يا رانيه انتى فاضية ؟؟

Posted: الثلاثاء,4 أغسطس, 2009 by aflaiga in اخرى

هو : يا مره جلابيتى وين ؟؟

هى : انا عارفاها ليك بتكون فى الدولاب !!!يا رانيا ( الحبشيه ) شوفى للراجل ده جلابيتو وين ؟؟؟؟

هو : يا مره الغدا وين انا جايى جعان من الشغل ؟؟

هى : ما تصبر انا ما عندى شغله غيرك ولا شنو ؟؟ يا رانيا شوفى للراجل ده الغدا انا ما فاضية .

هو : يا مره البيت ده مالو وسخان كده والشفع ديل وسخانين ؟؟

هى : يعنى انا اتقطع ؟؟ ماكنت  قاعده اغسل فى الهدوم !!يا رانيا قومى قشى الحوش ده وامسحى البرندات ديل .انا ما فاضية ..

هو : يا مره انا عندى ضيوف جايين المغرب .

هى : اسى عليك الله ده وقت ضيوف ما شايف البيت عامل كيف وانا تعبانه كيف ؟؟ يا رانيا جهزى ليك شاى وكيك لضيوف المغرب ديل انا ما فاضية ..

هو : يا مره انا ماشى الصلاه وجاى خلصى الغدا لحدى ما اجى .

هى : يا رانيا عليك الله لحدى الراجل ده ما يجى من الصلاه جهزى ليهو الغدا .

هو : يا رانيا عليك الله بعد ما تسوى الحاجات دى ارحكاكى ناس امى نكفر ليها لانها كانت راقده .. بعدين بالمناسبه انتى بالليل فاضية ؟؟؟!!!!!

 

Advertisements
تعليقات
  1. aflaiga كتب:

    ود الخلا : هو فضيان بالليل ده مش ممكن يكون عشا او سحور او تراويح او قيام ليل اسى الجارى للشين منو انت ولا رانيه ؟؟
    بعدين انتا عندك رانيا ولا مستور مع التانيه ولا بتتحاسب بالثانية ؟؟ نظامك شنو ؟؟

  2. aflaiga كتب:

    شباب : اصلو ود الخلا ده كمكا خش سخن الموضوع ما بيبقى سمح ؟؟ ايه رايكم نسلمو وزارة تسخين الشعب الفضل ؟؟
    الموضوع له علاقه بواجبات عواطف التى يتم تنزيلها وفق نظرية تقصير الظل الادارى لرانيا واخت المرا وام المرا وامكانية وصول السعيدون الى مرحلة انو ما يميز حقوقو عند منو ؟؟؟ وبس …

  3. علي سنكل كتب:

    ود الخلا:
    يا أخي الستره والفضيحه متباريات ، وحسه ذاتو الجهات المعنيه يدها حارقها لبن قريب ده. دحين الملف خليه مستور.
    أفليقا:
    أنا شايف وجود رانيه في البيت غلط من أساسو. عواطف دي لو سعيد ساعدها شويه بي فلاتيه تغسل وتكوي وتقش الحوش باليوميه ، ما بتكون عندها مشكله تانيه. إلاّ تكون أساساً عواطفاً ما ها قدر مسؤوليه العرس والأسره.
    وهنا يعاد للورشه عطبره في أقرب تاريخ.

  4. أفليقا ملك الزوابع
    و السمار الأعزاء سلام

    في غير هذا المكان تناولنا موضوع الشغالات من قبل و أكدنا أن “نفس” الزوجة لا بد و يكون في كل حتة و لا بد من وجود شغالة مؤدبة نظيفة ترعى المنزل و ليس الزوج … و كلامك دا يا أفليقا فيهو نوع من الخيال

    أولن: مافي بنت شغالة اسمها رانية
    تانين: يطرشني ما سمعت مثل هذا الحوار في احدى المنازل

    تالتن: هو سعيد من الهم و المشاكل و الجري وراء المعايش هو ذاتو داير مساعدة….

    قال فاضية قال..!!

