط منها لكن اثار الامر ذلك الصديق الشليق
    ولكما الشكر على المرور

  5. الزهراء كتب:

    القصه يا اخوي البشاوي مسألة ثقه وتفاهم بين الطرفين
    وعمرها الدبله ما مسكتلها راجل
    لكن بيعجبوني الرجاله اللي بيتمسكوا بيها ويرفضون خلع الدبله مراعاة لشعور الزوجه او الخطيبه
    نحن طبعا بنتكلم من بعيد لبعيد زي بوست التدبيل بتاع د/ عزت

    مشاكل/ الناس ديل لو اتجرسوا حيتجرسوا من كلامك ده
    ربنا يديك العافيه

  6. علي سنكل كتب:

    أنا يا البشاوي كنت داخل في نفس الحرج ، متضايق خالس من الشئ الجديد الدخل على جسمي الكان حر وطليق ، وكنت أشكي لأصحابي من الجسم الغريب ده.
    ربك رب الخير رزقني ببنت باكورة الانتاج ، وصديق خبيث معلم ربنا يمد في أيامه ( مغترب في السعوديه يا سماسم ) جاء المستشفى يهنئ وسوس لي في أضاني ” البت مالها أهي تحلك من الدبله العامله ليك هم في أصبعك دي ، بكره طوالي أمشي أعملها ليها حلق” أمها حتنبسط منك.
    وقد كان.

  7. الزهراء كتب:

    لكن باقي لي اولاد الزمن ده كان قالوا ليهم البسوها في اضانكم ماعندهم مانع
    الاولاد بالله مدبجين بالختم اكتر مني انا ولا مخليين سلاسل ولا اساور ما لا بسنها
    وقبال ما يخطبوا او يعرسوا لا بسين الدبل
    وحصلت مره في الجامعه اتنين من زملاءنا ارتبطوا ببعض بعلاقة حب قاموا جابوا ليك دبل الفضه الما خمج ولبسوها
    وبعد اتخرجوا البت عرست زول تاني والولد خطب صاحبة البت
    فهمتو حاجه؟

  8. حاج أحمد السلاوي كتب:

    السُمّار كوووووولهم ..والأحبة ..
    سؤال سغيرووووونى كدا ..يعنى الواحد لو بقا عندو عواطفتين أو تلاته يقوم يلبس كام دبلة فى أيدو ؟ ولاّ تبقى المسألة فرض كفاية ..واحدة تكفى كل العواطفات ؟..
    أنا غايتو قلعتها كيف (الدبلة طبعن ) ما أتذكر أبداً .. أظنها ضاعت وقرطت على كدا.. بس ما عملت حلق للبت …والطرف التانى ما اشتغل بالموضوع وانا عملت نايم ..ومن ديك وعييييك ..لاكين عملاً بالسنة المطهرة لبسنا خاتم الفضة ..
    وزى ما قالت بتنا الزهراء ..الدبلة دى أحدى البدع الكتييييرة الما ليها حد ونحنا كووووولنا متمسكين بيها..زى عيد الحب ..وعيد الأم..والما بعرفوا شنو دااااااك … وأكتر حاجة تغيظ لما واحد يقول لى ..ياخ نحنا قمنا لقينا أهلنا أو كبارنا بيعملوا كدا أو الناس كوووولها بتعمل كدا .. حقو نراجع أنفسنا شوية ونبدا شوية .. شوية نتخلص من الحاجات البتتعارض مع ديننا الحنيف وسنتنا المطهرة..
    ونرجع للبوست تاااانى بعد التخريمة.. وأقول إنو الدبلة لا تغير فى الأمر شىء فعقد القران أقوى من كل دبلة أو خاتم زواج ..
    ولما كان السىء بالشىء يذكر .. هاكم الطرفة دى .. عواطف شافت سعيد ماسك قسيمة ( عقد ) الزواج بيطالع فيها مدة من الزمن ..قالت ليهو الحاصل شنو مالك شايل القسيمة وبتعاين فيها كدا ؟ قال ليها عاوز أشوف العقد دا بينتهى متين !!! ( طبعن العوة والعجاجة قامت..وسعيد بقا فى التخارجه من مزحته ).وخليك بعيييييد يا البشاوى من قسيمة الزواج … وكل واحد يحافظ على قرينه ..

  9. ابكرون كتب:

    البشاوي يا بش يا عظيم ….شوق ومحبه
    ياخ الحديده دي ولاّ سميها الخانق ده عنده فترته زي انفلونزا الخنازير تاخد دورتها في احد الأصابع المسكينة المخنوقه التي خلقها الله حرة….
    وتبدأ القصة من بداية الاعتقال …والحكم عليك بالسير في الطريق ذو التجاه الواحد المؤدي كثيرا الياحمد شرفي او التجاني الماحي…
    وتبدأ الحكايةمن طوق صغيرمن الذهب غالبا او البلاتين (حسب) وتوضع ايام التغريد الاولي بعد الزواج في (البنصر) الشمال تكتم نفسو لفتره حسب قوة تحمل الزوج …بعد عام (يا عالم انا بتكلم عن زول) يبدأ الملل بترك هذا الشئ الخانق في الحمام او تحت المخده..او وضعه في مكان بارز للخادمه لتسرقه…وفي فتره سنه تانيه زواج الي سنه خامسه يخبي في جيب القميص ..في الحفلات والاعراس واماكن الكبكبة والبكا والنحيب (بمعني انا فري) طائر حر قابل للتغريد….واحيانا يتحول هذا الخانق الي اليد اليمني (قدرا أخف)….
    بعد التخرج اي بعد خامسه زواج تبدأ الشكيه من حساسية الذهب والاصابع سمنت وقرفه شديده وتبديله بآخر فضي….وقمة السعادة لو خاتم عادي بفاروزه او جعران (اشرح يا بش لي ناس هناي وهنايه)..
    ثم ياتي الفرج بالتخلص من ده كلووووووو لا دبله لا خاتم…..خاصه في فترة المراهقة الثانية….(السلاوي خلي عطوفه بتاعتك تقرأ الكلام ده…ما تعمل لي فيها شريف فضول)…
    وبعدها(شيل باقي عمري شيل عيني) تدخل في مرحلة الاستغراب الممزوج بالدهشة (الإستغدهاش) من كل زول لابس الشي ده….! وكل ما اشوف زول لابسه كان بالشمال او اليمين اتذكر الشخص اللابس (كولا) ويعاني من آلام او دسك في الرقبة……ولله في خلقه شئون…..

  10. مُخير كتب:

    العزيز الأستاذ البشاوي
    الحلوين في كل مكان
    السلام عليكم ورحمة الله وبركاته،،،
    الموضوع رائع بالرغم ما أنه تاني برجعنا لحنان عواطف، ولا أدري لماذا كل هذا التحسس والحساسية من الخاتم، أنا شخصياً مع أنني مثل البشاوي ونيام أتضايق من لبس الساعة والنظارة رغم الضرورة للأخيرة، وحيث أنني تجاوزت عقد من الزمان قابعاً في قفص الزوجية السعيد لكن الله يعلم ويشهد أنني ما شكيت من الخاتم الفضة ولم أتضايق منه حتى تاريخه، لكن ربما يتغير الوضع عندما ندخل مرحلة(الإستغدهاش) والتي عرّفها شاعرنا اللبيب نيام بمرحلة الاستغراب الممزوج بالدهشة، إلى ذلك الحين سيظل ممسكاً بخصر بنصري رمزاً للشرك (بفتح الراء) وذكرى لشريك نيفاشا.

