الحكاية شنو

Posted: الثلاثاء,11 أغسطس, 2009 by عزت in اخرى

و انا كنت قايل ناس جرائد الفضائح و الاثارة بيبالغوا أتاريهو الحكاية بقت بجد…..

طبعا حملت الأخبار في الأيام الأخيرة عدة أخبار عن جرائم أفضت الى الموت بدم بارد كما يقول الكابويات… فالشاهد ان زمان الحكاية بتبدا في بيت القمار و الا محل القعدة و الا في الانداية عندما تلعب الخمرة بالراس في ظل بعض الأحقاد التي تكتسب من لعب القمار و الا واحد يسوط الحلة و ياخد ليها منها لحمة و الا شكلة في بيت لعبة تهيج الناس و ترتفع الهراوات و تخرج السكاكين و في الغالب المرحوم غلطان في الأول لانو بكون هناك استفزاز شديد من قبله ادى لمقتله… فيجي البوليس و في الغالب كان المتهم يعترف بفعلته بسرعة لأنو بكون ندمان و سافي التراب فيا سجنوه و الا ودوهو لي المشنقة بجد مش زي حقة النونو أم قطيفة…….

images 3

و لكن مؤخرا بدأنا نسمع أمثلة للاصرار و الترصد و آخرها الانتقام الشديد و من من ….. من أب لا حول و لا قوة الا بالله فما حادثة أول الأمس ببعيدة حيث اعترف الابن بقتل ابيه بمسدس و كمين طعنة …. ياخ بالغت…. مجنون ما بيعمل كدا و الا العربي الخرع الذي يقتل مسلفه و يرميه بالسايفون و عاوز كمان يهرب….

mlr04h

فلتعمل منظمات المجتمع المدني و رجال الدين و أئمة المساجد في التنوير بتلك المسائل و لتترك جرائد الاثارة و تفرد صفحات لرفع وعي الناس بدلا من جرهم الى ما لا يحمد عقباه فالتنافس في اي مجال محمود الا في  أكل أموال الناس بالباطل كما حدث و قبل كم يوم أيضا ادى الى مقتل سوداني قيافه ذهب الى الشمالية لاسترداد حقوقه….

يعنى الأكلوها ديل ما خايفين من حسابو فلتذهب الميتين مليون و لتندلق الحلة بي لحمتها ان كان ذلك ما سوف يذهب بحياة اثنين القاتل و المقتول….. و مما تعلمنا و قرينا و سمعنا لم تكن هناك جريمة كاملة يزوغ منها الجاني فسوف ترتد عليه وبالا و خزيا في الدنيا  قبل الآخرة…………………………….

Advertisements
تعليقات
  1. nono كتب:

    د/عزت لك التحية

    حقيقة تطرقة ليه موضوع مهم لما يحدث في هذا البلد من تفشي

    الجريمة بصورة مرعبة!!

    قال النبي : ((إن بين لأيامًا ينزل فيها الجهل، ويُرفع فيها العلم، ويكثر فيها الهرج،

    والهرج القتل)).

    من علامات يوم القيامة

    كثرة موت الفجاءة !

  2. ياسين شمباتى كتب:

    د.عزت المرطب..سلام..اعمل حسابك مع ترطيبتك دى ما ينطوا ليك فى البيت!!
    حقيقة كترت الجرائم البشعة دى وكلو بسبب المال,والساعد على انتشارها كمان ما يعرف بالميديا,فكل وسائل الاعلام من تلفزيونات وراديوهات وفضائيات وصحف تعج باخبار القتل والتخطيط لها,فياتى ضعاف النفوس هؤلاء ويلقوها جاهزة وينفذوا بس..ربنا يلطف بينا..

    نونو..والله ياها العلامات كملن تب,بعد دا نرجى الكبيرة..

