نحن اذا جاء المطر

Posted: الأربعاء,26 أغسطس, 2009 by عزت in اخرى

نحن اذا جاء المطر المطر ….  نجري و نلعب بالزهر بالزهر

بين الحدائق والشجر…. ثم ننظف ثوبنا ليكون ثوباً معتبر

فالمطر في ذاكرة الطفولة ألبومٌ ملوّنٌ بصور الفرح والمرح وكان للمطر في الأرياف خصوصية، ولاسيما لدى الأطفال الذين يستقبلون زخاته الخفيفة والشديدة برؤوس مكشوفة، ويفرحون بتبليل أجسادٍ غضةٍ، خفيفةٍ كالفراشات، يغبطها الكبار على انطلاقاتها المجنونة، وفي أنفسهم لو تعود أيام الطفولة ، والصبا الأول. هذا كل ما يعرفه الأطفال عن الخريف: الجري في كل اتجاه تحت المطرو  يبنون بيوتهم من الرمال المبتلة وسرعان ما يهدمونها ضاحكين مستبشرين. وقد يلعبون ويخوضون في المياه الراكدة ثم يذهبون لينظفوا أثوابهم ليزيلوا ما علق بها من طين وأوضار.

ولا غرو في ذلك فإن الأطفال لا تهمهم سوى الجوانب المشرقة وقد قال الشاعر: وهل الهم يعرف الأطفالا؟…… ففي السودان و كما في سائر بلاد الأرض  ثمة أهازيج وأغانٍ للمطر تعبّر عن ابتهاجٍ به شديد كترديد أطفالنا يا مطيرة صبي لينا في عينينا و لكن هذا الغناء والابتهاج بالمطر تحوّلَ في الأمطار الأخيرة التي انفتحت بها أبواب السحاب ماءً مدراراً ، مدمراً، جارفاً ، مهلكاً البيوت المتهالكة أصلا و غمرت الشوارع و صارت تجمعات المياة آسنة و ذات روائج كريهة و تعزر الوصول الى كثير من المنازل بالسيارات و صار منظرا مألوفا أن تجد الناس و قد التصقوا (بالحيط) و يسيرون بحيطة شديدة لئلا يحصل ما لم يحسب عقباه…..

 Copy of 21 (3)

فتأثير المطر يكون على طريقتين فبينما يفرح أهل الريف و يجروا و يلعبوا بالزهر بحسبهم يعتمدون جلهم على الزراعة وبعضهم على الرعي والرعاة والمزارعون يترقبون حلول فصل الخريف بفارغ الصبر كي تنبت مزروعاتهم ويقوى عودها ويتم حصادها في نهاية المطاف. والرعاة أيضاً يتحرقون شوقاً لهطول الأمطار التي تنبت الكلأ وتتكاثر بها أنعامهم وينعمون بخيراتها من اللبن ومشتقاته.

 

لكن سكان الحضر و بالرغم من غسيل الأشجار و (الدششة) و القصور الا فهم في الغالب الأعم يخشون من قدوم الخريف ولسان حالهم دائماً «حوالينا ولا علينا» لأن البيوت الطينية تتأثر كثيراً بهطول الأمطار الغزيرة وهذا يقتضي صيانة سقوفاتها وفتح مصارف المياه، أما إذا كانت المصارف غير موجودة في شوارع الاحياء أو أنها لا تؤدي مهمتها كما ينبغي، فإن مياه الأمطار تظل حبيسة البيوت وهذا يؤدي بالأضرار بمرافق الصرف الصحي المحفورة كالمراحيض مثلاً وربما تغمرها المياه فتنهار، وانهيارها يتطلب إعادة حفرها وصب الخرصانة المسلحة في أعلاها وهذا يقتضي من صاحب الدار توفير الكثير من مدخراته لذلك الغرض، والأدهى والأمر أن هذه المراحيض لا يمكن حفرها إبان سقوط الأمطار وهذا يكلف الأسرة المتضررة شططاً وعنتاً شديدين….. لذا كان لابد للسلطات المحلية ان تبذل قصارى جهدها لفتح مصارف الأمطار قبيل حلول الخريف. ولكن المشكلة هي أن معظم هذه المصارف تم حفرها دون الاهتمام ببنائها وتغطيتها وفي أغلب الأحيان حفرت خبط عشواء دون استخدام الخرائط الكنتورية، ولهذا فإن هذه المجاري تمتليء من أول غيث وعند هطول أمطار اخرى تفيض فتملأ الطرقات وتركد فيها المياه طيلة فصل الخريف حتى تصبح آسنة وتغدو مرتعاً خصباً للبعوض ولأنها تحتوي على قدر غير قليل من النفايات فإن الذباب يتوالد بأعداد كبيرة وهذا هو سر تفشي الملاريا والحميات والأمراض المعوية خلال فصل الخريف.

