معقولة دا يحصل فى يوم ما ؟

Posted: الثلاثاء,8 سبتمبر, 2009 by التركى in اخرى

++ عامر بعد اغتراب عشرين سنة قرر يرجع لوطنه وصحابه ... خاصة وانو سمع بالتطور والرقى الدخل البلد .. .. بالاضافة لشوقه الشديد (لحلته) واخته صفية الخلاها شافعة وكمان شارع النيل الظليل ….
رجع البلد بعد السنين المرة ولقى بيوت الحارة اتغيرت ملامحها بفعل الامطار (النزلت فجأة) قال مامشكلة … بعد التحايا والمجاملات قال يلا يابت نمشى شارع النيل نشم النسيم …. الكنب على شارع النيل كله موجه على الزلط مامشكلة يلا نقعد هناك جنب القيف … فجأة (ماعارف انو كل شئ بحصل فجأة) وقف بوكس ونزلو منو جماعة لابسين رسمى وبعد نقاش مختصر ركبوهم البوكس … وفى محل منفرد لزو عامر من البوكس … مشى لاقرب مركز شرطة واداهم اوصاف الجماعة ونمرة البوكس (اصلو تفتيحة) … اليوم التانى مشى مع ابوهو يستفسرو …. الجواب من الضابط المسئول … لوحة البوكس مزورة وماعندنا جماعة بالاوصاف دى … ولايزال البحث جارى على صفية.

++ عبدالقوى ماشى بسرعة فى شارع المليون (شحاد) فجأة وقفوه اتنين من اللابسين كنقولى ونضارات سود ديلاك …. يلا ياخونا انت تعال معانا … اجى معاكم وين … لما تجى بتعرف … طيب الاول تعالو معاى انتو اوصل الدوا دا لامى اصلها ح تدخل العملية ومنتظرنو … هنا اتدخل واحد مواطن صالح (فالح) ياخونا اى خلوهو الراجل مستعجل …. واحد من الجماعة اياهم ياعمك لو عندك كلام تعال انت كمان قولو هناك , عمك الفالح عمل رايح …. فى اليوم التالى كان عبدالقوى داخل من باب الحوادث فاقد كلية وجسد امه طالع من الباب الرئيسى فاقد الروح …. اثبتت التحريات ان الجماعة اياهم غير منتمين للجهاز المعنى.

+ لنا ولؤى … اتخرجو من الجماعة بهنا واشتغلو بهنا … بعد سنة قررو الزواج …. حظهم يعملو شنو يوم العرس هاك ياهبوب وهاك يامطرة ام رعد … الحجمد لله انتهت الحفلة قريب الصباح ومشو اطراف المدينة (الريف العاصمى) محل قررو يقضو شهر العسل … رزاز المطر زاد الجو رومانسية والطريق بقى قصير جدا … استمر المطر للصباح … صحو متاخرين حبتين … قالو احسن نقوم بجولة فى احدى الحدائق الغناء المتواجدة بالاطراف … لقو محطات رياضية واماكن رحلات ومياة جارية … ادمنو على الحدائق وقضو شهر العسل فى ثبات ونبات .. عقبالكم

+ عبدالخالق بعد هجرة اختيارية قرر انو يجى وطنه ويعارض من الداخل … كون حزب … طلعت جمعية التكفير والاستشارة فتوة تكفير بحقه … تناولت الفتوى وسائل الاعلام الموجة …. فتح عبدالخالق قضية ضد الجمعية … جات الانتخابات وحزب عيدالخالق (لم ينجح أحد) … جاء رد شكوى عبدالخالق …. على ضوء ماوصلنا من وزارة الاوهام والتسجيل ليس هناك جمعية بهذا الاسم.