  3. سهيل كتب:

    صباح الخير و السلام

    من الملاحظ في الفتره الأخيره و تحديدآ في الشهر الأخير تجد على صفحات الجرائد ( السياسيه) اخبار إغتيلات لأسباب منها السياسي ومنها ما لا نعرفه .. مثلا مقتل (حمزه) بتاع المؤتمر الوطني من منطقه الباوقه لأنه من المناصرين لقيام سد الشريك(يا عبدو).. اول امبارح برضو مقتل عمدة منطقه بشرق البلاد — و كذلك مقتل موظف البنك السابق وووووو – اصلو الحكايه شنو ؟

    قبل مجيء الإنقاذ لم نسمع بهذا الهرج و لم نكن نعرف الإغتيالات و لا التصفيات – الله يستر من قوادم الأيام .. اي زول بقي يعمل اي حاجه لأنو ما عندو حاجه يخاف عليها و دي من اخطر مراحل الفساد الفكري–

    كسره : اعمل حسابك يا جار البنك المركزي

  4. و الله فعلا الحكاية بقت دايرة دبارة…………… نقوم نسعى لينا كلاشن و لا شنو … حالتا الانتخابات ما جات لسة

  5. مُخير كتب:

    العزيز أبو عصمت
    الحبان في كل مكان
    السلام عليكم ورحمة الله وبركاته،،،
    فعلن يا دكتور الشغلانة بقت جد جد، والمزعج إهتمام الناس والإعلام بمعرفة تفاصيل هذه الجرائم البشعة، وسمعت خلال زيارتي الموجزة للبلاد بقصة الرجل حديث الزواج الذي قتل عروسه وفقأ عينيها وأشبعها عضاً وتقطيعاً وشاء الله أن ألتقي بعض معارفه الذين أغلظوا الإيمان بأن الرجل إمام جامع ومُعلم وأن ما حدث نتيجة للجنية التي تعشقه وأن الغيرة دفعتها لتتقمصه ليرتكب جريمته، وأن عروس سابقة هربت منه ونجت من القتل، وسناريو آخر أنه كان مريض عقلياً وربما نفسياً أيضاً وأنه كان نزيل مصحة ..الخ التفاضيل الغريبة، كلام عجيب وما إرتفاع نسبة البطالة وزيادة تكاليف المعيشة ونزول بعض الكماليات إلى مرتبة الضروريات أصبح جرائم النهب والسرقة والنصب والإحتيال قصص عادية فطفق الناس يبحثون عن الإثارة في جرائم القتل والتعذيب والتقطيع، نسأل الله أن يلطف بالعباد وأن يُلهم الحُكام السداد ليؤدوا الأمانة بالتركيز على تحسين الأوضاع المعيشية للمواطنين وتخفيض أسعار الضروريات بدلاً من الصرف في الدعاية الإنتخابية وتلميع القيادات التي أخذت فرصتها كاملة ولم تفلح في معالجة مشاكل محمد أحمد وسعيد وعواطف.

  6. الزهراء كتب:

    الاخوه الاعزاء
    حقيقه دي ظاهره خطيره جدا وتحتاج لي وقفه لدراسة الاسباب المؤديه لظهور مثل هذه الحالات- وزي ما قلت يا دكتور عزت انا ذاااتي فكرت اسعى لي طبنجه القصه بقت ماا مضمونه
    وفعلا دي من علامات الساعه

  7. الصادق ود البركة كتب:

    السلام عليكم أيها الأخوان دون فرز
    شنو الواحد يدخل عاوز يلقى ليهو حاجة ترفع المعنويات زي (المختلس بتاع المليار قرر التوبة لله وسيرجع المليار ويطلب من الناس أن تسامحه على فعلته)

    نلقى الدوك كاتب الأشياء التي عشانها قاطعت قراية الجرايد من يوم ماجيت
    السؤال هو ما الأسباب في إنو الولد يقتل أبوهو؟؟؟؟
    ربما والله أعلم أنو الوالد لم يربي ولده بقروش حلال (لأنو ود الحلال ما بسوي كده)
    ربما الولد قال خلينا نخلص من الحياة ونخلص الوالد منها
    ودمتم

