مطاليق الحكومة,,الموية والكهربا…

Posted: السبت,29 أغسطس, 2009 by ياسين شمباتى in سياسية

دأبت الحكومة على تبرير عجزها وفشلها فى توفير المياه والكهرباء بان تخرج علينا كل صباح بان محطة (كذا) للكهرباء قد خرجت عن التغطية,وان محطة(زعيط) للمياه قد خرجت من الشبكة القومية,وان محطة(معيط) للكهرباء قد (حرنت وحردت) الشبكة و(طشت) ساااااكت كدة..

يا جماعة الخير ياناس الحكومة,ما تلموا (البنيات) قصدى الهيئات دى عليكم وتستروهن فى بيتهن,فى داى للانطلاقة والحوامة الكل يوم بالفريق لما جابن ليكم السمعة!! اسه الجيران ناس مصر واثيوبيا ويوغندا يقولوا عليكم شنو؟؟ويقولوا عنهن شنو؟؟وياربى اخواتن التانيات ناس(صناعة وزراعة وتجارة) مطلوقات كدة على حل شعرهن ولا مافى زول عارف عنهن خبر؟؟ولا ديل ما مأثرات فى اخوانهن الصغار زى (موية وكهربا)؟ باقى موية وكهربا ديل الكبيرات والكانن شايلات الحمل مع ابوهن(الشعب) قبل ما يجي(الحزب الطينى القابض) ويقتل ابوهن (الشعب) بالليل ويعرس امهن (الديمقراطية),وهو ذاتو فى ناس قالوا شافوهو بيغتصبها ولما نضمو معاهو عقد عليها لكن فى صيغة(زواج متعة)!! فى شان كدى قالوا الهيئات ديل اتأثرن من القصة دى وبقى مافى زول (كبير) يسأل فيهن ,,وعمتهن(المالية)  المغندلة والعندها القروش ما صارفة عليهن كويس,والزمن جار عليهن,قامن مرقن على الشارع يكوسن رزقهن ورزق وليداتن..لكن حلفوا الناس العاصروهم وشافوهم انو ابوهن (الشعب) ما قصر معاهن,تعب وراهن وكان بقطع من لحمو ولقمتو عشان يديهن مصاريفهن ويأسسن حياتن..

لكن سمعنا قالوا نظمن حياتن كويس ولمن قروش زى التراب وكان ممكن يرجعن لى ابوهن (الشعب) ويلمنوا ويحضضنوا ويجازنو بالخير على ايامه السودا العاشها,,لكن قالوا ليك كل واحدة لما فيها زول(مسلط) وبقى عليها عشرة,,وسفوا قروشهن وعقدوا عليهن وضوقوهن المر,والواحد فيهم حالف ما يطلق ولا (يسلم) الا تقوم القيامة..وقدر ما دخلوا الاجاويد ما رضوا,,اسه ما عارفين الحل شنو,,البقنعهم منو عشان يفكوا الهيئات ديل ولا القيامة تقوم كيفن شان (الشعب) المسكين دا يضوق خير بنياتو ديل..

وكمان ناس الحكومة ما مقصرين,فاضحنهن فى الاعلام وكل يوم يطلع (راجل) واحدة فيهن ويقول انو البينة قصدى الهيئة بتاعتو (مرقت) وما رجعت لسه..ويقول كلامو دا بلا خجلة..يا راجل اختشى وشوف السبب البخليها تمرق كل يوم شنو!! وامسكوا عليكم هيئاتكم ديل,,امسكوهن وصالحوهن واصلحوهن..

Advertisements
تعليقات
  1. طارق أب أحمد كتب:

    أها المطلوفه أم حساباتن سريه إن (جاز) لى أن أسميها سوداء الدمن دى يرجعوها لى بيت أهلها كيف

  2. زووووووول كتب:

    شمباتى واب احمد سلاااام
    اولا بالتبادى انت يا شمباتى داير تشوه سمعة البنيات ديل ساكت والله بناتنا مستورات واهو المويه رقدت ليكم هبطرش ما عليك الا تفتح باب بيتكم وتشوف قدامك .والرقاد الهبطرش دا طبعا بخلى الكهرباء ما تظهر وزى ما قال المثل اتنين ما اتلقو للنعامه .
    كسره : قرط على كدا يا شمباتى

  3. سلام يا الزوووول و ضيوفه الكرام

    انتو ما سمعتو “قام اتعزز الليمون”

    و تييب…..

