ود الزبير – شلت روح الدانقات ومشيت ..والباقين كمان .

Posted: الثلاثاء,21 يوليو, 2009 by aflaiga in اخرى

العزيز الشاب الخلوق الراقى الشفيف ود الزبير مثله مثل من يفتقدهم الناس لانه يفتقد الناس حين يغيبون – غاب عنا فى الفتره الاخيره وترك فراغا ظاهرا للعيان لا يملاه الا هو فود الزبير كما تعلمون تفاحة وفاكهة الموضوعات يخرم بالموضوع متى شاء ويعيده الى مساره متى شاء ويمكنه ان يخلق شكله ودية تعيد الغائبين وشكله اخرى دورية تغيب العائدين !! باله عليكم الم تفتقدوه ؟؟؟ والسؤال ايضا ممتد عن كل من :

كنانى –  الشال رقة وشفافية الدنقات ومشى .

عبدوش – الذى شرفنا بالزياره قبل قليل وعاود نشاطه وسيتداخل معكم بعد قليل .

الزووول – ويبدو ان الصدمه المريخية قوية !!

سماسم – مع انو الايامات دى مافى تطعيم !!

السعيد – ما ورانا اخبارو !!

بروسيسر دوم – قاطع خبر نوهائى .

وكل الناس الحلوين الغابو عنا على سبيل المثال – ابو محمد – فوكس – الحرامى – ساره – معجبة – فنجان – بت بحرى – همسة شوق – محنك – والجميع بدون فرز …

 

 

Advertisements
تعليقات
  1. عبدوش كتب:

    ورجعنا تاني وتاني تاني ….
    سلام ليكم والله قاعد في الكيبورت عشان اشوف حروف تعبر عن شوقنا ليكم بالجد الزول ما عارف يقول شنو وفي شنو طبعا كالعادة جينا داخلين توووش وما قرينا كل المواضيع السابقة اكيد فاتني الكتير والمثير ..
    وكيف صحتكم وخاصة البروف والله شوق ما ليه حدود يا بروف وكل السمحين..
    طبعا ما من حقنا نسأل عن الغايبين لانو انا منهم (كنت) … لكن انا كأول غايب (جمع) ادعوا لتكوين منظمة (اشواق بلا حدود ) … تضم الغايبين الطولوا علشان انا مجرب الحكاية دي
    سلام وحتى نلتقي

  2. نيام كتب:

    طيب افليقة انا حاعرف اجيبو ليكم من قرونو …
    قال ليك في واحد جعلي غايب من البلد سنين و امو تبكي عايزة تشوفو جوابات مافي رد تلفونات مافي رد فاكسات المهم …واحد مسطول سمع القصة قام جا للحاجة قال ليها اجيبو ليكي تديني شنو؟قالت ليهو اديك مية جنيه!!!
    بعد اسبوع الراجل جاء مقلع؟امو سالتو قالت ليهو الجابك شنو ؟قال ليها في واحد قال لي بتك نفضت ايدها و كل يوم في بلد؟امو قالت ليهو هو انت عرست؟قال ليها الله !!!والله دا كان كدي مقلبني!!!
    فيا ود الزبير الدانقا نفضت ايدها!!!ياخ افتح تلفونك !!!

  3. حاج أحمد السلاوى كتب:

    الدينمو ..ولدنا أفليقا ..
    لا تنسى إنو ودالزبير كان الألفة فى يوم من الأيام..ومشى من غير ما يعين بديل أو خلف يحل محلو …وسألنا عليهو فى الموبايل لقيناهو لا يرد ..إتبرع أخونا أب احمد وأفادنا بأن ودالزبير موجود وبخير وصحة جيدة ..
    ولدنا.. حفيدنا عبدوووووووووووشششششش .حمداًص على السلامة.. طولت الغيبة …لعلك بخير أنت وجميع الأهل اللى تركتهم فى ديار عبس ؟وإن شاء الله مواصل معانا شوية قبال تدخل الغابة مرة تانية ..
    أشواق بلا حدود ..أوع تكون دى منظمة إرهابية ؟..سترك يا رب .
    الدينمو .؟. إذا عندك أى ارقام هواتف للغائبين ..أرسلها فى الإيميل خاصتنا وسوف نجند كل الطاقات للبحث عن المفقودين…إتفقنا ؟؟؟

  4. nono كتب:

    عبدوووووووش /حمدلله علي السلام

    البقية تااااااااااتي؟؟؟؟

  5. بشار أحمد بشار (إبن برد) كتب:

    إنتو يا جماعة القصة شنو أصلها الخرطوم دي بقت هونغ كونغ واحد فيكم يختف رجلو ويمشي سيدي بيه ويورينا الحاصل شنو؟؟؟

  6. عبدوش كتب:

    بشار والجميع : لان فى الدانقات شيوخ قبائل قام الزول وود الخلا ختفو كرعينم ومشو ليهو لقوهو نصيح وفصيح وشديد ولضيض بس جارى ورا اكلو اشربو والجرى وراها عباده طبعا لكن ود الزبير الظاهر بقى صوفى الحته دى !!!
    عموما هو سيشرف عشاء الخميس وسيشرف هذا البوست حالما يستطيع التداخل . وتحياته للجميع ..