  8. اها يا شمباتى ود عزت – دع خبر طااازة مع الصباحية:

    فجعت الخرطوم مجدداً بجريمة غامضة أمس راح ضحيتها مهندس شاب وطالبة طب ، حيث وجدا ميتين داخل عربة بجراج في منزل الشاب بالدناقلة بحري – وبحسب مصادر فإن الشرطة ببحري والمعامل الجنائية والأدلة هرعوا لمكان وجود جثتي المهندس (أ.أ) والطالبة (س.ع) واشارت إلى أن تقرير الطبيب الشرعي أورد أن اسباب الوفاة تعود لنقص في الاوكسجين أدي لاختناقهما ومن ثم وفاتهما. واضافت ذات المصادر أن والد الشاب طبيب، فيما يعمل والد الفتاة أستاذاً جامعياً.

    صحيفة الراي العام

  9. عزت بقا ريتش كتب:

    و جرايد قالت البطارية اتعطلت و لم يستطيعوا فتح الأبواب الكهربائية…. غايتو جنس غايتو….

    طبعن يا استرايكر الحكاية ما جريمة بقد ما هي اجرام في حق أنفسهم

    رحمهم الله و يسر لأولادنا و بناتنا رغد العيش و البيت الحلال و العربية الحلال و المال الحلال……………………….. !!

  10. عزت بقا ريتش كتب:

    عارف يا ود البركة

    السؤال هو ما الأسباب في إنو الولد يقتل أبوهو؟؟؟؟

    أسر الي قريبا له أن الولد (مدمن) و يحتاج الى مصاريف كل يوم لتعمير راسه و كان الوالد دائما ما يعنفه لكي يتوب من الهباب و يحرجه قدام الناس… فالظاهر لم يحتمل … لكنه بالغ في الانتقام مسدس و سكين … !!!

    اللهم أكفنا شر العقوق وأغننا بحلالك عن الحرام….

  11. عله أنا موضوع العربي (الجبان) ما مريحني خالس…. فالراجل من جنسية عربية و يعمل مقاولا و عمال يشيل من المجني عليه في المواد لمن الدين وصل الى مئتي مليون قديم ففضل أن يستدرجه و يقتله و يرميه في السايفون بدلا من الايفاء بالدين…. و الا على اسوأ الفروض يسردب و ما يديهو قروشوا…. يقوم يعمل كدا….

    الدعوة الآن مراجعة العمالة الأجنبية و توفيق أوضاعها و عمل ضمانات لهم و كفيل و كلام من دا … اشمعنى مطلعين عين السودانيين برات البلد اقامة و كفيل و هنا طالقنها ساكت…..

  12. حاج أحمد السلاوى كتب:

    السادة المدونون الأعزاء ..سلام مربع ..
    يا اخواننا الجرائم موجودة فى كل مجتمع من المجتمعات ..ولكنها اصبحت مرعجة فى سودان أمازونيا العظمى لأنها لم تكن بالصورة التى صارت عليها الآن..ولو مريتو على معظم الصحف العربية تجدون فيها العجب العجاب …وأقرب جيران لينا ..أولاد بمبا …عواطفاتهم صعبات خلاس فأى خلاف يحصل بينها وبين سعيد … سعيد يلاقى نفسه فى أكياس..سجمنا.. غايتو لو العدوى إنتقلت لينا .وربنا يستر من المسخبى فى الغيب ..
    بنتنا الزهراء ..لو إنتى عاوزة طبنجة ..أنا ح اشوف لى آر بجى ..

