الساقية لســـه مــدورة

Posted: الأربعاء,16 سبتمبر, 2009 by التركى in إجتماعية

على غير عادته خرج محمود الى العمل مبكرا كأنه على موعد مع الاعنية التى لم يسعفه الزمن بسماعها كاملة البارحة …. ادار المسجل وبدأ يردد (اقول ليها عويناتك ترع لولى وبحار ياقوت …)  … فجأة وجد نفسه وقد استدار (360 درجة) مما كلفه اربعة دقائق ليجد نفسه اما طالبتين عارضا عليهن فضل زاده … رضخت احداهن تحت اصرار صديقتها خاصة وان امطار الامس اصابت المواصلات فى مقتل … جلسن على المقعد الخلفى مما حدا بمحمود التلاعب بالمرآة الداخلية قليلا … لم تبدأ الونسة (بالسودانى) الا بعد منتصف الطريق حيث الحديث عن الامطار والجامعة  مرورا بالسياسة … استطاع محمود بلباقته اقناعهن بالرجوع سويا خاصة وأن ساعة خروجهن تتناسب وزمن عمله  … تكرر الحدث وتوطدت العلاقة حتى انهن يرسلن له رسالة عندما يتأخر ويتصل عليهن ان جد جديد …. خلال تلك الفترة عرف عنهن الكثير اقله انهن على باب التخرج من  كلية عريقة بجامعة عتيقة وهو أول المدعوين .

رزان (بت الشمال) من اسرة  ميسورة … الأخت الوسطى لاخوين كبيرهما يحضر للدكتوراة بأوربا والصغير امتحن للشهادة السودانية هذا العام … شتزف الى ابن خالتها المغترب حال تخرجها  … (ملحت) كثيرا لكنها لم تقم بعمل يغضب الله أو يهز ثقتها بنفسها اولا  ثم اسرتها ثانيا …

هيام (بت الجزيرة) من اسرة مستورة … وحيدة امها وابوها (تماما مثل والدتها) … توفى عنها ابوها المغترب آنذاك وهى طفلة مما حدا بأمها الاشتغال بالتدريس وايصالها لما هى عليه الآن … لم (تملح) فى حياتها وكانت رافضة تماما لذلك الا أنها لم تشعر بالرهبة التى كانت تتوقعها عند صعودها  سيارة غريب لاول مرة … شديدة القلق على مستقبل زواجها من زميلها وتعزى ذلك الى  نقاش حاد بين جدها (من امها) ووالدتها  حسمته الأخيرة بعبارة ( لن اسمح لكائن كان بدفن ابنتى حية كما فعلتم بى) …. مما اضطر امها لسرد حكايتها مع زميلها وكيف انهم زوجوها ابن عمها المرحوم رغما عنها  … وانحدرت دمعة على خدها لن تعرفها هل على المرحوم زوجها ام على حبها الفانى المتجدد …

أخيرا قرر محمود طرح السؤال الذى ظل يؤرقه اياما وليالى …. بعد نزولهن  نادى على هيام , انتى ياهيام قلتى لى من وين فى الجزيرة ؟ … ماقلت ليك لكن انا من حوش ناس على ابو النور !!!!  بعدها لم يسمع عبارات الوادع اليومية ولم يدر وهو يمر على اقرب مركز توزيع وشراء شريحة جديدة وفى الصباح غير طريقه الى المكتب …

خاف الا يتمالك نفسه يوما ما ويبوح لها بأنه من نفس المنطقة بل من نفس (الحلة) وأنه كان (مقنول) فى حوش على ابو النور بل ان وحيدتهم هى السبب فى هجر قريته لاكثر من ربع قرن وأن هيامه بها هو السبب فى عدم زواجه الى الآن  وأنه ما تعرف اليهن الا بالحاح من الحاسة السادسة وأنها صورة طبق الاصل لماضى ولى ولم يمت  وأنه … وأنه ….

