لو مافاطر ماتخاطر؟؟؟؟

Posted: الثلاثاء,23 يونيو, 2009 by nono in اخرى

التمباك او الصاعود او ود عماري سمه ما شئت فهو نوع من التبغ ( الممطر) بمادة العطرون..يستخدم بكثرة في جميع ارجاء  السودان بين الرجال ويقل بين النساء في وسط السودان الا ان نساء قبايل الهدندوة في الشرق  وبعض قبايل النوبة يتعاطنه …فهو مادة مكيفة توضع خلف الشفة السفلي (غالبا) كما يوضع خلف الشفة العليا او تحت اللسان لفترة زمنية تمتص خلالها الشعيرات الدموية المادة المكيفة ويتركز (كنوكتين السجاير) في الدم وكلما قلت الكمية في الدم يشعر الشخص المتعاطي (بالخرم) للتمباك … ؟؟؟؟

 يا شباب ويا شيوخ التمباااااك مادة مسرطنة ( سرطان الشفة والفك والاسنان

الخ…) حسب النشرات الطبية والتحاليل لمكوناته… فلماذا نلقي بانفسنا الي التهلكة…؟ بجانب ذلك التمبااااك غير اجتماعي  وتكرهه حوااااء السودان عموما ولا تحبذ حواااء الرجل المتعاطي (الذي يسف) … وغنت حواء زمان (حبيت ابقجيجة أريت ابوسفه طاير…)وكم من خطيب رفض لانه (تمبكجي)…؟؟؟

بكل أسف تنتشر مواقع بيع هذه المادة المسرطنة في الاحياء وامام المدارس والجامعات ودواوين الدولة …بل يباع من قبل ستات الكسرة جنبا الي جنب الكسرة….

هلا توقفتم يا شباب عن هذا الداء …انقذوا حياتكم اليوم يا ابي ويا اخي  قبل الغد ولا عذر لمن انذر….اللهم هل بلغت فأشهد……

(ولاتُلْقُواْ بِأَيْدِيكُمْ إِلَى التَّهْلُكَةِ وَأَحْسِنُوَاْ إِنَّ اللّهَ يُحِبُّ الْمُحْسِنِينَ) صدق الله العظيم سورة البقرة…..

Advertisements
تعليقات
  1. يا سلام يا نونو على هذا البوست…

    فعلن السعوط دا حكاية و لا يتحرج متعاطيه من قذف بقاياه في أي مكان و يتخيرون الأركان زي ما الناس ما قاعدة تتعامل مع الحوش الوراني حيث يقذفون فيه أي شئ الى أن يتعذر المشي فيهو… و نلاحظ كلنا يا ويلك أن وضعت زهريات في السلم المؤدي الى طوابق بها مكاتب اذ لا يحلو لمتعاطي التمباك الا و القذف بالسفه داخل الزهرية و هو طالع لفوق و مرات كمان وراء الزهرية يعني الود حريف ما حيشوفوها..

    قال ليها: لو سمحتي خليني أقعد جنب الشباك عشان بسف
    قالت ليهو: و دي (مشيرة الى السفة)..

    حليلهم حبوباتنا يا ربي في لسة نسوان بسفو

  2. ابكرون كتب:

    نونو يا سلام عليك :سكتت دهرا ونطقت زهرا…..عارفه انا مره ماشي مطمئن تحت احدي الحافلات ومستعجل وديك يا القشرة….فاذا بهذه المادة الكاكاوية القذرة (طج) تتلطع في كم القميص الايمن…..ولم تنفعني اعتذارات المتسبب….وكان مشوار وطرشق …..وراجع تاني

  3. سماسم كتب:

    نونو صباح الخير
    قلتي لي
    بل يباع من قبل ستات الكسرة جنبا الي جنب الكسرة….
    تاني الشافنا شدينا الدوكة فوق اللداية ما كضب أكيد مع الهواء حا تتلوث الكسرة بالصعوط ودي بتكون سفة سلبية زي ما في التدخين السلبي ……… ربنا يشفي كل المصعطين

  4. nono كتب:

    التحية د/عزت

    ابكروووووووووووووون/ لك التحية شكرا لكم علي المرور انشالله الكل يدلي بدلوا

    في هذه الظاهرة المريبة؟؟؟؟؟؟؟؟

    حقيقة يوجد تحزير من وزارة الصحة (لو مااااااااااااافاطر ماااتخاطر)

    في واقع الامر هذا التحزير من اصحاب اكشاااااااااااك التباك نفسهم!!

  5. kreeni كتب:

    صباحكم زين ,
    موضوع مهم جداً , ولكن هل من السهل تغيير عادات الناس ؟ خاصة عندما تتحول هذة العادة الى نوع من الإدمان !!
    لا بد من اظهار الرغبة في التغيير من قبل “المدمن” ثم تأتي بعد ذلك جهود الاصدقاء و “عواطف” وقبل ذلك كله الجهات المسؤولة عن صحة المواطن.

    (بالمناسبة انا مدوناتي كرت كرتونة)

  6. nono كتب:

    سماسم كيفك

    بس كانون السرور !!

    يكفيك؟

    طالمه الشغلة جابت ليها ابو السا؟؟؟

  7. سماسم كتب:

    kreeni

    مرحب بيك مدون جديد متابع قديم (بدليل عارف عواطف) وان شاء الله تكون من المداومين على ابداء الراي وتكون اضافة جديدة للموقع

  8. nono كتب:

    kreeni بنرحب بيك في سوداننا………….

    الادمان ممكن يتعاالج بس حبة عزيمة من الشخص نفسة ؟؟

    يعني حبة صداااع حاااااااااايفك الا لو الموضوع اكبر من كده؟؟؟

  9. nono كتب:

    ابكروووووووووووون؟؟؟

    الخيل؟

    تجغلب؟؟

    الشكر؟؟؟

    لية؟؟؟؟

    حمااااااااااااد؟؟؟

  10. bakriMusa كتب:

    نونو : (الديك ) سفه ؟؟؟

    موضوع شيق يحتاج الواحد يدردم ليه (سفه ) كاربه
    من نوع ( لو مااااااااااااافاطر ماااتخاطر) ههههههه

    قال احدهم في مدح (الصعوط ) :ـ

    لو لا شذاك تشتت أفكارى …….. فغدوت ذو عقل بلا تذكار
    ما إن وضعتك فى فمى متفتتا ……. حتى خرجت كهيئة الدينار
    لك نكهة من غير نار حلوة …….. لا كالسيجارة نثيرها بالنار
    عمرت بك الأذهان حين عمرتها … صدق الذى سماك إبن عمارى

    وممكن نشرح لناس (الشهادة العربيه ) هذه الابيات :ـ

    فعندما يسف الشخص (السفاف) الصعوط يشم أولا الكيس (أو الحقة) -وغالبا ما تكون من نوع علبة النيفيا القديمه- فيتلذذ بالشذى فى المرحلة الأولى للكيف قبل السف ، وهنا يكون الشخص فى حالة من الخرم (بفتح الخاء والراء وتسكين الميم) عجيبة لدرجة ذهاب عقله .وبعد ذلك يصف الشاعر طريقة رمى السفة داخل الفم (ودى بعملوها الحريفين بس) يعنى الجماعة البدردموا السفة ديل ما حريفين وكذلك البلفوها ويدلعوها فى منديل كلينكس . وطبعا يخرج الصعوط (مرحلة تف السفة) مصفر اللون بعد ذهاب المفعول (أى إبتلاع النكهات المختلفة فيه من عطرون وغيره وغيره …. وذهابها الى داخل المعدة مباشرة) فيخرج فى شكل مدردم ووصفه هنا بالذهب (الدينار) . كما مدح النكهة والتى هى جاهزة وليست تشعل بالنار كالسيجارة . كما وأن الصعوط يعمّر الأذهان حيث تذهب الخرمة ويأتى الكيف العجيب الذى قد يساعد السفاف فى زيادة الإنتاجية فى العمل ..!!!!!!!!!!!!!

    وبمناسبة (السفه ) :

    قالوا فى واحد بقرأ فى جامعة الجزيرة ومسافر بالبص من الخرطوم لمدنى والزول دة بسف وماكان عنده صعوط فالتفت للزول القاعد جنبو وقال ليه : لو سمحت ياعم بتسف ؟؟
    عمك طلع حقتو واداه سفة منها … بعد شوية تانى قال ليه عليك الله ادينى سفة ..!!
    تاااانى طلع الحقة واداه منها … المهم كرر ليه شحدة الصعوط دى قريب الخمسة او ستة مرات وهم لسة ماوصلوا ( الحصاحيصا ) فالتفت عليه صاحبنا العندو الحقة وقال ليه :
    انت ياولدى ماشى مدنى عندك شنو ؟؟
    قال ليه انا بقرأ فى جامعة الجزيرة ياعمى ..!!
    فقال ليه : والله ياولدى انا شايف حقو قرايتك دى تكملها فى ( جامعة الفاشر)

    * في واحد بلدياتنا راكب هايس من النوع المقفل دااك ..قداموا واحد ادروب .. يتلفت يمين شمال . مذنووق .داير يتف ا لسفه .. عمنا متابعوا ليك ..في النهاية قال ليهو .. هت ..هوتو .. فييين ؟؟؟

    وراجعيين باذن ا لله

  11. kreeni كتب:

    سماسم / nono

    مشكورين على الترحيب وانشاء الله نكون اضافة طيبة ونجد القبول.

    سماسم كلامك صاح انا متابع قديم بس صراحةً ما قديم شديد. وجدت الموقع بالصدفة ومن أول يوم ما قدرت افارقو.

    نونو
    بالجد الموضوع بحتاج لعزيمة وما اكتر من كدا. انا متأكد انو مجرد عادة سيئة بالامكان التخلص منها.

  12. nono كتب:

    bakriMusa\

    نونو : (الديك ) سفه ؟؟؟

    يا بكري لو سفة قرووووووووووووووش ؟؟ مامشكله !!

    نسفة سوي؟

  13. ابكرون كتب:

    النونو : حمااااد ان شاء الله يلقي سفه…ما لطعه في كم القميص…العساكر بسموه (العربجه)….علاقة السفاسف بالسفة بالسفايف شنو…؟

  14. سهيل كتب:

    أيه الحلاوه دي يا نونو … ” يا ما في البرج مظاليم” .. غايتو نحمدالله نحن اولاد سغاااار و حلوين و بطننا بتطم من تفل الشاي خلي الصعوط .. و شكلي دا عليكم الله بتاع بلاوي زي دي؟ بس بلا لمه (واحد متحنكش)..

