للصنايعية فقط ..

Posted: الأربعاء,15 يوليو, 2009 by aflaiga in اخرى

بعد ان تناولنا الرياضه بمفهومها الواسع فى بوست للرياضيين وتحدثنا عن الجكه وتعريفها وانوعها . نهبش كمان الصنايعيه :

صديقى س من الصنايعية القداااام جدا ووصل لمرحلة فى تمييز العربيه من حيث الجوده والمتانه متقدمه جدا حيث بنظره واحده فاحصه يمكنه ان يقوم باعطاءك تقرير شامل عن العربيه ومن اقواله المشهوره حين طلبت منه المشوره قبل ان ارتبط عفوا ارغب فى شراء عربه :

* شوف يا افليقا لو اتكلمنا عن العربات فى  حاجات مهمه جدا لازم تلاحظ ليها :

اولا يا افليقا البودى من بره لازم يكون مقبول وما   فيهو اى سمكره ولا بوهيه ولا معجون قايم لى فوق والبوهيه بتاعة الشركة مرغوبه جدا اى نعم فى عربات ما مهم بوهية الشركة لكن البكاسى بالذات بوهية الشركة مهمه جدا جدا طبعا فى عربات بتترش فرن وما بتتميز بسهوله انها – مرشوشه – لكن الشركه واضحه والمرشوش واضح !!!

ثانيا يا افليقا المكنه ودى مهمه جدا مع انها عند بعض الناس ما اساسية ما داام البودى متين – المهم فى المكنه انو لو عاوز تميز المكنه الكويسه من الكعبه راجع العادم بى ورا وشوف الدخاخين وافتح غطاء المكنه وشوف رافعه زيت ولا لا وشوف المكنه لو مخرخره زيوت بالجنبه ولا لا وممكن تسوقا تطلع بيها محل عالى تشوف الكبس والجر بتاعا كيف لو طلعت معاك العالى معناها عربيه عاليه !! ولو ما طلعت معاك معناها عربيه واطية  !!

ثالثا يا افليقا الحديد الكورى الجديد ده طبعا ما زى القديم لانو ما عندو شاسيه واهم شيئ فيهو الاعمده والركب والتكييف والبودى من بره والفرش وعدد الكيلوات المشاها كم ؟؟

رابعا يا افليقا عشان تشترى اول شيء فى حاجات لازم تعرفا :

* الحديد الكورى مريح فى الصرف وراقى اجتماعيا لكن عمرو قصير وما بينستر معاك فى المواقف الصلبه .

* الحديد القديم متين لكن شكلو ما راقى وبيودى المنطقه كتير مع انو اسبيرو رخيس .

* الحديد طويل العمر غالى الاسبير زى المرسيدس والبيجو واليابانى عموما ده حديد متين لكن عندو مشاكل فى الاسبير غالى وصنايعيتو ذاتم شويه .

* فلو عاوز تشترى حديده يا افليقا شوف ظروفك انتا شنو يعنى لو عندك اسره كبيره !! لازم تشوف ليك بوكس من الحديد القديم عشان ينستر مع اهلك .

* ولو اطرفاك شوية ويتيم وما عندك مواجبات شوف ليك حديده كورية انت والحنان بتاعك لانها بتنستر معاك انت وبس وبتريحك ومكيفه ومفروشه سمح .

* ولو عاوز مصاريف من العربيه الراكبا اقع الامجادات لانها عالامت زى المره الموظفه بتدخل ليك لكن بتشيل زمن كتير منك عشان تلقط بيها رزقك !!

* لكن يا افليقا لو عاوز نصيحتى احسن من ركوب المواصلات مافى يعنى الجابرك شنو تخشس ليك فى عربيه وتبدا بعد داك مشاكل الاسبير والميكانيكى والوقود خليك مفتح واركب المواصلات ريح بالك لا حوادث لا كب بنزين خمسمية جنيه توصلك وخمسية ترجعك !!!

* اما لو انت راكب لكن تعبان وعاوز تقايض اوع تقايض قديم بقديم يعنى ما تفك ليك عربية سكند عشان تخش فى عربيه سكند !!!