والساقية لسه ولسه لسه مدورة

والسؤال هو : هل يذهب الى حفل التخريج ام الزفاف ام الاثنين معا وكيف يتصرف ؟

Advertisements
تعليقات
  1. الزهراء كتب:

    قمه في الروعه
    لك التحيه اخونا التركي

  2. مُخير كتب:

    لكن يا أبو الأتراك ما تقول لي
    كتابتك لذيذة وزي الحلم ومع السطر الأخير تخلي الواحد يقول اللهم أجعله خير، عموماً طلعت فعلاً تركي وقاص يعني قصاص تركي بس نسخة سودانية اللون والطعم والرائحة ومشروع قاص كبير بقامة اورهان باموك وعزيز نيسين وغيرهم من عمالقة القصة الأتراك.
    واصل إبداعك بعد هروب الشمباتي من زاوية القصة

  3. التركى كتب:

    الشكر اجزله للاخت الزهراء وفقنا الله واياكم وكل سنة وانتو
    بخير …

    مخير : لك الود والاحترام بقامة من ذكرت من الكتاب الكبار
    خاصة عزيز نيسين الكاتب االساخر الفيلسوف … فعلا
    الحكاية سودانية مية المية … بس انتو الاتنين ماقلتو
    لى اخونا الكاشف يعمل شنو … الحبيب شمباتى ما
    هرب بس لسه فى بيات رمضانى والقصة دى بتجيبو
    جرى له الاشواق … عيدا مبارك وكل سنة والجميع
    فى خير ومحبة …

  4. حاج أحمد السلاوى كتب:

    أخونا القاص التركى ..
    قصة رائعة وحبكة أروع..ومن صميم الواقع المعاش فى أمازونيا ..الواحد بيقرأ بين السطور ويحس بالمشهد والصور أمامه ..وفى الحقيقة قصة مشوقة خاصة أن ختامها غير معروف للقارىء مما يجعله متحمساً لإتمام قراءة القصة ليعرف كيف كانت النهاية ( مش زى الأفلام المصرية ..من أول الفيلم والواحد عارف نهاية الفيلم ..!! )..
    وفى إنتظار المزيد من قصص الواقع …
    مع تحياتى لك ولكل الأحبة من حولك ..

  5. مُخير كتب:

    الأخ التركي سلام
    الحبان في كل مكان
    السلام عليكم
    أخوك الكاشف ما في داعي يضيع دقيقة وطوالي يلحق ما تبقى من الزمن الضائع ويجري يحقق مرادو بزواج فتاة أحلامو والدة البنية وحذارى أن يعمل رايح وداير يعوض شبابو الفات ويقوم يتلبط في الشافعة …
    تعرف يا تركي في الحالة دي نحن حنقوم نطلق صفافير شديدة واحتمال نكسر الكراسي ونطلع مظاهرات إحتجاجية … شايف كيف !!!
    نحن ما ضد الفوارق السنية لكن كل زول يشوف ناسو ويلبس مقاسو !!!
    وحرام فراشة في عمر الزهور تدفع فواتير آمال مهشمة وإحباطات !؟؟
    وزي ما قال حاج أحمد السلاوي ترك الخاتمة مفتوحة لفتة بارعة في حد ذاتها وكل زول حيختمها بمزاجو … بس أخشى ما أخشاه أن يتم إبتداع نهاية مأسأوية أو إجرامية أو وحشية تسمم المزاج الرومانسي المنتشر بهدواء كأشعة شمس الصباح في هذا النص الجميل …

    يا أبا وضاح وصلنا أمازونيا ولا شجر الحنة ؟؟؟؟؟؟؟؟؟

  6. د.ياسين شمباتى كتب:

    الحبيب التركى..سلام وشوقى دافر قدامى..

