الغلطان منو؟؟؟؟؟

Posted: الخميس,6 أغسطس, 2009 by ياسين شمباتى in اخرى

احبها حبا جما,لم يأبه لتحذيرات وتنبيهات الآخرين بسوء خلقها وضيق صدرها وفساد طبعها,اعماه الحب عن تحرى الصدق والطيبة فيها,كانت جميلة جمالا يفوق الوصف,لذا اخذت بلبه ومجامع قلبه..قال له اخوته ان ثلاثة رجال قبله قد بنوا بها,وما طلقوها الا لاكتشافهم حقيقتها بعد تورطهم معها شرعا !! لكنهم كان يكرر عبارة اصبحت تقفز من طرف لسانه(( امكن الغلط ما منها يا اخوانا))..

وللامانة فانها كانت علاوة على جمالها وحسنها,لبقة تجيد الكلام وتذويقه وترنيمه,كانت مغناجا تأسر كل من بقلبه ضعف ومن برأسه خفة..كانت تظهر خلاف ما تبطن,دمثة الاخلاق لمن ينظرها اول مرة,تتمسح بمسوح الدين والرحمة والرهبانية,فاذا ما تنمرت خلعت هذا كله وارتدت الفحش وسئ الخلق وفجور الخصومة..ولقد كانت تفخر بانه ما من رجل من ازواجها السابقين قد اعرس بها اكثر من ليلة!! وربما كان هذا ما يدفع بالآخرين للارتماء تحت قدميها وجمالها بحسبانها قريبة من الصفر الذي يرجون!!

للاسف,اصر صاحبنا على الارتباط بها قبل ان يسبر اغوارها ويعرفها حقيقة لا زيفا,ولم يمر شهر الا وهو قد اكمل زفافه وسط دموع امه وحسرة اخوانه وشماتة اعدائه وهمهمة جيرانه,وبعضهم قد عقد رهانا على مدة زواجه!! ولم يمر الشهر الثانى الا وانيابها قد غرزت فى احشائه واستخلصت لنفسها ما لذ وطاب لها,اما هو فقد تجرع لياليه سما زعافا وقضى سحابات نهاره علقما لا يطاق,لم يحاول احد من الاقراب او الاغراب التدخل,لا تهربا ولكن خوفا من لسانها وما قد يلحقهم من اذى..

اصبح يوما وانقلب ناحيتها وقال لها : (طلقانة)…واستحم وارتدى ملابسه وخرج لعمله,ومن هناك اتصل بامه ليسال عن احوالها,فسألته عن زوجه فاخبرها بانه قد طلقها,ولما سألته عن السبب اجاب: (مافى حاجة,بس اتأكدت انو الغلط ما منها) !!!…

ونلتقى……

Advertisements
تعليقات
  1. ياسين شمباتى كتب:

    احبتى..دعونا نناقش معايير الزواج الناجح ومفهومنا او اعتقادنا عن الزواج,,ونظرة المجتمع الشرقى للرجل وللمطلقة وللمرأة التى تأخرت عن الزواج..ودورنا فى الاصلاح المجتمعى..

  2. مُخير كتب:

    دكتور ياسين سلام
    الحبان في كل مكان سلامات
    يعني يا حاج الراجل كان عاوز يآخذ فكرة، وبالتالي توصل لنتيجة بعد تجربة، إذن علينا أن نحمد له أن سعى وحاول الإصلاح وأجره على الله…
    أهة إنت رأيك شنو في قصة الإصلاح المجتمعي دي…!!!
    وما هي إسهاماتك المرتقبة ؟؟
    وهل يمكن أن تدق سدرك وتشيل ليك أربع لغرض إصلاحهن؟؟؟ …
    أجب !! فمن يدري ربما يكون الخير وصلاح بعضهن على يدك ؟؟؟!!