    مرحب بيك مدون جديد kreeni و ياريت يعجبك المحل و تتحفنا بمشاركاتك..

    ابكرون يا بتاع العربجه .. طول بالك.. و امشي في نص الشارع

  15. aflaiga كتب:

    النونو : حبابك وانتى تتكئين على ظلال الشجر الحرام (التمباك ) .
    التمباك عزيزتى نونو مصيبة كبيره جدا جدا وادمانه نتاج حركتين :
    * ميكانيكية : وهى اخراج الكيس او الحقه وفتحها ودرديم السفه ووضعها فى المكان المناسب .
    * كيمائية وهى دخول العطرون والنيكوتين للجسم .
    وللتخلص من التمباك لا بد من التخلص من ادمان الحركتين لان بعض الناس يخرم للحركتين معا والبعض الاخر يخرم لحركة واحده فقط …
    وجاييك تانى الموضوع هام وبيخصنا جدا …

  16. حاج أحمد السلاوى كتب:

    نونو ..سماسم ..أبو عصمت… أبكرون..بكرى ..
    أول حاجة أضيف إلى ترحيبكم الحار بالأخ الضيف كرينى (..صاح كدا بالعربى…ولاّ أنا غلطان .. ؟ )ترحيباً إضافياً ..وأتمنى له إقامة طيبة مع هذه الكوكبة من النجوم السامقة فى عالم المدونات ..وعندنا دائماً سؤال سغيرووووونى كدا بنتوجه بيهو دائماً للإخوة الجُدد ونسالهم عن موقعهم الجغرافى ..عشان نعرف نتواصل معاهم …مش كدا .. يا ابو عصمت ؟يعنى إنت من الصامدين داخل دولة أمازونيا العظمى ؟ ام من الطيور الما بتعرف ليها خرطة ولا فى أيده جواز سفر ؟..حدد موقفك ..أمام الأمم المتحدة ..وأع\هلاً بيك ..يا كرينى..
    نرجع بعد دا لموضوع السفة والصعوط والتمباك ..,كووولها أسماء لمنتج واحد يتعاطاه الكثير من مواطنى العالم التالت ( يعنى مش نحنا برانا.. يا أخلة ) هنالك أخواننا فى اليمن السعيد وإخوان لنا فى باكستان وأفغانسات لديهم أيضاً سفة وصعوط وشمّة ..بس الوانها فاتحه شوية ..
    أهلنا الكبار تعودوا عليهو لأنو كان بيستعمل كعلاج للآم الأضراس ( ربنا يشفيكم منها ) وصارت عادة بعد ذلك لم يستطيعوا التخلى عنها ..ومن خلا ّعادته قلت سعادته .. أو كما قال .
    لاكين السبب شنو البيخلى أبناء الجيل الجديد يستعملوا السفة والحاجات دى.. أنا ما قادر أعرفه ..وأذكر إنى جربت هذا الداء وانا صغير ( فى الجاهلية الأولى )وكان عمرى حوالى 9 أو 10 سنوات ( عمر الزهور .. يا ابكرون )وكانت تاتى ماشطة لتمشيط الوالدة عليها رحمة الله وكان لديها علبة صغيرة جدا( علبة دواء فارغة) لحفظ التمباك ..وكنت أشاهدها دائما وهى تشيل قطعة صغيرة جداً وتضعها داخل فمها .زوتستمر فى عملها كالمعتاد..وقررت بينى وبين نفسى أن أفعل كما تفعل ..وفى لحظة غفلة منها فتحت العلبة الصغيرة واخذت قطعة فى حجم راس الدبوس ووضعتها فى فمى ..وفى لحظات لم ار شيئاً أمامى والأرض تدور بى ..ولحسن حظى كنت قريباً من أحد السرائر فالقيت نفسى عليه وكانت نومة ..ولا أصحاب الكهف ..إمتدت من الساعة العاشرة صباحاً وحتى الرابعة بعد العصر..(من حسن حظى ايضاً أنى لم استفرغ )والكل يسأل ..الولد دا الليلة مالو ؟ حاسس بيحاجة ؟والعبد لله صامت صمت القبور..ولم أدل باية أقوال إضافية …وأنقضى ذلك اليوم بخيره وشره لاكين كانت توبة ( نصوحا ) وإلى يومنا هذا والحمد لله لم أتعاطاه مرة أخرى ..وكانت تجربة لابد منها وعدت بنجاح ..وكما ذكر كل الإخوة قبلى فإنه عادة كريهة ينبغى العمل على القضاء عليها بكل السبل والوسائل المتاحة وغير المتاحة وسن القوانين الرادعة لذلك ..طبعن الأمر ليس بهذه السهولة ..ولكن لابد من البداية ..
    – بكرى ود موسى ..ليه ما كملت النكتة بتاعة الديك سفه ؟..رد عليهو صاحبو وقال ليهو .. انا غايتو ما شفتو !!
    وغايتو جنس غايتو ..يا ناس التمباك …ربنا يشفيكم.
    وكل سفه وأنتم بخير .

  17. الزهراء كتب:

    السمار الاعزاء
    السلام عليكم
    الرائعه نونو لك عاطر التحايا
    موضوع في غاية الاهميه وخطير جدا وحقيقه التمباك يتسبب في كثير من الامراض السرطانيه ليست في الفم واللثه فقط انما تصل لدرجة سرطانات الرئه والمعده وغيرها حمانا الله واياكم
    وادمان التمباك اصعب من ادمان السجاير _والتمباك ماده قذره فلو اتجهنا الى جانب النظافه فان التمباك يبعد صاحبه من نطاق النظافه مما يسببه من تلون للاسنان وروائح كريهه للفم وانا بستغرب لما القى لي ولد نظييف وقاااشر واخر الستا وبي جاي تلقاهو شانق سفته
    ولو حصل زول فيكم مر بكوبر اخر محطه فلاحظوا الطوابير الطويله في انتظار الدور للتمباك
    واذكر الشباب في الجامعه كان بيخجلوا يجيبوا سيرته قدامنا نحن؛(الجكس وكده) فتلقى الواحد بيسال صاحبه( بالله لو عندك رصيد اديني موبايلك اعمل مكالمه) وفي فتره وجيزه اكتشفنا انه الموبايل هو كيس التمباك سبحان الله

    وزمان قالوا تركب التاكسي السواق يقعد يونس فيك ما يديك فرقه ترد عليهو قالوا ليك لو كنت حريف تنتهز فرصة رمي السفه وتستلم الموضوع
    (kreeni ) الدار ترحب بيك وشكلك تابعتنا من ايام الكتاحه بتاعه عواطف وسعيد والتدبيل _ نورتنا
    وجاياااكم

  18. kreeni كتب:

    الأخ سهيل والخال حاج احمد السلاوي
    مشكورين جداً على الترحيب وحقيقة بدأت اشعر ببعض الحرج كوني دخلت “توش” على موضوع الاخت النونو , لكن وعلى كل حال انا من مواطني امازونيا وفي العاصمة كمان (اها كدا كيف).

    اعتذاري مرة اخرى للمبدعة نونو .

    و اخيرا ارجو توجيهي للطريق الصحيح حيث انني الآن استطيع كتابة الردود فقط واريد (بكل حماس) ان اضيف مواضيعي الخاصة.
    وكوووولكم مشكورين على الترحيب مقدماً.

    * يا حاج حكاية سغيروووووووني دي شنو؟ شايفها حايمة كتير*

  19. kreeni كتب:

    مشكورة يالزهراء وتقبلي تحياتي
    انا لقيت الناس بقولو (عواطف) و (سعيد) فخضت مع الخائضين.

    بالرجوع للموضوع بتاع ” التمباك” انا لاحظت كتير من المدمنين أول ما الواحد يتزوج أو يدخل في علاقة طوااااالي الحكاية عندو تقل شوية شوية رغم انو (المتنبكاتي) بخجل يعترف بتأئير العلاقة الوجدانية الكانت سبب في التحول الحصل ليهو.
    عموماً انا عندي قناعة ان لحواء علاقة بكل ما هو جميل و (نظيف) والله اعلم.

  20. aflaiga كتب:

    شباب : شايف الحملات ضد العربجية قوية جدا ..
    اول شيئ راسا مابى الكيف اريتو بالسيف ..
    تانى شيئ التمباك ده ااى كعب لكن زابط راس ناس كتار ومخليهم ميه ميه ..
    انا شخصيا تمباكى منذ المتوسطه ابا عن جد عن حبوبه عن ام وسمسمه بس الما بتسف فى البيت حسب علمى !!!
    المهم قبل ما الناس تسن سكاكينا على التمباكجية مش اخير السف من حاجات تانى بيسووها الما بيسفو ؟؟؟ على الاقل البيسف ده زول واضح وصريح وموضح نوع المسفوف !!!
    كدى روقو المنقه وخلونا نمسكا من لماذا يسف من يسف وهل هو ضحية ام جانى ؟؟؟ وبعدين عاوزين الراى الطبى والفقهى المتخصص وبعد داك نقعد واطه نتكلم لكن تنظير ساى بتاع زول لا سف لا عارف السبب غير مقبول ..

  21. عزت بقا ريتش كتب:

    مش كدا بالله يا أفليقا الواحد اذا ما جرب ما يقدر يفتي…. ما سمعت بالزول الطاعم اللمو فيهو رجال العائلة في الصالون عشان ينصحوه فألقمهم حجرا…

    “جني و جن الزول البكجن حاجة ما جربا” !!!

  22. NONO كتب:

    بكروون /العلاقة طرديه؟؟

    سهيل /حااااااااااااج احمد السلاوي/ افليقا/

    كلكم بجيكم بي روووووووووووواقه!!!!!

    الزهراء انتي الفي جهاااااااااااااااز ود الخلاء؟؟؟؟

    وله الزهرااااااااااااااااااااااء البنعرفة انحنا؟؟؟؟؟

    عشااااااااااااان ماتعملوا لينا ؟؟

    تشويشششششش؟؟؟

  23. الزهراء كتب:

    د- عزت
    اكثر ما يؤلمني وضع السفه في اصيص الزهور

  24. د.ياسين شمباتى كتب:

    نونو…حمدالله على السلامة..
    والله موضوع فى التنك..وللاسف الصعوط الآن انتشر اكثر من اول,خصوصا فى وسط شريحة الطلاب والجامعيين الكانوا زمان بيترفعوا عنه بحسبه منبوذ اجتماعيا وما حضارى..والمشكلة انو خرمتو اكعب من السجاير وكل انواع المنبهات والمكيفات الاخرى_عدا المخدرات_وصاحبو ما بيقدر يفارق دربو بسهولة..

