لاتتحدث مع السائق -3-

Posted: الإثنين,27 يوليو, 2009 by aflaiga in اخرى

فى الحلقات الماضية تطرقنا للناس القاعدين فى الكنبه الجنوبيه وقلنا انهم مشو اشتكو للخواجه بعد صراع طويل مع السواق قام بموجبه لماهم سوا فى موقف مواصلات نيفاشا العربى وعملو اتفاق لحدى اسى مافى زول من الركاب عارف تفاصيلو شنو لكن كل مره بنسمع انو السواق خرق الاتفاق والكنبه الجنوبيه زعلانه منو لكن اتفاق شنو وزعل فوق شنو ما معروف لانو فجاتن بيعملو نايمين واعتقد القصه عندها علاقه بقروش الوقود بتاع البص مع انو الركاب ديل طوالى بيزعلو ويمشو للسواق لكن بيرجعو مكسورين الخاطر ده لو رجعو !! وما بيلقو اى جالون ولا خط حتى لحدى ما بقو يبلو دلقان بالوقود ويتسطلو بيهو !!! اها فى حته كده فى البص فاصله بين الكنبه الجنوبيه والشماليه وحته مهمه لانو مقاعدا خاصه وبتجيب ايراد كبير للبص . قام السواق وممثل الكنبه الجنوبيه احتكموا تانى للخواجه مع انو السواق مختلف مع الخواجه فى جزئية تتعلق بنفس الحته الاحتكمو ليها لكن ممثل الكتله الجنوبيه لانو مافى زول طالبو شيئ اصر على محكمة الخواجه – قام الخواجه فكر ثم قدر وطبعا الخواجه زول مفتح وكان سايق البص ده زمان فقال شفوو يا شباب : الكنبه الفى النص دى من ناحية القعاد حقت الكنبه الجنوبية ومن ناحية الايراد حقت السواق وحنخصص مقاعد فيها لاهل السواق لو عاوزين ياخدو راحتم يجو يرطبو فى كراسيهم . وطبعا لانو السواق بيهمو ايراد البص يكون تامى لانو عندو التزامات مع الكمسارى واقساط بتاعة حاجات تانية بره استبشر بالقرار  جدا وممثل الكنبه الجنوبيه برضو وافق – لكن يا جماعه الركاب برضو طلعو ملوص !!!

اها نخلى السواق مستمتع بايرد كنبتو الكان فيها المشكله ونشوف ناس الكنبه الغربيه برضو مانججين شوية واخرمره لمن الخواجه المبعوث الجديد بتاع الشركة لمورده للبصات طلب منهم يجتمعو للنقاش والحل رفضو لانو اسبيرات الكنبه بتاعتم فرنسية والخواجه امريكى  قام السواق اضطر يجيب مندوب من الشركة الفرنسية عشان يحلحل القصه دى .

اها نخلى ناس الكنبه الغربيه فى شغلتم ونمشى نشوف ناس الوسط اللى هم مركز البص – بعد ما شالو ليهم الكمسارى القديم الجنو استثمار جابو ليهم كمسارى جديد ما جنو ا شيئ لحدى اسى لحدى ما الناس قالت اخير داك كان بيستثمر وبيدينا !!! قامت المطره صبت مره فجاتن البص كلو خرخر مويه وجاب مويه من الجنبات مع انو الكمسارى برضو اكد انو السنه دى البص سقفو اتسمكر واتسلكت كل مخارجو .

نمر كمان على اتحاد السواقين القدامى الكان قبل اسبوع كده طعن فى شرعية الرخصه بتاعة السواق وترخيص البص واهاب بكل الركاب انو ينلز من البص ويقيفو قدامو عشان يعطلو الحركه ويضطرو السواق يستجيب لمطالبم !! متناسين انو السواق ده مشهور بانو ما بيتهدد وبيدوس اى شيئ بيقيف فى سكتو وقايلين القصه زى زمان لمن تجى تركب وتستلم الدركسون مافى زول بيحس بيك !! المهم الركاب عارفين المخاطر الورا القصه دى عملو نايمين والاتحاد برضو عمل نايم والسواق عمل نايم  والبص ماشى .

