فكو دربنا وجعتو قلبنا ..

Posted: الخميس,6 أغسطس, 2009 by aflaiga in اخرى

العباره اعلاه او الهتاف اعلاه سمعته الاذان لاول مره منذ فتره طويله تصل لعشرين عام فى الاسبوع الماضى فى المظاهرات التى صاحبت قضية الصحفية لبنى – لن نتطرق لموضوع لبنى بقدر ما سنتطرق لموضوع الهتاف .

دعونا نشرح كلمات هذا الهتاف الذى اعتبره شخصيا من اذكى واروع الهاتفات التى انطلقت فى الشارع السودانى لعدة اسباب :

اولها انه منطلق من المراه التى حين يرتفع صوتها فلا تملك الا ان تقف لتشهد ان هناك ماساه ما .

وثانيها انه مرتبط بلغتنا الدارجه وضارب فى العمق حيث انه لغه انثوية بحته قحه تتحدث بها المراه حين يصل الوجع مداه .

وثالثها انه موجه مباشرة للنظام فى وصفه الفئوى البحت بعيدا عن حكومة الوحده الوطنيه او تعقيدات الشراكه فالهتاف حين يقول فكو يصل السامع مباشرة الى ان قائله يقصد تماما من يقصده وان سامعه المقصود يعى تماما انه المقصود .

رابعها ان كلمة وجعتو قلبنا كلمة بلاغية دارجية موغله فى التعبير العميق عن ان وجع القلب هنا معنوى بحت وصل مداه فحين تقول المراه لابنها مثلا وجعت لى قلبى فهى تكون قد اخرجت اخر ما فى كنانة غضبها والمها من الابن وحينها يدرك الابن ان امه التى اوصى الله بها قد دخلت مرحلة عدم الرضا الذى يوجب تعجيل العقوبة فى الدنيا قبل الاخره .

ختاما الهتاف سمعته ايضا ابان مظاهرات انقطاع المياه فى امدرمان ومن النساء ايضا . دعونا نجيب على هذه الاسئله بعد تحليلنا لكلمات الهتاف :

هل دخلت المراه بقوه فى معادلة التعبير عن رفض الظلامات .

هل يبدا تشكيل واقع جديد يستعيض فيه الرجال بالنساء للحل محلهم فى مقاومة السلطه ؟؟

هل تملك الانقاذ من الوعى السياسى الذى يجعلها تتعامل مع ثورات النساء ولا كلو عند العرب صابون وكبير الجمل ؟؟

هل نشهد بنازير بوتو السودان فى يوم ما ؟؟

واخيرا ما هو وجه المقارنه بين نجاح خروج النساء فى التظاهر وفشل دعوة قادة الاحزاب الاخيره فى اخراج الشارع للتظاهر ام ان قادة الاحزاب وصلو لمرحلة من الذكاء السياسى فقامو بادخال المراه وتجريب دورها فى المقاومه ؟؟

Advertisements
تعليقات
  1. مُخير كتب:

    السُمار أهل الدار والزوار
    السلام عليكم ونهاركم سعيد
    الزينين أفليقا وسمسمة : نزف لكما باقة من التهاني العطرة وعقبال ما تحتفوا بالذكرى الثمانين لقرانكم الميمون وحواليكم أحفاد حمودي وسروية وعبودي قولوا آميييييييييييين

    الموضوع في السلك وأنتهز الفرصة لأعيد إلى الذاكرة قصيدة رائعة أهديها مع التحية والتقدير لناظمها وهو شاعرنا الفحل نيام نيام وقد نشرها في القمردينة بتاريخ 21 يوليو 2008م أي قد مر عليها أكثر من عام إلا أنها تبدو طازجة وكأنها خارجة لتوها من الفرن وفي صميم الموضوع:

    اسمعني بابا كراس مسيرتي ما اتملا !!
    اديني كراس انقلا
    كراس تمام مليان نظام السير علي كل الحبال
    في وكت واحد شعب فكة و انتعس
    ومن جوعو جوات المسيرة قام دقس
    قال لي فلسان دقستو قاعد يغازل في الفلس
    يا شعب كان
    في ذات زمان
    ارجوز غزوه الامركان
    صفق رقص
    و الشعب غني المهزلة

    **************
    ايام زمان كانت مسايرنا بتهز
    نيمها بيهز الكبري هز
    و الشعب مصدوق اللسان
    و ماسك مفاتيح اللغز
    ولانو ناقش المسعلة
    وما ملتبس
    عايش ملك مع انو تعريفة و فِلس

