امراض السودانيين ..

Posted: الثلاثاء,11 أغسطس, 2009 by aflaiga in اخرى

قالو فى الادب الشعبى المرض يا مرض جسم يا مرض فهم ومن هنا نبع موضوعنا الليله البيتكلم عن امراض السودانيين وخلونا نتناول فى الاول مرض الجسم القالو فيهو كتير من الخيراء انو نابع من مرض الفهم

برغم ما اثير اخيرا عن اننا شعب شحاد !! الا ان كل الحقائق والدلائل تشير الى اننا شعب كبير النفس ولو سالتونى كبير النفس لي حاقول ليكم لانو كان غنى النفس وغنى النفس بجيب كبر النفس والعفه والعزه وفقر النفس بيجيب العكس – وعشان ما نتوغل فى الكلام الجانبى ده تير نخش تووش للموضوع .

المرقاب لحال الشارع السودانى يلاحظ انه فى الفتره الاخيره كثرت الامراض بشكل ملحوظ فى البنى ادم السودانى ولو جينا نمسك اهم الامراض الظهرت فى الشارع السودانى حنلقى :

1 – الجلطات والذبحات – وهى نتاج طبيعى اما لسماع اخبرا غير جيده او للمفاجاه فى واقع معين او الصدمه فى شيئ ما او الدهشه من سلوك ما بالاضافه لاهمال الامراض المزمنه  من واقع الاهمال من اجل الاهمال او الاهمال من الياس او الاهمال من الفقر عن قصد .

2 – السكرى والضغط  – وديل كترو كتره كبيره جدا نتاج اختلالات فى السلوك بتاع البشر تجاه الغذا البقى عزيييييييييز على المواطن وصار اغلب الشعب ياكل ليعيش وتم ضغط الوجبات كما ونوعا .

3 – الالتهابات والحميات – ودى نتاج طبيعى للجو الغريب الحير بوبى ذاتو !!! والتغييرات المناخيه العجيبه الكل يوم ونتاج برضو لتغيير السلوك فى ممارسة العادات الغذائية او النشاط اليومى او التعرض للشمس او الوبائيات زى البعوض وغيرو وفى النهاية دى عوامل خارجية ممكن تكون بيد المواطن لكن الجزء الكبير منها بيد الحكومات .

4 – امراض البطون – ودى قالو فيها فى الدين انها من صاحبا لكن صاحبا ذاتو بقى متحير يسوى شنو تجاها وفى جزء كبير منها مرتبط بالسلوط الغذائى وجزء اخر مرتبط بجودة الخضروات والفواكه وجودة بيئة بيعا وتخزينا .

لكن بشكل عام يا جماعه الامراض والله كترت وارتفعت فاتورة العلاج بشكل مريع مما دعا بعض الناس انها تتحول للطب البديل والدجل وغيرو – دعونا نناقش هنا الحلول التى يمكن بها الحد من تفاقم الامراض ويا ريت لو الاطباء المعانا هنا يورونا روشته كده للوقاية اللى هى خير من العلاج . ةدعونا ايضا ننناقش دور الدوله فى مرض البنى ادم ودورها فى علاجه  لانو صديقى س لمن سالتو من قصة الامراض دى قال لى انو معظما مغسه سااااكت وانو شعبنا ده لانو نفسو كبيره اجسامو بتتعب فى تحمل نفسو وبيقوم يمرض سريع ومبررو انو امراض العيون سببا الحزب والبكا ( مش بتاع ناس ابكرون ) لا لا البكاالجد جد نتاج الحزن لانو داك ما بيعمى !! وامراض الجلطات من المفاجات لانو الشعب بقى يصحى كل يوم الصباح بمفاجاه فى ظل حكومه تسهر لاسعادو وتخلى ليهو حياتو مش يقدر يغمض عينيه !! وامراض البطن من الاكل المفاى او الاكل شبه المافى او الاكل الاخير عدمو البناكل فيهو ده لانو معظم الاسر بقت سلطانيه بحته ونسبة الدكوه فى الدم ارتفعت ونسبة الفول بقت مؤثره على الوعى السياسى مما يضخم فرص فوز المؤتمر الوطنى بالانتخابات نسبة لفاعلية الفول فى محو الذاكره لمتعاطيه !! بالله استصحبو معاكم كلا صديقى س ده فى النقاش لانو احتمال يكون كلام علمى غير منسق لكنه مثبت بالتجربه ..

وفى الختام برضو عاوزين نناقش امراض الفهوم اللى هى اهم من امراض الجسوم لانو ديك بتتعالج كعبه الاندراوه !!!

Advertisements
تعليقات
  1. nono كتب:

    افليقا لك التحية/

    موضوعك جميل

    انا كان علقت ليك بجيك بي اقوووووووال السلف الخلف ؟؟

    لاني كلام المفلسفاااااااااااااااااتية دة ماااااااابفدر علية؟؟

    ناسسس؟

    كذلك حيث ؟؟

    ايضا؟؟؟

    رياااايك شنوووو؟؟

    كسرة/ يعني بجيك من الاخر!!!