    ومواصلة لوردية الأخ الفقيه أبو صالح الذي سيطول غيابه شهراً آخر لإرتباطات أكاديمية أضيفت لأعباء وظيفته، وما علمته من صغري أن هناك حُرمة في لبس الذهب للرجال ولم أجد أدلة بعد لكن أورد أدناه بعض ما توفر من فتاوى حول الموضوع:
    رقـم الفتوى : 45670
    عنوان الفتوى : من السنة لبس خاتم الفضة للرجال
    تاريخ الفتوى : 23 محرم 1425 / 15-03-2004
    السؤال:
    ـ هل لبس الخاتم من السنة أو لا ، وإذا كان من السنة هل يشترط أن يكون من الفضة أم من الحديد وفي أي يد يلبس وفي أي إصبع ؟
    الفتوى:
    الحمد لله والصلاة والسلام على رسول الله وعلى آله وصحبه، أما بعـد:
    14- من السنة أن يلبس المسلم خاتم الفضة، وأما خاتم الحديد، فمختلف في جواز لبسه، وراجع في ذلك الفتوى رقم: 10727 ، ورقم: 20167.
    والله أعلم.

    كما ورد في الموضوع أيضاً:
    قال ابن رجب رحمه الله فى شرحه على الترمذى (شرح علل الترمذي ج:1 ص:277 )طبعة همام عبدالرحيم
    وقد اختلف العلماء في لبس الخاتم من فضة فذهب أكثر أهل العلم إلى إباحته
    قال أحمد ليس به بأس ومن أصحابنا من قال إن كان يقصد التزين فقط فتركه أولى ومنهم من قال بكراهته حينئذ
    وقال طائفة مستحب لبسه وهو وجه لأصحابنا أيضا ذكر مالك عن صدقه بن يسار قال سألت سعيد بن المسيب عن الخاتم قال ألبسه

  11. مُخير كتب:

    إضافة للموضوع:
    لم يكن الرسول عليه أفضل الصلاة والسلام يلبس خاتماً وفيما يلي قول فضيلة الشيخ محمد بن صالح العثيمين في لبس الخاتم:

    و أما لبس الفضة فلا بأس به , يجوز لرجل أن يلبس خاتما من فضة , لكن بشرط أن لا تكون هناك عقيدة في ذلك, كما يفعل بعض الناس الذين اعتادوا عادات النصارى في مسألة الدبلة التي يفعلها البعض عند الزواج . الدبلة يقولون : إن النصارى إذا أراد أحد منهم أن يتزوج , جاء إليه القسيس – بمنزلة العالم عند المسلمين – وأخذ الخاتم ووضعه في أصابعه : إصبع بعد إصبع حتى ينتهي إلى ما يريد ثم يقول : هذا الرباط بينك وبين زوجتك , فإذا لبس الرجل هذه الدبلة معتقدا ذلك فهو تشيه بالنصارى , مصحوبا بعقيدة باطلة, فلا يجوز حينئذ للرجل أن يلبس الدبلة. أما لو لبس خاتم عاديا بغير عقيدة فإن هذا لا بأس به . وليس التختم من الأمور المستحبة , بل هو من الأمور التي إذا دعت الحاجة إليها فعلت وإلا فلا تفعل , بدليل أن الرسول كان لا يلبس الخاتم ز لكنه لما فيل له: إن الملوك و الرؤساء لا يقبلون الكتاب إلا بختم , اتخذا خاتما نفش في فصه:(محمد رسول الله) حتى إذا انتهى من الكتاب ختمه بهذا الخاتم.

    من كتاب : شرح رياض الصالحين باب الأمر بالمعروف والنهي عن المنكر 8 /191

  12. ابكرون كتب:

    مخير : يا حليلك يا خوي الظاهر الخاتم ده ضاغط شديد اجلي النظر يا صاحي :(تدخل في مرحلة الاستغراب الممزوج بالدهشة (الإستغدهاش)……ههههه تسلم

  13. مُخير كتب:

    تصحيح ((ربما يتغير الوضع عندما ندخل مرحلة(الإستغدهاش) والتي عرّفها شاعرنا اللبيب نيام بمرحلة الاستغراب الممزوج بالدهشة)) المعذرة التعريف للفاضل الحبيب الأستاذ أبكرون، ولا أدري لماذا نسبته للأخ نيام ربما للسخرية الطريفة الممزوجة بالشاعرية، وهذاأيضاً أسلوب الخبير الإستراتيجي أبكرون عندما يكتب لنا هنا فله إعتذاري أن نسبت بنت فكره للأخ نيام، وعلى وجه العموم إن جاز لي التطاول هناك ميزة إضافية في أسلوب الحبيب أبكرون عند التعليق أنه إن كان رائق المزاج فأحياناً لا تخلو سخريته من السخط والسفه المُحبب.

  14. الصادق ود البركة كتب:

    السلام عليكم جميع الأخوان حكاية الدبلة وخلعها طبعاً زي أي زول عريس جبت الدبلة الماخمج ولبستها من سنة 90 وحتى98 وفي يوم وأنا في المسجد قبل صلاة الظهر أقترب مني شيخ وقور وبكل أدب أفهمني حكاية الدبلة وتأريخها عند النصارى وأقنعني بخلعها ومنذ ذلك اليوم وأصابعي خالية من الدبل والخواتم وعواطفنا سألت ورويت لها كلام الشيخ واقتنعت .جزى الله الشيخ الدكتور عبدالله بن حمود التويجري خير الجزاء وهو من وضح وأفاد بمثل ما ذكره أخونا مخير.
    كسرة يا أبكرون ممكن ترسل صورة العين الحلوة المرفقة مع تعليقكم أو تدلني من وين أجيبها ؟؟؟

  15. مُخير كتب:

    الأعزاء سلام
    إضافة أخرى لتعميم الفائدة وجدتها في موقع الإسلام سؤال وجواب للشيخ محمد صالح المنجد ما يلي:
    حكم لبس الدبلة للخاطب والمخطوبة
    ما هو حكم خاتم الخطوبة أو الزواج للرجال ؟ إذا كان جائز فهل يجوز أن يكون من أي معدن غير الذهب ؟ ما هي المعادن التي لا يجوز للرجال استعمالها غير الذهب ؟.
    الحمد لله
    ” أما لبس الذهب للرجل خاتماًأو غيره فلا يجوز بحال من الأحوال ، لأن النبي صلى الله عليه وسلم حرّم الذهب على ذكور هذه الأمة ، ورأى رجلاً في يده خاتم من ذهب فنزعه ـ عليه الصلاة والسلام ـ من يده ، وقال : ( يعمد أحدكم إلى جمرة من نار فيضعها في يده ) ، رواه مسلم ( اللباس والزينة/3897 ) ، فلا يجوز للذكر المسلم أن يلبس خاتم الذهب ، وأما الخاتم من غير الذهب من الفضة أو غيرها من أنواع المعادن فيجوز للرجل أن يلبسه ولو كان من المعادن الثمينة . يعني ممكن بلاتين
    وأما ( الدِّبْلَة ) فهذه ليست من عوائد المسلمين ، وهي التي تلبس لمناسبة الزواج ، وإذا كان يعتقد فيها أنها تسبب المحبّة بين الزوجين ، وأن خلعها وعدم لبسها يؤثر على العلاقة الزوجية ، فهذا يُعتبر من الشرك ، ويدخل في الاعتقاد الجاهلي , وبناء على ما تقدّم فلا يجوز لبس الدبلة بحال

    أولاً : لأنها تقليد لمن لا خير فيهم ، وهي عادة وفدت على المسلمين من غير المسلمين .