image045[1]

و لكن بالرغم من ذلك تظل المطر هي الغاسلة للنفوس و الأحزان و تكاد رائحتها العبقة التي تجمع ما بين رائحة الطين و الزهر هي المريحة لأعصابنا فلتهنأ الأشجار بملامسة حبيبات المطر و لتجري الخيران و لتفيض سيولا و وديانا و تمني….. بس تعملوا حسابكم أمشوا جنب الحيط

image028[1]

شوفوا الشجر دا فرحان كيف……………………………….

Advertisements
تعليقات
  1. aflaiga كتب:

    عزت : تحيات الدعاش والهمبريب والشقشاقه النقناقه وجعلها الله امطار خير وبركه .صديقى س من مزارعى القضارف حدثنى انهم يقامرون مع الله !! اى يتاجرون معه عبر انتظار رحمته فيودعون البذور الارض وينتظرون رحمة الخالق مطرا . نسال الله ان يكتر من سمسما القضارف وعيش الريف والفول السوانى ان يجعهلا امطار خير وبركة عليهم .
    هى : انشاء الله يا انتى المطره ما تكون عملت ليكم شيئ ؟؟
    هى 2 : والله رمت الراكوبه وقدت الديوان وشقت حيطة الحوش وبنغرف فى المويه من امبارح ! اها انتو كيف انشاء الله ما اتضررتو ؟؟
    هى : والله ابدا بس المطره غسلت لينا الدش !!
    هى 2 : انشاء الله كمان تجى صاقعه تكويهو ليكم !!!!
    ولهؤء الغلابه نقول اللهم استر حيشاننا التى هى ستار اعراضنا .
    واستر غرفنا التى هى مستودع احلامنا وامالنا ومالنا وعيالنا .
    واستر شوارعنا التى نمشى فيها ذلولا لناكل من رزقك .
    واستر بلادنا من غضبك فى شكل مطر .
    واجعل الامطار امتحانا لولاتنا وبصر ولاة ولاتنا بعجز ولاتنا ..
    وجاييك ..

  2. و تحياتي يا أفليقا

    طبعن الناس معذوزين المطر من صباح الرحمن و قليلين البيقدروا يمرقوا من القراش عبر شوارع مسفلتة الى أعمالهم و تبقت الغالبية العظمى في منازلهم غايتو البركة في (رمضان) مع جو الفول دا كان معدل المواليد زاد….

    الحضور almost nil في دواوين الحكومة و الشوارع مطنبجة ….
    و أنا براي في المدونة غايتو قالوا المتواجدين ثلاثة لكن ما بينو لسة أظهر بان عليك الأمان

    كسرة:
    يس شمباتي رمل شارعكم كيف…!!

  3. ياسين شمباتى كتب:

    الحبيب عزت..سلام..والله فعلا المطر خير وبركة,,وانا من صحيت بيها قلت الحمدلله انها ما بقت امس,,كان ما لقيتوا رملة فى شارعنا !!!والله الموية حدها باب القراش,,خليها بس…كدة واحد ظهر,,شوف الباقين..