    آآآآآه يا عزيزى التركى,,لقد وضعت مبضعك على جرح مازال حيا ونزفه غزيرا…حكاية الزول يعمل شنو مع حبو الحقيقى والكان راسم ليهو جنة على الارض تحضنو وتشهد نتاجو؟؟ والله ما اقسى قصص الحب البتموت فى بلدنا دى,لانو عندنا الفة فطرية ومحبة مافى اقوى منها,,لانها ما بتعتمد على الكلمات او معسول التعبير,,وانما على الاحساس المتبادل الشفيف..اها زولك دا حقو يمشى التخريج,,وكمان العرس لو اتمكن..لانو انا مشيت العرس !!!

    عذرا ان جاءت الكلمات مبتورة والتعبير ضعيف,,لكنى والله انزف الآن..

  7. د.ياسين شمباتى كتب:

    الحبيب مخير..شكرا على السؤال..والله انا ما زغت,,بس لقيت نفسى براى وانتو بتتلبدوا من بعيد لبعيد..اظهر وبان..

    ابونا السلاوى بيتحرك بعد بكرة باذن الله مساءا..واليوم باذن الله مساءا سيصل امازونيا حبيبنا واخونا ود الفتيحاب(ود الفبة)..

    وكل سنة وانت طيب….

  8. التركى كتب:

    كبيرنا حاج السلاوى : كلماتك بلسم وليها وقع خاص .. وآمل أن اوفق فى كتابة المزيد .. وكل سنة وانت والاخوان بالمملكة بخير مع الامنيات الخالصة للاسرة بدوام الصحة والعافية ..

    زميل مخير : شكرا على المشاركة وكسير الكراسى دا كان الاسبوع الفات (مع الاعتذار) … بلادى وان جارت عليا عزيزة

  9. التركى كتب:

    ماقلت ليك يامخير شمباتى هسع بظهر هههههههه ….

    د.شمباتى : لك الشوق اكمله والود اجزله ياخ والله مشتاقين شوق مابعرف ظروفك …. قلت لى مشيت غنيت ليهم (فى الليلة ديك) ؟ يلا نحن فى انتظار ابداعاتك ياقلب … تعرف انا مما جيت البلد دى بسمع فى قصص مش ممكن تتصورها … بس الله غالب…

    الف مرحب بالاخوين بيننا وكل سنة والجميع على اتم صحة وعافية ومتلمين فى الحرم ياررررررررررب

  10. البشاوى كتب:

    التركى
    الابداع بقى يمرق حبة حبة
    كم من توصيلة فضل الظهر نمت وكبرت وصارت أسرة وكم من توصيلة فضل ظهر تاهت وضاعت بين أرجل اللئام وذهبت ريحها الى الخور ومن ثم الى المايقوما
    بالله عليك أنكأ جراحنا كل يوم حتى نستبين الضياء وسط التحركات الانسانية للناس الطيبين ودالزبير \ د|عزت \ أفليقا\
    أب أحمد وبقية العقد

  11. aflaiga كتب:

    التركى : نحنا بنفرز الابداع من مسيره ميل ولمن جيتنا شمينا ريحتك عرفنا الريحه ريحه مبدع بدون ما نقول ليك قول كح !!! وما خزلتنا طلعت لاطى ابداع لى هنا !!!
    صديقى س ( اها قمنا ) تزوج من ابنة حبه الاول برغم فتوى قاضى العشق بكراهة الجمع بين العشقين !!! وكانت مشكلتو لمن العشق الجديد يقول ليهو ارح ناس امى !!!!! فسجل صيدقى اول اعتارض لمبدا ارح ناس امى بغير الاسباب المعروفه للجميع !!!!
    افتنا يا مخير فى الجمع بين العشقين لانه تشابه علينا البقر .
    تعرف يا بشاوى كم من توصيله اوصلت صاحبها للقفص اجابه صحيحه ميه ميه ..
    صديقى ص اصطحب يوما بعض طالبى فضل الظهر وبدا فى التغزل من ( شعرك دفة الليل ) وكان بمعيته صديقنا ك الذى استنكر البداية البعيده !!!
    شباب : بالله كدى ورونا رايكم شنو فى فضل الظهر المؤدى للماذون ؟؟؟ يعنى اسى لو اختلفت معاها وقالت ليك رجعنى محل انقذتنى ترجعا شارع العرضه ؟؟؟

  12. aflaiga كتب:

    ود الزبير – بشاوى – خشينا الشبكه جاهزين للشير الليله والهديمات باكر ..