    وثانياً : أنها إذا كان يصحبها اعتقاد أنها تؤثر على العلاقة الزوجية فهذا يدخل في الشرك ولا حول ولا قوّة إلا بالله . مستفاد من فتوى الشيخ صالح الفوزان .

    انظر الفتاوى الجامعة للمرأة المسلمة ج/ 3 ص/914 -915

    ويراجع سؤال رقم 😦 11446 ).

  16. حبيبي فكر وقدر
    أيه الجبتو ليك هدية
    أزاهر …….. لأ
    جواهر …….. لآ
    لالا أغلى واحة عينيّ
    ====
    هدية فيها حرفي وحرفك
    وذكرى حبنا مكتوبة
    مكانا أيدينك الحلوة
    تزين بنانك المخضوبة
    تخليك تفرحي وتقولي
    شوفوني أنا مخطوبة
    ==
    خلاص يا حبيبي
    ما عدت أطيق بعدك وإنت قريب
    من قلبي وروحي اخترتك لأيامي
    شريك وحبيب
    قبل العمر يفرقنا
    وما نلقى في شبابنا نصيب
    حبايبي وأهلي شاورت
    هنوني في هواك يا حبيب
    قالوا والله والله
    تستاهل حبي وانشغالي عليك
    تستاهل فني الوهبتو إليك
    وجوك معاي يهنوك
    يشوفوا البهجة في عينيك
    وكيف بين لهفة الأشواق
    أخت الدبلة في إيديك
    تخليك تفرحي وتقولي
    شوفوني
    أنا مخطوبة

    يا سلام دا الكلام البكتلو زول….. غايتو جنس غايتو

    لكن يا اعزائي اعتقد و انو لحد هنا مية مية بس أول ما تتحول لليد الشمال لا سعيد لا عواطف بيهتموا بيها… ما الحنة و الدهب و الذي منو حيدي الاشارة و الشيب و خطوط الزمن و عدم الونسة مع عواطف حيدي الاشارة بالنسبة لسعيد اذن….. خلاس

    عموما تزوجت و أنا في أوروبا و لمن جاتني “عواطف” لم تكن تحمل لي دبلة و لمن اشتريتها من هناك بعد ما جات الظاهر اشتريتها كبيرة اكبر من أصبعي ما عارف تفتيحة مني و الا صدفة و ابتدات تقع و نلمها لحد ما عملت زي “سنكل” و تحولت لحلق و من ديك و عيك

  17. سماسم كتب:

    صباح الخير للجميع

    لك التحية بيشاوي

    والله نحن سعيدينا ديل كا يدوهم وساهم الصبر من الدرجة الأولي … تصورا لسه

    ما شفتها غياب ثانية واحدة منذ اللحظة الأولى مسجلة حضور مية المية …….

  18. مُخير كتب:

    ود البركة: أحسن تحفظ مساحة يا شيخ من عيون أبكرون ديل بيودروا :).

    الزهراء: وبعد اتخرجوا البت عرست زول تاني والولد خطب صاحبة البت
    فهمتو حاجه؟ آآآآييي فهمنا كلام حاج أحمد السلاوي: ((الدبلة لا تغير فى الأمر شىء فعقد القران أقوى من كل دبلة أو خاتم زواج ..)) ده الكلام يا حاج

    والورقة بتاعت مولانا دي هي المحك مش حكي الناس الفي القيف (ناس سهيل والشمباتي) اللي ممكن يكبوا من أبو عشرة زي (بوعدك) حقت أبو عركي، وبالمناسبة نطلع من دائرة الفقه والنصوص إلى عالم الطرب وأهدي بالمناسبة رائعة أبوعركي إلى الباشمهندس سهيل والدكتور ياسين الشمباتي وإلى الأخوات الفاضلات الغبشة والزهراء ونونو وكل العصافير البرة الشرك، ومهداة أيضاً إلى الطيور المهاجرة وغير المهاجرة:

    بوعدك ياذاتى يا أقرب قريبة
    بكرة أهديك دبلة الحب والخطوبة
    أى حاجة تزعلك حالاً اسيبة
    عندى زيك كم اميرة وكم حبيبة
    وعد من قلبى ومن إرادتى ومن ضميرى
    مافى زول أجبرنى ماشاورت غيرى
    كل كلمة أقولها بتصور شعورى
    بالريدة وهى حراسى ومسيرى
    مين يقدر يفرق بين حبايب
    نادى …شوقهم
    الامل زاد العواطف فى طريقهم
    كل زول فى الدنيا دى شايفنو بريدهم
    والمحبة البانية
    راميـة
    ظلالها …فى طريقهم

  19. ابكرون كتب:

    مخير : تسلم وما قصدته الا الدعاااابه الظاهر المزاج رااااايق يا لذيذ يا رايق….
    ود البركه : ع تبالغ من 90 لا عند 98 بولغته فيها ..مفروض يكرموك في يوم الدبلة العالمية…..ياخ عين السرة دي اعمل عليها كلك باليمين وبعد داك احفظها (سيفها) وين ما بدالك……

  20. aflaiga كتب:

    البشاوى : جهزنا ليك اوضه فى الاقمار ما تخاف !!!
    الزول بيقولو لمن يبدا يقلع ما بيقيف تانى !!!
    انا شخصيا من قمت بكره الساعات والحاجات البتربط الزول دى وقلعت الدبله من اول سنه بعد الالتزام القاطع بانو سي الدبله مكانو بى جوه مش بره !!! شفت كسير التلج ده ؟؟
    الدبله اذا كانت دلاله على وضع اجتماعى معين ( مزوج او خاطب ) فدا بيعنى انها موجهه لطرف ثالث – اما اذا كانت دلاله على التزام عاطفى فهى بين الطرفين فقط ..
    صديقى س عامل دبله واسعه عشان يفكها لمن يحتاج ( يفكها ) ويربطا لمن يخاف من ( الربط ) !!!
    غايتو يا بشاوى يادوب اتفكينا من موضوع عزت وزول بتاع الدبل بفتح الدال وضم الباء تقوم تخششنا فى موضوع الدبل بكسر الدال وفتح الباء !!! الله يستر … يا جماعه نحنا راحلين جداد مالكم علينا ؟؟؟
    كسره : صديقى و اشتكى لى من ان عواطفو جابت ليهو دبله معينه لبستا ليهو وهو مصر انو الدبله دى مع العرق بتسرب لجسمو مواد من الطليه بتاعتا فيها عمل مكتوب عند فكى اسمو طلاء الطاعه لانو كلما يطلعا بيشيل نفسو وكلما يلبسا بيحس انو نفسو مكتوم !!!!