    الحبيب ابكرون..سلامات..بركة البقت على القميص,,والله مرة فى منتصف التسعينات وانا ماشى على الخرطوم الصباح,فى محطة السجانة جا واحد ماشى جنب البص_التاتا_وقدامى واحد قال كدى بصق السفة بكل سوائلها المصاحبة فوق رأسو !!! اها ما اخير البقت فى القميص؟؟

  25. الزهراء كتب:

    نونو
    ما تجقلبي نحن عالجنا القصه كلها وبقينا مفتحين كان ما قريت بياناتي ما بكتب ولا حرف
    د- شمباتي: نحن في انتظار المعلومات الطبيه منك هديه للود افليقا
    وصحي يا جماعه سمح القول في حقة سيدو قصدي في خشم سيدو

    وبعدين دايرين زول يورينا العلاقه بين نوع الحقه وشخصيه الزول البسف
    وا ادونا ملخص لاحساس الشخص وهو يمر بجميع مراحل السفه من درديمها وشمها لحدي ما تسافر الي خبايا الفم من شلاضيم وجضوم وغيرا
    لحدي ما يظهر الدكتور ياسين الله يطراهو بالخير

  26. د.ياسين شمباتى كتب:

    د.عزت..دحين انت زولك الزنقوهو فى الصالون دا ما هناى!!؟؟؟ الما بجيب اسمو..

    افليقا..بعد كدة اتوقع حملة لاثناءك عن التمباك,,وباقى الحاجات جاينها واحدة واحدة!!! خد…

    قالوا فى ضيف جا لى قريبو فى الخرطوم,وبيت قريبو دا مجيه جيهة شديدة,والله يكرمكم كان سافى,فلما جا يسف ما لقى محل يبصق فيهو سفتو..فمشى طوالى على الحمام وبصقها هناك!! قريبو قال ليهو :يعنى الحمام زى خشمك!!؟؟فمن يومو داك حلف ما يختها تانى..فله ولقريبه التحية..

  27. حاج أحمد السلاوى كتب:

    دكتور عزت ..سلام
    أول حاجة أنا عاوز اعرف معنى الزول الطاعم دا شنو …فى زول ضاقوا ولقاهو طاعم …؟
    وبعد داك نتفاهم ..

  28. د.ياسين شمباتى كتب:

    الاخت الزهراء..سلام..والله افليقا العارفو طبيا عن الصعوط اكتر مننا,بس معاند ومكبر راسو ساكت..

    فى كلمات موجزة الصعوط سبب اساسى لسرطان اللثة وكمان الفك واللسان,ويهيج قرحة المعدة والاثنى عشر ويهيج القوقن العصبى,كما يقلل من المقدرة الجنسية,ويتلف الاعصاب ويسبب رجفة فى الايادى تكون ظاهرة للعيان,كما يضعف الشهية..ومن الناحية الجمالية يشوه منظر الاسنان ويصبغها باللون الاصفر الغامق ويغير منظر الشفة ويجعل رائحة الفم كريهة..

    ومن عجب ان (الوطنية) صارت مكانا للعمارى الجيد نمرة واحد!!!

  29. مُخير كتب:

    العزيزة نونو

    الأعزاء أهل الدار والزوار

    السلام عليكم ونهاركم فُل

    لكن روعة يا بت يا نونو طلعتي سلطانة كيف وجرجرتي الجماهير من جدل السياسة ووجع الرااااس وإننقلت بهم إلى عالم الكيف.

    الأخ kreeni مرحباً بك في عالمنا.

    شايف في إطلالة أولية بدأت المواقف تتشكل كما العادة بين أكثرية ذامة قادحة، وأقلية نوبية مستبسلة في الزود عن حياض الكيف، ومجموعة متذبذة ومتمجمجة لا مع هؤلاء ولا أولئك.

    لا تعجبني عقلية القطيع جوكم جوكم ومعاكم معاكم، ما أن يبدأ الذم تجد تيار الشليت يقوى، صحيح أن التمباك أو السعوط غير سياحي، لكن الذم يوجه للذين يسيئون إستخدامه ويبصقونه بطريقة مُقززة وفي أماكن غير مناسبة لكن يجب إحترام من يتعاطونه بحرفية عالية تجبر على إعادة النظر في الإحتجاج.

    شخصياً موقعي من الأعراب غريب عملياً مع الضد غير أنني نظرياً مع المع حيث أنني كنت هناك، برغم أنني لا أدلع رأسي ومن صغري لا أستسيغ الشاي أو القهوة ناهيك عن بقية مواد الكيف، ومع ذلك دخنت لفترة لدرجة مزعجة ومن ثم أقلعت مع سبق الإصرار وبأقل خسائر ممكنة ولم أرجع، ومع مغادرتي المربع إلا أنني قادر أتفهم الدواعي وأحترم رغبات الأخوة السفافين وأدعو لهم بالتفكير في الأقلاع، فكما كانت تردد الراحلة ((صديق الصباح أفضل عادة أن لا تتعود على عادة وبصبح عليكم …ليلى المغربي )) الله يرحمها رحمة واسعة.

    هناك حاجة مُلحة لقبول الآخر بسجمه وتمباكو، مجموعة كبيرة من أهلنا السودانيين لا يرغبوا ناهيك عن أن يقووا على تركه، وبعد ذهابهم إلى دول الخليج أخذوه معهم بل ورطوا مجموعة كبيرة من الخليجيين في الجك، برغم منعه قانونياً إلا أن في المملكة على سبيل المثال تغض السلطات النظر عن السودانيين، وتسمح لهم بالبيع والشراء على إستحياء، في حين لا تتساهل مع قات اليمنيين والصوماليين، ونسوار البتان، وبان الهنود والبنغاليين، وهذا يعزي للأناقة في التعاطي، وإلا فإن تلك الممنوعات متأصلة في ثقافة المجموعات المذكورة.

  30. aflaiga كتب:

    عزت : ينصر كيفك .. ده كلام موزون والله يا معلم .
    نونو : جربى تختى ليى سفه من حقات حبوباتنا تغيرى عنوان البوست ده ده طوالى الى ( اقل المخاطر فى تكييف الخاطر ) .!!!
    حبوبه س تمباكجية مفتحه جدا تعرف كيف تخت السفه ومتى تختها وكيف ترميها ونحنا كماسمعنا من الناس انها بتسف ما كنا بنصدق ومفتحه لدرجة انها بتعرف الشال من حقتا الفى التلاجه منو وشال قدر كيف مع اننا كنا بننضف الحقه ونخليها زى الاول لكنها كانت تكتشف السرقه وتعرف الزول السف من طريقة فتح الحقه !!! حبوبه دى حقو تمشى خبيره فى الاف بى ااى !!!
    قبل فتره طويله قابلت طبيب نفسى بغرض ترك التمباك وارشدنى الى ان اقوم بالتخلص اولا من الحركه الميكانيكية عبر سف الشاى الحب المبلول وبقيت شهر كامل بسف شاى وتمباك سوا فى النهاية لمحتو ليك يوم قبل ما اخش عليهو بيصلح فى سفه ولميت فيهو شكل قام قال لى : يعنى انا عشان اعالجك لازم اكون ما بسف ؟؟؟ شوف انا جربت اى نوع شاى وما نفع !!!
    وجاييكم .

  31. حاج أحمد السلاوى كتب:

    ولدنا ..كرينى ..
    باقى لى كدا إنك متابع من زمااااان معانا فى سوداننا الحبيبة ..وعارف ناس عواطف وناس سعيد ..
    السؤال السغيرووووونى دا أصلو سؤال سغيرونى إستفهامى إعلامى ..كفاك ولاّ ازيدك ..عشان كدا حايمة كتير …يعنى ممكن تقول جمع شمارات .

  32. د.ياسين شمباتى كتب:

    د.عزت..الحاج دا انا فهمتو بالتلفون خلاص!!!

  33. د.ياسين شمباتى كتب:

    الاخ كرينى..الف مرحب وما تقطع رجلك مننا..

    العزيز مخير..سلام..كلامك منطقى,,بس فى فتوى شرعية طلعت فى تحريم التمباك..وكدة تكون جهيزة قطعت الدرب على الجماعة ديل..

    وعندى سؤال محيرنى,,زمان كان بكتبوا(العمارى الجيد نمرة واحد),وفجأة اترقى لى (العمارى الممتاز) !! ياربى دا يكون من شنو؟؟؟

  34. ابكرون كتب:

    .ياسين شمباتى قال :
    د.عزت..الحاج دا انا فهمتو بالتلفون خلاص!!!
    ———————————————————-
    يا حاااااج يا برئ يا نااااااييييف… والله لكن تقول متربي في الازهر الشريف ما جنب جامع حاجه النية…..اصلو يا سلولو ضايفين ليه معلقتين سكر…..عشااان كان مسيييييييخ

  35. nono كتب:

    د/شماتي شكرا علي الرشتة …………

    /الزهراء/ نفتووووا منها ؟؟؟

    يا المخير ماااااااااامسير/

    هناك حاجة مُلحة لقبول الآخر بسجمه وتمباكو؟؟؟

    ده نظرية للضرورة احكام؟؟؟ ده بتكون اخر ورقه؟؟؟

    د/شماتي ماتنسي(الكنترول للعمار الممتاز)

    بالطريقة ده حاااااااتشكووو فيني ؟؟؟

    الحقيقه المؤسفة انشاره بين طلبه( الاساس) ( الثانويات) هم في اعمار صغير ا

    اكيد الواحد في الحصة مااااحايستوعب حاجة ده سببوا الشلليات يعني كم قروب

    يشكل (فورترون) الاسرة ماتعرف تراقب البت وله الولد ؟

    الشغلة جاااااااااااااايطه!!!

  36. nono كتب:

    ابكرووون

    النونو : حمااااد ان شاء الله يلقي سفه…ما لطعه في كم القميص؟؟

    انته تبري من اللطع ***** اللطع ماالينا احناااااا

  37. د.ياسين شمباتى كتب:

    ابكرون..طبعا زولك عامل فيها برئ,,وقال اكيد ابكرون ونيام وعزت وسنكل بكونوا ناقشينها !!

    نونو..للاسف الشك اصبح محل يقين….