اها يا شباب بالله رايكم شنو فى انو الزول يمتلك عربيه فى الاساس ؟؟؟

ورايكم شنو فى المقايضه بعربيه تانى او الحفاظ على العربيه القديمه ؟؟؟

وشنو قصة الاسبيرات  الجمارك الغاليه الفرضوها على العربات الجايه من بره دى وهل ده بيساعد فى تسويق العربات الجوه البلد !!!

Advertisements
تعليقات
  1. semsema كتب:

    عمنا ود الخلا : السلام عليكم
    انتو البحر دا بتريدوا عكارو ما لكم يقول ليك صنايعية تقول ليهو شنو ما بعرف داك طبعاً هم الناس الغلابة نحنا دايماً مهاهم وبنشيل همهم لكم دايماً انتو ملحقننا جنس حاجاتكم دي وطعم القراية يكون سمح تلحقوا ركعتكم الفايتا ونكون لقينا الطعم اللاذع في النهاية اسه الناس الغلابة ديل كان ما زي ناس افليقا عبروا عنهم البعبر عنهم منو؟ ونحمد الله الصنايعية في الورش وتخلونا نحنا لجنس دا

  2. ابكرون كتب:

    هههه….. امانه ما وقع زووول…ياخ قولها ليه (براااهه في أدااانو) ..انت ماعرف سمسمه دي (دليل يمين بوزن الخطوه..وإسفيرية من الطراز الأولِ)

  3. ابكرون كتب:

    انت ما عارف

  4. الزهراء كتب:

    سمسمتي والله عفيت منك الناس كبت الجرسه عدييييل
    وصحبك عمل حمد لبد لكن هو ما عندو ذنب خففي عليه شويه
    ابكرون: ادينا رايك
    افليقا: اها الدركسون احسن يكون هايدروليك ولا هوا. والكلتش يكون سلك كيف معاك
    بعدين عندي ملحوظه اصحاب افليقا ديل كلهم اسمهم (س) ياخي غيرلينا شويه ص ولا ع ,اضعف الايمان نقطا لينا
    لكن العربيه دي ضروريه شديد
    مسئولين من الخي يا خوانا رايكم شنو في سواقة البنات؟
    يا نونو,سماسم,سمسمه,الغبشه
    اجهزن للكتااااحه

  5. سسسلام افليقا …. ياخويا جربتو كله ومانفع يقولو ليك غير لموديل اعلى لمن تصل السقف تقعد على الحديدة تبيع وترجع حليمة لقديمها … افضل شئ المواصلات او خ11 …. جمارك الاسبيرات دى حكاية غريبة ناس تمشة تجيبها صحبة راكب تدخلها بدون جمارك واخرين يستوردوها يدفعو حسب ظروفهم (علاقاتهم) الاجتماعية ….. وبينى وبينك بت البلد اقصد عربية البلد زيها مافى بس اليوفروها لينا بشروط معقولة ومقبولة … لك التحايا

  6. الزهراء كتب:

    ود الخلا: ارجاني امشي اجيب ليك اريل النونو واجيك اصلو بيخفف الحمى
    الما بجيب الحمى شنو وانتو قاعدين على الهبشه والكتراابه تقوم
    كر علييييينا

  7. الزهراء كتب:

    التركي: مرحب بيك يا اخوي وما شاء الله داخل بقوه
    عاد كان جيت للعلاقات الاجتماعيه والمحسوبيه وغيرا دي هي الودتنا لي ورا
    وخلت المصالح تسيطر على الناس
    وكل الناس ماشه بتتمحلس للشخصيات الكبيره البارزه حتى لو ينسوا اصلهم وكرامتهم.

  8. الزهراء كتب:

    وده يا التركي داير ليه بوست كااامل قصة المصالح والسعي لخلق علاقات اجتماعيه مع ناس المصالح والقرار

  9. ابكرون كتب:

    ولاااااهي يا بتنا يا زهرا ء نادية …رأيي قلتو فوق…في سبب العفارة …اما المسكين افليقا …تفتكري هو قاصد المنطقة الصناعية ذاتها..؟البأكد لي الإحتمال ده لبدتو دي…مسكين البوست ده جاب ليه الهوا زي السره ديك.
    سواقة البنات او النسوان : في ايميل رسلتوا لناس المدونه واحده بتغير لستكها الضارب خلي العندو ايميلك يحولو ليك…تلقيه مع الغبشة ونونو وسهيل الخ …وكذلك فديو آخر قبل فتره عن واحده بتحاول تعمل باركنق ….

