فتح الخرطوم على يد الامير مخير ..

Posted: الأربعاء,29 يوليو, 2009 by aflaiga in اخرى

كانت كل الدلائل تشير الى تقدم الامير مخير نحو الخرطوم وبمعيته جيوش من الاشواق لا قبل لنا بها كما افادت تقارير اميرنا عزت الذى زار ممكلة بلاد الباكستان مؤخرا وحذرنا بان مخيرا قد زحف الينا بجيش عرمرم من الاشواق لا قبل لنا به فاعددا فى حامية الخرطوم الشوقية ما استطعنا من لهفة ورباط الشوق نتهيا بها لاستقبال حبيب الكل مخير . واليوم تلقينا من الامير مخير هاتفا يفيد بدخولهم الخرطوم سالمين غانمين يملءهم الشوق لرؤياكم . فماذا انتم فاعلون ؟؟؟

Advertisements
تعليقات
  1. aflaiga كتب:

    اولا اسفين للاخطاء الاملائية وهى على مسئولية القارئ .
    ثانيا توجه الامير مخير لمسقط راسه بعروس الرمال وسيكون بيننا مساء الخميس وسيغادر البلاد السبت ..
    يلا ورونا همتكم .

  2. العزيز أفليقا
    و المدونين سلام
    أفاد الأمير مخير بأنه الآن في طريقه الميناء البري للسفر الي منزل الأسرة و أحضار والدته على جناح السرعة لتسافر معه الى الباكستان و لما كان حجزه يوم السبت فغالبا ما نلتقي في منزلنا في يوم الجمعة مساء….

    فحتى نتأكد من وصله دعوة لشرب شاي بمعيته باذن الله في منزلنا……

    ملحوظة: سافرت أم عصمت و بنتها في اجازة الى الامارات فمالك المنزل غير مسئول ان طلع الشاي “قطر قام”

    تحياتي

  3. aflaiga كتب:

    عزت : اها شاى الخميس ده نوديهو وين ؟؟ انا فورت اللبن من امبارح .

  4. سهيل كتب:

    رايكم شنو نشرب الشاي في منتزه الرياض العائلي – تحديد اليوم شورى بينكم

  5. سهيل كتب:

    رايكم شنو نشرب الشاي في منتزه الرياض المغربيه — تحديد اليوم نخليهو شورى بيننا

  6. تحديد اليوم سيكون مرهون بعودته من الأبيض و البيت قاعد و الشاي في و المحلة قريبة …..
    و ناس المقرن بتحبو

  7. aflaiga كتب:

    عزت : ناس المقرن بتحبو مافى كلام . لكن ناس الاقمار كده بتظلمو مش ؟؟ ادونا فرقه ندخل موسوعة البيوت الكريمه على الاقل نجرب لينا حرمين على طلاقين على اتفضلين سخنات كده من النوع الطولت منهم اضان سمسمه نظام اختبار مسند الاضان وكده وتسليك الطبله بكم ضيف …
    لكن لو اصريتو تريحو اضان سمسمه ناس المقرن بتحبو البيت عليكم والشاى علينا ..

  8. خلي سمسنة للرحلة الجاية أصلو الحرازة اللداية ديك بتكون مشتاقة للضبيحة و اللمة الحلوة

  9. aflaiga كتب:

    عزت : جدا حاخلى ضبيحة سمسمه للرحله الجايه

  10. سهيل كتب:

    يازول اقمار بالليل ؟ لالالالا — ناس المقرن مش بتحبو بس – ديل اهلنا و حبايييبنا – و يا طير يا ماشي لي اهلنا و كده

  11. سهيل كتب:

    لكن ادونا معاكم فرقه – شنو ميتين بيها براااااااااااااكم – إنتو بس حددو المواعيد و أقعدو فراجه

  12. aflaiga كتب:

    سهيل : يا اصلا بياع .. بتجى مسافر كوستى والدرب بيجيبك ..
    طيب ما دام عزت عزابى والبيت فاضى !! ما نقلبا قعده عزابيه بى عز الدينا وزريابا وكاشفا ؟؟