  7. بشار أحمد بشار (إبن برد) كتب:

    الإبن عبدوش : الحمدلله ، وزي ما قلتا الجري ورا لقمة العيش عبادة.

  8. علي سنكل كتب:

    أفليقا:
    سؤالك عن ودالزبير و الغايبين عن الدانقا كلنا محيرانا إجابته! يا ريتهم يردو علينا:
    ما حرام يا ليلي مجنونك تخلي
    لا سلام لا طله لا شوقاً تبلي
    ما خلاس يا القمرا فوق في سماكي هلي
    شوفي كيف راجيكي ما فت من محلي
    لى طيور الجنه ليك اترسلن لي
    الحنينات مشنليك وجن حكن لي
    قالو ود عينيكي ضربتو ما بتجلي
    وهو بيبين يظهر وكت حاجبك تعلي

    وصلتني يا د. صالح مداخلتك الرائعه على موضوع ود الخلا بتاع الزواج عن طريق الإيميل، ولك جزيل الشكر على ذلك ، وهو موضوع إجتماعي حي .

    لماذا لم تنشرها على الموقع ؟ ولماذا نحرم منها الآخرين ؟ ولماذا لا تعم الفائده؟
    أسئله محيره ! !
    هل فينا شئ طارد ونحن لا نحس به؟

  9. د.ياسين شمباتى كتب:

    عبدوش الحبيب..حمدالله على السلامة..كتامى شديد!!!!

  10. aflaiga كتب:

    شمباتى الحبيب : عليك الله ما تزعل نحنا زعلك ما قدرو نرضيك كيف ما عارفين ؟؟ غايتو الا فى عشاء اب احمد اديك صحنى وقزازتى !! بتاعة البارد !! ولا القصه ما كوكتيل يا اب احمد ؟؟؟
    اب احمد : الكاشف حجزناهو ليك لو محتاج ليهو 0911161990 اكل وتطريب . شفتو الدعاية المجانية دى كيف ؟؟

  11. د.ياسين شمباتى كتب:

    افليقا..زعل شنو!!؟؟؟ انا القزازة ما باباها_حقت البارد طبعا_لكن الفيك اتعرفت..

  12. ودالزبير كتب:

    شباب

    هسه ده شنو البتسوا فوقو ده البوست ماشي كويس وسؤال عن الحبيب تكعيب ودالزبير بعد شوزيه يخرم لعشاء ودعايه لمحمود الفنان ( قرب يقي محمود الكضاب ) بتاع هجم النمر ………………..

    بالجد يا حاج السلاوي الناس ده دايره ألفه ولو لقو كمان ( صول ) يكون ميه ميه ..

    تشرفت بالأمس بزياره الأخوين ود الخلا وزوووووووول ولمن لا يعلم فلزوووووووول معزه كبيره في قلبي بحكم إنه أول من عرفته هنا ولودالخلا موده خاصه بإعتبار أني ثاني إثنيين تعرفا عليه إبان هجمته وخلعته لجمعنا الكريم … كانت زياره قلبت علي المواجع وهيجت الذكرى لأشياء وشياء بعضها يمكن أن يحكى وبعضها لا يمكن التصريح به حفاظاً على ذكريات جميله ولسخريه القدر يصادف هذا الشهر مرور الذكرى الثانيه على بدايتي للتدوين وياله من تاريخ وإختلاف بين الذكرى الآولي وما كتبته عنها وبين آحداث العام الثاني العاصفه ……………
    لصديقي أفليقا ولكل من مر من هنا متسائلاً عن غيابنا لن أقول شكراً فهذه من خصالكم الحميده لكن بعد دراسه مطوله وتقييم دقيق للتجربه وخصوصاً في فترتها الأخيره أعتقد إنه كان من المناسب أن يختفي ودالزبير بعدين تعالوا هنا إنتو ما قاعدين تتفرجوا مسلسلات أجنبيه هسه في 24 كل أصحاب جاك باور المخرج بيقتلهم وما بيفضل غير البطل وماشين بعيد ليها في باب الحاره مشى كميه من الشخصيات الرئيسيه ماتت بعد ما إنتهى دورها الدرامي وتييب نقوم نتخيل ود الزبير إنتهى دوره في سيزون 2 وممكن يرجع في سيزون 5 زي ساره تانكريدي في بريسون بريك الماتت في الجزء التالت ورجعت في الرابع ..
    حاج السلاوي أوع أكون طلعت بيك العالي ,,

    للجميع ألف سلام وتحيه وإحترام

    هسه الكلام ده أعمل ليهو كوبيس وبيست وألصقه بهناك ولا خلاص كفايه كده

    وتظل في الحلق غصه تأبى أن تنبلع .

