ساب البلد…

Posted: الخميس,27 أغسطس, 2009 by ياسين شمباتى in إجتماعية

اهلى وعشيرتى,,اهل الحوبة والنوبة,,جناح الطابية والراتب,,والمحراب واللالوبة,,لقد كانت لقاءتنا الاول بمثابة الفتح الحياتى الجديد,,وتوالت اللقاءات الاسفيرية والمباشرة,,وازدادت العلاقة بيننا عمقا ومتنا..الكل يعجب لهذا النسيج الاجتماعى الفرد,فريد عصره واوانه..لقد كانت غيبتى السابقة اخف الما من الآن,لقد كنت وقتها افكر فقط فى كيفية الخروج,ومؤكد انه انتابتنى مشاعر حزن واسى على فرقة الوطن والاحباب و(اللمة) الحلوة,ولكنى كنت اعزى النفس بمستقبل وايام معدودات سرعان ما تتصرم وتنخرم من بين يدى,وحقيقة ان العام انطوت صفحته باسرع مما كان فى البال,ولكن الاجازة ووقتى بينكم ايضا انخرم باسرع مما فى الخيال,,وكما قال لى الحبيب ابكرون هاتفيا(الاجازة اتلحست)..اجدها حقت وقد (اتلحست) ولم يتبق بها الا سويعات وهنيهات..

هذه المرة اجدنى اشد وجدا من ذى قبل,واكثر الما مما مضى,ربما هى الانتكاسة التى يعنيها اهل الطب,وربما هو صعوبة الفطام للمرة الثانية,وربما هو ناتج من ازدياد الرصيد المعرفى الاجتماعى والتقائى بالعديد من الرموز والقامات التى لن يسع المقام ذكرها والاحتفاء بها..وربما هو شعور بالمكانة والقيمة وسط صفوة حتما سافتقد ضحكهم وجدهم..لقد كنت آمل فى الالتقاء بالعديد من الاحباب والاصدقاء,لكنى اتيت فى موسم تزاوج واهتمام بالافراح,اخذا جل وقتى,,فالعتبى لكل من قصرنا فى حقه وواجبه..

والشكر كل الشكر لكل من وصلنا وواصلنا بشخصه او بابراقه او باتصاله خلال فترة وجودى بين ظهرانيكم..والعفو والعافية لانى غدا سأمضى ويبعدنى الرحيل,, غدا سأمضى ولا يبقى للذكرى بديل,, غدا سأمضى وفى العين دمعة تبوح بكل ما قلنا وقيل..

ومتين تعود ايام هنانا وحننا…….وباذن الله سنلتقى لو فى العمر باقى…..

Advertisements
تعليقات
  1. مُخير كتب:

    يا حاج يا دكتووووور عوافي
    الحبان في كل مكان
    السلام عليكم ورمضان كريم
    يا حبيبنا ياهي الدنيا وياهو حالها، ونسأل ربنا أن يرد غربتك ويعيدك للديار سالم أحمد سالم وغانم السليطي آميين،
    ونحن نتفيأ ظلال بركات الشهر الفضيل نأمل أن تكون نجضت أمورك ووقعت ميثاق ماشاكوس مع محمود الخطيب عشان الغيبة ما تجر عشر سنوات زينا، وشكلك محتاج كورس تقوية كي تتقل حبتين وما تجي ناطي كل إجازة، ناس عمك أبو وضاح ديل رتبوا الأمور من بدري وعندهم نص الستة ولسة مشوارك طويل فحاول ما تنغمس شديد في الداخل وتبقى من فصيلة ناس عمك أبو عصمت وأكرب زندك وخليهو بالله يعملوا ليك عقد الجلاد ويرسلوا ليك نص الدين بارسيل، عشان تبدأ مشوار الإنجاز ولا الإنقاذ ولا الشنو ما عارف.
    حبيبنا إجازتك كانت إجازة بمعنى الكلمة وربنا يبارك في أيامك كوولها زالعفو والعافية إلى أن نتلاقى في ساعة خير.

  2. حاج أحمد السلاوى كتب:

    يا حليلو ..قال سايب البلد ..
    يا حليلو … يا حليلو ..

    وإن شاء الله تكون عملت بنصيحة عمك الخبير الأمير مخير – رد الله غربته وغربتنا جميعاً – وكما جابا ليك بلغة الشباب اليافع ..
    ما أحلى لحظات اللقا …وما اقسى ساعات الفراق..
    المهم نشوفك تانى ..ونسعد بلقاك ..
    وود الفتيحاب فى إنتظارك ..بالورود والرياحين …بس .

  3. عباس ركس كتب:

    شمباتي : مرحب بيك بي هناك بي هنا بي اي حتة .
    قلت لي ابكرون قال ليك الاجازة اتلحست !! وهي بقت على الاجازة بس , ما كل حاجة حلوة اتلحست !! الله يستر على الفاضل – سانتو !!!!