    **************
    وقام غزانا الاحسبون
    الحسكنيت الحسكنون المنتكس
    تاريخو كان يا دوب امس
    رجع دواليب الزمان
    سوالو تاريخ صولجان
    وجاب لينا حجوة مهلهلة
    قال الصفاء ثم النقاء ومن طهرو صار ابليس نجس
    وابليس مزغلل ما مصدق انو تاريخو اتلحس

    **************
    يا شعب نصو فوق بحر ينظر إلي الجنب الشمال
    ونصو هاجر و انكشح للغربة من ذل السؤال
    ونصو مصطول منشغل بقالو قال
    ونصو ناقش المسعلة
    لاكنو مضروب بالنعال

    **************
    والله يا ضل الضحي طولت طول ما جيتنا يوم
    وامانة يا جبل الظلم ماليك يوم
    زمزم علينا و استبد
    ينقيس ولادنا كل صباح
    و لما يوم نلقاه صاح
    جيب كراريسك و عد
    في الاملا كم؟
    في العملة كم؟؟
    يا احسبون يا حسكنيت يا حسكنون
    يوم داك براك كون مستعد

  2. أبو الأفلاق ياخ يبرو من وجع القلب… اريتو للأحسبون

    نيام و مخير يا ناقشين

    عله يا نيام هو الشعب دا فيهو كم نص !!

    واحد يتمشدق بعبادته قام قال لصحبو … و الله الليل دا فيهو جمال عبادة… نحن عارف التلت الأول فيهو نتعشى و نعمل الذي منه و ننوم… التلت التاني نقوم نتجهز و نقرأ في القرآن… التلت التالت نتنفل و نصلي و و التلت الرابع نقرا في القرآن لمان تشرق الشمس و التلت…….

    تحياتي

  3. التركى كتب:

    الاخ افليقا التهنئة مقرونة بالتحايا لك ولاسرتك الكريمة … صرخة (فكو قلبنا وجعتو قلبنا) صرخة نسائية بحتة ولا اعتقد ان المرأة السودانية لازالت وراء الكواليس السياسية فقط بل نزلت الخنادق لتطفئ نار الظلم وتوقد نار المطبخ …. والاستعاضة بهن بدلا عن الرجال دا زى تلعب ايتو مدافع عشان يجى من ورا يسجل قون شئ صعب لكن غير مستحيل …. لا الانقاذ ولا المعارضة مافيهم واحد دنقر تحت عشان يكتشف حقيقة الثورة النسائية واكيد قالو دى (جعجعة نسوان ساى) أتمنى انو اخواتنا يثبتو العكس فى الحالة دى بقول ليك اى ممكن تكون عندنا بنازير بوتو وتانسو جيلار وحتى انديرا غاندى … وحتى ذلك الحين الكل فى صف واحد نحو هدف موحد

  4. tarigabahmed كتب:

    أول من أطلق العباره الرائع محجوب شريف أواخر أيام نميرى و التلفزيون السودانى يعج بإعلانات السلع الإستهلاكيه و الكماليه

    فيمتو و فيكى و قمح أمريكى
    اللافندر عطرو يطير
    زيت أبو سمكه للتقليه و للتحمير

    فكو درينا كفانا فترنا
    حتى كلبنا أكل جرجير

    فكو درينا كفانا فترنا
    حتى كلبنا أكل جرجير

  5. طارق أب أحمد كتب:

    العباره أطلقها الرائع محجوب شريف أواخر أيام نميرى و التلفزيون السودانى يعج بإعلانات عن سلع إستهلاكيه و كماليه مستورده

    فيمتو و فيكى و قمح أمريكى
    اللافندر عطرو يطير
    زيت أبو سمكه للتقليه و للتحمير

    فكو درينا كفانا فترنا
    حتى كلبنا أكل جرجير

    فكو درينا كفانا فترنا
    حتى كلبنا أكل جرجير

    و ما أشبه الليله بى اول أمبارحه

  6. ابكرون كتب:

    افليقا :
    برضو كانت في لافتة جميلة معبرة تقول :
    حلوا عن سمانا
    ونقول معهن :
    حلوا عن سمانا …قاتلكم الله

  7. ياسين شمباتى كتب:

    سلام يا حبايب..فكوا دربنا وجعتوا قلبنا,فكوا دربنا كتلتوا قلبنا,فكوا دربنا خلاص انحنا زهجنا..ولا حياة لمن تنادى..
    كلنا نعرف دور المرأة تاريخيا على مر العصور فى شتى المجالات,وما حواء السودانية بمتخلفة عن ركب النساء الثوريات,ودونكم مهيرة بت عبود ورابحة الكنانية,ونفيسة بدرى ونفيسة عوض الكريم وحاجة بتول الداية وغيرهن..يعنى المرأة ليها دورها من زمان,واسه هى اكتر زول متكوى بى سياسات الجكومة,فغلاء الاسعار وارتفاع المهور وانخفاض قيمة المدخول اليومى كلها تؤثر اولا على المرأة لانها مديرة البيت ومدبرته,وتأكدوا انهن بيدعن كل يوم فى ناس الحكومة لمن يقرضوهم قرض..
    فكوا دربنا,,وروروووووووووووووك..

