09.09.09

Posted: الأربعاء,9 سبتمبر, 2009 by عزت in اخرى

صباح الخيرات و و طبعن تاريخ زي دا ما حتشوفوا تاني فأعمل فيهو حاجة متفردة…. أذكر التاريخ الذي مر قبل ثلاث سنواث و كان 06.06.06  أرسلت فيه لأحد أصدقائي منبها للتاريخ و حاسا أياه أن يعمل شيئا متفردا فيه فقلت له

أبتعد عن الستات اليوم فما زال يذكرها كلما نلتقي و صارت لديه قناعة أن يعمل مع السبعات حاجة مهمة فلم أدري هل فعل……. عموما اليوم ما زال بأوله فهل ستفعل شيئا مميزا اليوم ….

BROOKM8289092009.P02

xin_30209060915020461792756

كلمنا بالله و أخليكم هسة أنا خارج عمل ميداني و عندما أرجع سازيد في البوست باذن الله …. يا لا همتكم

Advertisements
تعليقات
  1. Kuala Lumpur, capital of Malaysia, Sept. 9, 2009. Some 500 couples got married on the auspicious date 09.09.09 here on Wednesday. In Chinese, the number 9 has the same pronunciation as “everlasting” which makes people believe that the number ensures longevity and everlasting love.(Xinhua/Chong Voon Chung)

  2. عباس ركس كتب:

    العزيز : ابو عصمت : تحياتي
    انها مجرد اماني , ان صدقت يختوها في اليوم المميز , وعندنا دايما مجلية , ليه كدا . . . الظلم دا ؟ – 8/ 8/ 1988 تاريخ مميز اكتر من تاريخ اليوم – وسيول وامطار وفيضانات – ولا ياهو دا التميز ظاتو ؟؟

  3. التركى كتب:

    د.عزت اميز شئ انها تلاتة تسعات … ذكرتنى الكتل البوليس واتصل على تلاتة تسعات وقال ليهم 999 قالولو اتفضل قال ليهم خلاص يقيتو 998 …. بحاول اعمل شئ لوالديى لانو دى أول وآخر تلاتة تسعات نحضرها مع بعض … شكرا على التذكير

  4. البشاوى كتب:

    دوك عزت والمارين سلام
    تعرف يادوك لو التلاتة تسعات دى ماصادفت رمضان كانت حتبقى حكاية ما ليها نهاية ولا شنو ياأب أحمد؟؟

  5. البشاوى كتب:

    لكن يادوك صاحبك الوصيتو يبعد من الستات فى التلات ستات دة ماراجل محظوظ ومفروض يعمل بى وصيتك ويدعو ليك كل يوم صباح ومساء
    يا أخى ماتشوف لى أخوك حاجة كدة موزونة من 6\6\ 2006 وبالله ماتنسى الحبيب افليقا راجل أخونا وبيتلقى

  6. aflaiga كتب:

    عزت : احيى ال تلات تسعات ذاتو .. الغريبه بالك رايق وبتتذكر الليله يوم كم اتخيل انا عرفت منك اسى انو دى سنه 2009 م !!!
    ركس : انت يا معلم ما بتجى الا مع التسعات التلاته ولا شنو ؟؟ يا زول اخير ليك تجى ليها ما تجى بيها !!
    البشاوى : يا راقى يا متذكرنا طوالى والله انا بدون تاريخ بعيد من البتاعات ديل الله يكفينا شرهن ..

  7. سلام يا أعزاء

    ياخ فعلا النمر المميزة و التواريخ المميزة دائما ما تحفزك لعمل شئ مميز مش يا البشاوي و كان ما متذكر التاريخ ذاتو يا أفليقا يمر عليك حدث لابد و أن يحفر في ذاكرتك مثلما حفر تاريخ 8/8/88 في ذاكرتي فقد كان يوما مهيب بالنسبة لي….

    أول يوم أخش فيهو بيت النسايب

    فقد تزوجت و أنا برات البلد و جائتني “عواطف” و مكثت معي متبقى بعثتي و أصلو أهلها ديل ما شفت فيهم غير أخوها…. تخيل و أنا ما عارف البلد كانت مليانة موية لي هنا (أشار الى فوق الركبة بقليل) و احنا نازلين بالطيارة….

    و الساعة ثمانية مساء كمان يا ركس …تخيل أنا قايلوا نازل في النيل شدت ما الرن وي و حوالينه كان مليان موية…. استغرق الوصول الى منزلهم أكثر من زمن رحلة من القاهرة للخرطوم بقيادة الكابتن الماهر أخوي بالأوبل الصفراء بتاعتي … يا حليلا

  8. حاج أحمد السلاوى كتب:

    يا دوك ..عزت ..
    الفرق شنو بين التلات تسعات والتلات ورقات ؟
    مضروبة فى تلاته …موش؟؟؟؟
    وكل عام والجميع بخير .