  21. حاج أحمد السلاوى كتب:

    ألحبيب الأمير مخير ثرو الطيب الغالى البشاوى ( تعرف يا بشاوى أسماءنا متقاربة نطقاً بالحيل ) ..سلام ليكم ولكل الأحبة الغايبين والحاضرين ..ومشتاقين كتير ..
    أعتقد ( وإن كان بعض الظن إثم ) أن شاعر القصيدة التى يغنيها الفنان أبو عركى دا من نوعية أخونا سعيد السهير مسح جوخ ..تكسير نلج برخصة..ودا حالته لسه فى مرحلة الخطوبة و لم يتزوج بعد .. غايتو جنس غايتو يا الرجال .جنس كبكبة فى البداية ..وبعد دااااااك يرمى الدبلة ويقول عملت لى حساسية..
    فى طرفة أتذكر إنى ذكرتها قبل كدا ..لاكين لا حرج الواحد يقولها تانى ..الخطيبة قاعدة مع خطيبها وبتقول ليهو أنا حأوقف جنبك وأكون ساعدك الأيمن واحلحل ليك كل مشاكلك إن شاء الله ..قال ليها بس أنا ما عندى مشاكل ..قالت ليهو : لاكين ما نحنا لسه ما إتزوجنا!!! ( حسه تلاقى كل العواطفات حكموا على و أهدروا دمى ..وختونى فى القائمة السوداء )..
    ربنا يسعد عواطف بى سعيده ..والماعندها سعيد يديها سعيد والماعندو عواطف ( آآآآى إنت يا المنطط عينيك زااااتك ) يديهو عواطف عشان يحس بالحنان وزى مابيقول زيدان .. دا الحنان الفى عيوننا اصلو نابع من عيونك ….سنه ؟؟

  22. aflaiga كتب:

    السلاوى : بقيت تفرفر شايفك سنه يا انتا الماك مضيوف !!
    ——
    مررت مرة بسوق الدهب وسالت الزول بتاع الفترينه :
    افليقا : الايامات دى اكتر شيئ ماشى شراء الدهب ولا الدبل بتاعة الخطوبه ولا الدهب بتاع الترضيه ولا شنو ؟؟؟
    الصائغ : والله الايامات دى ومش الايامات دى لينا زمن غير راء الدهب من الناس العاوزه تبيع ما فى شيئ !!!
    افليقا : يعنى الايامات دى ايامات ( بيع ) ولا شنو ؟؟
    فضحك وفهم وسكت ..
    ——
    صديقى س كهربتو ملخبطه شوية وكان فى الجنوب زمااااااان وفى احدة مدن الجنوب اهدته احدى الابنوسيات دبله بلاستيك لستك !! ومن اليوم داك لابسا وما طلعا برغم انو اتزوج وولد وقرب يمشى الحج ويعمل عملية البروستاتا ويموت !! بالمناسبه اهل الجنوب ديل عندهم مشغولات يدوية رهييييييييبه يحبها الخواجات جدا بينما لا نستمتع بها نحن اخوتهم فى الشمال الا نادرا .
    ———
    الاكرم عم بشار فى اخر زياره لا حظنا انو لابس ليهو حاجه كده سوار فى شكل خاتم كبير نحاس وخفنا نسالو منها تطلع دى من الاكسسوريز بتاعة شجر الدوم غايتو راجين منو الوصفه السحريه ولو فى الميل ..
    ——-

    جاييكم ..

  23. ابكرون كتب:

    السلاوي : غايتو عالم جبااااانات بشكل….! بتكسر دبش دقاق بشكل علي ابواب التاج محل….جايب لينا الهوا والزرزرة….!
    افليقا : نحاسة بشار دي اسعلني منها انا منقوش تحتها (ك ت م ت)…

  24. aflaiga كتب:

    ابكرون : طبعا نحنا ما عارفين ظروفك البتخليك ما بتحب التلج هل هى ظروف نابعه من مبادئ ولا من عدم اطلاع بتاع التلج على محل بدال العجله !! لكين غايتو بنحييك على المصمود والفرق بيننا وبينكم انكم سكنتو المنتدى عزابه ونحنا جيناهو عوايل وعندنا فايل !!!! بالله نحاسة بشار دى مكتوب تحتا كده ؟؟ انا قايلا ماخوده من النحاس الكان بيدقوهو فى الحرب زمان عشان يتذكر الامجدا وهو راكب ركشه !!!
    شباب : حقيقة !!شفتو حقيقة دى معناتا مافى حقيقة طوالى !!! حقيقة الواحد بعتز جدا بانو يعبر عن ارتباطو العاطفى باى شيئ دبله خاتم قربه طشت المهم يعبر وكل ما يلقى طريقه يعبر لكن بينى وبينكم قصة استخدام اداة وشكل مؤطر فى التعبير كالدبله دى اعتقد بانو بينقص من قيمة المدلول الارتباطى لانو البيننا اكبر من حديده !!
    صديقى ك خش مره فى نقاش مع عواطف حول الدبله :
    ك : دبله شنو يا حياتى البيننا اكبر من حديده ..
    عواطف ك : الاكبر خليهو بس انتا ركز لى فى الحديده دى .
    فيا ريت اخونا نيام يدينا بيتين عن اثر الفضه فى الشده واديك ملامح من البيتين :
    جارى عمرى اكوس رضاكى — وانتى مشغوله بحديده
    كل حدايد الدنيا اصغر من هواكى – نحنا ريدتنا اكيده
    ما بندورلنا رمز فانى – حبك اكبر من حديده و حبى مالياهو المعانى ..
    بالله يا نيام تمها وخلى ابكرون يموت كمدا …

  25. aflaiga كتب:

    شباب : البشاوى ده فتح باب تانى بيجيب مشاكل والتعلييقات داخل النص على مسئولية سيد البوست .
    بالمناسبه قة الدبله دى بتعمل اثر معنوى كبير عند عواطف لانو انا اذكر انو ف مره وانا ماشى جنب سوق الدهب لقيت دبله سمحه شديد وقمت اشتريتا ولبستها ومشيت البيت ما تتخيلو القصه دى انعكست ايجابا كيف على سمسمه ودار الحوار التالى :
    افليقا : بالله يا روحى مبسوطه كده من الحاجه دى ؟؟
    سمسمه : والله لو عارف مدى انبساطى ما بتقلعا تانى !!! ( مفتحه موش ) ؟
    افليقا : انتى عارفه يا روحى انو انا والله ما عاوز اقلعا لكن انتى عارفه برضو انا ما بحب حاجه تربطنى لانها بتضايقنى ..
    وهنا تدخل حمودى الشفت :
    حمودى : بابا طيب انت ماما دى مش رابطاك ؟؟
    افليقا : ايوا طبعا .
    حمودى : وتيب ؟؟!!!
    ——-
    فى الطفولة الاولى كنا نلعب مع شفع الجيران ونقوم بفك علب السجاير الفارغه ونطلع منها الورقه الجوانيه البيكون لونا دهبى ونعمل منها دبل واساور ونلبسا لى بعض نظام مخطوبين وعده عده وبابا جا من الشغل صديقى س ما كان بيحب الدبل والحاجات دى وكان زول خجول جدا جدا واول ما بت تلبسو طوالى يقلعا ويقوم جارى البيت لحدى ما لبس البى جد جد وبرضو بيقوم جارى لكن من البيت !!!!!