 

 

Advertisements
تعليقات
  1. الغبشة كتب:

    سوق ياسواق فى شارع السوق……………….
    مشكور وانت تثقفنا فى علم السواقه وفنونها لك الشكر…

  2. علي سنكل كتب:

    الركاب بتاعين وسط البص ديل يا أفليقا لمان يزهجو من السواق القاعد ليهم عشرين سنه في الدركسون ، وسواقته كعبه ومشيهو كلو بالدقداق لمان يزهجو منو ما راجين ناس الاتحاد ، ولا الخواجات ومحاكم الخواجات، براهم بطلعو ويقيفو قدام البص ، ويقلبوهو.

    في ليله وكنا حشود بتصارع
    عهد الظلم الشبا موانع
    جانا هتاف من عند الشارع
    قسما . . قسما لن ننهار
    طريق الثوره هدى الأحرار
    والشارع ثار
    وهزمنا الليل
    و هزمنا الليل

    ويعينو سواق جديد . . لكن دي ما المشكله ، المشكله يا أخواننا متين الركاب ديل وخاصه ناس كنبة النص ديل، متين يفهمو إنو السواقين القدام العواجيز ديل ما بوصلو البص أي مكان .
    و لابد من التفكير في سواقين شباب.
    وما ضروري عندي رخصتم تكون من شرطة الأوسط واللا الغربيه واللا الجنوبيه واللا من شرطة القسم الشمالي. بس تكون رخصه جديده ويسوق لينا سواقه حديثه تودي البص ده لي قدام. يا ناس البصات دي كلها فاتتنا!

  3. يسلم قلمك المميز ياافليقا ….. ماحضرت مندوب المبيعات قال شنو بس عرفت انو البايع راضى وكمان الشارى والحقيقة تقال الركاب ماعندهم راى اصلو الدنيا خريف ولو فقعت الشمس تهريهم سخانتها قالو نركب ومحل ماتسرى تمرى ….. قطر ماش وعم الزين وكيل صنفور وزى مالدنيا سكة غريبة تشرق يوم وتغرب يوم عم الزين محكر فى قطار الهم ….. ياخوانا لو السواق جاتو جلطة وراح فيها اثناء القيادة اها الكمسارى دا ماقالو ماعنده الاهلية لقيادة البص غايتو الا يرفعو المصحف الخاتيه السواق القديم قدام داك .. ربنا يستر

  4. ابكرون كتب:

    افليقا :
    وفي إحدي المحطات ركبت شابه جميله ممشوقة القوام ..لفتت انظار جميع ركاب البص خاصة ركاب الجنبة اليمين خلوا اي شئ وقعدوا يقهوا فيها …والبطلع ويدخل في جزلانه المتضخم …والبتبسم بسمات قبيحه كلها رغبة .. وبطلوا الشغله بس بقوا علي البنية…(وفجأتن) تحركت البنية ذات القوام الممشوق وأدخلت يدها بين فخذيها ..وضغطت علي شيئ..دوي صوت انفجار هز وسط القارة الأفريقية ….نسف البص بمن فيه وتطايرت اشلاء الجميع…وعم صمت بعد هرج استمر 20 عاما … واتت لجان التحقيق تبحث عن الصندوق الأحمر ..ووجد بين بقايا فخذي الفتاة…..!
    وتمتت وختمت…..!!

  5. aflaiga كتب:

    الكرام المارين سلامات :
    عم على : عليك الله لاقاك سواق بيفك الدركسون للشباب هو فى الغنا مسمينو الاغنيات الشبابية ونازلين فيها نقد خلى فى السواقه !!! احيى فكرك المتقد المتقدم الذى لا ينكر على اى ركاب كنبه سواقة البص وده اصلا ديدن ناس زمان الاكتشفو فجاتن جنس عبود وجنس نميرى وجنس مبارك زروق مع انو اهل اسى بيكتشفو جنس الزول قبل ما يستلم الوظيفه !!!
    التركى : وتحية اجمل منى – انما اضاع الركاب انهم كانو اذا ساق السواق لم يسالوه عن الشارع انشاء الله ينزلم فى الموقف ذاتو !!
    ود الخلا : كلما اقرا لك اتلمس سودانا جديدا بدا يتشكل لا يشبة سودان عرمان الجديد ولا يشبه سودان الانقاذ الجديد انه سودان الحق والخير والجمال والحرية الموزونه واحترام النفس والاخرين – بس لو عملت خلف دور ووجهت الكلام ده للناس ديل يكون ميه ميه لانو الناس المواجههم ديل عارفين الكلام ده وحاسين بيهو .
    ابكرون : ما ده المضيع بوبى !! ركابنا ديل قاعدين على الهبشه تعرف يا ابكرون يا مرعب الحبش الفكوهم فى البلد دى الايامات ديل والله خلو ليك ركابنا راقدين سلطه واتنبا بحرب نسوية بين الحبشيات واولاد عمنا المعرسينهم ديل !!!
    ما بين البين اخى ابكرون اهلك نسلا واضاع امما وازهق ارواحا وخرب بيوتا اللهم اكفنا شر ما بين البين واجعلنا ممن يحفظون ما بين وبين ..
    نواصل بعد قليل اخر تطورات البص …