  4. الكناني كتب:

    العزيز عزت :
    دوما انت مبدع ومتفرد يا دكتووور
    ( ففي السودان و كما في سائر بلاد الأرض ثمة أهازيج وأغانٍ للمطر تعبّر عن ابتهاجٍ به شديد كترديد أطفالنا يا مطيرة صبي لينا في عينينا و لكن هذا الغناء والابتهاج بالمطر تحوّلَ في الأمطار الأخيرة التي انفتحت بها أبواب السحاب ماءً مدراراً ، مدمراً، جارفاً ، مهلكاً البيوت المتهالكة أصلا و غمرت الشوارع و صارت تجمعات المياة آسنة)
    حليل زمن كان ويتبقي لنا كل ما هو آسن
    ودمتم

  5. زووووووول كتب:

    الاخ عزت سلاااام
    الامطار دى يبقا ليا ما امطار خير وبركه يا دكتور شوف الترع الفى الظلطه (جمع ظلط)!! دى بالمناسبه قالوا نفق عفراء المويه ركبه فيهو ومن ما تجى قايم بالعربيه يصيح الماره اعمل حسابك قدامك عربيه غاطسه .
    المهم انا جيت من البيت وفاتح الراديو ومتوقع استقالات جماعيه لكن هيهاتهيهات لا جن ولا مطره بقادرين على ان يجيبوا استقالات .
    كسره : القادم احلى وناس الارصاد قالوا لسا هو انتو شفتوا حاجه ؟

  6. حاج أحمد السلاوى كتب:

    حلّ الخريف حلّ …أهلاً به وسهلا
    هكذا كانت أناشيدنا المدرسية حين ذاك ..أتذكرون ايها الكواشف ؟..
    ولفصل الخريف فى ذاكرتى عبق خاص أستمده من لحظات تجمع السحاب والغيم الذى يلون الدنيا ثم نزول الأمطار (التى كثيراً ما غسلت رمال حلتنا )ثم رائحة الأرض بعد نزول المطر ..تلك الرائحة الجميلة التى قد يحس بها كل واحد منا بصورة مختلفة عن الآخرين..وتبقى عالقة فى مخيلتنا ..ويا لها من ذكريات ..
    _ المرطب عزت ..ياخ دايماً تنكت لينا الحاجات القديمة ووتهيج الشجون الدفينة..وتعيّشنا لحظات من السرور ..فلك منا خالص التحايا.. ايها الكاشف..وطلع العندك من السحارة ..وما تنقطع ..وزى قول ولدنا شمباتى .. خليك قريب ..يا حبيب..
    وكل عام وأنتم بخير ..

  7. (نقلا عن سوانايل بتصرف)

    أصيبت العاصمة السودانية أمس بشلل «شبه تام»، بعد ما تعرضت إلى هطول أمطار غزيرة استمرت، بشكل متصل، و تسببت الأمطار في مقتل امرأة عندما جرفتها المياه الغزيرة إلى داخل بئر سايفون في منزله ب «حلفاية الملوك» شمال مدينة الخرطوم بحري، فيما أصيب 4 أشخاص انهارت بهم المنازل في مواقع متفرقة، بينها ضاحية الحاج يوسف شرق العاصمة الخرطوم.

    سجل المواطنون بلاغات بانهيار عدد من المنازل في الأحياء الطرفية في مدن العاصمة. كما انهارت بعض المدارس وغمرت المياه البعض الآخر، ودفع ذلك وزير التربية والتعليم بولاية الخرطوم «إلى إصدار قرار أذيع، على نطاق واسع، بتعطيل الدراسة في المدارس، لمدة يومين، اعتبارا من يوم أمس. وأدت مياه الأمطار إلى تعطيل واحدة من أكبر محطات إنتاج مياه الشرب في سوبا جنوب الخرطوم، مما أدى إلى انقطاع مياه الشرب عن أحياء كثيرة جنوب الخرطوم، ونبه المسؤولون المواطنين إلى تدبير المياه إلى حين إصلاح العطل.

    هذا ولم يتمكن أغلب العاملين في الدولة من الوصول إلى مكان عملهم بالأمس بسبب غمر المياه للأحياء التي يسكنونها، بسبب سوء التصريف داخل الأحياء، كما توقفت تقريبا حركة المواصلات بين العاصمة والولايات، وبدت شوارع العاصمة شبه خالية من السيارات، فيما شوهد سكان في الأحياء بالعشرات وهم ينزحون المياه من داخل منازلهم إلى الشارع، وآخرون يحاولون جاهدين منع المياه من الدخول إلى منازلهم بعد أن غمرتها المياه ولم تجد طريقها إلى التصريف.

