زواج المحلل … ” تمثيلية محرمة ” بطلها تيس مستعار

Posted: الأحد,28 يونيو, 2009 by basharibnburd in إجتماعية

أحبائي المدونون صباحاتكم زفر في زفر بدون قطع كهرباء وقد اقتبست لكم الموضوع أدناه (حيث تقتضي أمانة النشر) بعد أن لمست فيه شيء من الحيوية ليدلي كل برأيه معليش يمكن الموضوع يكون طويل شوية لاكين اسمحولنا

مازالت قضية زواج المحلل تلقي بظلالها بين الحين والآخر سواء على صفحات الجرائد أو على ‏وسائل الإعلام الأخرى.. فلم يمر شهر تقريبا حتى نقرأ أن زوجين اتفقا على المحلل بعد أن ألقى ‏الزوج يمين الطلقة الثالثة عليها. وآخر هذه الحيل قصة “رأفت” الذي تزوج منذ 14 عاما من “منى” ‏وبعد هذه الفترة حدثت مشاكل انتهت بأن ألقى الزوج الطلقة الثالثة. ‏
فكر الزوجان في حيلة زواج الست من محلل حتى تعود المياه لمجاريها مع الأول من أجل ‏الأولاد وبالفعل تم لهما ما أرادا حيث عثرا على محلل تزوجها لمدة 24 ساعة فقط ودخل بها ثم ‏طلقها وبعد انتهاء العدة عقد عليها مطلقها من جديد بعد أن نفذ لها كل شروطها المادية ولكن لم يمر ‏عام على زواجهما حتى فوجئ بها تطالبه بالطلاق بحجة أن ضميرها استيقظ من سباته العميق ‏وأنهما قد خالفا شرع الله بالزواج من محلل لمدة معينة. ‏
التيس المستعار
يقول الشيخ منصور الرفاعي عبيد وكيل وزارة الأوقاف الأسبق إن زواج المحلل باطل لأن ‏الأصل في الزواج أن يكون زواجا دائما وليس مؤقتا فإذا كان الرجل الذي يكثر من الحلف على ‏زوجته ثم يذهب ويأتي برجل عرفه الفقهاء بأنه “التيس المستعار” وقد سموه تيسا – أي عجلا – ‏وكلمة مستعار أي أنه يأخذه من أهله لمدة محددة.. وهذا التيس ملعون والزوج الأول ملعون لأنه ‏سمح لرجل أجنبي أن يعاشر زوجته ويكشف على شرفه وكرامته لمدة ليلة والمصيبة الكبرى أنه ‏يدفع أجرا لهذا التيس.. لذلك قال رسول الله صلى الله عليه وسلم “لعن الله المحلل والمحلل له” وهذه ‏اللعنة جاءت على لسان رسول الله صلى الله عليه وسلم ونحن نعلم أن ما قاله الرسول ونطق به فهو ‏من الله تبارك وتعالى غضب على من يفعل ذلك. ‏
كما أكد الرسول على أن هذا الزواج لا يصح مطلقا إلا إذا كان فيه شرطان الأول “التأبيد” أي ‏تكون نية الزوج أنه يتزوج هذه المرأة زواجا مؤبدا وليس مؤقتا.. ‏
الشرط الثاني: الرسول حدده بقوله “حتى تذوقي عسيلته ويذوق عسيلتك” أي أن يكون هناك لقاء ‏في الفراش عدة مرات حتى تكون المرأة قد عرفت قدر زوجها وهو قد عرف قدرها فلابد من ‏تحقيق هذين الشرطين وإلا فإن الزواج باطل ومن يمارسه ملعون. ‏
زواج باطل
