إختلاس السرور

Posted: الأحد,9 أغسطس, 2009 by استرايكر in إقتصادية

كشفت مصادر «آخر لحظة» عن اختلاس 200 مليار جنيه بفرعي بنك النيلين بالخرطوم «الرياض» وغرب السودان. وتنبأت المصادر بأن تقود الاختلاسات لتصفية البنك وقالت إنها تتم بصورة دورية شهرية وأشارت إلى أن البنك ترأس إدارته شخصية اقتصادية. وأوضحت المصادر أن فرع البنك بالرياض اختلست منه قبل يومين 50 مليون جنيه وأضافت أن أحد كبار موظفي البنك اختلس 700 مليون جنيه وأن موظفاً أقل منه اختلس 2 مليار جنيه وأن وكيلا بالبنك اختلس 300 مليون جنيه وأبانت المصادر أن البنك قدّم تمويلاً بأكثر من 200 مليار جنيه دون ضمانات عقارية أو غيرها.
المصدر :اخر لحظة

Advertisements
تعليقات
  1. انتو يا جماعة الخير البلد دى مافيها مراجعة ولا رقابة
    لا الكلام والله جد فات حدو شديد – 200 مليار – ياخ ده رقم كبير خلاص لو بالقديم ولا الجديد .
    يعنى اسا البنك ده وبحالتو دى مابقى فى السهلة تب.
    كدى ناقشو معانا ضرب القروش والاختلاسات الماشا الايام دى .

    ولاحول ولا قوة الا بالله

  2. ياسين شمباتى كتب:

    استرايكر..والله دا بقى شئ عاااادى,فى تقرير المراجع العم قال انو الاختلاسات فى المال العام كبيرة خالص,ولم يتم محاصرة 90% منها !!! يعنى دا شئ عادى والدولة ذاتها غاضة طرفها عن الموضوع دا..
    اسه عليك الله ابراج وزارة الدفاع ومعاشيى القوات المسلحة دا يقولوا عليهم شنو؟؟؟ اخير اختلاس البنك..خلينى اصل وارجع افش غبينتى هنا..

  3. ربنا يتقبل مقدما يا شمباتى – ومستنيك انتا وكل الشباب العندهم غبينة .

    لكن بينى وبينك الابراج شديدة شدة العدو . 🙂

  4. أسترايكر

    أقول ليك كلام

    لن تستطيع الدوله ولا نظامها ولا أمنها ولا عبد الظمار أن يفتحوا بلاغ على حرامى واحد إلا فى حاله واحده
    (( إذا كان سارق ليهو حق قفة خدار))

  5. والله يا اب احمد نتمنى يجى اليوم ده زاتو البكون فيهو كل زووول عندو حق القفة.

    —————-

    اليوزر اشتغل وممكن تبقى اونلاين بعد كده ياحبيب

  6. حاج أحمد السلاوى كتب:

    ولدنا ..استرايكر …سلام

    مراجعة حسابات شنو البتسأل عليها ؟ الحكاية دى إنتهت زماااااااان مع المراجعين الأوائل ..حسه الحكاية بقت أمسك لى واقطع ليك …يا فلان إنت عليك 10 مليون ضرائب ..تقدر تدفع كام …وتمت وختمت وكسر قلمك …والباقى معروف ..عليكم الله فى زول شاف ليهو مكتب مراجعة شغال ؟ حتى ديوان الضرائب زاااااتو بقا ما بيعترف بالميزانيات وبيقدر كل حاجة إيجازياً ..ودقى يا مزيكة ..وزى ما بيقول ولدنا شمباتى ..لك الله يا وطنى الجريح..وطبعن دى مش حتكون آخر الإختلاسات ..ونحنا عاوزين نعرف مصير فلوس الإعتمادات الضائعة والمنهوبة… الأعلنوها السنة الفاتت ( أعلنها مدير بنك السودان ) حصل فيها شنو..
    وبرضو خلونا نشوف آخرتا شنو !!!

  7. نيام كتب:

    يعجبني الرجل الذكي!!!!

  8. نيام كتب:

    الكترابة…
    خلولك البنك صي …
    خزنو تقول يا الله لي …
    عليك الله ارمي لي …
    انا المحيرني المليعار دا زوووول واحد بشيلو ياخ عوضة ما بتشيلو ….بختك يا ماما ليزيا..

