فوضى جد…

Posted: الأربعاء,29 يوليو, 2009 by ياسين شمباتى in اخرى

طالعت فى صحيفة السودانى اليوم خبرا مفاده ان كلية الاقتصاد والعلوم الاجتماعية بجامعة كردفان قد اغلقت ابوابها وانقطعت عن التدريس الى اجل غير معلوم!!! والسبب ان ادارة الجامعة قد قررت فجأة وحسب مزاجها وهواها ان تغير مسمى الجامعة(كردفان) الى (جامعة السلام) !! ولا ادرى ما الحكمة فى ذلك..المهم ان الطلاب احتجوا على القرار الجائر_حسب رؤيتهم_ وقام منسوبى الكلية المذكورة اعلاه بتنفيذ احتجاج سلمى تمثل فى مقاطعة الدراسة والاعتصام بمبانى الكلية_وهذى عادة معروفة ومسنونة وقانونية حسب ما تعارفت عليه الانشطة والممارسات الطلابيةو النقابية_ ولم يثيروا اى جدل او شغب خارج اطار القانون,فما كان من الادارة الا ان افرزت قذاءتها هذى,واكتملت فصول اللعبة حين اخطر صندوق دعم الطلاب منسوبيه او من يفترض به رعايتهم من الطلاب بضرورة اخلاء الداخليات والسكن فى فترة اقصاها 24 ساعة!!! بالله عليكم متى ينتهى مسلسل الغباء والتهميش والتنكيل والجزاءات الذى تمارسه دولتنا متمثلا فى وزارة تعليمها العالى؟؟واين هو هذا التعليم واين علاه؟؟واين هو هذا الوزير المفترض به ان يكون قواما مسئولا امينا على رعيته؟؟
فلنبدأ المسلسل من اول حلقة,ما هو سر تغيير التسمية؟؟هل فى الاسم الاول ما يعيب؟هل باعت الدولة الجامعة الى جهة اخرى فقررت هذه الجهة تغيير الاسم صونا لحقوق الملكية او حتى التسجيل التجارى!!؟؟او ليس لهؤلاء الطلاب رأى فى اختيار الاسم؟وهم من يدفع رواتب الذين يتخذون قرارا بليلة دهماء؟؟ولما تغيير اسم قد يكلف الدولة اموالا طائلة من حيث تغيير لافتات ومكتبيات ومعاملات,ام الامر مقصود مقصود؟؟
والحلقات التالية تتمثل فى اساليب لى الذراع والضرب تحت الحزام,ما ان يخرج الطلاب حسا حتى تتصدى لهم الادارات بقرارات تعليق الدراسة الى اجل غير مسمى!! هكذا تتعامل الوزارة ومرافق التعليم والتربية مع منسوبيها,وهذا من قبيل(الما عجبو يشرب من البحر),اين الاتحادات والاجسام الطلابية؟؟للاسف فمعظمها يتبع للحزب الحاكم..وبعض الحلقات تتعلق بالصندوق الذى يزعم دعم الطلاب,كيف له ان ينذرهم بالاخلاء فى فترة لا تتعدى ال 24 ساعة؟؟اين يذهب الطلاب القادمين من الخرطوم وجوبا ودنقلا وبورتسودان فى هذه المهلة الوجيزة؟؟ولو كانوا لا يملكون مالا,خصوصوا وان(الدنيا اربعا وعقاب شهر)..ولا ننسى ان هناك فتيات يدرسن بهذه الكلية!!
وحقيقة الذى يحيرنى و(مطلع عينى) ولع دولتنا متمثلة فى كل المجالات بتغيير الاسماء,على مستوى الوزارات والمؤسسات والمحليات والجامعات,هل هو التلون واتباع اسلوب الحرباء؟؟هل هو التخبط الاعمى؟؟هل هو المزاج والنفس الامارة بالسوء؟؟ارجح كفة الاحتمال الاخير..
احبتى..هل نصحو فجرا لنجد ان اسم دولتنا تحول الى(جمهورية الشهداء الديمقراطية) ام (اقطاعية المؤتمر الوطنى التعددية) ام (دولة على كيفهم الاحادية)!!؟؟؟؟
لك الله يا وطنى الجريح…………….ونلتقى……..

Advertisements
تعليقات
  1. علي سنكل كتب:

    د. شمباتي ما تحرق أعصابك ساكت وتضيع إجازتك.
    دي حيلة العاجز ، لمان يغلبك تعمل الحاجه الأساسيه ومن باب ( أخير من قعاد ساي ) ، تقوم تتفتق أذهان هؤلاء العاجزين عن مشاريع وهميه جانبيه سهلة التنفيذ. أها في أسهل من تغيير إسم؟ ويعجبوك ناس المؤتمر في التسميات والشعارات والهتافات.