  13. ابكرون كتب:

    هههههههههه نقاش شيق …قعده عزابيه والحاجة ام مخير تودوها وين ؟

  14. طيب ما دام عزت عزابى والبيت فاضى !! ما نقلبا قعده عزابيه بى عز الدينا وزريابا وكاشفا ؟؟

    أحلها ليكم

    عزت البيت و المويه السخنه و التى باجز و لبن البودره

    سهيل أنت عليك البتاع الخطير البتعملوا اخنك داك

    أفليقا وأم سمسمه تسوى اللقيمات لأنو سمسمه ما عندها طريقه تشتغل

    وواصلو الأقتراحات

  15. د.ياسين شمباتى كتب:

    الامير مخير..الف حمدالله على سلامة وصولك الوظن,,وربنا يردك سالم وغانم وتقدر تتحلل من بعض ما تحمل من اشواق وحنية..يوم الخميس معاكم والجمعة عندنا خيانة وخوانة..

  16. ابكرون كتب:

    نسينا نقول للمخير حمد الله علي السلامة
    وليه الجيه السريعة دي وان شاء الله ما تكون الوالده مريضه …عموما حللت بالسلامة في الوطن …واقامة وان قصيرة سعيدة بين الاهل والاصدقاء….

  17. نسيت أم أحمد عليها الكيكه

  18. والله يا ابكرون شكلنا كده بقينا فعلن زى مصطفى شوارع جرينا نوزع فى المهام و المكان و نسينا نسأل عن الضيف و نسلم عليهو و على الوالده و نطمئن عليهم و إن شاء اله ما يكون فى شى يستدعى الإستعجال

  19. aflaiga كتب:

    اب احمد : عدلت فنمت يا اب احمد وعشان نلخص :
    عزت التوكيره والتسخينه وعزدينات .
    افليقا اللقيمات والزلابيات والجاتوهات .
    سهيل الكيكيات .
    ود الخلا التى باكات والسكرات .
    اب احمد المويات الملونات .
    ود الزبير السنتدوتشات .
    بشاوى الشامبيونات .
    جبرا لطفى وزرياب واجمل المقطوعات .
    باقى الشباب التمنيات بلحظات جميلات .

  20. aflaiga كتب:

    اعادة بالبطيء :
    كانت كل الدلائل تشير الى تقدم الامير مخير نحو الخرطوم وبمعيته جيوش من الاشواق لا قبل لنا بها كما افادت تقارير اميرنا عزت الذى زار مملكة بلاد الباكستان مؤخرا وحذرنا بان مخيرا قد زحف الينا بجيش عرمرم من الاشواق لا قبل لنا به فاعددنا فى حامية الخرطوم الشوقية ما استطعنا من لهفة ورباط الشوق نتهيا بها لاستقبال حبيب الكل مخير . واليوم تلقينا من الامير مخير هاتفا يفيد بدخولهم الخرطوم سالمين غانمين يملؤهم الشوق لرؤياكم .
    ومخير لمن لا يعرفه :
    * احد امراء المدونه الذين :
    تسمعهم فيعجبك قولهم .
    تناقشهم فيعجبك ادبهم .
    تدقق فى قولهم فتستفيد وتستفيد .
    منذ ان تجمعنا بلا ميعاد ولم يزر مخير السودان وهى اول زياره له للبلاد منذ تجمعنا .
    الرجل احدى مدارس الادب والرقى والوطنيه .
    اجداده كانو اصحاب قول فاصل لازمو مهدى الله فنصروه
    وهو يذود اليوم فى احدى ميادين الوعى والتنوير يرسى لسودان المحبه والخير .
    انه مخير واحد منا اتانا يحمل شوقه فهلا رحبتم به ؟؟

  21. semsema كتب:

    السلام عليكم
    كنا نمني انفسنا ( حمودي ،سروية ، عبودي )
    كما تمنى افليقا قبلنا وتهيأنا انتكون هذه الجلسة
    عندنافي الاقمار الصناعية لتُضاءَ بحضوركم باقمار حقيقية
    ولكن ليس لنا الا النزول لرغبة الجميع علي امل
    برمجتنا لذلك فيما بعد والزلابية جاهزة يا اب احمد واعتذاري
    الشديد لمدام ندى لكن نزوركم بالبيت انشاء الله واعتذار
    للمحتفى به د شمباتي والجايات اكتر من الرايحات

  22. nono كتب:

    ياالمخير مااااك مسير//

    حمدلله1000 علي السلامة

    اقامة طيببه في الامزووووووووون!!

  23. ومخير لمن لا يعرفه :
    * احد امراء المدونه الذين :
    تسمعهم فيعجبك قولهم .
    تناقشهم فيعجبك ادبهم .
    تدقق فى قولهم فتستفيد وتستفيد .
    منذ ان تجمعنا بلا ميعاد ولم يزر مخير السودان وهى اول زياره له للبلاد منذ تجمعنا .
    الرجل احدى مدارس الادب والرقى والوطنيه .
    اجداده كانو اصحاب قول فاصل لازمو مهدى الله فنصروه
    وهو يذود اليوم فى احدى ميادين الوعى والتنوير يرسى لسودان المحبه والخير .
    انه مخير واحد منا اتانا يحمل شوقه فهلا رحبتم به ؟؟
    انه مخير واحد منا اتانا يحمل شوقه فهلا رحبتم به ؟؟
    انه مخير واحد منا اتانا يحمل شوقه فهلا رحبتم به ؟؟

    تعرف يا أفلى لولا إننا نعرف ما كتبت عن مخير هو عين الحقيقه لقلنا أن كاتب هذا الكلام هو حسن طحنيه المبدع فى الهتاف و التحيه
    يسلم كيبوردك

  24. aflaiga كتب:

    اب احمد : هو عليك الله البيهتف ليهم حسن طحنيه ديل كان زى ناس مخير وزيكم مش كان كويس ؟؟

  25. aflaiga كتب:

    عزت : انت البيت فاضى الجمعه بس ولا لحدى السبت عشان لو تقلنا فى الاشواق ممكن نبيت ؟؟ ولو نيام جا برضو عشان نعفى بشاوى من التوصيله وخالد مدنى من التحليله ..

  26. د.ياسين شمباتى كتب:

    مصطفى شوارع والاجر عل الله..على حسب معلوماتى فان مخير قدم للسودان فى مهمة رسمية,يعنى باذن الله مافى عوجة ولا حاجة.

  27. aflaiga كتب:

    يا جماعه مصطفى شوارع ده انشاء الله فى الميل ورونا فى ياتو شارع ؟؟

  28. سماسم كتب:

    سلام يا أهلنا زمان

    بالرغم من التقلة الكاتلاني الأيام دي إلا جية مخير ما بتتفوت من غير تعليق
    أهلاً بيك مخير بين أهلك وعشيرتك في السودان
    والبلاد ترحب بيك وان شاء الله تاني ما تنقطع منها

    بس المشكلة الجماعة دول شايفاهم عملوها عزابة وكد؟؟؟؟
    لكن الجايات اكتر

  29. نعم قدم مخير في مهمة رسمية أنجزوا خلالها تدريبا لبعض المشاركين في النظم المصرفية و كان التريننج في برج الفاتح و لما كان مخير مشغول شديد بحسبه منسق البرنامج تبعا لمؤسسته في الباكستان حدثني قبل حضوره ان برنامجة مزحوم… لذا لم أشاغله حتى فرغ و لمن فرغ …. جرى لوالدته لينال عفوها و من ثم يأخذها معه الى الباكستان لتصوم معهم رمضان….