  3. aflaiga كتب:

    شمباتى : سجمى غلبك ولا شنو بقيت داير ناقشو ؟؟؟!!!
    يا زول اذا بليتم فاستترو عادى ممكن تقول خطبت وجاى الاجارزه الجاية اعقد شنو يعنى فى زول حقول ليك شيئ ؟؟
    والله يا شمباتى انا شخصيا لى ظمن ما سمعت عن زواج قريب ده بقصة حب القصه بقت حسابات كان للبت او الولد ..
    وزى ما قال حسين خوجلى الله يطراهو بالخير :
    زمن الحب بالجوابات وزمن يقبضوك فى الحله يدقوك ورمى الجواب من تحت الباب والانتظار فى لفة الدكان انتهى الان زمن الحسابات انا محتاج شنو والمره دى بتقدم لى شنو ؟؟؟
    تعرف فى ناس يا شمباتى بيقيمو الراجل بالكالكوليتر والمره برضو يعنى نظام مقاوله وتوقع يوم تسمع :
    هو : طيب يا ود يا عبدو انت محتاج لى شنو ( تحجج امك وابوك – تبنى بيت – تركب عربيه – تشتغل شغله خفيفه ومربحه – تنوم بدرى وتاكل كويس – تكون مصاريفك واره طوالى وما تنقطع – تمشى تحضر بره – تشتغل ليك فى شركة اجنبيه مرطبه ) حلو طيب الخيارات شنووووو ؟؟
    اولا – علوية الشغاله فى ال un طيب دى بريكه ( يعنى كبيره ) ونيشه ( يعنى شينه ) لكن مرتنبا دولار وعندها شقه فى ساريا وعندها سفره لى بره كل سنه — طيب دى بتوفر لى شنو ؟؟ يعنى زى تلات ارباع الحاجات الانا محتاجا – طيب بكون خسران شنو ؟؟ شناتا وكبرا ديل مقدرو عليهن تانى فى شنو ؟؟ مافى شيء طيب اديها 80 % .
    ثانيا – نهله زميلتى فى الجامعه طيب دى عسوله وقرمبوزه لكن مجففه وغلبانه – طيب دى نخليها للجامعه عشان الواحد حياتو اثناءالجامعه تكون مفرهده ولو الله سهل ليها وامورا زبطت نشوف تقييم جديد طيب دى اديها 50 % .
    ثالثا : اها يا شمباتى عندك ثالثا ولا نديك خيارات ؟؟؟

  4. عباس ركس كتب:

    سلام للحلوين :
    اخونا افليقا قال اول حاجة نعتذر عن الغياب . . . وغلطان بعتذر .
    عجبتني حتة قريبة من الصفر دي , يعني دبلوماسي وكدة !!!!
    شمباتي سلامات .
    عدم التواصل لا يعني انقطاع المتابعة . . . عشان كدة بنسأل عن اخونا ابومحمد – دبي ؟؟ عساه بخير .

  5. (ولو عاد بى الزمن مرة أخرى لما لفظت كلمة «طلقنى»، ولكن الإنسان لا يتعلم ببلاش، تزوجت وأنا فى الخامسة والعشرين من زميل لى فى الشركة ولأن صديقاتى وزميلاتى فى العمل أخذن يحذرننى بأن «زوجك ما تعوديه على الطاعة» فلم أكن أتحمل منه كلمة، وصممت على تأخير الحمل حتى أكون مستعدة، فلم يوافق على هذا الكلام واختلفنا وعندما ارتفع صوته لم أتحمل وذهبت لبيت أمى التى قامت بدورها بتشجيعى على موقفى وعندما جاء واعتذر لى أحسست بالسعادة ورجعت البيت شاعرة بقوتى وأنه لم يتمكن من الاستمرار فى إغضابى،

    و أصبحت كلما وجدت شيئا لم يعجبنى فى تصرفاته أترك البيت ليأتى ويصالحنى إلى أن جاءت مرة ولم يحضر ولم يسأل عنى فثرت وطلبت الطلاق وفاجأنى بموافقته، بالفعل طلقنى، )

    أها يا ياسين الغلطان هنا منو؟

    («سافر فى عمل بمدينة أوروبية لظروف عمله و لتعودى على ظروف عمله وسفره من حين لآخر وبقائى أنا مع أولادى لم أكن أسأله عن سفره أو من يرافقه فقد كنت أعطيه الأمان التام، وبالصدفة البحتة اكتشفت من أحد زملائه أنه مسافر ولكن ليس لظروف عمله وبعدما عاد سألته فعرفت منه أنه متزوج منذ أكثر من عام من زميلة له تشاركه دائماً سفرياته وحفلاته.)