  8. aflaiga كتب:

    القصيده ادناه قراتها وانا اتصفح موع سودانيز اون لاين :
    إلى رفيقات الزنزانة بالقسم الشمالي
    (1)نداء الخروج(لا لقهر النساء)
    دلّن حللكن وامرقن
    قشّن حننكن وامرقن
    غطّن حفركن وامرقن
    ماتقولن البيت والعيال
    همومنا كبرن وفرّخن
    تاني
    لا بيته لا بيتك براك
    الليلة بيتكن كلّكن
    لا متين تخدمن في الرّجال
    الليلة ناداكن وطن
    همّا تشيلي على الهموم
    وياك لزّامة المحن
    (2)مظاهرة(تحت عنوان :أبنت –نسبة إلى بنت-منكم)
    وقفن معاي
    قدّام
    وراي
    ركزن/ ولا النخل الثبات
    سكتن /ورفعن رايتن
    نبحوا الكلاب المؤجرين /قصدا يفرّقو لمّتن
    وقفن وغرقن في السكات
    قعدن وتبّن واقفات
    الكان بوصّفو في الحريم
    ويقولو/نقّة وخايفات
    أخواتي غيّرو فكرتهم
    عدلن مفاهيم البنات
    (3)الزميلة أميرة عثمان حامد
    مشهد خاص
    سبّاها
    بصقت عزّتو
    قاواها ..
    قلعت هيبتو
    لاواها هزمت قوّتو
    بي إيده بس وبدون سلاح
    فضحت رجالتو وخيبتو
    خجلان وعاري ومنكسر
    جات العساكر حاطتو
    وقفت براها وسط كتااار
    جالت ولا زول نادتو
    جرّوك من وسط الصفوف
    دفرونا منّك وحاوطوك
    ضربوك انصاص الرجال
    عسكر هراواتن تقيلة
    يا فارسة وحدك داب قبيلة
    يا أميرة خجّلتي الحروف
    صاحية وتقدّري للظروف
    ماكي (الأميرة النائمة)
    ميتانة راجية الينقذه
    واميرتي تنقذ بالألوف
    دفروها شان تركب معاهم
    بالقدلة ركبت زي اميرة
    كنداكة والزيّك قلال
    مستورة ربّوك بالحلال
    سكوتة ماناس قيل وقال
    ركزتي ..زلزلتي الجبال
    وصمدتي خجّلتي الرجال
    بتّي../إن شاءالله /وكفاي
    ما لنت صبّرتي المعاي
    ماشفتي زينب وبتّها
    دايرات يروحن بي وراك
    جونا العساكر بالسياط
    حرقت عواطف يدّها
    مجروحة صبرها عندها
    والقال قضيّة /وانتهت
    شافنا نهتف نهتف ضدّها
    والحق مشاويرنا ابتدت
    حالفين نوصّله حدّها
    يتبع

  9. aflaiga كتب:

    بعيدا عن كل التداعيات وفى نص النص اقول :
    لو كانت هذه النصوص هى وقود الثورات منذ يونيو الاول لما شهد الشعب يونيو الثانى !!!!
    وبعيدا عن كل الجدليات التى قد يقفز البعض بها من داخل النص مستبيحا حرمته متكئا على قل للنساء يغضضن او صوتهن عوره اقول ماذا جنينا من اصوات الرجال ..
    التحية كل من خرجت تقصد عزة عزه دونما قصد سياسى او مسخره
    والتحية لكل من خرجت لتمنع قوانين القهر المتدثره بثوب الاسلام والاسلام منها براء ..
    والتحية لكاتبة الابيات اينما كانت ..

  10. aflaiga كتب:

    اخى نيام ومخير وكل ذواقى الشعر الجميل بالله عليكم هل طرقت اذانكم منذ زمن بعيد مثل هذه الابيات ؟؟؟ حدثونا عن روعة النص حتى لا يضيع بين ثنايا ما ضاع من روائع ..
    ولها اقول :
    من يوم قلب ميزان بلد سجم الرماد
    صار الرجال واقفين ورا واتصدو للحق البنات
    راجل شرد ساب العيال لى امهم مرقت تكابس بالحلال
    راجل رقد ساب الهموم لى الزيكن مرقن عشان قوت العيال
    بالله يا نيام تم ددى للبنيه الارجل من كمين راجل دى ..