    مرحبا بيكم كوووولكم لمن يجي و نحدد اليوم……… خليكم قراب زي ما بقول شمباتي

  30. nono كتب:

    سماسم بركة علي الطله /

    سماسم /
    بس المشكلة الجماعة دول شايفاهم عملوها عزابة وكد؟؟؟؟
    لكن الجايات اكتر

    الجماعة لقوها حلوة ؟؟؟

    انتي مااااااااااشفتي صور عزومه شماتي؟؟؟

    ناس نايمة ناس حايمة ناااس بطاطيرة ناااااااازلة الشغلة جايطة شديد؟؟؟

    انامااااااعارفة ندي الاولاد وين؟؟؟

  31. د.ياسين شمباتى كتب:

    افليقا..مصطفى شوارع دا ما لاقاك قبل كدة!!؟؟ راجع ايميلك يا شقى انت!!

  32. د.ياسين شمباتى كتب:

    نونو..الليلة عملتينى شماتى !!؟؟ عفيت منك يا الكلسة..
    بعدين برضو كان فى ناس لابدة بى صحانة العشا,,وناس تقلت من البتاع !! اظنو نسكافيه.

  33. سماسم كتب:

    لك التحية نونو
    انت عارفة حا نفتقد د. صفاء … المرة دي طبعاً ما حا تكون موجودة عشان تنظم الشغلانية

  34. الزهراء كتب:

    التحيه لكم مجددا
    وحمد الله علي سلامة الغايبين
    وشايفين طوااااالي كده موال العزابه بقى مدور
    شنو يا اخوات مهيره
    ماا تنظموا لينا حاجه كده

  35. حاج أحمد السلاوى كتب:

    الأمير مخير ..
    – إيه المفاجآت الجميلة دى ..؟ حمداً لله على السلامة .وإن شاء الله تكررها تانى فى العيد الصغير..عشان نشوفك أيها الأمير ..
    صحبتك السلامة فى حلك وترحالك ..
    – ويا الشباب بخخخخخخخخخخختكم ..وإن شاء الله دايماً تامين ولامين ..والله لقيتا يا شمباتى ..عزايم ولقاءات بالكوم .. فى سنتر الخرتوم ..يا عوض دكام !ويعنى يا شمباتى.. عشان نونو دى كتبت إسمك ناقص حرف ..خلاس غلطت فى البخارى ؟ما تخليك حنيين ..ولآ حسه ارجعك الحفرة بتاعتك ..دييييييك !
    – بنتنا الزهراء ..حمداً لله على السلامة ..وقالوا متألم شوية …ياخ بُعد الشر عليك..وعساك بخير الآن ..؟
    – يا جماعة الخير ..ما تسطحوا بينا كتير .. فهمونا بس قصة مصطفى شوارع دى ..عشان اكان لاقانا فى الشارع ..نسلم عليهو .. على الأقل .. ولاّ شنو ؟
    ونسمع صوتكم يوم الخميس إن شاء الله … إتفقنا ؟؟؟

  36. nono كتب:

    الزهراء /

    حمدلله علي السلامة

    الزهراء /

    شنو يا اخوات مهيره
    ماا تنظموا لينا حاجه كده

    ماعندك مشكلة

    النعيمية عليك؟؟

    وس وس وس وس

    اهييييييييييي بعدااااااك نحدد المكان والزمان؟

    يجونااااا الكواشف(ناس الرفقه المؤمونة)

    بس تبقه حاجة وحدي ؟

    انتي كيف معا المرسوووووووووووون لانة الدنيا مامعروفة يمكن نسوااااااااااااان الرجال ديل يجونااا؟؟؟!!

