يا ود ابوك كان حريف كوره ومعلم ..

Posted: الثلاثاء,1 سبتمبر, 2009 by aflaiga in اخرى

صديقى س زارنى قبل ايام وهو متذمر  من تصرفات وسلوك السودانيين وكذبهم وقال لى بالنص :

س : تعرف يا افليقا انا متحير فى البلد دى منو الكان بيجى التانى والرابع والطيش فى الابتدائى ؟؟؟ ومنو كان ما بيعرف يلعب كوره ؟؟ ومنو شعرو كان قرقدى وقصير ؟؟ ومنو كان ما شفت فى الجكيس ومقطع السمكه وديلا ؟؟ ومنو ما عارض الديكتاتورية ومنو الكان خائن ؟؟ ومنو الما كان ساكن فى الخرطوم لمن الناس بنت العمارات ؟؟ ومنو ما كان شاطر وهو صغير ؟؟ ومنو ما كان مجموعو بيدخل طب وفضل المنطقه الصناعية ومنو ما ضحى عشان اخوانو قام خلى القرايه ومنو ومنو ومنو ؟؟

افليقا : ياخى ده كلام عجيب !! ليه ده كلو ؟؟

س : لانو يا افليقا اول ما تتونس ليك مع سودانى بيقول ليك :

تعرف انا والله القدامك ده كنت اخطر لاعب كوره فى نجوم امبده درجه تالته .

وانا والله شعرى الشايفو ده كان لحدى هنا ويشير الى عينيه !!!

وانا القدامك ده كنت مبكى بنات الجامعه كلهم .

وانا القدامك ده كنت اشطر زول فى المتوسطه وبجى الاول !! طيب الكان بيجى التانى والطيش منو لو كل الناس دى الاول ؟؟

وانا القدامك ده اول زول عارض ثورة سبتمبر !! وانا اول المعتقلين فى السجون السبتمبرية !! طيب الموالين لى سبتمبر كانو منو لو كل الناس ناضلت ضدها ؟؟

المهم يا افليقا نحنا شعب عجيب جدا .. تتخيل اول امبارح لاقانى واحد وبنتكلم عن كوبرى كوبر قال لى تعرف اول نفرين قطعو الكوبرى ده بكرعينم كنا انا وابوك الله يرحمو !!! طبعا هو مفتكر انو لمن يقول لى ابوك كان معاى حامشى الموضوع ساكت !! ودى عاده غريبه جدا من العادات السالبه عندنا الواحد لمن يجى يكضب وما داير زول يقول ليهو كضاب بيقوم يدخلك معاهو فى الكضبه .. يعنى يا افليقا انت ممكن تقول تعرفو يا جماعه طبعا انا وشمباتى من اوائل الناس العارضو نظام مايو واثار التعذيب فى جسمنا حتى الان مع انو انا وشمباتى فى زمن مايو كنا بنعذب فى الكدايس البنلعب معاها فى الواطه ونحنا بنحبى !!!!

دعونا نناقش هنا لماذا كل السودان كان الاول فى الكوره والقرايه والوجاهه والشعر الطويل والنضال ومنو الكان التانى ؟؟؟؟

Advertisements
تعليقات
  1. أفليقا سلام

    لكين ما لازم يكونوا واحدين في المقدمة و بعدين المؤمن صديق انت أول ما واحد يقول ليك أنا كنت الأول في الدفعة طوالى تصدقوا….مش في أول و نص و طيش مش جايز يكون صادق عبد الله

    عارف يا أفليقا طبعا الحكاية متأصلة في السودانين لأنهم بيعرفوا أي شئ… سياسة، كورة …جكس كلو….. و حتى في مجال الاعلام و لمن المستضاف يسألوه في (أسماء في حياتنا) فعيب كبير أن يتحدث المستضاف و ما يضيف ليهو حاجة من هذا القبيل (أصلو أنا و المرحوم جبارة و الله يطرا بالخير عبد الجبار (دا يكون هاجر ليهو سنين) و عبد المنعم رحمة الله عليه كنا بنجي من غلاليل اب روف لحد السراية عشان نقابل غردون) و طبعن ناس أسماء في حياتنا دائما بيستشهدوا بالمراحيم عشان مافي واحد يسألهم……

    الله يحيب لينا أيام أحسن من الأول عشان ما نقول حليل زمان

  2. د.ياسين شمباتى كتب:

    الحبيب افليقا..عودا حميدا..الكذب او محاولة التجمل عادة متأصلة عند كل البشر,لكنها تظهر جلية عندنا نحن السودانيين لحبنا للتميز والصدارة..