تقول د.سعاد صالح عميد كلية الدراسات الإسلامية والعربية السابقة بجامعة الأزهر إن زواج ‏المحلل عند جمهور الفقهاء بقصد التحليل للزوج الأول لفظا أو نية يعد زواجا باطلا ولا يترتب عليه ‏الحكم الشرعي وهو التحليل لقوله تعالى في سورة البقرة “فإن طلقها فلا تحل له من بعد حتى تنكح ‏زوجا غيره فإن طلقها فلا جناح عليهما أن يتراجعا إن ظنا أن يقيما حدود الله” وقد فسر الرسول ‏عليه الصلاة والسلام لفظ النكاح في الآية بالدخول التام بنية الاستقرار والدوام وذلك في حديث ‏امرأة رفاعة القرطبي “حتى تذوقي عسيلته ويذوق عسيلتك” والعسيلة هي كناية عن الجماع بين ‏الزوجين وقال الرسول صلى الله عليه وسلم “لعن الله المحلل والمحلل له” وقال المحلل هو التيس ‏المستعار ومن هنا فقد ذهب جمهور الفقهاء إلى عدم صحة نكاح المحلل وأنه لا يترتب عليه ما ‏يقصد منه وهو أن تحل الزوجة لزوجها الأول. ‏
ما رأي علم النفس؟!
‏ تقول د.درية عبد الرازق أستاذ علم النفس بكلية البنات جامعة عين شمس إن الزواج من محلل ‏له آثار نفسية قد تعود على الزوجين فقد يشعران بعقدة الذنب. والرجل يشعر بأنه السبب لأنه ‏استعجل في استخدام لفظ الطلاق للمرة الثالثة. والمرأة تشعر بأنها مستفزة وكانت سببا رئيسيا في ‏دفعه للطلاق.. وبالتالي إذا ارتبطت بزوج آخر كمحلل فهي لا تحترمه لأنه قبل على نفسه ممارسة ‏هذا الدور. ‏
أما إذا استمرت في الحياة الزوجية معه – أي المحلل- فإنها سوف تظل تشعر بداخلها أنه زوج ‏احتياطي وربما تعود لزوجها الأصلي في أي وقت وبالتالي لن تشعر بالأمان وسوف تكون في ‏عزلة. ‏
وأضافت د.درية أن المحلل قد يستثمر الموقف لصالحه في ابتزاز الزوج أو الزوجة حتى ‏يطلقها.. وإذا عادت الزوجة لزوجها الأول فإن العلاقة الزوجية لا تعود لأصلها حيث يشعر الزوج ‏أن آخر شاركه هذه الزوجة.. وإذا وجد أولاد فإنهم يشعرون بالحزن لما حدث من انفصال بين ‏والديهما مما ينعكس آثاره على حالتهم النفسية والدراسية. ‏
كما أن الأبناء سوف يشعرون أنهم متواجدون في أسرة مفككة دائما ما تتردد بين جدران منزلهما ‏لفظ الطلاق والرجوع مما يجعلهم يفتقدون الشعور بالأمان والإصابة بالعقد النفسية.. وخوفهم من ‏الفشل إذا أقدموا على الزواج مستقبلا. ‏
وقد يرغب الأبناء في الانتقام من المتسبب فيما آلت إليه حالة الأسرة ويكرهون ارتباط أمهم ‏برجل غريب ويتعاملون معها بجفاء كما يجب أن تكون العلاقة الزوجية كاملة شرعا بين الزوجة ‏والمحلل لأنه إذا لم تكتمل ستشعر الزوجة أنها ارتكبت إثما ينغص عليها حياتها في حالة عودتها ‏لزوجها..وإذا أراد المحلل أن تنجح حياته الزوجية فإن الزوجة تعمل على إفسادها كي تعود لزوجها ‏الأول. ‏
وأشارت د.درية إلى أن الزوجين قد يقعان في التجاوز الخلقي والديني عند اختيار المحلل كأن ‏تختار الزوجة أحد محارمها أو يختار الزوج من لا يكافئها اجتماعيا أو اقتصاديا كعامل لديه أو ما ‏شابه ذلك. ‏
وقالت إن ما يحدث يدل على انعدام الوازع الديني والجهل بأمور الدين أو الميل بالعبث بها ‏وسوف تتسبب بذلك في أن تكون قدوة سيئة للأبناء في المستقبل. (مقتبس من مجلة الحقيقة المصرية) ‏