  38. nono كتب:

    يادكترة/

    رانجوا ***جربتوا***رانجوا**ضقتووووووا؟؟؟

  39. الزهراء كتب:

    نونو بطلي تطلعي بره الشبكه يقوموا ناس كده قاصدنك يشمتوا فيك ساكت
    كدي قولي بسم الله وختي ليك سفه سغيرووونه كده وخليك في الخط

    قلتي شنوووو

    سؤال سغيروووني كده
    هسي يا اخوانا لو واحد لقى عواطف حقتوا بتسف شعوره حيكون شنووو؟

    بالمناسبه يا اخوانا في ناس كده شفتيين يعني الواحد يكون بيسف ليه زمن ولم يتم اكتشافه والسفه زاتا بتكون مختوته بي حرفنه وما ظاهره وخصوصا اذا كان الشنب كبير والسفه في السطوح لكن الناس البيختوها في بير السلم ديل ظاهرييين

    ولا شنو؟

  40. والله يا الزهراء عندك محن
    وصفك لختة السفة دى براهو داير ليهو بوست منفصل وحقو يكون باسم الوافى فى اداب وفنون خت السفة .

  41. د.ياسين شمباتى كتب:

    استرايكر..سلام..وانت الصادق مفروض يكون اسمو(التحفة فى كيفية وضع السفة),,او (الدر المنضود فى كيفية وضع الصعوط),,او(السفر المرموق فى كيفية استعمال النشوق)..

    راجع ايميلك يا حبيب وادينى رد..

  42. الزهراء كتب:

    لكن والله الجماعه ديل يشهوك لميع الحلل يعني تلقى الحله بتاعة التمباك دي لاااامعه ومجليه تمااام يعني لو جينا انا وسماسم ونونو ما نعرف نجلي حلة الالمنيوم دي كده والغريب انه طوروا شغلهم يعني بقت الاكياس مطبوعه باسم المحل وعليها شعار تجاري ناقص بعد كده يعلقوا شهادة الايزو 9001

  43. aflaiga كتب:

    شباب : والله صعبتوها شديد خلاااس .انشا الله ربنا يهدينا جميعا نبطل العادات الضاره كلها لانهن كتاااااااار لو مسكناهن
    ونقم الاله على العباد كثيره
    واقلهن تناول التمباك !!!!

  44. nono كتب:

    الزهراء/

    وخصوصا اذا كان الشنب كبير؟؟

    يالزهراء ياختي بس الشنب دة قلبتي فبها هوباااااا؟؟

    هسع الزمن دة في موصفات زي الشنب دة !!!!

    ماظنيتوووووا الا في عم شنبوووووووووو في مسلسل بن

    بن؟؟؟؟

    استريكر الصينية قمتة بيهااا براك وله وديته وين كانت عملة اضافة للموضوع؟؟

    عمنا ود الخلاااا شكرا علي المرور الواحد لمن يشوفكم انتوا البرفات زي الحاااااج السلاوي –وابكرو -د/عزت /باقي العقد الفريد في عصروا قلبوا بيدخل فيه

    الرحمن لاننا اشبالكم؟؟

  45. kreeni كتب:

    الزهراء
    والله حكاية الايزو دي خلتني اقهقه وسط الناس في المكتب زي المجنون.

    الغريبة قبل كدا لاقاني محل (تمباك) اسمو التحالف,
    اها قبل ما اسأل قام واحد اتبرع وحكى لى انو ديل “شركتين” اقصد محلين بتاعين تمباك اندمجو مع بعض !! اسمهم شنو و شنو كدا ماعارف.
    و الموضوع دا كان قبل الازمة المالية العالمية !!

  46. aflaiga كتب:

    العواطفات والتمباك :
    شخصيا خين كنا وسمسمه فى هدهدة الجكيس الاولى كنت اتحرج قليلا امامها من التمباك برغم وضوحى الشديد معها من الاول حيث وريتا كل الحاجات البسفها وورتنى كل الحاجات البتسفها عشان نكون واضحين من الاول ومافى زول يسف ليهو شي بره الاتفقنا عليهو !! المهم لمن اتوكرنا فى التوكيره الكبيره وعرسنا بدت النقنقه فى حاجاتى البسفها وسفاتى البوديها بقت تمثل مصدر ازعاج عند سمسمه مع تحملى الكامل كل سفسفتها التى اتفقنا عليها او التى جات مؤخرا !! المهم كلما ذات نهاية اسبوع بناخد محاضرة فى التمباك وبعد ان جو ناس حمودى والتمباك عامل رئيسى فى تكوينهم الجينى بدات الضغوطات عبر الوليدات من باب عشان خاطرنا بطل وبطل للبضرك واوعك تبقى قاسى تعال ارحم قليبى تعال اطفيهو نارى !! القلب البحبك ما بدور العمارى !! المهم حمودى الان فى حملة رهيبه ضد التمباك يعنى الواحد لو قام لقى التمباك مافى طوالى معناتا حمودى رسلو راس البيت وشينه الزول يقوم يلفلف ريسان البيوت انصاص الليالى يقومو يفتكروهو حرامى !! ولا يفهموهو صاح كمان تبقى مشكله !! المهم والله كلنا مقتنعون بانو التمباك مضر بالصحه وسبب رئيسى لامراض اللثه والفم والاسنان والقولون ذاتو لكن ربنا يهدى نبطل المهم افليقا شخصيا سفتو ما بيكتشفا الا زول حريف لانها سفة طلبه وشنقه فى شكل سفه .
    نرجع للعواطفات والتمباك تلقى العواطف ناقه فى سف سعيد للتمباك وموافقه على سف سعيد للدوله كلها !!!وتلقى العواطف قبل العرس بتتكلم عن التباك وضرره وبينا وبين نفسا مع البوره الحاصله فى البلد بتتمنى واحد انشاء الله بيسف ملوحه المهم عريس بعدين تنضفو برواقه !!!!
    وجاييكم ..

  47. nono كتب:

    افليقا/

    بتتمنى واحد انشاء الله بيسف ملوحه المهم عريس بعدين تنضفو برواقه !!!!

    هوووو لو بيقدر مايسفليه حاجة كويس خزنة مثلا ماااااامشلكه؟؟؟

  48. سهيل كتب:

    أسترايكر : محن شنو يا فرده …. سمعت بي ( شمس) … خليك مفتح يا ود اركويت ..إنت حاليآ في الديم..

    جدو سلاوي : معذور لو قلبي إشتهاك.. الذنب ما ذنبك .. لكن دوك عزت نسى درب الإيميل ..

    أبكرون : عمك سلولو عامل فيها رايح .. ولاحق نونو .. وقال شنو؟ .. بشار و ابكرون بيكونوا عارفين .. ياخي تخ

  49. سهيل – يعنى اخم واصر يا ولدنا ؟؟؟

    نونو – والله صينتك ابت تنزل – قدر ماعافرنا فيها ابت تمشى !! شكلو كنتا جعان وشلتها معاى .

  50. سهيل كتب:

    يا ود الخلا : اهاااااااااااااااااااا .. خلاص روق المنقه .. ما إنت عارف الموضوع كلو ونسه و كده .. ياخي إنت قيال عبدو دا إمام جامع ؟ خليها على الله

    استرايكر : صينية شنو يا فرده .. قلنا ليك اعمل حسابك من الفايرس .. بعد شويه بنشوفك بتكتب من فوق لي تحت …

    الزهراء : فيك الخير عايزه تضاري لي صاحبتك .. لكن هي خارج التغطيه .. ماتستعجلي .. هسي العوه بتقوم ..

  51. nono كتب:

    التغطية

    خارج

    هي

    لكين

    سهيل ؟

    ( عرب سات + نايل سات )

    ديل بنات عمي طوااالي ؟

    بس الواحد؟

    ماااااداير ؟

    يفك الشفرة؟

    خليهااااا؟

    بالنية؟

  52. nono كتب:

    خلي الناس ؟؟

    ديل ؟؟

    مرخمين؟؟

  53. kreeni كتب:

    يا نونو انا ما عارف حكاية علامات الاستفهام دي حكايتها معاك شنو ؟؟
    بعد مرات بتخلي الزول يلتبس عليهو الموضوع

  54. علي سنكل كتب:

    النونو: والله ما قصرتي فتحتي ليك سيره اجتماعيه غاية الأهميه وجايك لموضوع العماري ده بعد شويه.
    ولدنا الجديد kreeni : نرحب بقدومك ومشاركاتك خفيفة الظل وأمسك في سترايكر يوريك كيف تسوي الباسورد وتتدون مع المدورين. إسمك بدي إنطباع إنك جنك تطير شيكات!
    يس شمباتي ، أبكرون يعني ما عارفين سلولو ده شهاده عربيه.
    الزهراء: العواطفات دي كوووولها جنها سف ، هو السف إلا تمباك!

  55. nono كتب:

    kreeni/

    ماقصرته حضورك للنهاية؟

    ؟؟؟؟؟؟؟؟؟؟؟؟؟؟؟؟؟؟

    ديل ليك يا المنططط عينيك؟؟

    علي سنكل؟

    مااقصرتي فتحتي ليك سيره اجتماعيه غاية الأهميه!!

    بس الموضوع كان داير ليه شجاعة قوه قلب الحمدلله الجميع ماقصروااا الكل ضد

    التباك لكين الكلام( البيان بالعمل)!!

  56. kreeni كتب:

    المحترم علي سنكل
    ( إسمك بدي إنطباع إنك جنك تطير شيكات!)
    ههههههه
    والله اسم كريني دا ناوي اكتب فيهو بوست خفيييف كدا, بس تقول شنو برلوم ودايش.

  57. حاج أحمد السلاوى كتب:

    النجم سهبل .. الكاشفان ..ابكرون و سنكل ..وولدنا شمباتى ..
    باقى ليك يا أيها الكواشف حاجة عرفوها ناس شمباتى واخوه فى الرضاع سهيل نحنا الوقعنا من السما سبعة مرات ما نعرفه ..واسالوا شمباتى انا كلمته فى التليفون عصر اليوم ( بعد ما طلع من الحفرى بتاعته القاعد فيها …واحدة بواحدة ..يا شمباتى )…أنا طبعن كنت عاوز أخونا عزت يفضفض شوية فى الموضوع إياه…بس يا خسارة طلع من المكتب وما قرا التعليق اللى رسلتو ليهو ..كنا عاوزين نضحك شوية ..وبرضو.. ومع ذلك.. وحيث أنّ ..وكذلك ..ولا سيما..وفى الحقيقة ..وخصوصاً …قال إيه ؟ شهادة عربية !!