    و هنا الغلطان منو؟

    (لأنه على حالته من إدمان الكحوليات وطالبته ونصحته بأن يعدل من سلوكه ولكنه ثار وضربنى فلم أسكت وتركت له البيت وطلبت الطلاق ورفعت عليه قضية لأثبت استحالة العيش مع إنسان بهذا السلوك)

    طبعن في الثلاث حالات الفوق دي الغلط دائما مشترك….

    علة نصيحة:

    – أنصح كل امرأة ألا تسمع لأحد مهما حصل
    – لا تخرج من بيتها
    – ما تضع الحبل على الغارب
    – و شعرة معاوية دي ما تقطعها
    – و لا تقنط من اصلاح خاصة في حكاية الكحوليات دي

    لأن الطلاق صعب و أى مهرب منه هو الحل السليم

    كسرة:
    طبعن الغارب دا سنام الجمل فلا يمكن ترك الحبل عليه ببساطه لان الجمل كان نفخوا ساكت حيقع الحبل و يقوم يمشي يلعب بي ضنبو

  6. عباس ركس كتب:

    العزيز عزت : تحياتي
    لكن ضنبو دا يستفيد منو شنو ؟ ما لازم يلعب بيهو !!!!!

  7. ركس ليك وحشه

    و الله فعلا …… خلاص ما يقوم يمشى على حل شعره أصلو ما عندو شعر !!!!

  8. بعدين يا شمباتي هسة نحن نمشي نعلق بي غادي في ساخر سبيل برضو…. أركز

  9. aflaiga كتب:

    ركس المفتح : زى ما قال عادل امام :
    مادام فى ضنب يبقى لازم فى لعب بالضنب وهو الله لق الضنب ده عشان يهشو بيهو الدبان ؟؟
    فى اول العلاقه يهتم الرجل بكسر قورن المراه وتهتم المراه بربط ضنبو .
    طبعا الضنب ده لو علقو فيهو كم شافع على كم مسئوليه على كم نظافة اول باول بيبقى تقيل والنظرية الفيزيائية تقول بان الضنب لمن يتقل يصعب التلاعب به اسى انتو ما سمعتو بى قصة الحمير الربطو ليها البطيخ فى ضنبا ؟؟
    مره حكيت القصه دى ناس حمودى وبقو يضحكو وسالونى اسى يا بابا اسى عليك الله فى ضنب بيشيل ليهو بطيخه ؟؟ قلت ليهو بتيخه ؟؟ بتيخه البسيطه دى ؟؟ انا بعرف ضنب مربوط فيهو تلاته شفع وواحد فيهم قدرك كده ..

  10. ياسين شمباتى كتب:

    الحبيب مخير..سلام..لك التحية والاحترام وانت تقرأ بعضا مما ضمنته الاسطر..طبعا قصة الاصلاح المجتمعى رسالة وواجب يجب ان نحاول المشاركة فيه,ولكن للحب حكمه وقيمته ايضا,يعنى ما نخلى قصة الاصلاح دى شناعة بقدر ما انك تنوى المشاركة فيها..وصاحبنا الفوق دا تجربتو فاشلة لانو تابع السراب وتوهم غير ما يرى..

    الحبيب افليقا..سلام..طبعا فى خيار تالت,واحتمال رابع,يعنى لو حاولت تعمل خلطة من ديل بيطلع شنو!!؟؟ بغض النظر عن المعطيات ممكن تطلع بعشرة خيارات..لكن اقول ليك الحب موجود عند الكثير من شباب هذا الجيل,لكن تعرقله وتكبله التقاليد والعادات والتخلف الفكرى..
    لكن اكيد الاجازة دى خطوبة بس باذن الله,,العقد دا الا عزت يحلف طلاق انو ما يقلع جلابيتو الا بعد العقد!! وكدة يكون ورطنا تب..

  11. ياسين شمباتى كتب:

    عباس ركس..حمدالله على السلامة وبطل الجفا وورينى اخبارك يا حبيب,,ما عرقنا ليك طريق فى المملكة..خليك قريب يا راقى..

