للرياضيين فقط …

Posted: الثلاثاء,7 يوليو, 2009 by aflaiga in اخرى

فى زمن سابق كان معلم التربية البدنيه فى المجموعه الخاصه التى كنا ننتمى لها ( وما تسالونى هى شنو ؟؟ ) كان من الكفاءة والخبره فى مجاله بحيث تعلمنا منه الكثير من قواعد التربية الرياضيه مما اثر فى افهامنا واجسامنا حتى وقت قريب قبل ما تفك الكوره بت اللذين !! والكرش تظهر وتتدور !!! المهم فى الامر ان معلمنا ذاك وكان من احدى القبائل الحدودية المهاجره للسودان كان له مثل هام واساسى جدا استفدنا منه كثيرا وهو ببساطه يقول ( اوزن الجكه عشاان ما تقطع ) !!! ويوضح معلمنا فى المساحه التاليه انواع الجكات ومميزاتها كما يلى :

 

* يقول معلمى ان الجكه !!  البطيئه الموزونه تجعل الرياضى يقطع مسافات طويله باقل جهد ودون ان يقطع !!!

* كما ان الجكه !! السريعه تستهلك الجهد بسرعه ولا تجعل الرياضى يستمتع بطول المسافه ولا الجكه !!

* كما يؤكد معلمى ان الاهازيج المصاحبه للجكه !! تجعلها ممتعه وتجعل منها نزهه اكثر من كوها تمرين قاسى مفروض على البنى ادم فى حياتو !!!

* كما يؤكد معلمى على ان الجكه !! فى حد ذاتها يجب الا  ينقطع عنها الرياضى اكر من اسبوع لانها ببساطه ستصيبه بتمزق فى الاربطه الصليبيه !! تجعله غير قادر حتى على المشى !! ناهيك عن الجكه !!

* ويقول معلمى ان الجكه بعد مجهود اخر قبلها مضره جدا وينصح بان يكون الانسان متفرغ للجكه حين يرغب فى ممارستها !! والا فلينشغل باى مجهود اخر ويؤجل الجكه لاى زمن اخر !!

* يقول معلمى ان الجكه ! اكثر ما يجعلها مشوقه هى وزنة الجكه مع الناس الجاكين معاك فلا يمكن ان تكون سريعا وهم بطيئون لان تفاوت السرعات فى الجكه ياتى بمردود سلبى يكره الناس فى الرياضه ذاتا وقد يكون سببا رئيسيا فى ترك الرياضه او تشتت الفريق الرياضى !!

* ويقول معلمى ايضا انه يجك منذ سنوات تفوق العشرين بوتيره واحده ثلاث مرات يوميا يعنى بعد كل وجبه لكنها جكات موزونه جدا جعلت منه تواقا للجك يوما بعد يوم !!

* ويقول معلمى ان الاهتمام بالحضور الذى يراقب الجكه يجعل اداء الرياضى استعراضيا واحتفاليا اكثر من كونه للفائده فيسعى الرياضى لارضاء الجمهور ولا يركز فى الرياضه مما يتعب اعضاء الفريق ويخل بروح الجماعيه فى الجك !!

* ويقول معلمى ان ترتيب نوع الجكات بين الضاحية والماراثون والجكه التسخينيه مهم جدا ومن المهم ابلاغ كل الاطراف المشاركه فى الرياضه بان اليوم الفلانى سيكون جكه طويله او قصيره او مشى ساى !! المهم يجب ترتيب شعور الرياضى ال نوع الرياضه التى ستمارس اليوم وعدم تركها للظروف !!

ويقول معلمى فى الختام ان الجكه من اجمل الرياضات فى الدنيا لكنها من اخطرها ايضا اذا لم يقوم الرياضى بادائها بالشكل الامثل …

دعونا فى ختام هذه الكبسوله الرياضية نتناول السلوك الرياضى واختلافه طبقا للبيئات والظروف التى تحيط بالمجتمع الرياضى او الراغب فى الدخول الى عالم الرياضه …

Advertisements
تعليقات
  1. aflaiga كتب:

    انتو ما رياضيين ولا شنو ؟؟
    نبدا ليكم التعليق كويس :
    من المهم ايضا فى الجكه ان تختار شريك الجكه من حيث العمر واللياقه والبجك براهو بتعب لانو الجكه بشريك ممتعه جدا وخاصة اذا كان مكافئ وموازن يعنى :
    تلقى ليك زول شاب سغنتوتى جاكى ليهو مع راجل كبير وتعبان شديد فى انتظارو عشان يلحقو وكل مره يرجع ورا يجرو معاهو وكل مره يستناهو لمن يصل معاهو سوا .
    وتلقى ليك زول نحيف جدا جاكى ليهو مع زول سمين جدا وما قادرين يتوافقو مع بعض لانو الزول السمين محتاج لجرعات شوية شويه عشان يخفف من وزنو ويقدر يجارى الزول النحيف .
    وتلقى زول جاكى بلبس كامل فل تريننق سوت وزول جنوب جاكى بى بنطلون وجزمه وفنله وده ما كويس لانو الجكه عندها لبس معين .
    تلقى فى زول جاكى وشايل معاهو مويه صحه وزول جاكى وشايل معاهو فيتامينات ! وفى زول ما شاء الله بيجك ساى بدون اى مساعده !
    ..
    مش قلت ليكم للرياضيين بس ؟؟!!

  2. أعتاد جارنا الأستاذ على شمو على الجكه يوميا من الصافيه حتى الحلفايه
    وعادة ما يقوم أخى المشاغب بدر بقيادة السوزوكى الكبك بجواره ضاحكا ((ماشى قدام ياأستاذ ؟؟؟ أوصلك!!))

  3. نيام كتب:

    افليقا:
    ومعلمك دا ماقال ليك احسن انواع الجك هو جك الفول المصلح و عليه زيت سمسم و بصل ابيض…

  4. الزهراء كتب:

    افليقا لك التحيه يا اخي
    دي جرعه رياضيه فااهمه
    وما ننسى ان الزول المبتديء في رياضة الجكه عليه ان يقطع مسافت قصيره في الاول وكل يوم يزيد المسافه التي يقطعها حتى يستطيع الاستمرار لمسافات اطول تدريجيا
    والاهم من ذلك عدم الاستسلام لتلك الالام الناتجه عن التمزق التي تنشأ بعد اول جكه
    وايضا الاعتدال في شرب الماء قبل وبعد الجكه مباشرة
    وبعدين يا افليقا وباقي الجاكين
    ما نمشي نجك ونجي نخت صحن البووووش (الصبه)
    لازم نعتدل في غذاءنا ونركز على الطعام الذي يحتوي على الفيتامينات مثل الخضروات والفاكهه وايضا تناول البروتينات وبصوره معتدله
    اها قصرت معاكم

  5. ابكرون كتب:

    افليقا :
    واكيد معلمك ده كان بكون مبسوط (شديييييد) لمن (الجلالة) تكون مدورة ووازنة لخطاوي الجكة ويطرب عند سماع : (هوي هوي يا ام دلنج….) …و(بنيه …بنيه..ناري حيه) وخاصة عند (قلبنة) كلمات الجلالة في : (سيكو …سيكو…البتحصلو شنو ما عارف) وتزيد همة الجاريين او الجاكين في المناطق الوعرة عند سماع : (محل ده كلوووو دراب ….محل ده كلوووو دُقاق)
    معلمك ده ومجموعتكم الخاصة دي كانت في : كمبوني…او اليونسكو….او ست فله….وانا ارجح ست فله….

  6. مُخير كتب:

    العزيز أفلايقا
    الأعزاء أهل الدار والزوار
    الرياضيين والعابرين
    السلام عليكم
    والله يا ولدنا الجماهير دي إلا تجُك بالماوس بين المواقع وكدة، ههههههة
    الرياضة ضرورة أكثر منها متعة أو هواية، ونحن مطالبون أكثر من أي وقت مضى بالإلتفات إليها وممارستها ولو ثلاث مرات في الإسبوع، وأعتقد لمن هم بعيدون عنها أمثالنا يمكن البدء بالإستغناء ما أمكن من السيارات والمواصلات والمشي لمسافات طويلة، وتدريجياً ندخل في الحتة بتاعت الجكة دي، لأنو زي ما قلنا سابقاً يس براها ما بتكفي والقصة محتاجة جكة، للمحافظة على ما تبقى من رشاقة إن وجدت والقضاء على الشحوم والترهلات التي تبدأ في التراكم مع التقدم في العُمر، عموماً يديك العافية يا ولدنا والله يقدرنا ويدينا الهمة جميعاً للإستزادة من جرعات المعرفة بشأن أساليب العيش بشكل صحي والمحافظة على سلامة البدن وصيانته بالتغذية السليمة والرياضة.