  11. نيام كتب:

    هاك يا فلقة:
    من يوم قلب ميزان بلد سجم الرماد
    صار الرجال واقفين ورا واتصدو للحق البنات
    راجل شرد ساب العيال لى امهم مرقت تكابس بالحلال
    راجل رقد ساب الهموم لى الزيكن مرقن عشان قوت العيال
    كل الرجال اتبلموا بمقنع البت البطل
    دنقر فصيحهم مرتجف كأنوا ما عارف الحصل
    ساعة البنية تمهرت بطيب مهيرة و اسرجت روح الرجل
    كان مُهرها الشرف العتيق الما يبس
    صحصح منامات القطيع المنحبس
    في وجهتو كان ملتبس
    وكان مَهرها الصدق الاصيل الما اتلمس
    فار دمي في الساحات عموم و بصقت في وجه الدجل
    وقريت كتابهم و فهمت يادوب الحصل
    في البنك كم في السجن كم و الانهبل
    فكا الدرب في عز شبابو و اتلحس
    لمان سمع صوت البنية زي جرس
    مدرستو صاح
    يادوب عرف درب الصباح
    وكانت مهيرة واقفة في فصل الولاد
    رافعات حسوسن يا وطن الظلم زاد
    و الظلمة توهت المراكب و العباد
    شفناك يا ضو المنار
    يا صوت كنار
    فوق تلة الكفار
    وقف
    و للأسف
    ميزان سجم ما بعترف
    بانو دي البت النجف
    بصقت علي وجه السخف
    في عز نهارات الصلف
    لما الرجال يتهجوا في حرف الالف
    واحد شرد ساب العيال لى امهم مرقت تكابس بالحلال
    وواحد رقد ساب الهموم لى الزيكن مرقن عشان قوت العيال
    وواحد يطاطي و مرتجف

  12. حاج أحمد السلاوى كتب:

    أخى الكاشف نيام ..
    ما اجمل الكلمات البسيطة عندما تصدِق فى وصف الحال …
    لله درك ..ولا فُضّ فوك ..
    وزدنا من هذه الدرر … فهلا فعلت ؟
    وإنا لمنتظرون ..

  13. aflaiga كتب:

    نيام : على بالطلاق كان ما خايفين من زعل ام العيال كان عرسنا ليك البت دى عشان تطلعو لينا اروع واصدق ما قيل – لكن ما مشكله الحاله وحده ممكن اعرسا ليك انا ده !!!

  14. مُخير كتب:

    إبننا الهباش أفليقا وشاعرنا الفذ نيام سلام وإحترام
    الحبان في كل مكان
    السلام عليكم ورحمة الله وبركاته،،،

    أي والله تركن جلوسـن وقفن نخل يا نيــــــام
    ما حد يسوسن بالغصب لا إنسي ولا جن وجان
    رافعات حسوسن يا وطن ماف ظالم يسوقك بالحرام
    لمتين عاد يرجن رُجال ما بنرجوا بعد أدمنوا الذُل والهوان
    يا أفلي اتصدو للحق البنات بعدما كمل الصبر ونفد الكلام

    كيف النجرة يا أفلي ؟؟؟ ما بطالة لكن جنس كلام ناس نيام ده يجرجرنا لمواقف شعرية هزيلة، بالجد ما روعة
    كدي أنا خلوني إنتو رأيكم شنو في جنس ده
    ((ميزان سجم ما بعترف
    بانو دي البت النجف
    بصقت علي وجه السخف
    في عز نهارات الصلف
    لما الرجال يتهجوا في حرف الالف))

    ونحن أيضاً “منتظرون” المزيد من الدُرر مع حبيبينا حاج أحمد السلاوي

  15. مُخير كتب:

    وحتى يتجلى نيام ويتحفنا بالجديد فلنسترجع إحدى روائعه التي تبرد حر قلبنا:
    آل حسكنيت
    خلاس حد البلد و قـّـــف
    علي سيفا سنين بنزف
    رويحت الوالد المسكين ومما قام مستوظف
    جنس نوعكم حرام ما شاف و لا بعرف
    كفاك يا عنكبوت بس فوت
    خلاس آل حسكنيت التوووت
    وخلينا النواجه الموت
    حباب الموت وكت مكتوب علي الشاهد
    بدل عايشين و نشاهد
    موت اولادنا متقاصد
    و نتمني علي عزريل
    يزور في الليل
    حليلو شليل
    شليلنا الطول الواسوق
    و نحن نسوق
    حبال صبرا طويل بالحيل
    لا رحنا مع الراحو و لا فجرا نشوفو عديل
    سعلتك بالذي خلقك تعجل بالرحيل آفلان
    ضرعك جاف و دربك حاف
    وكلو نشاف
    خلاس آ فلان
    بدل ما نسفر الحبان
    شيل الشايلو و اتوكل
    سفر البن دق و حرق علي وقـــــّايتو يتعدّل
    خلاس ارحل
    رحيلك حلحل المشكل
    وكان خايف علينا و هام
    وحاتك نطلب استرحام
    طصاريح السفر قوام
    و قاطرة خسوسي برمنقهام
    فيها منامة بالسنتور
    ونضبح تور
    عشان يوم رحيلك هام
    وماترجع
    ولو ناس البلد رجعوا
    ماترجع
    ضوق الغربة و اتوجع
    شوية النفهم الحاصل مع الامم القبيل فزعو
    ونشبع نوم مع النايمين
    و نشبع قوم مع القايمين
    ونشبع في العديل و الزين
    من يوم مجيك الشوم
    ولا فد يوم
    ضقنا النوم
    ولا راحة
    سويتا حياتنا طوطاحة
    بس نهجس تقول قومو
    و ان جعنا تقول صومو
    نان لا متين
    شكيتك للذي خلقك
    ولا عافين
    ودار شيتنا
    وقفل بيتنا
    وبلد بطولو شحادين
    وحات الحق
    تقوم تلحق
    قطر باكر
    وشيل الشايلو بس غادر
    يا حسكه ..ابواللصيق
    فوت هسه ..تفوت للضيق
    ولا بنأسف علي فوتك ..ولا بننسا
    شوية رحمة ياعليق
    تفك الضيق
    سعلت المولي ياانسان تنوم ما تفيق
    تضيق ما تفيق
    تفج للضيق
    فشان الوِرْدي ما تنقاس
    فشان ما بيلمسها القيّاس
    فشان ما تردلك انفاس
    فشان الناس
    خلاص حد البلد و قـّـــف
    علي سيفا سنين بنزف
    رويحت الوالد المسكين ومما قام مستوظف
    جنس يومكم حرام ما شاف و لا بعرف

    الله يديك العافية يا نيام ويبرد حرّاية قلبك زي ما بتخفف على جموعنا الوجع

  16. aflaiga كتب:

    وما ناديت اذ اناديت عبثا فجاء بها مخير والنيام
    نيام لا نيام اذا استفاق وجر القلم فى ظهر اللئام
    تعرت كل عورات اللئام جزاك الله خيرا يا نيام
    —-
    هو انتو قايلين شنو ؟؟
    شاعرنا ما ناسى الالم
    شاعرنا ما داسى القلم
    لا فضفوك نيام وحلوه النجره يا مخير ..

  17. علي سنكل كتب:

    السمار الأعزاء
    أفليقا و شاعرنا نيام ألف تحية وسلام . . .
    أبدعت كالعادة أيما إبداع يا نيام ، يا زمار الدانقا وشاعرها الفحل . إبداع يجيب التايه الضهبان ، الغايب من الحيشان ليهو زمان.

    بالله كده حالتك ما حليت دينك !
    طيب كيف يكون الحال بعد ما تسدد الدين؟

  18. aflaiga كتب:

    واهو كمان السنكلونى جا بعد غياب ..
    نيام يملك مزمارا من مزامير ال سنكل يجعلهم يخرجون من عزلتهم لتذوق الابداع — حباب سنكل بعد غيبه ..
    تعرف يا نيام لو سلفوك لى رمضان واحد فى برنامج فى النيل الازرق ( اشعار واشعار ) بسوى بيك البدع ومش حتقدر تغمض عينيك ..

  19. نيام كتب:

    سمار الدانقا و مفاتيح الابداع..عندما تكون انت القارئ فان قلمي يفهم مقياس الروعة و الا الإحجام..عندما تكون أنت الناقد فان سيفك يهتز فوق عنقي الروعة و إلا فلا لا..عندما يكون رضاك هو الصعب تكون الروعة أصعب..لكم التحية مجتمعين و فرادي و كل عام و انتم بخير..حفظكم الله عينا و عونا لهذا الوطن الرائع بكم حتي نسد دينه علينا..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s