  37. aflaiga كتب:

    سماسم ثرو الغبشه ثرو نونو ثرو الزهراء : اها فى اقتراح انو ود المهدى يحجز لينا مزرعة الجريف يوم الجمعه ونخلى بيت عزت الفاضى لى يوم تانى رايكم شنو يا شباب ؟؟

  38. bakriMusa كتب:

    مرحب بالامير مخير بين اهلك واحبابك ووطنك
    ــــــــــــــــــــــــــــــــ

    جانا الخبر شايلو النسيم
    فى الليل يوشوش فى الخمائل
    هش الزهر بكت الورود
    وسالت مشاعر الناس جداول
    رجع البلد
    بعد السنين المره
    يادوب العيون سهرن هجد
    ياحليلو مارجع البلد
    وعيونا ما سهرن هجد
    فى عيونو شوق
    انهد لحب للناس للوطن
    ماغيرت ريدتو السنين
    ومابدل احساسو الزمن
    شفنا المشاعر الحلوه
    فى ساحاتنا بى الامال مشن
    انت ما نسمه فى الهجير
    انت ما راحة ضمير
    انت ما بهجة مشاعر
    انت ما رحلة عبير
    انت ماياكا الامير
    كيف نسيبك تمشى تانى
    وانت نورت البلد
    العذاب فارق طريقنا
    والعيون سهرن هجد

  39. علي سنكل كتب:

    الأمير مخير:
    ألف حمد لله على السلامه وربنا يحفظك في ترحالك.
    شايف القيامي قايمي كيف الجماعه مرحبين بيك كما يجب وإن شاء الله نقابلك في ساعة خير.

    كسره:
    والله كان الزول يوم لقيتو رجع الأمازون نوهائي بتكونو إنتو السبب يا عشيرة الفاتح جبرا الما في منكم إتنين.
    دمتم ودامت أيامكم أفراحاً.

  40. د.ياسين شمباتى كتب:

    ابوى السلاوى..جنس حسادة غايتو !!! بعدين مصطفى شوارع دا كان لاقيتو فى الشارع ما بتسلم عليهو,دا بتجرى منو عدييييل كدة,,دا منو جفلة يا حاج!!

  41. التلب كتب:

    1000 حمداً لله على السلامة

  42. سهيل كتب:

    افليقا : إقتراحك تمام و في محلو – بس نشوف ود المهدي و ظروف المزرعه –

    كسره : برضو عذابه و كده و لا نجي جاهزين ؟؟؟؟

  43. ياسين شمباتى كتب:

    سهيل..جاهز لشنو!!؟؟؟ الكابى ولا حاجة تانية؟؟

  44. نيام كتب:

    مخير:
    ايها الفارس العائد من بلاد الاردوان
    الي بلاد المزمزان
    مرحبا بك مرة علي صهوة جيادك …ومرة علي ارض بلادك
    تحياتنا و امانينا لك باجازة رائعة…

  45. الزهراء كتب:

    حاج السلاوي
    يسأل منك الخير ان شاء الله وانا الحمد لله بقيت عال العال
    نونو
    يابتي نسوان شنو وهييي منو الشبكه تاني طشت ولا شنو
    على العموم النعيميه جااهزه وتحت امركم
    والكلام ليك يا المنطط عينيك يا البتهاتي بالنعيميه
    فهمتني يا حاج السلاوي؟
    بكري موسى كلك زوق ودائما موفق في اختيار الاشعار الجميله
    وربنا يرد لينا كل الطيور المهاجره بسلام
    ولك التحيه

  46. nono كتب:

    ياالطيوووووووووووووووووووووووووور؟؟

    عوديييييييييي؟؟

    الي الوكر المهجووووووور؟؟

    طششششششششششان؟

    علي وزن نعيمية؟؟

    فهمتني يا حاج السلاوي؟

  47. سهيل مافى أنتى فايروس أقوى من الكاسبرسكاى

  48. bakriMusa كتب:

    الزهراء

    الف حمدالله على ا لسلامه انشاء اجر وعافيه

    ***مسطول اشترى خروف ضعيف شديد ..ابوهو قال ليهو ده شنو الخروف الضعيف ده قال ليهو ماتشوف الجسم شوف العيون كيف؟

    ***سكير لاقي ست العرقي في الحج
    حلفها قدام الكعبة
    تاني ما تزيدو موية .

  49. ودالفتيحاب كتب:

    أخونا بكرى موسى
    جمعتك مباركه :
    شديت محنك ،يعنى الحاج ده ناوى بعد العوده وكرامة الوصول يرسل ليه لى نص ؟

  50. aflaiga كتب:

    بعد نصف ساعه ونصف يعنى بعد ساعه من الان بتوقيت قرينتشوق
    يلتقى الاحبه حبيبهم مخير فى منزل حبيبهم عزت بحضور حبيب الكل جبرا وكل الحبايب وانشاء الله دايما لا مين تامين سالمين غانمين .
    مخير : يعنى تغيب كم سنه وتدينا ربع يوم كده عدل ؟؟ كدى المره دى امشى باكستان يوم وادينا سنه ! نحنا بنمشى امبده كل اسبوع نشحن بطاطيرنا من رضا الوالده انت شايل معاك البنشر ذاتو والله بختك ..

  51. aflaiga كتب:

    ود الفتيحاب ثرو بكرى موسى : والله من فتره بفكر فى بوست عن ناس المويات ( ابيض واصفر ) ولفت انتباهى قصة انو الراجل ده فى الحج بيفتش عن جودة العرقى واخشى ان يكون قد تعلق باستار الكعبه راجيا المولى ان يرفع جودة العرقى .. الكثيرون من ابناء شعبنا يخلطون بين الحلال والحرام وده بوست خاص بنجيهو برواقه يوما ما ..

  52. بشار أحمد بشار (إبن برد) كتب:

    الكواكب احتفلوا بالقمر.إن شاء الله يا مخير لقيت باقي العقاب كلهم سالمين وتامين .
    “ود الفتيحاب ثرو بكرى موسى : والله من فتره بفكر فى بوست عن ناس المويات ( ابيض واصفر )……..” إنت يا أفليقا عاوز تقوِّم لينا العفارة في المطرة دي؟؟

  53. علي سنكل كتب:

    أكمل يا بشار:

    ورمضان الكريم على الأبواب.
    وكل سنه و إنتو طيبين.

    مخير: سهره طيبه مع الأحبه ، حاسدنكم عليها.

  54. ابكرون كتب:

    الا ايها النوام (طارق وعزت) ويحكم هبوا
    نزلوا الصور والتوثيق لمخير والجنبو
    افليقا للشاي والقهوة والعصائر يصب
    اري استرايكر وسهيل (يسفسف ) مما يحب
    وودمدني والبشاوي من التورتات كل يعب
    وعلى جنب لطفي وجبرا مع الدندنة منكب
    وفي البعد ابكرون وسنكل وبشار لحظهم يندبوا
    فذاك آآآه وذااك آآآآخ وذاك يسب

  55. حاج أحمد السلاوى كتب:

    ابكرونا ….
    عجيييييييييييييييييييييييييييب ..ما كنا كويسين !!

  56. ابكرون كتب:

    سلولو : ياااااا ملاذ افكارك الهيمانه شوف وين ودتك التعبااانه
    (من اندب حظي او آمالي…يااااخ)

  57. الا ايها النوام (طارق وعزت) ويحكم هبوا
    نزلوا الصور والتوثيق لمخير والجنبو
    افليقا للشاي والقهوة والعصائر يصب
    اري استرايكر وسهيل (يسفسف ) مما يحب
    وودمدني والبشاوي من التورتات كل يعب
    وعلى جنب لطفي وجبرا مع الدندنة منكب
    وفي البعد ابكرون وسنكل وبشار لحظهم يندبوا
    فذاك آآآه وذااك آآآآخ وذاك يسب

    الصور نزلت فى ساخر سبيل الأمير مخير فى الخرطوم

  58. ياسين شمباتى كتب:

    سلام حبايبنا وقرايبنا..للاسف لم اتمكن من حضور الجلسة المحضورة,لكن لحقنا فضل الجماعة حيث التقيت وود الزبير امام صالة المغادرة بالامير مخير..ربنا يوصلو سالم وغانم_وكيف ما يكون غانم ومعاهو الوالدة_بالسلامة يا حبيب..

