جر شخيت واقيف بعيد ..

Posted: الأربعاء,8 يوليو, 2009 by aflaiga in اخرى

حين يرغب احدنا فى ضع نهاية لشيئ ما يستخدم الكثير من الالفاظ التى تدل على انه وصل الحد ويرغب فى انهاء هذا الشيئ الذى اتعبه جدا جدا ويختلف التعبير من بيئه لاخرى دعونا هنا نتناول بعض  التعبيرات التى تعنى رغبة احدنا فى انهاء وضع ما اتعبه :

هو : يعنى لو مرقنا الليله برانا مالو فيها شنو يعنى طوالى اختك الحقنه دى مارقه معانا ؟؟

هى : هوووى لحدى هنا واستوب !!! مرقه ما معانا ..

ودى كانت بتتقال زمان طبعا اسى بقو يقول ( هووووى نحنا لينا اسبوع بره البيت مش كفاية كده ولا نديها يومين تانى ؟؟ ) !!!!!

—–

الجاره الاولى : هوووى يختى جرى شخيت واقيفى بعيد لحدى شحدة الخلاطه وكفاية ما فاضل الا تقولى لى لو عندكم منقه ذايده نخلطا بى خلاطتكم دى !!!

وده طبعا بقى اسى بعد الجيران بقى البينم البوبار وبس مش زى زمان كان الواحد ما عارف هو ود ناس منو من كترة ما البيوت فاتحه فى بعض !!!!

—–

هو : قبلك –  قبلك – ماشى وين خزن بره ما مرخس وما عندك رخسه وخاشى اتجاه واحد عامل جيبك الكبير ده !!!

وتقال عندما يحس بتاع الحركه انو قروش سماية بتو طلعت منك خلااس !!!

—–

هو : شوفى يا مره والله  انا ما قادر احس بوجودى فى البيت ده فياخى لحدى هنا وكفاية اى زول يشوف الجنبه البتريحو !!!

وسرعان ما يكتشف انو الجنبه البتريحو هى الجنبه البتتعبو ذاتا !!!

—-

كسره : صديقى س قاعد فى المسجد بتاع الحله قام امام المسجد قال :

الامام : يا جماعه والله فى زول رجل بر واحسان متبرع لاى زول يعرس التانيه بى 5 مليون جنيه ..

س : عليك الله يا مولانا شوفو لينا بيدى الزول البيستحمل الاولى كم ؟؟؟

Advertisements
تعليقات
  1. التلب كتب:

    أفليقا
    السيناريو الشغال فى السودان ده متعبنى شديد.
    وقفنا بعييييد و جرينا شخييط ما نفع…وقفنا في الزلط و إتكلمنا غلط برضو ما نفع…. نعمل شنو يا جماعة؟؟؟
    ما تقول لى أعمل نائم!!!!

  2. aflaiga كتب:

    التلب : مشكور على المرور ووينك يا مان ؟؟
    اقول ليك اعمل نايم كيف يعنى دى ما دعوه صريحه للكسل والخمول انا بقول ليك اعمل انو ده ما انت يعنى اعمل رايح .

  3. البشاوى كتب:

    افليقا والتلب
    الله يكرمكم ياجماعة ورونا الشخيت دة ياتو ؟ شخيت رسمى مصرح به من السلطات ؟ ولا شخيت زى قرينتش كدة مجهجه وماليهو معارف ؟
    بعدين الراجل الساكن فى الجامع دة يابخت مراتو دخلتو الجامع وهى اتوهطت وقعدت فى البيت تأمر وتنهى !!!! انت قاصد الانقاذ ياإبنى ماتوديناش فى داهية !—

  4. حاج أحمد السلاوى كتب:

    الأخ العزيز .. التلب ..سلام …
    غيب وتعال تلقانا نحنا ..يانا نحنا ..
    بسيطة ..من الإصطلاحات والتعبيرات ( الراقصة ) فى السودان الحديث ..طنّش تعِش..شو بدك أكتر من هيك ؟

  5. ياسين شمباتى كتب:

    افليقا والاحباب..سلام..

    ومن التعبيرات الدالة على الحصار والخنقة وانو الزول دا متعب حنان حنانك ذاتو(دا وقف لى فى الزرارة الاخيرة),,زى الجماعة ديل!!!!

    لكن والله المستحمل دا حقو يدوهو 10 مليون عديل كدة..

  6. aflaiga كتب:

    ود الخلا : شفت الزول الكان عميان وفتح شاف الفار وغمد تانى وبقى اى شيئ يقول ليك يعنى بالنسبه للفار قدر كيف ؟؟؟!!! بس ده سؤالك ظاااااااااتو !!!
    لكن يا عمنا الانقاذ دى ما جنبه واحده ؟؟ الانقاذ دى كل الجنبات يعنى الا وقافى !!!

  7. لا حولالالالالالالا يافالقة بالغت لكن ياخ …. ديل الناس البجرو لاين وبقيفو بهاين والناس البياكلو الفول فى الشوارع وشنو شنو ….. ياخ زولك دا يجيب لى الخمسة ملايين (الا هى خمسة بالقديم ولا الجديد ؟ ) وانا مستعد استغنى عنهم الاتنين …. هو فى زول قادر ينوم عليك الله عشان يشوف ليهو جمبة مريحة ولا بريحة حتى

  8. ياسين شمباتى كتب:

    الاخ عبدالفتاح ابراهيم..سلام والف مرحب بيك وسط اهلك ودارك..

    ولدنا افليقا عملتو (فالقة) عديييل كدة!!! بعدين ذكرتنا صديق قديم اختفى وما عارفين ليهو اتر,اسمو(محمد الزهج خلااااص)..تحياتى وما تنقطع..

  9. التركــــى كتب:

    هههههههههههه شكرا ليك زميل شمباتى …. بس ماعرفت معنى الاسم افليقا …. اتمنى ان اكون دايما هنا وتحياتى لزميلكم (القديم) محمد

  10. حنين كتب:

    يا عبد الفتاح إباهيم إنت ياكا التركى زاتك ولا أى واحد براهو . على العموم مرحب بيك تانى إنابة عن كل المدوناتية .
    أفليقا . والله الزول البيصبر على الاولى دة مفروض يدوة جايزة أحسن صابر ..

  11. أخخخخخخخخخ صحيح انا عبدالفتاح ذاتو واتمنى انى اكون واحد منكم خاصة بعد ترحيبكم الحار دا … ربنا يقدرنا على مسايرتكم والاستفادة من مواضيعكم الجميلة دى

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s