    – أخونا أفليقا .. سجمنا .. هى سمسمة كانت بتسف برضو … كانت بتسف شنو ؟كان كيسكم واحد بتتجادعوهو ؟

    – سهيل .. منو القال ليك الموضوع كله ونسة ؟ صحى الكلام دا .. يا نونو ؟ حيكون فى محضر فى نهاية البوست وفى قرارات صارمة حتصدر .. تحسبو لعب ؟

  58. بشار أحمد بشار (إبن برد) كتب:

    بالله يا جماعة كلكم وفي (ظمتكم) تنقدَ ما تنسدَ أخير سف التمباك ولا أخير سف مقدرات الأمة؟؟؟ وأوعكم من (التلاقيح) وهي جمع (تلقيحة) وتعني الرياح العاتية التي تثير (العفارة) ولا شنو يا سنكلوني؟؟؟

  59. الزهراء كتب:

    (سهيل /محن شنو يا فرده …. سمعت بي ( شمس) … خليك مفتح يا ود اركويت ..إنت حاليآ في الديم..)
    شنو يا ود حلتنا ما تخلي الطابق مستور وروق المنقه موضوع السفه دا علم اسمو (السافولوجي) وبدا بتجربه عملا العالم (المتنبك بن مسفان الصاعدي) سنة 345
    ق.م. وذلك عندما كان يجمع في الواقود في منطقه شبه صحراويه واستظل بشجره وكان عندو لوز وامو قالت ليه اتمسح بالعطرون وبينما هو بالي العطرون وقعت صفقة شجره في العطرون وكان في جفاف والصفقه نااشفه المهم صاحبنا قام حت الصفقه بي عطرونا جنب ضرسوا الكان ماسكو فيه اشقدي من اللوز
    فاحمرت عيناه ودار بالافق راسا على عقب وبصراحه قام انكيف لمن اللوز ووجع الضرس راحوا وراح يبحث عن ميكانيكية صنع التمباك والية وضع السفه حتى توصل اليها وقد نال براءة الاختراع من المواصفات والمقاييس ويقال انه تلقى دعوات لمؤتمرات خارج البلاد لكنه رفض خوفا من سرقة اختراعه وتطويره في بلدان اخرى

    كريني شوف لي المكونات الكيميائيه الاخرى للتمباك من النت واديني نسبتها المويه عايزه افتح محل

  60. الزهراء كتب:

    سنكلوني
    كريني ده اسمه اداني احساس فريني لاعب الكوره

  61. سهيل كتب:

    إنت يا عمنا بشار .. البنات ديل حاليآ في السودان بيدخنن سجاير و يجرجرن شيشه و في واحدات كريستاليات ( سنه) بالكسره وو احدات شمامات .. يعني خلااااااااااااااااااص بقت علي الصعود ؟ .. روقو المنقه .. بعد فتره حنسمع بنظرية التكايس .. من ( كيس) .. و زي ما قال افليقا .. كيسي و كيسك و إتلمو الأكياس.. يعني ما تستغرب لو جات بت الجيران خاشه و قالت ليك ..لو سمحت كيسك يافرده ..

  62. الزهراء كتب:

    حاج السلاوي
    انا حاكون مسؤوله من الانضباط في البوست( الفه يعني)نسبه لظروف نونو التقنيه والعمل جاري على تثبيت السيستم(شغالين بي تردد كي يو باند حاليا) لي نونو بس يا خوانا سهيل ده ما يعرف عشان البت دي حتجيها نفسيات

  63. الزهراء كتب:

    سهيل ماااظن الكلام ده حاصل الا اقليات وبالمناسبه البشربن الشيشه والسجاير اغلبيتهم من بنات الروسين الفوق
    ولو مشيت الفنادق الكبيره ناس برج شنو داك وقراند منو داك تلقى البلاوي
    لكن ما ظنيتهم يوصلوا مرحلة السفه وكرستال البلح ومشتقاته

  64. kreeni كتب:

    الزهراء
    عملت بحث سريييع كدا ودي النتائج:
    15% عطرون
    25% ترجفون
    17% تتشوهون
    10% تفلسون
    10% تمرضون
    بقت كم كدا؟؟
    اها 23% تموتون.

    بعدين عندك عدد واحد حلة متوسطة 50 جنيه + ايجار شهري للمحل 100 جنيه + اكياس البلاستك حسب البيع وكدا.

    وتحت تحت سمعت انو الموضوع دا مربح جداً

  65. الزهراء كتب:

    كريني/ ده كلام زي المشمش
    بعد الدراسات المستفيضه لقينا الزبون لو كان بيسجر بينسون بيته حيخرب لو نزل للبرنجي حيدخل في مصاريف الايجار لو استعمل قوول الحبه بي ميتين اقلاها داير الفين في اليوم وحتخستك بيه لكن لو جينا لحبيبنا التمباك فممكن كيس بي 250 جنيه بالقديم يقعدوا يوم ولا يومين حسب عدد السفات
    لذلك احسب متوسط عدد الزباين اضافه للتصدير للخارج حتكون اخر ترطيبه
    وفي النهايه نفس مخاطر السجاير وسرطانتات وكدا
    واهو نونو تلقى ليها ناس تاني توعظ فيهم

    نكون جادين شويه/انا سالت ناس كتيرين بيقولوا انهم خلوا السجاير عن طريق التمباك لكن في النهايه دخلوا بي حمد ومرقوا بي خوجلي يعني ما عملوا حاجه

    نونو لمعي الحله لي كريني

  66. بشار أحمد بشار (إبن برد) كتب:

    سهيل : الكريستاليات وكيسي وكيسك وما تمشي بعيد أنا بقصد الأكياس bags بجميع أنواعها كلها هينة لاكين (الهازوق) واحدة تقول ليك : النبي ما بلقا لي عندك (حرباشة)؟؟؟

  67. علي سنكل كتب:

    نونو يا نونو نحن ما دايرنو الصعوت الكعب ده لأنو :
    أولاً : حاجه غير حضاريه في مجتمع رسالي ذي بتاعنا ده. بنبني في دوله إسلاميه ذات مشروع حضاري ، تجينا سافي يا أفليقا؟ عيب والله عيب بالمره.
    وثانياً: البيئه دي . . مرضتو د. بقا ريتش ده مرض من بزيق الصعوت في الزهريات. خلي من خراب المنظر إنتو عارفين إنكم يا ناس السفه ، إنو ناس السفه الجد . . جد أقل ضرراً للبيئة منكم؟ بتقتلو الشجر والزهر ، وذلك ببصق صعوتكم الذي يحتوي علي العطرون عالي القلوية والذي يحول التربه إلى ( وادي غير ذي زرع ) أرض غير صالحة لأي زرع لارتفاع ملوحتها.
    وتالتاً: من الناحيه الاقتصاديه ، ما قلتو ما لاقين حق اللحم ، حق الخدار ، حق الرغيف ، حق الغاز و الجمره و الفحم ، وين بتلقو حق الصعوت يا مساخيت؟
    أيام الشباب كنت قايل روحي داسي التدخين من أبوي (رحمه الله ) ، وكان عندنا بناء إضافي في البيت. ناداني الصباح الوالد ، وأنا في الإجازه من المدرسه وبدأ يصرف لي في تعليمات فطور العمال والبناين وغداهم ( زمان البلد بي خير والعمال يا كلو ويشربو من البيت )، فجعتن إقترب منا أحد العمال من أبناء جنوب الوطن طالبا مني سفة تمباك.
    أجبته والله ما بسف ، وفعلاً لم أسف في حياتي ( ليس إدانة لمن يتعاطون الصعوت)، فأ جابه الوالد ( رحمة الله عليه ):
    – ده ما بسف صعوت . . ده أوف ريال . . أوف ريال . وقد كانت السجاره وقتها بريال.
    شوف الناس ديل أسلوب تربيتهم كان كيف؟ بالرغم من علمه بأنني أدخن ولكنه لم يكلمني ولا مره واحده ، وتركني إلى أن أدركت خطورة التدخين وأقلعت. . ولو متأخر.
    رابعاً: كيميائياً: التمباك من فصيلة التباكو الضار بصحة الانسات وكمان السجاير أقل ضرر من التمباك ولو كان كلاهما ضار. يستخدم العطرون في صناعة التمباك ، والعطرون هو عباره عن مادة خلويه خام مأخوذة من مناطق جبليه تعرف بالعطرون وكيميائاً يمكن وصفها بكربونات الصوديوم غير النقيه ، و المصاحبه بشئ من كربونات الماغنيسوم و بايكربونات الصديوم ومركبات لا عدد لها من السيليكات.

    رابعا : كيميائياً الصعوت من أردأ أنواع التبغ ( وهو في النهايه ماده تبغيه من فصيلة التبغ الذي يصنع منه السجاير) ، وهو من فصيلة السيقار الكوبي الذي لا تستطيع جر أكثر من نفث واحد. تبغ حجار بتاع سجاير البرنجي البدخنو البروف ده أخف ضرراًسفون الصعوت واللا الذين يدخنون من الصعوت ألف مره.
    ينتج الصعوت أو التمباك من نبات طويل التيله ، في كوبا يلف لفاً كما الحبال.
    والله ده لو لقوهو أهلنا الشايقيه كان صنعو منو جنس حبال.
    ويفتل في الحبال ما خلا شيتن أسمو عشميق
    يرسل ليك فشان تقرأ العلك تلحقنا في الضيق
    إنت تاريك في بلد الترك ولداً مطيليق

    خامساً: خلو السفه يا بتاعين السفه . . أحسن تلفو على السفسفه.