  13. التركى كتب:

    السلام عليكم جميعا ….. يااخوانا العولمة (التكنلوجيا) بتجى دايما بمحاسنها ومساوئها ودى اعقتد انها من افرازاتها …. اها الناس بتقرا وبتشاهد حاجات زى دى من غير وعى او تثقيف وكترة التنكرار تعلم …. (لا مؤاخذة) غايتو انا بصرف النظر عن عمل السايفون ولما البيت يتم بالسلامة ح نفكر الموضوع مرة تانية …. لكم التحايا

  14. مشاكل كتب:

    سلامز

    اللهم أرحم المهندس ( أ.أ ) و أغفر له و أسكنه فسيح جناتك يا رب العالمين فانت الغفور الرحيم

  15. aflaiga كتب:

    د . عزت :
    اولا حماك الله ووقاك شر الحاصل
    ثانيا انت بعيد عن القصص دى لانك اجتهدت فى التربيه وابناءك على شاكلة ابيهم ادب وذوق وبر ورقى وفهم ما شاء الله اقر الله بهم عينك .
    حقيقة الحاصل بقى صعب جد جد وما بيبشر بخير للشفع ولا لينا .
    تفلت اخلاق نابع من ضعف الوازع الدينى وضعف التربيه وانعدام القدوه الحسنه ورخوة الحبال فى البيوت .
    جرائم العنف الاسرى مردها فاضح وخز
    اللهم استرنا فوق الارض وتحت الارض ويوم العرض وردنا اليك مردا غير فاضح ولا مخز يا رب الناس
    جاييك ..

  16. د.ياسين شمباتى كتب:

    الحبيب استرايكر..حدثت العدو ما حدثتنى..ديل شنو ديل كمان؟؟ الخبر دا فيهو تفاصيل عجيبة شوية وغامضة!!!

    الحبيب الصادق..حمدالله على السلامة..والله انت معشم عشم ابليس فى الجنة,,قلت لى راجى المختلس يتوب ويرجعهم؟؟ دا يرجع بطن امو ما يرجع القروش السرقها..

    الحبيب التركى..خواف ربى عياله…اها نبقى فى جنس دا؟؟؟

  17. خالد مدني كتب:

    السادة الكرام … سلام وتحية
    من شرفة المتفرج اتابع ما تكتبونه واتعجب من انكم حقيقة ومن لحم ودم وتعيشون في هذه الامازونيا … حفظكم الله والهمكم الصبر .
    الاخ الصادق عفوا اقول لك انه لم يعجبني تعليقك حول المرحوم الذي قتله ابنه واعتقادك والله اعلم انه لم يربي ولده من الحلال … هذا ليس من شأننا وهو عند مليك مقتدر واذكروا محاسن موتاكم ولو بالاعتقاد … كذلك اتستغربت تعليق الاخ مشاكل ودعاؤه بالرحمة للمهندس فقط دون من كانت معه وماتت معه … اللهم ارحمنا وارحمهم جميعا واحفظنا في ارواحنا واهلنا وكل المسلمين … آآآمين .

  18. كويس الجماعة ديل جابوك مارق من شرفة المتفرج يا خالد مدني…. أبقى أظهر مرة مرة

    بالطبع الرحمة و المغفرة للكل و وقانا و أياكم من الشرور و حفظنا و اياكم و المسلمين جميعا

  19. سهيل كتب:

    يا مرطب : كلاشن حته واحده – إنت ما شايف سكينه و طبنجه عملو شنو ..( دا انا اخاف من الكلب – يطلعلي اسد !!)

    جدو سلاوي و الزهراء : طبنجه يمكن تخارجك من شكله و لا هوى خفيف .. لكن للإنتخابات الجايه انا مفكر استورد لي دبابه مفرتقه و اجي اجمعها برااااي عشان نلبد جواها و نفتح نار في البره .

  20. محمد الخاتم كتب:

    الاخوة في سوداننا خالص التحايا في موقعكم الهادف

    الاعلام في السودان اصبح يتناول مواضيع الجريمة السبب يرجع للمواطن نفسة لشرائة لهذة الجرائد دون ان يتعظ..