  5. aflaiga كتب:

    سنكل : فى سعيدين ما عندهم قشه مره …
    ود الخلا : افو منو البزوغ ؟؟ هو الجهات المعنيه دى انت لسه ما حولت ليها ملفى ؟؟ والله شغلك بقى ما نضيف .. ومنو القال ليك العشا والقيام ما بدورو مساعده والله ان خير العون عون العشاء و قيام الليل ولكن قريب ده سمعت ليك عواطف صحت سعيد عشان يصلى الصبح ولا يقوم الليل ؟؟هو سعيد ده يصحوهو لى شنو ولا شنو ؟؟
    عزت : طبعا انا متذكر البوست بتاع الشغلات لن نعمل شنو مع رانية اصرت انو نعرض مشكلتا الليله وليس غدا
    القال ليك منو مافى حبشية رانييه ؟؟ الحبش عندهم اسم اصلى واسم كنيسه واسم سودان واسم دلع ..

  6. semsema كتب:

    السلام عليكم
    بيان من بت الفَرِيقْ بعد آثار الحريق
    نشكر كل من احال الينا هذا الموضوع للاستفسار وعليه نؤكد
    رغم الحريق نحن في خدمة دؤوب وهي علي قلبنا زي العسل
    نحنا لاقين نخدم سيد الكل (يا روح الفل ) رغم المعوقات لا نحتاج لي زي رانية وغيرها اهاااا …لكن هي الواحدة لو لقت زي رانية تاني الواحدة بتكون الشاغلها شنو هي بتقوم بكنس وغسل وغيرو لتكون ست البيت فا ضية لسيد بيتها وما في داعي للكلام دا رغم الجلابية البيضاء مكوية ورغم الشفع بيلاقوك بابتسامة عريضة !!! علي اي حال دايرين رد اعتبار انو هذا الموضوع عموم وليس له علاقة بالخصوص حسب تقديري بعدين نشكر كل من ساند وشد من ازرنا ( علي سنكل اخو البنات ) ونشجب التلميحات الظاهرة للبدائل الغير مجدية ( اخونا ود الخلا ) وما مساعدة لبناء مجتمع معافى من مشاكل الضرات الحقارات التي تاتي بمنتوج سلبي لنفسيات ست البيت البتنعكس علي اطفالها ورغم كل الجرس الشديدة لامانع لدينا من البديل وهو افضل من التنكيل والتجريم فنحن ان كنا نعمل علي اسعاد احبائنا فلا نريد ان نكون مصدر ازعاج ونكد لهم .
    وابقى ردي ليكم بالقوافي زي قول خالد شقوري لما قال في المواجع

    لما نبكى من المواجع قلنا نرتاح فى بكانا
    قولى كيف نرتاح ونحن نبكى من شدة هوانا
    الليلة رحلة الأشواق بعيدة والشواطئ بعيد مكانه
    حتى فى بر الأمانى السنين هدت قوانا
    كنا نحلم بمداين فيها نرتاح من شقانا
    قولى كيف نرتاح ونحن نبكي من شدة هوانا
    القدر طاوع قلوبنا وخلى بحر الريد حدانا
    ونحن ماصدقنا قمنا نشرب فوق روانا
    دى المشاعر فينا فاضت غرقت فرحة صبانا
    ما النعم مرات بتشقى والله بالريد إبتلانا
    مرة طلت دارنا غيمة ونحن ياما الريد غشانا
    شايلة فى الخاطر محنة جات تعيش الريد معانا
    جات تصب فى الريدة ريدة لو قليل يبرد جوانا
    كيف يا غيمة نرتاح ونحن غلبنا فى هوانا
    ما غريبة على البريدو يلقوا فى الريده المهانة
    ياما كتير أحبه غرقوا فى بحور الذل عشانا
    فى الحقيقة الريدة مره ضقنا مرها فى غنانا
    ماهو قيس بكى من هواهو مانحن برضوا الريد أذانا
    يا زمن لو تصفى نصفى فى البوادى يعم صفانا
    والعيون تصبح مرافئ فيها نرتاح من عنانا
    رحلة الهم بينا طالت ملت التسيار خطانا
    نعمل آيه ما نحن غلبنا فى هوانا .