  7. aflaiga كتب:

    الشباب الرياضيين صباح الخير :
    حقيقى الحركه فيها بركه والجكه مفيده للجبنه زى الخيار ..
    ابكرون : محموعتنا دى الله يرحما كانت فى تقاطع مندرا مع خور ابوحليف غرب قعر الكلب شمال المحموله جوا وار الهنكر الكبير الفاتح فى القشلاق !!! وكانو لا بسين شالات حمر وكترة حديد فى السدر !!! عرفتها ؟؟ اهازيج الجكه دى طبعا اتاسلمت مما اعطى للجكه اصاله اشبه بحفر الخندق فى زمن السلف !!! شفت التاصيل ده كيف ؟؟
    مخير : كنت اول ايام بعد العرس قاعد اخلى العربه فى اول شارع النيل واجى جاكى للمكتب واخد حمام واغبر اليونيفورم والحمد لله بعد العرس بقتره خليت القصه دى لانو بقيت انسى محل العربيه واقفه وين ؟؟!!! وبعد مرات اركب المواصلات وانسى انو جيت بى عربيه ذاتو !!! ده يكون من شنو ؟؟؟
    الزهراء : ورياضية كمان ؟؟ ماشاء الله غايتو جنس غايتو يا المنطط عينيك ..
    نيام : بمناسبة البصل الابيض قريبنا نايم وحلمان انو راكب حصان اخضر ضنبو ابيض وطابقالحنان وراهو صحى نفسو بايت فى الملجه فوق كوم خدار !!! جك الفول طبعا اهم جك وفى الجك ذاتو ..
    اب احمد : بالله على شمو جارك انا قايلك ساكن الصافيه بس عشان كده الله مديك العافيه اتارى برضو انت وعلى شمو جيران فى الثقافه !!

  8. نيام كتب:

    افليقا:
    ” وبعد مرات اركب المواصلات وانسى انو جيت بى عربيه ذاتو !!! ده يكون من شنو ؟؟؟ ” يجوز من غيار الزيت!!او يجوز من شراب الشاي بالنقنقون!!
    مخير:
    والله نحن في الامزون جاكين طبيعي …ومن جك لي جك حتي مرات من كترة الجككي بنلخبت الجكوكة…ياخي انا مرة جاكي بجك الفول لقيت روحي في صف الجمرة…قلت ليك المرطب لاقاك جاكي بهناك..اها دا جاكي لمان جاك..

  9. مُخير كتب:

    ولدنا الرياضي سابقاً أفلايقا
    شاعرنا الهدي الرضي نيام نيام
    الحلوين في كل مكان
    السلام عليكم
    قطعت مصاريني بالضحك يا نيام، قلت لي الأمازونيون كوولهم في حالة جككي علا بالغت جكة أبو عصمت المرقتو في أم طرقاً عراض، الله يجازي محنك يا نيام سمعنا بُقحة حولي، وشفقة بت ود جلي، وجوع بت الغرب، وسكرة يّني، وشدة كرياكو، إلا جكة عزت دي ما أدونا ليها إلا الليلة.

  10. aflaiga كتب:

    مخير : ما سابقا خااالس يعنى !! لحدى اسى فى شوية حيل بنجك بيهم مع حمودى كل اسبوع .. لكن عليك الله نجك فى المعايش ولا فى شنو ولا شنو ؟؟ بالله السمعت يهم ديل نزل بيهم بوست طوالى ( قحة حولى – شفقة حفيدة جلى – جوع بت الغرب – ونعنشة ينى – وشدة كرياكو )

  11. البشاوى كتب:

    الشقى افليقا
    انا غايتو اتأخرت شوية فى الجك معاكم يمكن اللياقة تعبانة شوية !! لكن بينى بينكم كدة موضوع الجكة بمعنى الجرى والرياضة ماوقعت لى لانو اخونا افليقا دة مازول جرى عدييييل كدة — وعندى سؤال سغنتوتى كدة زى مابيقول السلاوى هل ممكن نعتبر نوع الجكة المذكورة اعلاه والتى تشير الى ضرورة توافق الجاكين من حيث العمر والحجم ونوع اللبس هى مؤشر لى سعيد وعواطف فى الماراثون الابدى الجاكين فيهو دة يعنى ياأبكرون ورينى ياتو نوع من الجلالات ينفع للجكة دى ؟ وياتو لبس ؟ وياتو مضمار؟

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s