  2. شمباتي و على سنكل سلام

    فعلا ماهرين جدا في تغيير المسميات لدرجة انشاء ادارة في التمنية العمرانية اسمها (الأسماء الجغرافية) و أدو رئيسها و ادارتو مخصصات عشان يغيروا…. طبعن لازم يشتغلوا …. و أريتو هسة (السلام” دا كان اتحقق لكي يسموا عليهو فما زال الاحتراب قائما و ما زال (المعط) في قروش الدولة ساربا

    عندنا في العمارات غيروا شارع (15) في العمارت فصار شارع عمارة دنقس و حق ناس البيت 25 صار “محمود ود أحمد” و هكذا …ياخ عبود لمن عمل الشوارع و العمارات سموها بطريقة منظمة تستطيع من (الفوارة) أن ترسل حاجات لود المهدي في شارع (33) ……

    حاجات تغيز انت عارف ناس الانقاذ ديل ما فضل ليهم الا يغيروا اسم السودان…………………………….. !!!

  3. سهيل كتب:

    براحه يا ولدنا ما يطق ليك عرق — لازم تتعود على الغباء و تمارسو لأبعد حد عشان ما تجيك جلطه – و تعمل لنفسك تحصين عن طريق التعتيم و تغابي المعرفه بالحاصل حولك —
    كسره : بكره نسمع المؤتمر الوطني حيسموهو الحزب العام – وعشان تطلع بطاقه شخصيه لازم تنضم ليهو و كده —

    هون عليك يا رجل و زي ماقالو اعمامك سنكل و عزت – ازعل لكن ما شديد — لسه الزعل راجيك

  4. ياسين شمباتى كتب:

    الحبيب سنكل..والله دمى اتحرق,ومن جيت حاولت ما اتابع جرايد او اى نشرة اخبار داخلية,بس امس للتعترنى مسكت فى السودانى,وياريتنى ما مسكت!!!

    بقاريتش..عليك الله فى ادارة اسمها كدة!!؟؟ دا كلام عجيب جدا,,ما كفاهم وزارة البنى التحتية الما عارف جابوها من وين دى؟؟ طبعا دى افكار ومخططات يهودية بحتة,ومعروفة فى سياساتهم..قلت لى من الفوارة الى شارع 33 ؟؟قوية دى..

    سهيل..الراجينى اكتر من دا شنو؟؟بس ما فضل لينا الا التعتيم القلت عليهو دا..

  5. ياسين شمباتى كتب:

    ود الخلا..سلام..ناس كردفان منو؟؟ دى ادارة الجامعة,وما اظنو خافى عليك انو كل الادارات تابعة للحزب الحاكم,واظنك سمعت بالاعتصام الناجح والفاشل,يعنى لو طالب او اتنين كسروا الاعتصام بكون الموضوع بايظ,والكلية دى كان اعتصامها ناجح مية فى المية..
    وما اظنك ببعيد من اغلاق وتعليق الدراسة بجامعة الروصيرص كلية هندسة الكهرباء,وما جامعة جوبا بمنأى عن ذلك,وقبلها الجزيرة والخرطوم,يا ترى ما اسباب تلك الاغلاقات !!؟؟ هى ايضا مجرد تساؤلات تنشد الاجابة…..

  6. نيام كتب:

    السادة الدناقوة:
    عندما كنت اعمل في احدي الدول كنت مولع بقرأة اللافتات فصادف مرة ان قرأت “الادارة العامة للرقابة العليا للهيئة التنفيذية للطاقة البديلة و التوليد الحراري الخلوي”…وتبين لي فيما بعد انو ديل ناس توليد الكهرباء من الخلايا الضوئية في المناطق الصحراوية(مناطق النفط)..
    هسع دحين ناسنا ديل الله يديهم البصيرة وينها هي مكانة الجامعة اول حاجة بعدين الاسم سالم…
    كسرة:
    د.شمباتي:
    انت جيت تاجز و لا تحرق دمك…والله تتابع جرايدنا دي تمشي التجاني الماحي مع جماعة الرز الملصق في الحلة…

  7. ياسين شمباتى كتب:

    الحبيب نيام..والله على قولك الشغلة شغلة بصيرة قبال كل شئ..وانا زمااااان اتلصقت فى الحلة,خليها بالنية بس..اسه ناس الجامعة ديل ما بيفكروا فى مصير الطلاب وتعطيلهم عن الدراسة وما بيفكروا فى اهلهم الطفحوا المر عشان يعلموهم!!؟؟ قول الطلاب ديل غلطوا,مافى وسيلة تانية يعاقبوهم بيها غير الفارغة دى؟؟ولا هم نسوا تحذير جامعة الدول العربية من تعليق الدراسة المتكرر دا؟؟ وآخر المطاف المجلس الطبى البريطانى رفض الاعتراف بعدد من الجامعات السودانية,ودا كلو نتيجة للسياسات الخاطئة..الله اكبر على الظالم والمفترى فى بلادى..