    تحدث السكان بسخط عن ما يسمونه فشل السلطات في ولاية الخرطوم في خلق المنافذ الجيدة لتصريف المياه، وطالب بعضهم بمحاسبة المسؤولين عن تخطيط وتعمير المدن، وتحدثوا عن ما يعتبرونه أخطاء كبيرة في تنفيذ بعض المشاريع، مما يؤدي إلى إغلاق الشوارع ومصارف المياه، وبالتالي تهديد منازلهم بالانهيار وشل حركتهم، مع هطول أي أمطار. وصحبت الأمطار زوابع رعدية، ورياح عاتية اجتاحت بعض المواقع، وحسب المسؤولين فإن معدل الأمطار التي شهدتها العاصمة الخرطوم أمس حطم الرقم القياسي لمعدلات الأمطار فيها منذ عام 1988، حيث تراوحت ما بين 57 ـ 60 ملم. وقال المسؤولون إنها امتدت في مساحات شاسعة خارج الولاية.

    كسرة من المحرر:

    شاهدت العديد من المواطني بالأمس و هم يعملون بالمرزبات و الطواري و الأزم على كسر شوارع الظلط بغرض التصريف كما قالوا…………….. هم عميانين من مباني المحلية……..

  8. الود اجزله لدكنور عزت ….. امس اتهورت وقلت لازم امشى المكتب وعينك ماتشوف الا برك المياه وبما ان المكتب فى الرياض فقلت ياعم يمكن اشوف واحد من اياهم ماشى للدوان زينا ويعرف حاجة لكن هو غيرنا نحن منو البخوض بحر الصعاب …
    شوف عينى فى الموقف الجديد (لامؤاخذة) فضلات طافحة قالو الحمامات الهناك غرقت ….

    حل الخريف حل اهلا به وسهلا
    الزرع (السيل) فيه اخضر(أنهر) والخير (العوم) فيه أكتر (امهر)
    معقولة دى يجى يوم نقول فيه ان شاء الله نعمة الله (المطرة) ماتنزل … وتقول لى استقالات على منو دى يابرعى.

    سمع اضانى مسئول كبير قالو ليهو ليه ماتعملو للخرطوم مجارى زى عاصمتنا قال ياخ دى تكاليفها عالية جدا ….

    ربنا يحميكم من اخطار المطر ونشرات اخبار تلفزيون السودان

  9. aflaiga كتب:

    عزت : انى اتهمك بتحريض الشعب الفضل على الاتيان بفعل قد نساه منذ زمن …وتتخيل اول ما تقوم عليهو البتاه دى سكريهو حيقوم عليهو وضغطو حيرتفع ودقات قلبو بتذيد لانو مطول وكده — تتخيل يا عزت انا متوقع شنو ؟؟
    الزول يشيل الازمه ويمشى على المحلية ويرفعا فوق راس رئيس المحليه وقبل ما ينزلا يحصل واحد من تلاته :
    يا تقع منو الازمه ويروح واقع هو نايم من التعب !!!!
    يا يجى واحد واسطه يقول ليهو عفا الله عما سلف واخزى الشيطان ويقوم يستغفر ويتوب !!!!
    يا يجيهو ندا من ربنا انو لا لا ما تضيع اجرك ديل خليهم لى عندهم باب فى النار يدخل منه رؤساء المحليات اسمه باب الاحسبون .

