النداء الآخير للرحله المتجهه إلى…………………….

Posted: السبت,12 سبتمبر, 2009 by ودالزبير in اخرى

الإخوه والأخوات تقبل الله منا ومنكم الصيام والقيام ودعوني أقتبس من مقال أفليقا الأخير هذه الكلمات (

اها ياجماعه شوفو البيدخلكم فى العتق من النار شنو وبالله تاملو معانا كرم ربنا ده يعنى بدى العب فرصه كل يوم وبيديهو فرصه ذهبية فى رمضان زى الخصم الخاص ياخى اعتبروهو خصم خاص على صكوك الجنه والعتق من النار زى خصم العيد بتاع عفراء او البوتيكات وجازفو منو ما تستطيعو ونتلاقى فى العيد انشاء الله معتوقين من النار مرحمين برحمة رب العالمين مغفورى الذنب .)

يقبل العيد ونحن بين أهلينا وأطفالنا وهي نعمه يفتقدها طفل المايقوما ذلك الطفل الذي راى الكثير منكم حاله في أيام الله العاديه فبالله كيف يكون حاله في العيد …..لا لبس جديد يرتديه ولا لعبه يلهو بها ولا أم حنونه تضمه إلى صدره ولا أب يعطيه العيديه ……

يالها من مأساه …………………

أقترح أخوتي الكرام أن نقوم بعمليه جمع للملابس القديمه كما فعلنا تلك المره وبنفس الكيفيه مع دفع مبلغ عشرين جنيه فقط ولنعتبرها الفطره هذا المبلغ يتم شراء ألعاب أطفال ومع الملابس نكون قد قدمنا جهد المقل والله لا يضيع أجر من أحسن عملا ..

عن نفسي مستعد للقيام بأي جوله لجمع الملابس ونحتاج لثلاثه أو أربعه أشخاص على الأكثر لإتمام هذا العمل على أن تكون زيارتنا للدار في أيام العيد المباركه ………………… فتحنا باب التطوع .

ولا خاب من راهن عليكم .

Advertisements
تعليقات
  1. حاج أحمد السلاوى كتب:

    أخونا ودالزبير ..
    جزاك الله خيراً على هذه المبادرة الطيبة ..
    وفقك الله وإن شاء الله ما حنقصر معاكم ..وسوف نعمّد من جانبنا من يقدم يد العون فى هذا العمل الإنسانى الجميل ..
    وكل عام والجميع بخير .

  2. aflaiga كتب:

    ود الزبير وش الخير : جاهزين ..
    لما تمشى السوق تجدد للعيال لبس السنه
    اتذكر الود الهناك لا شاف ابو لا شاف هنا
    لم الهديمات القديمه المن سنين متركنه

    ود الزبير : شكر الله سعيك وانا متفائل جدا العيد ده البقجه تكبر والفرحه تكبر والاجر يكبر …

  3. طارق أب أحمد كتب:

    ((__عن نفسي مستعد للقيام بأي جوله لجمع الملابس ونحتاج لثلاثه أو أربعه أشخاص على الأكثر لإتمام هذا العمل على أن تكون زيارتنا للدار في أيام العيد المباركه ………………… فتحنا باب التطوع .))

    معاك يا ريس

  4. الزهراء كتب:

    ياسلاااااااااااااام ي اخوانا والله فكره راااائعه بمعنى الكلمه
    شرح الله صدرك ويسر امرك يا ود الزبير
    جاهزييين ان شاء الله ودا بالنسبه لينا عيد تاني
    يوم ما نفرح لينا طفل يتيم
    ربنا ما يجيب ليكم اسيه وان شاء الله ربنا يقدركم على فعل الخير كمان وكمان
    حاج السلاوي: لك التحيه وانت تبعث الاشراق والطمانينه على كل ما هو طيب
    ربنا يتقبل منكم صالح الاعمال

  5. حنين كتب:

    ود الزبير والسمار
    كيف حالكم وأحوالكم وأخباركم ورمضان كريم ولو إنها جات متأخرة لكن أن تأتى متأخر خير من أن لا تأتى أبدا والله لقيناكم كعهدنا بكم لم تغيركم الاحوال والسنون وماشاالله عليكم وربنا يحببكم للخير ويحبب الخير اليكم ويوفقكم فية .
    لنا عودة

  6. سهيل كتب:

    ارمي قدام ..