  68. ابكرون كتب:

    نونو : يقول التمبكجية ان سلطانه خطير اصعب من السجاير بالوانه الاتنين….كان معنا في المرحلة الثانوية طالب (عربجي كبير)… سفته ممكن استخدامها (دقار) لسيارة لحجمها العجيب …وكان المسكين كل يوم (مخموش ) بالثابته…وكل يوم بالع السفة.. خاصة لو فوجئ بالمدير بالفصل الآن طبيب مرموق ومازال عربجيا…….
    بشار : بالمناسبة هناك علاقة طردية بين ك ت م ت والعربجة …وفرع محلات (سورج) في دار النعيم بالثغر ….( أدونا حقتكم نسف ونديكم..تسفوا تدونا)
    الغبشة : التمباك ده طارد ولا جاذب للبوست….اين الحقة …أقصد دلوك…!
    افليقا : يا عربجي …بختك ما لمينا فيك كان (استبلاع في الآع)…

  69. حاج أحمد السلاوى كتب:

    سلام يا احبة .. وصبحكم الله بالخير .
    قصص التمبكجية كتيرة جداً وإليكم هذه الواقعة التى حدثت لإحد الطلبة فى الخرطوم الثانوية القديمة…حيث كان مديرها آنذاك الأستاذ المربى الكبير اللاذع ( هاشم ضيف الله) وكان أحد الطلبة( لسؤ حظه .. الطالب طبعن ) قد دخل عليه فى مكتبه الفاخر المفروش بالسجاد.. وهو يحمل بين شدقية سفه فلمحها الأستاذ وسأله : إيه اللى فى خشمك دا فأجاب بكل صفاقة : سفة يا استاذ..فطلب منه الأستاذ ضيف الله أن يرميها ( يتفها) فاستدار الطالب ليخرج من المكتب حسب تعليماته ..فساله الأستاذ ضيف الله : ماشى وين؟ فاجاب الطالب : ماشى أتف السفة … طيب ليه ما تتفها هنا؟ .. .فاجاب الطالب: ما عاوز أوسخ السجادة . فانبرى له الأستاذ هاشم ضيف الله قائلاً: يعنى إنت رضيت توسخ خشمك بالسفه.. وما عاوز توسخ السجادة ؟..وكان درساً بليغاً من أستاذ عظيم ..وتوقف الطالب من يومها عن التمبكة ..عقبال عندك … يا…. أفليقا !!
    لدى صديق ويدعى برضو ( س) كان دائماً تحت أحدى الأحوال الثلاثة التالية …أما أن تكون السفه مستقرة داخل شلاضيمه .. أو هو فى عملية أخراج السفه من شلاضيمه .. أو فى حالة إستعداد لتلقيم شلاضيمه بسفه جديدة ..فهو دائماً مشغول….فى مشغولية يا خواننا أكتر من كدا ؟.
    سؤال ( كالعادة ) سغيرووووونى كدا : ما هو الفرق بين السفه والهيرويين ؟كلاهما يستعمل لضبط الراس والمزاج…أليس كذلك؟ طيب ليه حيازة الهيويين يعتبر جريمة ..والتمباك والصعوط لا ؟

  70. aflaiga كتب:

    ما بين ساف وتاف ومقبل عليها مدردم مشنق معا ككرة جليد حطها الجرف من عل !!!
    تعرفو الواحد لو استنى شوية حتعملو مشروع قرار يمنع التدوين للمتمبكين !!!
    صباحات سمحه وجاييكم .

  71. حاج أحمد السلاوى كتب:

    أخونا أبو الأفاليق ..سلام ..
    شايفك من أول البوست وإنت الحكاية دى ما عاجباك ولا نازلة من زورك ..حكاية التمباك ومضاره ( الإنت أصلك عارفه )وإستهجان غالبية الناس ليهو ..بس يا خ هون عليك..وربنا يعافيك إن شاء الله منه..فى أسرع فرصة ممكنة ..واسرع فرصة دى هى إنو نسلط عليك حمودى وسروية عشان يكرهوك الصعوط ..

  72. aflaiga كتب:

    ابوى السلاوى : والله عاجبانى جدا جدا ومقتنع وقلنا الله يهدى الكل وبين المدونين تمباكه كتار جبنو عن الرد . وسروية وحمودى ما مقصرين ونحنا ذاتنا ما مقصرين هم ثلاث سفات بس ( سفة الصباح وسفة بعد الفطور وقبل النوم ) وماشات على اتنين ووحده ونبطل نهائى لكن الهجوم الممجوج على العمارى دون فهم غير مقبول والبعض اتخذه مثل الهجوم على من لا يصلى مثلا !! تحياتى ومشكور على الاهتمام بالصحه والنصيحه الراقية المحترمه التى تدفع فى اتجاه الوقف لا التى اوصلت الناس للسف !!

  73. kreeni كتب:

    صباح الخير للجميع

    سؤال يا اخوانا هل يختلف تأثير السفة على حسب زمن وضعها؟؟

    لانو انا لاحظت في ناس الواحد اول ما يصحى الصباح وقبل ما يدور الناحية التانية في السرير تلقاهو “شنق” سفة الصباح.
    وفي نفس الوقت لاحظت برضو كثير من الادوية يقول ليك تناولها الصباح على الريق .. على الرييييق.

    بالله العلاقة شنو ؟؟

  74. البشاوى كتب:

    النونو وسمارها
    ياجماعة افليقا دة خلوهو يسف تمباكو أحسن من يقبل على حاجات تانية
    الزهراء عليك نور ثقافتك واسعة فى عالم التكييف والتبريد
    السلاوىوشمباتى والله ليكم شوق مطر

  75. bakriMusa كتب:

    علي الرغم من انني لا (اسف) تمباكا ولا اتعامل مع اي نوع من المكيفات
    ما عدا (مكيف التبريد ) .. فانني اقف واساند اخونا افليقا في السفه الثلاثية الابعاد صباحا وظهرا ومساء … نظرا لانه ولدنا ودينمو المدونه ومبدعها ..
    وما دام (سمسمتو ) راااااضيه .. وهذا أهم شي .. ايه دخل الناس بين الشلاضييييم ..
    بس يا ابو الافلاق … خليك سياحي .. خليها في (السطوح) وابعد
    من (بير السلم ) ….

  76. حاج أحمد السلاوى كتب:

    الكاشف .. البشاوى
    حاجات تانية يعنى زى شنو ؟ حيسف التراب مثلاً ؟
    والراجل أهو قال عندو محاولات جادة للتخلص من العمارى ..بس هو متحسس شوية من الهجوم الممجوج على العمارى دون فهم غير مقبول على حسب رايه طبعن ..وشوقنا ليكم سيل عديييييل كدا !!!
    عاوزين نعرف من هم الذين يشنقون أنفسهم أيضاً بالسفه حسب قول ولدنا كرينى ..وجبنوا من أن يدلوا بدلوهم فى هذه البير العميقة ..؟
    – سفة الصباح … يا كرينى ..زى شاى الصباح عند بعض اقوام لنا ..والمسالة كوووولها إدمان فى إدمان ..حمانا الله وإياكم جميعاً من أى نوع ..بس حكاية الأدوية البتتاخد على الريق دى عاوزة فتوى من أهل الطب والطبابة.. ومن قال لا أعلم فقد أفتى ..ايضاً .
    – وفى سؤال سغيروووووونى( برضو ) كدا عاوز ليهم إجابة من أهل الكيف ..وهو إنو لاحظت بعض التمبكجية يهرولون نحو الكيس إياه بسرعة غريبة بعد تناول الوجبات وما يتبعها من حلويات أو شاى …السؤال هو..كيف يستبدلون الطعم اللذيذ بآخر ممطر بالعطرون ؟ مجرد خاطرة ..ومجرد سؤال!!

  77. kreeni كتب:

    السلاوي سلام
    والتحايا للجميع
    اكيد الموضوع ادمان في ادمان , بس انا قصدي سفة الصباح ال على “الريق” دي ضررها ما بكون اكبر ؟؟
    يلا يا أهل الطب همتكم

  78. نيام كتب:

    بالله شفتو في الطيارات و المطارات منظر السودانين وهم ببزقوا في التمباك …وما عارفين انو في كمرات خفية تقوم بتصوير مراحل السف و مراحل البزيق و يتم مراجعتها لمعرفة اذا كان المسحوق الثمين من عائلة الهيرويين..
    علي سنكل:
    رحمة الله علي روح الوالد اذكر تماما انو وجد كيس تمباك تحت المخدة ربما نساه واحد من الضيوف فبادرني ظنا منه ان الكيس من ممتلكاتي “كلم اخوانك ديل قول ليهم الزفت دا بمرضهم” ..بلغة اياك اعني و اسمعي يا جارة..
    bakriMusa
    لظروف استراتيجية اؤيد بحرارة مقترحك بخصوص اعفاء سفة الافالقة من ضريبة المستهلك و اتحفظ علي موافقة “سمسمتو”..

  79. سهيل كتب:

    والله يا أخواننا بعد البوست دا أنا خايف إنو المؤلفه قلوبهم يكون الدرب إتقشا ليهم و يزيد عدد تمبكجية المدونه .. أنا غايتو عندي النيه .. رايكم شنو ؟ هو الراس دا بس للقطعيه ..

    يافرد : هو الكلاشنكوف كان ما عمروهو .. بيضرب ؟ و تيب .. ..

  80. aflaiga كتب:

    السلاوى : التمباك مع الجوع بيعمل عمايل شينه زى سيجارة الجوع وكريستال الجوع – اما بعد الوجبات فنحن الان ناكل كى نسف فقط !!! بعدان كنا نسف بعد ان نشبع !!
    نيام ثرو سنكل : بالله الوالد ده ركزو لينا عليهو شوية لانو الولدم نحنا متحيرين فيهم خلى هو !! وفتنكم فى بعض كده فتنه عفوية ورونا منو الكان عامل للوالد هدق اكتر قام تعب فيهو اكتر طلع الروعه دى كلها ؟؟
    سهيل : انت يا زول مقبل على اجمل ايام محل بيختو التمباك حديثا واخريات ! فاوع تبوح وتصرح بالغربه لانها بتعمل رهبه !!!
    بكرى موسى : كان ما سفيت حبوبتك سفت وكان ما سفت انت ما نوبى مالك داير تشككنا .
    البشاوى : حاجات زى شنو كده يعنى عشان الواحد يجهز نفسو ؟؟
    شباب : حقيقة الكيف يدل على ضعف الاراده فان يمتلكك شيئ مااو شخص ما ويسيطر على سكناتك وحركاتك فهو نوع من ضعف الاراده لكنهى بقت على الكيف بس ؟؟ ما هو انتو فى واحد متكيف بيكم ليهو عشرين سنه فى زول فيكم قال الانقاذ ضاره بالصحه وتسبب تصلب الشرايين ؟؟!!! خلونا فى السافينو وخليكم فى السافيكم وربنا يهدى الجميع ..