  2. ياسين شمباتى كتب:

    الحبيب افليقا..كل ما ذكرته صحيح,,وتبقى العلة هى الدولة الغاشمة الظالمة الطاشمة,ويبقى المعلول هو المواطن المسكين الذى لا حول له ولاقوة…وحقيقة الاوضاع الاقتصادية والضغوطات والازمات المالية بكون عندهم دور كبير جدا فى حياة الشخص وامراضياته..لانو فى الطب فى شئ اسمو التاريخ الاجتماعى والحالة الاجتماعية الاقتصادية,ديل فى الدول المتقدمة واحبابنا ناس طب المجتمع المجتمع بحبوهم شديد وبعرفوا قيمتهم..والعلاج اظنو واضح جدا,الابتعاد عن المهيجات!!! حتى الوقاية بتكون كدة..

  3. ياسين شمباتى كتب:

    ود الخلا,,اظن تفسير(الناس على دين ملوكهم) انو الرعية بتتبع الحاكم,يعنى رشادها من رشاده وفسادها من فساده,يعنى ما العكس زى ما شرحت انت!! واظن دولة المدينة وعهد الخلفاء الراشدين المهديين وعهد عمر بن عبد العزيز خير امثلة وادلة على دا,ولما يفسد الحاكم بيحصل لينا زى ما حصل للامويين والعباسيين وحتى الفطميين والاندلس وملوك بنى الاحمر,وحتى صدام حسين القريب دا..
    وارجع واقول انو الوقاية والعلاج فى الابتعاد عن المهيجات,وكان جاتكم عوجة بعدهم ابقوا قابلونى…
    بعدين ورينى المواطنين ديل عملوا شنو فى الحكومة دى عشان تطشم وتغشم وتظلمهم كدة!!؟؟استحلفتك بالله انك تذكر اسباب ودوافع الحكومة فى انها تبطش بالمواطنين ديل!! معقولة بس!!؟؟

  4. aflaiga كتب:

    ود الخلا : من الاخر كده :
    الشعب ده اتملا دين بالصاح والكضب لمن كره التلاعب بالدين – كان عندك نصيحه اديها للحكام ديل خروجا بالجهاد عليهم او النصح المغلظ لهم او تعمل نايم من الاثنين تفك الشعب ده شوية من الدين الناطى ليهو بيهو كل ما يفتح خشمو ده – شوف الناس العاوزه دين وين واديها شوية جرعه من العندك .
    كرهتو الشع المنقه ذاتو .. ناس يظلموهو باسم الدين ونشسا يجو يقولو ليهو اصبر باسم الدين وناس يجو يعاتوهو انو فكا دينو عشان كده طلع ..
    ياخى فكونا ..

  5. aflaiga كتب:

    ودالخلا : فكوووووووووونا من تحميلنا ما لاطاقة لنا به لا تعنى فكونا بتاعتك القلتها اسى ..
    هذا المكان اكثر الاماكن ديمقراطية ما دام احترام النفس والاخرين متوافر .
    لكن والله بالجد وانت زول عزيز علينا بنقول ليك كترتو من قصة توبو الى ربكم وكانما شعبنا يصبح ببنقوية ويمسى بجكسوية وينوم فى خانه ويقوم فى ادبخانه ..
    انا والله اخى اعز واتقى واعرق شعب عرفه التاريخ ادبا ودينا بس فكونا من الوصايات على ديننا وبس ..
    اما فتك لينا انت قايل على كيفك بيننا وبينك مواثيق الاخوه والابوه والصحوبيه والعيش والملاح والزلابيه الاكلناها فى بيتك الجار المسجد وهى تعطينا الحق بان نقول لك موت بمغستك بيننا او افقع مرارتك بيننا لكن لا تهرب من بيننا ودافع عن وجهة نظرك لاخر لحظة ..

  6. التركى كتب:

    السلام عليكم ….. زميل افليقا أعتقد ( بعد طلب الاذن من الزملاء الاطباء) ان اغلب العلل يمكن تخفيفها او التقليل منها باحدى او كل الطريقتين معا … يجب ان نوفر الاطباء النفسيين وتوعية المواطنين بمراجعتهم لأنى سمعت كثيرا عن شئ اسمه سكر عرضى وضغط عرضى مما يدل على ان المريض قد مر بنكسة تستوجب التداوى ولو كان تحت سيطرة طبيب نفسى لازاح عنه او قلل عليه اثر الصدمة …. والشئ الآخر هو اصحاح (اصلاح) البيئة والغريب انى علمت ان بالسودان كليات لهذا الغرض فاين يذهب خريجوها ؟ وماهى حدود امكانيات البلديات للقيام بذلك ؟ … وسؤالى اين ذهب مكتب مكافحة الملاريا من شارع البلدية هل من عارف ؟ …. اخوتى اعتقد ان هناك مرض لم يذكر وليس له دواء الا وهو التمسك بالكرسى رغم الاخفاقات المتواصلة مع تغير وضع قطع الشطرنج أحيانا … لكم الود

  7. محمد السلاوي كتب:

    اسعد الله اوقاتكم بكل خير ..