  10. nono كتب:

    طبعا يا الزهرا ء يااختي

    انا الايام دة مبركنة سيارتي ((البريوس))

    لمن اجيكم بي رواقة نشوف الحديد دة اخبار شنووو؟

  11. nono كتب:

    يا السايق الفيات قم بي اخد سنده
    ****************************
    بالدرب التحت تجاه ربوع هنده

    *****************
    أوصيك قبُل تبدأ

    ***********************

    سيرك في الطريق السابق الرَّبدة

    ****************************
    منك بعيد جبدة

  12. سهيل كتب:

    انا بقترح يا إسترايكر و باقي الشباب إنو نعمل مدونه جانبيه للشباب فقط بباسويرد عشان ناس افليقا وود الخلا ياخدو راحتم على الآخر .. يعني ( ديوان) نقييل فيهو براااااانا في الحوش الوراني ….

    – تانيآ : صديق افليقا (س) دا مالو ؟ كوييييس و عاجبنا وكان نقطو برضو عااااجبنا ..ولا شنو يا اب احمد ؟

    – الله يستر الناس دي كوووولهل الحمى طلعت ليها في راسها ولا شنو …. التقول شغالين في البرج ..

    حالتكم تحنن

  13. ابكرون كتب:

    افليقا قال :
    (اها يا شباب بالله رايكم شنو فى انو الزول يمتلك عربيه فى الاساس ؟؟؟

    ورايكم شنو فى المقايضه بعربيه تانى او الحفاظ على العربيه القديمه ؟؟؟
    ———————————-
    والله يا افليقا : السكند هاند بهد الحيل…يعني احسن تشوف موديلات حديثه غير مستهلكه واياك اياك والمقايضة..
    اما عدم امتلاك عربه في الاساس احسن شي خليك بتاع ركشااات ساكت ومره مره امجادات

  14. الزهراء كتب:

    شكلي كده حأعمل زي خالد مدني
    الحكايه قلبت وجااابت ليها حساسية حروف مع انو ماا قصدنا حاجه
    النونو بجيك ياغاليه

  15. شكرا يالاخت وداخل بقوة لانى جيت جاكى كنت بهنااك عند ناس المنتدى التانى وقلت النديكم غشوة كدى قبلما يفقدونى يمكن ارجع تانى … بس لو اتطرقتو لموضوع المحسوبيات والناس الفووووق يمكن زيارتى تطول … لك التحايا

  16. طيب ياابكرون رايك شنو فى الكورى
    حنين وجديد ومريح تماما فى المطبات وفرشو مبالغة – وكمان عمرو الافتراضى سنتين بالكتير وتغير وتركب الموديل البعديو .
    مش احسن من اليابانى البقعد 20 و25 سنة .
    زى البكاسى ال 78 والسيوبر ال 81 لحد اسا ماشا !!!!

  17. nono كتب:

    الحارة؟

    المديدة؟؟؟؟

  18. nono كتب:

    موووووووية؟

    ليها؟

    وعايزة؟

    سخنة؟

    الماكنة؟

  19. الغبشة كتب:

    قلت لى هديد يا ابو هديده؟

    نونو:قلت لى كيف؟مبركنه شنو؟
    الزهراء:فى حاجه بتسويها عواطف ما بتكون تمام؟

    افليقيا:الرد على سؤالك الخير انو من المفترض يساعد على تسويق الجوه البلد ولكن؟
    والى لقاااااااااااااءءءءءءءء

  20. الغبشة كتب:

    التركى:ماقلت لى انت تركى من قرية مهند ولا أسمر ولا خليل ولا ولا منو؟؟؟؟؟؟؟؟؟؟؟

  21. زووووووول كتب:

    افليقا سلاااام
    نحى الروح الصنايعيه ونحى شعور ود الخلا الراقى بالمناسبه نفس الملامح والاستنباط انا برضو اتخيلتا الحاجه دى يا ابكرون (مع الاعتذار لاخوات نسيبه ) .
    المهم يا افليقا الزووول يرفع كرعيه ان شاء الله بعربيه قعونجه زاتو لانو الخرتوم دى دايره كدا .
    اما الجمارك دى الله يكضب الشينه ديل يا اخ لا يشبعوا لا يقنعوا كل ما تفرق معاهم يضربوا الكوندشن وياكلوا المندى ويزيدوا الجمارك والاتاوات وكمان ناس المحليات ديك اسكت خليهم شى عوائد وشى نفايات وشئ خدمات بعدين يا افليقا ناس الجمارك والضرائب والمحليات ديل شغالين مع المواطن الغلبان بفهم الايه (حتى يعطوا الجزية عن يد وهم صاغرون ) ولو مكضبنى انقرن معاهم الله لا قرنك قول امين .
    بعدين انت يا افليقا موش الرسول صلى الله عليه وسلم قال : لقد تابت توبة لو تابها صاحب مكس لغفر الله له ) وقال العلماء ان المكوس هى الضرائب والجمارك وحركات المحليان بتاعة التركيه السابقه دى .
    تتخيل هسى لو ما الجماعه ديل كان سعر العربيه دبل كاب اخر موديل ما يحصل 30 الف جنيه والكورى داك اسكت خليهوا كان يكون الاكسنت بى 20 الف ومعاها اى تن هواده كمان .

  22. حنين كتب:

    أفليقا الزايغ من فراشو وباقى المدوناتية الكرام .
    سلام .
    يا إسترايكر إنت كوركت لى ولا أضانى جابتو لى ساهى .
    والله ياأفليقا آآخوى سؤالك منطقى لكن باقى لى الزول أخير ليهو يسعى ليهو عربية حتى لو هكرة وقالو فى المثل كل زول بيعرف سواقة عربيتو . أخير من التلفت فى الشوارع ووالمعابنة لى عربات الناس ولى تقيف فى الشارع ترجى المواصلات .
    إنت ياأفليقا ما قلت البوست دة للصنايعية فقط الدخل الماصنايعية شنو .
    وين ياجماعة الخير عمنا السلاوى ما يحدد لينا موقعو الجغرافى ووين دكتور عزت نعلو طيب .

  23. هههه غبشة انا تركى بس من يامبيو …. لك الود والتحايا

  24. nono كتب:

    يا استريكر انحنا !!

    عندنا؟

    Proposal ؟؟؟

    معا ناااااااااس كيدهن دايرين لينا مدونه جانبيه بباسويرد عشان ياخدن

    راحتهن في الونس بتاعتهن على الآخر ..؟؟

    يعني ( ديوان) يقبل فيهن برااااااهن في الحوش الوراني ….

    عشان مانخش في ؟

    سين؟

    جيم؟

  25. aflaiga كتب:

    نونو : ديوان جانبى شنو ؟؟ انتى القلتيهو فى ديوان الرجال تانى عندك شيئ تدسيهو ؟؟ قولى ساى يا بتىاعتبريهو ديوان اخوات ستريكر !!!

  26. سهيل كتب:

    والله ماشاءالله يا خالد مدني .. بقى عندك مقلدين و كورال و شيالين … بقيت ظااااااااااالم ترم تراترارارا

  27. ابكرون كتب:

    يا كُسير عزه :عندنا proposal (طابور النونو) :
    المدييييييييييييده الحاره…يا دوب كلام الساعة 2 وشوي وقع ليك…!

  28. طارق أب أحمد كتب:

    يا افلى ما وضحت الحته بتاعت لامن تخت التمانيه و سبعين مع القولفايه و تخش فى هوندايه
    ع رجع بى كامرى من آخر يدو و مدخراتو كل ما يفلس يدخل الدلاله و يمرق بى موديل أقل و كاش نوع أقل و كاش آخر عهده بالدلاله شوهد مارق بى ماكينة خياطه و خمسين ألف

    يانونو
    الزمن
    دا
    البروبوزال
    دا
    بودى
    لى
    سين
    و
    جيم
    و
    نوووووون

  29. بشار أحمد بشار (إبن برد) كتب:

    عفيت منك يا بنيتي سمسمة حتى تمريرات أفليقا الأسكرو القالشة بتستلميها صاح .
    أفليقا : الباشمهندس صاحبك ده ما ورَّانا مساويء ركوب المواصلات العامة؟؟؟

  30. aflaiga كتب:

    الحلوين الراكبين والماشين كدارى والبيحبو حبوان سلامات ..
    عم بشار : صديقى س ده عمرو ما ركب المواصلات كلو كلو !!! كان زمان بياجر عربات لمن يكون محتاج لمشوار ومرات مرات لمن يكون ما عندو حق الايجار كان بيشد ليهو اى عربيه ( مدوره وناسين مفتاحا ) وحتى لو ما ناسين المفتاح فهو زول صنايعى بيعرف كيف ( يفرتق الخزنه يطلع السلوك بره ) ويدور يبقى مارق !!! غايتو مع س صديقى ده زمان الا كان تشيل معاك المكنه البيت وتخليها بودى بس !!! اها قام صديقى س ده لمت فيهو عربيه يوم جايه ماشه بى شارع الورشه ما شاء الله :
    ثبات فى الارض ميه ميه
    بوهية شركه
    مويه منقطه بالعادم
    فرش ميه ميه وجلد كمان
    لساتك جنوطه كرت كرتونه مافى غسال ولا بنشرجى مد يدو عليها لى الليلى !!
    طوالى قام قطرا وعرف محل بتقرش وين ومشى لى سيدا اشتراها منو ومن يومتا بطل الايجارات والشدات وبقى زول بى حقو ومحافظ على كل من :
    الزيوت
    الفلاتر
    الفرش
    الغسيل
    وما بيديها شده لى اى زول ولا بياجرا !!!
    ورابط فيها انذار ختيييييييييييييييييييير !!!
    وجاييك عشان اوريك صديقى س ده قاعد يسوق عربيتو كيف ومحافظ عليها كيف والاشكالات الظهرت فيها شنو ؟؟

  31. سهيل كتب:

    صاحبك (س) دا سايق L200 ولا شنو؟

  32. semsema كتب:

    افليقا ربنا يخليك لينا ونفرح بيك يا زينة ونفرح بي مجايبك لينا
    ويديم الفرح لينا ونسعد في بوادينا وتكبر لي عيالنا
    عُشرتك بيها طعم حياتنا يابونا ويا سمحنا البيكا ختمنا وابتدينا

    اهديك احدى روائع خالد شقوري (بتصرف)

    ابقى واصل

    لـيـــــــنـا واصــــل يـا حـنـيــــــن وابـقـى واصل
    الــدرب قـــدامــك أخـضـــر والوداد البينا واصل
    والعيون الفى انتظارك شوقها زي مطر الفواصل

    ما فى اروع من رسائل تحكي بي تحنان فصولا
    ما فى أجـمــل مــن مـقـاطع انت بالأشواق تقولا

    بـيــن حـكــايـاتى السعيدة قصة من أشواق فريدة
    جايـه لا لـون لا ملامـح زى نجوم طاشه وبعيدة
    لا هى غـنـيـة ولاها منية ولاها إحساسات جديدة
    ما الـبـحـسـو مـع عـيونك حاجة اكبر من قصيدة

    كلـمـة مـنـك لـو تـعــاتـب أغـلى من كل الغناوى
    والـبـتهمسو بين سطورك عندي بى كل الحكاوى
    الـحروف الفى انتظارك رافله فى الزى السماوى
    عـارفه إنـو الـغـنـيـة غـيـرك يا حنين ما بتساوى

    كســـــــــــــــــــــــــــــــــــرة
    ــــــــــــــــــــــــــــــــــــــــــــــــــ
    كسير دا كيييييييييييييف معاكم يا ناس سوداننا بس اوع تجيبوا لينا الهوا نحنا بديل العربات والموديلات دا ما بنقدر عليهو خلونا في البلدي الولف الكتال
    انتو الجياد دي مالها ؟

  33. semsema كتب:

    تصحيح
    كسير التلج دا كيف

  34. aflaiga كتب:

    سمسمه : وانا بهديك احدى روائع شاقر خلودى :
    انسى موضوع الدلاله ده ما بهمك
    وقت اغير اى حاجه ما بغير اصلو ريدك
    وقت اقايض اى حديده بى جديده
    ما بقايضك انتى ما انتى الوحيده
    وكيف اقايض وانتى ملكى ويانى ملكك
    واصلو ورقك ذاتو محجوز فى حياتى
    وما فى زول بقدر يوثق عقد بيعك
    اصلو سيل الريده عاتى
    لو ابيعك ابيع حياتى وذكرياتى
    وابقى اورنيك دون جمارك وما مرخص
    اصلو ورقك ممضى بى دمى وعيونى
    ما تخافى كل عام بارجع ارخص ريدتى ليكى
    مهما ذادت فى رسوما وفحص الى صعب عليكى
    برضو بتجاوز وارخص ما الولف والريده ليكى