 

Advertisements
تعليقات
  1. aflaiga كتب:

    عم بشار : نشيل البرنجى معاك الليله .
    اولا : هو اصلو البخلى الزول يصل لعدد طلقات قدر ده شنو ؟؟ زابط العتله فى السريع ولا شنو ؟؟ ما سمع بى طلقه طلقه ودانه دانه وتانى وحده وبى رزانه – طلقه تعرف وين مكانا ؟؟
    والله يا عمنا لو مسكنا القصه دى بنلقى انو جزء كبير من السودانيين عايشين مع نسوانم ديل ساى سمبلا لانو قصة الطلاقات دى فى الاونه الاخيره مع الظروف المهببه دى كترت وقاعدين ياكلوها بينم ساى ؟؟؟
    المؤسف يا عمنا انو علماءنا بدل يجتهدو فى القصه دى قاعدين يجتهدو فى اعانة الحاكم على رفع حالات الطلاق !!!
    عليك الله راجع الاعلانات فى الجريده فى صفحة كامله بتتكلم عن اعلان طلاقات اما للغيبه او الاعسار او الضرر !!! ودى كلها اسباب خارج يد الزوجين !!! وكلنا عارفين سببا منو ؟؟؟
    كنت قد كتبت قبل الان اننى اذا كنت من علماء البلد كنت ساصدر فتوى ملزمة بالاتى :
    * تحال سلطة الطلاق النهائى الثالث للقضاء وتنزع من يد الازواج تماما .
    * يتم تفريغ ديوان الزكاة تماما وفتح فروع بالمحاكم لعلاج حالات الطلاقات للاعسار .
    لانو ببساطه الزول الفقران المعدم لا يصح شرعا ان يترك له امر الاقرار فى القضايا الزوجية المصيرية المتعلقه بالزوجة والابناء .
    وده راى خاص اتمنى ان يتم النظر فيه .
    اما بالنسبه للتيس المحلل فما اظن انو فى راجل سوى بكامل رجولته يقبل ان يدخل على زوجته رجل اخر ويعود هو ويدخل عليها لانو اصلو لو بيحبها قدر ده فاكيها ليييييييييييييييييييه ؟؟؟؟
    وجايك ….

  2. بشار و ضيوفه سلام

    موضوع في السلك زي ما بقولوا شباب اليومين ديل…. لكن هو المرجعو ليها تاني شنو… طالما هو قاعد يوزع في الطلاقات يمين شمال يبقى مافي داعي ترجع ليهو و حقو المحلل يستأثر بالزوجة و يحيليهو يموت بغيزو….

    زي لمن عادل امام عملها في المسرحية و طلع الزوج ملوص…

    عموما يحذر العلماء و شيوخ الدين كثيرا من الحلف بالطلاق و دائما ما يشيرون في وعظهم الى أن “من حلف فليحلف بالله أو ليصمت” لكن البسمع كلامهم منو فقد تعود التجار و المستهبلين بالحلف بالطلاق في اليوم مائة مرة دون أن يهتز لهم جفن لذا يسمون طلاق من يحلف كثيرا بالطلاق “بطلاق السفيه” الذي لا يستوجب تمامه و وقوع الطلاق على زوجته.

    و لكنهم أيضا يشيرون الى الحالف بالطلاق أن كان و لا بد حالف بالطلاق فليحلف فيما يملك حتى لا يحرج أن لم ينصاع المحلوف عليه كمن يحلف على شخص (على بالطلاق تشيل المائة جنيه دي) فقد لا ينصاع من حلّفته و تكون وقعت في المحظور و لكنك تستطيع أن تحلف (بعلي الطلاق ما أديك المائة جنيه) فهي في جيبك و لا يستطيع كائن من كان (يقلعها) منك.

    بعدين حكاية طلقانة بالتلاتة دي مكنة ساكت اذ تكون طلقة واحدة لحد ما يعمر المرة الجاية…

  3. aflaiga كتب:

    والله يا عزت صصدقت ده طلاق السفيه ذاتو .. لكن مش مفروض يتم تعريفه جنبا الى جنب مع الطلقه السفيهه ؟؟!!! لانو البيوصل السفيه للسفاهه سفيهه زيو ولا شنو ؟؟ قد يضع الله امراة حسنه مؤمنة تحت عبد سفيه جائؤ والعكس !!! وقال ربنا الطيبون للطيبات والخبيثون للخبيثات ولا شنو ؟؟؟
    شباب : مشهد سغنتوتى :
    هو : تعرفى يا روحى نحنا كلمة طلقانه دى عاوزين نتجاوزا فايه رايك نخلى العصمة فى مؤسسة الرئاسة شراكى بيننا يعنى لو فى زول عاوز يتطلق نقعد سوا ونجتمع ونتفاكر ونجيب الشركاء ورعاة المفاوضات ونتفاهم ؟؟
    هى : خلاس نخلى امى رئيس شركاء التفاوض رايك شنو ؟؟
    هو : ليه ما نخلى امى انا رئيس شركاء التفاوض ؟؟
    هى : حلاص خلى امك تمسك ملف الترتيبات الامنيه والدمج وانا امى تمسك ملف الثروه والسلطه !!
    هو : باللاااااهى ؟؟ عشان بعدين تنفصلو وتشيلو الثرو والسلطه ؟؟
    هى : لالا نحنا نتفق انو نخلى الوحده جاذبه كويس ؟؟
    هو : خلاس انتى وامك تكونو شفافين مع الشفع ومعاى وتورونى حسابات الثروه كلها اول باول ..
    هى : انت الثروه عاوز بيها شنو نصيبك من الثروه حنديك ليهو ناشف ( معجون – صابون – سجاير – هدوم – ينزين .. الخ ) انت عاوز شنو تانى ؟؟؟
    هو : يعنى انا اكون رهين لى ذوقك انتى وامك مره تونى ومره ما تدونى وتختارو لى على ذوقكم ؟؟ لالا كده ما بخارج من لا يملك قوته لا يملك قراره .
    هى : والله كان عجبك !!!
    هو : اقول ليك شيئ الانفصاااااااااااااااااااال وبس ..
    هى : هى قول بسم الله ندى الوحده فرصه !!!
    ——-
    عم بشار تعرف الزول المحلل ده بيكون زى الزول البيجيبوهو فى المطاعم يضوق الاكل مش ؟؟ طبعا يجب الاتفاق على شروط الاستهلاك ويصفرو ليهو العداد قبل وبعد الاستلام والتسليم عشان يعرفا مشت معاهو كم كيلو ويحافظ على الزيوت والمصافى وما يغير نوع الزيت لانو تغيير الزيت وكترة الرجلين فى العربيه بيخفف مكنتا ولا شنو يا سهيل ؟؟؟

  4. علي سنكل كتب:

    الأخ بشار :
    مشكور على اللطش المدروس.
    من المواضيع الاجتماعية الهامه والواجب طرحها للنقاش .
    مع تزايد ضغوط المعيشه وصعوبة سبل كسب العيش وشح دخل الأسرة في الأمازون تزايدت حالات الطلاق بسبب النقه والحجه والضغوط التي تضعها عواطف على كاهل سعيد ( ما هديل ناس فلانه راجلها جاب ليها – وما هديل الناس كلهم سوو وعملو ) ، و هي ما عارفه إنو ناس فلانه ديك راجلها بيهبش في المال العام وسعيد يعلم أن فلان ذلك هباش ، وهي تعيره بأن ناس فلان أبوهم جاب ليهم.
    تتزايد الضغوط فيقع في المحظور مره واتنين وتقع الثالثه ، ثم يكونان أمام أمريم لا ثالث لهما:
    – يطنشا من حساب الطلقات والأمر يمشي كده ساي بدون حساب ، وده طبعاً غلت كبير لأنها بتكون كده قاعده معاهو صحبه ساكت وانتفت شرعية الزواج.
    – أو يلجأ الزوجان لما طرحه بشار أعلاه وده برضه طبعاً أنكأ من الأولاني ، والخوف كمان من الوقوع في قصة حاج منزو ( أحياناً يرفض التيس أن يطلق المره ، باتفاق سري بينه وبين الزوجه إذ تكون قد وجدت في هذا التيس السكون والمودة والرحمة التي لم تجدها عند الزوج الأصلي) ، ويضيع هنا الأطفال وتتفكك الأسره.

    والحل كما ذكر أفليقا أن يتقي الوالي الله في الرعيه وييسر لها من أمر معيشتها ويرفع عنها الجبايات والرسوم والجمرات والنفايات ويوفر الوظائف للشباب المالين الحيشان بلا شغل ولا مشغله.
    في جانب آخر يعتمد على عواطف ، وهو الاقتصاد في إدارة شئون البيت وترك الفشخره والتقليد والتباهي الفارغ ، وتقبل بقسمتها.

    ناس قلوبم راضي بالحاجي القليلي
    ناس يكرمو الضيف ولو كان بالبليلي
    ناس يعرفو الجار يموتو حمى القبيلي
    دي طيبة القريه ما جاتم دخيلي

    اللهم أرفع البلاء والمسغبة عن أهلنا ويسر لبلادنا مخرجاً يا كريم.