 

Advertisements
تعليقات
  1. (لنا ولؤى … اتخرجو من الجماعة بهنا واشتغلو بهنا … بعد سنة قررو الزواج …. حظهم يعملو شنو يوم العرس هاك ياهبوب وهاك يامطرة ام رعد … الحجمد لله انتهت الحفلة قريب الصباح ومشو اطراف المدينة (الريف العاصمى) محل قررو يقضو شهر العسل … رزاز المطر زاد الجو رومانسية والطريق بقى قصير جدا … استمر المطر للصباح … صحو متاخرين حبتين … قالو احسن نقوم بجولة فى احدى الحدائق الغناء المتواجدة بالاطراف … لقو محطات رياضية واماكن رحلات ومياة جارية … ادمنو على الحدائق وقضو شهر العسل فى ثبات ونبات)

    سلامات يا التركي

    الحمد لله عاشو في سبات و نبات و انشاء الله يخلفوا أولاد و بنات …… و كويس الاسكتش دا مر على الفاتح جبرا و الا على أفليقا….. كان ندموهم على السبات و النبات دا…..

    اتخيلت جبرا كان قال: قالو احسن نقوم بجولة فى احدى الحدائق الغناء المتواجدة بالاطراف و بينما هم يتجاذبون اطراف الحديث و البت مسبلة عينيها فاذا بهبوب عاتية مصحوبة بتراب ملت عين البت و طيرت الشنطة الفيها المناديل و صبت المطر فجأتن و بصورة لم يسبق لها مثيلا و جروا على العربية لقوها مافي….

    لكن أفليقا ربما يتدخل هنا و يدخل حسن بوبينة و درابة و عضة و هم قاعدين بلفوا في البتاعة و هم على مقربة من لنا و لؤي و قامت الهبوب و التراب يقوم بوبينة يمشي للولد و البت و يقول ليهم “بتكتحونا بالتراب مالكم” و بعد داك عيونهم ما تشوف الا النور……

    طارق أب أحمد …. كمل بالله نهاية مأساوية للاسكتش دا عشان الحبايب…!!!

  2. aflaiga كتب:

    يعنى يا عزت قصدك انو نحنا ماساويين ولا شنو ؟؟ والله يا عزتياخوى نحنا بنموت فى النهايات السعيده لكن وينا اسى قريب ده لاقاك نهاية سعيده وثبات ونبات ؟؟؟
    التركى : مرحب بقلم قاص جديد فى سوداننا وقبل ما نلصق ليك يوم كتابه فى الاسبوع اخير تختار براك ..

  3. ياسين شمباتى كتب:

    الحبيب التركى..سلام وشوق..ايوة كدة,,اظهر وبان عليك الامان..

    آسفنى جدا (عامر) العائد بعد غربة وشجن,,وآسفنى اكثر ذلك الذى سرقت كليته واغتيلت امه مع سبق الاصرار والترصد..

    لكن الما معقول شنو؟؟ بس عرس لؤى ولنا وعيشتهم فى سبات ونبات وهم متخرجين ياداااب سنة واحدة,,الا اذا كانوا احسبونيين..

  4. طارق أب أحمد كتب:

    لكن أفليقا ربما يتدخل هنا و يدخل حسن بوبينة و درابة و عضة و هم قاعدين بلفوا في البتاعة و هم على مقربة من لنا و لؤي و قامت الهبوب و التراب يقوم بوبينة يمشي للولد و البت و يقول ليهم
    يا شباب شنو النظام ؟
    لؤى :- ما فاهم
    بوبينا :- يعنى نواشف ولا سوائل ولا خندق ساى
    لؤى :- ما فاهم
    بوبينا :- شوف يابو الشباب نحنا ناس مزاج و بى صراحه كده بنحب البحبو المزاج
    لؤى :- أنحنا متزوجين
    بوبينا :- ها ها ها فى زول بقعد مع مرتو هاهاه
    لؤى :- لا انا قاصد نحنا عرسان جداد
    بوبينا :- ((وهو لا يزال يضحك و يردد فى زول بقعد مع مرتو )) يادرابه ياعضه أجمع هنا و جيب معاك النظام . ثم ملتفتا إلى العرسان :- الليله صباحى نعمل ليكم ربه زى الربه
    لنا ((وهى طبعن بت تفتيحه و ناقشه الوضع شديد )):- لكن ياعمو الدنيا ليل و ناس النظام و إنتو معاكم حاجات كده ممنوعه
    كاه كاه قه قه هاها هو هو هىهى بو بينا ودرابه و عضه فى حاله هستيريه من الضحك المتواصل
    (( ما نحنا ذاتنا النظام العام لكن بعد نقفل الناس بكون نظامنا خااااااص))