    بس يا شباب ماتخلو الموضوع كده ساي.. كونو لجنه سريعه تلف و تلم و تقلع قلع من الناس لانو العيد جا خلاص..

    بالتوفيق

  7. ودالزبير كتب:

    شباب وشابات

    زي ماقال سهيل نكون عمليين وطوالي ومن هنا تم تكوين لجنه من الآتيه أسمائهم للمور على الناس أفليقا وسهيل وطارق والبيشاوي السله ما جاءنا لكنه سيد الشئ زاته وشخصي الضعيف … مهام ووأجبات اللجنه من يوم الثلاثاء القادم المرور على الأعضاء لجمع الملابس والإشتراك بتاع العشرين جنيه يمكن أن يقوم نفرين من اللجنه بالمرور خلال النهار أو الليل بعد الإتصال بالعضو المستهدف بالمرور ……………….. أرح أرموا قدام ورا مؤمن..

    تم إعفاء الأخ زوووووووول من دفع العشرين جنيه نسبه لظروفه النفسيه السيئه هذه الأيام (3) كتيره والله وحاره جد

  8. ودالزبير كتب:

    حبيبنا ود الخلا

    نعمل من باب إتقوا النار ولو بشق تمره…….

    يالله يا زعيم همتك معانا

  9. aflaiga كتب:

    ود الزبير : تم تخصيص مكتبنا لتجميع الاشتراكات العينيه والبشاوى لتجميع الاشتراكات المادية .
    اى زول لقى فرقه وهو مارى ينزل الكيس فى الاستقبال ويدينا تلفون
    من التلات حنلف للناس فى حتاتم بس الزول يتصل يقول انا فلان وراجيكم يوم كده فى الحته الفلانيه نجى انا والبشاوى نشيل الكيس والاشتراك .
    سيتم تجميع وتصنيف وتكييس ونظافة الملابس فى منزل البشاوى
    سيتم تكليف ود الزبير بشراء اللعب للاطفال
    ارمو قدام ..

  10. معاكم و ربنا يوفق….. بس هدوم لي سغار شديد ما عندنا الا نعرس تاني

    و كل عام و الجميع بخير

  11. برة الموضوع:

    انتو حكاية “الأخيرة” دي شنو الماشة الأيام دي

  12. زووووووول كتب:

    د الزبير سلااام
    والله نفسياتنا فوووووووق كتيره كتيره كما يقول اخوتنا البنغاله .
    السقوط ما هو الاول ولن يكون الاخير ونجاحكم الذى هو الاول منذ 2007 ربما يكون الاخير .
    طيب خلينا فى الموضوع : مبادره جد رائعه نثنى وبشده ومستعدون لدفع العشرين رغم بصمة مازدا التى على وجهنا .
    لكن اخرجوا زكاة فطركم كالعاده واعتبروا ما تدفعونه لاطفال المايقوما بمثابة الصدقه وما تفعلوا من خير تجدوه عند الله هو خير واعظم اجرا .

  13. زووووووول كتب:

    عزت سلااام
    (بس هدوم لي سغار شديد ما عندنا الا نعرس تاني)
    انت الراجل دا يا ود الزبير متسحر بى روووب ولا شنو ؟

  14. ودالزبير كتب:

    عزت المرطب

    المتحيل تبكيه الريشه

    شنو يا عمك الجاب سيره العرس هسه منو

    يا زول أشتري لينا هدوم شفع يا أرفع إشتراك لتلاتين جنيه وبنشتري برانا

  15. ودالزبير كتب:

    شباب

    عرفت من ناس في الدار إنو حتى هدوم الكبار بالنسبه للسيدات بتنفع لتوزيعها للأمهات يعني يا عزت ممكن تقنع المدام توقف تبديل الهدوم القديمه بالعده ..