  5. aflaiga كتب:

    عم سنكل : والله هبشت اهم شيئ الا وهو المقارنه المقارنه التى خربت البيوت !!!!
    فى بلد يصعد فيه للسطح يوميا مئات المليونيرات الجدد من الطبقه الطفيلية يصعب الحياة وفق المقارنه لان الحياه ببساطة ستحول الزوجين الى اكلى مال حرام او مطلقين ببساطه !!!
    ———–
    مشهد تانى سغنتوتى :
    هى : فلانه راجلا جاب ليها وجاب ليها وجاب ليها !!
    هو : نان فلانه راجلا مكفيها فى دى مكفيها فى ديك برضو ؟؟
    هى : اسى الجاب سيرة ديك منو ؟؟ انت بس فالح لى فى ديك !!
    هو : خلاص نجيب ليك ديل ونوقف ديك ؟؟
    هى : هى فلانه تطير بى راجلا !!
    كسره : ديك هنا تعنى اى ديك معنوى او مادى …

  6. حاج أحمد السلاوى كتب:

    الدينمو .. أفليقا ..أبو حمودى..
    غايتو … جنس …غايتو ..
    وجاييكم راجع ..بالمهلة ..نبس نخلس الشغل الغاتسين فيهو ..وما بيكمل دا ..

  7. مش بالله يا أفليقا

    في غرب السودان تكاد المرأة أن تمثل قوة عاملة تضاهي ما يقوم به بعض الرجال أحيانا فتقوم المرأة على رعاية أرضها و التي تقاس “بالمخمس” و هو يمثل فدان و ثلث الفدان فتكدنها و تقسمها و تشتت بذورها و ترعاها و تحصدها…عبرت مرة احدى السيدات في احدى اللقاءات على دور الرجال السلبي هناك فهم يتركون نسوانهم للزراعة و الحقل و يستريحوا في الضللة و يأكلوا “مرين” و هو أكلة شعبية تذخر بها الأسواق…ناسية ما يقومون به حيال الأسرة

    هنا تحضرني احدى القضايا التي يحكونها بأن نساء أحد الرجال فالعادة أن يكون لكل رجل مثنى و ثلاث حسب أملاكه من “المخمسات” فسأله القاضي…..نسوانك ديل بيشتكوك قالوا انت ما بتزرع معاهم في الحقول….شن قولك

    قال …يا مولانا انا الحقيقة أنا ما ممكن أزرع في البيت و في الحقل خلهن يختارن

    طبعا سحبت النساء الشكوى في التو و اللحظة….زراعتنا بنقدر عليها !!!!

  8. نيام كتب:

    بشار بن برد:
    النقص في المعيشة و نقص في الدين و نقص في التربية و نقص في البنية الاجتماعية الامزونية الاصلية كل ذلك ادي الي زيادة في الطلاقات العصية و بعضهم قاعدين ساكت نظام عيشة خارج الشبكة.. بعد ان استوفوا طلقة الماغنوم ثري…الطريف المحزن ان بعضهم من الذين مازال في ارواحهم شئ من ايمان فرزوا العيشة و قاعدين في (المضيفة) و باقي الاسرة للداخل و حدهم عتبة الباب اولادوا يجيبوا اللقمة و يجو عليه و هو ما مقصر في قفة الملاح ، يعني اختصروا كل العلاقة الزوجية في قفة الملاح بحجة تربية الاولاد (ماهو راي الشرع في هكذا علاقة؟)

  9. ابكرون كتب:

    بشار يا بن برد :
    هو عليك الله ربنا حلاهو وطلق بالثلاثه لزوووومه شنو تيس وعجل وود ابرق…ما خلاص كل يروح لي حاله…قال عسيلتها….هو لو عندها عسيلة ولا عسلية كان الاول طلقها بالثلاثة….!
    اها لو طلقها تاني تحسب راااابعه …ولا (نهسبو) من اول وجديد….؟…والله يا شجرة الدوووم انتو ما عندكم شغله غير (بناااات آوه ) ديل

  10. البشاوى كتب:

    بشار بن برد
    لك التحية
    هو الرجال المطرطشين ديل الله فكاهم بالطلاق تانى العباطة لزوما شنو ؟
    كسرة
    مرة معاى عواطف جايين من امدرمان بالمواصلات لما وصلنا الموقف انا نزلت قبلها والحافلة ماوقفت لسة وبتاع المرور بيصفر للحافلة عشان تمشى قدام لسة قلت ليهو ياخى خليهو ينزل لى المدام ويمشى الراجل قال لى انت وكت الله فكاك منها منزلا لى شنو ماتتخارج

  11. ibnburd كتب:

    وين الناس ؟؟ ليش مافي (خش) ؟؟ ولا الموضوع ما (جزَّاب) عشان قلنا ليكم ملطوش؟؟؟

  12. nono كتب:

    basharibnburd /لك التحية

    العقد الفريد/ حاج السلاوي -نيام- البشاوي- ابكروووون- افليقا-د/عزت/علي سنكل

    الفهم شنو ؟

    الراي رايكم الشووووووورة شووورتكم؟

    يعني ياعواطف يااختي ماااافي داعي نكووووس لينا سعيد تاني يحلللله

    لانه بعد الفاس يقع في الراس ؟

    تجي الجغلبة!!!