  6. حاج أحمد السلاوى كتب:

    الكاشف أبكرونا ..
    البنية ذات القوام الممشوق دى.. عضو فى حركة طالبان ..ولاّ شنو ؟

  7. ابكرون كتب:

    افليقا : (نواصل بعد قليل اخر تطورات البص )…انت لسه حتواصل يا ابو الأفلاق البص بح انفجر بالفيه …تلاشى…مافي …بس فضل الصندوق (الأحمر)…افتح لينا الصتندوق الأحمر ده وورينا تسجيلات رحلة البص العجيب ده …بالذات اللحظات الأخيره….
    ——————
    سلولو : يس ما لاقتك في (تورا بورا.)..ولا يمكن تكون شفتها مع ناس (بادر ماينهوف)

  8. aflaiga كتب:

    ابكرون : فال الله ولا فالك مالك مفجرنا ؟؟
    شوف يا ابكرونا يا زعيم البص ده ساقوهو ناس كتار قبال كده واى زول فيهم كان رباط الدركسون يدو !!! وقايل الفكك مع القيامه !! لكن كل الحصل انو شتت والبص ماشى ماشى قدام ماشى ورا المهم ماشى ياابكرونا بصنا ده ما بيستنى زول وبالو طويل تركبو بالعدله تركبو بالقله بيجى يوم تنزل منو وبرضو ماشى !!
    فاصبر نفسك مع الذين ينتظرون اخر محطة السواق الحالى اما بصنا فليس له اخر محطه صحيح مهلهل وداير سمكره وبوهية ولساتك وشغل فى المكنه وفرش لكن ياهو بصنا نسوى شنو ؟؟
    اسى لاقاك دوله انتهت قريب ده قامو قسموها وباعوا فى السوق ؟؟؟ شوف حتى العراق والاتحاد الوسفيتى ما زال بصهم ماشى برغم انو ورقو محجوز فى المحامى !!
    شيل الصبر يا بلده بكره احلى ..

  9. nono كتب:

    انت قصدك شنووو باتفجير ده؟؟

    افليقا /تاني نهييييييي زندقيييييي؟

    لاتتحدث معا السايق 4؟

    عـرّج بي و ميل
    في الشاطئ نتأمل قليل

    شوف حكمة الصانع الجليل

    النيل خلال روضو الظليل

    ينعشنا بي روحو العليل

    شكل الغزالة مع الصباح

    أما الطيور ، عاشقة الزهور

    في هنا (ء) و سرور

    من طيبها ، تستنشق رياح

    و تغني ، أغنية الصباح

    شكل الغزالة مع الصباح!!!

    يعني يا ابكرووووووووووووووووون؟

    لا عاين أمام و أنظر قفا ؟؟؟

    خلاااااااااااااااااااااااص المره مااااااااااااااااااااااتت!!!؟؟

  10. بشار أحمد بشار (إبن برد) كتب:

    أفليقا : أحسن حاجة تكلم واحد يشد ليهو بليلة في (سندة) ويعزم الركاب وينزّلهم من البص لأنهم بيكونوا (مريوقين وجعانين) بعداك يفخخ (الباظ) وينسفو بسايقو ومساعدو .

  11. د.ياسين شمباتى كتب:

    الحبيب بشار..دا الكلام..

  12. aflaiga كتب:

    تعرف يا عم بشار اول زول حيعترض على النسف هو الشعب المسكين ده حيقعد يقول ليك عفا الله وما متعودااااااااا دايما ..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s