    هسة اتخيل تكون الكهربا و الموية مية مية … لا نحن لا المسئولين منها حيرتاحوا…..
    نحن الحال الدغري خالس دا ما بنقدر عليهو لازم يشق علينا الصيام زي ناس العراق عشان نرتاح

    و المسؤولين من الخير لازم يشتغلوا ….السفر و المساسقة دي ما بقروش لمن دي تطلع مش عشان يرجعوها دايرة قروش… و دايرة محولات من الصين و جزر الواق الواق…

    انت قايل الجماعة القاعدين يبنو ديل عشان سواد عينينا… ما غاروا لمن لقوا

    محمد يبني… خالد ابني (مع الاعتذار لود البرعي)

    و قاموا لحقهوهم

  4. حاج أحمد السلاوى كتب:

    إنتو يا ناس شمباتى وأب احمد لا بيعجبكم العجب ولا الصيام فى رجب .الوالى الجديد دا السمّاهو البشاوى عبدالرحمن المطر.. بدلاً من عبدالرحمن الخضر راجل كراعو خدرة وندية ..أول ما جاء جاب ليكم الخير العميم ..والراجل جديد لنج فى العاصمة القومية ( زول اقاليم سااااكت ) أدوهو فرصة يشيل نفسه عشان يشوف ويعرف مشاكلكم شنو ..صرف صحى ..صرف مياه امطار ..شوارع ..كهرباء ..موية …طولوا بالكم شوية يا جماعة وما تبقوا ملهوفين بالشكل دا ..يعنى هو اصلو ساحر ؟ لازم تحصل عدة كوارث طبيعية وغير طبيعية عشان ياخد الترقية وينقلوهو هو وجماعته إلى مناصب عليا..يمكن يعملوهو وزير الطاقة النووية …
    ارفع راسك ..ارفع راسك ..ارفع راسك ..ارفع راسك …وشوف السحاب الجايب المطر ..

  5. سهيل كتب:

    تعرفوا يا جماعة الخير – شمباتي دا ذااااتو كان مسكوهو الولايه راسو حيضرب و ماحيعرف يعمل شنو و يخلي شنو – يازول إنت ناس القفيف و الفواره ديل ربنا ساتر الولاه بتاعينهم ساااكت – كدي خلي تنزل عندهم (شكشاكه) ساي شوف كان ما يعلنوها منطقه كوارث

  6. تسلم يادكتور … ياخويا علاقة الكهربة بالموية علاقة حياة وموت لو جات المطرة يقطعو الكهربا عشان الهبوب ولو قطعت الكهربة تنعدم الموية عشان موتورات المحطة بتقيف …. اهلنا بقولو (عايرة وادوها سوط) … اذا الشعب يوما اراد الحياة

  7. د.ياسين شمباتى كتب:

    الحبيب طارق..مساك طيب..والله المطلوقة(الجاز) ليك تسميتها سوداء الدمن طريقة رجعة ليها مافى,,طبعا دى مقرشة لمن بهناك,وبعد طلقوها من زولها ديك لما ليم فيها واحد كمان اعوذ بالله منو,وكان معرس اختها(مالية),,يعنى زول ما تقول اتبادلوا الاخوات..ياربى دا حلال ولا حرام؟؟

    زوووووول..سلام..اسه انحنا واحد ما لمينا فيهو,,وينو التانى عشان نبقى زى النعامة؟؟ والله انحنا بنشبه النعامة بس فى دفن روسينا فى الرملة..بعدين انا مابشوه سمعتن,برااااهم رجالهم القالوا مرقن,,اسوى شنو انا..

    بقاريتش..قلت لى الشغلة مدروسة,وانا الكنت قايلهم بلداء ساكت..وبمناسبة البرعى اهى السيد الوالى الجديد مدحته التى يقول فيها(العيون نامت انت وين,,والرجال قامت انت وين)..

  8. الكناني كتب:

    الاعزاء الكرام
    لكم التحية
    قلت لي قام اتعزز الليمون ؟

    سمعت بي محطة رام الانهارت ولا محطة سوبا ( للمياه)
    الخراب عاااام وساعدته علي ذلك الامطار وابو رجل خضراء الجديد ده كمان
    ودمتم

  9. د.ياسين شمباتى كتب:

    ابوى السلاوى..مساك طيب..طبعا دا كمان لما يثبت كرعيهو كويس ح يقوم على ناس المجلس التشريعى,عندو معاهم حساسية عجيبة!!! ويجوطها ليك معاهم لحدى ما يتدخل فيها شيخ على,,عشان كدة اصلا ما راجين منو خير..وهو من جا صرح بان(اسالونى السنة دى من المجارى والخريف) ومافى سائل او مسئول فى بلد الهبتلى دى..وكربتنا كربة لو جات مطرة تانية..