  9. نيام كتب:

    هيييع …هسع تلقا البنك نزل يافطتو و وقف في صف الزكاة

  10. نيام كتب:

    دخلت نملة و شالت حبة و خرجت
    قامت نملة أكلت شبعت حلبت
    حلبت شعب تعيس اوراقو أتحرقت
    كان البيك جوه البنكي
    لما الحارس رفع السنكي
    للمسكين القاعد يبكي
    عشان نشلوه رغيفة و يشكي
    انو البنكي صبح منشول
    وسيد السونكي الواقف برة
    رد في خاطرو كمين مرة
    مامعقول ..مامعقول
    وصفق ايدو يطنطن ليك
    من يومين انا شايف البيك
    مع اولادو راكب شيك
    ماركة همبوووول
    وحاضن السونكي يردد مرة ما معقول
    قالو البنكي صبح عدمان
    نزل يفطوا زمان
    وكتب بالاحمر وبالمنشيت مافي امان!!
    مافي امان!!

  11. حاج أحمد السلاوى كتب:

    أخونا الكاشف نيام ..
    غايتو لو بقا حسابك فى البنك دا ..الماعندو يافطة ..كُر عليك ..يا يمه ..واطاتك اصبحت ..فى ناس كُتاااااااااااار يكونوا لحقوا أمات طه بعد ما سمعوا الخبر ..خبر البنك المسلوب ..
    غايتو ..جنس .. بنوك !!

  12. ياسين شمباتى كتب:

    عليكم الله اسه الابراج دى بنوها بى قروش منو!!؟؟؟ ولازمتها شنو؟؟؟مش كان احسن يدفعوا متأخرات مسرحى القوات المسلحة؟؟؟ كمان بلا خجلة وزير الدفاع فرحان بيها وقال تطور فى الخدمة المقدمة للمعاشيين,تقول المعاشيين والمسرحين ديل ح يجوا يقيلوا فيها !! ولا المجلس الاعلى للاستثمار!! اسه دا شنو دا؟؟مش فى وزارة للاستثمار؟؟ ولا لجنة الاستثمار الفى المجلس الوطنى!! يا جماعة مليار شنو وبنك شنو؟؟الموضوع اكبر من كدة..

    نيام..الواطة دى فى خشمنا كان حالنا بقى زى النمل الداخل ومارق دا,,ويبقى الامل..

  13. عباس ركس كتب:

    سلام للحلوين :
    استرايكر : دا اختلاس شنو دا الما بيراعي الترتيب الوظيفي – احد كبار موظفي البنك اختلس 700 مليون , وموظفا اقل منه اختلس 2 مليار – أكان اختلست , اختلس جمل .
    ملحوظة : الجمل = 1 مليار
    يعني برضو بالغ , جملين يا مفتري !! ولا مش كدة يا شمباتي !!!!!

  14. نيام شكلك مضروب بحساب فى البنك الفوقانى ده – غايتو الكشف بجيك قريب يا قريبك والجاتك فى حسابك ثامحتك . 🙂

  15. حاج السلاوى – وتقول لى دولة اسلامية ودولة الخلافة – غايتو وجنس غايتو

  16. ركس يا حبيب
    الداير اعرفو اسا – اوكاى عرفنا الاختلس منو وحددنا قيمة الاختلاس زاااااتو – اها ح ترجع كيف وح تعملو شنو – والله كالعادة السجن من سنة ل 5 سنة والقروش تكون برا والزوول يطلع مع اول احتفال ولا اول راس سنة مع الناس البفرجو عليهم كل سنة ويمشى يتمتع ويتجدع بقروشو . 😦

  17. سهيل كتب:

    منعول ابو الهندسه – هسي نحن زماااان ما قرينا محاسبه ليه ؟؟ عشان كان نشتغل مسؤول صغير

  18. ياسين شمباتى كتب:

    ركس الحبيب..سلام..شفت طمع الجماعة ديل؟؟انحنا جمل واحد ما لامين فيهو!! ربنا ينتقم منهم..