    قالوا ابوى الله يرحمه كان معذب اخوانى عذاب شديد فى القراية والنتائج_وهو كان عسكرى فى الشرطة_ يوم اخوى حامد جا التاسع وعادل الاستاذ جا الخامس ويبكى محروق من نفسو كيف ما يجى الاول,,ابوى شاكل حامد وقال ليهو انت اسه نفسك فاااتحة تاكل واخوك الجا الخامس حردان الاكل؟؟رد حامد ببرود_وهو فى الصف الرابع آنذاك_ انت كنت شاطر يا ابوى؟؟ بالحيل كنت شاطر,,فساله: وكنت بتطلع الاول؟؟ طوااالى ماسك الاول يا ولد..فساله آخرا: طيب وقت كنت بتطلع الاول ما لقيك ما بقيت مهندس ولا محامى تركب الطيارة بدل ما طلعت عسكرى تركب القطر بالتسريح!!! ونال علقة ساخنة ذاك النهار..

    اها عشان كدة الآباء يحاولوا يكونوا صادقين مع ابناءهم وما يمثلوا ادوار بطولة زائفة عشان ما يلم فيهم واحد زى اخوى دا ويلجمهم تب..

    بعيدن تعال يا افليقا,انا متين حضرت معاك مايو!!؟؟؟ يا داااب متذكر الانتفاضة طشاش طشاش..والله يا هو كمان!!!

  3. aflaiga كتب:

    عزت : مرور راقى كالعاده .
    المشكله يا زعيم الواحد بيكون بيتكلم وكل علامات الصدق بتشع منو ومتكى بالجنبه زى رواة الحديث ويقول ليك حدثنا فلان عن فلان ..
    اسى انا ذاتى مره مره بطلع بى حمودى العالى واشبكو تعرف يا حمودى امك دى جرت وراى لمن فترت لكن فى النهاية صبرت ونالت !!! وتكون سمسمه برضو اشترت ليها كم جوز جزم قديم من الخرد وقالت لى حمودى تعرف يا حمودى الجزم ديل كملن ابوك بى وراى – لكن حمودى طبعا مفتح جدا قام قال ليها : ماما انتى ابوى كان بفلق زمان ولا شنو ؟؟؟
    صديقى س من دفعه متميزة جدا احسنها كان هو الذى طلع بناء وطبعا قاشر بالمره انا دفعتى كلهم اطباء ومهندسين وضباط وتجار ورجال اعمال – يوم من الايام راكب المواصلات السواق قال للكمسارى ما تشيل من الزول داك ومن المعاهو !!! الكمسارى عاين للزول الاعفوهو واندهش :
    يا سلام يا دفعه عاش من شافك وقال للسواق تتخيل انا ما عرفتو من الثانوى ما اتلاقينا !!!!!!!!!

  4. قرن شطة كتب:

    الاخ افليقا /التحايا ورمضان كريم / الكلام القلتو دة كلو صاح وتمام ، ونحنا كده لاننا ناس محبطين فى حياتنا وماسعيدين بالمرة…عشان كده كلو واحد عندو ماضى عجيب ملى بالانجازات الوهمية ومستقبل كان ممكن ..لكين الظروف وناس فلان وحكومة فلان ..وظروف الاسرة شوية كانت سيئة…والوالد إتوفا لسوء الحظ …أمور ياسيد بتخصنا نحنا برانا من دون كلللللللللللللللللللللللللللالناس الخلقاها الله..دمت ياحريف

  5. طارق أب أحمد كتب:

    طيب يا افلى رأيك شنو فى المدير المجلى لامن يسرح بيك و يقول ليك هو العمل دراسة جدوى السد العالى وهو الأقنع مستر س بضرورة الأستثمار فى دس الثمار وهو صاحب نظرية الأستحمار فى السياسه و البمبار

    و الأدهى و ألأمر لامن يحكى لى ضيوفو عن إنجازاتو الى إنت الما روحك بتغباك صاحب الفضل فى كل هذه الأناجيز يا لذيذ

  6. ودالفتيحاب كتب:

    فى ناس تحب تتونس ،أها ممكن يسرح بى الجمبو لحدى مايوصل محطته ،ذلك تجد اكثر الشطحات فى البص خاصة لوكانت الرحلة طويله شويه ،يهريك لحدى ماتوصل ، بس مرات تقلل من عناء السفر ،وفى بيت البكاء بتكونمعاها شوية تمثيل ووقوف ،لزوم لفت النظر ،والله يرحم المرحوم .