  8. ابكرون كتب:

    يا يسن : (ما يمكن في سبب تاني ..!!!!) معقول ادارة الجامعه او اتحادها العينتهم حركة السلام الآن يخطأوا منو القال ليك عينهم المؤتمر يمكن يكونوا عينتهم حكومة جورجيا..؟…دي زي لبني قالوا ما يمكن في سبب تاني !!!! معقول الشرطي التابع …لجيش الرب يخطئ…! انت بتتكلم كيف يا دوك…؟

  9. nono كتب:

    شباب لكم التحية/

    هي الفوضي حااااااااااااصله ؟

    لكين منووو يقدر ؟

    يقول؟

    البغله؟

    في الابريق؟

  10. ابكرون كتب:

    السخلة…
    في الدبيب
    في العنكوليب

  11. nono كتب:

    في الكتاحة؟

    الكترابة؟

    الفرناقة ؟

  12. التلب كتب:

    طول بالك يا دكتور الجماعة ديل انتقلوا من مرحلة (لا صوت يعلو فوق صوت المعركة) الى مرحلة (لا صوت يعلو فوق صوت السلام)
    تعرف يا دكتور الدخلت فى البلد دى ما اظن تطلع تانى، يا ريت لو الشغلة بقت تغيير اسماء فقط و لكن الكارثة إنو الجماعة ديل نجحوا فى القيام بعملية تدمير ممنهج لقطاع التعليم فى السودان بشقيه العام و العالى و هى لعمرى كارثة سيعانى منها السودان كثيرا

  13. ياسين شمباتى كتب:

    الحبيب ابكرون..مساك طيب..والله فعلا ما فكرنا فى حكاية السبب التانى دى ابدا !!!ياربى يكون من شنو؟؟؟ اسه الطلاب الاتخرجوا قبل سنة حيكونوا طلعوا باسم جامعة كردفان,طيب المتخرجين السنة دى حيكونا بى جامعة السلام,والسنة الجاية امكن تكون جامعة(البطاطس المقلية) وهكذا كل عام باسمو..

    نونو..اها البغلة فى الابريق !! لازم نتعود نقولها صباح ومساء لحدى ما يقتنعوا بيها..

    التلب..والله فعلا العملوها فى التعليم والصحة ما بتمرق بالساهل,وزدى حاجة مقصودة,عايزين يخرجوا اجيال ترفل فى الجهل وما يقولوا ليهم تلت التلاتة كم,ويلهوهم فى الاكل والشراب والفارغة والبحث عن فرص عمل..لك الله يا وطنى الجريح..

  14. الاخوة المشاركين تحية طيبة هل من تاكيدات علي تغيير الاسم لانو تغيير الاسم عملية طويلة يتم نقاشها في مجلس الجامعة وغيرو من الموسسات المعنية ويطرح للنقاش حتي في زمن الكيزان الوهم ديل.
    هل المقصود جامعة كردفان ام جامعة اخري لانو احترنا صراحة من صحة المعلومة ولا لا .
    لو صحة المعلومة فهناك عمل كبير يمكن ان نقوم به لمعرفة وتغيير ما يمكن تغييره لانو يترتب عليهو ضرر كبير حتي علي الخريجين بمختلف الوانهم السياسية بما فيهم الكيزان وغيرهم من الخريجين في بقاع العالم المختلفة خريجين الجامعة موجودين الان من جميع الكليات في كل دول العالم وقد التحقوا بدراسات عليا ومنهم من اكملها من وقت طويل الامر ليس بالبسيط . عليه ارجو مدنا بتفاصيل القرار ان كان موجود والاجازة تمت في اي تاريخ واي اجتماع ومن كان حضور في مجلس الجامعة وما هي المسوقات حتي وان كانت واهية حتي يكون الرد بخطوات مدروسة وعملية تساعدنا في النهضة بالجامعة وقد تكون فرصة لنلتفت للجامعة من اجل التطوير فالتخرج منها لا يعني انقطاع الصلة بها ونتاثر ونحن بعد التخرج بالمستوي وكل المتغيرات الاكاديمية وسمعة الجامعة سلبا او ايجابا

  15. حاج أحمد السلاوى كتب:

    يا جماعة الخير ..دى ما أول مرة يتم فيها تغيير أسم أو مسمى جامعة أو مؤسسة تعليمية واضرب مثال لذلك وهو جامعة السودان الحالية التى كان أول تأسيسها بإسم الكلية المهنية العليا ( القسم الجنوبى ) ..ثم تغيرت إلى معهد الكليات التكنولوجية بعد دمجها مع معهد الخرطوم الفنى ( القسم الغربى ) ..ثم اخيراً إلى جامعة السودان ..وما سمعنا يوم ساكت زول قال بِغم …أشمعنى دلوقت القيامة قامت لامن تغير إسم جامعة كردفان ..غايتو بقيتو حساسين زيادة عن اللزوم ..ولزوميات ما لايلزم . أفتكر نحنا حقو نناقش ونتكلم عن المستويات المتدنية لهذه الجامعات ( الفكة ..كما يسميها أخونا جبرا )ونهتم وننادى بتطوير أداءها بدلاً من الكلام عن تغيير الأسماء وما شابه ذلك ..
    وبعدين الجماعة ديل مافى حاجة ما غيروا اسمها بداءاً من الوزارات الحكومية المختلفة مروراً بمسميات الوظائف ..يعنى هى بقت على تغيير الأسماء …بس ؟؟؟
    وغايتو جنس غايتو ..يا شمباتى !!!

  16. ياسين شمباتى كتب:

    الاخ الفاتح عثمان..سلام واحترام وترحيب بيك فى دارك..صراحة البوست دا كتبتو بناءا على خبر موجود فى جريدة السودانى وتتبعته فى عدد من الصحف,وطبعا الاخبار دى ما بتطلع كدة ساكت,يعنى بالتأكيد مافى زول كان حاضر فى مجلس سند الجامعة…وطبعا حكاية تغيير الاسم دى زى ما ذكرت انت وذكروا الاخوة قبلا حتأثر فى الطلاب والخريجين,لكن متيييين الجماعة ديل كان بهمهم زول ولا البتضرر منو!!؟؟ حتى تحذير وتهديد جامعة الدول العربية بشأن تعليق الدراسة المتكرر للجامعات السودانية ضربوا بيهو عرض الحائط..خليها تمشى كدة..

    الوالد السلاوى..سلام وشوق..لكن نسكت لمتين على الفوضى دى!!؟؟ المشكلة انو التغيير الان بقى مافى صالح الطلاب والمنتسبين للجامعة,بعدين المغزى شنو؟؟يعنى جامعة السودان دى كانت معهد وحصل فيها دمج,زى جامعة القران الكريم والمعهد العلمى,وتمت اضافة اقسام وتخصصات,بس جامعة كردفان ما حصل فيها شئ من دا,والاسوأ انو الجهات المعنية لم تحرك ساكنا او تبرر فعلتها !!! بعدين الوزارات مازى المؤسسات التعليمية والتربوية,كفاية مغصة وزارة البنى التحتية العملوها جديدة دى !!!

  17. حاج أحمد السلاوى كتب:

    الأخ الفاتح عثمان ..سلام
    أضافة إلى ترحيب ولدنا د. شمباتى وإنابة عن إدارة الموقع .. ضيفاً ومقيماً فى هذه الديار ( سوداننا ) نزيدك ترحيباً وترطيباً إن شاء الله ونأمل أن يطيب لك المقام مع الجميع وتجد غايتك من المواضيع المتنوعة المنشورة وما يتبعها من تعليقات ومشاركاً مع المتداخلين ..
    بس ياريت تورينا موقعك الجغرافى عشان نعرف نتواصل معاك أكثر .. فهل أنت من الصامدين الصابرين داخل دولة أمازونيا ؟؟ أم من الطيور المهاجرة ( الما بتعرف ليها خرطة ..ولا فى إيدها جواز سفر ) ؟ وبعد كدا تدخل فى التصنيف العام..من الشباب ..شباب ونص ..كاشف صغير ..كاشف ونص وخمسه ..والباقى كله هين .
    مرة اخرى ..يا ..هلا ..ومرحب بيك أخاً عزيزاً

  18. التركى كتب:

    اهلا بالدكتور شمباتى
    ياجماعة الخير نحن علمنا قبل كدة اتغير خليكم من اسماء شوارعنا ومؤسساتنا الحكومية …. نفسى اعرف منو عبيد ختم السمو عليه الشارع الكبير دا ؟؟؟؟
    اعتقد انو الفوضى دى بتنتهى لما يكون لينا كلمة فى تغيير والينا وحق اختيار رئيس بلديتنا …. لكم التحايا

  19. د.ياسين شمباتى كتب:

    التركى..والله جبت التايهة تب,يا ديمقراطية بحق يا بلاش..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s