العصر الذهبى

Posted: الخميس,10 سبتمبر, 2009 by التركى in اخرى

بعد شراب المويات والترخيمة الشباب قالو كدى النمش لعمو فتاح نشوف رأيه شنو فى مباراة القمة (عمو فتاح دا مشرعاتى مجالس زى غاندى سلاح الدين وفاطر خرمان كدى) … اها ياعمو مباراة القمة كيف ؟
ياأولادى قمة شنو ياحليل زمن الكورة كورة زمن كان الاتيام ثنائيات مش جماعات زمن كان بشرى وبشارة زمن اولاد النقر واولاد الكورى زمن كسلا وفتاح (كمال وين راح) قالو الزمن انتهى عند ناس كمال عبدالغنى والطاهر هوارى ماببدا ليكم من ناس حسبو وماجد وامين زكى وصديق منزول ديل فى كفة والجايين فى كفة …. زمان كان مبارياتنا التدريبية مع الفرق الاجنبية القوية … بتذكر لما جا فريق سانتوس البرازيلى ولمن كبتن الهلال جكسا قال نستعين بشرف من المريخ عشان يمسك لينا بيلية دا …. هنا قاطعه أحمد لكن بابا قال سشرف دا لاعب النيل العاصمى مالمريخ وكمان معاهو جلال كباتا وبيليه أوكلاهو لشواطين الفى مباراة كدة عمل حركات شيطانية لعمر الطير الجابوهو من كوستى مع زيكو للمريخ وقام عمر الطير اداهو بونية رقدتو مستشفى شهور لمن آمن (عمو عمل رايح) شفتو يااولاد كان الفريق القومى ماهلال مريخ بس فيه مجموعة طيبة حتى فريق العامل كان منه بشير عباس ومن الاهلى العاصمى نجم الدين … أحمد : بابا قال ليا نجم الدين دا كان فى التحرير وبشير عباس (قطار الوحدة) لاعب الموردة .. (عمك طنش) وكان عندنا لاعبين بلعبو حتى فى مصر زمن ناس الخطيب وفاروق جعفر واكرامى وربيع ياسين وثابت البطل ياسسسسسسسسسسلام الله يطراهم بالخير ناس الصياد والشافع الكبتن لطيف قال عليه دا ما قلة دا زير عديل (ياقماعة) … لاعبينا فى الخليج ماليهم عدد والسعودية كان ليها نصيب الاسد بس على قاقرين (الرمح الملتهب) ماارتاح هناك ورجع لاخوانو فى الفريق كان لما تكون فى مباراة الناس بتهظر وبتنكت على بعض وتلقى الضب يقول للفاضل سانتو لو جبت قون فى زغبير القعدة عليا والكوراع عليك … او الصبابى لاعب ابوروف يقولابراهيم كوة لو غلبتونا القعدة فى اب سعد عندكم سأله أحمد هم كانو بشربو ياعمو وبعدين الصبابى دا كان بلعب فى الموردة من هو طالب بحقوق الفرع (النيلين) وابراهيم كوة برضو .. عمك سمع السؤال وطنش التعليق : ياولدى الوقت داك الاقرو الشريعة ذاتهم كانو بطشمو وبلاش سياسة … اللاعبين كانو قاريين وسريعى البديهة عزالدين الدحيش مثلا لما (رمز السيادة) قال ليهو ازيك يادحيش قال ليهو اهلا ياابويا … ولما قالو لعمار خالد : قالو مشجعى الهلال اكتر من مشجعى المريخ رأيك شنو ؟ قال ليهم الشئ البعرفو مشجعى الفريقين بمثلو اكتر من خمسين فى المية من المشجعين السودانين … السودان مثل فى كأس العالم ببرلين … قاطعه أحمد بابا قال المقولة ديك ماقالها عمار خالد وبعدين كانت اولمبياد ماكأس عالم حتى فيها عبده مصطفى وقدورة حصلت ليهم مشكلة مع الادارة الفنية ومالعبو شاهدو المباراة كمتفرجين … هنا عمك فتاح قال خلاص يااولادى انا هسع ماشى صلاة التراويح وبكرة اواصل ليكم العصر الذهبى بس أحمد دا مايجى معاكم ولا أقول لكم قولة أمشو ل أب احمد يحكى ليكم العصر الذهبى (أها الكورة فى ملعبك يا أب أحمد)

كسرة بموية : يكون سمو العصر الذهبى عشان كاسات الدهب الجابت الرياضة
الجماهيرية ؟
عصير بتلج (كسير تلج) : مهما كانت النتيجة اتمنى انو الفريقين يقدمو مباراة
شيقة والنقاط للاصلح.