  7. التركى كتب:

    تحياتى أفليقا ….. تعرف نحن السودانين كلنا اوائل ياخ انت ماسمعت بالاول مشترك بس اهى ذاتا ….. مرة قلت لبتى الكبيرة انا كنت بدرس امك اللغة الاسبانية طوالى (لصقت) لى : مش مهم انك تعرف الاهم انك تطور معرفتك اهى امى بتعرف اسبانى احسن منك … أعتقد اننا ح نتخلص من الاول مشترك دى لما نقدر نعترف بضعفنا وعدم معرفتنا بكل شئ ودا ماعيب …

  8. مُخير كتب:

    أبو الأفلاق والحلوين
    سلام
    يا سادة أدوها صنة، يعني ما كفاية الخيبة وشلاليت الدُنيا، حكوا الشباب عن المستخدمين من بنغاليين وهنود وفلبينيين ألخ لمن يجتمعوا آخر الأسبوع في منطقة البطحاء بالرياض وتجدهم جماعات وأكوام وأكوم والونسة المدورة محورها الكفيل أو صاحب العمل والأفلام التي تعرض بتكرار غير ممل عن مواجهات تمت (في الخيال طبعن) أرباب قوول إنت روح جيب آيسكريم من شان بذورة!!! أنا قووول مافي رووح أرباب…. أرباب أنت روووح أنا مافي رووح
    وبصوت عالي وإنفعال وهكذا ما لا يستطيع فعله أوقوله في الواقع فلا مندوحة أن يضفي عليه قليلاً من التوابل ويقدمه للحبان أو ابنك أو بنتك في طبق بكمية تكفي لشخص واحد ولمرة واحدة، وبالتالي عند السؤال عن الترتيب في المدرسة فالحقيقة كاملة قد تكون مزعجة أو ربما تعود بعواقب وخيمة لذا وجب التخفيف ويعني لا يجب أن تكون الأول الأول لكن كان طلعت من العشرة ما فوت العشرين الأوائل!!! والفصل ربما يكون فيه كم وأربعين فبالتالي أن تكون أوّل الطيشة خيراً من أن تكون طيش الأوائل، كلامي ده صاح ولا ما غلط يا أبوحمودي.

  9. البشاوى كتب:

    افلى الفلتة
    تعرف عندى صاحب سمسار كل يوم يورينى بطولة فى مجال مختلف
    يوم فى الكورة زمان ويوم فى القراية ويوم فى الجكس ( مالو التقول زولك ذاتو ) آخر مرة فكانى ليك بى درابة مبالغة قال إنو كان حرس شخصى للريس لكن حقارة ناس المؤتمر الوطنى طفشوهو وجابو حرس تانى لكن مابالمواصفات المطلوبة والان الريس جارى وراهو عشان يرجعو وهو رافض لانو الموضوع موضوع كرامة وكدة والغريبة انو عاطل وكل يوم يقول ليك ساكى لى شغل –

  10. طارق أب أحمد كتب:

    لكن يا أفلى فى نقطه مهمه لازم ننتبه ليها وهى إنو نحنا من قمنا عرفنا إنو أنحنا السودانيين أرجل ناس و أضكر شنو ما بعرف و نحنا طردنا المستعمر كيف و المك اسد حرق الترك و التعايشى جلس فوق المصلايه بالإضافه لإنو نحنا عندنا أحسن قطن وأحسن صمغ و أحسن خرفان وأطول نيل و أكبر بلد و اكتر جيران و أكبر ثروه حيوانيه

    الملخص من قمنا و نحنا أرجل أكتر اكبر أسمح اغنى أ… أ….. أ…… إلخ

    و كبرنا و لقينا دا كلو وهم لكن كبرت الكضبه فى خبالنا بل و صارت تسرى عنا كما الخيال الخرافى فى الأفلام الهنديه فمارسنا الهوايه وورثنا الكضبه للمساكين السغار

  11. نيام كتب:

    يحكي المرحوم دكتور عوض دكام قال لمان ودوهم معسكر الخدمة الوطنية كان معاهو شلة من وكلاء الوزارات و السفراء الكبار و كووووولهم علي وش معاش و كده …فقال جابوهم جاكين مرة بشارع فعطشوا عطش شديد فقالو لصبي واقف قدام بيتهم يا ولد ناولنا جك موية.
    فجاب ليهم الموية وقعد يسأل فيهم يا عمو انت شغال شنو قال ليهو سفير السودان في امزونيا و انت شغال شنو قال ليهو انا وكيل وزارة التخطيط العمراني و انت شغال شنو قال ليهو انا طبيب اسنان انا عوض دكام ما بتعرفني ..
    فبدأ علي وجه الصبي انو ما اقتنع .. فلمان اتحركوا ماشين قال ليهو لكن ياعمو بتقنبلوها قنبلة!!

  12. طارق أب أحمد كتب:

    الطريف فى الموضوع يا نيام إنهم كانوا لابسين لبس المجندين فى ق د ش
    و هو فى الزمن داك كان دموريه طبق الأصل من لبس المساجين

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s