  5. طارق أب أحمد كتب:

    التركى
    سلام و متأسفين دخلنا كده توشك بدون ما ندق الباب

    تعرف قبل يومين عندنا فا الشغل كان برنامج تدريب الأستاذ المدرب طلب منكل واحد من الحضور إنو يرسم رسمه منها يستطيع المدرب ان يقرأ طريقة تفكير نفسية المتدرب
    من خلال إسكتشاتك الأربعه يمكن للمرأ أن يستشف صدمتك فى البلد الذى عدت إليه بعد غيبة سنين و احلامك الورديه التى طافت بخيالك طيلة هذه المده حول الحله و ذكريات الصبا ,,,,,
    وآمال ما زالت معششه فى مؤخرة رأسك حول أن القادم أجمل

  6. سهيل كتب:

    سلامات يا تركي… واحلى تحيه للعقد الفريد

    اصحى يا تركي … انت في السودان .. بس ما تفقد الأمل خاااااالص .. يعني فتح شويه و ادقس شويه عشان ما تجيك جلطه ..

    اب احمد : ياخي ما تخوف الراجل ..
    عزت : لكن لقيتك تفتيحه و ناقش نفسيات ناس عمك و افليقا تمام

    سلاوي وين يا اخواننا و كمان ابكرون و بشار و سنكل

  7. التركى كتب:

    أحبائي شكرا على المرور والموآزرة ….
    د.عزت : تسلم ياراقى ويشرفنى جدا انو العباقرة الذكرتهم
    ديل يعملو رتوش كدة اكيد يكونو اشتاقو لايام (لايزال
    الليل طفلا يحبو)

    الحبيب افليقا : تشكر ياريس بس يوم اسبوعى دى صعبة مع
    الفطاحلة وماعايز اتحرم من دررك وروائع
    الآخرين ياخ انا ياداب كدة كل شهر شهرين
    أعاين من الشباك .. ومنتظر اضافاتك

    د.شمباتى :اخبارك ياقلب …. الشوق بالتركترات …. تعرف
    الموجعنى اكتر انو عامر حصل ليهو دا جنب وزارة
    الداخلية وعبدالقوى فى اكتر المناطق ازدحاما
    بالاستخبارات والبوليس المدنى … أما لؤى ولنا
    فدى امنية اننا نوظف كل الخريجين ونطلع بعد
    المطر فى نزهة دون خوف من سلك كهربة وافع
    فى الموية ولا سايفون يودينا مركز الكرة
    الارضية …. أخخخخخخخخخخ

    الغالى اب احمد : تسلم يارائع وكدة انت اديتنى فرصة انى
    ادخل شمال … مادام الاسف ياخ انت
    عملت برواز رائع لصورة بالابيض والاسود ….
    تعرف انا الماغصنى انو العيب مافى البلد
    فى اولى الامر ودا سبب الصدمة الجد جد
    لايفوتو ولايموتو شوكة حوت وكمان لاعبنها
    (ون تو ) … بس اكيد القادم اروع واجمل …
    وقسما قسما لن ننهار طريق الثورة هدى
    الاحرار …. لك الود والاحترام

  8. التركى كتب:

    العزيز سهيل … هلا بيك ياغالى وشكرا ليك تعرف انا خايف تهب رياح التغيير فى لحظة الدقسة …. نحن فى السودان
    نهوى اوطانا وان رحلنا بعيد نطرى خلانا … لك الود

  9. البشاوى كتب:

    التركى لك التحية
    قاص مميز واسلوب راقى — احسن تختار يوم براك زى ماقال افليقا وماتخلينا ندبسك فى حنان يوم ماعايزو

  10. aflaiga كتب:

    التركى : تسلم يا راقى من يوم جييييييييييتنا وللمدونه الق فما تنقطع .
    سهيل : انت اقعد بارى لى نفسيات افليقا لمن تجيك نفسيان اها بى نفسياتنا دى عملنا ناس حمودى انت بنفسياتك اتحرك وسوى لينا اى حركه ولا المشكله فى الهارد زى ما قال ود الزبير ؟؟

  11. ياسين شمباتى كتب:

    ود الخلا..والله نيرانو صعبة خلاص وتتجه حيث لا تشتهى..بس خليك قريب واعمل ساتر..