 

Advertisements
تعليقات
  1. قبال ما يجي اب احمد هاكم دي

    كان الناس اخوانا بكل ما يحفر عميقا هذا التعبير، و الغناء مستعذب لصدق دواعيه و لا تلمح مظهرا يسي بعصبية الا في ميدان كرة القدم الذهبية المراحل حينها و الخالدة الرموز “كوارتي، ماجد، المحينة، بكري، جقدول و سمير ماشي. جكسا و ديم الصغير، عمر التوم و صوت طه حمدتو الندي يندى المرحلة يقسم الملعب لمربعات. ……

    و لولا براعة الشبل بندر لنائت شباك الشاطئ بعشرات الأهداف.

    (من كتاب امدرمان)

    كسرة:
    حقو واحد يفتح للتاني و يريحونا

  2. التركى كتب:

    شكرا على المرور المبكر يادكتور … تعرف انا قبل كدة قلت نفس الشئ واعتقد انو المريخ يفتح للهلال منطقى اكتر من فتح الهلال للمريخ فى الوقت الحالى …. تسلم

  3. ياسين شمباتى كتب:

    حبيبنا التركى..وطلعت حريف كورة كمان..

    تعالوا نحاول نرجع شئ من العصر الذهبى دا ولو كان بشأن المجتمع..يعنى العلاقت والاخوة والصداقة الكانت زمان بين الناس صلة ليه ما ترجع تانى بصفاء قلب ونية؟؟

    اما بخصوص الهلال والمريخ,,فالليلة يوم الرجال,,واكيد بعنى الهلال..

  4. حاج أحمد السلاوى كتب:

    اخونا التركى.. لك التحية.. ( باقى لى كدا إنت من الكواشف …ولاّ انا غلطان ؟ )..
    كلامكم دا مابيقولوا إلا زول عايش الزمن الجميل ..وشوف اخونا الكاشف أبو عصمت كان اول المتداخلين لأنك رجعتو للأيام الما بتتعوض ..
    ندعو الله العلى القدير أن يصلح الحال..ويرجعنا للصفر ..ما عاوزين أكتر من كدا !

  5. مشاكل كتب:

    سلامز

    و الليييييييلا و اللييييييلا

    سادومبا

    امبيلي

    كاريكا

    سيدا و سيد ابوها زاتو

    الله يينا الفي مرادنا

  6. مشاكل كتب:

    سلامز

    النجمة حلاتها … زبطوها تلاتة

    و الله التلاتات كترت عليكم يا ميرخاب

    و مازدا تلاتات .. ينفععععععععكم انشا الله

  7. التركى كتب:

    الحبيب شمباتى : شكرا ياغالى والزمن ماأظن يرجع بس
    ياريت لو عشنا الاجمل منو ….. تصور من
    قبل ربع قرن ماشاهدت مباراة (هلاريخ)
    كاملة الا الاخيرة دى وللآسف لقيت احرف
    زول فى الميدان حكم الوسط ورجل الخط
    بتاع الجهة الشرقية …

    كبيرنا حاج السلاوى : لك الاحترام … كلامك صح بس كنت
    محنط بره البلد …. الغالى أبو عصمت
    كالعادة مداخلته كانت راقية جدا .. وان
    شاء الله دعواتك مستجابة ياحاج بس بدل
    رجوعنا للصغر دا خلينا نشوفو فى احفادنا
    بطريقة افضل …

    مشاكل : هههههههههههه الظاهر انك اسم على مسمى
    ياعزيزى …. ياخ ربناياخد بايد الهلال ويجيب الكأس
    بس ماننسى انو مازدا دا مدرب وطنى قبلما يكون
    مريخابى ولو مااحترمنا ملكته التدريبية يغفر ليهو
    ماضيه مع الفريق القومى لاعبا ومدربا …. مبروك
    للهلال وهاردلك للمريخ …

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s