  9. ربطوا ناس دبي نفسهم بهذا التاريخ 9/9 ايذانا بافتتاح أول خط مترو في الامارات بمجموع 70 كيلومترا (43 ميل) من الخطوط ، و 47 محطة (منها 9 محطات تحت الأرض)

    الركاب الذين سيستخدمون نظام مترو دبي، سينتقلون في قطارات هي ذروة ما أنتجته الصناعة، وهي مكيفة الهواء بالكامل، ومصممة خصيصاً لتفي بالاحتياجات الخاصة للإمارة. وسيكون طول كل قطار حوالي 75 متراً، ويشتمل على 5 عربات مزدوجة الأبواب لتسمح بالتدفق السلس للركاب في المحطات. وتنقسم القطارات إلى درجة اعتيادية تشتمل على قسم خاص للنساء والأطفال، ودرجة أولى فخمة، وتبلغ سعة القطار 400 راكب.

    أوعدنا يا رب… ما متطلعين بس عاوزين شوارع نقدر نمشي فيه و انارة عشان ما نتوقع في الحفر

    و في ناس بكونوا منتظرين سبتمبر اليفن (11/9) القدامنا دا بفارق الصبر مش يا ود الزبير و الزوووووووول

  10. حاج أحمد السلاوى كتب:

    الأحبة ابناء الأحبة ..
    الفنان صلاح بن البادية غنّى للستات ..ونحنا حسه قاعدين نغنى للتسعات..

  11. يا حاج ….. ابن البادية طبعن غني ق. ش.
    الليلة لو قال جنس كلامو دا كان لحقهوه “لبني”

    غنيتا للستات
    و أنا قصدي الانبساط
    دائما
    يا أخوانا مع البنات !!!!

  12. aflaiga كتب:

    عزت : طبعا انا سرحت مع الاوبل الصفرا واتخيلتها فى مخيلتى دركسونا يمين وعزت جارى الشارع متبخترا بالاوبل الذى وصلتنا سمعته انه كان ركوب الفاهمين بس بيكسر ركبه كتير ولا شنو ؟؟
    التاريخ اللميز بتاع دخول بيت النسابه ده بيطون طبعا محفور فى الذاكره بقدر العمق الذى محفورة به بت النسابه فى الوجدان ربنا يحفظ ليكم عيالكم ويديم محبتكم لاعمق من ذلك وتحضرو مع الشفع 9 / 9 / 2090 م

  13. ياسين شمباتى كتب:

    حبيبنا عزت..غايتو عصرت علينا عصرة شديدة خلاص,,جماعتنا ديل هنا ما بعرفوا تاريخ ميلادى,,كمان لا بعرفوا ليك احتفال لا بطيخ (مرسيدس) نسوى شنو عاد؟؟
    وكل تلات تسعلات وانتم بخير…وتنعاد عليكم بالصحة والعافية..

  14. مُخير كتب:

    سيدنا أبو عصمت
    الحبان في كل مكان
    يا دكتور اللهم إنك صائم لكن التسعة طويلة جدن جدن، والثمانية شغالة خسوسن وإنو أخوك جرّ معاها بليه “جاك” وأداك وقال ما خاشي فيها …. كيفنو الكلام ده !!!
    إن شاء الله أيام الله السبعة وكذلك الثلاثون بل والثلاثمائة خمسة وستون يوماً حسوما تكون كُلها سعيدة معاكم … جوة وبرة الوطن … وأن لا تظلموا أو تُظلموا فيها (الأخيرة بتاعت المفعولُن به دي صعبة لكن ما كتيرة على ربنا) وأن تنعموا فيها برضاء الله وراحة البال وخير الحال وهجعة زول بعد ترحال… آميين

  15. سهيل كتب:

    غايتو جنس غايتو .. الإنتخابات على الأبواب و تسعاتك ديل ذكروني نسبه فوز ( إكتساح) الرؤساء العرب للإنتخابات 99.9 …

    غايتو التلات تسعات في شهر اربعه الجاي واااااارده .. بس ما معروف الفاصله العشريه حتقعد وين ..

  16. البشاوى كتب:

    السهيل
    ايه ياإبنى خلاص نويت على 11\9 فى ابريل ؟ لكن كدة حتلخبط حسابات اعمامك
    عموما معاك معاك حتى لو فجرًت نفق عفراء ذاتو فى ذلك التاريخ

  17. البشاوى كتب:

    نسيت اقول ليك ياسهيل الفاصلة العشرية دى يفصلوها زى ماهم عاوزين ونحنا مالنا

  18. سهيل كتب:

    اهلين يا عمنا .. قلت الفاصل المداري مالو ؟

    جنكم فواصل .. هسي يجيكم شهر اربعه تقعدو تتفصلو

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s