    الحبيب عزت المرطب..والله الاكلشيهات دى رهيبة جدا ومعبرة عن واقع معاش واحداث تتكرر يوميا,وزى ما قلت فى معظم الحالات بكون الغلط مشترك..لكن نصيحتك للمرأة بانها ما تسمع كلام اى من كان دى حقو تكتبها بالخط العريض وتلونها بالاحمر,لانها_اى المرأة_بطبعها سميعة للآخرين,وغالبا ما تخرب بيتها بسبب وشاية او نصيحة فاسدة..
    وانا راكز شديد,بس لانو فى بعض الاخوة ما بخشوا بى هنا او ما بعرفوا الطريق فقلنا نشركهم معانا فى المناقشة والتحاور..

  12. nono كتب:

    شباب لكم التحية/

    عن النبي صلى الله عليه وسلم : ( الدنيا متاع وخير متاعها المرأة الصالحة ) .

    وروى ابن ماجه عن أبي إمامة رضي الله عنه عن النبي صلى الله عليه وسلم أنه قال : ( ما استفاد المؤمن بعد تقوى الله خيرا له من زوجة صالحة ، إن أمرها أطاعته وإن نظر إليها سرته ، وإن أقسم عليها أبرته ، وإن غاب عنها حفظته في نفسها وماله)
    فسعيد وعواطف هم القاعدة لإنشاء مجتمع فلابد من اختيار الزوجة( عواطف ) الصالحة ……

    قال صلى الله عليه وسلم : ( إياكم وخضراء الدمن . قالوا : وما خضراء الدمن يا رسول الله ؟ قال : المرأة الحسناء في منبت السوء ) . ضعفه الألباني …

    كسرة / عشان مااااااا نبقي في الغلطان منووو؟؟؟؟

    للحديث بقية…….

  13. aflaiga كتب:

    نونو : تحياتى وانت تذكرينا دوما بقول السلف فى افعال الخلف ..
    تعرف يا شمباتى ات احسن حاجه تسويها تعمل اعلان ( شمباتى يحتاج لعروس ) وتمسكنا انا وستريكر لجنة المعاينات عشان البايظ نوزعو للكواشف وتدينا معاييرك ننزلا فى التقييم وتحدد اخر موعد للتقديم وانو شمباتى غير ملزم بقبول اقل او ادنى عطاء – وطبعا اللجنه دى لازم يكون عندها حوافز انشاء الله من المتقدمين ذاتو !!!
    كدى فكر فى قصة اللجنه دى لحدى ما نتلاقى بالدرب ونحنا طبعا مطلبين واحد عزومه مغربيه فى الاقمار قاعدين نرتب ليها ..

  14. nono كتب:

    aflaiga \ ( حاااااااااااااااااج نظرية الحلاقة العصرية )

    عشان البايظ نوزعو للكواشف ؟؟؟؟

    الكواااااااااااااااشف زنبهم شنووو تديهم البضاعة المضروبة؟؟؟

  15. نيام كتب:

    اوهـ اوهـ الراجل دخل خط ستة…يلا يا افليقا اقفلوه جوه الشبكة…

  16. الزهراء كتب:

    التحيه لكم ايها الاعزاء
    التحيه ايضا للدكتور شمباتي وهو دائم التركيز على المواضيع الاجتماعيه الحساسه
    نونو :احتجيتي كده مالك اطمئني انتي ما مع الباااايظ ده ماتزعلى نفسك!!!!
    ولما تكون شبكتك قويه بيكون عندك كلام درر يا غاليه
    افليقا: النبي اكان ما دخلتونا انا وسمسمه في اللجنه معاكم لان اي لجنه لازم تنبثق منها لجان اخري فتتولد لجينات لاعطاء افضل النتائج المرجوه.
    وانا وسمسمايه اختي دي خلي لينا رفع سعر العريس وكده حتى نتمكن من الحصول على افضل العروض واغلاها.

  17. حاج أحمد السلاوى كتب:

    الدينمو ..افليقا ..