  13. سهيل كتب:

    الله ينور عليك يا التركي .. وعلى باقي الاحباب..

    مخير عمل نظام (قطعت جهيزه قول كل خطيب).. و جاب ليك من الآخر ..

    قلتا لي حوش علي ابو النور دا بيمشو ليهو بي وين ؟ ولا اقول ليك نمشي التخريج احسن..

    حبيبنا يس : اللهم اجره في مصيبته و اخلف له خيرآ منها .. تأكد تماما ان ما حدث إنما هو لخير و ربنا عايز ليك السمح.. طول بالك .. لكن ماقلت لي” في الليله ديك ” فبل و لا بعد ام الطيور.. طلعت ابو الدفان و برلمتنا انا و اب احمد

  14. aflaiga كتب:

    سهيل : سريع قطن وشاش ولزقه ورباط ضاغط لشمباتى البيزنف – يا ود يا شمباتى خليك زى اخوك سهيل نزيفك داخلى ما بيظهر الا فى الرنين المغنطيسى وبعد مرات فى الرنين ذاتو ما بيظهر ..
    شمباتى بى ريدو النضيفو
    ربنا يوقف نزيفو
    ويدى قدرة يكون مفتح
    يعرف الجد جد وزيفو

    شمباتى انت الطب لسه ما اكتشف اجهزة بتعاين للزول من جوه تورى انو كضاب ولا صادق فى مشاعرو ؟؟ ولنسمها الاشعه فوق المشاعرية ولا الرنين الحسيسى للمشاعر الدسيسى !!!
    بعد مرات بيظهر فى الدم مش ؟؟ اللهم الا اذا كان الطرف التانى ما عندو دم اساسا !!!
    سجمنا الدكاتره بينزفو طيب نحنا نسوى شنو ؟؟؟

  15. الزهراء كتب:

    اخي التركي
    انا شايفه انو اخونا دا مادام قلبو رهييف لدرجة تركه للحله بسبب حبه الاول ما في داعي يوجع قلبه ويمشي لا تخريج ولا عرس وزي ما قال مخير احسن يكسب زمنو
    د/شمباتي: يا اخوي ياااحليلك يا المافي زيك حقيقه انت فريد من نوعك
    اغلب الناس بقوا يمشوا العرس وكمان سايقين البديل لزوم قشره وكده
    وحقيقه انا عاذراك لانك مشاعرك كانت صادقه جدا-
    لكن ما فتحت عليك باب تاني صعب يتقفل كان تعمل نايم

  16. البشاوى كتب:

    الجماعة ديل الا يقومو الكتاحة دى أنا بعرف من وين الشرارة بتبدأ وهاكم دى
    همسات من ضمير الغيب تشجى مسمعى

    وخيالات الأمانى رفرفت فى مضجعى

    وأنا .. بين ضلوعى .. لا أعى

    عربدت بى هاجسات الشوق أذ طال النوى

    وتوالت ذكرياتى .. عطرات … بالهوى

    كان لى فى عالم الغيب غرام … وأنطوى

    كان لى فى الأمس أحلام وشوق وحبيب

    كان للجرح طبيب .. لا يدانيه طبيب

    كان .. ما كان .. وبتنا كلنا ناء غريب

    سكر السمار .. والخمار فى حان الغرام

    وأنا الصاحى أرى فى النور أشباح الظلام

    وغدت كأسى على راحى.. بقايا من حطام

    عادنى الوجد الى ليلى … وكأسى المترع

    وسعير الحب يشقينى … ويشقى مضجعى

    ولهيب الشوق يدعونى فهل أنت معى ؟؟؟؟

  17. aflaiga كتب:

    الزهراء : شمباتى ده ود رهيف المشاعر مرهف الاحاسيس واى زهره فى اى روضه تتمناهو بس الايامات دى الرياض علمو ليها خفراء وبوابين بيدسو الحاجات السمحه بالشدر الكبار الفى السور والشوك والسلك الشايك .. ليته كان فراشه فيطير فوق الاسوار – لكن البلد دى ليها زمن ما بيطير فيها غير القمرى ويرك فى الزنكى ويتصنت القضيه … قسمة الزهور ان يقطفها الجناينى بعربية القص بينما الفراش حاير فى سماهو وقسمة الفراش ان يحترق ويختنق بدخان نار حريق الزهر فى الكوشه الخلفيه لحديقة الحيوان … ولله فى خلقه شئون .. فهمتو حاجه ؟؟ ولا انا !!!

  18. aflaiga كتب:

    مشهد سغنتوتى :
    هو : معقوله انتى ؟؟ لالا ما ممكن ؟؟
    هى : ليه ما معقول ؟ الما معقول انك تلقانى ولا انى موجوده لسه ؟؟
    هو : الما معقول انو القى الما مفروض يتلقى ..
    هى : وليه ما مفروض ؟؟
    هو : مش ما مفروض كلوكلو – لكن ليه بالذات اسى ؟؟
    هى : وليه ما اسى بالذات انت خايف من اسى ولا خايف من امبارح يشيل اسى ؟؟
    هو : انا خايف من بكره يشيل الليله وامبارح ..
    هى : ممكن عادى تنسى الليله زى كانو ما كان .
    هو : لو بنسى الليله كان نسيت امبارح .
    هى : حيرتنى انت عاوز بكره بطعم امبارح ولا ماك عارف بالمره ؟؟
    هو : ااه انا انا ااه انا ااااااه .
    هى : انت خايف تتحدى ؟؟
    هو : انا خايف انى ابدا .
    هى : بما انك زى ما خليتك اخر مره متردد ومرتبك مع السلامه ..
    هو : لكن .. لا بس .. لو ممكن …
    هى : لسه انتا زى ما انت حتى ما قادر تكاتل عشان امبارح …
    كسره : واتلاقو بكره وكان هو يتابط بكره وهى تتابط بكره اخر وضحكا ربما ضحكا على امبارح او ضحكا فى بكره لا يهم …

  19. البشاوى كتب:

    افليقا
    الكلاام القلتو فى ولدنا شمباتى دة كووووووووولو صاح رقة وذوق وفهم
    لكن التكسر والترضرض دة جبتو ليهو من وين ؟ لحدى الاجازة الاخيرة دى ماكان ظاهر عليهو ! ولا شنو رايك ياســـــــــــــــــــــــــــــــــــهيل

  20. التلب كتب:

    الأخ التركى لكن ما إبدااااااع عديييييل كده. تسلم يا راقى.
    دكتور شمباتى خليك صنديد و شوف ليك طريقة وقف النزيف ده. و زى ما قال أفليقا إذا كان الدكاترة بينزفوا نحنا نسوى شنو؟؟
    كل عام و أنتم بخير

  21. السلام عليكم ورحمة الله وبركاته
    تقبل مرورى وتقديرى واحترامى لإبداعك الراقى
    أخوك
    محمد الجرايحى / مصر

  22. التركي و السمار الأعزاء سلام

    الله يقطع الاجتماعات و “ظروفها” بالله يا دوب جيت لقيت باب الغرام فاتح و دخلت….. و ما شاء الله لقيت الحفلة مدورة و التخريج قاعدين البلوم يختاروا في اللبسات و الأغاني بتاعتو…و بطلنا محتار يمشي وين……

    فعلا قصة محيرة

    بالرغم من الزهراء قد قطعت قول كل “خطيب” الا أن هناك من يهو التعذيب…

    يعني نظام “عذبني و تفنن” و بكون صاحبنا داير يشوف تحت تحت كيف كان سيكون حاضره مع وحيدة حوش النور ….