  59. aflaiga كتب:

    طارق اب احمد: وفيها شنو لو نزلتها هنا برضو ؟؟

  60. حاج أحمد السلاوى كتب:

    أفليقا ..الدينمو ..
    ما عندو جوكر …

  61. مُخير كتب:

    الحبان داخل السودان
    والخلان داخل الوجدان وخارج السودان
    السلام عليكم ورحمة الله وبركاته،،،
    لم يسبق لي أن ضربت لخمة واختلطت مشاعري بالقدر الذي يلجم اللسان ويزلزل الكيان وما أهون الكتابة على الحاسوب، فبالرغم من أن زيارتي للوطن بعد طول غياب كانت مهمة رسمية تتعلق ببرنامج تدريببي مرتبط ببعض مؤسسات الدولة ومسئوليتي ذات أعباء إدارية ومالية وتشمل الاهتمام بـ 30 متدرب أجنبي وربما تحول محدودية مدة الزيارة جسامة المسئولية عن تأدية الواجبات اللامحدودة فلم أشأ الإعلان عنها حتى لا أسقط فريسة الإحراج لعدم التمكن من صلة الرحم كما ينبغي خاصة وأنني تركت عيالي خلفي، لكن شاء الرحمن أن يعرف الحبان فكان ما كان، وتنادوا للإحتفاء بقدومي، وبالرغم من الاهتمام والحفاوة الرسمية للدولة والتغطية الإعلامية التي حظي بها البرنامج غير أن كل هذا لم يحدث فيّ الهزة العاطفية والزلزال المشاعري الذي إجتاحني في دار عزت بالمقرن، فقد وجدت هناك ما لم يخطر ببالي ويُعز نفاسة على النائم في حلمه أن يناله، صحيح أنني لم أتوهمهم يوماً كشخوص إفتراضية وأنني عرفتهم من على البُعد وواصلتهم عبر الأثير، غير أنني وجدتهم أروع وأجمل وأكمل وأكرم مما إفترضتهم أو تصورتهم أن يكونوا، جمعني بهم قلم الأستاذ الفاتح جبرا، فما اسعدني إذ بي أجده شخصياً بلحمه ودمه وسخريته وظرفه حاضراً للقائي، ووجدت أبو عصمت ” د. عزت ” فاتحاً أبواب داره وفارداً ذراعيه لإستقبالي فما اسعدني، ووجدت نجوم القمردينة وفلذات كبدها وفرسانها النجيب اللبيب أفليقا بدماثة خلقه ولطفه وحيائه الذي أدهشني، ووجدت صديقي الإستثنائي خالد مدني بكل طيبته ووده وقد ضحى بمبارة الهلال للقائي، ووجدت سهيل وجه الحبيب وقلب المُحب بإبتسامته الودودة، ووجدت طارق أب أحمد بطلته البهية وإريحيته وحضوره الحميم، ووجدت القبيلة كوولها حاضرة في شخص الباشمهندس عبد الله ود الخلا الذي شرفني بحضوره، ووجدت الإنسان ود المهدي وفي معيته أميرته الصغيرة فيا بختي ويا سعدي، ووجدني عبدووش الذي دخل القلب توووش بلا رتوش فما أسعدني، وكان محمد عزت حاضراً وممثلاً لعصمت وبقية الأسرة الحاضرة الغائبة، وكان ود الزبير متواجداً جسدياً على بعد بضعة أمتار منا ليطمئن على مسيرة الزعيم الإفريقية وحاضراً ببعض من قلبه وذهنه عبر الأثير، ومن أوروبا والمملكة المتحدة حادثني شيخي الفقيه العدل الحبيب محمد صالح وأعطاني بعض من صادق عطفه وخالص وده، ومن آسيا عبر البحر الأحمر هاتفني أبو الكواشف وسيد الفوارس الحاج أحمد السلاوي فيا بختي ويا سعدي، وفي مقرن النيلين في دار عزت بدا السودان أكثر جمالاً والخرطوم أنضر وأبهى حُلة، وأزدانت الموائد بما لذّ وطاب من فواكه ومعجنات ومرطبات فما أكرمكم وما أروع صحبتكم، وهل هكذا يكون الإستقبال والترحاب ومن شط النيل الأزرق هاتفني شاعرنا وصناجتنا الأرب نيام نيام وحادثني الأستاذ البشاوي وولدنا الأديب الأريب ياسين الشمباتي وطللت على القمردينة لاحقاً فوجدت وابل من تحيات طيبات وأمنيات صادقات فهاهم كبار الدانقا أستاذنا على سنكل، وخبيرنا أبكرون، وعلامتنا بشار إبن بُرد، وحبيبنا بكري موسى، والعزيز التلب، بل ومن ساخر سبيل طل علي الأديب الطبيب محمد حسن، وودالقبة، كما بلغني كرم الأخوات الفضليات كريمات الدانقا ودُرها المكنون الفاضلة سمساسم والزهراء والنونو والعزيزة أم حمودي سمسمة، فما أسعدني بكم والله أسأل أن يجزيكم عني خير الجزاء وأن يرفعني إلى مصاف ودكم وأن يعينني على رد نذر يسير من كبير إحسانكم عليّ، وإنني سعيد وفخور بإنتمائي لهذه الكوكبة الفريدة من رجال الزمن الفلاني، وفخور بإرتباطي وصلاتي مع هذا الصفوة المبجلة والرهط المتميز من بني وطني، فأنتم قبيلتي وعشيرتي وحزبي وفريقي وأهلي وحسبي وأضرع لله أن يديم المودة بيننا صادقة وقوية له وفيه إلى يوم لقياه.