    (وتمسكنا انا وستريكر لجنة المعاينات عشان البايظ نوزعو للكواشف ) …
    الكلام دا إنت قدروا .. وبتتحمل عواقبو ولاّ ساكت؟ نحنا الكواشف ديل بايظك دا زااااتو ما عاوزنو ..(أنا أتحدث بلسان الكواشف كووووولهم ..كُبار وُسغار ) والعندنا راضين بيهو وعاجبنا …
    ولاّ شنو ..يا الكواشف؟

  18. طارق أب أحمد كتب:

    تعرفوا يا شباب عشان ما كل مره نقول الغلطان العامود الغلطان المرحوم ولا كان قلنا كلام جميل نقول باركوها و الجاتك فى مالك سامحتك

    نقوم نعمل مدرسه تدريب على الزواجه على وزن القياده يدخل فيهو المتأهل كورس تأهيلى 45 يوم كونفاينمنت يذوق فيها كل أصناف التعذيب غنا هايف مراسيل فارغه و لمن يرجع يترسل تانى عشان الحاجات الجابه ما سمحه و تشغيل لكل أدوات الكهربا و تركها شغاله مع الأستمتاع بالتحدث بالتلفون فىى السهله و ترك الأكل خارج التلاجه البابه فاتح زى باب ناس الحريقه و الشفع و المكان كلو ريحتو زى ريحة حلة كوكو

    أما المتأهله فممكن نخليها برج الفاتح ولا روتانا

    أها لمان الإتنين يطلعا الراجل حيقول ما داير و المرأه عكسو دايره عرس دايره عرس أها فى الحظه ديك نقوم نعمل جوب ديسكربشن نحدد فيهو أختصاصات و مددى صلاحية و حدود كل زول مع التأكيد الصارم بعكس المواقع فى حالة الإخلال بالعهود

  19. ودالفتيحاب كتب:

    شمباتى
    امانا ماوقع راجل ،أفليقا كلامه صاح ،سجمك كان بقيت على النقاش ،راجيها من منوا،عاد يالدكاتره عليكم جنس فعايل ،ماتركزو ساكت وتقولوا بسم الله،كلمناك قلنا ليك غمد وشوت وبراها بتجى قون ،
    المقايس تتغير بتغير الزمان والمكان ، يعنى كدى النقول مقايس ناس المنشيه،اكيد المواصفات شويه دايره ابوقرشين ،وينتمى لى ياتو حزب ،مش مهم الحسب والنسب لانهم مافارقه معاهم.
    أما مقايس ناس شندى فوق وعموامتهم ،اكيد ود منوا اول حاجه ،بعدين شغال شنو .اما البنيات هنا وهناك الهم واحد عندهم (الكالكيوليتر )،بشتغل عندهم ،أها نقعد لى جنس ده .

  20. ابكرون كتب:

    سلاااامات
    انتو الدوك ده بتلعبوا بيه كده ليه …الزوووول ده يمكن قضي امره… هو اشتكي ولا بكي ؟ بوسته ده يمكن كلااام للثقافة العامة (آآآآهي هيه العديل والزين….الليله العديله ..يا عديلة الله)…الزين ده منو يا بشااار يكون اخو عوض حسن بله….!
    الزهراء :طيب انت لمن تكوني عضو في اللجنة…الحيكونن مرشحات منو .؟ خلي اللجنة لي ناس سنكل ونيام وبشار وزوجات الكواشف…ولا كيف؟

  21. ياسين شمباتى كتب:

    الحبيب افليقا ابو ضنب مربوط فيهو تلاتة بطيخات!!! والله القصة دى الليلة حكيتها لى معظم البعرفهم,مؤثرة شديد..المشكلة بقت مافى المعاينات,بقت فى مرحلة المجابدات والخلافات..واحتاج منكم صالح الدعوات..

    الاخت نونو..بارك الله فيك على تذكيرنا بهدى الحبيب المصطفى,والحديث الضعفو الالبانى دا انا من زمااااان كايس لى زول يضعفو,لانو بالجد غريب على شوية وما بنهضم,لكن كان بقى صحيح ما عندنا فوقو رأى..لكن برضو احسن الزول يبعد من الشبهات والكلامات..

    الحبيب نيام..والله زولك بعد دخل خط ستة جماعتو الجارين معاهو رجعوا لى ورا !!! اها فى طريقة يكابس براهو!!؟؟

  22. ياسين شمباتى كتب:

    الوالد السلاوى..سلام واحتجاجك مقبول,لكن زى الطنشتنى بهناك كدة مالك!!؟؟ فى الايميل يعنى؟؟ والله الامور بقت بمبية عديييل كدة..