    يعني حيبوس يدينو وش و ضهر و الا غير….

  23. ياسين شمباتى كتب:

    الحبيب سهيل..معقولة ابرلمكم يا حبايب؟؟ الكلام دا كان قبل واقعة(ام الطيور) باكثر من 4 سنوات…بس ما جات سيرة لللتفاصيل,,لكن معروف عالميا انى(مجروح مرتين يا مظاليم الهوى)..ربك يستر من التالتة التابتة..

    الحبيب افليقا..انا الحار فى دواى حكما واطبا…..تقول لى جهاز وشنو ما بعررف داك,,خليها بالنية وكتر الدعوات لى حبيبك..

  24. ياسين شمباتى كتب:

    الزهراء..سلام..النصيحة دى ما حاااارة واخير نمرقها..بعدين القلب ما عاد يتحمل زيادة,,قلت تشيلوا معانا شوية..

    افليقا..عملتها ظااااااهرة..لكن الشدر(الكبار) دا اسوى ليهو شنو؟؟ دا راسخ جدا ويانا قاعدين فى(ضلو) وحماهو..

    الحبيب البشاوى..تسلم ياراقى..براك عارف الحاصل..

    التلب..جزيت خيرا على النصح,,لكن انت اتجهجهت قبل كدة ولا لسه؟

  25. البشاوى كتب:

    سهيل الما ساهل
    ناس افليقا ديل حيطلعوك إنت محمود بى شحمو ولحمو خليك مفتح وماتبقى زى المعز محجوب انشغل بى مدافرة وارغو مع ناس دفاع الهلال لامن قلق جاب القون وطبعا إنت عارف قلق بالنسبة ليك منو؟
    وأقوليك زى ماخكى السلاوى عن المسطول اللى بيكتب شعر لما قال:
    كان يحبها كثيرا
    وكانت تحب غيره
    وكان الله يحب المحسنين
    ——————
    خليك انت مع المحسنين احسن ليك
    شمباتى
    والله الكلام كتير واقف لى فى كيبوردى لكن ماداير اشمت فيك الجماعة
    الدم بيحن
    ودالخلا
    انا ماعارفك معاى من زمان بس الله يستر علينا من الكتاحة البيعملا الولد الشقى افليقا

  26. مُخير كتب:

    الدناقوة سلام
    بالله يا تركي شوف سيرة الحب دي خلت الجماهير دي تتجلى وتنداح كيف … ناس أبو البش نكتوا خيالات الأمانى الرفرفت وين ما عارف … وناس ياسين ناس أهرب من قلبي أروح على فين … ليالينا الحلوة في كل مكان … وتعرف من غير مسح ميداني إستطلاع آراء يخيل إلي أن قرابة الـ40% من بني أمازونيا مآخدين شواكيش مع تفاوت درجات الألم والوجع والصدمة والخيبة، لأنها حتماً ليست صدفة أو فجأتن سالت مشاعر الناس جداول،،،،،فالواضح إنو الأخ التركي لمس وتر حساس … خلي الإندياح يحصل … حتى أخونا محمد الجرايحي من شمال الوادي … القصة هبشتو …

  27. الصادق ود البركة كتب:

    السلام عليكم ورحمة الله وبركاته
    أخونا القاص التركى ..
    قصة رائعة وحبكة أروع..ومن صميم الواقع المعاش فى أمازونيا ..الواحد بيقرأ بين السطور ويحس بالمشهد والصور أمامه ..وفى الحقيقة قصة مشوقة خاصة أن ختامها غير معروف للقارىء مما يجعله متحمساً لإتمام قراءة القصة ليعرف كيف كانت النهاية ( وده كلام حاج أحمد عجبني فنقلته)وأنا معاهو

    السلاوي وكل الأحبة كل عام وأنتم بخير ويا السلاوي إن شاءالله تلقى الجميع في البلاد بخير

  28. د.ياسين شمباتى كتب:

    الحبيب الصادق..نهارك طيب..انت لسه حايم بهناك؟؟ ابقى مارق واغشانا..

