انقلاب ..(1) .

Posted: الأحد,23 أغسطس, 2009 by aflaiga in اخرى

قد يتبادر الى ذهن القارئ لاول وهله حين يقرا العنوان ان احدهم قد قلب الجلابيه بالجنبه التانيه !! او قلب التربيزه القدامو !! لان اذهان القراء والحمد لله حمدا طيبا كثيرا طيبا مباركا قد تناست او نسيت  الانقلاب العارفنو داااك منذ زمن بعيد !! لكن الانقلاب الوارد فى موضوع اليوم له قصه اخرى .

ولدت وحيده لابويها بعد انقطاع دام ست سنوات بعد الزواج عن الولاده – اسمياها حميده – حمدا لله واجتهدا فى تدليلها وتربيتها بنفس المقدار تخرجت مهندسه معمارية وعملت بمكتب هندسى فى طرف المدينه -حكى لى عم عبدو الغفير بان المكتب الهندسى ده كان زى الخرابه قبال ما تجيهو الاموره حميده – تعرف يا افليقا التمباك فى الترابيز المكتب وسخان – المكيف واقف – المويه من الزير – المناديل بشاكير – اللبس مشلهت ومكلفت – الخلق مبشتنه – الورق مجدع تحت الترابيز – غايتو يا افليقا حاله صعبه  وهو المكتب فيهو منو ؟ ما باشمهندس حسن البيشرب الشاى بالبلح وبيتريح بمعطر الهوا – وباشمهندس عمر اب قميصا واحد وبنطلونين – وباشمهندس وائل اب اخلاقا ضيقه – تعرف يا افليقا عليك امان الله مما جاتنا الاموره باشمهندس وحيده دى الحال انقلب ميه وتمنين درجه تتخيل معاى ؟؟

* المكتب بقى اخر اناقه واخر نظافه واخر قيافه والمعطرات تتطاقش والتكييف بقو ينقو فى ضعفو وعدم مواكبتو للجو البره .

* التمباك اختفى تماما من المكتب وظهر البنسون فى الترابيز ومعاهو كمان دعوات بانو الله يعفينا من التدخين المزعج ده !!

* اما خلق الشباب ديل فخليها ساى .

انت يا افليقا القصه دى تفسيرا شنو ؟؟ يعنى انقلاب مفاجئ فى المكتب من جات البنيه دى ولا القصه ما ليها علاقه بالبنيه ولا الحاصل شنو ؟؟

Advertisements
تعليقات
  1. الصادق ود البركة كتب:

    السلام عليكم جميعاً اليوم كدي الناخد البرنجي في التعليقات
    النصف الآخر ده شئ عجيب خلاص في حياتنا لو عاوز تعرف الفرق شوف مدرسين الفي مدارس البنين ومدارس البنات تلقى الزول من الفئة التانية آخر قيافة وناس الفئة الأولى مشي حالك ساكت وأسأل مجرب ولا تسأل طبيب

  2. حاج أحمد السلاوى كتب:

    الدينمو ..أبو الأفاليق..
    قصتك دى ذكرتنى أخونا الأستاذ الكان شغال مدة طويلة فى مدارس الأولاد – المرحلة الثانوية ( المشاغبين ) ..قاموا نقلوه مدرسة بنات ثانوية .. وبعد فترة قصيرة ..قام أسرّ لأحد زملاءه من المعلمين وقال ليهو ..أنا ما ندمان على شىء قدر زمنى الفات القضيتو كلو فى مدارس الأولاد..صاحبك شاف الحنان ..ما صدّق .. الكلام وصل المدير … وقبل نهاية العام الدراسى صاحبك الأستاذ إياه لقى نفسه كما كنت.. مع المشاغبين .
    بس أنا ما عاوز أتكلم عن تاثير عواطف ..أحسن الناس الحاسدين والمتربصين بى يفتكروه كسير تلج ومسح جوخ والذى منه..والموضوع دا خليهو لحد ما نتقابل بإذن الله ..إتفقنا ؟؟
    سؤال سغيرووووونى كدا ..أين بقية أحبابنا الكواسف الكبار والسُغار ؟

  3. حاج أحمد السلاوى كتب:

    تصحيح ..غلطة طباعية.. فقط لا غير .
    أحبابنا الكواشف الكبار والسُغار ..