  10. عباس ركس كتب:

    العزيز افليقا : تحياتي . لكن بالغت فوكها – قلت لي باب الاحسبون , هي الابواب كمها – ذكرتني بالذي يرفع يديه ويدعو قائلا : اللهم اجعلني من العشرة المبشرين بالجنة !!! – يعني يعملوا ليه زي عملية الصادق المهدي وعمك بشرى لما الصادق تم ال30 سنة . . شيل دا من دا موش عارف ايه – وشغالين مواقع وبالنهار ورمضان مسخن وشمباتي مسخن وعشان كدا المطرة صبت وموش عارف ايه كدا انطبت والجماعة جابوهم يتفسحوا بالهليكوبتر عشان يشوفو الخرطوم العائمة وبعدها يرجعو لقواعدهم سالمين – نعمل ليهم شنو ؟ الخريف بقى يجيء فجأتن وزيسكو يجيب قون فجأتن والنفق اتملا موية وما في ماسورة تصريف !! وناس المريخ سووا الدغالة . وصدعت . .

  11. ياسين شمباتى كتب:

    الاحباب المواطنين..والله تباروا الناس ديل الا يعملوا ليكم ارتكاريا فى الجيوب الانفية!! والله ياركس ياخوى انا قنعت من خيرا فى الناس ديل,,بعد دا يا الموت يا يمشوا..لا عفو لا عافية معاهم..اللهم بحقك وقوتك وجبروتك خذهم اخذ عزيز مقتدر بما شقوا به على عبادك فى شهرك الحرام..يارحمن يا منتقم يا جبار يا قادر..

  12. البشاوى كتب:

    المرطب عزت – شفت الرطوبة الجد جد اليومين ديل—
    امس فى زمن هطول الامطار واقف قدام البيت اللى اصبح نيل ابيض عدييل كدة – جيرانى بالحيطة – ادارة الدفاع المدنى ولاية الخرطوم – تقف امام مبانيهم عربات جديدة تشبه عربات السواح الخواجات البيجيبوها معاهم
    مكتوب عليها اللجنة العليا للطواريء – واخرى – لجنة درء الكوارث – وتناكر مياه واسعاف – والغريبة انهم كانو بيتفرجو زى ما انا بتفرج !!!!!

  13. ياسين شمباتى كتب:

    البشاوى..خلى جيرانك ديل,,ادارة الدفاع المدنى ذااااتها قدامها بركة عجيبة,,والعربات عايمة وفوضى مرورية جد..اين الشرطة الموحدة؟؟ عجبى..

  14. aflaiga كتب:

    البشاوى : بركه الما شحدوك كوريك ولا طوريه ؟؟؟ يفتحو بيها مصارفم ..
    ركس : ابواب جهنم كتار وكمان فى مقاعد قدام فى الجنه ناصية وسنقل وفاتحه على النار للعاوز يتفرج على اهل النار تتخيل حتكون فى مفاجاات عجيبه جدا للمتفرجين تلقى ناس ما متخيل تلقاهم وبرضو تلقى فى الجنه ناس ما متخيل تلقاهم غايتو مفاجاات عجيبه ..

  15. صباح الخير و المطر و جمعة مباركة للكل و انشاء الله مطرة أمبارح ما تكون تقلت على حيطة زول و كانت زيادة خير…

    هاتفت خبير ارصاد صديقي صباح اليوم بعدما قرأت خبرا مفاده أن وزير الري كان بنفتش ليهو شماعة أمبارح في اجتماع مجلس الوزراء أمبارح و الظاهر قام عاين لي صاحبنا و تخيل قال شنو:
    “انو التنبؤات بتاعت ناس الارصاد لم تكن مطابقة للواقع” في اشارة لعدم قدرتهم بالاستعداد الكافي…..

    ضحكت معة و قلت له ياخ انت ما عندكم حق كان تكون تنبؤآتكم تكون كالآتي:

    “تهطل اليوم في تمام الساعة الثامنة و خمسة أربعين دقيقة مطر مصحوب بزوابع رعدية و تستمر لمدة ساعة و نص وقدرها ثلاثون مليمترا” هذا و تهيب هيئة الارصاد بغرفة الطوارئ للاستعداد و على سكان الحارات 5- 288 أن يتحسبوا للسيول الجاية عليهم من الشمال الشرقي”

    بالله دا كلام !!!!!!

    غايتو ضحكنا و قال لي الله شافنا من مطرة أمبارح اذ تجمعت سحب سوداء اللون نحمد الله ان الهواء شتت بعضها……..