    أفليقا والبشاوي

    خلاص الصوره بقت وأضحه البيقدر يمر على أفليقا في مكتبه يمشي والمابيقدر ينتظر لحدي ما نمر نحن عليهو

  16. مُخير كتب:

    العزيز ود الزبير
    الأعزاء الأخيار الأبرار
    السلام عليكم
    جزيتم خيراً، ولقد شاهدت حلقة برنامج مواجهة في قناة هارموني واللقاء الذي أجري مع د. محي الدين الجميعابي رئيس دار الراعية بالمايقوما ومعه الصحفي الأستاذ عادل البلالي وعبر التسجيل الشيخ عوض الجاك والصراحة الحلقة كانت مفيدة جداً ودهشت كثيراً وخلال تناول الموضوع تم الإشادة بدور المدونات ومواقع الإنترنت في دعم الدار والتوعية بدورها، فمع نفحات السبع الأواخر نسأل الله أن يجزيكم خير الجزاء وينفعكم بهذا العمل يوم الحساب. آمين

  17. د.ياسين شمباتى كتب:

    الاحباب اهل الخير ووجهه..السلام عليكم ورحمة الله..
    وفقكم الله وسدد خطاكم فى كل ما تنوون القيام به من اعمال خير وبر وتطوع..وباذن الله تلحقكم دعوات كاربات فى ليلات اخيرات هى ام الليالى..

    عزت المرطب..قعد تعملها ظاااهرة..

  18. ودالزبير كتب:

    شباب

    أها جهزتو الحاجات ولا لسه

    عقاب اليوم ده بمر على البقدر عليهو عشان ألمها والماجاب الهدوم معاهو للشغل بنكتفي بمبلغ العشرين جنيه لحدي ما يجيب لينا الهدوم ..

  19. طارق أب أحمد كتب:

    شباب
    الدنيا يقت عيد و نحنا لسه ما عملنا شى
    بالله قرار سياسى بمكان و مواعيد التجمع مع إلتزامنا الصارم بتوصيل المساهمه الماديه و العينيه فى المكان الذى سيحدد (( قبل التجمع )) و أقترح منزل البشاوى لأنه فى منطقه وسط

  20. ودالزبير كتب:

    شبابنا وشاباتنا وشيابنا

    سلام وكل عام وإنتم بألف خير

    بدايه أعزرونا على تأخير الإطلاله لظروف كثيره متشابكه …. بحمد الله وتوفيقه قمنا بزياره دار المايقوما صبيحه يوم العيد السعيد برفقه أخي البيشاوي بعد إعتذار أفليقا بعدم قدرته على مقابله تلك الوجوه البرئيه صباحه العيد … حملنا مساهمتكم الكريمه من لعب وملابس وتوجهنا هناك لنعيد عليهم ونجلس معهم في أول يوم في العيد ……. كانت المفاجأه بعد وصولنا إلى هناك إننا الإثنان لم نملك الشجاعه الكافيه لمقابله أولئك الأطفال … جبنت وجبن البيشاوي من النظر في عيونهم والإجابه على التساؤلات البريئه ( عيد يعني شنو ) لم ندخل العنابر إكتفينا بمقابله المشرفه ( حنان ) وهربنا والدمع يكاد يطفر من أعيننا ……………..

    جعل الله هذا العمل في ميزان حسناتكم ووفقكم للمزيد منه ….. وشكراً لك أخي د صالح وأنت تتصل صبيحه العيد معيداً وسائلاً من أحوال الجميع .

  21. الزهراء كتب:

    الاخ ود الزبير

    كتر خيرك كتير انت واخونا الكريم البشاوي
    وربنا يوفقنا واياكم لفعل الخيرات ومساعده الاخرين
    وربنا يقدرنا ونقيف مع الابرياء ديل ولو بالقليل
    وياريت ما نقيف عند هذا الحد فقط ونستمر بالتواصل معاهم

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s