    الاخت الزهراء..بارك الله فيك,طواااالى جريتى على اللجان وخم القروش؟؟ غايتو جنس غايتو!!

    ود الخلا…البتقدل دى منو؟؟؟

  23. ياسين شمباتى كتب:

    الحبيب طارق..والله فكرة ممتازة,وانا اول زول بسجل فيها,لكن التكلفة على منو!!؟؟ بس اوعى تكون على الكانديديت!!؟؟؟ لكن من اسه احلال مواقع ما معانا !!

    الحبيب ود الفتيحاب..سلام وشوق..والله انا مفتح ابت تجى قون,دايرنى اغمض ليها !! دعواتك..

    الحبيب ابكرون..والله كلامك سمح تب,لكن العصرة حصلت على,وبالجد داير الناس من هنا تطلع برسالة واضحة للمجتمع فى مفاهيم الزواج,ويترسخ عندهم فهم ينقلوهو للاجيال القادمة…

  24. ودالفتيحاب كتب:

    ابكرون
    جمعتك مباركه وربنا يبلغكم رمضان ،شفت المواضيع لما تبقى خفيفه الناس بتتواصل فيها كيف ؟فعلا كلامك صاح المواضيع الجاده فى بعض الاوقات منفره ،وثقيله على القلب ، لك كل التحايا القلبيه..

  25. ياسين شمباتى كتب:

    ود الخلا..سلام..(كشماء) دى من كشمير ولاشنو؟؟ خصوصا انها تطوى المسافات طى..شكلى انا ال ح اطوى المسافات والله..

  26. الزهراء كتب:

    سمارنا الكرام
    والله العرس ده كان سووا فيه ماجستير زاتو ! ياهو البلاقي الناس ما حيتغير
    والحياه دي كان ما عاشوا تجاربها ودخلوا في معمعتها وضاقوا الحلوه والمره سوا ما حيتعلموا كيف يصمدوا للمصاعب
    شمباتي: البلد دي غير اللجان البتنبثق منها لجان في شنو عليك الله؟ خلينا ندخل الحوش شويه يمكن نترشح في يوم رؤساء لجان ما معروف.
    ابكرون : يديك العافيه ان شاء الله لكن بيني وبينك احسن نكون في اللجنه مما نكون مرشحين نظام خوفنا على اخوانا اولاد قبيلة سوداننا لازم نتحزم ونتلزم ونعمل عمايل الحموات شويه عشان بنات الزمن ده ما يغشوهم.
    ود الخلا : الكشماء دي شنو يا ابوي؟ قدر ما فتشت في الدكشنري ما عرفتها
    ثقفونا معاكم وكده

  27. حاج أحمد السلاوى كتب:

    ود الخلا ..ايها الكاشف الكبير ..
    غايتو كشماء دى يطرشنى ويعمينى ما سمعت بيها …إنت الحاجات بتجيبها من وين ؟ واشك إنو واحد من الكواشف ( شدر الدوم ) يعرف كشماء بتاعتك دى ..
    غايتو جنس كشمات …

  28. ياسين شمباتى كتب:

    ودالخلا…مساك طيب..والله كشماءك دى عصرت على الكل!! حتى ابونا السلاوى عمدة المدونة ما عرفها..الحقنا يا ابن برد..

    الزهراء…والله شكلك فلستى اليومين ديل قمتى تكوسى فى اللجان المنثبقة وكدة..كدى ابثقى لى نعيميتى وبعدداك نتفاهم..