    ،،،،،،،،،،

    ولكم كل الود

  7. aflaiga كتب:

    سمسمه : انت جيييييييييتى ؟؟ خلاس يا رانيه سمسمه جات ..
    وانا برد ليك ببيتين من شاقر خلودى :
    سمسومه جات خلو الغلات
    ما رانيه حدها مطبخا والمكنسات
    القال منو رانيه بتحل فى يوم محل ست البنات ؟؟
    القال منو رانيا بتشيل هم الولاد ؟؟
    ما رانيا حدها مطبخا والمكنسات
    هم العيال وابو العيال ما ياهو واجب السمسمات
    هو السمسمات لولا العيال وابو العيال كان الله جابن سمسمات
    ما كان بقت كل الارض بس للضكور والعاقبه فى المحزنات
    يا سمسمه اصلو الكلام ما دغرى ليك
    القصه ظاهره فى البلد والقصه بس كده تلميحات
    شان يفهم الفات الحدود حد رانيا وين والسمسمات
    ود الخلا اب قلبا كبير خايف علي حق البنات
    وجزاهو خير رب العباد الاوصى بكل البنات
    بس فى بنات .. يا سمسمه
    بشتين وفى الواطه رقاد يا سمسمه
    الواحده زى شان الضكر
    من الصباح تمشى الشغل
    تجى فاتره جاهزه للشكل
    لو اصلو محتاجين شكل
    ما كان نكوس اصلا ضكر !!!!

  8. semsema كتب:

    افليقا يا غالي
    انت عارف ولا ماك عارف
    تبقى ذكرانا الجميلة وانو اجمل حاجة بيناتنا
    التقينا واجمل باقة سنوات عشقنا وورد المشاعر
    وتاني برد خالد شقوري بلقى مرادي واقول ليك

    بـيــن حـكــايـاتى السعيدة قصة من أشواق فريدة
    جايـه لا لـون لا ملامـح زى نجوم طاشه وبعيدة
    لا هى غـنـيـة ولاها منية ولاها إحساسات جديدة
    ما الـبـحـسـو مـع عـيونك حاجة اكبر من قصيدة

    كلـمـة مـنـك لـو تـعــاتـب أغـلى من كل الغناوى
    والـبـتهمسو بين سطورك عندي بى كل الحكاوى
    الـحروف الفى انتظارك رافله فى الزى السماوى
    عـارفه إنـو الـغـنـيـة غـيـرك يا حنين ما بتساوى .

  9. عباس ركس كتب:

    سلام للحلويين :
    خلاااااااص اكل راسك بي بيتين وشوية شمار وترمس وكبكبيق . غالي بتاع شنو ؟ افتحي نيران تقيلة – أكان قاصد ولا ما قاصد – أشان يآمين – وبعدين ما نبقى في اجاويد ومش عارف ايه !!!! يلا دوري

  10. مُخير كتب:

    ولدنا أفلايقا بُهار القمردينة
    أساتذتنا ضُباط الإيقاع وأسياد الراي
    الزوار وأهل الدار

    السلام عليكم وليكم وحشة

    التحية لأم وأب حمودي وسروية وعبودي على المجادعة الرائعة التي تعكس صدق المودة ومتانة الإرتباط وعمق التفاهم وهما أقوى أسس الزوجية.

    قام بالأمس في قناة الرسالة الشيخ عبد الله المطلق بفتح نيران في واحدة سعودية إتصلت تستفسر بشأن تبرئة ذمتها من مبلغ خاص بشغالة إستغنت عن خدماتها واقتطعته حنقاً من رداءة خدمتها على حد زعمها، عموماً الشيخ بفصاحته المعهودة شلت حريم الخليج وادان إتكاليتهم على الشغالات وإنتقد ما جرته عمالة المنازل من بلاوي لمجتمعهم، واختتم بأن المرأة لو شدت حيلها قادرة على قضاء خدمة منزلها بنفسها ودعا سعيد لمد يد العون ما تيسر مستشهداً بأن سيد الخلق كان يساهم في الخدمة المنزلية.
    إضافتي بإيجاز هي أن لا ضير إذا توفرت الموارد في الإستعانة بخادمة لجزء من خدمات المنزل، بل تصبح ضرورة إذا كانت الزوجة عاملة، غير أن المرأة الحصيفة هي التي تتولى إدارة منزلها وتلبية حاجات بعلها بالكيفية التي تحول دون وقوع أية كوارث أو ورود شكاوي أو حدوث منغصات.
    .