  29. التركى كتب:

    أحبائى كل عام وانتم بخير …. لعطل فنى لم استطع أن ارد على تعليقاتكم طيلة الفترة السابقة …. فعذرا مقدما

    البشاوى : تسلم يادفعة …. قلت آه من جور زمان ….. لكن قصيدتك دى تزبيك قائم بذاته اكيد اصابك سهام اللحظ ….

    افليقا : شكؤا ليك ياامير …. اتمنى ان تكون كلماتى عليكم زى مكرونة نوبا (اخطها فى دقايق وتهضموها فى ثوانى) … وكم من فضل ظهر قد قصم ظهرا …. بينى وبينك الطريق الى المأذون شالبو السيل وتعددت السبل شئ عرفى وشئ مسيار وشئ عن طريق النت وشى شنو داك مابعرف بس كل واحد شاقى ليهو طريق وماشى فى النهاية بتلاقو بس وين وكيف العلم عند الله ….. عشان كدة لا فى بت بتقول لراجلها رجعنى محل مااخدتنى ولا فى ولد بديها الفرصة دى …. هو وهى رائعة ولك الشكر ….

    سهيل : لك الود ياغالى … بيت ناس على ابوالنور بوديك محل ناس اولاد الدويلى الشرقو وغربو ثم لحقو امات طه وانت غالى عليا مابرضاها ليك…

    الزهراء : شكرا ليك على المشاركة الرائعة …. بس ياشمباتى ماتستعجل انتظر النهاية ….

    التلب : شكرا ليك ياجميل ودا من ذوقك ياراقى ….

    ود الخلا : سعالك من العينة (صغير حجمها ) كبير معناه يكتر السمار ويلعثم اللسان … اصلو محمود دا …. يعنى محمود دا … هو محمود دا …. جا حكى وقام بكى ثم انتكأ وترنم (يانديمى دعك من عثرات قولى واترع الكأس وناجى الكون مثلى) …. ياريت لو كان التركى

    محمد الجرايحى : اهلا بيك بيننا ياصديقى وأشكرك على كلامك الرائع … كل عام وانت بالف خير

  30. د.عزت : منور ياغالى وياريت من أول وريتنا انك يمكن تتأخر … أها توصية الاجتماع اكنت شنو ماشى التخرج ولا الزفاف ؟ … نعم الاخت الزهراء والزميا مخير جابوها من الآخر.

    د.شمباتى : جرحك ابيض ياحبيب وبقولو جرح الحبيب مايصيب الا اللبيب …. بس التلب دا يظهر انو تلب من قطار الغرام قبل محطة الشواكيش بشوية كدة …

    بيشاوى : يادفعة هو سهيل براهو طبعا انت عارف حكاية … أحببتها فأحبت غيرى وأحب غيرى غيرها …. استر يارب

    مخير : تعرف ياغالى فى كل منا محمود بداخله وان لم يكن محمودا ….. وماخفى أعظم .

    مدالبركة : يابركة دعواتك مع ايام العيد دى وشكرا جزيلا على الاطراء الجميل دا .

    ودالخلا : ههههه ومنو القال انو محمود دا ماانت ؟؟ …
    (واضمن لعمري النجاة لو طيف خيالك لي جا) .. ياخ لكن دى بالغت فيها عدييييييل ومال لو خيالها جا كان ح يحصل شنو ؟
    معك حق وكمان كل واحد فينا ريدته المودره جنبه بس كالعادة مافينا حد بتمعن فى (نخرته) لدرجة وصفها بدقة … ونقرن تحايانا وامنياتى العذبة للزميل ابكرونا ايضا …. لك الود والاحترام

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s