  26. nono كتب:

    غايتوووووووو؟؟؟؟

    جنس؟؟؟؟؟؟؟

    غاااااااااااااايتوووو؟؟؟؟؟؟؟؟؟؟

  27. nono كتب:

    البشاوي لك التحية/
    العقد الفريد/ الزهراء/ مخير/ ابكرووووووون/ افليقا /مشاكل /علي سنكل/ (حاج أحمد السلاوي)

    يعني ياالزهراء يااخني الحساسية الانطلقة في البنصر دة شنوووو؟؟؟؟؟؟؟؟؟؟ من الخانم ولة من عواااااطف الشي شنوووووووا ( شي برهم ) شنوو ووووووو مااااابعرف داااااااك
    (ياالبنصر ياالخنصر )

  28. نيام كتب:

    عفو صديقي بشة للتاخير ولكن بت خالتك كانت مودرة دبلتها و نحن في حالة استنفار قصوي للبحث عن الكنز..
    انا لا اعرف كيف يذكر الجميع متي وضعوا الدبلة علي بناصرهم و لا يذكرون متي تم فكاك تلك البناصر..وهذا في حد ذاته مؤشر ذو حدين إما أن تلك البناصر ما عادت تأبه لهذا الحدث أو أنها قد ضاقت ذرعا به…
    تمت الخطوبة في تاكسي من تاكسيات الخرطوم في طريقنا لسينما البلونايل من داخليات جامعة الخرطوم …
    دبلتين من الفضة اشتراهما صديقي و زميلي بعد عودتنا من الغربة..ناولني (عبدو) وهو في المقعد الأمامي مع السائق ناولني الدبل وأنا علي المقعد الخلفي مع الملكة اليزابيث الأولي و الأخيرة فوضعت واحدة باصبع الملكة و الاخري في اصبع الملك (اللي هو انا ) و لست ادري حتي هذه اللحظة هل كان ذلك ضروري ام انه ان الاوان حينذاك لوضعهما.. ام انني اردت ان ابرئ نفسي من مرافقة فيها شبهة…ولكن احسست بعد ذلك باني مهم و قد احست هي بان الموضوع صار جد..
    كانت نظرية البشاوي هي السائدة بعذ ذلك فكل ذات نون كنت املؤها غيظا باني مستحيل..وظل ذلك الكبرياء الارعن يملؤني ردحا من الزمن حتي جاء زمن صرت ابحث فيه لعكس النظرية فخلعت قطعة الفضة تلك بحجة انها تسبب الخطر في اثناء العمل و انها في كثير من الاحيان كادت تقلع اصبعي ..ومر الموضوع بسلام و دون عقوبة تذكر ..غير انه يبدو ان خلعها قد تم بعد فوات الاوان حيث اني لم اجد نونا متحركة واحدة تنظر الي باهمية تذكر بعدئذ..

    افليقا:

    هاك يا فلقة….
    بيني بينك شوق عمر لا نام ولا خاتمو انقلع
    بيني بينك ريد سنين لا راح و لاالدبلة بتقع
    بيني ما بينك جياد يا ريت حديدها لو نفع
    بيني ما بينك رباط ما هان و لا يوم انقطع

  29. nono كتب:

    يا عااااااااااااااااازف ؟؟؟؟؟؟؟؟؟؟

    ياااااااااااعازف؟؟؟؟؟؟؟؟؟؟؟

    الاوتاااااااااااااااااااااااااااااار؟؟؟؟؟

  30. الزهراء كتب:

    الاخوه الاكارم
    الليله منورين

    نيام:( بيني ما بينك رباط ما هان و لا يوم انقطع)

    نيام تسلم البطن الجابتك يا أخوي
    يعني لا دبله لا حديد ولا غيره حيبدل الجوه الدواخل
    دي خلاصة الكلام

    لكن الموضوع ممكن نلقى ليه اتجاه ايجابي تاني
    ده اذا اعتبرنا الدبله نوع من التذكار زيها زي باقي الهدايا والتذكارات
    انا طبعا والحمد لله لا امتلك دبله لكن تعودت على وضع هدايا الناس العزيزين علي امام عيني منها صور ومنها (دبدوب لعبه) واحتفظ ببقية العطور المهداه الي والملابس ايضا المهداه وما الى ذلك وعموما وانا انظر الى هذه الاشياء احس بنوع من الايجابيه في التفكير
    اذن الدبله ممكن نعتبرا تذكار يعني وانت بتاكل بتغسل اياديك وانت تقود السياره فعندما تنظر اليها تتذكر انه هناك شخص ما في هذا العالم خصص لك انت فقط هذا التذكار الجميل وانه ايضا ينظر الى يده ويتذكرك بكل حنان ويبتسم لك

  31. nono كتب:

    الزهراء/
    انا طبعا والحمد لله لا امتلك دبله؟؟؟؟
    لكن تعودت على وضع هدايا الناس العزيزين علي امام عيني منها صور ومنها (دبدوب لعبه) واحتفظ ببقية العطور المهداه الي والملابس ايضا المهداه وما الى ذلك وعموما وانا انظر الى هذه الاشياء احس بنوع من الايجابيه في التفكير………!!!!

    من حمدووووووا؟؟؟

    زاااااااااااااااااااادوا؟؟؟

    يااااااااااااا بت ياااااااااااافكري؟؟؟

  32. bakriMusa كتب:

    البشاوي .. متعك الله بالصحة والعافيه

    تعرف يا اخوي البشاوي ..المهم موش دبلة الزواج ..اهم شي انو تاريخ صلاحية عقد الزواج يكون ساري المفعووووول .
    _____________

    منقووووول للفائدة

    خاتم الخطوبة من التقاليد الفرعونية القديمة، وأول من اتبع ذلك التقليد هم القدماء المصريون، والسبب فى ذلك أن النقود التى كانوا يتعاملون بها كانت على هيئة حلقات ذهبية، وأن وضع إحدى هذه الحلقات فى اصبع العروسة يدل على أن العريس قد وضع كل أمواله وكل ما يملك تحت تصرفها !!

    أما فى عصر الرومان فكان العروسان يرتديان طوقا من الزهور على رأسهما وهذا دليل على ارتباطهما، وتحول الطوق بعد ذلك إلى خيط ملون يتلف حول أصبع الخنصر.

    وعند الإغريق قيل إن أصلها مأخوذ من عادة قديمة، حيث عند الخطوبة توضع يد الفتاة فى يد الفتى ويضمهما بقيد حديدى عند خروجهما من بيت أبيها، ثم يركب هو جواده وهى سائرة خلفه ماشية مع هذا الرباط حتى يصلا إلى بيت الزوجية!!.

    وعن قصة الدبلة فى اليمين عند الخطوبة والشمال فى الزواج، فترجع إلى أن اليد اليمين هى التى نحلف بها يمين العهد، وفى حالة الخطوبة هنا الطرفين كل واحد فيهما أعطى عهدا للطرف الآخر أنهما سيرتبطان للأبد.