  11. nono كتب:

    semsema

    افليقا يا غالي
    انت عارف ولا ماك عارف
    _______________________

    نسوي شنوووو انحنا معنا

    ناااااااااس مااااااااااااك؟؟

    اوماااااااااااااك ديل؟؟؟

  12. aflaiga كتب:

    ركس : انت تغيب سنه وتجى تولع النيران ؟؟ كدى اعتذر عن الغياب اول شيء .تدور يمين ولا شمال ؟؟ سمسمه دى ما بتاعة لف ودوران ..
    مخير: تسلم يا شفيف مع انك زغت من الملوحه بجيتك السريعه .
    نونو : الشبكه لسه ولا شنو ؟؟

  13. حاج أحمد السلاوى كتب:

    الدينمو ..ولدنا أفليقا ..وحرمه أم حمودى ..
    غايتو ما قصرتو ..تب ..وكانت احلى مجادعة ..

    كلـمـة مـنـك لـو تـعــاتـب أغـلى من كل الغناوى
    والـبـتهمسو بين سطورك عندي بى كل الحكاوى
    الـحروف الفى انتظارك رافله فى الزى السماوى
    عـارفه إنـو الـغـنـيـة غـيـرك يا حنين ما بتساوى

    وليكم الإتنين أجمل تحية … من عمكم السلاوى .

    وما تنسونا من صالح الدعاء ..

  14. مُخير كتب:

    الحبان في كل مكان
    سلام وصباح الخير
    أفليقا: أوع تكون خوفتك المديدة حرقاني بتاعت حبيبنا ركس … بتنا سمسمة عاقلة وصاحية للون وكان في عقوبات حتآخذها سُكيتي …
    أخونا ركس قصدو يسخن الفول ويبهر البوش بغرض إجتذاب الجماهير لساحة الحوار… فخلي روحك رياضية
    عباس ركس: العود أحمد … ويا حبابك يا الله جابك … لينا منك طولة… سخن إنت حوارنا بشمارة وقولة…
    حاج أحمد السلاوي: أنت بلّ حبل الصبر وخليك ماسك الزمن يا حكم …..
    فضلن كذا اسبوع وتكون في الجك … ونقول مقدماً رمضان كريم … وسودان كريم والله أكرم…

  15. semsema كتب:

    السلام عليكم
    وصباحكم يا صباح الفل
    عباس ركس: الزمن دا الاجاويد زاتم دايرين ليهم اجاويد
    واخير نطفيها سريع اكان ولعت في ناس بصبوا البنزين
    مخير : مرات الشمار اكان زاد بيبقى الفول مُر وما بيحلى
    الا بي حبة شمار خفيف واظن عباس زي ما قلت ما زودوا خالص
    نونو: شنو يا بتاعت الغنا ما سمعت بي غنية الكاشف انت عارف وافليقا تم الغنية علي اي حال شوفي زول يعمل ليك مذاكرة عشان تعرفي المقصود ولا شنو ؟ انت لسة شبكتك طاااااااشة
    ابونا وعمنا السلاوي : نشكر لك التشجيع المستمر الذي يزيدنا بكم القاً ونحن داخل حوشنا الصغير وتحت رعايتك ووصايتك

  16. aflaiga كتب:

    شباب : حدث فى مثل هذا اليوم ..
    قبل ثمانيه سنه كده وانا قاعد فى محل الشغل جات خاشه بت كده رابطه راسا بخمار ودخلت للمدير شايله اوراق وطلعت للمدير الادارى ومنو للمدير الفنى وبعد ساع لقيتا ليك مع المدير الفنى فى مكتبى وكنت وقتها مشرف قسم صيانة تلفونات قديمه وتاهيلها للسوق مره اخرى قام المدير الفنى قال للا يا افليقا دى سمسمه الادارية الجديده حتكون معاك تحت اشرافك فى مكتبك ومن اليوم داك وهى تحت اشرافى لى يوم الليله مع تبديل الاشراف بيننا احيانا !!! وفى نفس هذا اليوم من نفس العام بقيت افكر فيهو اتامل واقيس بمحاسنك بمن يا الدره الما ليك تمن .
    المهم يا اهل الله بقينا شغالين انا وسمسمه فى مكتب واحد انا اصين التلفونات وهى تنضفا وتلمعا وتكيسا وتعرضا وتبيعا واظن دى كانت بداية توزيع المهام بيننا انا اصين وهى تكيس وتعرض !! وبدت بيننا مشاكسه لطيفه وشكله كل يوم انا اشاغلا بعنف وهى تستفزنى بعنف ويمكن ده الخلى طابع حياتنا يكون دايما مبنى على المشاكسه الى تنتهى دوما بسماح وحب من جديد .
    اها قعدتافكر وانا الايامات ديك كايس لى مره يا ود يا افليقا وين المرا وين المرا وما اتخيلت ابدا انو الزول البشاكلو كل يوم ده ممكن يكون فى بالى .
    لحدى ما يوم لفت انتباهى زول زميل لى انو اسى انت تفتش فى مره وجنبك المرا الهدية الرضيه المؤدبه الملتزمه دى انت مجنون ؟؟
    واتارى كان فى اتافق فى شكل مؤامره بين الزملاء انو يلفتو انتباهنا لى بعض وفى لحظة واحده صاح كل من : منو انا سمسمه – منو انا افليقا ؟؟ مستحيييل مستحيييييييييييل .. واتارى غير المستحيل ما بيصير ..
    ومن ديك وعيك .
    البوم تمر علينا الذكرى السنوية للشيخ العارف بالريد والهوى مولانا ( عرس الزين ) وهى مناسبة عظيمه للوقوف لاخذ العبر وتقييم المسير .
    ترعفوانا مفكر اسوى شنو ؟؟؟
    مفكر امشى اطلب سمسمه من ابوها تانى ونبدا صفحه جديده ..
    لكن طبعا شروط العقد القديم لازم تتعدل مع الازمه الاقتصادية العالمية ومع التجارب العميقه .
    طبعا لو عزمناكم حتكون عزومة مراكبية لانو حتكونو حقنه فى شكل دفنه !! فتمنياتكم ودعواتكم لنا بعمر مديد وعقبال العيد المئوى فى الكازوزه !!
    طبعا لانو الثوره فى مرحلة الانتقال من الشرعية الثورية للدستورية حيكون ملمح احتفال السنه دى عملى جدا لوقف الصرف البذخى على احتفالات عيد الثوره وحنكتفى بافتتاح عدة مشروعات منها شجن عداد الجمره الجديد وافتتاح خط تغذية انبوب الغز القاطع ليهو كم يوم وتعلية المرحله التانيه من السور الشمالى للبيت وتخريج سروية من الروضه وتجنيد عبودى فى الروضه دورة مغسة السودان 1 – وتمليك وسائل الانتاج لسمسمه وهى عباره عن خلاطه + غساله لاخراج سمسمه من سقف النقه فى المطبخ بعد الحريق الاخير الذى نفذته قوى البغى والعدوان .
    وعشان الاحتفال يكون عملى جدا احنا حنطفى شمعتنا الساعه 12 مساء ولانو الوقت بيكون اتاخر فما عاوزين نزعجكم وعقبال عندكم وانشاء الله فى السمح .
    نترك المايكرفون للاخت سمسمه لانو هى اكثر واحد ممكن يعبر عن الثمانيه سنوات التى استاجرنى فيها ابوها بعد ان وجدتها تسقى الماء فى بئر الجريف ..
    نتمنى من الله ان يخفف على كل مستاجر عدد حججه وان يصدر عفو ربانى عام عن بقية الحجج والا نذيد من عندنا ما استطعنا الا بمقدار ما نقدر انه نعم المولى ونعم النصير .

  17. ياسين شمباتى كتب:

    الحبيب افلى..مبارك زواجك ومن جديد جيت تانى تبدأ قصة غرام ما انتهت..كل عام وانتم الحب والمودة والتفاهم..وتحياتى وتبريكاتى عبرك لسمسمة..