  35. سهيل كتب:

    حرم نسقف علي كده

  36. غايتو
    وجنس
    غايتو
    ابقى مارق يا سهيل يااخوى
    دى
    شعر
    ماعندك
    راس ليهو

  37. طارق أب أحمد كتب:

    تصريح خطير من شيخ القبيله الخلوى
    ((ما شفت الشعر البيجبوهو في الفضائيات كدعاية للشامبوهات والشنو ما بعرف داك ، لمن ينكشح كده زي المياه المسكوبة في الهوا،،،،))

    آآآهااا يعنى إنت بتذاكر من ورانا!!!!

  38. حاج أحمد السلاوى كتب:

    الدينمو .. أفليقا ..والدينموية ..سمسمة..
    أنا غايتو رسلت مجادعات قصائدكم دى لعواطفنا عشان يبقا ليها درس عصر .. يمكن نحصل ونسمع منها حاجات زى دى..وعينى بااارده على نشاط عواطفكم اليومين دول…وعشان كلامك دا يا أفليقا حقو يرخصوا ليك مجاناً…بدون رسوم ..وهنيئاً لكم وربنا يديم المودة والمحبة بين كل عواطف وسعيد .
    -وإنت يا سهيل ( يا مستجد ..إنتباه ..) شهراً ما ليك فيهو نفقة لاتعد ايامه ..بس اقرا وذاكر كويس من شان لامن تلم على عواطف تعرف كيف تتعامل معاها …أهو برضو درس عصر مجانى ..وقالوا فى المثل .. الفى البر عوام .
    – أخونا الكاشف الصغير ( تحت التدريب ) المستعرب الخلوى ..يعنى قاعد بتذاكر من ورا المجموعة زى ما قال جارك ( اخونا الأصغر ) أب أحمد ..وتأملت الإعلان لحد ما وصفتو أحسن من الإعلان زاتو..بس فى سؤال سغيرووووونى محيرنى ..الشعر البيجيبوه فى الإعلان دا طبيعى ..ولاّ حاجة تانية ؟

  39. ابكرون كتب:

    جمعه مباااركه :
    عالم دمعتها قريبه بشكل
    إهئ إهئ
    ——
    بعدين ولدنا سهيل ده خلوووه لسه ما كمل حب يا دوب في سنه تانيه بدري علي الامتحان خلوه يذاكر كويس ما تدفروووه ..هو خايف يمتحن من سنه تانيه يقوم يدق الدلجه…خلي شمباتي يديك دروس تقويه….كان ما نفع اعمامك جاهزين مدارسهم متعدده

  40. علي سنكل كتب:

    السمار الأعزاء
    أفليقا يا مفتاح الونسات سمسمتك بتكسر ليك في التلج ونحن نكسر لسماسمنا في التلج والمويه برضها يقولو حاره.
    ود الخلا أب أحمد قابضك بي جوكرين. أيوه يا أخي كلمنا شويه عن الشعر والرقبه.

  41. ابكرون كتب:

    سنكل : جنوح ود الخلا للشَعر والشِعر والتالته الما عايز يقولها والرقبه كلاااام ساكت عشان الانتخابات زي ديمقراطية ناس المؤتمر…حمى شديده وهضربه ود الشيخ طايره ليه في راسه ما شايفه قال ليك : (كمان بس اصبري لي ليهو)… انت يا سنكل خليت كوم الفواتك بقيت عواتك ؟؟؟هههههههه

  42. علي سنكل كتب:

    لا والله يا أبكرون أنا لسه فواتك حاشاني من العواتك.
    لكن ود الخلا إختار الوسطيه وهي خير الدين والدنيا.
    واللا شنو يا هندسه ؟ من غير قبليه؟

  43. طارق أب أحمد كتب:

    عارف يا أبكرون
    بمناسبة الأنتخابات ود الخلا يقوم يعمل حركات و يقول إنو الأسم فى الأصل ود الخليوى أى السيار أى الموبايل اى او أقصد إنو أسمى أصلن موبيلسون لكن مع العربنه بتاعت الجامعات إنطرينا نغيرو لكن لو ا فزنا فى الأنتخابات حنرجع الأمور زى نظام عادى و كدا

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s