  13. حاج أحمد السلاوى كتب:

    أخونا الشفيف شكسبير ( ودالزبير … بالعربى)..
    أول حاجة كدى قول لى وعيد كلامك دا تانى..البطل ..وسيزون 2 …وسيزون5 …وتانككريدون فى بابربسيون…..المخرج فلان الفلانى ..وشنو ما بعرف دااااااك..دا إنت طلعت بى بره الكرة الأرضية ..مش العالى بس !!! يا راجل ..يا رجل ( زى ما قال المذيع محمد سليمان ) .
    طبعن فى معلومة أصرح بيها أول مرة منذ دخولنا عالم مدونات أخونا العزيز الفاتح جبرا ..وهى أن الأخ ودالزبير هو أول من إتصل على هاتفياً وحادثته من أعضاء القمردينة سابقاً …منعروس البحر الأحمر ..بورتسودان .. وللمعلومية لم نلتق إلى الآن وجهاً لوجه ( مش ..وجهالوجه ..إياها ) وتبعه بعد ذلك الأخوين خالد مدنى ..وعمر خندقاوى ( رد الله غربته )..لذا يظل ودالزبير هو الألفة ..والصول ..والوكيل ..لقطاع المدونات القديمة والجديدة ..وكانت ليك وحشه شديدة خلال فترة الإعتكاف القهرى إن صح القول ..
    طيب دا كوووول عرفناهو ..موبايلك الحاصل ليهو شنو ؟ غيرت الشريحة ..ولاّ غيرت الموبايل زاااااتو ؟
    وزى ما قلت ليك فى الضفة الغربية ( منتدى ساخر سبيل ) قبلنا عذرك ..بس تانى ما تعمل كدا ( مش أنا أخوك الكبير ؟ ).
    والتحية لكل من ساهم فى البحث عن شكسبير وإعادته سالماً إلى اهله وذويه..والتحية موصولة للأخ الفاتح جبرا الذى كان له القدح المعلى فى أن نتعرف على هذه الكوكبة من الأخوات ..وربنا يديم الود والإخاء والمحبة بين الجميع …وما فى زول داير من زول حاجة ..
    وما تنسونا من صالح دعائكم ..
    إتفقنا ؟

  14. سلام يا ود الزبير و حمد الله بالسلامة

    و سلام للأحباب

    حقيقتن صارت هناك الفة (بكسر الألف) بين مدوني القمردينة و من عبر معنا لسوداننا و من التحق مؤخرا و يحزن الجميع لغياب فرد فيها و كان البيغيبوا ديل بيعملوا كدا عشان يعرفوا معزتهم لدى الكل الرسالة واضحة كلكم عزاز علينا… فمن يغب دون عذر لا بد و حنسأل عنو..

    عشان كدا أدونا من وقتكم شوية و الشغل دا ما بنتهي و الا و كانوا و عهدوا به لمقاول… لكن أكيد هناك فرق بين العام و الخاص …ففي بورتسودان يبدوا أن ود الزبير كان عندوا مساعدين فاختلفت التجربة عندما صار يقف على كل كبيرة و صغيرة في “سيدي بيه” و لم يعد هناك وقت للأحباب………….

    حاول أعمل شويت “ديليقيشن” للبعض لكي ترتاح و لو انو مافي راحة….

    عموما نفتقد تداخلك و مالو كلامك الفوق دا يا ود الزبير زي أهو ظهرنا و مع السلامة…..

    تداخل معنا مرة مرة فنحن نستحق حديثك على الأقل تنقل لينا تجربتك ان عزمنا للانتقال من العام للخاص و لو انو بقى مافي وقت…!!!

    و تحية كبيرة للكل و أدام المودة بين الجميع

  15. ابكرون كتب:

    سيدي ود الزبير يا بابا…
    عودا منصور يا بابا…
    ياخ ازيك ..سلااماتك….مشتاقين لطلاااتك
    ياخ شنو (حلق ..وتظل…وغصة وبلع…وتأبي….) الزمن العكر ده اي حاجه بتتبلع حتي الضريسه والحسكنيت….يا رجل هوووون عليك…
    لكن تعرف بيني وبينك مرااات الصنه مهمه واعادة ترتيب الادراج والرفوف …لكن ما طوالي ….وخليك قريب

  16. nono كتب:

    لو عمرى شئً فى يدى

    لوهبتو ليك يا سيدى بيه؟؟!!!

    ود الزبير بركة علي الطلة؟

    غايتو؟

    جنس؟

    غايتو؟؟؟؟

  17. سهيل كتب:

    سلامات لكل الأحباب—

    الأخ الفاضل ود الزبير : حمدلله إنك طيب وماعندك عوجه ونورت البلد — يبدو انك اصبحت كالجمعيه الخيريه — الكل بيتمنى إعادة الروح ليها و في نفس الوقت ما في زول فاضي ليها — لا أملك إلا أن اكرر كلام الدكتور عزت و الفكي ابكرون و الأب سنكل-

    كان جيتنا راجع : نحن الكسبانين
    و كان أبيت : الطرفين خسرانين

  18. عبدوش كتب:

    سهيل : والله هباش جنس هبيش .. اسى الجاب المرحومه الجمعيه شنو هنا ؟؟

  19. aflaiga كتب:

    سهيل : معليش الباس بتاع عبدوش ما مسحتو ورسلت طوالى ..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s