    وتقليد وضع الخاتم فى الأصبع الرابع من اليد اليسرى فى الزواج له علاقة بشريان يمتد من الأصبع ويتصل مباشرة بالقلب، ويعرف بشريان الحب “فينا أموريس”.

    أما الشكل الدائرى فيرجع إلى زمن الإمبراطورية الرومانية، حيث كان الخاتم آنذاك مصنوعا من الصلب ليشكل رمزا للصلابة والمتانة، وأيضا لعدم توافر الذهب فى ذلك العهد، والشكل الدائرى يمثل الاستمرار والثبات لصياغته.

    وقد قيل إن النماذج الأولى التى شكلت خاتم الزواج كانت تصنع من جزأين يتصلان بواسطة عقدة، يقدم الرجل لعروسه المقبلة نصف الحلقة ويحتفظ لنفسه بالنصف الثانى، وعند إتمام المراسم تجمع القطعتان ليكتمل خاتم زفاف العروس.

    وبالنسبة لحفر التواريخ وعهود الأزواج فقد برزت فى القرن السادس عشر كعبارات “بحبك” و”معا إلى الأبد” وغيرها، والأحرف الأولى لاسمَى العروسين، وهذا التقليد لا يزال محافظا على مكانته حتى يومنا هذا.

    ودخول الألماس فى بعض الدبل له خصوصية خاصة، حيث إن الألماس هو الحجر الذى لا يُقهر ويرمز إلى الحب الأزلى، وبرز فى بعض التصميمات أن الدبلة مرصعة بثلاث ألماسات ترمز إلى الماضى والحاضر والمستقبل لتؤرخ مراحل الحب.

  33. الزهراء كتب:

    النونو ما تعملي لي اي هركات بقبل عليكي في بوست الريييد بوريك المكشن بلا بصل
    اشرح ليا يا سهيل ووريها اللي ممكن يحصل

    يا ستي ليك وحشه واحلى تحيه ليك يا اموره

    أهنننن يا أبكرون قلت لي نونو دا مالو؟

  34. nono كتب:

    ،يا الزهراء ياختي «دبلة الخطوبة» حلماً يبرق بخيال كل عواااااطف وهو ويلمع في الإصبع من أدرك هذا الحلم؛ ليكون بداية الأفراح السعيد …..
    يعني ماتقولي لية لو غسلته ؟؟؟!!! العده شنوووومابعرف داااك ؟؟
    بالنسبة لخانم( ا-لخ-ط-و-ب-ه) في رواية مامتاكدة من صحتها ان الرسول (ص) كرمه الله وجهة أمر أحد الشباب الساعي إلى الزواج قائلاً: «التمس ولو خاتماً من حديد»..اي يقدم للعروس مهر لو خانم….

    ياخاتم المنى وين نلقاك هنا
    تبعد همنا وتدينا الهنا

    ماتقولينا لا ما بنحملا
    لو شفتو الحلا
    حتقولو الصلا وتغيرو مننا
    ماتغيب مننا ياخاتم المنى

    ياخاتم المنى وين نلقاك هنا
    تبعد همنا وتدينا الهنا

    نور شمعتين وامسح دمعتين
    لو جانا الحبيب نفرح مرتين
    ونول المنى يا خاتم المنى

    ياخاتم المنى وين نلقاك هنا
    تبعد همنا وتدينا الهنا

    بعيون القمر بتحلي السمر
    ولطافته السير
    ونقول الندر
    وان غاب عننا يا خاتم المنى

    ياخاتم المنى وين نلقاك هنا
    تبعد همنا وتدينا الهنا

    يا الزهرااااااء الفكي ابكرووووون ده خلي في حااالوا
    البيااااااااااااااااااااااااض حق العزيمه ديك مادفعتوا لية؟؟؟؟

  35. بشار أحمد بشار (إبن برد) كتب:

    غايتو أنا في رأيي البسيط المتواضع أي واحد ما صرف دبلتو بعد شهر من الزواج واشترى ليهو لحم ضان لزوم الشواءات وتوابعها من سفن أب وخلافو معناتا هو (ظاتو) ملبوس خاتم بواسطة المره وأنا بحمد الله لغاية هسع عواطفي ماعارفاني مشلخ ولا ( أمره) أي بدون شلوخ لأني شدت ما نمر ما بتقدر تملى عيونها فيني (الأسود عرفنا البيهم والعليهم من الإيميل الرسلو لينا عزت المرة الفاتت) فما بال تسألني عن الدبلة وين؟؟

  36. الزهراء كتب:

    لو لاحظتي يا نونو الرجاله ديل كلهم ما مستحملين الدبله واشمعنى عواطف دي لابساها وما بتفكر حتى تقلعا من ايدا بل بالعكس تكمل المنظر بالخضاب الجميل وبغم ما بتقولا
    الحكايه تعويده انا عندي خاتم لبستوا لمدة سنوات وكان لا يفارق يدي اليمنى وفي بعض الاحيان اخلعه لفتره قصيره وارجع والبسه من جديد حتى تسبب في اثر دائم حول اصبعي وحتى الان بالرغم من استبداله بآخر اكبر الا انني لا استطيع تركه… يعني ممكن نقول انه عندنا معاني خاصه جوانا اقوى من اي حساسيه في الدنيا

    هل هذا برأيكم نوع من الحنين للطرف الاخر ام ماذا بالضبط
    لو في زول منكم عندو علاقه بالسيكولوجي يفسر لينا

  37. الزهراء كتب:

    بكري موسى
    ما قصرت يا اخوي
    شفت الناس ديل كانوا راقين كيف

    لكن نحن عندنا حاجات احلى زي الجرتق والحريرهوالضريره ورش اللبن والسوميت والخرز الازرق وخاتم الجنيه الما بيلحقه ماس ولا غيرو
    كلها عادات وتقاليد لكن ليها نكهتها الخاصه ومازالت مستمره

    لك التحيه اخي

  38. nono كتب:

    الزهراء/
    لو في زول منكم عندو علاقه بالسيكولوجي يفسر لينا؟؟؟؟

    نونو/
    انا عندي علاقة بالسيكولوجية؟؟؟؟؟!!!!

    التفسير بيقول؟؟؟؟

    هناك مؤشر اكيد غير قابل للشك ان هذا الخاتم له ارتباط عاطفي سواء أكان (من حبيب او من ود اما قريب)؟؟؟؟؟

  39. bakriMusa كتب:

    اعتقد أن الاهتمام بخاتم الزواج يرجع إلى أهميته في مجتمعاتنا العربية رمزاً للارتباط الشرعي لقصص الحب بين الشباب ولذلك يولي الشباب وخصوصاً الفتيات اهتماماً بالغاً بشكل «دبلة الخطوبة» ويحلمن باليوم الذي ستتوج إصبعهن بإطار من ذهب وقلوبهن بإطار من حب.

    وهناك تفاوت بالنسبة إلى الاهتمام بين البنات والشباب بـ «دبلة الزواج»؛ لأنه في الوقت الذي يرى فيه كثير من الشباب أهمية ارتدائها أثناء فترة الخطوبة، على حين لا يكترثوا لوجودها بإصبعهم بعد الزواج، إلا أن المرأة تظل على عهدها في الاحتفاظ بها ربما إلى آخر أيام العمر بل يصل الأمر إلى أن المجتمع يدين المرأة المتزوجة التي لا تضع خاتم الزواج بيدها، إذ يعدها مفرِّطةً في ركن من أركان الزواج وربما هو ركنه الأول والأهم عند الكثيرين فهو رمز للإخلاص والولاء لصاحب القيد الذهبي.