  81. حاج أحمد السلاوى كتب:

    ” شباب : حقيقة الكيف يدل على ضعف الاراده فان يمتلكك شيئ مااو شخص ما ويسيطر على سكناتك وحركاتك فهو نوع من ضعف الاراده لكنهى بقت على الكيف بس ؟؟ ما هو انتو فى واحد متكيف بيكم ليهو عشرين سنه فى زول فيكم قال الانقاذ ضاره بالصحه وتسبب تصلب الشرايين ؟؟!!! خلونا فى السافينو وخليكم فى السافيكم وربنا يهدى الجميع .. ”

    وتااااااااااانى قام جاب سيرة البحر ..
    – أخونا افليقا ..السف دا ما خشم بيوت ..فى ناس بتسف عشان تتكيف ..وفى ناس تتكيف عشان تسف ( زى السفه بعد الحلو )..وفى ناس سافه ومسفوفه..,فى ناس بيعملوا ديل كووووولهم ..وانا ما بقول وما بصرح ..كلام الناس كتير ..والناس ما بتريح ..وأدونا كيسكم نسف ونديكم ..وتسفوا تدونا ..
    – أصغر واجمل سفه بشوفها عند اخى ( طبعن اصغر منى سناً ..يعمل استاذ / معلم لغة أنجليزية… تخيلوا !! ) يضعها دائماً تحت الشفة العليا ..ولا تكاد تبين من صغر حجمها ..شوفتو الكيف دا بيعمل شنو ؟ أنا جنى وجن الزول البكجن حاجة ..وهو ما يكون جربها ..بس ياهو زاااااتو !!
    – عرفنا لحد حسه إنو الكثير من العواطفات ما بيستلطفن السفه ..طيب رايهن شنو فى السجاير والكدوس ( الغليون ..فى رواية اخرى )..؟؟هل يكرهنه فى نفس مستوى الصعوط ؟؟ بصراحة كدا أنا دخنت بايب ( كدوس )لفترة من الزمن ( فى الجاهلية التانية … يا ود الخلا ..وجاييك فى الجاهلية التالته) وما زلت احِن إلى تبغه ذا الرائحة الجميلة.. قبل المحرقة وبعد المحرقة(وعشان ما تودوناش فى ستين ..مش المحرقة إياها …) ولكن لا عودة للجاهلية ..

    – أخواننا الغايبين .. سترايكر ..ودالزبير ..ودالمدنى ..محنك ..طارق ود عبد القادر ( أخوك المغترب أنا كنت فاكره اكبر منك سناً ..طلع أصغر واحد عندكم فى البيت ..يا راجل .. يا عجوز )واخواتنا وبناتنا الحرائر .. سماسم … الغبشة..همسة شوق…. إن شاء الله مافى عوجة…
    سامحونا الليلة كتَرنا عليكم الطلة ..بس البوست ذو شجون ..

  82. الزهراء كتب:

    نهاركم زين يا سمارنا
    من قبيل دايره ادخل عليكم وكده لكن ما لاقيه فرقه من الشغل
    بالنسبه للسفه البعد الوجبات انا بعتقد انها تساعد في عملية الهضم
    لان صاحب السفه ما ان يضع سفته بعد الاكل حتى تسمع ليك كريييعه قوييه(كاااع) معليش يا اخوانا شكلي قرفتكم
    المهم -اضافه للجانب النفسي للشخص السافي فانا اعتقد بانه تزداد الشعور عنده بالفتونه والرجوله وكده تلقى الواحد قدومو شبرين قدامو والحشم زي ال(parking)بتاع البنطون وبعدين في حاله بتاعة غرودة عيون كده ما عارفاها شنو(يمكن سببها انو حاسي بانه طااالع تاني دور والهوا شدييد) ولا احساس ضب معلق في عامود
    غايتو انا لو كنت سفيت كان وصفت الشعور بالضبط
    ولا كان زول بلبس نظارات وبسف دايما تلقى بير السلم كاشفه شويه والنظاره وااقعه لي تحت
    ولا انسى ايام كنت بالجامعه كنت بلبس نظاره وكل يوم في الخرطوم بجي ماره في بتاع طبليه ناااصيه كده دايما سافي في بير السلم نظارته واقعه ويقعد يبصبص بي فوق النظاره وبكون شايله معدات الرسم الهندسي والمسطره طويييله شايلاها عمك بس بي سفته دي تلقاه مركز مع النظاره وينادي بصوته الاجش(وييين يا دكتورح) لحدي ما يوم سمعوا واحد من زملائي وراح يهدده (والله اطقك كف اخلي سفتك دي ترجع جوه الحقه)

  83. الزهراء كتب:

    البت نونو : مالك مختفيه رادمه سفه ولا مشيتي محل التمباك
    ابوي السلاوي
    والله لو جينا للجد العواطفات عندهن حساسيه مع التمباك لكن لا اعتقد انه سبب رئيسي لرفض الزواج من سعيد( الكلام الاخلاق) فلو كان على خلق فما في مانع ترتبط بيه وبعدين تساعده في العزوف عن التمبكه

    بالنسبه للغليون اذكر ان والدي عليه رحمة الله كان لديه واحد وكنت باستمتع بمنظره وهو يدخن الغليون وتعجبني رائحه تبغه جدا

    اما السجائر فانا لا احتمل مجرد الوجود في مكان واحد مع شخص يدخن وريحته بتضايق كتير من الناس
    لكن افشي ليكم سر؟
    الجكس عموما بيعجبم الراجل البيسجر خصوصا اذا كان يستعمل عطر معين فريحة السجاره بتتغير طبعا وبتديهم احساس الجنتله(جنتلمان) وقوه الشخصيه وكده

    لكن الموضوع ما فيه هو المضار الصحيه لكل هذه الاشياء فيا اخواني والله روحكم دي غااليه علينا وما بنستحمل عذابكم مع المرض الله لا جابو وما دايرنكم تحرقوا شبابكم وعمركم في الفاضي عاينوا لاهلكم واولادكم ديل واكيد انتو عاقلين بما فيه الكفايه وعندكم العزيمه للتخلص من اي ادمان ويلا شدوا حيلكم ونحن معاكم
    ولا نامت اعين الجبناء

  84. علي سنكل كتب:

    شايفه يا النونو الناس لسه ( منداحه يا أبكرون ) في موضوع السفه كيف؟
    ود الخلا كلامك أظنو صاح يمكن العلبه بريال.
    أشكرك يا أفليقا على الاشاده بالوالد وده من زوق أبوك العلمك الأدب والخجل يا ظريف.
    يعني يا الزهراء لمن نجي نشاغل ( بدون سفه ) نقول وين يا هندسه؟

    يا عزيزتي ما في علاقه بين الهضم والتمباك ، بالعكس ممكن تكون في علاقه بينو وبين سؤ الهضم ، فالتمباك يحتوي علي نسبه كبيره من العطرون وهو بدوره يحتوي على كربونات الصوديوم بنسبه عاليه وسيليكات صوديوم مع نسبه بسيطه من أملاح الماغنيزيوم وملح الطعام ودي مواد ذات قلويه عاليه ما بتكون معاها في هضم لأنه عصارة المعده الهضميه هي حمضيه بطبيعتها . نسبه من هذه العناصر بتنزل لاإرادياً في الجهاز الهضمي وتسبب إضطرابات المعده وذي ما قال د. شمباتي أمس تسبب القرح والبلاوي. أضف للضرر الذي يسببه النيكوتين .

  85. نيام كتب:

    نونو:
    مبروك الاندياح وعقبال رتق النسيج الاجتماعي في الحتة دي..
    الزهراء:
    نهارك زين و MTN وسوداني…انتي بدون ما تسفي اجدتي وصف المسفاف بن بزقة …اقول ليكي ما قرفتينا لانو الكريعة حقتك كانت ناقصة ألف طالعة يعني لو كانت (كاأأأع) كان ممكن…و يعجبني وصفك للمسفاف طلوعه السلالم عكس الهواء و كنت اتمني ان تختي سفة حتي يسعفك خيالك بزاوية سقوط السفة عن زاوية ميلان النضارة و علاقة عجلة السقوط بعدد السلالم…وارتفاع المسفاف عن سطح البحر..
    افليقا:
    خلاص ازنا ليك بالسف داير كمان تتكرع ..ورينا شعورك بعد ميلوحة كاااااربة و موية باااااااااردة ثم كباية شاي حااااااارة ثم سفة تخينة ..بالله بايجاز..

  86. سهيل كتب:

    الزهراء : (ويلا شدوا حيلكم ونحن معاكم ولا نامت اعين الجبناء) …

    قيادة المنطقه العسكريه الوسطى تشد من ازركم و تتضامن معكم في الإستيلاء على السلطه و في إنتظار البيان الأول .. ترررا تررررا .. بين الجبلين فقدنا رجال ..طابورنا الحار ما بندار … هرد

  87. طارق أب أحمد كتب:

    نونو وجميع المدونين السافين منهم و المسفوفين
    تحيه و دخول متأخر بسبب السفر

    أبدا بى نونو يا بتى مالك مع الهدندوه ما نسوان السودان كلهم بسفن بس بقت على ناس الشرق
    يعنى نظام علينا جاى زرعو فى الغرب و سفو فى الشرق جابو بالحماره و باعو فى الأشاره

    أفليقا هم ماحركتين بل عد معاى
    تطلع الكيس من الجيب
    تكرضم السفه و تسفها
    تشم الكيس و ترجعوا
    تصفق و دى أهم حته فى الميكانزم بتاع السف و قديما خسر أحدهم الرهان الذى كان سيربح فيه بقره لو ما صفق
    طبعن الخبره واضحه لكن يا أفليقا أنا أقلعت عنه قبل عشرين سنه و مازالت تعترينى أم هلا هلا كلما مررت بمحل ريحة تمباكو صاموتى
    و زمان كانو بقولو لى سيب القرف دا ,,,,,دا الجداد ما بياكلو و أرد ببرود أدروبى شفت ليك جداد بيشرب سجاير
    عمنا و كبير حلتنا السلاوى شكرا على أتصالكم الراقى و فعلن أخوى أصغر منى بكتير و أنا أصغر منك بكتيرين يبقى أنت أصغرنا أها أيه رأيك لو أكلم أبكرون عن البراءه بتاعتك تتذكر ناس كلاى خلاس إن كتمت
    Is kreeni
    مرحببيك و نشكرك على حسن الظن بنا و شكلك كده حتطول معانا فعشان مسائل إكمال التسجيل و الأعفاء من الرسوم و الذى منو سلم على وجه السرعه موقعك الجغرافى للحاج حاج أحمد السلاوى(أسم واحد)
    شمباتى كيفك قت لى شرحتها ليهو بالتلفون و دى بيكتبوها إزاى ياحسين
    نونو شكلك سويتى بيان بالعمل سفيتوا أنا **ضقتووووووا؟؟؟

  88. aflaiga كتب:

    سنكل ثرو نيام : لا نملك سوى الانحناء اجلالا لمن رفد دانقتنا بنيام وسنكل وشارك فى تربية بشاوى وقرن ونور ولو بالمشاهره !! دمت ابا للكل .
    نيام : تعرف مره الوالد رحمه الله طبعا ما عارف قصة التمباك دى وكنا راقدين فى الحوش سوا وسريرى جنب سريرو قمت بالليل عاوز اخت لى سفه وده كان ايام الثانوى وتمباك النو الشهير فى البوسته – المهم قمت عملت رجلينى شكل 8 وشديت الملايه وزبطت السفه بى تحت ونسيت انو كيس النو للعمارى كيس فضيحه وله صوت مميز – المهم الحاج اظنو سامع الكشكشه تحت الملايه وشايف الحركه قام طوالى راح سائلنى : انت يا ود بتسوى شنو بى تحت الملايه ؟؟؟ فلم املك سوى الاعتراف باننى اسف وكان لك احسن الحلول عشان مخو ما يمشى بعيد !!!
    شباب : بالله عليكم دعونا نلخص البوست ده لانو بيثير فينا حاجات كده غريبه جدا اقلها هو انو الواحد ما قادر يتخلص من القصه الشينه دى واخرها انو ما قادر يرتفع لمستوى اشفاقكم على الصحه والسلامه .
    نونو : الرساله وصلت ما تحكيها اكتر من كده ..