  29. الزهراء كتب:

    شمباتي: صباحك زين . نعيميتك دي جاااهزه لكن الناس عملوا هركات وغيروا من برنامج الرحلات وبقت مسائيات وشايات وكده لكن كان مافي رحله برضوا بجهزا ليك ما عندك مشكله
    ود الخلا: كدي يا يابا صرفا لي (كشماء دي) ما تصرفا لي ماهيه, صرفا لي كفعل وعربي وكده( كشم يكشم تكشيما فهو مكشم)
    صاح كده؟
    وبرضو ما عرفناها

  30. نيام كتب:

    الزهراء:
    ليس هكذا ( كشم يكشم تكشيما فهو مكشم)وانما كشم يكشم اكشاما فهي مكشمة اي البصلة واحيانا بلا بصلة فيقال المكشم بلا بصل اي انضج دون الحاجة الي بصل كناية عن مقدرة اتقان الشئ حتي دون عناصره الاساسية ..اي ان فلانة ورتو المكشن بلا بصل ..اتقنت نضجه و احسنت طبخه دون الحاجة الي بصلة..يعني ورتو نجوم الضحي .. والله اعلم..

  31. ياسين شمباتى كتب:

    نيام والزهراء..شكلها الكشنة دى وادغمت فصارت كشمة!! لكن يا نيام على ما اعتقد انو الكشنة دى البصلة المحمرة,يعنى المكشن بلا بصل دا شى تعبان خالص..حقو عزت المرطب يورينا رايو فى كلام الطبيخ دا..لكن ياربى الغلطان منو!!!؟؟

  32. الزهراء كتب:

    كلامك صاح يا شمباتي طلعت حريف
    المكشن بلا بصل دا الطبيخ المعمول عدي من وشك والزول البياكلو بيتمغس منو ومن طعمه الكعب….. الله لا وراكم او ضوقكم ليه

  33. ياسين شمباتى كتب:

    الزهراء..يعنى ود الخلا داير يصيعنا ساكت!!؟؟؟ دا الله لا ضوقو لى عدو ولا حبيب..

  34. ياسين شمباتى كتب:

    وروروووووووك يا ود الخلا,دى البلحقها منو!!؟؟ انحنا دايرين حاجة وسط,زى الكديسة وكدة,كان جرت تتلحق..

  35. سهيل كتب:

    هي كان جرت لا حقنها لي شنو – تكون جات منها ( زي ما قال البيشاوي) (له وحشه – وين هو ) –

  36. ياسين شمباتى كتب:

    سهيل..غايتو انت مستغنى بس!! وينو البشاوى وبشار والتركى وبقية الناس البلبدوا مدة ديل؟؟

  37. سهيل كتب:

    ست القبيله دي مني ؟

  38. الزهراء كتب:

    لكم التجله اينما كنتم
    شمباتي: الكشماوات ديل ما بفكوهن للجري انت ابقى نجيييض وقريب عشان تحرس الحمى بدل ما تبقى في الملاحقه
    ود الخلا: ماقصرت في المعلومات المهمه الله يديك العافيه

  39. ياسين شمباتى كتب:

    ود الخلا,,قلت كدة؟؟ خلاص ورونى العدو واقعدوا فراجة..

    سهيل..الا تجيب الدم يعنى!!؟؟

    الزهراء..براك عارفة الحاصل..

  40. الزهراء كتب:

    شمباتي: لا تيأسن اذا كبوتم مرة**** ان النجاح حليف كل مثابر

    حاول وكن واثق من النجاح فأرادة الانسان أقوى من الأحباط

    ويوم بكره جميل

  41. سهيل كتب:

    شمباتي : وصلنا العضم و ما عرفنا حاجه – اها كده كويس – الواحد قرب يقوم ليهو ضنب

  42. حاج أحمد السلاوى كتب:

    ولدنا سهيل ..بن السهل الممتنع ..

    هو إنت لسه ما قام ليك ضنب ؟ امانا ما إتلومت !!!

  43. ياسين شمباتى كتب:

    سهيل..اهو الوالد السلاوى اغنانى عن الاجابة!!! انت لو عايز تعرف حاجة كان عرفت..

    الزهراء..بارك الله فيك على الدعم دا..بس كترى الدعوات..

  44. سهيل كتب:

    سلولو و شمباتي – إنتو ضنبكم وصل الواطه ولا لسه

  45. د.ياسين شمباتى كتب:

    سهيل..انحنا برضو العندنا اذناب!!؟؟؟ اظهر يا ولدنا..

  46. سهيل كتب:

    اظهر انا و لا الولح ليك ضنبي ؟

  47. د.ياسين شمباتى كتب:

    خلاص لولح ضنبك العاجبك دا..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s