  4. الصادق ود البركة كتب:

    السلام عليكم و رحمة الله الفتى الذهبي ياسين
    تمشي وترجع للأوطان بالسلامة ولم تسوي عمرة ما تنسانا من صالح الدعاء
    (صدقني السودان القالو عنو كعب يصبح سمح جداً عندما تمرق منو ولو أسبوع واحد ) رد الله غربتنا جميعاً ودمتم

  5. عزيزى د.شمباتى …. تمشى وترجع لينا بالسلامة وماعايزين نقول ليك قلنا ماممكن تسافر لانو دا نضال وضريبة شبابية قررت انك تدفعها بس مناى ترجع للوطن ظافر ونفرح بيك وبعودتك الحميدة …. معرفة الرجال كنز ومعرفة دكتور شمباتى مفتاح الكنز ….. لك الحب والتقدير ولكل الاخوة بالمملكة الامانى العذبة …. رد الله غربتكم ومتعنا برؤيتكم ان شاء الله

  6. الكناني كتب:

    الدكتور ( ولدنا) يس

    انت سفيرنا هناك للدعوات الطيبة وانت في سفرك ادعوا الله ان يسهل كل امر ويجمع الشمل ، سعدنا بلقاءك كما كنا دوماً .
    نوصيك .
    احسن الي الناس تستعبد قلوبهم ** فطالما استعبد الانسان احسان
    وكن علي الدهر معوانا لذي أمل ** يرجو نداك فان الحر معوان
    واشدد يديك بحبل الدين معتصما ** فانه الركن ان خنتك اركان
    من استعان بغير الله في طلب ** فان ناصره عجز وخزلان

    نسأل الله ان نلتقي بك هناك
    ربنا يكتب السلامة ولا تنسانا

  7. البشاوى كتب:

    كل الحب والشوق والامنيات الطيبات بسفر سعيد واقامة فى بلد الغربة طيبة وصحة وافرة ودعاء مستجاب وصحبة خيًرة وسكنا به رحمة ولطف من الله وعملا نافعا وعودا حميدا وذنبا مغفورا

  8. الزهراء كتب:

    الاخ شمباتي
    بعدك الفريق اصبح خلا
    والله كنا نتمنى وجودك معانا يطول لكن سنة الحياة
    ربنا بوفقك وينور طريقك ويعدل خطوتك
    امييييييييين

  9. البشاوى كتب:

    آآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآمين يارب

  10. ياسين شمباتى كتب:

    الحبيب مخير..سلام يا غالى وانت تزود بالنصح اخا فى امس الحوجة له..ربنا يسهل الخطوة ويبعد العوارض وباذن الله الخطة تمشى على مايرام..

    ابوى السلاوى..والله المصبرنى ومرجعنى وجودكم على الضفة الاخرى من الحياة لتستولوا على كل حياتى وقلبى,,بكم اتلمس خطاى المستقبلية وباذن الله يكون جمعنا دايما على خير ولى خير..طمنتنى بكلامك عن ود الفتيحاب دا !!

    الحبيب الصادق..ربنا يرد غربتك زينا كدة واول ما تنزل مكة ادينا خبر..

  11. ياسين شمباتى كتب:

    الحبيب ركس..عليك الله اظهر بهناك,,عشان على الاقل نقول فى حاجة حلوة ما(اتلحست)..وخليك قريب..

    الحبيب ود الخلا..بارك الله فيك,,وياها بلدنا وناسها الحلوين..يارب نجى نلقاها احسن واحلى..

    الحبيب الكنانى العائد بقوة..والله ما تتخيل فرحتنا بمداومتك على الطلة..ولك دعوات خالصات باذن الله..بالمناسبة,,اين كل يوم حديث؟؟؟؟

  12. ياسين شمباتى كتب:

    حبيبنا بشاوى..بارك الله فيك على المشاعر الطيبة والدعاء الاطيب..ربنا يجمعنا فى ساعات الهناءة والرضا..ما اوصيك على العقاب..

    الاخت الزهراء..وانتى كمان ربنا يحفظك فى غربتك ويعدلها عليك محل ما تقبلى..رحلة سعيدة وعودا اسعد..

  13. نيام كتب:

    حليل القلبو مال
    وهام في خيال خيال
    بعد ما كان يمين
    أصبح في الشمال
    يا اصدق مقال
    و احلاهو الكلم

  14. bakriMusa كتب:

    مرحبا بالاخ شمباتي
    وهون عليك.. فارقت اناس قل ان يجود الزمان بمثلهم ولكن فارقتهم الى كوكبة اخري هم اناس في قامة (وطن) لايقلون روعة عن من فارقتهم
    فهنيئا لك بهما .. هنا .. وهناك ..

  15. ياسين شمباتى كتب:

    الاحباب نيام وبكرى..بارك الله فيكم ونتقابل فى ساعات الخير والصفاء,,كان هنا كان هناك..

  16. نيام كتب:

    اضحي الفراق بديلا عن تدانينا
    و الايام مسرعة في العد تفنينا
    يا اهل ودي و اطياف تساورني
    كم في الخيال لقاء قد يدانينا

  17. ياسين شمباتى كتب:

    الحبيب نيام..الله يديك العافية وانت تنشر لنا دررا وتكتب لنا احلى شعر..بحمدالله وصلت قبل الافطار الى جدة,,وانا الآن اجتر ذكرى ايام تخرمت من بين ايدينا وعز فيها اللقاء بالكثيرين,,ولكنى احمد الله على لحيظات ستكون زادى فى غربة تخيرتها واخترتها وحدى..استودعت الله دينكم واماناتكم وخواتيم اعمالكم..وربنا يجمعنا فى ساعات الخير والحب والمودة..

  18. سهيل كتب:

    خلاص كفايه .. كده حنبكي

  19. حاج أحمد السلاوى كتب:

    سهيل …هو إنت لسه ما بكيت ؟ يخس عليك ..ما عندك عشرة ( بضم العين ) .

  20. د.ياسين شمباتى كتب:

    الشكر العميق للبروف الفاتح جبرا واسرته ولطفى الانسان وللحبيب استرايكر الذىن كانوا معنا قلبا وقالبا وروحا وجسدا حتى اللحظات الاخيرة بالمطار..والشكر لكل من اتصل مودعا ومهنئا بسلامة الوصول.

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s