    ويعد المجتمعُ الشرقي المرأةَ المتخلية عن دبلة زواجها طوعاً لظروف انتهاء هذا الزواج بأي شكل سواء للطلاق أو الوفاة فالقلب فارغ ولا يشغله أحد؛ كيلا تشغل إصبع الزواج بيدها اليسرى بإطار ذهبي وأن المرأة العربية حريصة على إبراز موقفها الاجتماعي بوضوح لعدم الخلط وخصوصاً في أمورها العاطفية والخاصة بالارتباط، إذ إن الدبلة هي الإشارة الأكيدة غيرالقابلة للشك في نوعية ارتباط المرأة العاطفي سواء أكانت فتاة أم سيدة.

  40. سهيل كتب:

    مساكم زين … اخونا البيشاوي نورت البلد و قومت العجاجه ..

    شكلها الليله كتاحتها في السما .. و كان حيين بنتلاقا ..

    نونو : شكلك كده عايزه إعاده برمجه .. بعد ما يتعمل ليك إسكاننق .. شكلو كده الآنتي فايرس بتاعك ما مواكب .. .. .. مبروك البرمجه الجديده

    الواحد نفسو يواصل لكن جيراننا عندهم بكا و لازم نعصر الفراش

    جاييكم

  41. الزهراء كتب:

    يا سهيل لا كتاحه لا عجاجه
    نحن كويسييين الا كان كايس ليك موضوع براك بتاع كتاحات

    وبعدين نونو دي دايره فورماتينق عديييل وانستاليشن لي ويندوز فيستا عشان تقدر تواكب وبعد داك اديها اب ديت للبرامج كلها
    ونخليها تعمل ريستارت
    ولا شنو؟

    ود الخلا نورت المجلس والله ما ضراك ان شاء الله
    كتر خيرك عرفت للجماعه ديل وشكلك عارف نفسياتم كويييس

    وبمناسبة الفرفشه دي نحن ونتظرين البوست بتاعك وان شاء الله يكون مفرفش

    فاقدنك يا الغبشه

    ما طابلك عدو ان شاء الله يا يمه
    وييين ايامك؟

  42. ابكرون كتب:

    يا عالم بطلوا الوهم ده …بكري عليك الله ما تخلي بنوتنا ديل يبنن قصور من الرمال …قال ايه عندو معاني الخاتم ده..!!! معناه الوحيد للسره … اغنية وردي (شوفوني انا مخطوبه) وبعدها متزوجه بعد نقله لليد الشمال محاط بنقوش الحنة….اما بالنسبة لبعلها ….اشارة الي ده يا بنات حقي انا …! وخاطب ومن ثم متزوج…الخ
    سهيل والزهراء…كل شي ولا النونو دي …بيل قيتس ما يفرمتها..اعملوا حسابكم وارعوا بقيدكم….
    ود الخلا : عليك الله ما تتور نفسي….هاك التقييد بالحديد ده…!
    بشار : افليقا بقصد الرنق الكبير بتاع النحاس بتاع المعصم …ك ت م ت

  43. البشاوى كتب:

    الاعزاء السمار سلام
    ينصر دينك ياأبكرون تفش الغبينة وتبرد الحارة بدون تلج (متبرع ليك بى كشك)
    سنكل رجل الملاذات الآمنة والحلول المنطقية عفيت منك
    مخير لك الود والتحية – نحن نشتكى من حساسية فى الاصبع من لبس الخاتم وانت تشتكى من حساسية من نوع آخر ولاشنو؟؟؟؟ ههههة
    بشار الاسد قلت لى عواطفك ماعارفاك مشلخ ولا أمره للليلى ؟بتكون حاسة بشنو ياربى ؟اكيد تكون مديها ضهرك
    السلاوى شبيه الاسم لك الحب == مالك كلما طرقنا باب فيهو سيرة عواطف تفتح مصنع تلج يعنى ناس الشيخ ابكرون ديل يمسكو النار دى براهم خلى قلبك معانا شوية وتسلم أم وضاح
    بكرى موسى بارك الله فيك على الافادة الجيدة عن تاريخ الخواتم وشكرا على المرور الانيق
    نيام قلت لى تمت العملية داخل تاكس ؟؟ يا إبنى دى عملية إرهابية عدييييل كدة وإختطاف تحت التهديد وصاحبك دة بالتحديد زعيم العصابة حاول تلقاهو وتاخد حقك منو كفاية عليك لحدى هنا
    القبيلة ود الخلا كلامك زين بالحيل كشفت الجماعة العاملين تفتيحة ونايمين جنس الكلام دة بيسبب حساسية لى ناس سلولو وبشار ومخير
    العزيز عزت يعقب وعامل ساتر من الهجمات المرتدة الدكتور دة كان مفروض يكون صانع العاب فى ريال مدريد
    المراوغ افليقا لكن ياولدنا كملت على اعمامك التلج يكسرو شنو تانى ؟
    سماسم شغلك نضيف قرطى على كدة
    النونو نعم ربماالدبلة هى فرحة ورامل لكل عواطف تحت التمرين
    الصادق ودالبركة الشيخ الحلاك دة ماعندك رقم تلفونو نديهو لى حبايبنا المقيدين ديل
    ولدنا السهيل البركة فيكم قصة العجاجة انت البديتا واعمامك شايتين عليك خلى روحك رياضية وقفل دفاعاتك —– بالمناسبة انت لابس دبلة ؟؟

  44. الزهراء كتب:

    ابكرون /انت قبل كده نونو دي فرمتها بي فاتحه ولا شنو؟
    ولا يعني عشان سهيل ما ادلك البياض تقوم تدينا على راسنا

    سهيل عاصر فراش جيانم بيعشيهم ويجيك يا ابكرون
    دا لو ما قوم كتاحه وكتراابه والتراب كاال حماد والعجاجه قجت
    ويا عيني كفاك الم الغبار والعجاج قسم
    يا عييينيييا

  45. البشاوى كتب:

    الزهراء
    تسلم عيونك من الغبار والكتاحة — النونو دفعت البياض للفكى ابكرون وسهيل
    منتظر شنو لى حسة ؟؟ ابكرون لو كتحو بى رتينزة بيخلى عجاجو لاوى

  46. الزهراء كتب:

    يا البشاوي
    سهيل ده لو ماعشى ناس الفراش كلهم ما بيجيكم
    بس خايفين يكب الزوغه بي كشف البكا زي عمنا بتاع مقال الفاتح جبرا

  47. د.ياسين شمباتى كتب:

    الحبيب البشاوى..سلامات..

    غايتو انا من محبى ومشجعى خواتم الفضة,وهى سنة نبوية مثبتة..وطوالى بقتنى الجديد فى عالم الدبل(جمع دبلة),,من باب البخت والمباختة وكدة..

    احبتى..اعذرونى هذى الايام للغياب,لكنا سوف نأتى عما قريب..

  48. سهيل كتب:

    صباح الخير

    بيشو الحبيب : لا أنا مالابس دبله … انا لسه سغيرووني و عايز اقرا .. (سامعه يالغبشه) ..