  16. ياسين شمباتى كتب:

    حبيبنا عزت..دى قمة المهزلة السياسية والفوضى الادارية..هم حقارتهم فى ناس الارصاد؟؟هم ما يستعدوا سمح بعدداك يكوسوا المشاكل مع ناس بقيرتى ديل..اسه كمان سمعنا انو فى امطار هطلت بعد الافطار..الوضع كيف؟؟

  17. شمباتي حمد الله سلامة الوصول

    طبعن استمر مسلسل الامطار و جاتنا واحدة كمان بس مش شديدة بعد الفطار و لكن ربما تفاقم الوضع في بعض المناطق لأن المنازل مسقية بالموية و قد تكوع بعض الحيط….

    و لكن تبقى المطر هي الخير و البركة و ناس المحليات و الحكومة ذاتا هم المسخرة

  18. ياسين شمباتى كتب:

    الحبيب عزت..الله يسلمك..امس استرايكر قال لى انو بيت جيرانهم اتماص فى اركويت..لكن فعلا المسخرة معروفة..

  19. زووووووول كتب:

    ود الخلا وبقية السمار سلاااام
    يقول ود الخلا :
    ((لم تغضب السماء يوما” علي قوم فتمطرهم رحمة وبركة وانما كان غضبها والعياذ بالله العذاب، )).
    اقول يا عزيزى ود الخلاء من قال انها امطار خير وبركه يمكن للسماء ان تمطر ليعذب الله بها اقواما حيث لا يعلم جنود ربك الا هو . بل حتى الاموال والابناء يمكن ان تكون وسائل للعذاب (فلا تعجبك اموالهم ولا اولادهم انما يريد الله ان يعذبهم بها فى الحياة الدنيا ).
    بل حتى فى زمن الرسول الكريم صلى الله عليه وسلم كان الصحابة عندما تكثر عليهم المطر يقولون اللهم حوالينا ولا علينا اللهم على الضراب والاكام ومنابت العشب فلماذا يدعوا هؤلاء الاخيار بذهاب الخير والبركه للصحارى ومنابت العشب يا صديقى .

  20. طارق أب أحمد كتب:

    مطره ماجنوم 9 ملى على مقياس ريختر دقت الخرطوم لحظة أذان المغرب

    ربنا عالم بحالنا لأن كل مطره من المطرات الأخيرات تكون مصحوبه بكتاحه سوبر سونيك سرعان ما تشتت جلل حبات المطر لتكون حوالينا ما علينا

    االوالى دا شغلو نضيف

  21. يا ناس بحري مالكم علينا…. قلت لي يا أب أحمد بتكون عوقت البناء ,,,,

    الخرطوم غايتو هوا ساكت … !!

  22. طارق أب أحمد كتب:

    يا دوك
    ما إنفكت مستمره تصب و تقيف زى باص الحله
    بس ما تشيل هم دى من النوع البسقى الأسمنت
    لا حولتن فى صاقعه وقعت ربنا يستر

  23. نيام كتب:

    زووووووول:
    وقرأت ايضا ان الله اذا احب عبدا من عبيده قدر عليه رزقه لعلمه ان هذا العبد متي وسع له في رزقه ابتعد عن ذكر الله…فهذا يؤكد مقولتك ان ليس كل الرزق خير فبعض الرزق يبعدنا عن ذكر الخالق و يفتننا بالدنيا…والله يقول في محكم تنزيله (يَا أَيُّهَا الَّذِينَ آمَنُوا لَا تُلْهِكُمْ أَمْوَالُكُمْ وَلَا أَوْلَادُكُمْ عَن ذِكْرِ اللَّهِ وَمَن يَفْعَلْ ذَلِكَ فَأُوْلَئِكَ هُمُ الْخَاسِرُونَ{المنافقون :9}.
    اذن الله سبحانه و تعالي وحده يعلم متي تكون امطار خير او امطار شر فهو العليم و قد استأثر بذلك لنفسه..(فكونا بقا كل مطرة هي امطار خير و بركة شوفو مجاريكم و افتحوا كباريكم)

  24. طارق أب أحمد كتب:

    فى ساخر سبيل حول إختراعات برمائيه كانت لى براءه الأختراع التالى وهو قد يفيد الموضوع بالذات عزت

    عذرا يا شباب أحلامكم فطيره بما إنو نحنا دوله عظيمه فاتت الكبار و القدرها ف لازم أحالمنا و إختراعاتنا تكون عظيمه ——-
    الفكره إنو نأجر خيمة مناسبات من ناس كزام تكون قدر السودان كلو و نقوم نشدها فوق كل البلد و نمرق منها سباليق تغذيه سبلوقه تكب فى صهريج برى و سبلوقه تكب فى صهريج الصافيه و عطبره و بعدين الفائض يكب فوق دولاب ضخم يولد كهربا نوصلا بى توربينات مروى العاضه و كدا نكون حلينا مشكة المويه و الكهربا فى كل البلد بس فى مشكله واحده ,,,,,,
    منو البدفع أيجار الصيوان وزير الرى ولا الكهربا ولا الوالى ولا أسامه

  25. نيام كتب:

    طارق اب احمد:
    قبال ما نشوف البدفع منو لازم نشوف نأجر من ايتها شركة “الارائك” ام “الظليل” ام “الميمنة” وبعدين حاجة ثانية البدفع النفايات منو و الدفع المقدم علي منو ما تقول لي شيرنق ياخ اقول ليك فضها سيرة من هسه البشاوي طلع دفترو…

  26. د.ياسين شمباتى كتب:

    الحبيب طارق..والله اختراعك قوى وما بتلحق,,لكن سؤالك دا عايز اجابة عشان الجماعة بعدداك ما يقوموا يتخرطوا وكل واحد يرميها فوق التانى..

  27. طارق أب أحمد كتب:

    نيام
    وجدتها ومرقت الشارع لابس شراب و انا أصيح وجدتها وجدتها

    نكون شركه من الأربعه المستفيدين نسميها أيو حاجه كهربون تسقون تلحسون و نقوم نركب شافطات صواقع تلحس نار الصاقعه توقد بيها الوساخه يطلع أستيم يدور بابور الكهربا و تانى نجر سلك لى مروى و نسكت الخشامه

    تقول لى أرخميدس كان بستحما فى البانيو

  28. ياسين شمباتى كتب:

    الله يشفيكم..وصلتوا لى مرحلة صعبة خلاس يا طارق ونيام!!!

  29. التركى كتب:

    الاخ اب احمد الاختراع جميل جدا وليك عليا من هسع نكون ليهو لجنة متابعة عليا تنبسق منها لجان فرعية ولا اقول ليك نراضى خليل ونعمل ليهو وزارة تتولى الامر

  30. يا سلام يا أب أحمد كلك نظر اصلوا احنا ذاتنا تعبنا من الحر و الشمس و ممكن الاختراع دا يستعمل طول العام بس الا تكلم لينا الصينيين ديل يكيفوهوا لينا و ما بنختلف……………..

    مشيت بحري الليلة و لقيت البناء على الشجر على العمال ذاتم يزغططوا من الفرح …………… فعلا أمطار خير و بركة الا الجات في ممتلكات المتضررين سامحتهم….

    لكن برضو بركة الجات 80 ملليميتر اليوم داك مش احسن مما لو جات 160 ملليميتر…. شكرا حاج السلاوي لصقنا فوق من صورك البعتها لينا عقبال الريالات..!!

  31. زوب كتب:

    يا سلام يا أب أحمد كلك نظر اصلوا احنا ذاتنا تعبنا من الحر و الشمس و ممكن الاختراع دا يستعمل طول العام بس الا تكلم لينا الصينيين ديل يكيفوهوا لينا و ما بنختلف……………..

    مشيت بحري الليلة و لقيت البناء على الشجر على العمال ذاتم يزغططوا من الفرح …………… فعلا أمطار خير و بركة الا الجات في ممتلكات المتضررين سامحتهم….

    لكن برضو بركة الجات 80 ملليميتر اليوم داك مش احسن مما لو جات 160 ملليميتر…. شكرا حاج السلاوي لصقنا فوق من صورك البعتها لينا عقبال الريالات..!!

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s