    سهيل..الفوارة جاها سيل قبل يومين,لكن الحمدلله عندنا مجرى طبيعى ليهو,ياخى ديل وسط الجبال موصلين ليهم شارع زلط وكهربا وموية ومركز صحى وامارة ومكتب بريد ومدارس,والسكان اقل من 100 مواطن!! تقول لى كوارث..

    التركى..شقت انحنا بس راجين ارادة الشعب دى عشان يعيش..لك الله يا وطنى الجريح..

  10. حاج السلاوى
    فعلا الوالى دا جديد و ما مسائل لكن الفكره محاكمة النظام الذى أتى بهذا الوالى والوالى المنصرم والكان قبله وقبل القبله و هكذا دواليك لحدت ما تصل قلندر كل الولاه السابقين لهثوا وراء إستحواز و توزيع أكبر مساحه ممكنه و تحويلها الى مبانى ما أدى الى انعدام المنتزهات و مصارف المياه الكنتوريه و كذلك الأخلال بالتدرج الكنتورى الطبيعى من الجنوب للشمال و شرقا أو غربا الإنحدار نحو النيل نتيجه للردميات الناتجه عن المبانى و كذلك عمل عشرات الشوارع بدون مصارف

    تصدق خور عز الدين مبنى من الحجر من سنة دو كسروهو و بنوهو مسلح قلنا جميل بس ما أن تجاوز البنيان سعد قشره تحول الى بلكات أسمنتيه اتماصت بعد أول مطره قبل شهر

    بعد تكرار حوادث موت الأطفال نتيجة صعق بتيار كهربائى بعد كل مطره أجدنى أفضل قطع التيار على البوبار بإنو المطره ما قطعت الكهربا

    سهيل
    تعرف شمباتى دا لو مسكوهو الولايه حيرفع شعار و الأمطار ما عارف شنو رمال حلتنا لامن يقلبا لينا فينيسيا

  11. شمباتى

    زلط وكهربا وموية ومركز صحى وامارة ومكتب بريد ومدارس

    ديل براهم 100 تيب المواطنين وين

  12. البشاوى كتب:

    يادكتور شمباتى عساك طيب
    شفت نوعك دة مفروض يعملو ليهو حظر دخول للبلد لانك فى الغربة بتسمع ومابتصدق لكن جيتك للبلد تشوف بى عينك تشيل حال الحكومة
    يفيض النيل نحيض نحنا
    يظل حال البلد واقف ( دوت )
    تقع محنة
    من الابرول ابت تطلع
    من الواسوق ابت تطلع
    من المدفع طلع خازوق ( امانة ماخازوق )

  13. نيام كتب:

    طارق اب احمد:
    المواطنين ما آ آ آ آ قطع وكده!!

  14. طارق أب أحمد كتب:

    البشاوى
    ليس من رأى كمن سمع
    جيد انو شمباتى شاف بى عينو
    أول مطره تانى الحكومه حتعلن حالة طوارئ و تستجدى المساعدات و السودانيين المغتربين حتشيلم الهاشميه و ينسوا الفات و يدفعوا من جديد

  15. د.ياسين شمباتى كتب:

    الحبيب طارق..صباحك طيب..كلامك جميل جدا عن الميلان الطبيعى والانحدار نحو النيل,,لكن ياربى فى مهندس من مهندسينهم ديل بكون جايب خبر للحاجات دى!!؟؟؟ يعنى اسه اى مواطن بكون عندو فكرة بسيطة عن التصريف والصرف الصحى,,يعنى نفق عفراء دا لو مسكونى مقاولتو كنت بنتبه للمصارف!! عجبى..
    ورحمة الله على كل الماتوا بسبب جهل وتجاهل الدولة لهم تحت الانقاض وبسبب الكهرباء السارية فى المياه وبسبب الامراض التى يتوقع ان تتفشى فى هذه الايام..
    وشفت براك حكومة مليكنا خادم الحرمين بتخدم 100 مواطن كيف..عارف السنة المضت جا برد قارص جدا فى نواحى الطائف,,الحكومة وزعت بطاطين ومواد تموينية للكل,مواطنين واجانب..لك الله يا وطنى الجريح..
    بعدين لو ادونى الولاية دى سنة بتشوف براك البحصل شنو..

  16. د.ياسين شمباتى كتب:

    الحبيب البشاوى..من المدفع طلع خازوق..خوازيق البلد زادت..خوازيق البلد كترت..
    لكن ليهم يوم..

    الحبيب نيام..القطع دا راجيهم يوم لا ينفع مال ولا بنون..

    عليكم الله يا احباب خشوا على اللنك دا وشوفوا الناس دى ممغوسة كيف..

    http://www.facebook.com/sumia.e.elamin?v=feed&story_fbid=127504887381&mid=104fef8G2f517d23G26dc780G37

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s