  13. سهيل كتب:

    العم بشار حياك الله .. و نأسف للتأخير

    الشباب و الجدود لكم التحيه و الود ..

    سؤال سغيرووووووني … طيب .. لو كانت العصمه في يد (عواطف) اها الفلم دا شكلو حيكون كيف ؟؟؟؟؟؟؟ .. هل ستسعتين بصديق؟ ولا انا أعرس تاني و لا هي حتعرس تيس جديد و لا نعرس نحن الجوز واحدين تيسين تانيين و لا نخليها الشغله دي ؟

    البشاوي : عواطفكم عندها عنوان سوداننا دي و لا نخلي طارق أب احمد يمسك ملف دارفور ؟

  14. سهيل كتب:

    نونو : مشكلتك شنو مع حروف العله ؟ منك ولا من الكيبورد؟

  15. بشار أحمد بشار (إبن برد) كتب:

    الرمّاي أداة تتكون من خيط أو عصب متين يتراوح طوله بين 15 ال20 مترا تربط في أحد طرفيه (تقالة) من الحجر أو معدن (الرصاص) وعدد من الصنَّارات يتراوح بين ثمانية الى عشرة وفي الطرف الآخر (طرورة) أو وتد والرماي معروف لدى الناس الذين يقطنون على أطراف النيل وعندما تعلق الصنارات بجسم أو حجر او جنزير مرساة داخل الماء يقال أن الرماي (كرَّد) وقد سقت لكم هذه المقدمة الطويلة عشان الفعل كرَّد يكرِّد فهو مكرِّد ويعني شبك شبكة بت ستين كلب . يحكى أن ع كانت أجمل نساء عصرها وكانت حلم كل رجل لما حباها الله من جمال وقوام لا مثيل له وكانت هي على علم بهذه الحقيقة وكانت لاتتوانى في (تهبيل) الرجال وهى (تتقصع) وتتمايل في مشيتها حيث كانت تبيع فيهم وتشتري وشاء حظها العاثر أن يزوجها أبوها العاشق للدرهم (أبو رنة) للتاجر القصير الذميم ذو البنية الصغيرة م ولم تجد ع في م الرجل الذي يهدي فيها بركانها الثائر وسرعان ما دبت بينهما الخلافات حتى أفرغ م طلقاته التلاتة ومن ثم احتار دليله وكثر تردده لوالد ع لإيحاد طريقة من الخروج من هذه الورطة حتى جاء الفكي عابر السبيل حاج (منزو) وهو فكي دجال فأغروه بالمال أن يعقد على ع ويطلقها في صباح اليوم التالي لتحل لزوجها الأول م (ولا من شاف ولا من دري) ولكن ما وجدته خضراء الدمن ع من حاج منزو في تلك الليلة لم تجده من زوجها الأول صاحب الحسب والمال طيلة مدة زواجها منه وأوعزت ع لحاج منزو أن يتمسك بالأرض ولا يطلق وفعلاً (حرن) المحلل منزو وكرَّد وأصبح مثلاً يضرب في كل عقدة يعجز عن حلها ولكي تبرر ع موقفها صارت تروِّج أن القبيلة التي ينحدر منها حاج منزو من الأشراف.

    • طارق أب أحمد كتب:

      و بفية الحكايه أن خالة البت جاءت لتنصحها بتغيير موقفها فأوعزت أليها البنيه ان تتطفئ النور و تنوم مكانها فالحاج يأتى بعد العشاء و يشرب اللبن و يؤدى الواجب و ينام ليصحو قبل الفجر و لن يرى شيئا ,,, و فد كان و عند الصبح أسرت الخاله لبنت أختها بأن هذا الرجل ما بتخلى لكن ما تنسى خالتك مره مره

  16. حاج أحمد السلاوى كتب:

    الأكارم ابناء الأكارم ..سلام
    الجهل بأمور ديننا يؤدى إلى أكثر من التتيس ..لأنى لا حظت خلال العطلات أن الناس قد نسوا حكاية حرام وحلال فى كل شىء..واصبح الدرهم والدينار هو المطلب والمقصد وبأى وسيلة كانت … لا يهم ..المهم الحصول عليه..وهكذا حتى وصلنا إلى موضوع الطلاق بالثلاثة ..ووصلناألى هذا العبث الذى نحن فيه ( كل العالم العربى ..ولسنا وحدنا .. ) والمصيبة أن الشخص المتورط فى هذه الشغلة سيجد من العلماء يحلل له ويسهل له الأمر ..واذكر ان والد الشيخ ( هو فى شيخ غيره ؟ ) جاءه أحدهم ولديه نفس الأشكالية..ولا يريد التتيس.. ويريد الحل لكى يعيد عواطف إلى العصمة من جديد ..ولأن والد الشيخ يعرف الحلال والحرام قال للرجل ..أنا ما شايف ليك طريقة ترجع بيها عواطف اللتك دى …لاكين أمشى الخرطوم هناك فى شيخ اسمه حسن يمكن يلقى ليك دريبات ويشوف ليك حل ..وكان فقه الضرورة .. سيد الموقف .
    وفى رأييى المتواضع .. أرى أن مادام العلاقة الزوجية وصلت إلى الطلقة التالته ..فهذا مؤشر أن هذه العلاقة لم تعد ذات قيمة ( وما لازم تستمر .. حتى لو بدوا تانى من الصفر )..والسؤال ماذا سيكون الوضع لو الجماعة ( عواطف وسعيدها ) تااااانى اختلفوا .. بعد التتيس يبدؤا من أول جديد ..ولاّ كيف الدبارة ( بفتح الدال ..منعاً للخلط )…
    البشاوى .. شعورك كان شنو ..لمّا البص أبا يقيف ؟..اظنك جريت ورا الباص وقعدت تكورك .. يا زول أقيف الحاجة لسه ما نزلت ..وقعدت تجقلب..وضغطك ارتفع والسكر نزل…والكوليسترول بقا فى السما ..وحالتك حالة … مش ؟
    قالوا سعيد عايش فى الغرب ( غرب السودان ) ملك ..مهامه محددة بالقانون العرفى ..والتعدد ..شىء طبيعى فى الحالة دى..لأنه متفرغ تماماً للأعباء الموكلة إليه..يا .. بخته !!!
    وإلى الله ايها الحائرون …وقولوا يا لطيف.

  17. سهيل كتب:

    عمنا بن برد : ابكرون بتاعنا دا علاقتو بي حاج منزو شنو ؟

  18. حاج أحمد السلاوى كتب:

    سهيل ..ودى عاوزة ليها سؤال ..ما ياهو زاااااتو ..بس مشى اغترب..

  19. بشار أحمد بشار (إبن برد) كتب:

    الإبن سهيل : إنهما متشابهان بجامع الفحولة في كلٍ .

  20. سهيل كتب:

    يعني ابكرونزو !!!

  21. البشاوى كتب:

    سهيل \\ المتحرر من القيود انت ياابنى ماتقرا جنس الكلام دة لانو بيجيب ليك لخبطة حسابات انت لسة ماحسبتها وبعدين عواطفنا من المتابعات لسوداننا والامريكان عندهم اسرار الحروب الانتهت زمان بقت افلام عدييل كدة
    السلاوى اخوى عليك امان الله دة كان انت كنت جريت ورا الحافلة ولا بتقبل غادى زى كدة — انا الا لحقونى فى نص الشارع

  22. ابكرون كتب:

    ههههههه الله يجازي محنك يا بشار…..ما تشوهوا (سمأتنا) ساااكت تقوم (هفسه) تصدق….هاج منزو ده حراشيفو….
    خلي بالك فلم عادل امام الكان شغال فبه (متيس) اظن اسمه زوجه لليلة واحده…برضو (تمنزو) اي كان زي حاج منزو لان ليلي علوي المطلقة بالثلاثة كنكشت وقالت ليه ما تطلق استمر

  23. علي سنكل كتب:

    يا بشار أظنو أبكرون ده ملخبت ! ! ! الذي أذكره أن مسرحية ” الود سيد الشغال ” والتي كانت تعرض بالمسرح القومي بالقاهره في نهاية ثمانينيات القرن المنصرم هي التي لعب فيها الفنان الموهوب عادل إمام دور ” التيس ” ، وراح مكنكش ذي الحاج منزو.
    صاح واللا ما صاح ؟ أتذكر دخلناها ” لايف ” أنا و عواطف وكانت أول مره أشوف عادل إمام لحم و شحم.