  4. نيام كتب:

    أبو الافالقة عودا حميدا و رمضان كريم..
    الكاشف “سلولو” ماقربتا..
    قبل كم سنة دخل علينا واحد صاحبنا و قال لي ياخ مكتبكم محتاج النصف الحلو ولم افهم ما يقصد الا بعد فترة اشتغلت معانا بنية واحد صاحبنا يا فلقة تاني يوم القا ليك الطرابيز مفضفضة و الأوراق منظمة و مدبسة كل موضوع في ديباجة و المعطر من خلال التكييف ..فدخل صاحبنا فجأة وقال لي مالكم حصل شنو؟
    قلت ليهو لقينا النص الحلو!!!
    المشكلة انها عرست وبقت ست بيت!!!!

  5. سهيل كتب:

    سلامات ..

    تعرف مش بس البني آدمين .. حتي لا مؤاخذه الحيوانات و خصوصآ الكلاب تلقاها مبشتنه و راقده في الطين و كاتله حيلها طول اليوم من حفره لي حفره .. بس يا سيدي من ما يجي الشتا .. تعال شوف الجيهه و النضافه و النشاط .. و الضنب ملفوف لي فوق و الصدر فوق و النبيح تسمعو من الحله الورا.. دا كلو عشان ست الحبايب تديهو” نظره” .كفاكم كده .. اللهم إني صائم

  6. حاج أحمد السلاوى كتب:

    ولدنا ..سهيل …سلام ورمضان كريم

    غايتو بصراحة كدا نحنا ما عارفين … إنت مهندس ميكانيكى ..ولاّ طبيب بيطرى ..؟
    غايتو لاكين…..دى ما باااااااااااالغت ..فيها .

  7. ودالفتيحاب كتب:

    الاخوة الكرام
    لكم فى شهر الكرم أجمل الدعوات لكم بقبول العمل والعتق من النيران .
    سهيل – الكلب عامل سكسوكه لى حبيبته بس ماشايف لى كلبه مخصصه لى كلب كلهم اولاد كلب

  8. سهيل كتب:

    هسي يا ود الفتيحاب … سهيل الكلب دي دحين ما دايرا ليها شرطه ولا داش ولا إسلاش او حتى نقطه إنشاءالله نقطه نظام زي بتاعت ابكرون في ساخر سبيل ؟؟؟؟؟؟؟؟؟؟؟

  9. تم تصحيح الموضوع وهو لايفوت على فطنة القارئ يا سهيل !

  10. حاج أحمد السلاوى كتب:

    ولدنا سترايكر ..
    أنا غايتو لامن قريت مداخلة ودالفتيحاب ( قبل التصحيح ) ضحكتا كترت ضحك..وما عرفت أكتب أقول شنو ..
    طبعن يا سهيل أخونا الكاشف الصغير ودالفتيحاب أكيد ما كان قاصد شىء بطال …لاكين إنت براك الدخلت روحك فى شغل البياطرة … مهندس بيطرى .

  11. ياسين شمباتى كتب:

    ههههههاااااااى

  12. ياسين شمباتى كتب:

    اسه يا استرايكر مغيرها مالك؟؟ جنس شلاقة غايتو!!!

  13. سهيل كتب:

    والله يا احباب انا لاني زعلان و لاني متضايق.. ود الفتيحاب حبيبي و حبيت اضحك معاهو شويه .. جيت راجع للبوست الليله لقيتكم مدينها كم كوز كده .. غايتو جنس غايتو .. اها الكلب انا ولا زول تاني .. إنتو مالكم .. قبل كم يوم كده جدو الغالي ما قوم لي ضنب عديييييل كده وهسي جا ود الفتيحاب تم الناقصه … هوهوهوهوهو

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s