  18. semsema كتب:

    ياحلاة العشرة وكتين تبقي صح صح
    ويا حلاة الريدة وكتين تصفي تفرح
    ويا حلاة ليلاً معاك ما درنا يصبح
    ويا حلاة صبحاً تكون أنت المصبح
    كل سنة وانت طيب افليقا

  19. aflaiga كتب:

    سمسمه : عشان الناس ديل ما يقولو قلبنا البوست حديقه وغراميات لكن اقول ليك خليهم يقولو نديهم البيتين ديل ونتم الباقى فى البيت :
    ويا حلاة حمودى وكت يبكى و تشيلى
    ويا حلاة حمودى وكت تكبرى يشيلك
    ويا حلاة لمتنا فى شاى المغيرب
    وربنا يخليكى ما يجيب يوم حليلك

  20. ودالفتيحاب كتب:

    الفليقا
    وسمسمه
    كل سنه وانتوا طيبين وربنا يديم عليكم نعمة العلاقه الطيبه والحميمه ،ربنا يحفظكم من العين ويحفظ لكم اولادكم وتشوفوهم اعلام يضيئوا افق السودان بعلمهم واولادهم ،(يعنى بقيناكم جدود من الامس ) .
    والله كنا سعيدين بسعادتكم والكلمات خير معبر عن هذه العلاقه الطيبه ،ومادايرين نفسد عليكم ليلتكم فتكم بى عافيه حسن وكل سنه وانتو طيبين .
    إنت يالشمباتى اقعد لى كدى أحححححححححى منك .

  21. ودالفتيحاب كتب:

    رانيا فى السماء
    كله عليها
    دى ماخير ترجع أهلها إمكن زول يحن عليها شويه.

  22. عباس ركس كتب:

    الافلايق والسماسم : كل سنة وانتو طيبين وحلوين وتامين . والله يبعد عنكم العبابيس الحاقدين !!!!

  23. الزهراء كتب:

    الاخ العزيز افليقا والاخت الغاليه جدا سمسمه
    كل عام وانت آيه رمز للحب والوئام
    وكل عام وانتو في سعاده وفي سلام
    ويا رب دوام مفرور جناحكم في الغمام
    يارب كمان طول العمر وتتهنوا لينا في كل عام
    ربي يحفظ لي ودادكم وتبقوا قدوه لكل همام

    التحيه لكم مجددا وكنا دايرين نرسل التورته من عندنا لكن طالما ما دايرين تتعبونا الساعه 12 بالليل سنحاول تعويضكم اياها في وقت اخر
    ويارب يكون عيد ميلاد سرويه صحبتي

    ويا حلات لمتنا بيكم
    ويا جمال عرفتنا ليكم
    وانتو مكسب ما خساره
    ونورت سوداننا بيكم

  24. أبو الأفلاق و سمسمة سلام

    (وربنا يخليكى ما يجيب يوم حليلك)

    انت من زمن النسوان بيموتو في الأول… حليلك

  25. التركى كتب:

    كل سنة وانتو فى سعادة وهناء … ربنا يديم المحبة والاحترام

  26. aflaiga كتب:

    شباب وكل الحلوين المرو من هنا :
    مشكورين على التهنئه والتبريكات . واهوة بقيتو شاهدين انو انا فى العيد الثامن للثوره عملت تهنئه للسيد الرئيس عشان ما يجى يوم يقول ما هنونى وعشان اجى اقول ليهو :
    فى عيدك التامن مش هنستك وفى عيدك التاسع مش هنيتك كدى زح شوية يا عزت وفى عيدك العاشر مش هنيتك …
    ركس : مثلك لا يحسد فالعين مليانه بحب الجميع يا غالى . انت ما عاوز تجى البلد ولا شنو ولا مستخسر فى سهيل الخروف ؟؟
    بقاريتش : نوبى معرس شايقية وشايقى معرس نوبيه انا بحكى ليك وانتا احكى ليا .. الحاصل بيك والحاصل بيا ..

  27. سهيل كتب:

    سمسمه و عبدو عقبال 100 سنه حب ووئام – وانا حاجز عبدالله لي بتي إنشاءالله من هسي (الله يجيبها)

    لكن يا د.عزت كتلت حيل الراجل …

    ركس : دا كلام يا راجل ( قدي تي بربال ) – حمدلله على السلامه

  28. عباس ركس كتب:

    سلام للحلوين :
    شــــــــكرا على السؤال ,
    افليقا : انشاء الله قريبا نتشرف بشوفتكم ,
    سهيل : كيفك ؟ ( يا ني قدي بربال !! )
    المرطب : كلامك صحي . آخر احصائية للوفيات النسبة 1 : 4 , الواحد للنسوان طبعا . ودا طبعا عشان ود الزبير وقف كتيل النسوان !!! ليه ما عارف ؟؟ نزنقو هسة يقوم يطلع لينا بي قصيدة !!