  89. طارق أب أحمد كتب:

    بس يا أفليقا لو قدرت توصل ليهم شعورك مع السفه بعد الفطور أول يوم فى رمضان

  90. kreeni كتب:

    طارق أب أحمد
    مشكور غلى الترحيب وانا سلمت موقعي من امس. أكيد ح اطول معاكم ومن الصباح ” لافي” بى جاي.

  91. الزهراء كتب:

    سهيل: شكيت محنك يا كروز حركات الجيش دي شنو؟
    يا اكوانا انهنا في قوات نزاميه دا ما بندورو اي واحد كوهنه ولا دلقان -وبعدين دلقنه ورجفه ده بجي من وين ما من كلام تااع تمباك وسجاير ده يا اكوانا انينا كلام ده كلو عشان كايفين الى سهه بتاااع ناس ده بالله اليكم الله املوا تابور صفا وانتباه واسمئوا كلام تاا جنا ارب دا اسمو سيهيل دا
    اجمأ يا مواتن سريييئ
    اييينتباأ

  92. الزهراء كتب:

    علي سنكل
    حامض +قاعده=ملح +غاز
    المواد البتنزل من التمباك دي عباره عن احماض والمعده ايضابتفرز احماض لذلك السففنجي لابد ان ياكل قبل السفوفه عشان حامض مع حامض حيهضم المهده ذاتا ويسبب التقرحات
    وعموم هو فعلا مضر بالمعده والجهاز الهضمي كله
    كر علي يايمه

  93. علي سنكل كتب:

    ملح + ماء
    بعدين إنتي كنتي تعلمجي في الديش ؟

  94. طارق أب أحمد كتب:

    يا الزهراء
    شويتين و تشدى لينا جلاله أنا ماشى نيالا أووهوو أنا ماشى نيالا سنبرم

  95. bakriMusa كتب:

    (بكرى موسى : كان ما سفيت حبوبتك سفت وكان ما سفت انت ما نوبى مالك داير تشككنا )

    فعلن يا افليقيا مجتمعنا النوبي خاصه ناسنا القدام السفه كانت عندهم ذي التحليه ..لما كنا (سغاااااار ) تقريبا الحلة كلها كانت تسف ..حتى النسوان خاصه الكبار عندهم صنف خاص بهن (اخضر ) اللون ممزوج بالعطرون ..
    اتذكر ..عمتي وولدها الكان في نفس سني ..(حقتهم )كانت واحدة ..مرة رسلتو يشتري ليها صعوط من الحلة الجنبنا..اثناء العودة وسط النخيل ..اخد ليه سفه وقال لي :ـ جرّب .. يا اخي… شفت فيه النيل بيلمع في الظلام ..ذي سيف مجهور بالنجوم من غير نظام..
    وكانت توبة اخونا (السلاوي).!!!!!

  96. زووووووول كتب:

    نونو سلااام
    موضوعك لذيذ لكننا غبنا عنه بامر سوداتل وانقطاع خدمتها .
    المهم : قال التمباكه :
    سفه بعد الشاى ولا ZY
    وقالوا لو ما فاطر ما تخاطر زى ما تفضلتى
    الصعوط شئ مقرف جدا لا يتناوله الا ……………..(اخير ما اقول )
    والله يا نونو اخوك يكرهو اكثر من الجكس زاتو ويعتبر عندى عاملا مهما فى تقييم الشخصيات يعنى تلقى الواحد عندى زوول مهم جدا لكن من اشوفو حدر ليهو سفه ينزل ميه وتمانين درجه .
    بلدياتنا كان قبيحاجدا وشين شناة العود لدرجة يرى نفسه قبيحا جدا
    كان يرى ان سف التمباك مرتبط بقبح الشخصيه ولهذا كان كثيرا ما يسألنى :
    يا زووول عليك الله شكلى دا شكل صعووط؟؟
    فاجيبه بالنفى
    لكنه يخبرنى ان كل من يقابله يبادره بقوله : بالله لو سمحت ادينى سفه
    وجااايييكم تانى

  97. ابكرون كتب:

    علي ود سنكل : شهد شاهد من اهلك ….يعني العربجة كانت حاصله…؟ اصلو ده راس هدربا (اسال منو بشار)…تمباك …وسجاير ..وشيشه…وكدوس …وشنو ما عارف….
    نونو : انا المتداخل يا رقم 99 او 100 والظاهر عليها لو ما عدينا حاجز ال 100 ما بتخش….
    الزهراء : غايتو عايزه ليك فرمته …واسكاننق بكاسبر الجديد…وفتره بتاعة فقدان ذاكره اقلو سنه ….بعد داك برمجه جديده…ههههه بس ملف النكات بنوصي بعدم مسحه

  98. حاج أحمد السلاوى كتب:

    يا جماعة الخير ..يا نونو صاحبة البوست .ز
    عشان ( خاترنا) خاطرنا ..وعشان خاتر أخونا وحبيبنا الدينمو افليقا ..أدى تعليمات للفورمان عشان يشد السقف ..ونقرط على كدا ..لأنو عندى أحساس ( وإحساسى دايما ..ما بيخيب ) إنو فى زول عزيز علينا واخد على خاطره وعاوزكم تقفلوا على كدا .. وشاعر بأنو الموضوع أخد كفايته من التمحيص والتدقيق.. وبصراحة الزول دا عزيز علينا كووووولنا …وما بنقدر على زعلو ..عشان كدا يا نقرط على كدا …يا نقرط على كدا … قلتى شنو ؟
    – ولدنا كرينى ..” ومن الصباح ” لافي” بى جاي. ..” بس أوع ما تكون لافى صينية ..!!
    – الزوووووول ..”( والله يا نونو اخوك يكرهو اكثر من الجكس زاتو ويعتبر عندى عاملا مهما فى تقييم الشخصيات يعنى تلقى الواحد عندى زوول مهم جدا لكن من اشوفو حدر ليهو سفه ينزل ميه وتمانين درجه .. ” ) ليه القسوة دى فى احكامك ؟..يعنى الجماعة التانيين اللى بيعملوا حاجات تانية ..كنت خسفت بيهم الأرض ..ولاّ شنو ؟مش للدرجة دى .. يا سديقى العزيز …وخلى قلبك معاى شوية ..
    -أخونا بكرى ..وكانت طيرة أبريش من الدريش..وتوبة يا حبوبة ..غايتو الله شافك ..ولاّ كان حسه عواطف تلقط الأكياس من تحت المخدة ..
    _ بتنا الزهراء …أكيد إنتى إتخرجتى من الكلية الحربية .. أو كلية الشرطة ..أيهما أسرع …وكُر عليك .. يا يمه من الديش !!!
    – أخونا طارق … أسأل مجرب ولا تنسى الطبيب ..وشعور سفة ما بعد فطور رمضان دى ما بيعرفه إلا زولاً مجرب ..وزى ما قال ابو عصمت ..فى مقولته الشهيرة .. (أنا جنى وجن الزول البكجن حاجة من غير يكون جربها )..بينى وبينك كلام عقل .. وعادل إمام قال : دا انا غلباااااااااان ( وزيادة على كدا أنا برىء وناااااييييف .. يا ابكرون ..وكمان شهادة عربية) ودى ذكرتنى حكاية أخونا من جنوب السودان لامن سالوهو ..إنت مسلم ؟ ردّ وقال : آآى وكمان جبهة ..( قرب يقول كمان كوز … سامحنا .. يا الزوووووول !! )..
    أنا غايتو العندى قلتو .. إنتو شن قولكم ؟

  99. د.ياسين شمباتى كتب:

    مساء الخير يا حبايب..

    الحبيب سنكل..حاج السلاوى شهادة عربية؟؟ الكلمك منو!!؟؟ انا عندى ما يثبت كدة,وما قايلكم نقشتوهو..

    البشاوى العزيز..سلامات..والله الشوق اكتر,,وين ليك مدة ما بنت؟؟

    هام لجميع المدونين..عبدوش يبثكم اشواقه وتحاياه ويبشركم بقرب عودته,شاكرا كل من سأل عنه,وبقول ليكم انو ياها دى المحرية فيكم..

  100. الزهراء كتب:

    دياشااا دياشه والديش نقلوه فتاشه كر علي انا
    ابكرون: يايابا تطش شبكة روتانا وشبكتي تكون ثابته والسيستم بتاعي فيه(protection )من اي تداخلات في الترددات ونحن اتصالنا بالقمر الصناعي مبااااشر لا بتاثر فينا مطره ولا اشارتنا بتضعف بي مسافه وكاسبر ده من ده انا افرمت جدو الجابو اسكاي ود مهله بت التوم الحداد
    حاج السلاوي: انا اصلا من الابتدائي ما وقفت في طابور وما عندي علاقه بالديش ولا الشرطه دي شفتنه ساااكت
    وكان لي افليقا ده كان سف شنو داك اياهو اخونا المابنقدر على زعله والكلام اخلاقو العاليه ونحن معاه في طريق التخلي عن كل ما يضر به
    والصلح خير والبعادينا بنندمه وقرارم ده بيلوه ويشربوا كابيه
    والله اكبر ولله الحمد
    الله

    اكبر

    والعزة

    للسوداااااان

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s