  24. ابكرون كتب:

    لا يا سنكلوني ….ده كان فلم خاص بعملية المحلل وبس وهم مجموعة ازواج منهم سعيد عبد الغني وعمر الحريري والطفهم كان محمد رضا…وهو زوج ليلي علوي وكبير في السن …وكلهم مطلقين ويتبادلون الاخبار بوجود محلل الخ…محمد رضا بعد زواج المحلل بليلي علوي (زوجته) …اعصابه بايظه ويوصي عادل امام ان لا يمسها ويطلق بدري الخ وجاء فجر….ويحاول عادل امام الايفاء بالوعد الا ان الشيطانه ليلي تغويه بانه زوجها وحلالها ….والكنكشه الياها ….ورفضت الطلاق وهو كذلك (عادل) رفض….شفت ابكرون حكاواتي كيف…..!

  25. طارق أب أحمد كتب:

    سنكل و أيكرون
    المسرحيه الواد سيد الشغال و الفلم رجب شايل سيفو

  26. بشار أحمد بشار (إبن برد) كتب:

    طارق أب أحمد : يأني يالتريقة ده الهاج بقى تيس للمراح كولو.
    سنكل / أبكرون : إنتو الإتنين صاح لأنو عادل إمام كان (مستتيس) في الفيلم والمسرحية.
    صديقي ود الخلا كان عندنا يماني في حلتنا بيحلف يقول : علي الحلال بالتلاتة بالله مش حريف؟؟؟

  27. حاج أحمد السلاوى كتب:

    الشيوخ ..الكواشف .. سنكل ..وابكرونا ..

    ” المسرحيه الواد سيد الشغال و الفلم رجب شايل سيفو.”
    شوفوا الشباب المتابعين وحافظين دروسهم كويس ..مش زيكم تقعدوا تتغالطوا إنتو الإتنين ..الواد طارق جابها من الاخر…وجاب المفيد..

  28. ابكرون كتب:

    لا يا سادة انا شي شفتو لا يمكن انساه
    الفلم :اسمه زوج تحت الطلب
    والعايز يشوفو يدخل الرابط : http://www.arbcinema.com/pen/showthread.php?t=6207

    ما توروا نفسنا يا طارق وسنكل

  29. نيام كتب:

    ابكرون:
    يعني يا ابكرونزو بس خايف من هفسة و الاعباء المترتبة؟؟

  30. خلاص متأسفين يعنى غلطنا فى البخارى ما هو كلو عادل أمام و تيوس

  31. بشار أرجع لى تعليق الرماى و بعد داك رد بالميل

  32. nono كتب:

    شبااااااااااااااااب لكم التحية/

    عجاجكم وصلنا!

    البلد دة انحنا ماعندنا فيها قعاااااااااااااد؟

    انحنا ماااااااااااعندنا طريقة الانحلل بي (بلحة)………

  33. نونو قال ليك المسطوا مشى لى الدكتور قاليهو مش غلط تحللوا الدم و تحرموا الخمره

  34. زووووووول كتب:

    طارق اب احمد سلاام
    تيوس دى يا طارق عندها معنى تانى معاى
    نونو
    لو ما فى بلحه حللوا بى مويه زرقاء

  35. nono كتب:

    المويه يازووووووول فيها

    مشكلة

    الايام

    ده؟

    ما تبخلووووا

    علينا بي بلح الدناقلا !!!

  36. الزهراء كتب:

    يا نونو
    كان الحليل بطريقة الناس الفي البوست ديل اخير نصوم عمرنا كلو
    ولو ما قدرنا نتحزم ونقع البحر
    ابكرون: قلت لي محمد رضا اكل نيم مش؟
    ناس السينما ظهروا؟ عفيت منكم ما قصرتوا

  37. بشار أحمد بشار (إبن برد) كتب:

    nono/ الزهراء : أصبرن يا بنات وهاتن الأغنيات إنشاء الله شيلتكن كلها بلح مشحون بالأوتومبيلات.

  38. ابكرون كتب:

    الزهراء: نيم بس ده اكل في خاطره واكل القوووووا واكل كسره مره….وكلو من مطاعم كيدكن

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s