  29. سهيل كتب:

    , اها – و قومن يالنسوان موتن !!! كده كيف يا ركس

  30. من التقاطع كتب:

    جيتكم عابر ولما لقيت لمتكم عجبتني وقلت احسن ادخل ولما دخلت لقيت نفسي قعدت وعجبني كلامكم بس ماتخافوا ماحا اطول ….
    سلام للكل واخص افليقا وسمسمته واقولكم ربنا يديكم طول العمر ويدوم عليكم نعمة الصحة والعافية بعد داك الباقي هين .
    الخلاني ادخل انه انا زاتي عندي سمسمه اقصد كان عندي سمسمه هدية ورضية ووديعة وفيها نقاء حبات سمسم القضارف المطري ….
    ولكن شوية شوية بقت تكبر ويتغير شكلها ولونها لمن بقت حبة بطيخ وشوية شوية بقت حبة قرع وشويه شويه اتنفخت بقت قرعة ماتعرف راسها من كرعيها ..
    وهسه انا محتار ياربي اشققها و لا اديها الشمس يمكن تكش وترجع تاني زي اول ؟
    افيدوني

  31. ياسين شمباتى كتب:

    الاخ المن التقاطع_ياتو تقاطع ياربى؟؟__سلام ومراحب كبيرة..ربنا يحفظ ليك سمسمتك ويرجعها ليك زى اول وامكن احسن كمان,,بس شيل الصبر..بعدين شكلو سمسمتك دى جارت عليها الطبيعة او هى جارت عليها !!ما تزهج تديها الشمس ساكت..وخليك قريب..

  32. حاج أحمد السلاوى كتب:

    الأخ من التقاطع ..يمكن سنار التقاطع …يا شمباتى .. خلى عبدوش يمشى يقابله.. لأنو يبدو من أسلوبه إنو شخص ظريف جداً وحيكون إضافة للدانقا..ونيابة عن إدارة الموقع نقول ليهو مرحب بيك أخ وصديق وزميل..وما تنقطع ولا تحرمنا من إبداعات قلم الساخرة دى..
    وبعدين السمسم دا زاااااتو خشم بيوت ..وفى ناس بيحبو السمسم الكبار زى أخونا خالد مدنى ..أما سمسمتك ( عواطف ) الكانت صغيرة وبقت كبيرة ابقا عليها عشرة لأنك إنت السبب فى إنها كبرت لحد ما بقت قرعة ( حسب وصفك ..أنا ما جبت حاجة من عندى ) ..الرجال ديل لا بيعجبهم العجب ..ولا الصيام فى رجب …لامن الواحد عاوز يتزوج يقعد يفتش البنات السُغار وبعد كام طاشر سنة عاوز يرجع ويلاقيها ياها زاااااته ..لا اتغيرت ولا إتبدلت ..بعد ماتكون جابت ليهو الوليدات والبنات وما قصرت ..تب ( مسح جوخ ..يا ابكرون ..الإجازة قربت )..أمسك سمسمتك عليك وما تفرط فيها وما تديها الشمس أنها حتنشفها ليك.
    غايتو جنس غايتو ..يا الرجال ..
    وخليك قريب يا المن التقاطع

  33. خالد مدني كتب:

    يا سمسم القضارف سلاوي كبير وعااااارف … برضو انا يا حاج بتاع السمسم الكبار … يا اخوانا احكمو بيني وبين حاج السلاوي ده … اصل الحكاية انو الحاج زمن القمردينة الحليلو قال انو ندي القلعة مسمسة … طيب بنات عجاج ديل يكونو شنو ؟؟؟

  34. ياسين شمباتى كتب:

    خالد ود مدنى..طبعا انا بقيف فى صف ابوى,,لكن كمان ندى منو المسمسمة!!؟؟؟؟ وهن بنات عجاج هينات؟؟ديل من زمن اسكت..خلى الطابق مستور…

  35. حاج أحمد السلاوى كتب:

    د. شمباتى …
    اللهم إنى صائم ..
    رمضان كريييييييييييييييييييييييييييييييييييييييييييييييييييم .

  36. ياسين شمباتى كتب:

    الوالد السلاوى..الله اكرم…خلاص بننتظرك بعد الافطار..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s