  62. مُخير كتب:

    كما لا يفوتني أن أشكر الأخ الحبيب والصديق العزيز محمد هاشم الزوووووول على إتصاله ليلة الدعوة وترحيبه وله كل العذر ونسأل الله أن نلتقي لاحقاً معه في دياره العامرة وشكري لأخي وألفتي وفردتي الوجيه مصطفى ود الزبير الذي ترك ماله وأعماله لينتظرني والسيدة الوالدة قرابة الساعة في المطار للسلام علينا ووداعنا فله مني ومنها أجزل الشكر والتقدير وبذات القدر الشكر موصول لإبننا المغترب الدكتور ياسين الشمباتي (محمود الخطيب) على تفضله بالحضور للمطار لوداعنا، والشُكر كل الشكر لكل من أراد لقائي ولم يتمكن وأتمنى من المولى جل وعلا أن يجعنا بكم جميعاً في المستقبل القريب.
    كما أسجل عظيم شكري وعميق إمتناني للأخ الفاضل طارق أب أحمد على تفضله بتصوير جانب من اللقاء التاريخي لشخصي ونشره بعض صوره في موقع ساخر سبيل وهي لفتة بارعة منه وتضاف لكثير جمايله عليّ.

  63. حاج أحمد السلاوى كتب:

    الحبيب ..الأمير مخير …شرتاى البلد كووووولها .سلام
    لقد افضت فأطنبت.. ولكن بعد دا اقول ليك حظك كويس إننا ما كنا حاضرين أبان فترة وجودك فى أمازونيا .. لأننا كنا حنحلف عليك ونغنى ليك …ما ممكن تسافر ..ونحنا ما صدقنا إنك بجلالك جيتنا زائر ..
    تقول لى قال ليك ؟..إنت لسه شفت حاجة ؟بس تعال تانى !!!
    وهنيئاً للإخوة الزملاء ( كوكبة الداخل ) اللى إلتقوا بك فى دار أخونا الكاشف ابو عصمت ..وسعدوا بك واستمعوا إليك بعد طول غياب…
    جمعنا الله وإياكم فى اسعد الأوقات وابرك الساعات ..آمييييييييييييييييييييييين .

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s