    حمانا الله وابناءنا من هذة الجرائم البشعة..

  21. عباس ركس كتب:

    سلام يا خِلة :
    زي ما بقولو اهلنا الرك على الاساس – التربية – ربيت ولدك صاح , ماممكن يعمل جنس العمايل دي , آي ممكن يخرمج شوية لكن ما ممكن يبعد عن الريتم الاساسي زي ما بقولو ناس المزيكة .

  22. الزهراء كتب:

    الاخ عباس يا حليل زمن التربيه
    الزمن ده الام ما فاضيه والاب دائم الانشغال وبقى مافي اهتمام في الاسره عشان يعرفوا اولادهم مصاحبين منو وعندهم شنو وبعد داك الفراغ خلا الكثيرين منهم يتجهوا للمخدرات واشباهها وغيبت عقولهم وصار اللي صار في مثل هذه الايام

  23. التركى كتب:

    سلام اخ ركس
    (التربية) الكلمة دى بقت ليها ضرات كتار زى اصدقاء السوء والظروف الاجتماعية والرتم بقى نشاز كل واحد بعزف براهو .. الوالدين يربو وللاسف المدرسة بدل ترسخ اصول التربية تحيد الطالب عن مساره دا غير العولمة والمؤثرات المرئية بتاعتها …. نقول شنو بس ربنا يدينا خيرهم ….
    د.شمباتى عقبال تربى عيالك ياغالى

  24. د.ياسين شمباتى كتب:

    الاخ محمدالخاتم..سلام ومرحب بيك وسط الحلوين ديل..

    الحبيب التركى..ربنا يديك العافية وتشوف خير عيالك وتشوف جنا جناهم..على موعدنا باذن الله..

    الحبيب خالد مدنى..انا برضو استغربت ترحم مشاكل على الولد دون البنت,لكن ربما كان هناك سابق معرفة..ارجو امدادنا بمعلومات صحيحة عن الحادثة يا عزيزى مشاكل..

  25. طارق أب أحمد كتب:

    شمباتى
    الحادث قضاء و قدر نتج عن سوء تقدير موقف حيث أن الفقيدين كانا داخل سياره داخل جراج مغلق و ماكينة السياره مدوره لتشغيل المكيف ما أدى لإنعدام الأكسجين و انتشار أول أكسيد الكربون و أنت أدرى بالباقى

    اللهم الهم آلهم و وذويهم الصبر و السلوان

    فى خطبة رفع العزاء تحدث الدكتور الفقيه عن خطأ رمى الناس بمات على سوء الخاتمه و فسر المعنى يشكل جلى و كان يدعو و بقية الخطباء ل ((فقيدينا)) بالرحمه و المغفره و الله رحيم بعباده هو على كل شئ قدير

  26. د.ياسين شمباتى كتب:

    الحبيب طارق..جمعتك طيبة ومتقبلة يارب..والله دى تفاسير غريبة جدا !! لكنا لا نملك الا التصديق..

  27. يا با شمهندس سهيل

    بعد دا الكلاشن واجب احنا قايلين الحكاية لعب…….

    بقى فيها نط بيوت و تلثم و بعج بالجملة……………………………….

    اللهم الطف بنا
    اللهم أرحم المغدورين و أكشف الجاني و سلط عليه من لا يرحمة ببركة هذا شهر رمضان المبارك….. اللهم أرحم الأب و الابن و عجل بشفاء الزوجة

  28. الصادق ود البركة كتب:

    الاخوة الكرام السلام عليكم وتصومون وتفطرون على خير
    الأخ خالد مدني خاصة بالنسبة لما أثرته حول ما كتبته ده ما رأي أنا فقد قال أحد السلف رحمه الله ( إن للرزق الحلال أثرأ عجبياً راحة في النفس وسعة في الصدر وصلاحاً للولد وإجابة للدعوة )فمن هنا كان التعليق رحم الله موتانا وموتى جميع المسلمين آمين

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s