  19. نيام كتب:

    سهيل:
    تاني منعول ابو الهندسة الشغل يوم الجمع و حتة محاسب مليار لبع…انت محاسبة دي ما تشيف..
    استرايكر:
    بسم الله و الحمدلله و الصلاة و السلام علي رسول الله و علي اله و صحبة و من ولاه وبعد..
    احسب انني لا املك خردلة و لا قطمير في بنك الليلة تلقاهو فاتح بكرة تلقاه ما فيش ..دا بنك و لا ست شاي..
    وقووووووول عرفنا اسم اللابعين و اسم الملبوعين و كمان حجم اللبعة يعني شنو؟؟…ما بكرة تسجل و تحفظ و خلوها مستووووووورة…

  20. سهيل كتب:

    عمنا نيام : و ما طريق الإنقاذ الغربي منكم ببعيد – ( التسويات و كده)

    زمان شاعرنا محجوب شريف قال :

    واحد بيسرق خروف السمايه
    وواحد بيسرق سفنجه و ملايه

    وواحد تصدق.. بيسرق ولايه

  21. الصادق ود البركة كتب:

    السلام عليكم وبعد
    بصراحة الصراحة أنا بعد أسبوعين من عدم الدخول للمدونة دخلت واندهشت واحترت ده لو قعد يختلس مليون كل يوم المليار براهو عاوز ألف يوم يعني لا بد من معاونين ويكونو اخدو من الكعكة
    اخونا السلاوي العجيب من يوم وصلت وأنا جاري جاري جاري ما قدرت اتصل أو اكتب
    دكتور ياسين لك الشكر والتجلة ورجعنا للخرتوم أمس

  22. الصادق ود البركة كتب:

    اها نسيت :
    1ـ يذهب الحرام من حيث أتى
    2ـ الذي يربي أولادو من قروش حرام كيف يكونو بارين بأبيهم
    3 ـ (وماله من أين اكتسبه وفيم أنفقه) صدق الرسول صلى الله عليه وسلم

    اللهم جنبنا وجميع المسلمين الحرام وأهله

  23. ياسين شمباتى كتب:

    الحبيب الصادق..حمدالله على السلامة..باذن الله لنا لقاء..

  24. سهيل كتب:

    ود بركه : حمدلله على السلامه – ياراجل لابد مالك ؟
    افليقا : وين رحلة ود بركه ؟ الله الله – ودا برضو إسمو كلام – نسق و ادينا خبر..

  25. التركى كتب:

    السلام عليكم من جديد ….. خلوها مستورة …. زميل استرايكر بجدك منتظر الناس دى تتحاسب ياخ هو فى زول بحاسب روحه ولو المراجع بقى ود ناس بقولو ليهو انت عندك عيال وعايز تربيهم وتقريهم جامعة ماتنسى الوصية (التهديد) عادة فى الحالات دى البرلمان بحاسب لكن فى موضة رفع حصانات الايام دى مافيش برلمانى يقدر يفكر لانو كراسيهم هزازة ….
    بالنسبة لاصحاب الودائع مش المفروض البنوك دى لما تجى تباشر عملها المصرفى مش المفروض يكون ليها امنيات تحسبا للظروف الزى دى ؟؟؟ … سمعت انو عندنا مدينة اولمبية كنت بفتخر بيها على اساس انها انتهت رجعت السودان لى اكتر من خمسة سنين ولسه ماشفت لامدينة ولا روضة … يكون الجماعة عملو بدل المدينة ابراج سكنية ؟

  26. د.ياسين شمباتى كتب:

    الحبيب التركى..طبعا المدينة دى صفت على استاد عادى جدا !! باعوا اراضيها لصالح اسر الشهداء!! عاد تانى فى زول بقدر يقول شئ؟؟
    وقالوا صاحب الفكرة وديدبان الانقاذ وقتها,سكن فى المعمورة وعندو حاويات قدام بيتو,قالوا صبح يوم لقى ناس الحلة كاتبين بالوهية على الحاويات(المدينة الرياضية)!!! عفيت منهم..

  27. التركى كتب:

    ههههههههههههه تسلم يادكتور على المعلومة ….. ياربى نحن فى قاموسنا دى مافى كلمة استقالة ولا قلبوها كلها استخارة بس ….. أكان لاسر الشهدا ماعندنا كلام تب بس اليورونا الاسر دى منو واستفادت منها كيف ؟؟؟؟؟ لك الود

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s