    كعادتك aflaiga تأتي .. فتضع النقاط على الحروف
    تبهرنا بنقاء تأملك ومصداقية حرفك
    قلمك يُدار دائماً على قلب الحقائق
    قوتهُ تكمن في صراحته .. وفي صدقه … طرح جميل ..

    المشهد الاول :
    ** قبل اسابيع كنت في مستشفي أم درمان مع أخي الذي كسرت يده اليمني فبعد ان عاينته الطبيبة وعلي ما أظن أنها ليس لها خبرة طويلة في هذا المجال (طب العظام) والذي أصبح يرثي له في بلدي .. قلت ليها : الكسر دا كيف صعب ولا بيسط ولاشنو !! ؟؟ فقالت لي الكسر دا هنا نحنا ما بنحبزه !!! قالتيها طيب بتحبزوه وييييين !!! غايتو جنس حالة .. والله ثلاثة شهور الكسر ما جبر إلي ان تم عمل عملية بعد ثلاثة شهور …

    غايتو دي يحلها الشربكه …. انا أفتكر أنو مش فاتورة العلاج الغاليه بس التشخيص الصحيح بقي ما في يعني كلو دكتور يديك كلام غير كلام الدكتور التاني وأنت تبقي في حيرة شديدة عندك شنو ما تعرف !!!!!!! وتمشي للصيدلية وتشتري الدواء بأغلي الاثمان وهو دا الحاجة الوحيدة الواحد المابيفاصلو فيها الناس نشتري طوالي نموت يعني ولا شنو ؟؟ وانا اتخيلي السنوات الجاية البلد دي ما حيبقي فيها لا دكاترة لا مهندسين ولا اي شئ !!! الله يستر .. وأنا اضم صوتي لصوت الاخ التركي في ضرورة التوعية الصحية النفسية لانها مهمة جداً .. ففي الدول المتقدمة يلجاً الافراد إلي الطبيب النفسي ليخففوا قليلاً عن معاناتهم فمابال نحن في الدول النامية أو النايمة ..

    وذي ما قال الشاعر :
    إنا المعلم والطيب كلاهما *** لا ينفعان إذا هما لم يكرما
    فاصبر لجهلك إن جفوت معلماً *** وأصبر لدائك إن جفوت طبيا

    إذاً المعلم والطبيب هما حجر الزاوية في هذه العملية فإن هما انصفا لم يعد هناك مشاكل كثيرة … وذي ماقلت معظم المشاكل ديه مغسه والله .. عافأنا الله واياكم …

    ولو قدر لنا سنعود

  8. د.ياسين شمباتى كتب:

    ود الخلا..مساءالخير..اختلف بعض علماءنا الاجلاء حول بايهما يبدأ اصلاح المجتمع والناس,باصلاح الشعب اولا ام باصلاح الحكام؟؟ ولكن معظمهم ارجع الامر الى صلاح الحاكم ومن بعده الشعب..ولكن لا اختلاف اذا كان الغرض هو اصلاح المجتمع وتطبيق شرع الله,وجاء فى الحدبث الشريف الذى نكرره مرارا وتكرارا(ان الله ليزع بالسلطان مالا يزع بالقرآن)..يعنى ولى الامر له سلطة وسطوة كبيرة..

    الاخ التركى..والله كلامك صحى,لكن اللصقة الفى الكرسى دى يفكوها كيفن؟؟

  9. محمد الخاتم كتب:

    امراض السودانين /
    المرض ماداير ليه سوداني وله اجنبي
    المسالة كلها ابنلاءت..
    والصبر عليها..

  10. د.ياسين شمباتى كتب:

    محمدالخاتم..سلام ومرحب..
    كيفن الامراض ما دايرة ليها جنس او نوع؟؟ ناس الطب قالوا فى امراض بتنتشر وسط اجناس معينة وقبائل وافراد وجماعات كمان,,لكن كلام الابتلاء طيب,اما الصبر فلا والف لا..فلنسعى لتغيير المنكر بكل ما اوتينا من قوة..

  11. aflaiga كتب:

    شمباتي ازيك احمد

  12. د.ياسين شمباتى كتب:

    اهلا يا احمد..ضربت ليك قبل مدة وما رديت,,عساك طيب..

  13. التركى كتب:

    السلام عليكم …. زميل محمد …. بس ياخويا فى امراض خاصة بالسودانين نتيجة الاهمال وسف مخصصاتها مع انها انقرضت فى كثير من بلاد العالم ولو كان ابتلاء فلا يغير الله مابقوم حتى يغيرو مابانفسهم …..والسمك بتشم من راسه .
    دكتور شمباتى عين الحق امراض قوم عند قوم مصائب … فى رجل اعمال تركى جا وزار الجنوب لما رجع تركيا جاتو ملاريا تتصورو الحصل شنو ….(مات) لانو علاج الملاريا غير موجود بتركيا وكمان ماعرفو المرض من البداية لانه منقرض هناك …. … لك التحايا

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s