    – الدبل بكسر الدال = جمع دبله أما بفتحها (الدال) فهي بوادر هبوب الخماسين و وإحتمال قصف جوي عنيف لا تقوى دفاعاتكم الأرضيه على صده يالعواطفات و الموحدين…

    ” ارى تحت الرماد وميض نار ** و اخشى ان يكون لها ضرام”

    ” فإن النار بالعودين تزكى ** و إن الحرب اولها كلام” ..

    إن عدتم عدنا و إن لبدتم لبدنا

  49. نيام كتب:

    بشار:
    ” وأنا بحمد الله لغاية هسع عواطفي ماعارفاني مشلخ ولا ( أمره)”
    هييييع بشار.. تكون ام يحي جابت خبر شلوخك و مرهك في لحظة شية الدبل و في انسجامك ما نقشت الكمرة الخفية .اخير صاحبك سواهن حلقات في اضان هدوو..
    بشاوي:
    صاحبي داك الله يسامحو و حقي بلقاهو قدام

  50. حاج أحمد السلاوى كتب:

    الحبيب الغالى أخونا ودالخلا… وكل الأحبة ..سلام
    بس بعد مقالتك العصماء ما وريتنا ( إنك حتتأخر يوم ..كان غايتو إتصبرنا ) موقفك امام الأمم المتحدة … أنك من اللابسين للحديدة إياها .ولاّ من التانيين ..
    – ولدنا شمباتى ..أنت مالك ومال شراء التياب حسه ؟ لامن تلم فى عواطف بعدين ادخل السوق …ولاّ دا تمرين لما سيكون ..بس قول لى إيه أخر أسماء التياب السودانية فى باب شريف ؟
    -” وأنا بحمد الله لغاية هسع عواطفي ماعارفاني مشلخ ولا ( أمره)”
    أخونا الكاشف بشار .. يا جامد ..إيه السطوة والجبروت دا.. غايتو أكان بقيت مشلخ وهى ما عارفاك دى تبقى حكاية تانية..حكاية عاوزة ليها بوست خاص ..دى ذكرتنى قصة واحد خليجى ( خلونا من أى بلد ) عواطفه رفعت عليهو قضية لأنو كشف القناع اللابساهو وهم متزوجين من 15 سنة ..وطلبت الطلاق .ز المثير فى القضية إنو عواطفه دى طلعت جميلة جمال تاجوج ..والزوج سعيد صار يتحسر إنو طول الفترة ما أًتيحت ليهو فرصة عشان يشوف الجمال دا …وطبعن هو غلطان من قمة راسه إلى أدنى اساسه لأنو خالف الشرع والسنة بانو مسموح ليهو يشوفها شرعاً قبل أن يقدم على الزواج ..وبينى وبينكم .. يستاهل .

  51. مُخير كتب:

    أستاذنا البشاوي
    الحلوين أينما كانوا
    سلام
    قلنا لن يستوي اليوم ما لم نُمر على فراش أبو البش نشيل الفاتحة على حلوة الذكر “الدبلة” ونآخد لينا خشم خشوين مع الحلوين، أهة جينا لقينا العلامة بشار إبن بُرد بيكسر حبة تلج لأم يحي فإذ بناس نيام وحاج السلاوي يفهموا غلط ويعتبروا المسعلة سطوة وجبروت.. ياخوانا الولية قمة في الأدب ولأبو عيالها هيبة وفنجرية وأطلعوا منها، الدنيا لسة بخير وفيها نساء بخُلق الأجيال الماضية والواحدة منهن لا تجرؤ أن تملأ عينها من بعلها.

    وجه الحبيب سُهيل: شنو يا ولدنا قصة الحرب اولها كلام، الله لا جاب حرب، والحرب دوماً اكون من أجل الوطن أو إمرأة متميزة، ويمكن لك أن تحقق مقصودك بالسلم ودون حرب، أو لم يقل الشاعر رسول حمزاتوف “شيئان في الدنيا يستحقان المنازعات الكبيرة.. وطن حنون وامرأة رائعة..” ندعو الله أن يُمن عليك بالمرأة الرائعة دون حرب أو نزاع، قول آميييين
    ويقول الشاعر الداغستاني الكبير رسول حمواتوف:

    حبيبتي.. إن كان هناك مئة مخلوق في العالم، يُحبونك
    فاعلمي أن حمزاتوف أحدهم..
    وإذا كان الذين يحبونك عشرة.. فقط
    فتأكدي يقيناً، بأن رسول حمزاتوف، هو أحدهم أيضاً
    أما إذا كان لا يحبك في هذه الدنيا، سوى مخلوق واحد
    فاعلمي بأنه حتماً، سيكون رسول حمزاتوف
    أما إذا كنتِ حزينة ووحيدة
    لأن لا أحد يحبك في هذا العالم؛
    فاعلمي أن رسول حمزاتوف قد مات

    ألا رحم الله الشاعر المسلم إبن فاطمة الذي بدأ حياته شيوعيا، مؤمنا بالأممية
    متنكرا لوطنه وقومه، معتبرا تراثهم وما يعتزون به من دين وتاريخ عبئا يجب أن يتخلصوا منه، او يقبلوا بكل أريحية أن يضعوه في متاحف السوفييت، وسخر الشاعر من جهاد قومه المسلمين عبر العصور في مواجهة الدب الروسي
    القيصري والسوفييتي، معتبرا أن ذلك الجهاد كان مقاومة يائسة من التخلف للحضارة، ومن الرجعية للتقدم، وأنتهى المطاف بالشاعر العظيم وقبل أنهيار الأتحاد السوفيتي بسنوات طويلة الى أن يعود الى جذوره وأصوله ليعانقها
    ويعتذر لها ويسقيها من رحيق شعره ودفق وجدانه ويخلدها في واحد من أروع الكتب “بلدي”لقد غاص الشاعر في الأرض، والأنسان، والتاريخ، والعادات
    والتقاليد، ورسم لوحة يراها القلب وتقرأها الروح، وصار القرآن والصلاة والصوم والحج معالم هوية قومية، والشجاعة والحب والشهامة وكل الفضائل والأخلاق كائنات وطنية، والجهاد العظيم الذي قاده الحاج شامل وتلاميذه من بعده أنشودة وأغنية، وكل ذلك في نسق أنساني يعتز ولايتكبر، ويفتخر ولا يتعصب
    وينتمي ولا يركد او ينحسر، وكيف لايكون كذلك ودين الإسلام الذي آمن به قومه هو سدى الشعور القومي ولحمته نسأل الله الرحمة للشاعر العظيم.

  52. البشاوى كتب:

    العزيز مخير
    لك التحية على عصر فراش الدبلة ونسأل الله أن لايريكم مكروها فى عزيز وأبقو عشرة على الزول البيلبًس الدبلة

  53. max كتب:

    الدبلة شيء أساسي في الخطبة والزواج لأن معظم الشباب والفتياتيشعرون بالارتياح الشديد عند ارتداءهم اياها

  54. شوشو وبس كتب:

    بجد الدبله دى اهم شىء واى وهو لبسها يشعر باءرتياح شديد وبتبقا احلى فترة هى فترة الخطوبه واْى حد بيبقا فرحان بالدبله

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s