  12. yassin كتب:

    الاخ التركي: والله بس أنا مستغرب من حاجة واحدة في الكلام دا (مقاعد شارع النيل) كلها متجهة إلى شارع الاسفلت ما عارف القصد من كدة شنو والله أنا مستغرب جدا، الواحد جاي عشان يروح على نفسو ويشوف النيل يقوم يعاين للعربات الماشة وجاية شئ عجيب

  13. مُخير كتب:

    أخونا التركي
    ما أتعودنا نشوفك باسم وترجع تاني تداري البسمة
    إيه الإبداع ده كوولو، أهة أقل من كدة تاني ما حنقبل، وشوفت فتحت شهية الأقطاب ديل، فكما ذكر الحبان حضورك الجميل أضفى نكهة على الدانقا فلا تبتعد ولا تختفي ولا تنكفي، ولا تصالح ولو قلدوك الذهب ولو فقأوا عينيك ولو وضعوا مكانهما جوهرتين ..الخ كلام دنقل …………..

  14. التركى كتب:

    هلا بالرزين ود الخلا … لك الود والاحترام … ياخ لخصتنى فى جمل مفيدة (الصديق القادم من عمق الماضي الجميل والحاضر البهي ومستشرفا للمستقبل الأفضل، وممتطيا” لبساط رياح التغيير) بس ياخويا تحديد اتجاهى دى بقت شبه مستحيلة انا مما نزلت من شارع الزلط (أقصد الطيارة) اتشوشت بوصلة اتجاهاتى وبقيت ماعارف شرقنا من غربنا اصلو فى بلدى كل الاتجاهات تؤدى الى المصير المجهول … خايف اخلى شمباتى يوجهك بس يقوم يوصف ليك زى وصف بيتم داك وعييييييييييك …

    البشاوى : يادفعة العين مابتعلا على الحاجب وشكرا على
    الاطراء الرقيق دا … وحنانك حبيبى وين حنانك
    حنانك حبيبى الروح عشانك ..

    أفليقا : ياقلب دى شهادة تستاهل اعلقها على جبينى …
    لك المحبة والوعد بعمل المستحيل من غير انقطاع ..

    شمباتى : ماترهب الراجل ساى بقولو البقعد جنب نافخ
    الكير بتتقد جلاليبه …

    يسن : ههههههه اول ماشفتها سألت السؤال دا والجواب
    ماأظن يعجبك .. اعتقد انهم مابثقو يدو زول ضهرهم..

    مخير : لك الشكر اجزله … بس دا كلام دنقل (دناقلة) ولا
    أمل دنقل ؟ …. اطلب من المولى انو يقدرنى أرتقى
    لمستواكم … وكدة بقيت مسير يعنى مامخير
    زيك … وياسواقى بلدنا وينو صوتك مالو …

  15. سهيل كتب:

    افليقا : “سهيل : انت اقعد بارى لى نفسيات افليقا لمن تجيك نفسيان اها بى نفسياتنا دى عملنا ناس حمودى انت بنفسياتك اتحرك وسوى لينا اى حركه ولا المشكله فى الهارد زى ما قال ود الزبير ؟؟”

    شنو يا فرده .. نسوي حركه ولا مؤتمر ؟ وكفايه كده ما توديناش في داهيه..

    بالنسبه لمشكلة ود الزبير “الهارد” .. خلي صاحبك يمشي لهاج مهمد قريب الشيخ خميس ود مريومه يديهو ( القنج) ولا خليهو يشوف فلم عادل إمام مع كمال الشناوي بتاع ( الواد حماده بتاع الوزير ) …. .. اللهم إني صائم

    الهارد في و السوفت في .. بس رايح الدرايفر ( اللايسنس)

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s